1.‏ یہوواہ ساڈے بارے کیہہ چاہندا اے؟‏

 جدوں کسے میاں بیوی دے گھر بچہ پیدا ہوندا اے تے اوہ بڑے خوش ہوندے نیں۔ بھانویں کہ ماں پیو اپنے چھوٹے بچے نال بوہت پیار کردے نیں پر فیر وی اوہ ایہہ نئیں چاہندے کہ اوہ ہمیشاں بچہ ای رہوے۔ سگوں جے اوہناں دا بچہ ودھدا پھلدا نئیں تے ماں پیو نُوں بڑی فکر ہوندی اے۔ ایسے طرحاں جدوں اَسی مسیح دے پچھے پچھے ٹُرنا شروع کرنے آں تے یہوواہ نُوں بڑی خوشی ہوندی اے۔ پر اوہ ایہہ نئیں چاہندا اے کہ اَسی مسیح دے لحاظ نال ہمیشاں بچے ای رہیے۔ (‏1-‏کُرنتھیوں 3:‏1‏)‏ یہوواہ تے ایہہ چاہندا اے کہ اَسی سمجھ‌دار تے پُختہ مسیحی بنئے۔—‏1-‏کُرنتھیوں 14:‏20‏۔‏

2.‏ ایس مضمون چ اَسی کیہہ سکھاں گے؟‏

² پُختہ مسیحی بنن دا کیہہ مطلب اے؟ پُختہ مسیحی بنن لئی سانوں کیہہ کرن دی لوڑ اے؟ پُختہ بنن چ سخت روحانی کھانا ساڈی کیویں مدد کر سکدا اے؟ نالے اَسی اپنے آپ اُتے حدوں ودھ بھروسا کرن توں کیویں بچ سکنے آں؟ ایس مضمون چ اَسی ایہناں سوالاں دے جواب حاصل کراں گے۔‏

پُختہ مسیحی بنن دا کیہہ مطلب اے؟‏

3.‏ پُختہ مسیحی بنن دا کیہہ مطلب اے؟‏

³ بائبل چ جیس یونانی لفظ دا ترجمہ پُختہ کیتا گیا اے اوہدا مطلب سمجھ‌دار تے مکمل وی ہو سکدا اے۔‏ a (‏1-‏کُرنتھیوں 2:‏6‏)‏ جدوں اَسی روحانی طور تے بچے نئیں رہندے سگوں روحانی لحاظ نال جوان ہو جانے آں تے اَسی اِک طرحاں نال پُختہ مسیحی بن جانے آں۔ پر پُختہ ہو جان دے بعد وی سانوں یہوواہ نال اپنی دوستی نُوں ہور مضبوط کردے رہنا چاہی دا اے۔ (‏1-‏تیمُتھیُس 4:‏15‏)‏ جے اَسی عمر دے لحاظ نال جوان ہو گئے آں تے فیر اَسی روحانی لحاظ نال وی جوان بن سکنے آں۔ پر ایہہ کیویں پتہ چلے گا کہ اَسی اِک پُختہ مسیحی بن گئے آں؟‏

4.‏ اِک پُختہ مسیحی کیہہ کردا اے؟‏

⁴ اِک پُختہ مسیحی خدا دے صرف اوہناں اصولاں تے عمل نئیں کردا جیہڑے اوہنوں پسند نیں سگوں اوہ اوہدے سارے اصولاں دے مطابق زندگی گزاردا اے۔ ایہہ سچ اے کہ اوہدے کولوں وی غلطیاں ہوندیاں نیں پر فیر وی اوہ خدا دی مرضی دے مطابق چلن دی پوری کوشش کردا اے۔ اوہ نوِیں شخصیت پا لیندا اے تے اپنی سوچ نُوں یہوواہ دی سوچ مطابق ڈھالن دی کوشش کردا رہندا اے۔ (‏اِفِسیوں 4:‏22-‏24‏)‏ اوہ یہوواہ دے حکماں تے اصولاں مطابق فیصلے کردا اے۔ ایس لئی اوہنوں اپنی زندگی گزارن لئی اصولاں دی لمی چوڑی لسٹ دی ضرورت نئیں ہوندی۔ تے جدوں اوہ کوئی فیصلہ کر لیندا اے تے فیر اوہ اپنی پوری وا لا کے اوہدے تے عمل وی کردا اے۔—‏1-‏کُرنتھیوں 9:‏26، 27‏۔‏

5.‏ جیہڑے مسیحی پُختہ نئیں ہوندے اوہناں نُوں کیہڑے خطریاں دا سامنا ہوندا اے؟ (‏اِفِسیوں 4:‏14، 15‏)‏

⁵ جیہڑا بندہ پُختہ نئیں ہوندا اوہ لوکاں دی چال بازی چ پھس جاندا اے۔ اِنج اوہ اوہناں لوکاں دی غلط تلیم دا شکار ہو جاندا اے جیہڑے یہوواہ توں دُور ہو گئے نیں۔‏ b ‏(‏اِفِسیوں 4:‏14، 15 نُوں پڑھو۔)‏ اوہدے چ دُنیا دی سوچ پیدا ہو جاندی اے نالے اوہدی دُوجیاں نال وی نئیں بن دی تے مشکل ویلے چ اوہ غلط قدم چُک دا اے۔—‏1-‏کُرنتھیوں 3:‏3‏۔‏

6.‏ مثال دے کے دَسو کہ اِک بندہ وقت دے نال نال پُختہ کیویں بن دا اے۔ (‏تصویر نُوں وی ویکھو۔)‏

⁶ اَسی پہلاں سکھ چُکے آں کہ پاک کلام چ دَسیا گیا اے کہ جیویں اِک بچہ ہولی ہولی جوانی وَل ودھدا اے اونویں ای اِک مسیحی ہولی ہولی پُختہ بن دا جاندا اے۔ اِک بچہ ایناں سمجھ‌دار نئیں ہوندا ایس لئی کسے وڈے نُوں اوہدی حفاظت تے رہنمائی کرنی پیندی اے۔ مثال لئی، اِک ماں اپنی چھوٹی بچی دا ہتھ پھڑ کے اوہنوں سڑک پار کراندی اے۔ پر جدوں اوہ بچی تھوڑی وڈی ہو جاندی اے تے ماں اوہنوں کلے سڑک تے پار کرن دیندی اے پر اوہنوں ایہہ یاد ضرور دَواندی اے کہ سڑک پار کردے ویلے اوہنوں دونویں پاسے ویکھنا چاہی دا اے۔ پر جدوں بچی جوان ہو جاندی اے تے اوہ اپنے آپ دھیان نال سڑک پار کر سکدی اے۔ جیویں بچیاں نُوں خطریاں توں بچن لئی وڈیاں دی مدد تے رہنمائی دی ضرورت ہوندی اے اونویں ای جیہڑے مسیحی پُختہ نئیں ہوندے اوہناں نُوں وی چنگے فیصلے کرن لئی تے روحانی طور تے خطریاں توں بچن لئی پُختہ مسیحیاں وَلّوں مدد تے رہنمائی دی ضرورت ہوندی اے۔ پر جدوں پُختہ مسیحی کوئی فیصلہ کردے نیں تے اوہ ایہدے بارے یہوواہ دی مرضی جانن لئی  پہلاں بائبل دے اصولاں تے غور کردے نیں تے فیر اوہدے مطابق عمل کردے نیں۔‏

7.‏ کیہہ پُختہ مسیحیاں نُوں وی دُوجیاں وَلّوں مدد دی لوڑ ہوندی اے؟‏

⁷ تواڈے خیال چ کیہہ پُختہ مسیحیاں نُوں دُوجیاں کولوں مدد لین دی لوڑ نئیں ہوندی؟ ضرور ہوندی اے۔ اصل چ پُختہ مسیحیاں نُوں وی کدی کدار دُوجیاں کولوں مدد لینی پیندی اے۔ پر جے کوئی مسیحی روحانی لحاظ نال پختہ نئیں اے تے فیر اوہ ہمیشاں دُوجیاں کولوں ایہہ توقع کردا اے کہ اوہ اوہنوں دَسن کہ اوہنوں کیہہ کرنا چاہی دا اے تے کیہہ نئیں۔ یاں فیر دُوجے اوہدے لئی اوہ فیصلے کرن جیہڑے اوہنوں آپ کرنے چاہی دے نیں۔ پر اِک پُختہ مسیحی دُوجیاں دے تجربے تے عقل‌مندی توں سکھدا تے ہے وے پر اوہ ایس گل نُوں وی یاد رکھدا اے کہ یہوواہ چاہندا اے کہ اوہ اپنی ذمے‌داری دا بھار آپ چُکے۔—‏گلتیوں 6:‏5‏۔‏

8.‏ پُختہ مسیحی کیس لحاظ نال اِک دُوجے توں فرق ہو سکدے نیں؟‏

⁸ جیس طرحاں عمر چ وڈے لوک اِک دُوجے توں فرق نظر آندے نیں اوسے طرحاں پُختہ مسیحیاں چ وی فرق فرق خوبیاں ہوندیاں نیں جیویں کہ عقل‌مندی، دلیری، ہمدردی تے ایہدے نال نال اوہ کُھلے دل والے وی ہوندے نیں۔ ایہدے علاوہ جدوں دو پُختہ مسیحیاں نُوں اِکو جہی صورتحال دا سامنا ہوندا اے تے ہو سکدا اے کہ اوہ اِک دُوجے توں فرق فیصلہ کرن پر دونواں دا فیصلہ بائبل دے مطابق صحی ہوئے۔ ایس طرحاں اوہدوں ہوندا اے جدوں فیصلہ ضمیر دے حساب نال کرنا پیندا اے۔ ایسے لئی اوہ اِک دُوجے دے فیصلے تے اِعتراض نئیں کردے سگوں اوہ اپنے ایکے نُوں قائم رکھن دی کوشش کردے نیں۔—‏رومیوں 14:‏10؛‏ 1-‏کُرنتھیوں 1:‏10‏۔‏

پُختہ مسیحی بنن لئی سانوں کیہہ کرن دی لوڑ اے؟‏

9.‏ کیہہ اِک مسیحی اپنے آپ ای پُختہ بن سکدا اے؟ وضاحت کرو۔‏

⁹ وقت دے نال نال اِک بچہ اپنے آپ وڈا ہو جاندا اے پر اِک مسیحی اپنے آپ پُختہ نئیں بن سکدا۔ مثال لئی، کُرنتھس چ رہن والے مسیحیاں نے خوش‌خبری نُوں قبول کیتا،بپتسمہ لیا،اوہناں نُوں پاک روح مِلی تے اوہناں نُوں پولُس رسول توں بوہت کجھ سکھن دا موقع مِلیا۔(‏اعمال 18:‏8-‏11‏)‏ پر بپتسمے دے کجھ سال بعد اوہناں وچوں کجھ مسیحی روحانی لحاظ نال حالے وی بچے ای سن۔ (‏1-‏کُرنتھیوں 3:‏2‏)‏ اَسی کیہہ کر سکنے آں تاکہ ساڈے نال اِنج نہ ہووے؟‏

10.‏ سانوں پُختہ بنن لئی کیہہ کرنا پووے گا؟ (‏یہوداہ 20‏)‏

¹⁰ پہلی گل تے ایہہ وے کہ ساڈے دل چ پُختہ مسیحی بنن دی خواہش ہونی چاہی دی اے۔ جیہڑے لوک ناتجربہ کاری نُوں پسند کردے نیں اوہ روحانی طور تے چھوٹے بچے ای رہنا چاہندے نیں۔ اوہ پُختہ بنن لئی اَگے نئیں ودھنا چاہندے۔(‏اَمثال 1:‏22‏)‏ اَسی کدی وی اوہناں لوکاں وانگوں نئیں بننا چاہندے جنہاں دا قد تے نکل آندا اے پر حالے وی اوہناں دی کوشش ہوندی اے کہ اوہناں دے فیصلے اوہناں دے ماں پیو ای کرن۔ ایہدی بجائے سانوں پتہ اے کہ یہوواہ نال اپنی دوستی نُوں ہور پکا کرنا ساڈی ذمے‌داری اے۔ ‏(‏یہوداہ 20 نُوں پڑھو۔)‏ جے تُسی حالے وی پُختہ بنن لئی کوشش کر رہے او تے فیر یہوواہ کولوں دُعا کرو کہ اوہ توانوں اِنج کرن دی خواہش تے طاقت بخشے۔—‏فِلپّیوں 2:‏13‏۔‏

11.‏ پُختہ مسیحی بنن لئی یہوواہ کیویں مدد کردا اے؟ (‏اِفِسیوں 4:‏11-‏13‏)‏

¹¹ یہوواہ ایہہ توقع نئیں کردا کہ اَسی اپنے آپ ای پُختہ مسیحی بن جائیے۔ اوہنے سانوں کلیسیا چ ایہو جہے چرواہے تے اُستاد دِتے نیں جیہڑے مسیح وانگوں پوری طرحاں پُختہ بنن چ ساڈی مدد کردے نیں۔ ‏(‏اِفِسیوں 4:‏11-‏13 نُوں پڑھو۔)‏ ایہدے علاوہ یہوواہ نے سانوں پاک روح دِتی اے جدی مدد نال اَسی مسیح ورگی سوچ رکھ سکنے آں۔ (‏1-‏کُرنتھیوں 2:‏14-‏16‏)‏ اوہنے اپنی پاک روح دے ذریعے چار اِنجیلاں وی لکھوائیاں نیں جنہاں توں اَسی یسوع دی سوچ، اوہدیاں گلاں تے اوہدے کماں بارے جان سکنے آں۔ جے تُسی یسوع وانگوں سوچو گے تے اوہ کم کرو گے جیہڑے یسوع نے کیتے تے تُسی پُختہ بن سکدے او۔‏

یہوواہ وَلّوں مِلن والا سخت روحانی کھانا ساڈی مدد کیویں کر سکدا اے؟‏

12.‏ مسیح بارے بنیادی تلیم کیہہ اے؟‏

¹² پُختہ مسیحی بنن لئی ضروری اے کہ اَسی مسیح بارے بنیادی تلیم توں  اَگے ودھیئے یعنی اوہ تلیم جیہڑی اَسی شروع شروع چ سکھی سی۔ مثال لئی بھیڑے کماں توں توبہ کرنا، خدا تے ایمان لیانا، بپتسمہ لینا تے مُردیاں دے جی اُٹھن دی امید رکھنا۔ (‏عبرانیوں 6:‏1، 2‏)‏ ایہہ عقیدے ساڈی بنیاد نیں۔ ایسے لئی تے پطرس رسول نے پنتِکُست دے موقعے تے تلیم دیندے ویلے لوکاں نُوں ایہناں گلاں بارے دَسیا سی۔ (‏اعمال 2:‏32-‏35،‏ 38‏)‏ مسیح دا شاگرد بنن لئی ایہناں بنیادی گلاں تے ایمان رکھنا ضروری اے۔ مثال لئی، پولُس رسول نے دَسیا کہ جے اِک بندہ مُردیاں دے جی اُٹھن دی تلیم تے ایمان ای نئیں رکھدا تے اوہ ایہہ نئیں کہہ سکدا کہ اوہ مسیح دا شاگرد اے۔ (‏1-‏کُرنتھیوں 15:‏12-‏14‏)‏ پر سانوں ایہہ وی نئیں سوچنا چاہی دا کہ ایہناں بنیادی گلاں نُوں سکھنا ای کافی اے۔‏

13.‏ عبرانیوں 5:‏14 چ جیس سخت روحانی کھانے دا ذکر کیتا گیا اے، اوہدے توں فائدہ حاصل کرن لئی سانوں کیہہ کرنا چاہی دا اے؟ (‏تصویر نُوں وی ویکھو۔)‏

¹³ سخت روحانی کھانے چ صرف یہوواہ دے قانون ای شامل نئیں نیں سگوں ایہدے چ اوہ اصول وی شامل نیں جنہاں دی مدد نال اَسی اوہدی سوچ نُوں سمجھن دے قابل ہُنے آں۔ ایس روحانی کھانے توں فائدہ حاصل کرن لئی سانوں ہر روز بائبل نُوں پڑھنا چاہی دا اے، ایہدے چ لکھیاں گلاں تے سوچ وچار کرنا چاہی دا اے تے ایہناں گلاں تے عمل وی کرنا چاہی دا اے۔ جے اَسی اِنج کراں گے تے اَسی سکھ جاواں گے کہ اَسی یہوواہ نُوں خوش کرن والے فیصلے کیویں کر سکنے آں۔‏ c‏—‏عبرانیوں 5:‏14 نُوں پڑھو۔‏

14.‏ پولُس نے کُرنتھس دے مسیحیاں دی پُختہ بنن چ کیویں مدد کیتی؟‏

¹⁴ جیہڑے مسیحی پُختہ نئیں ہوندے اوہناں نُوں اوس ویلے فیصلہ کرن چ بڑی مشکل ہوندی اے جدوں بائبل چ کوئی واضح حکم نہ دِتا ہوئے۔ جدوں اوہناں نُوں کسے معاملے بارے بائبل چوں کوئی واضح حکم نئیں مِلدا تے اوہ سوچدے نیں کہ اوہ جو مرضی کر سکدے نیں۔ کجھ تے دُوجیاں نُوں ایہو جہے قانون بنان بارے کہندے نیں جنہاں دی اصل چ کوئی لوڑ نئیں ہوندی۔ مثال لئی، کُرنتھس دے مسیحیاں نے پولُس رسول نُوں پچھیا کہ کیہہ اوہ اوہناں چیزاں نُوں کھا سکدے نیں جیہڑیاں بُتاں دے سامنے چڑھائیاں جاندیاں نیں۔ پولُس نے اوہناں نُوں ہاں یاں نہ چ جواب دین دی بجائے ایہہ سمجھایا کہ ہر بندہ اپنے ضمیر دے مطابق فیصلہ کرن دا حق رکھدا اے۔ پولُس نے اوہناں نُوں ایہو جہے اصول دَسے جنہاں دی بِنا تے اوہ اِک ایہو جیہا فیصلہ کر سکدے سن جدے توں اوہناں دا ضمیر وی صاف رہوے تے دُوجیاں نُوں وی کوئی ٹھوکر نال لگے۔ (‏1-‏کُرنتھیوں 8:‏4،‏ 7-‏9‏)‏ اِنج پولُس نے اوہناں مسیحیاں دی پُختہ  بنن چ مدد کیتی تاکہ اوہ اپنی سوچن سمجھن دی صلاحیت نُوں استمال کر کے آپ فیصلہ کرن تے دُوجیاں کولوں ایہہ توقع نہ کرن کہ اوہ اوہناں لئی کوئی قانون بنان یاں اوہناں لئی فیصلے کرن۔‏

15.‏ پولُس نے عبرانی مسیحیاں دی پُختہ بنن چ مدد کیویں کیتی؟‏

¹⁵ پولُس نے عبرانیوں دے خط چ جو کجھ لکھیا، اوہدے توں اَسی اِک ہور بڑی اہم گل سکھنے آں۔ کجھ عبرانی مسیحی یہوواہ نال اپنی دوستی نُوں مضبوط کرن لئی کجھ نئیں کر رہے سن۔ اصل چ اوہ سخت کھانا کھان دی بجائے فیر توں دودھ پین لگ پئے سن۔‏ (‏عبرانیوں 5:‏12‏)‏ اصل چ اوہ اوہناں سچائیاں نُوں قبول نئیں کر رہے سن جیہڑیاں یہوواہ اوہناں نُوں وقت دے نال نال کلیسیا دے ذریعے سکھا رہیا سی۔ (‏اَمثال 4:‏18‏)‏ مثال لئی، جیہڑے یہودی مسیحی بنے سن اوہ حالے وی ایسے گل تے زور دے رہے سن کہ موسیٰ دی شریعت چ لکھیاں گلاں تے عمل کرنا چاہی دا اے جد کہ یسوع دی قربانی دی وجہ توں شریعت نُوں ختم ہوئیاں 30 سال ہو گئے سن۔ (‏رومیوں 10:‏4؛‏ طِطُس 1:‏10‏)‏ 30 سال دا عرصہ اپنی سوچ نُوں بدلن لئی کافی سی پر اوہناں نے اِنج نئیں کیتا۔ ایس لئی پولُس اوہناں سچائیاں نُوں سمجھن چ اوہناں دی مدد کر رہیا سی جیہڑیاں اوہ اوہناں نُوں سکھا رہیا سی۔ ایہناں مسیحیاں نُوں اپنا ایمان مضبوط کرن لئی ایہناں ای سچائیاں دی لوڑ سی۔ ایہناں سچائیاں توں ایہہ مسیحی سمجھ گئے کہ یہوواہ نے یسوع دی قربانی دی بِنا تے عبادت دا جیہڑا نواں بندوبست شروع کیتا اے، اوہ پہلے بندوبست نالوں بوہت بہتر اے۔ ایہناں ای سچائیاں دی مدد نال اوہ یہودیاں دی مخالفت دے باوجود دلیری نال مُنادی کردے رہے۔—‏عبرانیوں 10:‏19-‏23‏۔‏

اَسی اپنے آپ اُتے حدوں ودھ بھروسا کرن توں کیویں بچ سکنے آں؟‏

16.‏ سانوں پُختہ بنن دے علاوہ ہور کیہہ کرن دی کوشش کرنی چاہی دی اے؟‏

¹⁶ سانوں صرف پُختہ بنن دی کوشش نئیں کرنی چاہی دی سگوں پختگی نُوں قائم رکھن دی کوشش وی کرنی چاہی دی اے۔ سانوں ایہہ نئیں سوچنا چاہی دا کہ ہُن سانوں یہوواہ نال اپنی دوستی نُوں ہور پکا کرن دی کوئی لوڑ نئیں۔ (‏1-‏کُرنتھیوں 10:‏12‏)‏ سانوں اپنی جانچ کردے رہنا چاہی دا اے کہ کیہہ اَسی وقت دے نال نال پُختہ بن رہے آں یاں نئیں۔—‏2-‏کُرنتھیوں 13:‏5‏۔‏

17.‏ کُلسّیوں دے ناں پولُس دے خط توں ایہہ کیویں پتہ چلدا اے کہ ساڈے لئی پختگی نُوں قائم رکھنا کیوں ضروری اے؟‏

¹⁷ کُلسّیوں دے ناں پولُس نے اپنے خط چ واضح کیتا کہ ساڈے لئی پختگی نُوں قائم رکھنا کیوں ضروری اے۔ بھانویں کہ ایس کلیسیا دے مسیحی پُختہ بن گئے سن پر فیر وی پولُس نے اوہناں نُوں خبردار کیتا کہ اوہ دُنیا  دی سوچ دا شکار نہ ہو جان۔ (‏کُلسّیوں 2:‏6-‏10‏)‏ اِپَفراس تے شاید ایہناں مسیحیاں نُوں چنگی طرحاں جان دا سی ایس لئی اوہ ایہناں لئی دُعا کردا رہندا سی تاکہ اوہ آخر تک پُختہ رہن۔ (‏کُلسّیوں 4:‏12‏)‏ اَسی کیہہ سکھنے آں؟ ایہہ کہ پولُس تے اِپَفراس دونویں ایہہ گل جان دے سن کہ آخر تک پُختہ رہن لئی سانوں سخت کوشش کرن تے یہوواہ دی مدد دی لوڑ اے۔ دونویں ایہہ چاہندے سن کہ ایہہ مسیحی ہر مشکل چ وفادار ثابت ہون تے آخر تک پُختہ رہن۔‏

18.‏ اِک پُختہ مسیحی دے نال کیہہ ہو سکدا اے؟ (‏تصویر نُوں وی ویکھو۔)‏

¹⁸ پولُس نے عبرانی مسیحیاں نُوں سمجھایا کہ جے اِک پُختہ مسیحی خبردار نئیں رہندا تے اوہ یہوواہ نال اپنی دوستی نُوں ہمیشاں لئی گنوا سکدا اے۔ جے ایہو جیہا مسیحی یہوواہ دی گل نئیں سُن دا تے اوہدا دل ایناں سخت ہو سکدا اے کہ اوہ توبہ نہ کرے تے فیر شاید یہوواہ اوہنوں معاف نہ کرے۔ پر خوشی دی گل ایہہ وے کہ عبرانی مسیحی حالے ایس نوبت تک نئیں پونچے سن۔ (‏عبرانیوں 6:‏4-‏9‏)‏ پر اَسی اوہناں مسیحیاں بارے کیہہ کہہ سکنے آں جنہاں نے عبادتاں تے آنا چھڈ دِتا یاں اوہناں نُوں کلیسیا چوں کڈھ دِتا گیا پر فیر اوہناں نے توبہ کر لئی؟ جے اوہ دِلوں توبہ کردے نیں تے ایہدے توں پتہ چلدا اے کہ اوہ اوہناں لوکاں ورگے نئیں نیں جنہاں بارے پولُس نے کہیا سی کہ اوہ خدا دی دوستی ہمیشاں لئی گنوا سکدے نیں۔ جدوں اوہ یہوواہ وَل واپس آ جاندے نیں تے یقیناً اوہناں نُوں اوس مدد دی لوڑ ہوندی اے جدا بندوبست یہوواہ نے کیتا اے۔ (‏حِزقی‌ایل 34:‏15، 16‏)‏ ایہدے لئی شاید کلیسیا دے بزرگ کسے پُختہ مسیحی نال گل کرن جیہڑا یہوواہ نال دُبارہ دوستی کرن چ اوہناں مسیحیاں دی مدد کر سکدا اے۔‏

19.‏ ساڈا ارادہ کیہہ ہونا چاہی دا اے؟‏

¹⁹ جے تُسی ارادہ کیتا اے کہ تُسی پُختہ بنو گے تے تُسی اِنج کرن لئی کوشش وی کر رہے او تے تُسی ضرور کامیاب ہو سکدے او۔ سخت روحانی کھانا کھاندے رہوو یعنی پاک کلام دِیاں گوڑھیاں سچائیاں سکھدے رہوو تے اپنی سوچ نُوں یہوواہ دی سوچ مطابق ڈھالو۔ تے جے تُسی پُختہ مسیحی بن چُکے او تے فیر اپنی پختگی نُوں قائم رکھو۔‏