1، 2.‏ (‏الف)‏یہوواہ دے بندیاں دے دل چ کیہو جہے شک آ سکدے نیں؟ (‏ب)‏ایس مضمون چ اَسی کیہڑیاں گلاں تے غور کراں گے؟‏

 ہر بندے دے دل چ کدی نہ کدی شک a پیدا ہوندے نیں فیر بھانویں اوہدی عمر جِنّی وی ہوئے۔ مثال لئی، شاید اِک نوجوان سوچے کہ کیہہ یہوواہ نُوں میرے چ دلچسپی ہے وے۔ ایس وجہ توں ہو سکدا اے کہ اوہ بپتسمہ لین توں جھکے۔ یاں اِک ایہو جہے بھرا بارے سوچو جنہے نوجوانی چ دُنیا چ ناں کمان دی بجائے یہوواہ دی بادشاہی نُوں اپنی زندگی چ سب توں زیادہ اہمیت دین دا فیصلہ کیتا سی۔ پر ہُن اوہدا اِک خاندان اے۔ اوہدے خرچے ودھ گئے نیں تے ایس وجہ توں اوہ ایہہ سوچ رہیا اے کہ پتہ نئیں اوہدا فیصلہ صحی سی یاں نئیں۔ ذرا اِک وڈیری بھین بارے سوچو جدے چ ہُن پہلے جِنّی طاقت نئیں اے۔ شاید اوہ ایس وجہ توں بے‌حوصلہ ہو گئی اے کیونکہ ہُن اوہ یہوواہ لئی اوہ سب کجھ نئیں کر سکدی جو اوہ پہلے کردی سی۔ کیہہ تواڈے ذہن چ کدی ایہو جہے سوال آئے نیں:‏ ”‏کیہہ یہوواہ میرے تے دھیان دیندا اے؟ کیہہ مَیں یہوواہ دی خدمت لئی قربانیاں دے کے صحی کیتا اے؟ کیہہ مَیں ہُن وی یہوواہ دے کم آ سکنا واں؟“‏

² جے اَسی اپنے شک دُور نئیں کراں گے تے ساڈا ایمان کمزور پینا شروع ہو جائے گا تے شاید اَسی یہوواہ دی عبادت کرنا ای چھڈ دَئیے۔ ایس مضمون چ اَسی ویکھاں گے کہ بائبل چ لکھیاں گلاں اوس ویلے ساڈی مدد کیویں کر سکدیاں نیں جدوں ساڈے دل چ ایہہ شک پیدا ہوندا اے کہ (‏1)‏یہوواہ ساڈے چ دلچسپی رکھدا اے، (‏2)‏اَسی جیہڑے فیصلے کیتے نیں، اوہ صحی نیں تے (‏3)‏اَسی ہُن وی یہوواہ دے کم آ سکنے آں۔‏

 اَسی اپنے شک نُوں کیویں دُور کر سکنے آں؟‏

3.‏ اپنے شک نُوں دُور کرن دا اِک طریقہ کیہہ اے؟‏

³ اپنے شک نُوں دُور کرن دا اِک طریقہ ایہہ وے کہ اَسی خدا دے کلام چوں اپنے سوالاں دے جواب لبھن دی کوشش کرئیے۔ اِنج کرن نال یہوواہ تے ساڈا ایمان مضبوط ہوئے گا تے اَسی اوہدے زیادہ نیڑے ہو جاواں گے۔ نالے اَسی ہور چنگی طرحاں ایمان دی راہ تے ٹُردے رہواں گے۔—‏1-‏کُرنتھیوں 16:‏13‏۔‏

4.‏ اَسی ساریاں گلاں نُوں کیویں پرکھ سکنے آں؟ (‏1-‏تھسلُنیکیوں 5:‏21‏)‏

⁴ 1-‏تھسلُنیکیوں 5:‏21 نُوں پڑھو۔‏ بائبل چ سانوں کہیا گیا اے کہ اَسی ساریاں گلاں نُوں پرکھیے۔ اَسی اِنج کیویں کر سکنے آں؟ اِنج کرن لئی اَسی ایہہ ویکھ سکنے آں کہ ساڈے ذہن چ جیہڑیاں گلاں آ رہیاں نیں، اوہناں بارے بائبل چ کیہہ دَسیا گیا اے۔ مثال لئی ذرا اوس نوجوان بارے سوچو جیہڑا ایہہ سوچ رہیا سی کہ شاید خدا دی نظر چ اوہدی کوئی اہمیت نئیں اے۔ کیہہ اوہنوں ایہہ من لینا چاہی دا اے کہ اوہ جو سوچ رہیا اے، اوہی صحی اے؟ بالکل نئیں۔ سگوں اوہنوں ایس گل نُوں پرکھنا چاہی دا اے تے اِنج کرن لئی ضروری اے کہ اوہ بائبل چوں ویکھے کہ ایس بارے یہوواہ دی کیہہ سوچ اے۔‏

5.‏ اَسی کسے معاملے بارے یہوواہ دی سوچ نُوں کیویں جان سکنے آں؟‏

⁵ جدوں اَسی بائبل پڑھنے آں تے اِک لحاظ نال اَسی یہوواہ دی گل سُن رہے ہنے آں۔ پر کسے اِک خاص معاملے بارے یہوواہ دی سوچ جانن لئی شاید سانوں زیادہ محنت کرنی پووے۔ اِنج کرن لئی سانوں ایہو جہیاں ایتاں لبھنیاں پین گیاں جنہاں چ اوس معاملے بارے دَسیا گیا اے۔ اَسی تنظیم دِیاں کتاباں تے رسالیاں وچوں وی اوس معاملے بارے تحقیق کر سکنے آں۔ (‏اَمثال 2:‏3-‏6‏)‏ اَسی یہوواہ کولوں دُعا کر سکنے آں کہ اوہ ساڈی مدد کرے تاکہ اَسی اوس معاملے بارے اوہدی سوچ نُوں جان سکئے۔ فیر اَسی بائبل چوں ایہو جہے اصول تے معلومات لبھ سکنے آں جدے بارے ساڈے ذہن چ سوال چل رہے نیں۔ سانوں بائبل چوں ایہو جہے لوکاں دے واقعے پڑھن نال وی بڑا فائدہ ہوئے گا جنہاں دے ذہن چ ساڈے ورگے سوال آئے سن۔‏

6.‏ عبادتاں تے جان نال ساڈے شک کیویں دُور ہو سکدے نیں؟‏

⁶ اَسی عبادتاں تے جا کے وی یہوواہ دی گل سننے آں۔ جے اَسی باقاعدگی نال عبادتاں تے جاواں گے تے شاید اَسی کوئی ایہو جہی تقریر سنیے یاں ساڈا کوئی بھین بھرا ایہو جیہا جواب دَوے جدے توں ساڈا شک دُور ہو جائے۔ (‏اَمثال 27:‏17‏)‏ آؤ ہُن کجھ خاص معاملیاں تے غور کرنے آں تے ویکھنے آں کہ اوہناں بارے اَسی اپنے شک نُوں کیویں دُور کر سکنے آں۔‏

جدوں توانوں شک ہون لگے کہ کیہہ یہوواہ نُوں میرے چ دلچسپی ہے وے

7.‏ کجھ لوکاں دے ذہن چ شاید کیہڑے سوال آن؟‏

⁷ کیہہ تواڈے ذہن چ کدی ایہہ سوال آیا اے کہ ”‏کیہہ یہوواہ میرے تے دھیان دیندا اے؟“‏ جے توانوں لگدا اے کہ تواڈی کوئی اہمیت نئیں اے تے شاید توانوں لگے کہ تُسی تے کائنات دے خالق نال کدی دوستی نئیں کر سکدے۔ ایہو جہی گل بادشاہ داؤد دے ذہن چ وی آئی سی۔ اوہ ایس گل تے بڑا حیران ہوندا سی کہ یہوواہ عام جہے انساناں تے دھیان دیندا اے۔ اوہنے کہیا:‏ اَے یہوواہ، انسان کیہہ اے کہ تُوں اوہدے تے غور کریں؟ فانی انسان دا پُتر کیہہ اے کہ تُوں اوہدے تے دھیان دَویں؟ (‏زبور 144:‏3‏)‏ تُسی ایس سوال دا جواب حاصل کرن لئی کیہہ کر سکدے او؟‏

8.‏ 1-‏سموئیل 16:‏6، 7،‏ 10-‏12 دے مطابق یہوواہ کسے بندے چ کیہہ ویکھدا اے؟‏

⁸ بائبل توں سانوں پتہ چلدا اے کہ یہوواہ ایہو جہے لوکاں تے وی دھیان دیندا اے جیہڑے دُوجیاں دی نظر چ اینے اہم نئیں نیں۔ مثال لئی، یہوواہ نے سموئیل نُوں یسی کول گھلیا تاکہ اوہ اوہدے پُتراں چوں کسے اِک نُوں اِسرائیل دے بادشاہ دے طور تے مسح کرے۔ یسی نے اوہنوں اپنے سَت پُتراں نال مِلوایا پر اوہنے اپنے سب توں چھوٹے پُتر داؤد نُوں نئیں بلا‌یا۔‏ b پر یہوواہ نے داؤد نُوں ای چُنیا سی۔ ‏(‏1-‏سموئیل 16:‏6، 7،‏  10-‏12 نُوں پڑھو۔)‏ یہوواہ نے داؤد دے دل نُوں ویکھیا سی تے غور کیتا سی کہ اوہ اوہنوں کِنّاں پیار کردا اے۔‏

9.‏ تُسی ایس گل دا یقین کیوں رکھ سکدے او کہ یہوواہ نُوں تواڈے چ دلچسپی اے؟ (‏تصویر نُوں وی ویکھو۔)‏

⁹ ذرا سوچو کہ یہوواہ نے کیہڑے طریقیاں نال ظاہر کیتا اے کہ اوہنوں تواڈے چ دلچسپی اے۔ اوہ تواڈی ضرورت دے مطابق توانوں چنگے مشورے دیندا اے۔ (‏زبور 32:‏8‏)‏ ایہدے توں پتہ چلدا اے کہ اوہ توانوں چنگی طرحاں جان دا اے۔ (‏زبور 139:‏1‏)‏ جدوں تُسی اوہدے مشوریاں تے عمل کرو گے تے ویکھو گے کہ ایہدے توں توانوں کِنّاں فائدہ ہو رہیا اے تے توانوں یقین ہو جائے گا کہ یہوواہ تواڈے چ دلچسپی رکھدا اے۔ (‏1-‏تواریخ 28:‏9؛‏ اعمال 17:‏26، 27‏)‏ تُسی یہوواہ دی خدمت کرن تے اوہدے نال چلن لئی جیہڑیاں کوششاں کردے او، اوہ اوہناں نُوں ویکھدا اے۔ اوہ تواڈیاں خوبیاں تے دھیان دیندا اے تے تواڈے وَل دوستی دا ہتھ ودھاندا اے۔ (‏یرمیاہ 17:‏10‏)‏ تے جدوں تُسی اوہدے نال دوستی کردے او تے اوہنوں بڑی خوشی ہوندی اے۔—‏1-‏یوحنا 4:‏19‏۔‏

جدوں توانوں اپنے ماضی دے فیصلیاں تے شک ہون لگ پئے

10.‏ جدوں اَسی اپنے اوہناں فیصلیاں بارے سوچنے آں جیہڑے اَسی ماضی چ کیتے سن تے شاید ساڈے ذہن چ کیہڑے سوال آن؟‏

¹⁰ کئی سالاں بعد جدوں کجھ لوک پچھے مُڑ کے ویکھدے نیں تے شاید اوہ سوچن کہ پتہ نئیں اوہناں نے ماضی چ صحی فیصلے کیتے سن یاں نئیں۔ ہو سکدا اے کہ اوہناں نے ماضی چ یہوواہ دی ہور زیادہ خدمت کرن لئی اِک چنگی نوکری یاں کاروبار نُوں چھڈن دا فیصلہ کیتا سی۔ پر ہُن کئی سال لنگھ چُکے نیں۔ شاید اوہناں نُوں اپنے آلے دَوالے ایہو جہے لوک نظر آن جنہاں نے اوہناں توں فرق فیصلے کیتے سن تے ہُن اِنج لگ رہیا اے کہ اوہ بڑی آرام‌دہ زندگی گزار رہے نیں تے اوہناں کول بڑا پیسہ اے۔ ایس وجہ توں شاید اوہناں دے ذہن چ ایہہ سوال آئے:‏ ”‏کیہہ مَیں یہوواہ دی خدمت لئی قربانیاں دے کے صحی فیصلہ کیتا سی؟ یاں کیہہ مینوں دُنیا چ ہور زیادہ کم کرنا چاہی دا سی تاکہ میرے کول زیادہ پیسہ ہوندا؟“‏

11.‏ زبور 73 نُوں لکھن والا بندہ کیہہ سوچ کے پریشان ہو رہیا سی؟‏

¹¹ جے تواڈے ذہن چ وی ایہو جہے سوال آندے نیں تے زبور 73  نُوں لکھن والے دے جذبات بارے سوچو۔ اوہ اپنے آلے دَوالے ایہو جہے لوکاں نُوں ویکھ رہیا سی جیہڑے یہوواہ دی خدمت نئیں کردے سن۔ پر اوہ صحت‌مند تے خوشحال نظر آندے سن تے اِنج لگدا سی کہ جیویں اوہناں نُوں کوئی پریشانی نئیں اے۔ (‏زبور 73:‏3-‏5،‏ 12‏)‏ اوہناں دی ایہو جہی زندگی تے کامیابی نُوں ویکھ کے اوہنوں اِنج لگدا سی کہ اوہنے یہوواہ دی خدمت کرن لئی جیہڑیاں کوششاں کیتیاں نیں، اوہ فضول نیں۔ ایس سوچ دی وجہ توں اوہ سارا دن پریشان رہندا سی۔ (‏زبور 73:‏13، 14‏)‏ پر اوہ اپنی ایس سوچ تے کیویں قابو پا سکیا؟‏

12.‏ زبور 73:‏16-‏18 دے مطابق کیہڑی چیز نے زبور لکھن والے دی مدد کیتی تاکہ اوہ اپنی سوچ نُوں بدل سکے؟‏

¹² زبور 73:‏16-‏18 نُوں پڑھو‏۔ زبور 73 نُوں لکھن والا یہوواہ دے مُقدس مقام چ گیا۔ اوتھے ماحول بڑا پُرسکون سی۔ ایس لئی اوتھے اوہ اپنے ذہن چ آن والیاں گلاں بارے صحی طرحاں سوچ سکیا۔ اوہ سمجھ گیا کہ بھانویں کجھ لوکاں دی زندگی بڑی اسان لگدی اے پر اَگے چل کے اوہناں دا کوئی مستقبل نئیں اے۔ ایہہ سوچ کے اوہنوں ذہنی سکون مِلیا کیونکہ اوہنوں یقین ہو گیا کہ یہوواہ دی خدمت کرن دا فیصلہ ای سب توں ودھیا فیصلہ اے۔ ایس وجہ توں یہوواہ دی خدمت کرن دا اوہدا عزم مضبوط ہویا۔—‏زبور 73:‏23-‏28‏۔‏

13.‏ جے توانوں اپنے ماضی دے فیصلیاں تے شک اے تے توانوں ذہنی سکون کیویں مِل سکدا اے؟ (‏تصویر نُوں وی ویکھو۔)‏

¹³ خدا دے کلام تے غور کرن نال توانوں وی ذہنی سکون مِل سکدا اے۔ پر کیویں؟ اپنا دھیان اوہناں برکتاں تے رکھو جیہڑیاں توانوں مِلیاں نیں۔ اوہناں وچوں اِک برکت ایہہ وے کہ یہوواہ تواڈے توں خوش اے تے ایہہ برکت دُنیا دے لوکاں کول نئیں اے۔ اوہناں لئی چنگی نوکری تے آرام‌دہ زندگی ای سب کجھ اے۔ اوہناں کول مستقبل دی کوئی امید نئیں اے۔ پر یہوواہ نے توانوں ایہو جہیاں برکتاں دین دا وعدہ کیتا اے جنہاں بارے تُسی سوچ وی نئیں سکدے۔ (‏زبور 145:‏16‏)‏ ذرا ایس بارے وی سوچو:‏ کیہہ تُسی پورے یقین نال ایہہ گل کہہ سکدے او کہ جے تُسی اپنی زندگی  چ فرق فیصلے کیتے ہوندے تے اَج تواڈی زندگی زیادہ چنگی ہوندی؟ اِک گل تے پکی اے کہ جے اَسی ایہو جہے فیصلے کراں گے جنہاں توں اَسی یہوواہ تے اپنے گوانڈھی لئی محبت ظاہر کر سکنے آں تے یہوواہ سانوں کسے چیز دی کمی نئیں ہون دَوے گا۔‏

جدوں توانوں شک ہون لگے کہ کیہہ تُسی ہُن وی یہوواہ دے کم آ سکدے او

14.‏ یہوواہ دے کجھ بندے کیہڑیاں مشکلاں دا سامنا کر رہے نیں تے ایس وجہ توں شاید اوہناں دے ذہن چ کیہڑا سوال آئے؟‏

¹⁴ یہوواہ دے کجھ بندے وڈیرے، بیمار یاں معذور ہو گئے نیں۔ شاید ایس وجہ توں اوہناں نُوں لگے کہ یہوواہ دی نظر چ اوہناں دی کوئی اہمیت نئیں اے۔ ہو سکدا اے کہ اوہناں دے ذہن چ ایہہ سوال آئے:‏ ”‏کیہہ مَیں ہُن وی یہوواہ دے کم آ سکنا واں؟“‏

15.‏ زبور 71 لکھن والے نُوں کیہڑی گل دا یقین سی؟‏

¹⁵ زبور 71 لکھن والے دے ذہن چ وی ایسے طرحاں دی گل سی۔ ایس لئی اوہنے دُعا چ یہوواہ نُوں کہیا:‏ جدوں میری طاقت جواب دے جائے تے مینوں کلّا نہ چھڈیں۔ (‏زبور 71:‏9،‏ 18‏)‏ بھانویں اوہ پریشان سی پر فیر وی اوہنوں ایس گل دا پکا یقین سی کہ جے اوہ وفاداری نال یہوواہ دی خدمت کردا رہوے گا تے یہوواہ وی اوہدی رہنمائی تے مدد کردا رہوے گا۔ اوہ جان گیا سی کہ یہوواہ اوہناں لوکاں توں خوش ہوندا اے جیہڑے اپنے خراب حالاتاں دے باوجود پورے دل تے جان نال اوہدی خدمت کردے نیں۔—‏زبور 37:‏23-‏25‏۔‏

16.‏ وڈیرے بھین بھرا کیہڑے طریقیاں نال یہوواہ دے کم آ سکدے نیں؟ (‏زبور 92:‏12-‏15‏)‏

¹⁶ وڈیرے بھین بھراوو، اپنے آپ نُوں اوسے نظر نال ویکھن دی کوشش کرو جیویں یہوواہ توانوں ویکھدا اے۔ بھانویں ہُن تواڈے چ اینی طاقت نئیں اے یاں تواڈی صحت اینی چنگی نئیں اے پر فیر وی یہوواہ تواڈی مدد کر سکدا اے تاکہ تُسی وفاداری نال اوہدی خدمت کردے رہوو۔ ‏(‏زبور 92:‏12-‏15 نُوں پڑھو۔)‏ ایس گل تے دھیان نہ دَوو کہ ہُن تُسی کیہہ نئیں کر سکدے سگوں ایس گل تے اپنا دھیان رکھو کہ تُسی کیہہ کجھ کر سکدے او۔  مثال لئی، تُسی اپنی چنگی مثال تے دُوجیاں لئی فکر وکھان نال اوہناں دا حوصلہ ودھا سکدے او۔ تُسی دُوجیاں نُوں ایس بارے دَس سکدے او کہ یہوواہ نے ساری زندگی توانوں کیویں سنبھالیا اے تے توانوں مستقبل چ اوہدے کیہڑے وعدیاں دے پورے ہون دا اِنتظار اے۔ ایہہ گل وی کدی نہ بھلو کہ تُسی دُوجیاں لئی جیہڑیاں دُعاواں کردے او، اوہناں دا کِنّاں زبردست اثر ہوندا اے۔ (‏1-‏پطرس 3:‏12‏)‏ بھانویں ساڈے حالات جیہو جہے وی ہون، اَسی سارے یہوواہ تے دُوجیاں لئی کجھ نہ کجھ ضرور کر سکنے آں۔‏

17.‏ سانوں دُوجیاں نال اپنا مقابلہ کیوں نئیں کرنا چاہی دا؟‏

¹⁷ جے تُسی ایس گل توں اُداس ہو جاندے او کہ ہُن تُسی یہوواہ دی خدمت چ زیادہ کجھ نئیں کر سکدے تے ایس گل دا یقین رکھو کہ تُسی اپنے حالات مطابق جِنّاں وی کردے او، یہوواہ اوہدی بوہت قدر کردا اے۔ تُسی یہوواہ لئی جو کجھ کر رہے او، شاید تُسی اوہدا مقابلہ دُوجیاں نال کرو۔ پر اِنج کرنا صحی نئیں اے۔ پر کیوں؟ کیونکہ یہوواہ کدی وی ساڈا مقابلہ دُوجیاں نال نئیں کردا۔ (‏گلتیوں 6:‏4‏)‏ مثال لئی، مریم نے یسوع دے سِر تے بڑا مہنگا تیل پایا۔ (‏یوحنا 12:‏3-‏5‏)‏ پر غریب بیوہ نے ہیکل چ رکھے عطیات دے ڈبے چ صرف دو چھوٹے سکے پائے جنہاں دی قیمت بوہت ای گھٹ سی۔ (‏لُوقا 21:‏1-‏4‏)‏ پر یسوع نے اوہناں دونواں عورتاں دا آپس چ مقابلہ نئیں کیتا سگوں اوہدی نظر چ اوہناں دونواں دا ایمان بوہت مضبوط سی۔ یسوع دا باپ یہوواہ وی اِنج ای کردا اے۔ اَسی اوہدے تے ایمان رکھن تے اوہدے نال محبت کرن دی وجہ توں جو کجھ کرنے آں اوہ اوہدی بڑی قدر کردا اے، فیر بھانویں ساڈی نظر چ اوہ کم چھوٹا ای کیوں نہ ہووے۔‏

18.‏ اپنے شک نُوں دُور کرن چ کیہڑی چیز ساڈی مدد کرے گی؟ (‏ایس بکس نُوں وی ویکھو:‏  ‏”‏یہوواہ دے کلام توں تواڈے شک دُور ہو سکدے نیں۔‏‏“‏)‏

¹⁸ ساڈے ساریاں دے دل چ کدی نہ کدی شک آ جاندے نیں۔ پر ایس مضمون چ اَسی ویکھیا اے کہ خدا دا کلام اپنے شک نُوں دُور کرن چ ساڈی مدد کر سکدا اے۔ ایس لئی اپنے شک نُوں دُور کرن تے اپنے سوالاں دے جواب لبھن لئی پوری کوشش کرو۔ اِنج کرن نال تُسی مایوس ہون توں بچ جاؤ گے۔ یہوواہ توانوں جان دا اے تے تواڈے چ دلچسپی رکھدا اے۔ اوہ تواڈیاں قربانیاں دی بوہت قدر کردا اے تے توانوں ایہناں دا اجر ضرور دَوے گا۔ ایس گل دا پورا یقین رکھو کہ یہوواہ اپنے ہر بندے نُوں پیار کردا اے تے اوہدے تے دھیان دیندا اے۔‏