1.‏ پہلی صدی چ یہوواہ دے بندے کیویں منظم طریقے نال کم کر رہے سن؟‏

 یہوواہ جدوں وی اپنے بندیاں نُوں کوئی ذمے‌داری دیندا اے تے اوہ چاہندا اے کہ اوہ اوہنوں منظم طریقے نال پورا کرن۔ (‏1-‏کُرنتھیوں 14:‏33‏)‏ مثال لئی، یہوواہ چاہندا اے کہ بادشاہی دی خوش‌خبری دی مُنادی ساری دُنیا چ کیتی جائے۔ اوہنے ایس کم دی دیکھ‌بھال دی ذمے‌داری یسوع مسیح نُوں دِتی اے تے یسوع ایس گل دا خیال رکھدا اے کہ ایہہ کم منظم طریقے نال کیتا جائے۔ (‏متی 24:‏14‏)‏ پہلی صدی چ جدوں فرق فرق تھانواں تے کلیسیاواں بنائیاں گئیاں تے ایہناں چ بزرگاں نُوں مقرر کیتا گیا تاکہ اوہ کلیسیاواں نُوں ہدیتاں دین تے اوہناں دی پیشوائی کرن۔ (‏اعمال 14:‏23‏)‏ یروشلم چ بزرگاں تے رسولاں دی اِک جماعت سی۔ ایہہ جماعت فرق فرق معاملیاں بارے فیصلے کردی سی جنہاں تے کلیسیاواں نُوں عمل کرنا ہوندا سی۔ (‏اعمال 15:‏2؛‏ 16:‏4‏)‏ایہناں ہدیتاں تے عمل کرن دی وجہ توں کلیسیاواں ایمان چ مضبوط ہوندیاں گئیاں تے شاگرداں دی تعداد دن بہ دن ودھدی گئی۔—‏اعمال 16:‏5‏۔‏

2.‏ 1919 توں یہوواہ کیویں اپنے بندیاں دی رہنمائی کر رہیا اے تے اوہناں نُوں تلیم دے رہیا اے؟‏

² یہوواہ اَج وی منظم طریقے نال کم کرن چ اپنے لوکاں دی مدد کر رہیا اے۔ 1919 توں یسوع مسیح پاک روح نال مسح ہوئے مسیحیاں دے اِک چھوٹے گروہ دے ذریعے مُنادی دے کم تے اپنے پیروکاراں نُوں تلیم دین دے کم نُوں منظم کر رہیا اے۔ (‏لُوقا 12:‏42‏)‏ اَسی ایس گل نُوں صاف ویکھ سکنے آں کہ یہوواہ ایہناں بھراواں دے کم تے برکت پا رہیا اے۔—‏یسعیاہ 60:‏22؛‏ 65:‏13، 14‏۔‏

3، 4.‏ (‏الف)‏اِک مثال دے کے دَسو کہ منظم طریقے نال کم کرن دے کیہڑے فائدے ہوندے نیں؟ (‏ب)‏ایس مضمون چ اَسی کیہڑیاں گلاں تے غور کراں گے؟‏

 ³ جے اَسی منظم نہ ہوندے تے اَسی کدی وی چنگے طریقے نال مُنادی دا کم نہ کر پاندے جیہڑا یسوع نے سانوں دِتا اے۔ (‏متی 28:‏19، 20‏)‏ مثال لئی، فرض کرو کہ جے سانوں مُنادی کرن لئی کوئی علاقہ نہ دِتا جاندا تے ساڈے وچوں جدا جتھے دل کردا، اوتھے مُنادی کردا۔ اِنج کجھ علاقیاں چ تے وار وار مُنادی ہوندی رہنی سی تے کجھ علاقیاں چ شاید بالکل وی نہ ہوندی۔ شاید تواڈے ذہن چ منظم طریقے نال کم کرن دے ہور وی کئی فائدے ہون گے۔‏

⁴ یسوع نے جیویں زمین تے رہ کے اپنے پیروکاراں نُوں منظم کیتا سی اونویں ای اوہ اَج وی سانوں منظم کر رہیا اے۔ ایس مضمون چ اَسی ویکھاں گے کہ یسوع مسیح نے منظم طریقے نال کم کرن دے معاملے چ کیہو جہی مثال قائم کیتی تے اَج ساڈی تنظیم اوہدی مثال تے کیویں عمل کر رہی اے۔ اَسی ایس گل تے وی غور کراں گے کہ اَسی یہوواہ دی تنظیم تے اپنے بھروسے نُوں کیویں ودھا سکنے آں۔‏

ساڈی تنظیم یسوع دی مثال تے عمل کردی اے

5.‏ ساڈی تنظیم یسوع دی مثال تے کیویں عمل کردی اے؟ (‏یوحنا 8:‏28‏)‏

⁵ یسوع نے اپنے اسمانی باپ کولوں سکھیا کہ اوہنوں کیہڑیاں گلاں تے کیہڑے کم کرنے چاہی دے نیں۔‏ یسوع دی مثال تے عمل کردیاں ہوئیاں یہوواہ دی تنظیم پاک کلام دے ذریعے ساڈی رہنمائی کردی اے تے ایہدے چوں ای سانوں سکھاندی اے کہ کیہہ صحی اے تے کیہہ غلط۔ ‏(‏یوحنا 8:‏28 نُوں پڑھو؛‏ 2-‏تیمُتھیُس 3:‏16، 17‏)‏ تنظیم سانوں وار وار ایہہ گل یاد دَواندی اے کہ اَسی خدا دے کلام نُوں پڑھئے تے ایہدے تے عمل کرئیے۔ سانوں ایس ہدیت تے عمل کرن نال کیہہ فائدہ ہوئے گا؟‏

6.‏ بائبل دا مطالعیا کرن نال سانوں کیہڑا خاص فائدہ ہوئے گا؟‏

⁶ جدوں اَسی تنظیم وَلّوں مِلن والیاں کتاباں دے ذریعے بائبل دا مطالعیا کرنے آں تے سانوں بڑا فائدہ ہوندا اے۔ مثال لئی، اِنج کرن نال اَسی ایہہ ویکھن دے قابل ہُنے آں کہ بائبل چ کیہہ دَسیا گیا اے تے تنظیم کیہڑیاں ہدیتاں دے رہی اے۔ اِنج کردے ویلے جدوں اَسی غور کرنے آں کہ ایہہ ہدیتاں بالکل بائبل دے مطابق نیں تے یہوواہ دی تنظیم تے ساڈا بھروسا ہور ودھ جاندا اے۔—‏رومیوں 12:‏2‏۔‏

7.‏ یسوع نے کیس چیز دی مُنادی کیتی تے اَج یہوواہ دی تنظیم اوہدی مثال تے کیویں عمل کر رہی اے؟‏

⁷ یسوع نے خدا دی بادشاہی دی خوش‌خبری دی مُنادی کیتی۔‏ (‏لُوقا 4:‏43، 44‏)‏ اوہنے اپنے شاگرداں نُوں وی اِنج کرن دا حکم دِتا۔ (‏لُوقا 9:‏1، 2؛‏ 10:‏8، 9‏)‏ اَج یہوواہ دی تنظیم چ شامل سارے لوک بھانویں جتھے وی رہندے ہون تے تنظیم چ جیہڑیاں وی ذمے‌داریاں نبھارہے ہون، اوہ بادشاہی دی خوش‌خبری دی مُنادی کردے نیں۔‏

8.‏ ساڈے کول کیہڑا اعزاز اے؟‏

⁸ دُوجیاں نُوں خدا دی بادشاہی دا پیغام سنانا ساڈے لئی اِک اعزاز اے۔ پر ایہہ اعزاز ساریاں کول نئیں اے۔ مثال لئی، جدوں یسوع زمین تے سی تے اوہنے بُرے فرشتیاں نُوں ایس گل دی بالکل اجازت نئیں دِتی کہ اوہ اوہدے بارے گواہی دین۔ (‏لُوقا 4:‏41‏)‏ اَج جدوں کوئی بندہ یہوواہ دے گواہواں نال مِل کے مُنادی کرنا چاہندا اے تے اوہنوں اپنی زندگی توں ظاہر کرنا پیندا اے کہ اوہ ایس اعزاز دے لائق اے۔ سانوں جدوں و ی تے جتھے وی موقع مِلدا اے، اَسی مُنادی کرنے آں۔ اِنج اَسی ظاہر کرنے آں کہ اَسی ایس اعزاز دی بڑی قدر کرنے آں۔ یسوع وانگوں اَسی وی پوری کوشش کرنے آں کہ اَسی لوکاں دے دل چ بادشاہی دا بیہہ بوئیے تے ایہنوں پانی دَئیے۔—‏متی 13:‏3،‏ 23؛‏ 1-‏کُرنتھیوں 3:‏6‏۔‏

9.‏ ساڈی تنظیم دُوجیاں نُوں خدا دے ناں بارے کیویں سکھا رہی اے؟‏

⁹ یسوع نے دُوجیاں نُوں خدا دے ناں بارے سکھایا۔‏ یسوع نے اپنے اسمانی باپ نُوں دُعا چ کہیا:‏ ”‏مَیں ایہناں نُوں تیرے ناں بارے سکھایا اے۔“‏ (‏یوحنا 17:‏26‏)‏ یسوع دی مثال تے عمل کردے ہوئے یہوواہ دی تنظیم پوری کوشش کردی اے کہ لوک یہوواہ دے ناں بارے سکھن۔ اِنج کرن لئی تنظیم نے پاک کلام دا ‏”‏ترجمہ نوِیں دُنیا‏“‏ تیار کیتا اے۔ ایس ترجمے چ خدا دا ناں ہر اوس جگہ تے لایا گیا اے جتھے ایہہ اصل چ موجود سی۔ ایہہ مکمل ترجمہ یاں ایہدے کجھ حصے ہُن 270 توں زیادہ  زباناں چ موجود نیں۔ اُردو زبان چ کتاب ‏”‏کتابِ‌مُقدس کی تحقیق کے لئے گائیڈ‏“‏ چ تُسی ایس بارے بوہت کجھ پڑھ سکدے او کہ خدا دے ناں نُوں بائبل دے ترجمیاں وچوں کیوں کڈھیا گیا سی تے ‏”‏ترجمہ نوِیں دُنیا‏“‏ چ ایہنوں ہر اوس جگہ تے کیوں پایا گیا اے جتھوں ایہنوں ہٹا دِتا گیا سی۔ ایس کتاب چ ایس گل دے کئی ثبوت دِتے گئے نیں کہ یونانی صحیفیاں چ خدا دا ناں 237 واری کیوں آنا چاہی دا اے۔‏

10.‏ میانمار چ رہن والی اِک عورت دے تجربے توں اَسی کیہہ سکھنے آں؟‏

¹⁰ یسوع وانگوں اَسی زیادہ توں زیادہ لوکاں دی مدد کرنا چاہنے آں کہ اوہ خدا دے ناں نُوں جانن۔ ذرا میانمار چ رہن والی اِک عورت دے تجربے تے غور کرو جدی عمر 67 سال اے۔ جدوں اوہنوں خدا دے ناں بارے پتہ چلیا تے اوہدیاں اَکھاں بھر آئیاں تے اوہنے کہیا:‏ ”‏مینوں زندگی چ پہلی واری پتہ چلیا اے کہ خدا دا ناں یہوواہ اے۔ مَیں اَج تک جِنّیاں وی گلاں سکھیاں نیں، اوہناں وچوں ایہہ گل میرے لئی سب توں خاص اے۔“‏ ایس تجربے توں پتہ چلدا اے کہ جدوں نیک دل لوک خدا دے ناں بارے سکھدے نیں تے اوہناں دِیاں زندگیاں بدل جاندیاں نیں۔‏

یہوواہ دی تنظیم تے اپنے بھروسے نُوں ودھاندے جاؤ

11.‏ کلیسیا دے بزرگ کیویں ظاہر کر سکدے نیں کہ اوہ یہوواہ دی تنظیم تے پورا بھروسا کردے نیں؟ (‏تصویر نُوں وی ویکھو۔)‏

¹¹ کلیسیا دے بزرگ کیویں ظاہر کر سکدے نیں کہ اوہ یہوواہ دی تنظیم تے پورا بھروسا کردے نیں؟ ایہدا اِک طریقہ ایہہ وے کہ جدوں اوہناں نُوں کوئی ہدیت مِلدی اے تے اوہ ایہنوں دھیان نال پڑھدے نیں تے فیر ایہدے تے صحی طرحاں عمل کرن دی پوری کوشش کردے نیں۔ مثال لئی، اوہناں نُوں صرف ایس بارے ای ہدیتاں نئیں مِلدیاں کہ اوہناں نُوں عبادتاں چ اپنے حصے کیویں دینے چاہی دے نیں تے کلیسیا لئی دُعاواں کیویں کرنیاں چاہی دِیاں نیں سگوں اوہناں نُوں ایس بارے وی رہنمائی مِلدی اے کہ اوہ مسیح دِیاں بھیڈاں دی دیکھ‌بھال کیویں کر سکدے نیں۔ جدوں بزرگ تنظیم وَلّوں مِلن والیاں ہدیتاں تے عمل کردے نیں تے بھین بھراواں نُوں محسوس ہوندا اے کہ یہوواہ اوہناں نال پیار کردا اے تے اوہناں دا خیال رکھ رہیا اے۔‏

12.‏ (‏الف)‏سانوں کلیسیا چ پیشوائی کرن والے بھراواں دے فرمانبردار کیوں رہنا چاہی دا اے؟ (‏عبرانیوں 13:‏7،‏ 17‏)‏ (‏ب)‏سانوں پیشوائی کرن والے بھراواں دِیاں خامیاں دی بجائے خوبیاں تے دھیان کیوں دینا چاہی دا اے؟‏

¹² جدوں کلیسیا دے بزرگ سانوں کوئی ہدیت دیندے نیں تے سانوں اوہناں دی گل خوشی نال مننی چاہی دی اے۔ جدوں اَسی اِنج کراں گے تے اوہناں بھراواں لئی اپنیاں ذمے‌داریاں نُوں پورا کرنا اسان ہو جائے گا۔ بائبل چ سانوں نصیحت کیتی گئی اے کہ اَسی اوہناں بھراواں دے فرمانبردار تے تابع‌دار رہیے جیہڑے ساڈی پیشوائی کردے نیں۔ ‏(‏عبرانیوں 13:‏7،‏ 17 نُوں پڑھو۔)‏ کدی کدار اِنج کرنا مشکل ہو سکدا اے۔ پر کیوں؟ کیونکہ ایہہ بھرا وی عیب‌دار نیں۔ پر جے اَسی اوہناں دِیاں خوبیاں دی بجائے اوہناں دِیاں خامیاں تے دھیان دَواں گے تے اَسی اپنے دُشمناں دا کم اسان کر رہے ہوواں گے۔ اَسی ایہہ گل کیوں کہہ سکنے آں؟ کیونکہ جے اَسی پیشوائی کرن والے بھراواں بارے بُرا سوچاں گے تے ساڈا تنظیم توں بھروسا اُٹھنا شروع ہو جائے گا تے ایہی تے ساڈے دُشمن چاہندے نیں۔ اَسی اپنے دُشمناں دِیاں چالاں نُوں پچھانن تے ایہناں توں بچن لئی کیہہ کر سکنے آں؟‏

دُوجیاں دی وجہ توں یہوواہ دی تنظیم توں اپنا بھروسا اُٹھن نہ دَوو

13.‏ خدا دے دُشمناں نے اوہدی تنظیم نُوں بدنام کرن دی کوشش کیویں کیتی اے؟‏

¹³ خدا دی تنظیم سانوں جیہڑیاں گلاں سکھاندی اے، اوہناں نُوں اوہدے دُشمن غلط طریقے نال پیش کردے نیں۔ مثال لئی، اَسی پاک کلام چوں سکھیا اے کہ یہوواہ چاہندا اے کہ اوہدے بندے اپنے جسم تے چال‌چلن نُوں پاک رکھن تے اوس طریقے نال اوہدی عبادت کرن جیویں اوہ چاہندا اے۔ اوہنے اپنے کلام چ ایہہ حکم دِتا اے کہ جیہڑا بندہ ناپاک کم کردا اے تے ایہناں توں توبہ نئیں کردا، اوہنوں کلیسیا چوں کڈھ دِتا جائے۔ (‏1-‏کُرنتھیوں 5:‏11-‏13؛‏ 6:‏9، 10‏)‏ اَسی یہوواہ دے ایس حکم تے عمل کرنے آں۔ پر ساڈے دُشمن ایس گل نُوں ساڈے خلاف استمال کردے نیں۔ اوہ ساڈے تے اِلزام لاندے نیں کہ اَسی لوکاں نال پیار نئیں کردے،اَسی اوہناں تے نکتہ‌چینی کرنے آں تے اوہناں لوکاں نُوں برداشت نئیں کردے جیہڑے ساڈے توں فرق نیں۔‏

14.‏ ساڈی تنظیم بارے جیہڑیاں جھوٹھیاں گلاں پھیلائیاں جاندیاں نیں، اوہناں دے پچھے کدا ہتھ اے؟‏

¹⁴ ایس گل نُوں پچھانو کہ جھوٹھیاں گلاں پچھے کدا ہتھ اے۔‏ شیطان اِبلیس یہوواہ دی تنظیم بارے جھوٹھیاں گلاں پھیلاندا اے۔ اوہ ”‏جھوٹھ دا پیو اے۔“‏ (‏یوحنا 8:‏44؛‏ پیدائش 3:‏1-‏5‏)‏ ایس لئی سانوں پتہ اے کہ اوہ یہوواہ دی تنظیم بارے جھوٹھ پھیلان لئی اوہناں لوکاں نُوں استمال کرے گا جیہڑے ساڈے خلاف نیں۔ یسوع نال تے پہلی صدی دے مسیحیاں نال وی اِنج ای ہویا سی۔‏

15.‏ مذہبی رہنماواں نے یسوع تے اوہدے پیروکاراں نال کیہہ کیتا سی؟‏

¹⁵ پہلی صدی چ شیطان دے کجھ لوکاں نے خدا دے بے‌عیب پُتر بارے اِک توں بعد اِک جھوٹھ پھیلائے۔ مثال لئی، یسوع اپنے اسمانی باپ دی طاقت نال معجزے کردا سی پر مذہبی رہنماواں نے لوکاں نُوں کہیا کہ یسوع ”‏باغی فرشتیاں دے سردار“‏ دی مدد نال باغی فرشتیاں نُوں کڈھدا اے۔ (‏مرقس 3:‏22‏)‏ جدوں یسوع تے مُقدمہ چل رہیا سی تے مذہبی رہنماواں نے اوہدے تے اِلزام لایا کہ اوہنے خدا دے خلاف کفر بکیا اے۔ نالے اوہناں نے لوکاں نُوں ہلاشیری دِتی کہ اوہ ایہہ منگ کرن کہ یسوع نُوں مار دِتا جائے۔ (‏متی 27:‏20‏)‏ بعد چوں جدوں یسوع دے پیروکاراں نے خوش‌خبری دی مُنادی کیتی تے اوہناں دے مخالفاں نے لوکاں نُوں مسیحیاں دے خلاف کر دِتا تے اوہناں نُوں بھڑکایا کہ اوہ مسیحیاں تے ظلم کرن۔ (‏اعمال 14:‏2،‏ 19‏)‏ اعمال 14:‏2 بارے اُردو زبان چ 1 دسمبر 1998 دے ‏”‏مینارِنگہبانی“‏ چ ایہہ دَسیا گیا سی:‏ ”‏یہودی مخالفاں نے نہ صرف آپ پیغام نُوں رَد کیتا سگوں لوکاں چ مسیحیاں دے خلاف نفرت پیدا کرن لئی اوہناں تے جھوٹھے اِلزام وی لانے شروع کر دِتے۔“‏

16.‏ جے اَسی یہوواہ دی تنظیم بارے کوئی جھوٹھی گل سننے آں تے سانوں کیہہ یاد رکھنا چاہی دا اے؟‏

¹⁶ پہلی صدی وانگوں شیطان اَج وی جھوٹھ پھیلا رہیا اے۔ اوہ تے اَج وی ساری دُنیا نُوں گمراہ کر رہیا اے۔ (‏مُکاشفہ 12:‏9‏)‏ جے تُسی یہوواہ دی تنظیم تے پیشوائی کرن والے بھراواں بارے جھوٹھیاں گلاں سُن دے او  تے یاد رکھو کہ خدا دے دُشمناں نے یسوع مسیح تے پہلی صدی دے مسیحیاں بارے وی جھوٹھ پھیلائے سن۔ بائبل دی پیشین‌گوئی دے مطابق اَج یہوواہ دے لوکاں تے ظلم کیتا جاندا اے تے اوہناں بارے جھوٹھیاں گلاں پھیلائیاں جاندیاں نیں۔ (‏متی 5:‏11، 12‏)‏ جے اَسی ایس گل نُوں پچھاناں گے کہ جھوٹھیاں گلاں پچھے کدا ہتھ اے تے اَسی ایہناں توں بچن لئی فوراً کجھ کراں گے۔ پر اَسی ایہہ کیویں کر سکنے آں؟‏

17.‏ اَسی جھوٹھیاں گلاں تے یقین کرن توں کیویں بچ سکنے آں؟ (‏2-‏تیمُتھیُس 1:‏13‏)‏ (‏ایس بکس نُوں وی ویکھو:‏ ‏”‏ جھوٹھیاں گلاں بارے ساڈا ردِعمل۔‏‏“‏‏)‏

¹⁷ جھوٹھیاں گلاں تے دھیان نہ دَوو۔‏ پولُس رسول نے صاف صاف دَسیا کہ جے اَسی خدا تے اوہدے لوکاں بارے جھوٹھیاں گلاں سننے آں تے اَسی کیہہ کر سکنے آں۔ اوہنے تیمُتھیُس نُوں کہیا کہ اوہ بھراواں نُوں حکم دَوے کہ اوہ جھوٹھیاں کہانیاں تے دھیان نہ دین تے خدا دی توہین کرن والیاں جھوٹھیاں کہانیاں توں دُور رہن۔ (‏1-‏تیمُتھیُس 1:‏3، 4؛‏ 4:‏7‏)‏ ذرا سوچو کہ کیہہ اِک سمجھ‌دار بندہ چھوٹے بچیاں وانگوں فرش تے پئی کوئی وی چیز چُک کے اپنے منہ چ پا لوے گا؟ یقیناً اوہ اِنج نئیں کرے گا کیونکہ اوہنوں پتہ اے کہ جے اوہ اِنج کرے گا تے اوہ بیمار ہو سکدا اے۔ ایسے طرحاں اَسی وی جھوٹھیاں کہانیاں نئیں سُن دے کیونکہ سانوں پتہ اے کہ ایہناں پچھے کدا ہتھ اے۔ ایہدی بجائے اَسی صرف سچائی دی صحی تلیم تے دھیان دینے آں۔‏‏—‏2-‏تیمُتھیُس 1:‏13 نُوں پڑھو۔‏

18.‏ اَسی کیویں ثابت کر سکنے آں کہ اَسی یہوواہ دی تنظیم تے پورا بھروسا کرنے آں؟‏

¹⁸ ایس مضمون چ اَسی صرف تِن ایہو جہیاں گلاں تے غور کیتا اے جنہاں چ یہوواہ دی تنظیم یسوع دی مثال تے عمل کردی اے۔ پر بائبل دا مطالعیا کردے ویلے ہور وی ایہو جہیاں گلاں تے غور کرو۔ کلیسیا چ دُوجیاں دی مدد کرو تاکہ اوہ یہوواہ دی تنظیم تے اپنے بھروسے نُوں ودھان۔ یہوواہ اپنی مرضی نُوں پورا کرن لئی اپنی تنظیم نُوں استمال کر رہیا اے۔ ایس لئی وفاداری نال یہوواہ دی خدمت کردے رہوو تے اوہدی تنظیم نال جُڑے رہوو اِنج تُسی ظاہر کرو گے کہ تُسی اوہدی تنظیم تے بھروسا کردے او۔ (‏زبور 37:‏28‏)‏ ساڈے لئی ایہہ بڑے مان دی گل اے کہ اَسی اوہناں لوکاں چ شامل آں جیہڑے یہوواہ نُوں پیار کردے نیں تے اوہدے وفادار نیں۔ آؤ اَسی ایس اعزاز لئی اپنے دل چ قدر نُوں ودھاندے رہیے۔‏