1.‏ یہوواہ اپنے بندیاں بارے کیہو جیہا محسوس کردا اے؟‏

 یہوواہ نُوں پتہ اے کہ ساڈی زندگی چ کیہہ کجھ چل رہیا اے۔ اوہ ساڈیاں خوشیاں تے غماں نُوں جان دا اے۔ (‏زبور 37:‏18‏)‏ جدوں اوہ ویکھدا اے کہ اَسی دُکھ تے پریشانی دے باوجود پورے دل تے جان نال اوہدی خدمت کر رہے آں تے اوہ بوہت خوش ہوندا اے۔ ایہدے نال نال اوہ ساڈی مدد کرن تے سانوں تسلی دین دی وی بڑی خواہش رکھدا اے۔‏

2.‏ یہوواہ ٹُٹے دل والے لوکاں دی مدد کرن لئی کیہہ کردا اے تے اَسی اوہدی مدد توں کیویں فائدہ حاصل کر سکنے آں؟‏

² زبور 147:‏3 چ دَسیا گیا اے کہ یہوواہ ٹُٹے دل والے لوکاں دے زخماں تے پٹی بنھدا اے۔ ایس ایت توں پتہ چلدا اے کہ یہوواہ اوہناں لوکاں دی بڑے پیار نال دیکھ‌بھال کردا اے جنہاں دے دل زخمی نیں۔ یہوواہ دی ایس مدد توں فائدہ حاصل کرن لئی سانوں کیہہ کرنا چاہی دا اے؟ ایہدے لئی ذرا اِک مثال تے غور کرو۔ اِک ماہر ڈاکٹر کسے بندے دے زخم دا علاج بڑی چنگی طرحاں کر سکدا اے۔ پر اوس ڈاکٹر دی مدد توں فائدہ حاصل کرن لئی زخمی بندے نُوں اوہدیاں ہدیتاں تے صحی طرحاں عمل کرن دی لوڑ اے۔ ایسے طرحاں یہوواہ بڑی چنگی طرحاں ساڈی مدد کر سکدا اے۔ پر اوہدی مدد توں فائدہ حاصل کرن لئی سانوں اوہدے مشوریاں تے عمل کرن دی لوڑ اے۔ ایس مضمون چ اَسی ویکھاں گے کہ یہوواہ نے اپنے کلام چ اوہناں لوکاں نُوں کیہہ دَسیا اے جیہڑے دُکھی نیں تے اَسی اوہدے مشوریاں تے کیویں عمل کر سکنے آں۔‏

یہوواہ سانوں یقین دَواندا اے کہ اَسی اوہدی نظر چ اہم آں

3.‏ کجھ لوکاں نُوں ایہہ کیوں لگدا اے کہ اوہناں دی کوئی اہمیت نئیں اے؟‏

³ اَسی اِک ایہو جہی دُنیا چ رہنے آں جیہڑی محبت توں خالی اے۔ افسوس دی گل اے کہ بوہت سارے لوکاں نُوں ایہہ احساس دَوایا جاندا اے کہ اوہناں دی کوئی اہمیت نئیں اے۔ ایس بارے بھین ہیلن a دَسدی اے:‏ ”‏ساڈے امی‌ابو ساڈے نال پیار نال پیش نئیں آندے سن۔ ابو سانوں بوہت زیادہ ماردے ہوندے سن تے ہر روز سانوں احساس دَواندے سن کہ اَسی کسے کم دے نئیں آں۔“‏ ہو سکدا اے کہ ہیلن  وانگوں تواڈے نال وی کسے نے بھیڑا سلوک کیتا ہوئے، تواڈی بے‌عزتی کیتی ہوئے یاں توانوں ایہہ احساس دَوایا ہوئے کہ تُسی پیار دے لائق نئیں او۔ جے تواڈے نال اِنج ہویا اے تے شاید توانوں ایس گل تے یقین کرنا مشکل لگے کہ کوئی واقعی سچے دل نال تواڈی فکر کردا اے۔‏

4.‏ زبور 34:‏18 دے مطابق یہوواہ سانوں کیس گل دا یقین دَواندا اے؟‏

⁴ بھانویں کہ دُوجیاں نے تواڈے نال بھیڑا سلوک کیتا ہوئے پر تُسی پورا یقین رکھ سکدے او کہ یہوواہ توانوں پیار کردا اے تے تواڈی بوہت قدر کردا اے۔ اوہ ٹُٹے دل والیاں دے نیڑے وے۔ ‏(‏زبور 34:‏18 نُوں پڑھو۔)‏ جے تواڈا حوصلہ ٹُٹ گیا اے تے یاد رکھو کہ یہوواہ نُوں تواڈیاں خوبیاں پسند نیں تے ایسے وجہ توں اوہ توانوں اپنے نیڑے لیایا سی۔ (‏یوحنا 6:‏44‏)‏ اوہ تواڈی مدد کرن لئی ہمیشاں تیار رہندا اے کیونکہ تُسی اوہدے لئی بوہت اہم او۔‏

5.‏ یسوع اوہناں لوکاں نال کیویں پیش آیا جنہاں نُوں لوک کم‌تر سمجھدے سن؟‏

⁵ یسوع دی مثال تے غور کرن نال اَسی یہوواہ دے جذبات بارے بوہت کجھ سکھ سکنے آں۔ جدوں یسوع زمین تے سی تے اوہ اوہناں لوکاں نال بڑے پیار نال پیش آیا جنہاں نُوں دُوجے لوک کم‌تر سمجھدے سن۔ (‏متی 9:‏9-‏12‏)‏ مثال لئی، اِک عورت نُوں امید سی کہ جے اوہ یسوع دے کپڑیاں نُوں ای چُھو لوے گی تے اوہدی بیماری ٹھیک ہو جائے گی۔ ایس لئی جدوں اوہنے اوہدے کپڑیاں نُوں ہتھ لایا تے یسوع نے اوہنوں جِھڑکیا نئیں سگوں تسلی دِتی تے اوہدے مضبوط ایمان دی تعریف کیتی۔ (‏مرقس 5:‏25-‏34‏)‏ یسوع چ بالکل اوہی خوبیاں نیں جیہڑیاں اوہدے باپ چ نیں۔ (‏یوحنا 14:‏9‏)‏ ایس لئی تُسی ایس گل دا یقین رکھ سکدے او کہ یہوواہ تواڈی قدر کردا اے۔ اوہ تواڈیاں خوبیاں تے دھیان دیندا اے۔ نالے ایس گل تے وی غور کردا اے کہ تواڈا ایمان کِنّاں مضبوط اے تے تُسی اوہدے نال کِنّاں پیار کردے او۔‏

6.‏ جے توانوں محسوس ہوندا اے کہ تواڈی کوئی اہمیت نئیں اے تے تُسی کیہہ کر سکدے او؟‏

⁶ جے توانوں لگدا اے کہ تواڈی کوئی اہمیت نئیں اے تے تُسی کیہہ کر سکدے او؟ بائبل چوں ایہو جہیاں ایتاں پڑھو تے اوہناں تے سوچ‌وچار کرو جنہاں توں توانوں ایس گل دا یقین ہو جائے کہ یہوواہ تواڈی قدر کردا  اے۔‏ b (‏زبور 94:‏19‏)‏ جے تُسی یہوواہ دی خدمت چ اپنے کسے منصوبے نُوں پورا نئیں کر سکے یاں تُسی ایس گلوں مایوس او کہ تُسی یہوواہ دی خدمت چ اوناں نئیں کر پا رہے جنّاں دُوجے کر رہے نیں تے اپنے آپ نُوں نہ کوسو۔ یہوواہ چاہندا اے کہ تُسی اوناں ای کرو جِنّاں کر سکدے او۔ (‏زبور 103:‏13، 14‏)‏ جے ماضی چ کسے نے توانوں ماریا کُٹیا اے، توانوں ذہنی پریشانی دِتی اے یاں تواڈے نال جنسی زیادتی کیتی اے تے ایہدے لئی اپنے آپ نُوں قصوروار نہ ٹھہراؤ۔ یاد رکھو کہ عدالت بھیڑا سلوک کرن والیاں دی ہوئے گی نہ کہ تکلیف سہن والیاں دی۔ (‏1-‏پطرس 3:‏12‏)‏ بھین سینڈرا نُوں بچپن چ بڑے بھیڑے سلوک دا سامنا کرنا پیا۔ اوہ کہندی اے:‏ ”‏مَیں وار وار یہوواہ نُوں کہنی آں کہ اوہ میری مدد کرے تاکہ مَیں اپنے آپ نُوں قصوروار نہ سمجھاں سگوں ایس گل نُوں یاد رکھاں کہ اوہ مینوں پیار کردا اے۔“‏

7.‏ ساڈے ماضی دے بھیڑے تجربے یہوواہ دی چنگی طرحاں خدمت کرن چ ساڈے کم کیویں آ سکدے نیں؟‏

⁷ یاد رکھو کہ یہوواہ تواڈے ذریعے دُوجیاں دی مدد کر سکدا اے۔ اوہنے توانوں ایہہ اعزاز دِتا اے کہ تُسی مُنادی چ حصہ لوو تے اوہدے نال مِل کے کم کرو۔ (‏1-‏کُرنتھیوں 3:‏9‏)‏ شاید اپنے ماضی دے تجربیاں دی وجہ توں تُسی دُوجیاں دے درد نُوں چنگی طرحاں سمجھ سکدے او۔ ایس لئی تُسی بڑے چنگے طریقے نال اوہناں دی مدد کر سکدے او۔ بھین ہیلن جدا ایس مضمون چ پہلاں ذکر ہویا اے،اوہنوں یہوواہ دے بندیاں دے ذریعے بڑی مدد مِلی۔ ہُن اوہ آپ دُوجیاں دی مدد کر دی اے۔ اوہنے کہیا:‏ ”‏مینوں لگدا سی کہ مَیں کسے کم دی نئیں آں۔ پر یہوواہ نے مینوں احساس دَوایا کہ اوہ مینوں بڑا پیار کردا اے تے مینوں خوشی اے کہ دُوجیاں دی مدد کرن لئی مَیں یہوواہ دے کم آ سکنی آں۔“‏ بھین ہیلن ہُن پہل‌کار اے تے بوہت خوش اے۔‏

یہوواہ چاہندا اے کہ اَسی اوہدی معافی توں فائدہ حاصل کریئے

8.‏ یسعیاہ 1:‏18 چ یہوواہ نے سانوں کیس گل دا یقین دَوایا اے؟‏

⁸ یہوواہ دے کجھ بندے اپنے اوہناں گُناہواں دی وجہ توں ہُن وی پریشان رہندے نیں جیہڑے اوہناں نے بپتسمہ لین توں پہلاں یاں بپتسمہ لین توں بعد کیتے سن۔ پر سانوں ایہہ گل یاد رکھنی چاہی دی اے کہ یہوواہ سانوں بوہت پیار کردا اے تے اوہنے فدیے دا بندوبست ایسے لئی کیتا اے تاکہ ساڈے گُناہ معاف ہو سکن۔ ایہہ بندوبست ساڈے لئی اِک نعمت اے تے یہوواہ چاہندا اے کہ اَسی ایہدے لئی قدر وکھائیے تے یقین رکھئے کہ ایہدی وجہ توں ساڈے گُناہ معاف ہو جاندے نیں۔ یہوواہ نے سانوں ایس گل دا یقین دَوایا اے کہ جدوں اَسی اوہدے نال معاملہ سلجھا لینے آں c یعنی توبہ کر لینے آں تے اوہ ساڈے گُناہواں نُوں پوری طرحاں معاف کر دیندا اے۔ ‏(‏یسعیاہ 1:‏18 نُوں پڑھو۔)‏ اَسی اپنے پیار کرن والے اسمانی باپ دے بڑے شکرگزار آں کہ اوہ ساڈے گُناہواں نُوں بُھل جاندا اے تے ساڈے چنگے کماں نُوں یاد رکھدا اے۔—‏زبور 103:‏9،‏ 12؛‏ عبرانیوں 6:‏10‏۔‏

9.‏ سانوں ماضی دی بجائے اپنا دھیان ایس گل تے کیوں رکھنا چاہی دا اے کہ اَسی ہُن کیہہ کر رہے آں تے مستقبل چ کیہہ کجھ کر سکنے آں؟‏

⁹ جے تُسی اپنیاں ماضی دِیاں غلطیاں دی وجہ توں پریشان رہندے او تے اپنا دھیان ایس گل تے رکھن دی کوشش کرو کہ تُسی ہُن کیہہ کر رہے او تے مستقبل چ کیہہ کجھ کر سکدے او۔ ذرا پولُس رسول دی مثال تے غور کرو۔ اوہنوں ایس گل تے بڑا پچھتاوا سی کہ اوہنے ماضی چ مسیحیاں تے بوہت ظلم کیتا اے۔ پر اوہنوں پتہ سی کہ یہوواہ نے اوہنوں معاف کر دِتا اے۔ (‏1-‏تیمُتھیُس 1:‏12-‏15‏)‏ کیہہ پولُس اپنے ماضی دے گُناہواں بارے سوچ سوچ کے پریشان ہوندا رہیا؟ بالکل نئیں۔ جیویں اوہ ماضی چ مِلن والیاں کامیابیاں بارے نئیں سوچدا سی اونویں ای اوہ اپنے ماضی دے گُناہواں بارے وی نئیں سوچدا سی۔ (‏فِلپّیوں 3:‏4-‏8،‏ 13-‏15‏)‏ ایہدی بجائے اوہ پوری لگن تے جوش نال مُنادی کردا رہیا تے اوہنے اپنا پورا دھیان مستقبل تے رکھیا۔ پولُس وانگوں اَسی وی اپنے ماضی نُوں بدل نئیں سکدے۔ پر اَسی ہُن اپنے حالات مطابق ایہو جہے کم کر سکنے آں جنہاں توں یہوواہ دی وڈیائی ہوئے۔ نالے اَسی اپنا پورا دھیان اوس شاندار مستقبل تے رکھ سکنے آں جدا وعدہ یہوواہ نے کیتا اے۔‏

10.‏ جے ماضی چ اَسی کسے دا دل دُکھایا اے تے اَسی کیہہ کر سکنے آں؟‏

 ¹⁰ شاید تُسی ایس وجہ توں بوہت زیادہ پریشان ہووو کہ ماضی چ تُسی کسے نُوں تکلیف پونچائی سی۔ ایس صورت چ تُسی کیہہ کر سکدے او؟ تُسی جیہڑا نقصان کیتا اے اوہنوں بھرن دی کوشش کرو نالے ایہدے لئی دِلوں معافی منگو تے اپنی غلطی نُوں سدُھارن دی پوری کوشش کرو۔ (‏2-‏کُرنتھیوں 7:‏11‏)‏ یہوواہ کولوں دُعا کرو کہ اوہ اوہناں لوکاں دی مدد کرے جنہاں نُوں تواڈی وجہ توں تکلیف پونچی اے۔ اوہ تواڈی تے اوہناں لوکاں دی مدد کر سکدا اے تاکہ تُسی اوہدی خدمت جاری رکھ سکو تے ذہنی سکون حاصل کر سکو۔‏

11.‏ اَسی یُوناہ نبی توں کیہہ سکھ سکنے آں؟ (‏تصویر نُوں وی ویکھو۔)‏

¹¹ اپنیاں ماضی دِیاں غلطیاں توں سکھو۔ نالے یہوواہ تواڈے کولوں جیہڑا وی کم لینا چاہندا اے، اوہنوں کرن لئی تیار رہوو۔ ذرا یُوناہ نبی دی مثال تے غور کرو۔ خدا نے اوہنوں نینوہ جان دا حکم دِتا سی۔ پر نینوہ جان دی بجائے اوہ دُوجے پاسے چلا گیا۔ ایس لئی یہوواہ نے یُوناہ دی درستی کیتی تے یُوناہ نے اپنی غلطی توں سبق سکھیا۔ (‏یُوناہ 1:‏1-‏4،‏ 15-‏17؛‏ 2:‏7-‏10‏)‏ یہوواہ نے یُوناہ کولوں نبی دے طور تے کم لینا نئیں چھڈیا۔ اوہنے یُوناہ نُوں نینوہ جان دا اِک ہور موقع دِتا تے ایس واری یُوناہ نے فوراً یہوواہ دی گل منی۔ یُوناہ نُوں اپنی غلطی دا پچھتاوا تے ہے سی پر ایس وجہ توں اوہ اوس ذمے‌داری نُوں قبول کرن توں پچھے نئیں ہٹیا جیہڑی یہوواہ اوہنوں دے رہیا سی۔—‏یُوناہ 3:‏1-‏3‏۔‏

یہوواہ سانوں پاک روح دے ذریعے تسلی دیندا اے

12.‏ جدوں ساڈی زندگی چ کوئی تکلیف‌دہ واقعہ ہوندا اے تے یہوواہ سانوں اِطمینان کیویں دیندا اے؟ (‏فِلپّیوں 4:‏6، 7‏)‏

¹² جدوں ساڈے نال کوئی تکلیف‌دہ واقعہ ہوندا اے تے یہوواہ اپنی پاک روح دے ذریعے سانوں تسلی دیندا اے۔ ذرا بھرا رون تے بھین کیرل دے تجربے تے غور کرو۔ اوہناں دی زندگی چ اِک بڑا ای دردناک واقعہ ہویا۔ اوہناں دے پُتر نے خودکُشی کر لئی۔ اوہناں نے کہیا:‏ ”‏اَسی اپنی زندگی چ بوہت ساریاں مشکلاں دا سامنا کیتا سی۔ پر ایس تکلیف نُوں برداشت کرنا ساڈے لئی بوہت مشکل سی۔ سانوں رات نُوں نیند نئیں آندی سی تے اَسی یہوواہ کولوں دُعا کردے رہنے ساں۔ سانوں اوہ اِطمینان محسوس ہویا جدا ذکر فِلپّیوں 4:‏6، 7 چ ہویا اے۔“‏(‏ایہناں ایتاں نُوں پڑھو۔)‏ جے تواڈی زندگی چ وی کوئی ایہو جیہا واقعہ ہویا اے جدی وجہ توں تواڈا دل ٹُٹ گیا اے تے تُسی جِنّی وار چاہوو تے جِنّی دیر لئی چاہوو، دُعا چ یہوواہ نُوں اپنے دل دا حال دَس سکدے او۔ (‏زبور 86:‏3؛‏ 88:‏1‏)‏ یہوواہ کولوں وار وار اوہدی پاک روح منگو۔ اوہ تواڈی دُعا دا جواب ضرور دَوے گا۔—‏لُوقا 11:‏9-‏13‏۔‏

13.‏ پاک روح ساڈی مدد کیویں کردی اے تاکہ اَسی وفاداری نال یہوواہ دی خدمت کردے رہیے؟ (‏اِفسیوں 3:‏16‏)‏

¹³ کیہہ توانوں کدی کسے ایہو جہی مشکل دا سامنا کرنا پیا اے جدی وجہ توں تُسی ہمت ہار بیٹھے او؟ ایس صورت چ پاک روح توانوں طاقت دے سکدی اے تاکہ تُسی وفاداری نال یہوواہ دی خدمت کردے رہوو۔ ‏(‏اِفسیوں 3:‏16 نُوں پڑھو۔)‏ ذرا بھین فلورا دے تجربے تے غور کرو۔ اوہ تے اوہدا شوہر مشنری دے طور تے یہوواہ دی خدمت کر رہے سن۔ ایس دوران اوہدے شوہر نے اوہدے نال بے‌وفائی کیتی تے اوہناں دونواں دی طلاق ہو گئی۔ بھین فلورا نے دَسیا:‏ ”‏مَیں ہر ویلے اُداس رہنی ساں تے بس اپنے شوہر دی بے‌وفائی بارے سوچدی رہنی ساں۔ مَیں یہوواہ کولوں اوہدی پاک روح منگی تاکہ مَیں ایس تکلیف نُوں برداشت کر سکاں۔ شروع شروع چ مینوں لگ رہیا سی کہ جیویں سب کجھ ختم ہو گیا اے۔ پر یہوواہ نے مینوں طاقت دِتی تاکہ میرا زخم بھر سکے تے مَیں ایس مشکل وقت دا مقابلہ کر سکاں۔“‏ بھین فلورا محسوس کردی اے کہ یہوواہ دی مدد نال اوہدا ایس گل تے بھروسا ودھیا اے کہ یہوواہ ہر مشکل چ اوہنوں سنبھالے گا۔ اوہ کہندی اے:‏ ”‏زبور 119:‏32 چ لکھی ایہہ گل میرے تے لاگو ہوندی اے:‏ مَیں تیرے حکماں نُوں جوش نال مناں گا کیونکہ تُوں میرے دل چ ایہناں لئی جگہ بنانا ایں۔“‏

14.‏ اَسی کیہہ کر سکنے آں تاکہ یہوواہ اپنی پاک روح دے ذریعے ساڈی مدد کرے؟‏

¹⁴ یہوواہ کولوں پاک روح دی درخاست کرن دے نال نال توانوں کیہہ کرنا چاہی دا اے؟ ایہو جہے کم کرو جنہاں دے ذریعے تُسی یہوواہ دی پاک روح نُوں زیادہ توں زیادہ حاصل کر سکو جیویں کہ عبادتاں چ جانا تے مُنادی کرنا۔ اپنا دھیان یہوواہ دِیاں گلاں تے رکھو۔ ہر روز اوہدے کلام نُوں پڑھو تے اوہدے تے سوچ‌وچار کرو۔ (‏فِلپّیوں 4:‏8، 9‏)‏ بائبل پڑھدے ویلے  غور کرو کہ خدا دے کسے بندے نُوں کیہڑی مشکل دا سامنا کرنا پیا تے فیر ایس گل تے سوچ وچار کرو کہ یہوواہ نے اوہدی مدد کیویں کیتی تاکہ اوہ ہمت نہ ہارے۔ بھین سینڈرا جدا ایس مضمون چ پہلاں وی ذکر ہویا سی، اوہنوں اپنی زندگی چ اِک توں بعد اِک مشکلاں دا سامنا ہویا۔ اوہ کہندی اے:‏ ”‏یوسف دے واقعے توں مینوں بڑی ہمت مِلی۔ اوہنوں بوہت ساریاں مشکلاں تے نااِنصافیاں دا سامنا کرنا پیا سی۔ پر ایس وجہ توں اوہنے کدی وی یہوواہ نال اپنا رشتہ کمزور نئیں ہون دِتا۔“‏—‏پیدائش 39:‏21-‏23‏۔‏

یہوواہ ساڈے ہم‌ایماناں دے ذریعے سانوں تسلی دیندا اے

15.‏ اَسی کِنہاں کولوں تسلی حاصل کر سکنے آں تے اوہ ساڈی مدد کیویں کر سکدے نیں؟ (‏تصویر نُوں وی ویکھو۔)‏

¹⁵ جدوں اَسی کسے مشکل چوں لنگھ رہے ہنے آں تے سانوں اپنے ہم‌ایماناں توں بڑی تسلی مِل سکدی اے۔ (‏کُلسّیوں 4:‏11‏)‏ یہوواہ اوہناں دے ذریعے ساڈے لئی محبت وکھاندا اے۔ سانوں تسلی دین لئی شاید اوہ بڑے صبر نال ساڈی گل سُنن یاں مشکل چ ساڈا ساتھ دے کے سانوں احساس دَوان کہ اَسی کلّے نئیں۔ شاید اوہ ساڈا حوصلہ ودھان لئی ساڈے نال مِل کے کوئی ایت پڑھن یاں دُعا کرن۔‏ d (‏رومیوں 15:‏4‏)‏ کدی کدار ہو سکدا اے کہ کوئی بھین بھرا ساڈی مشکل بارے کوئی ایہو جہی گل کہوے جدے توں اَسی یہوواہ دی سوچ نُوں سمجھ سکئے تے بہتر محسوس کریئے۔ یاں شاید بھین بھرا کسے ہور طریقے نال ساڈی مدد کرن جیویں کہ ضرورت ویلے ساڈے لئی کھانا لیان۔‏

16.‏ دُوجیاں کولوں مدد لین لئی شاید سانوں کیہہ کرنا پووے؟‏

¹⁶ کدی کدار شاید سانوں دُوجیاں نُوں دَسنا پووے کہ اَسی کیہڑی مشکل  چوں لنگھ رہے آں۔ ساڈے بھین بھرا سانوں بوہت پیار کردے نیں تے ساڈی مدد کرنا چاہندے نیں۔ (‏اَمثال 17:‏17‏)‏ پر ہو سکدا اے کہ اوہناں نُوں ایہہ پتہ نہ ہوئے کہ اَسی کیہہ محسوس کر رہے آں تے سانوں کیس قسم دی مدد دی لوڑ اے۔ (‏اَمثال 14:‏10‏)‏ جے تُسی بوہت زیادہ دُکھی او تے ایہو جہے دوستاں نُوں اپنے دل دی گل دَسن توں نہ گھبراؤ جیہڑے پُختہ مسیحی نیں۔ اوہناں نُوں دَسو کہ توانوں کیس چیز دی لوڑ اے۔ تُسی اِک یاں دو ایہو جہے بزرگاں نال وی گل کر سکدے او جنہاں نال توانوں گل کرنا اسان لگدا اے۔ کجھ بھیناں نُوں شاید کسے پُختہ بھین نال گل کرنا اسان لگے۔‏

17.‏ کیہڑیاں گلاں دی وجہ توں شاید ساڈا دُوجیاں کولوں مدد لین دا دل نہ کرے؟‏

¹⁷ شاید پریشانی دی وجہ توں تواڈا دُوجیاں نال وقت گزارن نُوں دل نہ کرے۔ پر کلّے کلّے نہ رہوو۔ کدی کدار ہو سکدا اے کہ بھین بھرا توانوں نہ سمجھ سکن یاں فیر توانوں کوئی ایہو جہی گل کہہ دین جدی وجہ توں توانوں دُکھ ہوئے۔ (‏یعقوب 3:‏2‏)‏ پر ایہو جہیاں گلاں دی وجہ توں بھین بھراواں توں دُور نہ ہو جاؤ کیونکہ یہوواہ اوہناں دے ذریعے تواڈا حوصلہ ودھا سکدا اے۔ ذرا بھرا گیون دی مثال تے غور کرو جیہڑا کلیسیا چ بزرگ اے۔ اوہنوں ڈپریشن دی بیماری اے۔ اوہ کہندا اے:‏ ”‏کدی کدار میرا بالکل وی دل نئیں کردا کہ مَیں بھین بھراواں نال گل کراں یاں اوہناں نال وقت گزاراں۔“‏ پر ایہدے باوجود بھرا گیون بھین بھراواں نال وقت گزارن دی پوری کوشش کردا اے تے ایہدے توں اوہنوں بوہت فائدہ ہوندا اے۔ اِک بھین جدا ناں ایمی اے،اوہ کہندی اے:‏ ”‏ماضی چ میرے نال جو کجھ ہویا، اوہدی وجہ توں مینوں دُوجیاں تے بھروسا کرنا مشکل لگدا اے۔ پر مَیں اپنے بھین بھراواں تے بھروسا کرنا سکھ رہی آں۔ مَیں سوچنی آں کہ جے یہوواہ اوہناں نال پیار کردا اے تے اوہناں تے بھروسا کردا اے تے فیر مینوں وی کرنا چاہی دا اے۔ مینوں پتہ اے کہ یہوواہ ایہدے توں خوش ہوندا اے تے ایس گل توں مینوں وی خوشی مِلدی اے۔“‏

مستقبل بارے یہوواہ دے وعدیاں توں تسلی حاصل کرو

18.‏ اَسی مستقبل بارے کیہڑی گل تے بھروسا رکھ سکنے آں تے ہُن کیہہ کر سکنے آں؟‏

¹⁸ ایس گل تے پورا بھروسا رکھو کہ مستقبل چ سب کجھ ٹھیک ہو جائے گا کیونکہ یہوواہ ہر اوس چیز نُوں ختم کر دَوے گا جدی وجہ توں سانوں تکلیف پونچ دی اے۔ (‏مُکاشفہ 21:‏3، 4‏)‏ اوس ویلے ساڈے دل چ ماضی دِیاں گلاں دا خیال وی نئیں آئے گا۔ (‏یسعیاہ 65:‏17‏)‏ جیویں کہ اَسی ویکھیا اے، یہوواہ اَج وی ساڈے زخماں تے پٹی بنھدا اے۔ یہوواہ نے ساڈی مدد کرن تے سانوں تسلی دین لئی جو کجھ دِتا اے، اوہدے توں پورا فائدہ حاصل کرو۔ ایس گل نُوں کدی وی نہ بُھلو کہ ”‏اوہنوں تواڈی فکر اے۔“‏—‏1-‏پطرس 5:‏7‏۔‏