موسیقی بنی‌اِسرائیل دی ثقافت دا اِک اہم حصہ سی۔ بائبل چ کئی ایہو جہے لوکاں دا ذکر ہویا اے جیہڑے کوئی ساز وجاندے سن یاں گیت گاندے سن۔ بائبل دا تقریباً 10 فیصد حصہ گیت نیں۔ ایہناں چ زبور، غزلُ‌الغزلات تے نوحہ دِیاں کتاباں شامل نیں۔ اِک کتاب چ ایہہ دَسیا گیا اے:‏ ”‏بائبل توں صاف پتہ چلدا اے کہ موسیقی لوکاں دی زندگی دا اِک اہم حصہ ہوندی سی۔“‏‏—‏میوزک اِن ببلیکل لائف۔‏

روزمرہ زندگی چ موسیقی دی اہمیت۔‏ بنی‌اِسرائیل اپنے جذبات دا اظہار کرن لئی ساز وجاندے سن تے گیت گاندے سن۔ (‏یسعیاہ 30:‏29‏)‏ جدوں کوئی بادشاہ بن دا سی، کوئی عید ہوندی سی یاں کوئی جنگ چ جِت دا سی تے اِسرائیلی عورتاں ڈفلی وجا کے نچ دِیاں تے گاندیاں سن۔ (‏قُضاۃ 11:‏34؛‏ 1-‏سموئیل 18:‏6، 7؛‏ 1-‏سلاطین 1:‏39، 40‏)‏ جدوں کوئی فوت ہوندا سی تے اِسرائیلی اپنے دُکھ دا اظہار کرن لئی ماتم دے گیت گاندے سن۔ (‏2-‏تواریخ 35:‏25‏)‏ اِک مشہور انسائیکلوپیڈیا چ دَسیا گیا اے کہ ”‏بنی‌اِسرائیل دا موسیقی نال گُوڑھا لگاؤ سی۔“‏‏—‏میک کلنٹوک اینڈ سڑرونگز سائیکلوپیڈیا۔‏

بادشاہ دے محل چ موسیقی دی اہمیت۔‏ اِسرائیلی بادشاہواں نُوں موسیقی نال گُوڑھا لگاؤ سی۔ مثال لئی، بادشاہ ساؤل نے داؤد نُوں اپنے محل چ بلا‌یا تاکہ اوہ اوہدے لئی ساز وجایا کرے۔ (‏1-‏سموئیل 16:‏18،‏ 23‏)‏ بعد چوں جدوں داؤد آپ بادشاہ بنیا تے اوہنے موسیقی دے نویں ساز بنائے، خوب‌صورت گیت لکھے تے لوکاں دے اِک گروہ نُوں مقرر کیتا کہ اوہ یہوواہ دی ہیکل چ ساز وجائے۔ (‏2-‏تواریخ 7:‏6؛‏ عاموس 6:‏5‏)‏ بادشاہ سلیمان نے وی اپنے محل چ مرداں تے عورتاں نُوں گان واسطے رکھیا سی۔—‏واعظ 2:‏8‏۔‏

عبادت چ موسیقی دی اہمیت۔‏ اِسرائیلی یہوواہ دی عبادت لئی گیت گاندے سن تے ساز وجاندے سن۔ یروشلم چ ہیکل دے اندر 4 ہزار آدمی ساز وجاندے سن۔ (‏1-‏تواریخ 23:‏5‏)‏ اوہ جھانجھ، تاراں والے ساز، بربط تے نرسنگے وجاندے سن۔ (‏2-‏تواریخ 5:‏12‏)‏ صرف ساز وجان چ ماہر لوک ای نئیں سگوں دُوجے لوک وی گیت گا کے یہوواہ دی عبادت کردے سن۔ بوہت سارے اِسرائیلی جدوں عیداں منان لئی یروشلم جاندے سن تے اوہ سفر دے دوران کجھ گیت گاندے سن جنہاں نُوں ”‏چڑھائی دے گیت“‏ کہیا جاندا سی۔ (‏زبور 120-‏134‏)‏ کجھ یہودی لکھاریاں دے مطابق بنی‌اِسرائیل فسح دی عید مناندے ویلے کجھ خاص زبور گاندے سن جنہاں نُوں ”‏وڈیائی دے گیت“‏ a کہیا جاندا سی۔‏

اَج وی موسیقی یہوواہ دے بندیاں لئی بڑی اہم اے۔ (‏یعقوب 5:‏13‏)‏ اَسی عبادتاں چ گیت گانے آں۔ (‏اِفسیوں 5:‏19‏)‏ گیت گان دی وجہ توں اَسی اپنے ہم‌ایماناں نال اِک مُٹھ ہو جانے آں۔ (‏کُلسّیوں 3:‏16‏)‏ تے جدوں مشکلاں دا سامنا کردے ویلے اَسی گیت سننے آں یاں گیت گانے آں تے سانوں بڑی ہمت مِلدی اے۔ (‏اعمال 16:‏25‏)‏ واقعی گیت گان نال اَسی ظاہر کرنے آں کہ اَسی یہوواہ تے ایمان رکھنے آں تے اوہدے نال پیار کرنے آں۔‏