ایس سال چ تنظیم نے عبادتاں چ کجھ تبدیلیاں کیتیاں جنہاں دی وجہ توں بائبل سٹوڈنٹس دا ایکا مضبوط ہویا۔ ‏”‏مینارِنگہبانی“‏ چ اِک ایت تے اوہدے تے تبصرہ آنا شروع ہو گیا جدے تے بھین بھرا ہفتہ‌وار عبادت چ غور کردے سن۔ ایہدے علاوہ بائبل سٹوڈنٹس نے اِک کیلنڈر وی تیار کرنا شروع کیتا جدے چ ہفتہ‌وار عبادت چ غور کرن لئی ایت تے گیت ہوندا سی۔ ایس گیت نُوں اوہ اپنے ذاتی مطالعے تے خاندانی عبادت چ وی گا سکدے سن۔‏

بائبل سٹوڈنٹس ہفتہ‌وار عبادت چ ساریاں سامنے کھلو کے ایہہ دَسدے سن کہ اوہناں نُوں مُنادی چ کیہڑا چنگا تجربہ ہویا تے اوہ کیہڑیاں گلاں لئی یہوواہ دے شکرگزار نیں۔ ایہدے علاوہ اوہ گیت وی گا سکدے سن، ایتھوں تک کہ دُعا وی کر سکدے سن۔ بھین ایوا برنی دا بپتسمہ 1923 چ ہویا جدوں اوہ 15 سال دی سی۔ اوہ کہندی اے:‏ ”‏ہفتہ‌وار عبادتاں چ اَسی کھلو کے کجھ ایس طرحاں گل شروع کر سکنے ساں:‏ ”‏خدا نے میرے لئی جو کجھ وی کیتا اے، مَیں اوہدے لئی بڑی شکرگزار آں۔“‏“‏ کجھ بھراواں نُوں کھلو کے ساریاں سامنے ایہہ گل دَسنا بوہت پسند سی۔ بھین ایوا دَسدی اے:‏ ”‏اِک وڈیرا بھرا گوڈوِن بوہت ساریاں ایہو جہیاں چیزاں بارے دَسدا سی جنہاں بارے اوہ یہوواہ دا شکرگزار سی۔ جدوں اوہدی بیوی ویکھدی سی کہ عبادت دا نگہبان ویکھ رہیا اے کہ گل زیادہ لمی ہو گئی اے تے اوہ اپنے شوہر دے کوٹ نُوں پچھوں کھچ‌دی سی تے فیر اوہ بہہ جاندا سی۔“‏

مہینے چ اِک وار ہر کلیسیا اِک خاص ہفتہ‌وار عبادت کردی سی۔ ایس عبادت بارے 1 اپریل 1923 دے ‏”‏مینارِنگہبانی“‏ چ ایہہ دَسیا گیا سی:‏ ”‏عبادت دا اَدھا حصہ مُنادی چ ہون والے چنگے تجربیاں تے بھین بھراواں دا حوصلہ ودھان لئی ہونا چاہی دا اے۔ سانوں یقین اے کہ ایہناں عبادتاں دی وجہ توں بھین بھراواں دا ایکا مضبوط ہوئے گا تے اوہناں دی آپس چ دوستی وی ودھے گی۔“‏

کینیڈا چ رہن والا اِک مبشر چارلس مارٹن جدی عمر 19 سال سی، اوہنوں ایہناں عبادتاں توں بڑا فائدہ ہویا۔ بعد چوں اوہنے دَسیا:‏ ”‏ایہناں عبادتاں چ ای مَیں پہلی وار سکھیا کہ مَیں مُنادی چ کیویں گل کرنی اے۔ بھین بھرا اکثر ایہہ دَسدے سن کہ اوہناں نُوں گھر گھر مُنادی کردے ویلے کیہڑے چنگے تجربے ہوئے۔ ایہدے توں مَیں وی ایہہ جان سکیا کہ مَیں مُنادی چ کیہہ کہہ سکنا واں تے لوکاں دے کسے اِعتراض دا جواب کیویں دے سکنا واں۔“‏

تنظیم نے مُنادی کرن لئی کجھ خاص دن طے کیتے۔ ایہناں دی وجہ توں وی بھین بھراواں دا ایکا مضبوط ہویا۔ 1 اپریل 1923 دے  ‏”‏مینارِنگہبانی“‏ چ ایہہ اعلان کیتا گیا:‏ ”‏اَسی سارے مُنادی دے کم لئی اِک مُٹھ آں۔ منگل 1 مئی 1923 نُوں مُنادی دے کم لئی مقرر کیتا گیا اے۔ ایسے طرحاں ہر مہینے دا پہلا منگل مُنادی دے کم لئی ہوئے گا۔ ساریاں کلیسیاواں دے سارے مبشراں نُوں ایس کم چ کجھ نہ کجھ حصہ ضرور لینا چاہی دا اے۔“‏

نوجوان مبشراں نے وی ایس کم چ حصہ لیا۔ بھین ہیزل برفورڈ جیہڑی اوس ویلے صرف 16 سال دی سی، دَسدی اے:‏ ”‏بلیٹن چ گل بات لئی مشورے دِتے جاندے سن تاکہ اَسی اوہناں نُوں یاد کر سکئے۔‏ a مَیں اپنے نانا دے نال بڑے جوش نال مُنادی دے کم چ حصہ لینی ساں۔“‏ پر بھین ہیزل نے ایہہ نئیں سوچیا سی کہ بھین بھراواں وچوں کوئی ایس گل تے اِعتراض کرے گا۔ اوہنے دَسیا:‏ ”‏اِک وڈیرے بھرا نُوں ایہہ گل چنگی نئیں لگدی سی کہ مَیں مُنادی چ لوکاں نال گل بات کراں۔ اوس ویلے کجھ بائبل سٹوڈنٹس ایس گل نُوں نئیں سمجھدے سن کہ ہر کسے نُوں یہوواہ دی وڈیائی کرنی چاہی دی اے تے ایہناں چ نوجوان تے کنواریاں وی شامل نیں۔“‏ (‏زبور 148:‏12، 13‏)‏ پر بھین ہیزل مُنادی کرن توں نہ رُکی۔ بعد چوں اوہنے گلئیڈ سکول دی دُوجی کلاس توں تربیت حاصل کیتی تے مشنری بن کے ملک پانامہ چلی گئی۔ وقت دے نال نال بھین بھراواں نے وی اپنی سوچ بدل لئی۔‏

کنونشناں نے وی بھین بھراواں دا ایکا مضبوط کیتا۔ ایہناں وچوں کئی کنونشناں تے اِک دن خاص طور تے مُنادی کرن لئی رکھیا جاندا سی۔ مثال لئی کینیڈا دے شہر ونی‌پیگ چ جیہڑی کنونشن ہوئی، اوہدے چ سارے بھین بھراواں نُوں کہیا گیا کہ اوہ 31 مارچ والے دن اوس شہر چ مُنادی کرن۔ ایہدے بڑے چنگے نتیجے نکلے۔ 5 اگست نُوں ونی‌پیگ چ اِک ہور کنونشن ہوئی جدے چ کوئی 7000 لوک آئے۔ ایہہ اوس زمانے چ کینیڈا دی کسے کنونشن تے آن والیاں دی سب توں زیادہ تعداد سی۔‏

1923 چ جیہڑیاں کنونشناں ہوئیاں اوہناں وچوں سب توں خاص کیلیفورنیا دے شہر لاس اینجلس چ ہون والی کنونشن سی جیہڑی 18 توں 26 اگست نُوں ہوئی۔ کنونشن توں کجھ ہفتیاں پہلاں اخباراں چ ایہدے اشتہار دِتے گئے تے بائبل سٹوڈنٹس نے ایہدے 5 لکھ توں زیادہ دعوت‌نامے دِتے۔ اوہناں نے گڈیاں تے ایہدے وڈے وڈے بینر وی لائے۔‏

25 اگست ہفتے والے دن بھرا رتھرفورڈ نے اِک تقریر دِتی جدا عنوان  سی:‏ ”‏بھیڈاں تے بکریاں۔“‏ ایس تقریر چ اوہنے دَسیا کہ ”‏بھیڈاں“‏ توں مُراد اوہ لوک نیں جیہڑے ہمیشاں دی زندگی دی راہ تے چلنا چاہندے نیں تے اوہ زمین تے فردوس چ رہن گے۔ اوہنے ساریاں سامنے اِک پرچہ وی پڑھیا جدا عنوان سی:‏ ”‏اِک آگاہی۔“‏ (‏مکاشفہ 18:‏2،‏ 4‏)‏ ایس پرچے چ مسیحی فرقیاں دا پردہ فاش کیتا گیا سی تے نیک دل لوکاں نُوں ہلاشیری دِتی گئی سی کہ اوہ اپنے آپ نُوں وڈے بابل توں الگ کر لین۔ بعد چ بائبل سٹوڈنٹس نے ایس پرچے دِیاں لکھاں کاپیاں نُوں بڑے جوش نال پوری دُنیا چ وَنڈیا۔‏

کنونشن دے آخری دن بھرا رتھرفورڈ نے اِک تقریر دِتی جدا عنوان سی:‏ ”‏ساریاں قوماں ہرمجدون وَل ودھ رہیاں نیں پر لکھاں لوک جیہڑے اَج زندہ نیں کدی نئیں مرن گے۔“‏ ایس تقریر نُوں 30 ہزار توں زیادہ لوکاں نُوں سُنیا۔ بائبل سٹوڈنٹس نُوں امید سی کہ اینے زیادہ لوک آن گے ایس لئی اوہناں نے اِک وڈا سٹیڈیم بُک کیتا جدا ناں لاس اینجلس کولیسیم سی جیہڑا اوس ویلے نواں نواں بنیا سی۔ بھراواں نے سٹیڈیم دے لاؤڈ سپیکراں نُوں استمال کیتا تاکہ سارے لوک صحی طرحاں سُن سکن۔ ایہہ ٹیکنالوجی اوس ویلے نوِیں نوِیں آئی سی۔ایس توں وی زیادہ لوکاں نے ریڈیو تے پروگرام سُنیا۔‏

1923 چ افریقہ، یورپ،اِنڈیا تے جنوبی امریکہ چ مُنادی دے کم چ بوہت ترقی ہوئی۔ اِنڈیا چ خدمت کرن والا اِک بھرا جوزف اپنی بیوی تے چھ بچیاں دی دیکھ‌بھال کرن دے نال نال ہندی، تامل، تیلگو تے اُردو زبان چ کتاباں تے رسالیاں نُوں تیار کرن دے کم نُوں وی ویکھدا سی۔‏

دو بائبل سٹوڈنٹس ایلفرڈ جوزف تے لینرڈ بلیک‌مین جیہڑے سیرالیون چ خدمت کر رہے سن، اوہناں نے بروکلن چ ساڈے ہیڈکوارٹر نُوں خط چ لکھیا کہ اوہناں نُوں ہور مبشراں دی لوڑ اے۔ 14 اپریل 1923 نُوں اوہناں دی درخاست دا جواب آ گیا۔ بھرا ایلفرڈ نے دَسیا:‏ ”‏ہفتے دی رات نُوں مینوں اِک فون آیا۔“‏ فون تے کسے نے بڑی بھاری آواز چ اوہنوں پچھیا:‏ ”‏کیہہ تُسی ای اوہ جنہے واچ‌ٹاور سوسائٹی نُوں خط لکھ کے کہیا سی کہ اوہناں نُوں مبشراں دی لوڑ اے؟“‏ بھرا ایلفرڈ نے جواب دِتا:‏ ”‏ہاں جی۔“‏ اَگوں جواب آیا کہ ”‏بھراواں نے مینوں تواڈے کول گھلیا اے۔“‏ اوہ فون بھرا ولیم براؤن نے کیتا سی۔ اوہ اوسے دن اپنی بیوی اینٹونیا تے اپنیاں دو دِھیاں لوئز تے لُوسی نال اوتھے پونچیا سی۔ دونویں بھرا چھیتی ای بھرا ولیم تے اوہدے خاندان نُوں ملے۔‏

بھرا ایلفرڈ نے اَگے دَسیا:‏ ”‏مَیں تے لینرڈ ہر ہفتے بائبل دا مطالعیا کرنے ساں تے اگلی سویر وی اَسی اِنج ای کر رہے ساں کہ اَسی ویکھیا کہ اِک بڑا ای لما چوڑا بندہ دروازے تے کھلوتا اے۔ اوہ بھرا ولیم براؤن سی۔ اوہدے اندر یہوواہ دی خدمت کرن دا ایناں جوش سی کہ اوہ اگلے ای دن  عوامی تقریر دینا چاہندا سی۔“‏ اِک مہینے توں وی گھٹ عرصے چ بھرا ولیم براؤن نے اوہ ساریاں کتاباں تے رسالے مُنادی دے دوران لوکاں چ ونڈ دِتے جیہڑے اوہ اپنے نال لیایا سی۔ چھیتی ای اوہنوں 5000 ہور کتاباں گھلیاں گئیاں تے تھوڑے عرصے بعد فیر توں ہور کتاباں دی لوڑ پے گئی۔ پر بھرا ولیم براؤن کتاباں ویچن والے دے طور تے مشہور نئیں سی۔ سگوں اوہ تے بڑے جوش نال اپنیاں تقریراں چ پاک کلام دِیاں ایتاں دا حوالہ دیندا سی جدی وجہ توں لوکاں نے اوہدا ناں ”‏بائبل براؤن“‏ رکھ دِتا۔‏

ایسے عرصے دے دوران بھراواں نے سوچیا کہ اوہ جرمنی دی برانچ دے دفتر نُوں شہر بارمن توں کِتے ہور شفٹ کر دین گے کیونکہ ایہہ دفتر چھوٹا سی۔ نالے اوہناں نے ایہہ خبراں وی سُنیاں سن کہ فرانس جرمنی تے قبضہ کرن والا اے۔ بائبل سٹوڈنٹس نُوں میگڈےبرگ چ اِک عمارت مل گئی جیہڑی اوہناں دے چھپائی دے کم لئی بالکل صحی سی۔ 19 جون تک بھراواں نے چھپائی دے سامان تے دُوجے سامان دی پیکنگ مکمل کر لئی تے میگڈےبرگ چ نویں بیت‌ایل چ چلے گئے۔ جیس دن بھراواں نے ساڈے ہیڈکواٹر نُوں ایہہ دَسیا کہ اوہ نویں بیت‌ایل چ شفٹ ہو گئے نیں، اوسے دن اخباراں چ ایہہ خبر آئی کہ فرانس نے شہر بارمن تے قبضہ کر لیا اے۔ ایس گل توں بھراواں نُوں ایہہ محسوس ہویا کہ ایہہ فیصلہ واقعی یہوواہ وَلّوں سی تے اوہنے اوہناں نُوں محفوظ رکھیا سی۔‏

برازیل چ بھرا جارج ینگ نے برانچ قائم کیتی تے پُرتگالی زبان چ ‏”‏مینارِنگہبانی“‏ نُوں چھاپنا شروع کیتا۔ اوس بھرا نے خوش‌خبری دی مُنادی کرن لئی کافی سفر کیتا سی۔ برازیل چ اوہنے کجھ مہینیاں دے اندر اندر لوکاں نُوں 7000 توں زیادہ کتاباں، رسالے تے پرچے دِتے۔ جدوں اوہ اوتھے بھین سارہ فرگیوسن تے اوہدے خاندان نُوں ملیا تے اوہ بڑی خوش ہوئی۔ اوہ 1899 توں ‏”‏مینارِنگہبانی“‏ پڑھ رہی سی۔ پر اوہ کدی بپتسمہ نئیں لے سکی سی۔ پر بھرا جارج دے اوتھے جان دے کجھ مہینیاں بعد بھین سارہ تے اوہدے چار بچیاں نے بپتسمہ لے لیا۔‏

سال دے آخر چ 15 دسمبر 1923 دے ‏”‏مینارِنگہبانی“‏ چ دَسیا گیا کہ بائبل سٹوڈنٹس نُوں اپنیاں عبادتاں، مُنادی تے کنونشناں چ تبدیلیاں کرن نال کیہڑے فائدے ہوئے۔ ایہدے چ لکھیا سی:‏ ”‏ایہہ گل صاف نظر آ رہی اے کہ کلیسیاواں دا ایمان بوہت مضبوط اے۔ آؤ ہُن ہور زیادہ کم کرن لئی تیار ہوئیے تے 1924 چ وی جوش تے خوشی نال یہوواہ دی خدمت کردے رہیے۔“‏

اگلا سال وی بائبل سٹوڈنٹس لئی بڑا خاص ثابت ہون والا سی۔ بیت‌ایل دے بھرا سٹیٹن جزیرے تے کجھ مہینیاں توں تنظیم دی اِک عمارت بنا رہے سن جیہڑی بروکلن چ ساڈے ہیڈ کوارٹر توں زیادہ دُور نئیں سی۔ اوہ عمارت 1924 دے شروع تک مکمل ہو گئی۔ ایہدی وجہ توں بھین بھراواں دا ایکا مضبوط ہویا تے ہور نوِیں طریقیاں نال خوش‌خبری دی مُنادی ہو سکی۔‏