1.‏ کجھ بھین بھراواں نُوں مُنادی چ دُوجیاں نال گل کرنا کیہو جیہا لگدا اے؟ (‏تصویر نُوں وی ویکھو۔)‏

 اَسی مُنادی ایس لئی کرنے آں کیونکہ اَسی اپنے اسمانی باپ نال محبت کرنے آں تے چاہنے آں کہ دُوجے وی اوہدے دوست بنن۔ کئی مبشراں نُوں مُنادی دے کم چ حصہ لے کے بڑا مزہ آندا اے۔ پر کجھ نُوں مُنادی کرنا اوکھا لگدا اے۔ کیوں؟ کیونکہ کجھ مبشر بوہت شرمیلے نیں تے اوہناں نُوں لگدا اے کہ اوہ چنگے اُستاد نئیں نیں۔ کجھ نُوں بن بلا‌ئے لوکاں دے گھر جانا عجیب لگدا اے۔ کجھ ایس گلوں ڈردے نیں کہ لوک اوہناں دا پیغام قبول نئیں کرن گے یاں اوہناں نال بحث شروع کر دین گے۔ ایہہ بھین بھرا یہوواہ نُوں دِلوں پیار کردے نیں۔ پر اوہناں نُوں اجنبیاں نُوں خوش‌خبری سُنانا مشکل لگدا اے۔ ایہدے باوجود اوہ ایس کم چ باقاعدگی نال حصہ لیندے نیں کیونکہ اوہ جان دے نیں کہ ایہہ کم کِنّاں اہم اے۔ ایہہ ویکھ کے یہوواہ یقیناً بوہت خوش ہوندا اے۔‏

2.‏ جے توانوں مُنادی کرنا مشکل لگدا اے تے توانوں بے‌حوصلہ کیوں نئیں ہونا چاہی دا؟‏

² کیہہ کدی کدی توانوں وی ایہناں گلاں دی وجہ توں مُنادی کرنا مشکل لگدا اے؟ جے ہاں تے ہمت نہ ہارو۔ جے توانوں لگدا اے کہ تُسی چنگے اُستاد نئیں او تے ایہدے توں ظاہر ہوندا اے کہ تُسی خاکسار او تے دُوجیاں دا دھیان اپنے وَل کِھچنا نئیں چاہندے تے نہ ای کسے بحث چ پینا چاہندے او۔ ظاہر اے کہ کوئی وی نئیں چاہندا کہ دُوجے اوہدے تے غصہ کرن، خاص طور تے اوہدوں جدوں اوہ اوہناں دی مدد کرن دی کوشش کر رہیا ہوئے۔ یقین رکھو کہ تواڈا اسمانی باپ جان دا اے کہ تُسی کیہڑیاں مشکلاں دا سامنا کر رہے او تے اوہ تواڈی مدد کرنا چاہندا اے۔ (‏یسعیاہ 41:‏13‏)‏ ایس  مضمون چ اَسی پنج مشوریاں تے غور کراں گے تاکہ اَسی ایہناں مشکلاں نال نبڑ سکئے تے مُنادی چ اپنی خوشی نُوں ودھا سکئے۔‏

خدا دے کلام توں ہمت پاؤ

3.‏ کیہڑی چیز نے مُنادی کرن چ یرمیاہ نبی دی مدد کیتی؟‏

³ پرانے زمانے چ جدوں خدا دے بندیاں نے کوئی مشکل ذمے‌داری پوری کرنی ہوندی سی تے خدا دے کلام توں اوہناں نُوں بڑی ہمت مِلدی سی۔ ذرا یرمیاہ نبی دی مثال تے غور کرو۔ جدوں یہوواہ نے اوہنوں مُنادی کرن دی ذمے‌داری دِتی تے اوہ گھبرا رہیا سی۔ یرمیاہ نے کہیا:‏ مَیں بول نئیں سکدا کیونکہ مَیں تے بچہ واں۔ (‏یرمیاہ 1:‏6‏)‏ اوہنے اپنے ڈر تے قابو کیویں پایا؟ اوہنوں خدا دے کلام توں ہمت مِلی۔ اوہنے کہیا:‏ تیرا کلام میرے دل چ بَلدی اَگ وانگوں اے تے مَیں ایہنوں روکدا روکدا تھک گیا واں۔ (‏یرمیاہ 20:‏8، 9‏)‏ بھانویں کہ لوک یرمیاہ دی سخت مخالفت کر رہے سن پر یہوواہ نے اوہنوں جیہڑا پیغام سُنان لئی کہیا سی اوہدے توں ای اوہنوں مُنادی کرن دی ہمت مِلی۔‏

4.‏ خدا دے کلام نُوں پڑھن تے ایہدے تے سوچ‌وچار کرن دا کیہہ فائدہ ہوندا اے؟ (‏کُلسّیوں 1:‏9، 10‏)‏

⁴ مسیحیاں نُوں خدا دے کلام توں بڑا حوصلہ مِلدا اے۔ پولُس رسول نے کُلسّیوں دے ناں خط چ لکھیا کہ صحی علم حاصل کرن نال مسیحیاں دے دل چ ”‏یہوواہ نُوں خوش کرن تے ہر طرحاں دا چنگا کم کرن“‏ دی خواہش پیدا ہوئے گی۔ ‏(‏کُلسّیوں 1:‏9، 10 نُوں پڑھو۔)‏ ایہناں چنگے کماں چ خوش‌خبری دی مُنادی کرنا وی شامل اے۔ جدوں اَسی خدا دا کلام پڑھنے آں تے ایہدے تے سوچ‌وچار کرنے آں تے یہوواہ تے ساڈا ایمان ہور مضبوط ہو جاندا اے۔ نالے اَسی چنگی طرحاں سمجھ جانے آں کہ لوکاں نُوں بادشاہی دا پیغام سُنانا کِنّاں اہم اے۔‏

5.‏ اَسی کیہہ کر سکنے آں تاکہ سانوں بائبل پڑھن توں زیادہ فائدہ ہوئے؟‏

⁵ خدا دے کلام توں پورا فائدہ حاصل کرن لئی ضروری اے کہ تُسی ایہنوں پڑھن چ کالھی نہ کرو سگوں وقت کڈھ کے ایہدے تے سوچ‌وچار کرو۔ جے توانوں کسے ایت چ لکھی گل سمجھ نئیں آ رہی تے ایہنوں سمجھن لئی تحقیق کرو۔ تُسی اُردو زبان چ کتاب ‏”‏یہوواہ کے گواہوں کے لئے مطالعے کے حوالے“‏ دی مدد نال اوس ایت دی وضاحت لبھ سکدے او۔ جے تُسی بائبل پڑھن تے ایہدے تے سوچ‌وچار کرن لئی وقت کڈھو گے تے ایس گل تے تواڈا یقین ودھ جائے گا کہ خدا دے کلام چ لکھی ہر گل بالکل سچ اے۔ (‏1-‏تھسلُنیکیوں 5:‏21‏)‏ جِنّاں زیادہ تواڈا یقین ودھے گا اوناں ای زیادہ توانوں سکھیاں ہوئیاں گلاں دُوجیاں نُوں دَسن چ مزہ آئے گا۔‏

چنگی تیاری کرو

6.‏ سانوں مُنادی لئی چنگی تیاری کیوں کرنی چاہی دی اے؟‏

⁶ جے تُسی مُنادی لئی چنگی تیاری کرو گے تے تواڈے لئی دُوجیاں  نال گل کرنا اسان ہوئے گا۔ یسوع نے اپنے شاگرداں نُوں مُنادی چ گھلن توں پہلاں اوہناں نُوں تیار کیتا۔ (‏لُوقا 10:‏1-‏11‏)‏ یسوع دِیاں ہدیتاں تے عمل کرن دی وجہ توں شاگرداں نُوں ایہہ کم کر کے بڑی خوشی مِلی۔—‏لُوقا 10:‏17‏۔‏

7.‏ اَسی مُنادی لئی تیاری کیویں کر سکنے آں؟ (‏تصویر نُوں وی ویکھو۔)‏

⁷ اَسی مُنادی لئی تیاری کیویں کر سکنے آں؟ اَسی پہلاں توں سوچ سکنے آں کہ اَسی پاک کلام دِیاں سچائیاں لوکاں نُوں اپنے لفظاں چ کیویں سمجھانواں گے۔ ایہہ وی چنگا ہوئے گا کہ اَسی دو یاں تِن ایہو جہیاں گلاں بارے سوچئے جیہڑیاں اکثر ساڈے علاقے دے لوک پچھدے نیں۔ نالے ایہہ وی سوچئے کہ اَسی ایہناں دا جواب کیویں دَواں گے۔ فیر جدوں اَسی لوکاں نُوں ملنے آں تے اَسی کوشش کرسکنے آں کہ اَسی پُر سکون رہیے، مسکرائیے تے دوستاں وانگوں گل کرئیے۔‏

8.‏ مسیحی کیس لحاظ نال مٹی دے بھانڈیاں وانگوں نیں؟‏

⁸ پولُس رسول نے مُنادی دے کم چ ساڈی ذمے‌داری بارے سمجھان لئی اِک مثال دِتی۔ اوہنے کہیا:‏ ساڈے کول مٹی دے بھانڈیاں چ ایہہ خزانہ اے۔ (‏2-‏کُرنتھیوں 4:‏7‏)‏ ایہہ خزانہ کیہہ اے؟ ایہہ خزانہ بادشاہی دی مُنادی دا کم اے جدے ذریعے لوکاں دِیاں جاناں بچ سکدیاں نیں۔ (‏2-‏کُرنتھیوں 4:‏1‏)‏ نالے مٹی دے بھانڈے کیہہ نیں؟ ایہناں دا اشارہ خدا دے خادماں وَل اے جیہڑے لوکاں نُوں خدا دی بادشاہی دی خوش‌خبری سُناندے نیں۔ پولُس دے زمانے چ کاروبار کرن والے لوک اپنیاں قیمتی شیواں جیویں کہ کھانا، مے تے پیسہ اِک جگہ توں دُوجی جگہ کھڑن لئی مٹی دے بھانڈے استمال کردے سن۔ ایسے طرحاں یہوواہ نے سانوں خوش‌خبری دا قیمتی پیغام سُنان دی ذمے‌داری دِتی اے۔ نالے یہوواہ سانوں طاقت وی دیندا اے تاکہ اَسی اوہدا پیغام لوکاں تک پونچا سکئے۔‏

دُعا چ دلیری منگو

9.‏ اَسی انساناں دے ڈر تے قابو کیویں پا سکنے آں؟ (‏تصویر نُوں وی ویکھو۔)‏

⁹ جے کدی کدار سانوں ایس گلوں ڈر لگدا اے کہ لوک ساڈا پیغام نئیں سُنن گے یاں ساڈی مخالفت کرن گے تے اَسی ایس ڈر تے کیویں قابو پا سکنے آں؟ ذرا غور کرو کہ جدوں رسولاں نُوں مُنادی کرن توں سختی نال منع کیتا گیا تے اوہناں نے کیہڑی چیز لئی دُعا کیتی۔ انساناں دے ڈر تے قابو پان لئی اوہناں نے یہوواہ توں دلیری منگی تاکہ اوہ اوہدا پیغام سُناندے رہن۔ یہوواہ نے فوراً اوہناں دی دُعا دا جواب دِتا۔ (‏اعمال 4:‏18،‏ 29،‏ 31‏)‏ جے کدی کدار سانوں وی انساناں دے ڈر دی وجہ توں مُنادی کرنا مشکل لگدا اے تے سانوں وی یہوواہ توں دُعا کرنی چاہی دی اے۔ یہوواہ توں مدد منگو کہ لوکاں لئی تواڈا پیار تواڈے دل چوں انساناں دا ڈر مٹا دَوے۔‏

10.‏ یہوواہ گواہی دین چ ساڈی مدد کیویں کردا اے؟ (‏یسعیاہ 43:‏10-‏12‏)‏

¹⁰ یہوواہ نے سانوں اپنے گواہواں دے طور تے چُنیا اے تے اوہ وعدہ کردا اے کہ اوہ ساڈی مدد کرے گا تاکہ اَسی دلیری نال گواہی دے سکئے۔ ‏(‏یسعیاہ 43:‏10-‏12 نُوں پڑھو۔)‏ چار گلاں تے غور کرو جنہاں دے ذریعے اوہ ساڈی مدد کردا اے۔ پہلی گل، جدوں وی اَسی مُنادی کرنے آں تے یسوع ساڈے نال ہوندا اے۔ (‏متی 28:‏18-‏20‏)‏ دُوجی گل، یہوواہ فرشتیاں دے ذریعے ساڈی مدد کردا اے۔ (‏مُکاشفہ 14:‏6‏)‏ تیجی گل، یہوواہ سانوں اپنی پاک روح دیندا اے جیہڑی اِک مددگار وانگوں سانوں اوہ گلاں یاد دَواندی اے جیہڑیاں اَسی سکھیاں نیں۔ (‏یوحنا 14:‏25، 26‏)‏ چوتھی گل، یہوواہ نے سانوں بھین بھرا دِتے نیں جیہڑے ایس کم چ ساڈا ساتھ دیندے نیں۔ یہوواہ خدا تے بھین بھراواں دی مدد نال اَسی دلیری نال گواہی دے سکنے آں۔‏

لوکاں دے مطابق اپنے پیغام نُوں ڈھالو تے صحی سوچ رکھو

11.‏ مُنادی چ تُسی زیادہ توں زیادہ لوکاں نُوں کیویں مِل سکدے او؟ (‏تصویر نُوں وی ویکھو۔)‏

¹¹ کیہہ تُسی اوہدوں بے‌حوصلہ ہو جاندے او جدوں زیادہ‌تر لوک گھر نئیں مِلدے؟ اپنے آپ کولوں پچھو:‏ ”‏ایس ویلے لوک کتھے ہون گے؟“‏ (‏اعمال 16:‏13‏)‏ ”‏کیہہ اوہ کم تے ہون گے یاں بازار گئے ہون گے؟“‏ جے ایہہ گل اے تے کیہہ تُسی عوامی تھانواں تے جا کے مُنادی کر سکدے او؟ ایہدے بارے جوشوعا ناں دے اِک بھرا نے کہیا:‏ ”‏مینوں بازاراں تے دُوجیاں عوامی تھانواں تے کئی لوکاں نُوں گواہی دین دا موقع مِلیا اے۔“‏ اوہنوں تے اوہدی بیوی بریجٹ نُوں لوک اکثر اوہدوں گھر مِلدے نیں جدوں اوہ شام چ یاں اتوار دی دوپہر نُوں مُنادی کردے نیں۔—‏اِفِسیوں 5:‏15، 16‏۔‏

12.‏ اَسی کیویں پتہ لا سکنے آں کہ لوک کیہہ من دے نیں یاں کیہڑیاں پریشانیاں دا سامنا کر رہے نیں؟‏

¹² جے اِک بندہ شروع شروع چ ساڈے پیغام چ دلچسپی نئیں لیندا تے ایہہ پتہ لان دی کوشش کرو کہ اوہ کیہہ من دا اے یاں اوہ کیہڑیاں پریشانیاں دا سامنا کر رہیا اے۔ بھرا جوشوعا تے بھین بریجٹ لوکاں نال گل بات شروع کرن لئی اوہ سوال استمال کردے نیں جیہڑے ساڈے پرچیاں دے پہلے صفحے تے دِتے گئے ہوندے نیں۔ مثال لئی، جدوں اوہ پرچہ ‏”‏تُسی بائبل بارے کیہہ سوچدے او؟“‏ نُوں استمال کردے نیں تے اوہ لوکاں نُوں پچھدے نیں:‏ ”‏کجھ لوک سوچدے نیں کہ بائبل خدا دا کلام اے پر کجھ ایہہ نئیں من دے۔ تواڈا ایس بارے کیہہ خیال اے؟“‏ اِنج اوہ لوکاں نال گل بات شروع کرن چ کامیاب ہوئے نیں۔‏

13.‏ جے لوک ساڈا پیغام نئیں سُن دے تے سانوں ایہہ کیوں نئیں سوچنا چاہی دا کہ اَسی ناکام ہو گئے آں؟ (‏اَمثال 27:‏11‏)‏

¹³ بھانویں مُنادی چ لوک ساڈی گل سُنن یاں نہ سُنن ایس کم چ حصہ لے کے اَسی اپنا مقصد پورا کر لیا اے۔ اَسی ایہہ ایس لئی کہہ سکنے آں کیونکہ اَسی اوہ کم کیتا اے جیہڑا یہوواہ تے یسوع چاہندے نیں یعنی اَسی لوکاں نُوں گواہی دِتی اے۔ (‏اعمال 10:‏42‏)‏ جدوں سانوں مُنادی چ کسے نال گل کرن دا موقع نئیں مِلدا یاں کوئی وی ساڈا پیغام قبول نئیں کردا تے فیر وی اَسی خوش ہو سکنے آں کیونکہ اَسی جاننے آں کہ ساڈا اسمانی باپ ساڈے توں خوش اے۔‏‏—‏اَمثال 27:‏11 نُوں پڑھو۔‏

14.‏ سانوں اوہدوں وی خوش کیوں ہونا چاہی دا اے جدوں کسے ہور مبشر نُوں اِک ایہو جیہا بندہ مِلدا اے جیہڑا پاک کلام بارے ہور سکھنا چاہندا اے؟‏

¹⁴ اَسی اوہدوں وی خوش ہو سکنے آں جدوں کسے ہور مبشر نُوں کوئی ایہو جیہا بندہ مِلدا اے جیہڑا پاک کلام بارے سکھنا چاہندا اے۔ اِک ‏”‏مینارِنگہبانی“‏ چ دَسیا گیا سی کہ مُنادی دا کم اِک گواچے ہوئے بچے نُوں لبھن ورگا اے۔ جدوں اِک بچہ گواچ جاندا اے تے بوہت سارے لوک فرق فرق علاقیاں چ جا کے اوہنوں لبھدے نیں۔ جدوں بچہ لبھ جاندا اے تے صرف اوہی بندہ خوش نئیں ہوندا جنہے اوہنوں لبھیا سی سگوں سارے خوش ہوندے نیں۔ ایسے طرحاں شاگرد بنان دا کم وی ساری کلیسیا مِل کے کردی اے۔ کلیسیا دے سارے علاقیاں چ مُنادی کرن لئی سارے مبشراں دی ضرورت ہوندی اے۔ ایس لئی جدوں کوئی ساڈیاں عبادتاں تے آن لگ پیندا اے تے کلیسیا چ سارے بھین بھرا خوش ہوندے نیں۔‏

یہوواہ تے لوکاں لئی پیار—‏مُنادی کرن دی اہم وجہ

15.‏ متی 22:‏37-‏39 تے عمل کرن نال مُنادی لئی ساڈا جوش کیویں ودھ سکدا اے؟ (‏تصویر نُوں وی ویکھو۔)‏

¹⁵ جدوں اَسی یاد رکھنے آں کہ اَسی یہوواہ تے لوکاں نال پیار دی وجہ توں مُنادی کرنے آں تے ایس کم لئی ساڈا جوش ودھ جاندا اے۔ ‏(‏متی 22:‏37-‏39 نُوں پڑھو۔)‏ ذرا سوچو کہ یہوواہ اوہدوں کِنّاں خوش ہوندا اے جدوں اوہ ویکھدا اے کہ اَسی مُنادی کر رہے آں۔ نالے سوچو کہ اوہ لوک کِنّے خوش ہون گے جنہاں نال اَسی بائبل کورس شروع کراں گے۔ یاد رکھو کہ جیہڑے لوک ساڈا پیغام قبول کردے نیں اوہناں نُوں ہمیشاں دی زندگی مِل سکدی اے۔—‏یوحنا 6:‏40؛‏ 1-‏تیمُتھیُس 4:‏16‏۔‏

16.‏ اَسی مُنادی چ اپنی خوشی اوہدوں وی کیویں قائم رکھ سکنے آں جدوں اَسی گھروں باہر نئیں نکل سکدے؟ کجھ مثالاں دَوو۔‏

¹⁶ کیہہ تواڈے لئی کسے وجہ توں گھروں باہر جانا مشکل اے؟ تُسی فیر وی یہوواہ تے لوکاں لئی پیار وکھا سکدے او۔ کورونا دی وبا دے دوران  بھرا سموئیل تے بھین دانیا گھروں باہر نئیں نکل سکدے سن۔ ایس مشکل دے باوجود اوہ باقاعدگی نال فون دے ذریعے تے خط لکھ کے لوکاں نُوں گواہی دیندے رہے تے اوہناں نے زوم دے ذریعے بائبل کورس کروائے۔ بھرا سموئیل کینسر دے علاج لئی جیہڑے ہسپتال چ جاندا سی اوہنے اوتھے وی لوکاں نُوں گواہی دِتی۔ اوہنے کہیا:‏ ”‏مشکلاں دی وجہ توں اَسی پریشان ہو جانے آں، تھک جانے آں تے ساڈے ایمان دا اِمتحان وی ہوندا اے۔ پر سانوں یاد رکھنا چاہی دا اے کہ جے اَسی یہوواہ دی خدمت چ لگے رہواں گے تے اَسی مشکلاں دے باوجود خوش رہ سکاں گے۔“‏ ایسے دوران بھین دانیا ڈِگ پئی۔ اوہ تِن مہینیاں تک بسترے توں اُٹھ نئیں سکی۔ ایہدے بعد اوہنوں چھ مہینیاں تک ویل‌چیئر استمال کرنی پئی۔ اوہنے کہیا:‏ ”‏ایہناں حالاتاں چ مَیں جو کجھ کر سکنی ساں، مَیں کیتا۔ مَیں اوس نرس نُوں یہوواہ بارے دَسیا جیہڑی میری دیکھ‌بھال کرن لئی آندی سی۔ نالے مَیں اوہناں لوکاں نُوں وی گواہی دِتی جیہڑے میرے گھر چیزاں پونچاندے سن۔ میری اوس عورت نال وی چنگی گل بات ہوندی سی جیہڑی اِک میڈیکل کمپنی وَلّوں مینوں فون کردی سی۔“‏ ایہہ جوڑا اپنے حالاتاں دی وجہ توں پہلے جِنّی خدمت نئیں کر سکیا۔ پر اوہ دونویں جو کجھ کر سکدے سن، اوہناں نے کیتا تے ایہدے توں اوہناں نُوں بڑی خوشی مِلی۔‏

17.‏ تُسی ایس مضمون چ دِتے مشوریاں توں فائدہ حاصل کرن لئی کیہہ کر سکدے او؟‏

¹⁷ کھانا بنان لئی فرق فرق مصالحے چاہی دے ہوندے اے۔ جدوں سارے مصالحے مکس کیتے جاندے نیں، اوہدوں ای مزےدار کھانا تیار ہوندا اے۔ ایسے طرحاں ایس مضمون چ جیہڑے پنج مشورے دِتے گئے نیں، اوہناں توں سانوں اوہدوں ای فائدہ ہوئے گا جدوں اَسی اوہناں ساریاں تے عمل کراں گے۔ اِنج اَسی اوہناں مشکلاں دا سامنا کر سکاں گے جنہاں دی وجہ توں سانوں مُنادی کرنا اوکھا لگدا اے تے ایس کم چ اپنی خوشی ودھا سکاں گے۔‏