1، 2.‏ جدوں یسوع دے دو شاگرد اِماؤس جا رہے سن تے راہ چ اوہناں نال کیہہ ہویا؟‏

 ایہہ 16 نیسان 33 عیسوی دی گل اے۔ یسوع دے شاگرد بوہت زیادہ دُکھی تے ڈرے ہوئے سن۔ اوہناں وچوں دو شاگرد یروشلم توں اِماؤس جا رہے سن۔ اِماؤس اِک پِنڈ سی جیہڑا یروشلم توں 11 کلو میٹر (‏7 میل)‏ دُور سی۔ ایہہ آدمی بڑے مایوس سن کیونکہ اوہناں دے اُستاد یسوع نُوں سُولی تے چڑھا دِتا گیا سی۔ اوہناں نُوں یسوع توں بڑیاں امیداں سن۔ پر ہُن اِنج لگ رہیا سی جیویں اوہناں دِیاں امیداں تے پانی پھر گیا اے۔ پر فیر اِک ایہو جہی گل ہوئی جدے بارے اوہناں نے سوچیا وی نئیں سی۔‏

² اِک اجنبی اوہناں کول آیا تے اوہناں دے نال نال ٹُرن لگ پیا۔ اوہناں شاگرداں نے اوہنوں دَسیا کہ اوہ یسوع دی موت دی وجہ توں کِنّے دُکھی نیں۔ فیر اوس اجنبی نے اوہناں نال کجھ ایہو جہیاں گلاں کیتیاں جیہڑیاں شاید اوہناں نُوں ساری زندگی یاد رہیاں ہون گیاں۔ اوہنے موسیٰ تے نبیاں دے صحیفیاں توں شروع کیتا تے اوہناں نُوں سمجھایا کہ مسیح نُوں کیوں ظلم سہنا پیا تے مرنا پیا۔ فیر اوہ تِنے اِماؤس پونچ گئے تے اوہناں نے پچھان لیا کہ اوہ اجنبی کوئی ہور نئیں سگوں یسوع سی جنہوں خدا نے مُردیاں چوں زندہ کر دِتا سی۔ ذرا سوچو کہ جدوں شاگرداں نُوں پتہ چلیا ہوئے گا کہ یسوع مسیح زندہ ہو گیا اے تے اوہناں دی خوشی دی کوئی اِنتہا نئیں رہی ہوئے گی۔—‏لُوقا 24:‏13-‏35‏۔‏

3، 4.‏ (‏الف)‏یسوع دے شاگرداں نال کیہہ ہویا؟ (‏اعمال 1:‏3‏)‏ (‏ب)‏ایس مضمون چ اَسی کیہڑیاں گلاں تے غور کراں گے؟‏

³ زندہ ہون توں بعد یسوع نے زمین تے جیہڑے 40 دن گزارے، اوہناں چ اوہ کئی وار اپنے  شاگرداں نُوں مِلیا۔ ‏(‏اعمال 1:‏3 نُوں پڑھو۔)‏ اوہدے شاگرد اوہدی موت دی وجہ توں بڑے دُکھی تے ڈرے ہوئے سن۔ پر ایہناں 40 دِناں دے دوران اوہناں دا غم خوشی چ بدل گیا۔ نالے اوہناں چ دلیری نال دُوجیاں نُوں خوش‌خبری سُنان تے تلیم دین دا جوش پیدا ہویا۔‏ a

⁴ ایس عرصے دے دوران یسوع نے جو کجھ کیتا، اوہدے تے غور کرن نال سانوں بڑا فائدہ ہو سکدا اے۔ ایس مضمون چ اَسی ویکھاں گے کہ یسوع نے ایہناں 40 دِناں دے دوران (‏1)‏اپنے شاگرداں دا حوصلہ کیویں ودھایا، (‏2)‏پاک کلام دِیاں گلاں نُوں چنگی طرحاں سمجھن چ اوہناں دی مدد کیویں کیتی تے (‏3)‏اوہناں نُوں تربیت کیویں دِتی تاکہ اوہ ہور وڈیاں ذمے‌داریاں چُک سکن۔ اَسی ایہہ وی ویکھاں گے کہ ایہناں تِناں معاملیاں چ اَسی یسوع دی مثال تے کیویں عمل کر سکنے آں۔‏

دُوجیاں دا حوصلہ ودھاؤ

5.‏ یسوع دے شاگرداں نُوں حوصلے دی لوڑ کیوں سی؟‏

⁵ یسوع دے شاگرداں نُوں حوصلے دی لوڑ سی۔ پر کیوں؟ اوہناں وچوں کجھ نے یسوع دے پچھے چلن لئی اپنا گھربار، خاندان تے کاروبار چھڈ دِتا سی۔ (‏متی 19:‏27‏)‏ ایہدے علاوہ یسوع دے شاگرد بنن دی وجہ توں لوک اوہناں نال بھیڑا سلوک کردے سن۔ (‏یوحنا 9:‏22‏)‏ یسوع دے پیروکاراں نے ایہہ ساریاں قربانیاں ایس لئی دِتیاں کیونکہ اوہناں نُوں پکا یقین سی کہ یسوع ای اوہ مسیح اے جدے آن دا خدا نے وعدہ کیتا سی۔ (‏متی 16:‏16‏)‏ پر جدوں یسوع نُوں سُولی تے چڑھا کے مار دِتا گیا تے اوہناں دِیاں امیداں تے پانی پھر گیا تے اوہناں دا حوصلہ ٹُٹ گیا۔‏

6.‏ یسوع نے زندہ ہون توں بعد کیہہ کیتا؟‏

⁶ یسوع اپنے شاگرداں دے دُکھ دی وجہ جان دا سی۔ اوہنوں پتہ سی کہ اوہناں دا ایمان کمزور نئیں اے سگوں اوہ اوہدی موت دی وجہ توں دُکھی نیں۔ ایس لئی خدا نے جیس دن یسوع نُوں زندہ کیتا، اوسے دن اوہنے اپنے شاگرداں نُوں تسلی تے حوصلہ دینا شروع کر دِتا۔ مثال لئی، جدوں مریم مگدلینی اوہدی قبر تے رو رہی سی تے اوہ اوہنوں مِلیا۔ (‏یوحنا 20:‏11،‏ 16‏)‏ اوہ اوہناں دو شاگرداں نُوں وی مِلیا جنہاں دا ذکر ایس مضمون دے شروع چ کیتا گیا اے۔ نالے اوہ پطرس رسول نُوں وی نظر آیا۔ (‏لُوقا 24:‏34‏)‏ اَسی یسوع دی مثال توں کیہہ سکھنے آں؟ ایہدا جواب حاصل کرن لئی آؤ اوس واقعے تے غور کریئے جدوں یسوع مریم مگدلینی نُوں مِلیا سی۔‏

7.‏ یوحنا 20:‏11-‏16 دے مطابق جدوں 16 نیسان دی صبح یسوع نے مریم نُوں ویکھیا تے اوہ کیہہ کر رہی سی تے یسوع نے اوہدے لئی کیہہ کیتا؟ (‏تصویر نُوں وی ویکھو۔)‏

 ⁷ یوحنا 20:‏11-‏16 نُوں پڑھو۔‏ 16 نیسان دی صبح کجھ عورتاں یسوع دی قبر تے گئیاں۔ (‏لُوقا 24:‏1،‏ 10‏)‏ آؤ ویکھئے کہ اوس موقعے تے اوہناں وچوں اِک عورت نال کیہہ ہویا جدا ناں مریم مگدلینی سی۔ جدوں مریم یسوع دی قبر تے پونچی تے قبر خالی سی۔ مریم بھج کے پطرس تے یوحنا نُوں ایہدے بارے دَسن گئی۔ اوہ دونویں شاگرد بھج کے یسوع دی قبر تے آئے تے مریم وی اوہناں دے پچھے پچھے آئی۔ جدوں پطرس تے یوحنا نے اپنی اَکھیں ویکھیا کہ یسوع دی قبر خالی اے تے اوہ گھر واپس چلے گئے۔ پر مریم واپس نئیں گئی۔ اوہ یسوع دی قبر دے کول کھلو کے روندی رہی۔ اوہنوں ایس گل دا اندازہ ای نئیں سی کہ یسوع اوہنوں ویکھ رہیا اے۔ یسوع اوہنوں تسلی دینا چاہندا سی کیونکہ اوہ ویکھ سکدا سی کہ اوہ اوہدی موت دی وجہ توں کِنّی دُکھی اے۔ ایس لئی اوہ مریم تے ظاہر ہویا۔ فیر یسوع نے اِک کم کیتا جدے توں مریم دا بڑا حوصلہ ودھیا۔ یسوع نے مریم نال گل کیتی تے اوہنوں ایہہ خاص ذمے‌داری دِتی کہ اوہ جاکے اوہدے بھراواں نُوں دَسے کہ اوہ زندہ ہو گیا اے۔—‏یوحنا 20:‏17، 18‏۔‏

8.‏ اَسی یسوع دی مثال تے کیویں عمل کر سکنے آں؟‏

⁸ اَسی یسوع دی مثال تے کیویں عمل کر سکنے آں؟‏ یسوع وانگوں جے سانوں وی پتہ ہوئے گا کہ ساڈے بھین بھرا کیہڑی مشکل چوں لنگھ رہے نیں تے اَسی اوہناں نُوں تسلی تے حوصلہ دے سکاں گے تاکہ اوہ یہوواہ دی خدمت کردے رہن۔ ایس بارے ذرا بھین جوسلین دے تجربے تے غور کرو جدی بھین اِک حادثے چ فوت ہو گئی سی۔ بھین نے کہیا:‏ ”‏مَیں کئی مہینیاں تک صدمے چ رہی۔“‏ پر اِک بھرا تے اوہدی بیوی نے بھین جوسلین نُوں اپنے گھر بلا‌یا۔ اوہناں نے بڑے دھیان نال اوہدی گل سُنی تے اوہنوں یقین دَوایا کہ یہوواہ نُوں اوہدی بڑی فکر اے۔ بھین جوسلین نے دَسیا:‏ ”‏میری زندگی چ جیہڑا طوفان آیا سی، اوہدی وجہ توں مینوں اِنج لگ رہیا سی جیویں مَیں غم دے سمندر چ ڈُب رہی آں۔ پر یہوواہ نے اوس بھین تے بھرا دے ذریعے مینوں بچا لیا۔ اوہناں نے میری مدد کیتی تاکہ میرے اندر فیر توں یہوواہ دی خدمت کرن دی خواہش پیدا ہوئے۔“‏ اَسی وی اِنج ای اپنے بھین بھراواں دا حوصلہ ودھا سکنے آں۔ جدوں اوہ سانوں اپنی کسے تکلیف بارے دَسدے نیں تے اَسی اوہناں دی گل دھیان نال سُن سکنے آں تے پیار نال اوہناں نال گل کر سکنے آں تاکہ اوہ یہوواہ دی خدمت کردے رہن۔—‏رومیوں 12:‏15‏۔‏

خدا دے کلام نُوں سمجھن چ دُوجیاں دی مدد کرو

9.‏ یسوع دے شاگرداں نُوں کیہڑی مشکل دا سامنا ہویا تے یسوع نے اوہناں دی مدد کیویں کیتی؟‏

⁹ یسوع دے شاگرداں نے خدا دے کلام نُوں قبول کیتا سی تے اوہ ایہدے تے عمل کرن دی پوری کوشش کردے سن۔ (‏یوحنا 17:‏6‏)‏ پر اوہناں نُوں ایہہ سمجھ نئیں آ رہیا سی کہ یسوع نُوں اِک مُجرم دے طور تے سُولی تے کیوں چڑھایا گیا اے۔ یسوع جان دا سی کہ اوہدے شاگرداں دا ایمان کمزور نئیں اے۔ بس اوہ پاک کلام دِیاں گلاں نُوں حالے چنگی طرحاں نئیں سمجھے۔ (‏لُوقا 9:‏44، 45؛‏ یوحنا 20:‏9‏)‏ ایس لئی اوہنے خدا دے کلام نُوں سمجھن چ اوہناں دی مدد کیتی۔ آؤ ویکھنے آں کہ جدوں یسوع اوہناں دو شاگرداں نُوں مِلیا جیہڑے اِماؤس وَل جا رہے سن تے اوہنے کیہہ کیتا۔‏

10.‏ یسوع نے اپنے شاگرداں نُوں ایہہ کیویں سمجھایا کہ اوہی مسیح اے؟ (‏لُوقا 24:‏18-‏27‏)‏

¹⁰ لُوقا 24:‏18-‏27 نُوں پڑھو۔‏ غور کرو کہ یسوع نے شاگرداں نُوں فوراً نئیں دَسیا کہ اوہ کون اے سگوں اوہنے اوہناں کولوں سوال پچھے۔ پر کیوں؟ شاید یسوع جاننا چاہندا سی کہ اوہدے شاگرد کیہو جیہا محسوس کر رہے نیں تے اوہناں دے ذہن چ کیہہ چل رہیا اے۔ اوہناں نے اوہنوں دَسیا کہ اوہ سوچ رہے سن کہ یسوع اوہناں نُوں رومی حکومت دے ظلم توں نجات دَوائے گا۔ یسوع نے اوہناں دی پوری گل سُنن دے بعد اوہناں نُوں پاک کلام چوں سمجھایا کہ جو کجھ وی ہویا اے، اوہدی وجہ توں پیشین‌گوئیاں پوریاں ہوئیاں نیں۔‏ b اوسے شام یسوع نے ایہہ گلاں اپنے دُوجے شاگرداں نُوں وی سمجھائیاں۔ (‏لُوقا 24:‏33-‏48‏)‏ ایس واقعے توں اَسی کیہہ سکھنے آں؟‏

11، 12.‏ (‏الف)‏یسوع مسیح نے دُوجیاں نُوں جیویں پاک کلام دِیاں گلاں سمجھائیاں، اوہدے توں اَسی کیہہ سکھ سکنے آں؟ (‏تصویراں نُوں وی ویکھو۔)‏ (‏ب)‏بائبل کورس کران والے بھرا نے نورٹی دی مدد کیویں کیتی؟‏

 ¹¹ اَسی یسوع دی مثال تے کیویں عمل کر سکنے آں؟‏ جدوں اَسی کسے نُوں بائبل کورس کرانے آں تے سانوں اوہدے کولوں ایہو جہے سوال پچھنے چاہی دے نیں جنہاں توں سانوں پتہ چلے کہ اوہ کسے معاملے بارے کیہہ سوچدا اے۔ (‏اَمثال 20:‏5‏)‏ جدوں توانوں اوہدی سوچ تے جذباتاں بارے پتہ چل جاندا اے تے اوہنوں سکھاؤ کہ اوہ ایہو جہیاں ایتاں کیویں لبھ سکدا اے جیہڑیاں مسئلے دا سامنا کرن چ اوہدی مدد کر سکدیاں نیں۔ اوہنوں ایہہ نہ دَسو کہ اوہنوں کیہہ کرنا چاہی دا اے تے کیہہ نئیں سگوں اوہدے کولوں ایتاں بارے سوال پچھو۔ اوہنوں ہلاشیری دَوو کہ اوہ ایتاں تے سوچ‌وچار کرے تے ویکھے کہ اوہ ایہناں دے مطابق فیصلے کیویں کر سکدا اے۔ ذرا ایس بارے بھرا نورٹی دی مثال تے غور کرو جیہڑا ملک گھانا چ رہندا اے۔‏

¹² بھرا نورٹی نے 16 سال دی عمر چ بائبل کورس کرنا شروع کیتا سی۔ پر چھیتی ای اوہدے گھر والیاں نے ایس وجہ توں اوہدی مخالفت کرنی شروع کر دِتی۔ کیہڑی چیز نے بھرا نورٹی دی مدد کیتی کہ اوہ بائبل کورس کرنا نہ چھڈے؟ بھرا نورٹی جیس بھرا کولوں بائبل کورس کر رہیا سی، اوہنے متی 10 باب وچوں اوہنوں دَسیا کہ سچے مسیحیاں تے ظلم کیتا جائے گا۔ بھرا نورٹی نے کہیا:‏ ”‏جدوں میری مخالفت ہونی شروع ہوئی تے مینوں پکا یقین ہو گیا کہ مینوں سچائی مِل گئی اے۔“‏ بائبل کورس کران والے بھرا نے متی 10:‏16 دے ذریعے اوہدی ایہہ سمجھن چ مدد کیتی کہ اوہ اپنے گھر والیاں نال اپنے عقیدیاں بارے گل کردے ویلے نرمی تے سمجھداری نال کم کیویں لے سکدا اے۔ بپتسمہ لین توں بعد بھرا نورٹی پہل‌کار بننا چاہندا سی۔ پر اوہدا ابو چاہندا سی کہ اوہ یونیورسٹی جائے۔ ایس واری وی بائبل کورس کران والے بھرا نے اوہنوں ایہہ نئیں دَسیا کہ اوہنوں کیہہ کرنا چاہی دا اے سگوں اوہنے بھرا نورٹی دی توجہ بائبل دے اصولاں تے دَوائی تے اوہدے کولوں کجھ سوال پچھے تاکہ اوہ آپ صحی فیصلہ کر سکے۔ ایہدا کیہہ نتیجہ نکلیا؟ بھرا نورٹی نے فیصلہ کیتا کہ اوہ پہل‌کار بنے گا۔ ایس وجہ توں اوہدے ابو نے اوہنوں گھروں کڈھ دِتا۔ بھرا نورٹی نال جو کجھ ہویا، اوہدے بارے اوہ کیہو جیہا محسوس کردا اے؟ اوہ کہندا اے:‏ ”‏مینوں پورا یقین اے کہ میرا فیصلہ بالکل صحی سی۔“‏ جدوں اَسی وی پاک کلام دے اصولاں نُوں سمجھن چ دُوجیاں دی مدد کرنے آں تے اوہناں دا ایمان مضبوط ہوندا اے تے اوہناں نُوں مدد مِلدی اے کہ اوہ یہوواہ دی خدمت کردے رہن۔—‏اِفسیوں 3:‏16-‏19‏۔‏

بھراواں دی مدد کرو تاکہ اوہ ہور ذمے‌داریاں چُک سکن

13.‏ یسوع مسیح نے کیہہ کیتا تاکہ اوہدے اسمان تے جان توں بعد وی زمین تے مُنادی دا کم ہوندا رہوے؟ (‏اِفسیوں 4:‏8‏)‏

¹³ جدوں یسوع مسیح زمین تے سی تے اوہنے اوس کم نُوں بڑی چنگی طرحاں کیتا جیہڑا یہوواہ نے اوہنوں دِتا سی۔ (‏یوحنا 17:‏4‏)‏ پر اوہنے ایہہ کدی وی نئیں سوچیا سی کہ صرف اوہی یہوواہ دی مرضی مطابق کم کر سکدا اے۔ زمین تے اپنی  ساڈھے تِن سال دی خدمت دے دوران اوہنے دُوجیاں نُوں وی مُنادی دا کم کرن دی تربیت دِتی۔ اسمان تے واپس جان توں پہلاں یسوع نے اپنے شاگرداں نُوں ایہہ ذمے‌داری دِتی کہ اوہ یہوواہ دِیاں قیمتی بھیڈاں دی دیکھ‌بھال کرن، مُنادی کرن تے تلیم دین چ پیشوائی کرن۔ ایہناں وچوں کجھ شاگرداں دی عمر شاید 30 سال توں وی گھٹ سی۔ یسوع مسیح دے شاگرد پورے دل تے جان نال یہوواہ دی خدمت کرنا چاہندے سن۔ اوہ بڑے محنتی تے یہوواہ دے وفادار سن۔ ‏(‏اِفسیوں 4:‏8 نُوں پڑھو۔)‏ یسوع مسیح نے زمین تے اپنے آخری 40 دِناں دے دوران اوہناں دی مدد کیویں کیتی تاکہ اوہ آدمی نعمتاں ثابت ہون؟‏

14.‏ یسوع نے زمین تے آخری 40 دِناں چ اپنے شاگرداں دی مدد کیویں کیتی تاکہ یہوواہ نال اوہناں دی دوستی مضبوط ہوئے؟ (‏تصویر نُوں وی ویکھو۔)‏

¹⁴ یسوع نے اپنے شاگرداں نُوں صاف صاف دَسیا کہ اوہناں نُوں کتھے بہتری لیان دی لوڑ اے۔ پر اوہنے بڑے پیار نال اِنج کیتا۔ مثال لئی، جدوں اوہنے ویکھیا کہ اوہدے کجھ شاگرد شک کر رہے نیں تے اوہنے اوہناں دی درستی کیتی۔ (‏لُوقا 24:‏25-‏27؛‏ یوحنا 20:‏27‏)‏ اوہنے اپنے شاگرداں نُوں ایہہ وی سمجھایا کہ اوہناں نُوں پیسہ کمان توں بوہتی توجہ ایس گل تے دینی چاہنی دی اے کہ اوہ خدا دے بندیاں دا خیال رکھن۔ (‏یوحنا 21:‏15‏)‏ اوہنے اپنے شاگرداں نُوں ایہہ وی یاد دَوایا کہ اوہ ایس بارے حدوں‌ودھ نہ سوچن کہ دُوجیاں کول کیہڑیاں ذمے‌داریاں نیں۔ (‏یوحنا 21:‏20-‏22‏)‏ یسوع مسیح نے بادشاہی بارے اوہناں دی سوچ نُوں وی درست کیتا تے اوہناں دی مدد کیتی کہ اوہ اپنا پورا دھیان خوش‌خبری دی مُنادی کرن تے لان۔ (‏اعمال 1:‏6-‏8‏)‏ بزرگ یسوع توں کیہہ سکھ سکدے نیں؟‏

15، 16.‏ (‏الف)‏بزرگ کیہڑے طریقیاں نال یسوع دی مثال تے عمل کر سکدے نیں؟ وضاحت کرو۔ (‏ب)‏جدوں پیٹرک دی درستی کیتی گئی تے اوہنوں کیویں فائدہ ہویا؟‏

¹⁵ بزرگ یسوع دی مثال تے کیویں عمل کر سکدے نیں؟‏ اوہناں نُوں دُوجے بھراواں نُوں تربیت دینی چاہی دی اے تاکہ اوہ وڈیاں ذمے‌داریاں نُوں چُکن دے لائق بنن۔ اوہناں نُوں نوجوان بھراواں دی وی تربیت کرنی چاہی دی اے۔‏ c بزرگاں نُوں ایہہ نئیں سوچنا چاہی دا کہ اوہناں بھراواں کولوں غلطی نئیں ہوئے گی۔ اوہناں نُوں بڑے پیار نال ایہناں جوان بھراواں دی درستی کرنی چاہی دی اے تاکہ اوہ تجربہ حاصل کر سکن تے سمجھ سکن کہ اوہناں نُوں کیوں خاکسار تے بھروسے دے لائق بننا چاہی دا اے۔—‏1-‏تیمُتھیُس 3:‏1؛‏ 2-‏تیمُتھیُس 2:‏2؛‏ 1-‏پطرس 5:‏5‏۔‏

 ¹⁶ ذرا غور کرو کہ جدوں بھرا پیٹرک دی درستی کیتی گئی تے اوہنوں ایہدے توں کیویں فائدہ ہویا۔ جدوں اوہ جوان سی تے اوہ دُوجیاں نال بڑی سختی نال گل کردا سی، ایتھوں تک کہ بھیناں نال وی چنگی طرحاں پیش نئیں آندا سی۔ کلیسیا دے اِک بزرگ نے ویکھیا کہ ایس معاملے چ پیٹرک نُوں اپنے اندر بہتری لیان دی لوڑ اے۔ ایس لئی اوہنے اوہدی درستی کردے ویلے بڑے پیار نال پر صاف صاف دَسیا کہ اوہنوں کیہہ کرنا چاہی دا اے۔ پیٹرک نے کہیا:‏ ”‏مَیں اوس بھرا دا بڑا شکرگزار آں کہ اوہنے میری مدد کیتی۔ جدوں دُوجے بھراواں نُوں اوہ ذمے‌داریاں مِلدیاں سن جیہڑیاں مَیں حاصل کرنا چاہنا ساں تے مَیں بڑا مایوس ہو جانا ساں۔ پر اوس بھرا دی مدد دی وجہ توں مَیں سمجھ گیا کہ میرا دھیان ذمے‌داریاں تے نئیں سگوں بھین بھراواں دی خدمت کرن تے ہونا چاہی دا اے۔“‏ ایہدا ایہہ نتیجہ نکلیا کہ پیٹرک 23 سال دی عمر چ کلیسیا چ بزرگ بن گیا۔—‏اَمثال 27:‏9‏۔‏

17.‏ یسوع نے کیویں ظاہر کیتا کہ اوہنوں اپنے شاگرداں تے بھروسا اے؟‏

¹⁷ یسوع مسیح نے اپنے شاگرداں نُوں نہ صرف مُنادی کرن سگوں تلیم دین دی ذمے‌داری وی دِتی۔ (‏متی 28:‏20‏)‏ شاید شاگرداں نُوں لگیا ہوئے کہ اوہ ایس ذمے‌داری نُوں نبھان دے لائق نئیں نیں۔ پر یسوع نُوں بھروسا سی کہ اوہدے شاگرد ایس ذمے‌داری نُوں چنگی طرحاں نبھا سکدے نیں۔ شاگرداں تے اپنا بھروسا ظاہر کرن لئی یسوع نے اوہناں نُوں کہیا:‏ ”‏جیویں باپ نے مینوں گھلیا اے، مَیں وی توانوں گھل رہیا واں۔“‏—‏یوحنا 20:‏21‏۔‏

18.‏ بزرگ یسوع مسیح دی مثال تے کیویں عمل کر سکدے نیں؟‏

¹⁸ بزرگ یسوع دی مثال تے کیویں عمل کر سکدے نیں؟‏ تجربہ‌کار بزرگ دُوجیاں نُوں کلیسیا چ ذمے‌داریاں دیندے نیں۔ (‏فِلپّیوں 2:‏19-‏22‏)‏ مثال لئی، اوہ عبادت‌گاہ دی صفائی تے دیکھ‌بھال دے کم چ بچیاں نُوں شامل کر سکدے نیں۔ کسے بھرا نُوں کوئی ذمے‌داری دین دے نال نال اوہنوں تربیت دے سکدے نیں تے اوہدے تے بھروسا ظاہر کر سکدے نیں کہ اوہ ایہہ کم کر سکدا اے۔ بھرا میتھیو جیہڑا نواں نواں بزرگ بنیا اے، اوہنے دَسیا کہ اوہ اپنی کلیسیا دے تجربہ‌کار بزرگاں دا بڑا شکرگزار اے جنہاں نے اوہنوں تربیت دِتی سی تاکہ اوہ اپنی ذمے‌داری نُوں نبھا سکے تے اوہدے تے بھروسا کیتا کہ اوہ ایس ذمے‌داری نُوں پورا کر سکدا اے۔ بھرا میتھیو نے کہیا:‏ ”‏جدوں میرے کولوں غلطیاں ہوئیاں تے اوہناں بزرگاں نے میری مدد کیتی تاکہ مَیں اپنیاں غلطیاں توں سکھاں تے اپنے اندر بہتری لیاواں۔“‏ d

19.‏ سانوں کیہہ عزم کرنا چاہی دا اے؟‏

¹⁹ یسوع مسیح نے زندہ ہون توں بعد زمین تے جیہڑے 40 دن گزارے اوہناں چ اوہنے دُوجیاں دا حوصلہ ودھایا، اوہناں نُوں پاک کلام دِیاں گلاں گہرائی نال سمجھائیاں تے اوہناں نُوں تربیت دِتی۔ آؤ اَسی وی ایہہ عزم کرئیے کہ اَسی اوہدی مثال تے عمل کراں گے۔ (‏1-‏پطرس 2:‏21‏)‏ اِنج کرن چ اوہ ساڈی مدد کرے گا۔ کیونکہ اوہنے ایہہ وعدہ کیتا اے:‏ ”‏مَیں دُنیا دے آخری زمانے تک ہر ویلے تواڈے نال رہواں گا۔“‏—‏متی 28:‏20‏۔‏