1.‏ پرانے وقتاں چ یہوواہ نے اپنے بندیاں نُوں کیویں مضبوط کیتا؟‏

 پاک کلام چ دَسیا گیا اے کہ جیہڑے لوک مضبوط ایمان رکھدے سن اوہ بڑے ہمت والے سن۔ پر ایہدے باوجود اوہ کدی کدار کمزور وی محسوس کردے سن۔ مثال لئی، کجھ موقعیاں تے بادشاہ داؤد نے محسوس کیتا کہ اوہ پہاڑ وانگوں مضبوط اے پر کجھ موقعیاں تے اوہ بوہت گھبرا گیا۔ (‏زبور 30:‏7‏)‏ ایہدے علاوہ جدوں سمسون یہوواہ دی پاک روح نال بھر جاندا سی تے اوہدے اندر بوہت زیادہ طاقت آ جاندی سی۔ پر اوہنے وی ایس گل نُوں تسلیم کیتا کہ جے اوہدے کول یہوواہ دی طاقت نہ ہووے تے اوہ کمزور ہو جاوے گا تے باقی انساناں ورگا ہو جاوے گا۔ (‏قضاۃ 14:‏5، 6؛‏ 16:‏17‏)‏ یہوواہ دے ایہہ وفادار بندے صرف ایسے لئی مضبوط سن کیونکہ یہوواہ نے اوہناں نُوں طاقت دِتی سی۔‏

2.‏ پولُس رسول نے ایہہ کیوں کہیا کہ جدوں اوہ کمزور ہوندا اے، اوہدوں ای اوہ طاقت‌ور ہوندا اے؟ (‏2-‏کُرنتھیوں 12:‏9، 10‏)‏

² پولُس رسول ایس گل نُوں من‌دا سی کہ اوہنوں یہوواہ دی طاقت دی لوڑ اے۔ ‏(‏2-‏کُرنتھیوں 12:‏9، 10 نُوں پڑھو۔)‏ ساڈے وانگوں اوہنوں وی صحت دے مسئلیاں نال لڑنا پیندا سی۔ (‏گلتیوں 4:‏13، 14‏)‏ کدی کدار اوہنوں صحی کم کرنا وی مشکل لگدا سی۔ (‏رومیوں 7:‏18، 19‏)‏ تے کدی کدی اوہ بڑا پریشان ہوندا سی تے سوچدا سی کہ پتہ نئیں اوہدے نال کیہہ ہوئے گا۔ (‏2-‏کُرنتھیوں 1:‏8، 9‏)‏ پر ایہناں ساریاں گلاں دے باوجود جدوں وی پولُس کمزور ہوندا سی اوہدوں ای اوہ طاقت‌ور ہوندا سی۔ پر کیویں؟ کیونکہ یہوواہ اوہنوں طاقت دیندا سی۔ اوہی اوہنوں مضبوط کردا سی۔‏

3.‏ ایس مضمون چ کیہڑے سوالاں دے جواب دِتے جان گے؟‏

³ یہوواہ نے وعدہ کیتا اے کہ اوہ سانوں طاقت دَوے گا۔ (‏1-‏پطرس 5:‏10‏)‏ پر ایس طاقت نُوں حاصل کرن لئی سانوں وی کجھ کرنا پووے گا۔ ایہدے لئی ذرا اِک مثال تے غور کرو۔ اِک گڈی نُوں چلان دی طاقت اوہدے انجن چ ہوندی اے۔ پر فیر وی گڈی نُوں چلان لئی ڈرائیور نُوں ریس دبانی پیندی اے۔  ایسے طرحاں یہوواہ وی سانوں طاقت دین لئی تیار اے پر ایس طاقت نُوں حاصل کرن لئی سانوں کجھ قدم چُکن دی لوڑ اے۔یہوواہ نے سانوں طاقت دین لئی کیہڑیاں نعمتاں دِتیاں نیں؟ تے سانوں ایس طاقت نُوں حاصل کرن لئی کیہہ کرن دی لوڑ اے؟ اَسی ایہناں سوالاں دے جواب یہوواہ دے ایہناں تِن بندیاں دی زندگی تے غور کرن نال حاصل کراں گے:‏ یُوناہ نبی، یسوع دی ماں مریم تے پولُس رسول۔ اَسی ویکھاں گے کہ یہوواہ نے اوہناں نُوں طاقت کیویں دِتی تے اوہناں طریقیاں نال ای اوہ سانوں کیویں طاقت دیندا اے۔‏

4.‏ اَسی یہوواہ کولوں طاقت حاصل کرن لئی کیہہ کر سکنے آں؟‏

⁴ یہوواہ کولوں طاقت حاصل کرن دا اِک طریقہ دُعا اے۔ جدوں اَسی یہوواہ کولوں دُعا کرنے آں تے اوہ سانوں ایہو جہی طاقت دیندا اے جیہڑی انسانی طاقت توں ودھ کے وے۔ (‏2-‏کُرنتھیوں 4:‏7‏)‏ سانوں اوہدوں وی طاقت مِلدی اے جدوں اَسی یہوواہ دے کلام نُوں پڑھنے آں تے ایہدے تے سوچ وچار کرنے آں۔ (‏زبور 86:‏11‏)‏ یہوواہ نے بائبل چ ساڈے لئی جیہڑیاں گلاں لکھوائیاں نیں، اوہ بڑیاں اثردار نیں۔ (‏عبرانیوں 4:‏12‏)‏ جدوں تُسی یہوواہ کولوں دُعا کرو گے تے اوہدا کلام پڑھو گے تے توانوں اوہ طاقت ملے گی جدی وجہ توں تُسی ثابت‌قدم رہ سکو گے، اپنی خوشی نُوں قائم رکھ سکو گے تے مشکل توں مشکل ذمے‌داری نُوں وی پورا کر سکو گے۔ غور کرو کہ یہوواہ نے یُوناہ نبی نُوں کیویں طاقت دِتی۔‏

5.‏ یُوناہ نُوں ہمت تے طاقت دی لوڑ کیوں سی؟‏

⁵ یُوناہ نبی نُوں ہمت تے طاقت دی لوڑ سی۔ یہوواہ نے اوہنوں اِک شہر چ جان دی ذمے‌داری دِتی سی۔ پر یُوناہ اوتھے جان توں گھبرا رہیا سی ایس لئی اوہ کشتی چ بہہ کے کسے ہور علاقے چ بھج رہیا سی۔ ایہدا ایہہ نتیجہ نکلیا کہ سمندر چ بڑا خطرناک طوفان آ گیا جدی وجہ توں اوہدے نال بیٹھے دُوجے لوکاں دی جان وی خطرے چ پے گئی تے اوہ آپ وی مردے مردے بچیا۔اوہدے نال کشتی چ بیٹھے دُوجے لوکاں نے اوہنوں سمندر چ سُٹ دِتا۔ جدوں اوہدی اَکھ کُھلی تے اوہ اِک ایہو جہی جگہ تے سی جدے بارے اوہنے کدی سوچیا وی نئیں سی۔ اوہ اِک بوہت وڈی مچھی دے ٹیڈھ وچ سی تے اوہدے آلے دوالے نھیرا ای نھیرا سی۔ تواڈے خیال چ یُوناہ نُوں کیہو جیہا محسوس ہو رہیا ہوئے گا؟ کیہہ اوہنوں ایہہ لگ رہیا سی کہ ہُن اوہ مچھی دے ٹیڈھ چ ای مر جائے گا؟ یاں کیہہ اوہ سوچ رہیا سی کہ یہوواہ نے اوہنوں چھڈ دِتا اے؟ یُوناہ واقعی بڑا پریشان ہویا ہوئے گا۔‏

6.‏ یُوناہ 2:‏1، 2،‏ 7 دے مطابق جدوں یُوناہ مچھی دے ٹیڈھ وچ سی تے کیہڑی چیز نے اوہنوں ہمت تے طاقت دِتی؟‏

⁶ جدوں یُوناہ مچھی دے ٹیڈھ چ سی تے اوہنے یہوواہ کولوں طاقت حاصل کرن لئی کیہہ کیتا؟ اوہنے دُعا کیتی۔ ‏(‏یُوناہ 2:‏1، 2،‏ 7 نُوں پڑھو۔)‏ بھانویں کہ اوہنوں پتہ سی کہ اوہنے یہوواہ دی نافرمانی کیتی اے، پر فیر وی اوہنوں یقین سی کہ جے اوہ خاکساری نال یہوواہ کولوں دُعا کرے گا تے اوہدے کولوں معافی منگے گا تے یہوواہ اوہدی ضرور سُنے گا۔ ایہدے علاوہ یُوناہ نے پاک کلام دِیاں گلاں تے وی سوچ وچار کیتا۔ اَسی ایہہ گل کیوں کیہہ سکنے آں؟ یُوناہ 2 باب چ اوہدی جیہڑی دُعا لکھی اے، اوہدے چ بوہت ساریاں ایہو جہیاں گلاں نیں جیہڑیاں زبوراں چ لکھیاں نیں۔ (‏مثال لئی، یُوناہ 2:‏2،‏ 5؛‏ زبور 69:‏1؛‏ 86:‏7 تے غور کرو۔)‏ ایہہ گل صاف ظاہر اے کہ یُوناہ اوہناں ایتاں بارے چنگی طرحاں جان‌دا سی۔ تے جدوں اوہنے مصیبت دی گھڑی چ ایہناں تے غور کیتا تے اوہنوں ایس گل دا یقین ہو گیا کہ یہوواہ اوہدی مدد ضرور کرے گا۔ بعد چ مچھی نے یُوناہ نُوں خشک زمین تے اُگل دِتا۔ ہُن یُوناہ یہوواہ وَلّوں مِلن والی نوِیں ذمے‌داری نُوں پورا کرن لئی تیار سی۔—‏یُوناہ 2:‏10–‏3:‏4‏۔‏

7، 8.‏ تائیوان چ رہن والے اِک بھرا نے مشکلاں چ طاقت حاصل کرن لئی کیہہ کیتا؟‏

⁷ جدوں اَسی مشکلاں چوں لنگھ رہے ہُنے آں تے سانوں یُوناہ دی مثال توں بوہت مدد مل سکدی اے۔ مثال لئی تائیوان چ رہن والا اِک بھرا جدا ناں زیمن b اے، اوہنوں صحت دے کافی وڈے وڈے مسئلے نیں۔ ایہدے علاوہ یہوواہ تے ایمان رکھن دی وجہ توں اوہدے گھر والے وی اوہدی مخالفت کردے نیں۔ اوہ یہوواہ کولوں طاقت حاصل کرن لئی دُعا کردا اے تے ذاتی مطالعیا کردا اے۔ اوہ کہندا اے:‏ ”‏جدوں مسئلے کھڑے ہوندے نیں تے مَیں ایناں پریشان ہو جانا واں کہ میرے اندر ذاتی مطالعیا کرن دی وی ہمت  نئیں ہوندی۔“‏ پر بھرا زیمن مدد لئی یہوواہ تے بھروسا کردا اے۔ اوہ کہندا اے:‏ ”‏سب توں پہلاں مَیں یہوواہ کولوں دُعا کرنا واں۔ فیر مَیں ہینڈزفری لا کے گیت سننا واں۔ کدی کدار تے مَیں ایہناں گیتاں نُوں ہولی جہی آواز چ گانا وی آں۔ مَیں اوہدوں تک گیت گاندا رہنا واں جدوں تک مینوں سکون نئیں مل جاندا۔ فیر مَیں ذاتی مطالعیا کرنا واں۔“‏

⁸ ذاتی مطالعیا کرن نال بھرا زیمن نُوں مدد ملی اے کہ اوہ مشکلاں دا مقابلہ ہمت نال کر سکے۔ مثال لئی،اِک واری اوہدا اِک بوہت وڈا آپریشن ہویا جدے بعد اِک نرس نے اوہنوں دَسیا کہ اوہدے اندر خون دی بوہت زیادہ کمی ہو گئی اے، ایس لئی اوہنوں خون لوانا پووے گا۔ پر اپنے آپریشن توں پہلے والی رات بھرا نے اِک ایہو جہی بھین بارے پڑھیا سی جدا اوہی آپریشن ہویا سی جیہڑا بھرا زیمن دا ہونا سی۔ بھرا زیمن دے اندر تے خون دی اینی زیادہ کمی نئیں ہوئی سی جِنّی اوس بھین دے اندر ہو گئی سی۔ پر فیر وی اوہنے خون نئیں لوایا سی تے اوہ ٹھیک وی ہو گئی سی۔ ایس تجربے توں بھرا نُوں مدد ملی کہ اوہ اپنے ایمان تے قائم رہوے تے یہوواہ دا وفادار رہوے۔‏

9.‏ جے کسے مشکل دی وجہ توں تُسی اپنے آپ نُوں کمزور محسوس کردے او تے تُسی کیہہ کر سکدے او؟ (‏تصویراں نُوں وی ویکھو۔)‏

⁹ کیہہ کدی تواڈے نال اِنج ہویا اے کہ تُسی کسے مشکل چ اینے پریشان ہو گئے کہ تواڈے کولوں صحی طرحاں دُعا وی نئیں ہو پا رہی سی؟ یاں تواڈے اندر مطالعیا کرن دی وی ہمت نئیں سی؟ یاد رکھو کہ یہوواہ تواڈی صورتحال نُوں چنگی طرحاں سمجھدا اے۔ ایس لئی بھانویں تُسی دُعا چ زیادہ کجھ نئیں وی کہہ پاندے تے فیر وی تُسی ایس گل دا یقین رکھ سکدے او کہ اوہ توانوں اوہ سب کجھ دَوے گا جدی توانوں لوڑ اے۔ (‏اِفسیوں 3:‏20‏)‏ جے توانوں بیماری یاں کسے ہور پریشانی دی وجہ توں بائبل پڑھنا تے ایہدے تے سوچ وچار کرنا مشکل لگدا اے تے تُسی بائبل یاں کتاباں رسالیاں دی آڈیو ریکارڈنگ سن سکدے او۔ توانوں کوئی گیت سنن تے jw.org تے کوئی ویڈیو ویکھن نال وی مدد مل سکدی اے۔ جدوں تُسی یہوواہ کولوں دُعا کرو گے تے ایہدا جواب حاصل کرن لئی بائبل پڑھو گے نالے یہوواہ وَلّوں مِلن والیاں دُوجیاں سہولتاں نُوں استمال کرو گے تے اوہ توانوں طاقت ضرور دَوے گا۔‏

10.‏ ساڈے بھین بھرا ساڈی ہمت کیویں ودھاندے نیں؟‏

¹⁰ یہوواہ ساڈے بھین بھراواں دے ذریعے سانوں طاقت دے سکدا اے۔ جدوں اَسی مشکلاں دا سامنا کرنے آں یاں کسے مشکل ذمے‌داری نُوں پورا کرن دی کوشش کر رہے ہُنے آں تے سانوں بھین بھراواں توں بڑی ہمت تے طاقت مل سکدی اے۔ (‏کُلسّیوں 4:‏10، 11‏)‏ سانوں خاص طور تے مصیبت دے ویلے چ اپنے بھین بھراواں دی بڑی ضرورت ہوندی اے۔ (‏امثال 17:‏17‏)‏ جدوں اَسی کمزور محسوس کرنے آں تے بھین بھرا ساڈیاں  ضرورتاں نُوں پورا کردے نیں، سانوں تسلی دیندے نیں تے یہوواہ دے نیڑے رہن چ ساڈی مدد کردے نیں۔ غور کرو کہ یسوع دی ماں مریم نُوں دُوجیاں توں کیویں ہمت ملی۔‏

11.‏ مریم نُوں ہمت دی لوڑ کیوں سی؟‏

¹¹ مریم نُوں اوس ذمے‌داری نُوں پورا کرن لئی بڑی ہمت دی لوڑ سی جیہڑی اوہنوں یہوواہ نے دِتی سی۔ سوچو کہ جدوں جبرائیل فرشتے نے اوہنوں دَسیا ہوئے گا کہ اوہ شادی توں بغیر ای حاملہ ہوئے گی تے اوہنوں کیہو جیہا محسوس ہویا ہوئے گا۔ اوہنوں تے بچے پالن دا وی کوئی تجربہ نئیں سی۔ پر اوہنوں اِک ایہو جہے بچے دی دیکھ‌بھال کرنی سی جنہے بعد چ چل کے مسیح بننا سی۔ ایہدے علاوہ اوہنوں اپنے منگیتر یوسف نُوں ایہہ دَسنا کِنّاں مشکل لگیا ہوئے گا کہ اوہ جنسی تعلق قائم کیتے بغیر ای ماں بنن والی اے۔—‏لُوقا 1:‏26-‏33‏۔‏

12.‏ لُوقا 1:‏39-‏45 دے مطابق مریم نُوں ہمت تے طاقت کیویں ملی؟‏

¹² مریم نُوں ایس اہم تے مشکل ذمے‌داری نُوں پورا کرن لئی ہمت تے طاقت کیویں ملی؟ اوہنے دوجیاں کولوں مدد لئی۔ مثال لئی، اوہنے اپنی ذمے‌داری بارے جبرائیل توں ہور معلومات لئی۔ (‏لُوقا 1:‏34‏)‏ ایہدے تھوڑے چِر بعد ای اوہ یہوداہ دے پہاڑی علاقے دا سفر کر کے اپنی رشتے‌دار الیشبع نُوں مِلن گئی۔ ایہہ سفر اوہدے لئی بڑا چنگا ثابت ہویا۔ الیشبع نے مریم دی تعریف کیتی تے یہوواہ دے اِلہام نال اوہدے ہون والے بچے بارے اِک پیشین‌گوئی کیتی جدے توں اوہنوں بڑا حوصلہ ملیا ہوئے گا۔ ‏(‏لُوقا 1:‏39-‏45 نُوں پڑھو۔)‏ مریم نے کہیا کہ یہوواہ نے اپنے بازو نال بڑے زبردست کم کیتے نیں۔ (‏لُوقا 1:‏46-‏51‏)‏ یہوواہ نے جبرائیل فرشتے تے الیشبع دے ذریعے مریم نُوں ہمت تے طاقت دِتی۔‏

13.‏ بولیویا چ رہن والی اِک بھین نے جدوں دُوجے بھین بھراواں کولوں مدد لئی تے اوہنوں کیہہ فائدہ ہویا؟‏

¹³ مریم وانگوں توانوں وی اپنے ہم‌ایماناں توں ہمت تے طاقت مل سکدی اے۔ بولیویا چ رہن والی اِک بھین جدا ناں ڈیسوری اے، اوہنوں وی ہمت تے حوصلے دی لوڑ سی۔ اوہدے ابو نُوں اِک ایہو جہی بیماری ہو گئی جدا کوئی علاج نئیں سی ایس لئی اوہنوں ہسپتال چ داخل کرانا پیا۔ بھین ڈیسوری پورے دل نال اپنے ابو دی خدمت کرن لگ پئی۔ (‏1-‏تیمُتھیُس 5:‏4‏)‏ پر اِنج کرنا اوہدے لئی کدی کدی مشکل وی ہوندا سی۔ اوہ کہندی اے:‏ ”‏کئی واری مینوں محسوس ہوندا سی کہ ہُن میری ہمت جواب دے گئی اے۔“‏ کیہہ اوہنے دُوجیاں کولوں مدد منگی؟ شروع چ اوہنے اِنج نئیں کیتا۔ اوہ کہندی اے:‏ ”‏مَیں اپنے بھین بھراواں نُوں تکلیف نئیں دینا چاہنی ساں۔ ایس لئی مَیں سوچیا کہ یہوواہ ای میری مدد کرے گا۔ پر فیر مینوں احساس ہویا کہ اپنے آپ نُوں دوجیاں توں وکھرا کرن نال اصل چ مَیں کلّی اپنیاں مشکلاں نُوں حل کرن دی کوشش کر رہی ساں۔“‏ (‏امثال 18:‏1‏)‏ ایس لئی بھین ڈیسوری نے ایہہ فیصلہ کیتا کہ اوہ اپنے کجھ دوستاں نُوں خط لکھے گی تے اوہناں نُوں اپنے حالات بارے دَسے گی۔ اوہ کہندی اے:‏ ”‏مَیں لفظاں چ نئیں دَس سکدی کہ بھین بھراواں دی وجہ توں مینوں کِنّی ہمت تے طاقت ملی اے۔ اوہ ہسپتال چ ساڈے لئی کھانا لیائے تے اوہناں نے میرے نال ایہو جہیاں ایتاں پڑھیاں جنہاں توں مینوں بڑی تسلی ملی۔“‏ ایہہ جان کے سانوں کِنّاں اچھا لگدا اے کہ اَسی کلّے نئیں آں۔ اَسی یہوواہ دے اِک وڈے خاندان دا حصہ واں؛ اِک ایہو جیہا خاندان جیہڑا ساڈی مدد کردا اے، ساڈے دُکھ چ شریک ہوندا اے تے ساڈیاں تکلیفاں چ ساڈے نال کھلوندا اے۔‏

14.‏ سانوں بزرگاں دی مدد نُوں کیوں قبول کرنا چاہی دا اے؟‏

¹⁴ یہوواہ بزرگاں دے ذریعے وی سانوں ہمت تے طاقت دیندا اے۔ بزرگ یہوواہ وَلّوں اِک تحفہ نیں۔ اوہ سانوں مضبوط تے تازہ‌دم کردے نیں۔ (‏یسعیاہ 32:‏1، 2‏)‏ ایس لئی جدوں تُسی پریشان ہووو تے بزرگاں نُوں اپنی پریشانی دَسو۔ تے جدوں اوہ تواڈی مدد کرن تے ایہنوں قبول کرو۔ بزرگاں دے ذریعے یہوواہ توانوں مضبوط بنا سکدا اے۔‏

15.‏ سارے مسیحیاں کول کیہڑی خاص امید اے؟‏

¹⁵ بائبل چ چنگے مستقبل دی جیہڑی امید دِتی گئی اے، اوہدے توں وی سانوں طاقت مل سکدی اے۔ (‏رومیوں 4:‏3،‏ 18-‏20‏)‏ ساڈے کول امید اے کہ اَسی ہمیشاں تک زندہ رہ سکنے آں۔ کجھ مسیحی زمین تے ہمیشاں تک زندہ رہن گے تے کجھ اسمان تے۔ ایس امید دی وجہ توں سانوں ہمت مِلدی اے کہ اَسی مشکلاں نُوں برداشت کر سکئے تے کلیسیا چ اپنیاں ذمے‌داریاں نُوں نبھا سکئے۔ (‏1-‏تھسلُنیکیوں 1:‏3‏)‏ ایسے امید نے پولُس رسول نُوں وی ہمت دِتی سی۔‏

16.‏ پولُس رسول نُوں ہمت تے طاقت دی لوڑ کیوں سی؟‏

 ¹⁶ پولُس رسول نُوں وی ہمت تے طاقت دی لوڑ سی۔ کُرنتھس دے مسیحیاں دے ناں اپنے خط چ اوہنے اپنے آپ نُوں اِک مٹی دے برتن وانگوں کہیا کیونکہ اوہنوں دبایا جاندا سی، پریشان کیتا جاندا سی، اذیت دِتی جاندی سی تے تھلے سُٹیا جاندا سی۔ ایتھوں تک کہ کدی کدی اوہدی زندگی وی خطرے چ پے جاندی سی۔ (‏2-‏کُرنتھیوں 4:‏8-‏10‏)‏ پولُس نے ایہناں مشکلاں بارے اپنے تیجے دورے دے دوران لکھیا۔ اوس ویلے تک اوہنوں نئیں پتہ سی کہ اوہدے تے ہور وی مشکلاں آن گیاں۔ بعد چ لوکاں دی اِک بھیڑ نے اوہدے تے حملہ کیتا، اوہنوں گِرفتار کیتا گیا، سمندری سفر دے دوران اوہدا جہاز تباہ ہو گیا تے اوہنوں قید وی کیتا گیا۔‏

17.‏ 2-‏کُرنتھیوں 4:‏16-‏18 دے مطابق کیہڑی چیز نے پولُس نُوں طاقت دِتی تاکہ اوہ مصیبتاں نُوں برداشت کر سکے؟‏

¹⁷ اپنی امید تے سوچ وچار کرن نال پولُس نُوں مصیبتاں نُوں برداشت کرن دی ہمت ملی۔ ‏(‏2-‏کُرنتھیوں 4:‏16-‏18 نُوں پڑھو۔)‏ اوہنے کُرنتھس دے مسیحیاں نُوں لکھیا کہ بھانویں اوہدا جسم باہروں ختم ہوندا جا رہیا اے پر فیر وی اوہ ایہدی وجہ توں ناامید نئیں اے۔ پولُس نے اپنا دھیان مستقبل تے رکھیا۔ پولُس دی نظر چ اسمان تے ہمیشاں تک زندہ رہن دی امید اینی شان‌دار سی کہ اوہدے لئی اوہ کسے وی مصیبت نُوں برداشت کرن لئی تیار سی۔ اوہنے اپنی ایس امید تے سوچ وچار کیتا تے ایہدی وجہ توں اوہنے ایہہ محسوس کیتا کہ اوہ دن بدن نواں بن‌دا جا رہیا اے۔‏

18.‏ مُردیاں دے جی اُٹھن دی اُمید توں بھرا تیومیر تے اوہدے خاندان نُوں کیویں طاقت ملی اے؟‏

¹⁸ بلغاریہ چ رہن والا اِک بھرا جدا ناں تیومیر اے، اوہنوں چنگے مستقبل دی امید توں بڑی ہمت تے طاقت مِلدی اے۔ کجھ سال پہلاں اوہدا چھوٹا بھرا اِک ایکسیڈنٹ چ فوت ہو گیا۔ ایہدی وجہ توں بھرا تیومیر بوہت صدمے چ رہیا۔ ایس غم دا سامنا کرن لئی اوہنے تے اوہدے خاندان نے ایس گل تے سوچ وچار کیتا کہ جدوں مُردیاں نُوں زندہ کیتا جائے گا تے اوہ ویلا کیہو جیہا ہوئے گا۔ بھرا کہندا اے:‏ ”‏اَسی ایس بارے گل کرنے ساں کہ جدوں میرا بھرا زندہ ہوئے گا تے اَسی اوہنوں کتھے ملاں گے تے اوہدے لئی کیہڑے کیہڑے کھانے بنانواں گے۔ نالے اَسی اوہدے زندہ ہون دی خوشی چ جیہڑی پارٹی رکھاں گے، اوہدے چ کنہوں کنہوں بلا‌واں گے تے اَسی اوہنوں آخری زمانے بارے کیہہ کجھ دَساں گے۔“‏ بھرا تیومیر دَسدا اے کہ جدوں اوہ تے اوہدا خاندان ایس شان‌دار امید تے سوچ وچار کردے نیں تے اوہناں نُوں طاقت مِلدی اے کہ اوہ  ثابت‌قدم رہن تے اوس وقت دا اِنتظار کردے رہن جدوں یہوواہ اوہدے بھرا نُوں زندہ کرے گا۔‏

19.‏ تُسی اپنی امید نُوں ہور پکا کرن لئی کیہہ کر سکدے او؟ (‏تصویر نُوں وی ویکھو۔)‏

¹⁹ تُسی اپنی امید نُوں ہور پکا کیویں کر سکدے او؟ مثال لئی، جے تُسی زمین تے ہمیشاں تک زندہ رہن دی امید رکھدے او تے بائبل چ نوِیں دُنیا بارے پڑھو تے ایہدے تے سوچ وچار کرو۔ (‏یسعیاہ 25:‏8؛‏ 32:‏16-‏18‏)‏ سوچو کہ اوہدوں زندگی کیہو جہی ہوئے گی۔ تصور کرو کہ تُسی نوِیں دُنیا چ او۔ سوچو کہ توانوں کیہہ نظر آ رہیا اے؟ تُسی کیہڑیاں آوازاں سن رہے او؟ تے توانوں کیہو جیہا محسوس ہو رہیا اے؟ نوِیں دُنیا بارے ہور چنگی طرحاں سوچن لئی ساڈیاں کتاباں تے رسالیاں چ اوس وقت دِیاں تصویراں ویکھو جدوں زمین عدن دے باغ وانگوں سوہنی ہوئے گی۔ یاں فیر تُسی ایہناں گیتاں دی ویڈیوز وی ویکھ سکدے او:‏ ‏”‏نویں دُنیا آ گئی‏“‏،‏ ‏”‏امن بے‌اِنتہا‏“‏ تے ‏”‏سوچو کہ کیسی ہوئے گی دُنیا‏۔“‏ جدوں اَسی نوِیں دُنیا دی امید نُوں یاد رکھاں گے تے سانوں محسوس ہوئے گا کہ ساڈیاں مشکلاں بس تھوڑی دیر لئی نیں تے سخت نئیں نیں۔ (‏2-‏کُرنتھیوں 4:‏17‏)‏ یہوواہ نے توانوں جیہڑی اُمید دِتی اے، اوہدے ذریعے اوہ توانوں طاقت دَوے گا۔‏

20.‏ جدوں اَسی کمزور محسوس کرنے آں تے اَسی طاقت حاصل کرن لئی کیہہ کرسکنے آں؟‏

²⁰ جدوں اَسی اپنے آپ نُوں کمزور محسوس کرنے آں تے یہوواہ توں سانوں طاقت مِلدی اے۔ (‏زبور 108:‏13‏)‏ یہوواہ نے سانوں پہلے توں اوہ نعمتاں دے دِتیاں نیں جنہاں توں سانوں طاقت مل سکدی اے۔ ایس لئی جدوں توانوں کسے ذمے‌داری نُوں پورا کرن، کسے مشکل نُوں برداشت کرن یاں اپنی خوشی نُوں قائم رکھن لئی مدد دی لوڑ ہوندی اے تے یہوواہ کولوں دل کھول کے دُعا کرو تے ذاتی مطالعیا کرن نال اوہدے کولوں رہنمائی حاصل کرو۔ بھین بھراواں دی مدد نُوں قبول کرو۔ چنگے مستقبل دی امید بارے سوچدے رہوو۔ فیر خدا اپنی عظیم قدرت دے ذریعے ضرورت دے مطابق توانوں طاقت دَوے گا تاکہ تُسی ہر صورت چ صبر تے خوشی نال ثابت‌قدم رہوو۔—‏کُلسّیوں 1:‏11‏۔‏