1، 2.‏ بائبل دا مطالعیا کرن دا بہترین طریقہ کیہہ اے؟ مثال دَوو۔‏

 فرض کرو کہ تُسی اِک گھر نُوں خریدن بارے سوچ رہے او۔ اوہنوں خریدن توں پہلاں تُسی اوہدے چ کیہہ کجھ ویکھو گے؟ کیہہ تُسی بس اوہدی تصویر ویکھو گے؟ تُسی ضرور اوس گھر نُوں جا کے ویکھو گے۔ تُسی اوہدے ہر کمرے چ جاؤ گے تے اوہدی اِک اِک چیز نُوں بڑے دھیان نال ویکھو گے۔ تُسی شاید اوہدا نقشہ وی ویکھنا چاہوو تے ایہہ وی جاننا چاہوو کہ اوہنوں بنان چ کیہو جیہا سامان استمال ہویا اے۔ ظاہری جہی گل اے کہ تُسی اوس گھر بارے ہر گل جاننا چاہوو گے۔‏

² اَسی بائبل دا مطالعیا کردے ویلے وی اِنج ای کر سکنے آں۔ بائبل دے اِک عالم نے کہیا کہ ”‏بائبل اِک بوہت وڈی عمارت وانگوں اے جیہڑی بوہت ای اُچی اے تے ایہدیاں بنیاداں بوہت ای ڈونگیاں نیں۔“‏ تے فیر اَسی بائبل چ لکھیاں گلاں نُوں چنگی طرحاں کیویں سمجھ سکنے آں؟ جے تُسی بائبل نُوں بس چھیتی چھیتی پڑھو گے تے تُسی بس ایہدیاں بنیادی گلاں نُوں ای سمجھ سکو گے۔ (‏عبرانیوں 5:‏12‏)‏ پر جیویں اِک گھر بارے چنگی طرحاں جانن لئی تُسی اوہدے اندر جا کے اوہنوں ویکھدے او، اوسے طرحاں خدا دے کلام دِیاں گلاں نُوں چنگی طرحاں سمجھن لئی اوہدی گہرائی چ جاؤ۔ بائبل دا مطالعیا کرن دا اِک ودھیا طریقہ ایہہ وے کہ تُسی ویکھو کہ ایہدے چ لکھیاں سچائیاں آپس چ کیویں جڑیاں ہوئیاں نیں۔ ایہدے علاوہ ویکھو کہ تُسی کیہڑیاں سچائیاں تے ایمان رکھدے او تے کیوں رکھدے او۔‏

3.‏ پولُس رسول نے اپنے مسیحی بھین بھراواں نُوں کیہہ کرن دی ہلاشیری دِتی تے کیوں؟ (‏اِفسیوں 3:‏14-‏19‏)‏

³ خدا دے کلام چ لکھیاں گلاں نُوں چنگی طرحاں سمجھن لئی ضروری اے کہ اَسی ایہدی گہرائی چ جائیے۔ پولُس رسول نے اپنے مسیحی بھین بھراواں نُوں ہلاشیری دِتی کہ اوہ خدا دے کلام دا مطالعیا اینی چنگی طرحاں کرن کہ اوہ ایہدے چ دَسی گئی سچائی دی چوڑائی، لمبائی، اُنچائی تے گہرائی نُوں پوری طرحاں  سمجھ سکن۔ اِنج ایمان چ اوہناں دِیاں جڑاں ڈُونگیاں تے مضبوط ہو جانیاں سن۔ ‏(‏اِفسیوں 3:‏14-‏19 نُوں پڑھو۔)‏ سانوں وی خدا دے کلام دا مطالعیا اِنج ای کرن دی لوڑ اے۔آؤ اَسی ویکھئے کہ اَسی اِنج کیویں کر سکنے آں۔‏

4.‏ اَسی یہوواہ دے نیڑے جان لئی کیہہ کر سکنے آں؟ مثالاں دَوو۔‏

⁴ مسیحیاں دے طور تے اَسی بائبل دِیاں بنیادی گلاں نُوں ای سکھ کے مطمئن نئیں ہو جاندے سگوں اَسی خدا دِیاں گہریاں گلاں نُوں وی جاننا چاہنے آں جدے چ پاک روح ساڈی مدد کر سکدی اے۔ (‏1-‏کُرنتھیوں 2:‏9، 10‏)‏ تے فیر کیوں نہ اَسی اپنے ذاتی مطالعے چ ایہو جہیاں گلاں تے غور کریئے جنہاں دے ذریعے اَسی یہوواہ دے نیڑے جا سکنے آں۔ مثال لئی، اَسی ایس بارے تحقیق کر سکنے آں کہ پرانے وقتاں چ یہوواہ نے اپنے بندیاں لئی محبت کیویں ظاہر کیتی تے ایہد ے توں کیویں ثابت ہوندا اے کہ اوہ ساڈے نال وی پیار کردا اے۔ ایہدے علاوہ اَسی بنی‌اِسرائیل دے عبادت دے اِنتظام تے غور کر سکنے آں تے ایہہ ویکھ سکنے آں کہ اَج یہوواہ کیہو جہی عبادت نُوں پسند کردا اے۔ یاں فیر اَسی ایس گل دا وی گہرائی نال مطالعیا کر سکنے آں کہ جدوں یسوع زمین تے سی تے اوہدے تے کیہڑیاں پیشین‌گوئیاں پوریاں ہوئیاں۔‏

5.‏ تُسی کیہڑے موضوع دا گہرائی نال مطالعیا کرنا چاہوو گے؟‏

⁵ کجھ بھین بھراواں کولوں پچھیا گیا کہ اوہناں نُوں کیہڑیاں گلاں بارے گہرائی نال مطالعیا کرنا پسند اے۔ اوہناں نے جیہڑیاں گلاں دَسیاں، اوہناں وچوں کجھ بکس ‏”‏ ذاتی مطالعیا کرن لئی موضوع‏“‏ چ دِتیاں گئیاں نیں۔ توانوں ایہناں بارے مطالعیا کر کے بڑا مزہ آئے گا تے اِنج کرن چ توانوں اُردو زبان چ کتاب ‏”‏یہوواہ کے گواہوں کے لئے مطالعے کے حوالے“‏ توں بڑی مدد مل سکدی اے۔ جدوں تُسی بائبل دا گہرائی نال مطالعیا کرو گے تے تواڈا ایمان مضبوط ہوئے گا تے تُسی خدا دے علم نُوں حاصل کر سکو گے۔ (‏امثال 2:‏4، 5‏)‏ آؤ ہُن اَسی بائبل دِیاں ایہو جہیاں سچائیاں تے غور کریئے جنہاں دا اَسی گہرائی نال مطالعیا کر سکنے آں۔‏

6.‏ (‏الف)‏ اِک مثال دے کے دَسو کہ اَسی ایہہ کیوں کہہ سکنے آں کہ یہوواہ دا مقصد ضرور پورا ہوئے گا؟ (‏ب)‏اَسی ایہہ کیوں کہہ سکنے آں کہ یہوواہ نے انساناں تے زمین لئی جو کجھ سوچیا اے، اوہ شروع توں ای اوہدا مقصد سی؟ (‏اِفسیوں 3:‏11‏)‏

⁶ ذرا خدا دے مقصد نُوں سمجھن لئی اِک مثال تے غور کرو۔ جے تُسی کِتے جانا ہوئے تے تُسی طے کردے او کہ توانوں کیہڑے رستے توں جانا  چاہی دا اے۔ پر جے اوہ رستہ بند ہوئے تے تُسی اپنی منزل تے نئیں پونچ سکو گے۔ پر یہوواہ نال ایس طرحاں نئیں اے۔ اوہنوں اپنی منزل یعنی مقصد تک پونچن لئی کوئی وی چیز روک نئیں سکدی۔ اوہ اپنے مقصد نُوں پورا کرن لئی کوئی وی رستہ تے کوئی وی طریقہ چُن سکدا اے۔ یہوواہ نے بائبل چ اپنے مقصد نُوں ہولی ہولی واضح کیتا۔ (‏اِفسیوں 3:‏11‏)‏ اوہ ایہنوں ضرور پورا کرے گا۔ اوہ ہر کم اِنج کردا اے کہ اوہدا مقصد پورا ہووے۔ (‏امثال 16:‏4‏)‏ ایہنوں پورا کرن لئی اوہ جیہڑے وی کم کردا اے، اوہناں دے نتیجے ہمیشاں قائم رہن گے۔ پر یہوواہ دا مقصد کیہہ اے تے جدوں ایہدی راہ چ رُکاوٹ کھڑی ہو گئی تے اوہنے کیہڑا فرق رستہ چُنیا؟‏

7.‏ جدوں آدم تے حوا نے یہوواہ دی نافرمانی کیتی تے اوہنے اپنے مقصد نُوں پورا کرن دے طریقے نُوں کیویں بدل لیا؟ (‏متی 25:‏34‏)‏

⁷ یہوواہ نے آدم تے حوا نُوں دَسیا سی کہ اوہناں لئی اوہدا کیہہ مقصد اے۔ ایس مقصد دے مطابق اوہناں نے ودھنا پھلنا سی، زمین نُوں بھر دینا سی تے سارے جانوراں اُتے اِختیار رکھنا سی۔ (‏پیدایش 1:‏28‏)‏ پر آدم تے حوا نے یہوواہ دی نافرمانی کیتی تے اِنج گُناہ انساناں چ آ گیا۔ پر ایہدی وجہ توں یہوواہ دا مقصد ختم نئیں ہویا۔ اوہنے بس ایہنوں پورا کرن دا طریقہ بدل لیا۔ ایس لئی اوہنے فوراً ایہہ ارادہ کر لیا کہ اوہ اسمان تے اِک بادشاہی قائم کرے گا جیہڑی زمین تے انساناں لئی اوہدے مقصد نُوں پورا کرے گی۔ ‏(‏متی 25:‏34 نُوں پڑھو۔)‏ فیر صحی وقت تے اوہنے اپنے پہلوٹھے پُتر یسوع نُوں زمین تے گھلیا تاکہ اوہ لوکاں نُوں اوہدی بادشاہی بارے دَسے تے اوہناں نُوں گُناہ تے موت توں چھڈان لئی اپنی جان فدیے دے طور تے دَوے۔ فیر یہوواہ نے اوہنوں زندہ کر دِتا تاکہ اوہ اسمان تے اوہدی بادشاہی دا بادشاہ بنے۔ پر خدا دے مقصد بارے ہور وی گلاں نیں جیہڑیاں سانوں سکھن دی لوڑ اے۔‏

8.‏ (‏الف)‏ بائبل دا سب توں خاص موضوع کیہہ اے؟ (‏ب)‏اِفسیوں 1:‏8-‏11 دے مطابق یہوواہ اپنے مقصد دے ذریعے ہور کیہڑا کم کرے گا؟ (‏پہلے صفحے دی تصویر نُوں ویکھو۔)‏

⁸ بائبل دا سب توں خاص موضوع ایہہ وے کہ جدوں یہوواہ اپنی بادشاہی دے ذریعے زمین لئی اپنے مقصد نُوں پورا کرے گا تے اوہدا ناں پاک ثابت ہوئے گا۔ یہوواہ دا مقصد بدل نئیں سکدا۔ اوہنے وعدہ کیتا اے کہ اوہ اپنے مقصد نُوں پورا کرن چ ضرور کامیاب ہوئے گا۔ (‏یسعیاہ 46:‏10، 11؛‏ عبرانیوں 6:‏17، 18‏)‏ جدوں اِنج ہوئے گا تے ہولی ہولی زمین عدن دے باغ وانگوں بن جائے گی جتھے آدم تے حوا دی اولاد وچوں نیک لوک ہمیشاں تک زندگی دا مزہ لین گے۔ (‏زبور 22:‏26‏)‏ ایہدے علاوہ یہوواہ دے ذہن چ اِک ہور مقصد وی اے۔ اوہ ایہہ وے کہ اوہ زمین تے اسمان اُتے رہن والے اپنے خادماں نُوں اِک مُٹھ کرے۔ فیر ایس کائنات دی ہر مخلوق یہوواہ نُوں اپنا حکمران تسلیم کرے گی۔ ‏(‏اِفسیوں 1:‏8-‏11 نُوں پڑھو۔)‏ اَسی واقعی ایس گل توں حیران ہو جانے آں کہ یہوواہ کِنّے زبردست طریقے نال اپنے مقصد نُوں پورا کر رہیا اے۔‏

9.‏ بائبل پڑھن نال اَسی مستقبل بارے کِنّاں کجھ جان سکنے آں؟‏

⁹ ذرا اوس پیشین‌گوئی تے غور کرو جیہڑی یہوواہ نے باغِ‌عدن چ کیتی سی۔ ایہہ پیشین‌گوئی پیدایش 3:‏15 چ لکھی اے۔‏ b ایہہ پیشین‌گوئی اوہناں واقعیاں وَل اشارہ کردی اے جیہڑے یہوواہ دے مقصد دے پورا ہون لئی ضروری سن۔ پر ایہناں واقعیاں نے ہزاراں سال بعد ہونا سی۔ مثال لئی، یہوواہ نے ابراہام نُوں دَسیا کہ اوہدی نسل توں مسیح آئے گا۔ (‏پیدایش 22:‏15-‏18‏)‏ فیر پیشین‌گوئی دے مطابق 33 عیسوی چ سَپ یعنی شیطان نے اوہدی اڈی تے وڈیا۔ (‏اعمال 3:‏13-‏15‏)‏ ایس پیشین‌گوئی دا آخری حصہ حالے پورا ہونا اے۔ آخری حصہ ایہہ وے کہ یسوع شیطان دے سر نُوں مدے گا تے ایہدے پورا ہون چ حالے 1000 سال توں زیادہ عرصہ لگے گا۔ (‏مکاشفہ 20:‏7-‏10‏)‏ بائبل چ ایس بارے ہور وی بوہت کجھ دَسیا گیا اے کہ شیطان دے نظام تے یہوواہ دی تنظیم وچ جیہڑی دُشمنی اے، اوہدا انجام کیہہ ہوئے گا۔‏

10.‏ (‏الف)‏ مستقبل چ کیہڑے واقعے ہون والے نیں؟ (‏ب)‏اَسی ایہناں واقعیاں لئی اپنے دل تے دماغ نُوں کیویں تیار کر سکنے آں؟ (‏فٹ‌نوٹ نُوں ویکھو۔)‏

 ¹⁰ ذرا بائبل چ دَسے گئے اوہناں واقعیاں تے غور کرو جیہڑے دُنیا نُوں ہلا کے رکھ دین گے۔ سب توں پہلاں قوماں امن تے سلامتی دا اعلان کرن گیاں۔ (‏1-‏تھسلُنیکیوں 5:‏2، 3‏)‏ فیر اوہ جھوٹھے مذہب تے حملہ کرن گیاں تے اچانک وڈی مصیبت شروع ہو جائے گی۔ (‏مکاشفہ 17:‏16‏)‏ ایس توں بعد انسان دا بیٹا یعنی یسوع ”‏بدّلاں چ بڑی شان تے اِختیار نال“‏ آوے گا۔ (‏متی 24:‏30‏)‏ فیر اوہ انساناں دی عدالت کرے گا تے بھیڈاں نُوں بکریاں توں وَکھ کرے گا۔ (‏متی 25:‏31-‏33،‏ 46‏)‏ شیطان وی ہتھ تے ہتھ دھر کے نئیں بیٹھا رہوے گا۔ اوہ اینی نفرت نال بھریا ہووے گا کہ اوہ ماجوج دے جوج یعنی قوماں دے گروہ نُوں بھڑکائے گا کہ اوہ یہوواہ دے بندیاں تے حملہ کرن۔ (‏حِزقی‌ایل 38:‏2،‏ 10، 11‏)‏ پاک روح نال مسح ہوئے جیہڑے مسیحی وڈی مصیبت دے دوران زمین تے ہون گے، اوہناں نُوں اسمان تے جان لئی جمع کر لیا جائے گا تاکہ اوہ اوتھے جا کے یسوع تے اسمانی فوجاں نال مل کے ہرمجدون دی جنگ لڑن۔ اِنج وڈی مصیبت ختم ہوئے گی۔‏ c (‏متی 24:‏31؛‏ مکاشفہ 16:‏14‏، 16)‏ فیر زمین تے یسوع دی ہزار سالہ بادشاہی شروع ہوئے گی۔—‏مکاشفہ 20:‏6‏۔‏

11.‏ ہمیشاں دی زندگی کیہو جہی ہوئے گی؟ (‏تصویر نُوں وی ویکھو۔)‏

¹¹ ہُن ذرا سوچو کہ مستقبل چ ایس توں وی اَگے کیہہ ہوئے گا۔ بائبل چ دَسیا گیا اے کہ یہوواہ نے ساڈے دل چ ہمیشاں تک زندہ رہن دی خواہش پائی اے۔ (‏واعظ 3:‏11‏)‏ ذرا سوچو کہ جدوں اَسی ہمیشاں تک زندہ رہواں گے تے یہوواہ نال ساڈا رشتہ کیہو جیہا ہو جائے گا۔ ایس حوالے نال کتاب ‏”‏ڈرا کلوز ٹو جیہوواہ“‏ دے صفحہ نمبر 319 چ اِک بڑی دلچسپ گل دَسی گئی اے۔ ایتھے لکھیا اے:‏ ”‏جدوں اَسی ہزاراں، لکھاں، ایتھوں تک کہ کروڑاں سال جی چُکے ہوواں گے تے اوہدوں تک اَسی یہوواہ بارے وی بوہت کجھ سکھ چُکے ہوواں گے۔ پر فیر وی سانوں محسوس ہوئے گا کہ حالے ہور وی بے‌شمار گلاں نیں جیہڑیاں یہوواہ بارے  سانوں جانن دی لوڑ اے۔ اَسی سوچ وی نئیں سکدے کہ ہمیشاں دی زندگی کِنّی خوب‌صورت تے دلچسپ ہوئے گی۔ تے اوہدے چ سب توں ودھیا گل ایہہ ہوئے گی کہ اَسی یہوواہ دے نیڑے ہوندے جاواں گے۔“‏ جدوں تک اوہ ویلا نئیں آندا، اَسی خدا دے کلام چوں ہور کیہڑیاں گلاں دا چنگی طرحاں مطالعیا کر سکنے آں؟‏

12.‏ اَسی اسمان دِیاں اُنچائیاں نُوں کیویں ویکھ سکنے آں؟ مثال دَوو۔‏

¹² اسمان دِیاں اُنچائیاں تے یہوواہ دا تخت بڑا ای شان‌دار اے۔ پاک کلام چ سانوں ایس منظر دی بس اِک جھلک ای ملدی اے۔ (‏یسعیاہ 33:‏5‏)‏ بائبل توں سانوں یہوواہ تے اوہدی تنظیم دے اسمانی حصے بارے بڑیاں حیران کر دین والیاں گلاں پتہ چلدیاں نیں۔ (‏یسعیاہ 6:‏1-‏4‏؛ دانی‌ایل 7:‏9، 10؛‏ مکاشفہ 4:‏1-‏6‏)‏ مثال لئی، اَسی بائبل چ اوس زبردست منظر بارے پڑھ سکنے آں جدوں اسمان کُھل گیا تے حزقی‌ایل نے خدا وَلّوں رویاواں ویکھیاں۔—‏حِزقی‌ایل 1:‏1‏۔‏

13.‏ عبرانیوں 4:‏14-‏16 دے مطابق یسوع اسمان تے جو کجھ کر رہیا اے، اوہدے بارے سوچ کے توانوں کیہو جیہا لگدا اے؟‏

¹³ ذرا ایس بارے وی سوچو کہ اسمان تے یسوع ساڈے بادشاہ تے رحم‌دل وڈے کاہن دے طور تے کیہہ کجھ کر رہیا اے۔ اوہدے وسیلے نال اَسی دُعا چ عظیم رحمت کرن والے خدا دے تخت دے سامنے حاضر ہو سکنے آں تے اوہدے کولوں ضرورت دے ویلے رحم تے مدد منگ سکنے آں۔ ‏(‏عبرانیوں 4:‏14-‏16 نُوں ویکھو۔)‏ سانوں ہر روز ایس گل تے سوچ وچار کرنا چاہی دا اے کہ یہوواہ تے یسوع نے ساڈے لئی کیہہ کجھ کیتا اے تے ہُن وی اوہ اسمان توں ساڈے لئی کیہہ کجھ کر رہے نیں۔ اوہناں دی محبت دا ساڈے دل تے گُوڑھا اثر ہونا چاہی دا اے تے ساڈے اندر ایہہ خواہش پیدا ہونی چاہی دی اے کہ اَسی جوش نال یہوواہ دی خدمت تے عبادت کریئے۔—‏2-‏کُرنتھیوں 5:‏14، 15‏۔‏

14.‏ یہوواہ تے یسوع لئی شکرگزاری ظاہر کرن دا اِک بہترین طریقہ کیہہ اے؟ (‏تصویراں نُوں وی ویکھو۔)‏

¹⁴ یہوواہ تے اوہدے پُتر یسوع لئی شکرگزاری ظاہر کرن دا اِک  بہترین طریقہ ایہہ وے کہ اَسی لوکاں دی مدد کریئے کہ اوہ یہوواہ دے گواہ تے یسوع دے شاگرد بنن۔ (‏متی 28:‏19، 20‏)‏ پولُس رسول نے وی خدا تے مسیح لئی شکرگزاری ظاہر کرن واسطے اِنج ای کیتا۔ اوہ جان‌دا سی کہ یہوواہ دی مرضی ایہہ وے کہ ہر طرحاں دے لوک نجات پان تے سچائی بارے صحی علم حاصل کرن۔ (‏1-‏تیمُتھیُس 2:‏3، 4‏)‏ ایس لئی اوہنے بڑی محنت نال مُنادی کیتی تاکہ اوہ کسے نہ کسے طرحاں کجھ لوکاں نُوں بچا لوے۔—‏1-‏کُرنتھیوں 9:‏22، 23‏۔‏

15.‏ زبور 1:‏2 دے مطابق سانوں کیہڑے کم توں خوشی ملے گی؟‏

¹⁵ پہلے زبور نُوں لکھن والے نے بالکل صحی کہیا سی کہ اوہ بندہ خوش رہندا اے تے کامیاب ہوندا اے جدی خوشی یہوواہ دی شریعت چ ہوندی اے تے دن رات جدا دھیان اوہدی شریعت تے رہندا اے۔ (‏زبور 1:‏1-‏3‏)‏ بائبل دا ترجمہ کرن والے اِک بندے نے ایہناں ایتاں بارے کہیا کہ ”‏اِک بندے دے اندر خدا کولوں رہنمائی حاصل کرن دی اینی زیادہ خواہش ہونی چاہی دی اے کہ اوہنوں ایس رہنمائی نُوں اوہدے کلام چ لبھنا چاہی دا اے، ایہدا مطالعیا کرنا چاہی دا اے تے ایہدے تے سوچ وچار کرن لئی وقت کڈھنا چاہی دا اے۔“‏ اوہنے ایہہ وی کہیا کہ ”‏جے اِک بندہ کسے دن بائبل نئیں پڑھ پاندا تے اوہنوں سوچنا چاہی دا اے کہ اوہدا اوہ دن ضائع ہو گیا اے۔“‏ جدوں تُسی ایس گل تے غور کرو گے کہ بائبل چ کیہڑیاں خاص گلاں نیں تے ویکھو گے کہ ایہہ ساریاں گلاں آپس چ کیویں جڑیاں ہوئیاں نیں تے توانوں بائبل پڑھن چ مزہ آئے گا۔ واقعی، جدوں اَسی خدا دے کلام دا گہرائی نال مطالعیا کرنے آں تے سانوں بڑی خوشی ملدی اے۔‏

16.‏ اگلے مضمون چ اَسی کیس بارے گل کراں گے؟‏

¹⁶ یہوواہ اپنے کلام چ سانوں جیہڑیاں سچائیاں دَسدا اے، اوہناں نُوں سمجھنا ایناں مشکل نئیں اے۔ اگلے مضمون چ اَسی ایہو جہی اِک سچائی بارے گل کراں گے۔ ایہہ سچائی یہوواہ دی عظیم ہیکل بارے وے جدا ذکر پولُس رسول نے عبرانیوں دے ناں اپنے خط چ کیتا۔ امید اے کہ سانوں ایہدے بارے سکھ کے بڑی خوشی ملے گی۔‏