مطالعے دا مضمون نمبر 40
سچی توبہ کیہہ ہوندی اے؟
میں دینداراں نُوں بلان نئیں آیا سگوں گناہگاراں نُوں تاکہ اوہ توبہ کرن۔—لُوقا 5:32۔
گیت نمبر 36 (خوشی نال گاؤ): اپنے دل دی حفاظت کریئے
مضمون تے اِک نظر *
1، 2. (الف) بادشاہ اخیاب تے بادشاہ منسّی چ کیہہ فرق سی؟ (ب) ایس مضمون چ اَسی کیہڑے سوالاں تے غور کراں گے؟
آؤ پرانے زمانے چ رہن والے دو بادشاہواں دی مثال تے غور کریئے۔ اوہناں وچوں اِک اِسرائیل دی حکومت دا بادشاہ سی تے دُوجا یہوداہ دی حکومت دا بادشاہ سی۔ اوہناں دونواں نے بھانویں کہ فرق فرق دَوراں چ حکومت کیتی پر اوہناں چ کئی گلاں مِلدیاں جلدیاں سن۔ مثال لئی، اوہناں دونواں نے یہوواہ دے خلاف بغاوت کیتی تے اوہدے بندیاں نُوں گُناہ دی راہ تے پا دِتا۔ ایہدے علاوہ اوہناں نے جھوٹھے دیوتاواں دی عبادت کیتی تے لوکاں نُوں قتل کروایا۔ پر اوہناں دونواں چ اِک گل فرق سی۔ اِک نے مردے دم تک اپنے بھیڑے کماں توں توبہ نہ کیتی پر دُوجے نے اپنے گُناہواں توں توبہ کیتی تے یہوواہ نے اوہنوں معاف کر دِتا۔ آؤ، ویکھئے کہ ایہہ دونویں بندے کون سن۔
2 اِک دا ناں اخیاب سی جیہڑا اِسرائیل دا بادشاہ سی تے دُوجے دا ناں منسّی سی جیہڑا یہوداہ دا بادشاہ سی۔ ایہناں دونواں دی مثال توں اَسی توبہ کرن بارے اِک بوہت ای خاص گل سکھ سکنے آں۔ (اعمال 17:30؛ رومیوں 3:23) توبہ کیہہ اے تے اَسی ایہنوں کیویں ظاہر کر سکنے آں؟ ساڈے لئی ایہناں سوالاں دے جواب جاننا بوہت ضروری اے کیونکہ اَسی چاہنے آں کہ جدوں ساڈے کولوں گُناہ ہو جائے تے یہوواہ سانوں معاف کر دَوے۔ ایہناں سوالاں دے جواب جانن لئی اَسی بادشاہ اخیاب تے بادشاہ منسّی دی زندگی تے غور کراں گے تے ویکھاں گے کہ اَسی اوہناں توں کیہہ کجھ سکھ سکنے آں۔ ایہدے بعد اَسی غور کراں گے کہ یسوع مسیح نے توبہ کرن بارے کیہہ سکھایا۔
اَسی بادشاہ اخیاب توں کیہہ سبق سکھنے آں؟
3. اخیاب کیس طرحاں دا بادشاہ سی؟
3 اخیاب اِسرائیل دی حکومت دا ستواں بادشاہ سی۔ اوہنے جیس عورت نال ویاہ کیتا اوہدا ناں ایزبل سی جیہڑی صیدا دے بادشاہ دی دھی سی۔ اوہدی قوم بڑی امیر سی۔ ایزبل نال ویاہ کر کے اخیاب دے ملک چ دولت تے بڑی آ گئی پر ایہدی وجہ توں اوہدے ملک دے لوک ہور وی بھیڑے کماں چ پے گئے۔ ایزبل بعل دی پوجا کردی سی۔ اوہنے اخیاب نُوں ہلاشیری دِتی کہ اوہ ایس بھیڑے مذہب نُوں ہور پھیلائے جدے چ مندراں دے اندر گندے جنسی کم ہوندے سن تے بچیاں دی قربانی دِتی جاندی سی۔ ایزبل دے دَور چ یہوواہ دے نبیاں دی جان خطرے چ رہی۔ اوہنے بوہت سارے نبیاں نُوں قتل کروا دِتا۔ (1-سلاطین 18:13) اخیاب نے وی اوہناں سارے بادشاہواں نالوں یہوواہ دی نظر چ زیادہ بدی کیتی جیہڑے اوہدے توں پہلاں آئے سن۔ (1-سلاطین 16:30) یہوواہ خدا اخیاب تے ایزبل دِیاں ساریاں حرکتاں نُوں ویکھ رہیا سی۔ پر اوہنے اپنی قوم تے رحم کیتا تے ایلیاہ نبی نُوں اوہدے کول بھیجیا تاکہ اوہ اپنی بھیڑی راہ توں باز آ جائے۔ پر اخیاب تے ایزبل نے یہوواہ دِیاں گلاں تے کوئی دھیان نہ دِتا۔
4. یہوواہ نے اخیاب نُوں کیہڑی سزا دِتی تے اخیاب نے کیہہ کیتا؟
4 اخیر یہوواہ دے صبر دی حد ہو گئی تے اوہنے ایلیاہ نبی دے ذریعے اخیاب تے ایزبل نُوں سزا سنائی۔ اوہنے اوہناں نُوں دَسیا کہ اوہناں دی نسل دا ناںنشاں مٹ جائے گا۔ ایلیاہ دِیاں گلاں اخیاب نُوں چبھ گئیاں۔ پر حیرانی دی گل اے کہ ایہہ گھمنڈی آدمی یہوواہ دے حضور خاکسار بن گیا۔—1-سلاطین 21:19-29۔
5، 6. کیہڑیاں گلاں توں پتہ چلدا اے کہ اخیاب نے دلوں توبہ نئیں کیتی سی؟
5 بھانویں کہ اخیاب نے ایس موقعے تے خاکساری وکھائی پر اوہنے بعد چوں جیہڑے کم کیتے اوہناں توں ظاہر ہویا کہ اوہنے سچی توبہ نئیں سی کیتی۔ اوہنے اپنے ملک چوں بعل دی پوجا نُوں ختم نہ کیتا تے نہ ای اوہ لوکاں نُوں یہوواہ دی عبادت وَل لیایا۔ اخیاب دے ہور وی کئی کماں توں ظاہر ہویا کہ اوہنے دلوں توبہ نئیں کیتی سی۔
6 مثال لئی، بعد چوں اخیاب نے یہوداہ دے بادشاہ یہوسفط کولوں مدد منگی کہ اوہ اوہدے نال مِل کے ارامیاں دے خلاف جنگ لڑے۔ یہوسفط اِک چنگا بادشاہ سی تے یہوواہ تے بھروسا کردا سی۔ ایس لئی اخیاب دے نال جنگ تے جان توں پہلاں اوہنے اخیاب نُوں کہیا کہ سانوں پہلاں یہوواہ دے نبی کولوں مشورہ لینا چاہی دا اے۔ شروع چ تے اخیاب نے منع کر دِتا تے کہیا کہ اِک بندہ ہے تے سہی جدے ذریعے اَسی یہوواہ کولوں پچھ سکنے آں پر مینوں اوہدے توں نفرت اے کیونکہ اوہ میرے بارے چنگی نئیں سگوں ہمیشاں بھیڑی پیشینگوئی کردا اے۔ اخیر اوہ دونویں میکایاہ نبی نال مشورہ کرن لئی گئے۔ اخیاب دی گل صحی نکلی۔ میکایاہ نبی نے اخیاب بارے بھیڑی خبر سُنائی۔ اوہدی گل سُن کے اخیاب نے یہوواہ کولوں معافی منگن تے توبہ کرن دی بجائے اوہنوںجیل چ پا دِتا۔ (1-سلاطین 22:7-9، 23، 27) بھانویں کہ اخیاب نے یہوواہ دے نبی نُوں جیل چ پوا دِتا پر اوہ اوہدی پیشینگوئی نُوں پورا ہون توں نہ روک سکیا۔ بعد چ جدوں اخیاب جنگ لڑن لئی گیا تے اوہ ماریا گیا۔—1-سلاطین 22:34-38۔
7. یہوواہ خدا نے اخیاب دے مرن دے بعد اوہدے بارے کیہہ کہیا؟
7 اخیاب دے مرن توں بعد یہوواہ نے ظاہر کیتا کہ اوہ اخیاب بارے کیہہ محسوس کردا سی۔ جدوں یہوسفط بادشاہ جنگ توں صحی سلامت گھر واپس آیا تے یہوواہ نے یاہو نبی دے ذریعے یہوسفط نُوں دَسیا کہ اوہنے اخیاب دی مدد کر کے بوہت وڈی غلطی کیتی اے۔ یاہو نے اوہنوںکہیا کہ کیہہ ایہہ صحی اے کہ تُوں شریراں دی مدد کریں تے یہوواہ دے دُشمناں نال پیار کریں؟ (2-تواریخ 19:1، 2) ذرا سوچو کہ جے اخیاب نے دلوں توبہ کیتی ہوندی تے یہوواہ کدی وی اپنے نبی دے ذریعے اوہدے بارے ایہہ نہ کہندا کہ اوہ اِک بھیڑا آدمی سی تے یہوواہ توں نفرت کردا سی۔ ایہدے توں ظاہر ہوندا اے کہ اخیاب کسے حد تک اپنے گُناہواں تے پچھتایا تے ہے سی پر اوہنے سچی توبہ نئیں کیتی سی۔
8. اخیاب دے نال جو کجھ ہویا اوہدے توں اَسی توبہ کرن بارے کیہہ سکھنے آں؟
8 اَسی اخیاب توں کیہہ سبق سکھنے آں؟ جدوں ایلیاہ نے اخیاب نُوں دَسیا کہ اوہدی نسل دا ناںنشاں مٹ جائے گا تے شروع شروع چ اوہنے خاکساری وکھائی تے ایہہ چنگی گل سی۔ پر بعد چوں اوہنے اپنے کماں توں ظاہر کیتا کہ اوہنے دلوں توبہ نئیں کیتی سی۔ ایس توں پتہ چلدا اے کہ توبہ کرن دا مطلب ایہہ نئیں کہ اَسی اپنیاں غلطیاں تے بس پچھتاوا محسوس کرئیے۔ آؤ، ہُن اِک ہور بادشاہ دی مثال تے
غور کرئیے جدے توں اَسی سکھاں گے کہ سچی توبہ کرن چ کیہہ کجھ شامل اے۔اَسی بادشاہ منسّی توں کیہہ سکھ سکنے آں؟
9. منسّی کیہو جیہا بادشاہ سی؟
9 اِسرائیل چ اخیاب دی حکمرانی دے دو سو سال بعد منسّی ملک یہوداہ دا بادشاہ بنیا۔ اوہنےتے اخیاب نالوں وی وڈے گُناہ کیتے۔ بائبل چ منسّی بارے دَسیا گیا اے کہ اوہنے یہوواہ دی نظر چ بڑی بدکاری کیتی تے اوہنوںغصہ دَوایا۔ (2-تواریخ 33:1-9) منسّی نے جھوٹھے دیوتاواں دے اَگے قربانیاں چڑھان لئی تھانواں بنوایاں۔ ایتھوں تک کہ اوہنے یہوواہ دی ہیکل دے وچکار اِک دیوی دی مورتی بنوا دِتی۔اوہ جادوٹونا کردا تے فال کڈھدا سی۔ ایہدے علاوہ اوہنے بوہت زیادہ بےگناہواں دا خون کیتا جدے نال یروشلیم اِک سرے توں دُوجے سر تک بھر گیا۔ اوہنے بڑی بےرحمی نال لوکاں نُوں قتل کروایا۔ اوہنے تے جھوٹھے دیوتاواں دے اَگے قربانی چڑھان لئی اپنے پُتراں نُوں وی اَگ چ ساڑیا۔—2-سلاطین 21:6، 7، 10، 11، 16۔
10. یہوواہ خدا نے منسّی دی اِصلاح کیویں کیتی تے منسّی نے کیہہ کیتا؟
10 اخیاب وانگوں منسّی نے وی اوہ گلاں نہ سُنیاں جیہڑیاں یہوواہ نے اپنے نبیاں دے ذریعے اوہنوںکہیاں سن۔ ایس لئی یہوواہ نے ملک یہوداہ نُوں اسور دے بادشاہ دے حوالے کر دِتا۔ اسور دی فوج نے یہوداہ تے حملہ کیتا تے بادشاہ منسّی نُوں بیڑیاں پا کے بابل لے گئے۔ جدوں منسّی بابل چ قید سی تے لگدا اے کہ اوہنے اپنے گُناہواں تے سوچوچار کیتا ہوئے گا۔ اوہ اپنے پیو دادے دے خدا دے حضور بڑا خاکسار بن گیا۔ پر اوہنے کجھ ہور وی کیتا۔ اوہ اپنے بھیڑے کماں توں باز آیا، یہوواہ نُوں اپنا خدا منیا تے اوہدے کولوں دل دی گہرائیاں توں دُعا کرن لگ پیا۔—2-تواریخ 33:10-13۔
11. دُوجی تواریخ 33:15، 16 دے مطابق منسّی نے کیویں ظاہر کیتا کہ اوہنے سچی توبہ کیتی سی؟
11 وقت آن تے یہوواہ نے منسّی دی دُعاواں دا جواب دِتا۔ یہوواہ نے ویکھیا کہ اوہنے اپنے آپ نُوں بدل لیا اے جدا ثبوت اوہدیاں دُعاواں سن۔ ایس لئی یہوواہ نے منسّی دی اِلتجا سنی، اوہنوں معاف کیتا تے اوہنوںفیر توں بادشاہ بنا دِتا۔ منسّی نے ایہہ ثابت کرن دی پوری کوشش کیتی کہ اوہنے سچی توبہ کیتی اے۔ اوہنے اوہ کیتا جو اخیاب نے نئیں کیتا سی۔ اوہنے اپنا چالچلن بدل لیا، جھوٹھے دیوتاواں دی پوجا کرن دی مخالفت کیتی تے لوکاں نُوں یہوواہ دی عبادت وَل لیایا۔ (2-تواریخ 33:15، 16 نُوں پڑھو۔) ایہہ سب کجھ کرن لئی منسّی نُوں بڑی دلیری تے ایمان دی لوڑ سی کیونکہ اوہنے کئی سالاں تک اپنے گھر والیاں، اپنے اعلیٰ افسراں تے اپنی قوم لئی بوہت ای بھیڑی مثال قائم کیتی سی۔ پر ہُن اپنی حکمرانی دے آخری سالاں چ اوہنے اوس سارے نقصان نُوں بھرن دی پوری کوشش کیتی جیہڑا اوہدے غلط کماں دی وجہ توں ہویا سی۔ اوہنے اپنے پوترے یوسیاہ لئی اِک ودھیا مثال قائم کیتی کیونکہ یوسیاہ بعد چوں اِک چنگا بادشاہ ثابت ہویا۔—2-سلاطین 22:1، 2۔
12. اَسی منسّی دی مثال توں توبہ کرن بارے کیہہ کجھ سکھ سکنے آں؟
زبور 86:5) پر اوہ صرف اوہناں لوکاں نُوں ای معاف کردا اے جیہڑے دلوں توبہ کردے نیں۔
12 اَسی منسّی توں کیہہ سکھ سکنے آں؟ اوہنے خاکساری ظاہر کرن دے نال نال ہور وی کجھ کیتا۔ اوہنے یہوواہ کولوں دُعا کیتی تے اوہدے کولوں رحم دی اِلتجا کیتی۔ اوہنے اپنے رویے تے چالچلن نُوں بدل لیا۔اوہنے اوس نقصان نُوں بھرن دی پوری کوشش کیتی جیہڑا اوہدے کماں دی وجہ توں ہویا سی۔ ایہدے علاوہ اوہنے یہوواہ دی عبادت دی پوری حمایت کیتی تے اِنج کرن چ دُوجیاں دی مدد وی کیتی۔ منسّی دی مثال تے غور کرن نال اوہناں لوکاں نُوں بڑا حوصلہ مِلدا اے جنہاں کولوں سنگین گُناہ ہوئے نیں۔ اوہدی مثال توں ثابت ہوندا اے کہ یہوواہ نیک تے معاف کرن نُوں تیار اے۔ (13. اِک مثال دَوو جدے توں اَسی توبہ کرن بارے اِک اہم گل سکھنے آں۔
13 منسّی نے اپنے گُناہواں تے بس شرمندگی ظاہر نئیں کیتی سگوں ہور وی کجھ کیتا۔ ایس توں اَسی توبہ کرن بارے اِک اہم سبق سکھنے آں۔ ایہدے بارے ذرا ایس مثال تے غور کرو۔ فرض کرو کہ تُسی اِک بیکری تے جاندے او تے دُکاندار نُوں کہندے او کہ توانوں اِک کیک چاہی دا اے۔ پر اوہ کیک دین دی بجائے تواڈے ہتھ چ اِک آنڈہ پھڑا دیندا اے۔ کیہہ تُسی آنڈہ لے کے خوش ہووو گے؟ یقیناً نئیں۔ پر جدوں دُکاندار توانوں دَسدا اے کہ کیک بنان لئی آنڈہ بوہت ضروری ہوندا اے تے کیہہ تُسی ایس گل توں مطمئن ہو جاؤ گے؟ ظاہر اے نئیں۔ ہُن ذرا ایس مثال نُوں ایس گل تے لاگو کرو۔ یہوواہ اِک گُناہگار بندے نُوں کہندا اے کہ اوہ اپنے گُناہ توں دلوں توبہ کرے۔ پر جے اوہ بندہ اپنے گُناہ لئی بس شرمندگی ظاہر کرے تے کیہہ ایہہ کافی ہوئے گا؟ ایہہ سچ اے کہ توبہ کرن لئی اپنے گُناہ تے شرمندگی محسوس کرنا ضروری اے۔ پر ایہہ کافی نئیں۔ اِک گُناہگار بندے نُوں کجھ ہور وی کرن دی ضرورت اے۔ آؤ، ایس بارے یسوع دی اِک مثال تے غور کرئیے جیہڑی ساڈے دلاں نُوں چُھو لیندی اے۔
ایہہ اندازہ کیویں لایا جا سکدا اے کہ اِک بندے نے دلوں توبہ کیتی اے؟
14. یسوع مسیح دی مثال دے مطابق سدھی راہ توں بھٹکے ہوئے پُتر نے ایہہ کیویں ظاہر کرنا شروع کیتا کہ اوہنے توبہ کر لئی اے؟
14 لُوقا 15:11-32 چ یسوع مسیح نے دل نُوں چُھو لین والی اِک مثال دِتی جدے چ اِک بندہ سدھی راہ توں بھٹک جاندا اے۔ اوہ اپنے پیو نال بغاوت کردا اے، گھر چھڈدیندا اے تے کسے دُور دے ملک چ جا کے رہن لگ پیندا اے۔ اوتھے اوہ بدچلنی چ پے جاندا اے۔ پر جدوں اوہدے تے مشکلاں آندیاں نیں تے اوہ سوچدا اے کہ اوہنے کِنّاں غلط فیصلہ کیتا سی۔ یسوع مسیح نے دَسیا کہ اوہنوںہوش آیا یعنی اوہنوںاحساس ہویا کہ اوہ اپنے پیو دے گھر کِنّی چنگی زندگی گزار رہیا سی۔ اوہ فیصلہ کردا اے کہ اوہ واپس گھر جائے گا تے اپنے پیو کولوں معافی منگے گا۔ ایہہ بڑی اہم گل سی کہ اوہنوںاحساس ہویا کہ اوہنے جیہڑا فیصلہ کیتا سی اوہ غلط سی۔ پر کیہہ ایہہ احساس ہونا ای کافی سی؟ جی نئیں۔ اوہنوںہور وی کجھ کرن دی لوڑ سی۔
15. ایہہ کیویں ثابت ہویا کہ بھٹکے ہوئے پُتر نے واقعی سچی توبہ کیتی سی؟
15 بھٹکے ہوئے پُتر نے اپنے کماں توں ظاہر کیتا کہ اوہنے دلوں توبہ کر لئی اے۔ اوہ اِک لما سفر کر کے اپنے گھر گیا۔ اوتھے پونچ کے اوہنے اپنے پیو نُوں کہیا کہ ابو، میں خدا دے خلاف تے تیرے خلاف گُناہ کیتا اے۔ لُوقا 15:21) اوہنے دلوں اپنے گُناہ دا اعتراف کیتا جدے توں ظاہر ہویا کہ اوہ فیر توں یہوواہ نال اپنی دوستی مضبوط کرنا چاہندا اے۔ اوہنوںایس گل دا احساس وی ہے سی کہ اوہدے کماں دی وجہ توں اوہدے پیو دا دل بڑا دُکھیا اے۔ ایس لئی اوہ اپنے پیو نُوں خوش کرن لئی سخت محنت کرن لئی وی تیار سی ایتھوں تک کہ اوہ اوہدا مزدور بنن لئی وی تیار سی۔ (لُوقا 15:19) یسوع مسیح دی ایہہ مثال صرف دل چُھو لین والی اِک کہانی نئیں اے۔ ایہدے چ دَسے گئے اصول اوس ویلے بزرگاں دے بڑے کم آندے نیں جدوں اوہ ایہہ سمجھن دی کوشش کردے نیں کہ گُناہ کرن والے بندے نے سچی توبہ کیتی اے کہ نئیں۔
میں ایس لائق نئیں کہ تُوں مینوں اپنا پُتر آکھیں۔ (16. بزرگاں لئی ایس گل دا اندازہ لانا مشکل کیوں ہو سکدا اے کہ اِک بندے نے دلوں توبہ کیتی اے کہ نئیں؟
16 بزرگاں لئی ایس گل دا اندازہ لانا مشکل ہو سکدا اے کہ اِک بندے نے سچی توبہ کیتی اے کہ نئیں۔ کیوں ؟ کیونکہ بزرگ کسے بندے دا دل نئیں پڑھ سکدے۔ ایس لئی اوہ ایس گل دے ثبوت لبھدے نیں کہ کیہہ گُناہ کرن والے بندے نُوں واقعی احساس ہو گیا اے کہ اوہنے کِنّاں سنگین گُناہ کیتا اے۔ کدی کدار اِک بندہ اینی ہٹدھرمی نال گُناہ کردا اے کہ بزرگاں لئی ایہہ یقین کرنا مشکل ہو جاندا اے کہ اوہنے واقعی دلوں توبہ کیتی اے۔
17. (الف) اِک مثال توں ایہہ کیویں ظاہر ہوندا اے کہ اپنی غلطی تے صرف پچھتان نال ایہہ ثابت نئیں ہوندا کہ اِک بندے نے دلوں توبہ کیتی اے؟ (ب) 2-کُرنتھیوں 7:11 دے مطابق دَسو کہ اوس بندے توں کیہہ توقع کیتی جاندی اے جیہڑا دلوں توبہ کردا اے؟
17 ایس بارے ذرا اِک مثال تے غور کرو۔ اِک بھرا کئی سالاں توں وار وار زِناکاری کر رہیا اے۔ ایس بارے مدد منگن دی بجائے اوہ اپنا گُناہ اپنی بیوی، دوستاں تے بزرگاں کولوں چھپاندا اے۔ اخیر بزرگاں نُوں اوہدے ایس گُناہ بارے پتہ چل جاندا اے۔ جدوں بزرگ ثبوتاں دی بِنا تے اوہدے نال گل کردے نیں تے اوہ اپنا گُناہ من لیندا اے تے شرمندگی ظاہر کردا اے۔ پر کیہہ صرف اِنج کرن نال ایہہ ثابت ہو جائے گا کہ اوہنے دلوں توبہ کر لئی اے؟ جی نئیں۔ ایس معاملے نُوں حل کردے ویلے بزرگ صرف ایہہ ای نئیں ویکھن گے کہ اوہ بندہ اپنے گُناہ تے شرمندہ اے۔ ظاہر اے کہ اوس بندے نے صرف اِک وار گُناہ نئیں کیتا سگوں اوہ کئی سالاں توں اِنج کر رہیا سی۔ نالے اوہنے آپ بزرگاں کول جا کے اپنا گُناہ نئیں منیا سگوں بزرگاں نُوں کسے کولوں اوہدے گُناہ بارے پتہ چلیا۔ ایس لئی بزرگ ایہو جہے ثبوتاں تے غور کرن گے جنہاں توں واضح ہو جائے کہ گُناہ کرن والے بندے نے واقعی اپنی سوچ تے چالچلن نُوں بدل لیا اے کہ نئیں۔ (2-کُرنتھیوں 7:11 نُوں پڑھو۔) ہو سکدا اے کہ اوس بندے نُوں اپنے اندر ضروری تبدیلیاں لیان چ کافی وقت لگ جائے۔ ایس لئی بزرگ اوہنوںاوہدوں تک کلیسیا چوں کڈھ دیندے نیں جدوں تک اوہ اپنے آپ نُوں پوری طرحاں بدل نئیں لیندا۔—1-کُرنتھیوں 5:11-13؛ 6:9، 10۔
18. (الف) جیس بندے نُوں کلیسیا چوں کڈھ دِتا گیا اے، اوہ ایہہ کیویں ظاہر کر سکدا اے کہ اوہنے دلوں توبہ کیتی اے؟ (ب) دلوں توبہ کرن دا کیہہ نتیجہ نکل سکدا اے؟
18 جیس بندے نُوں کلیسیا چوں کڈھ دِتا گیا اے، جے اوہ ایہہ ظاہر کرنا چاہندا اے کہ اوہنے دلوں توبہ کر لئی اے تے اوہ باقاعدگی نال عبادتاں تے آئے گا۔ اوہ بزرگاں دی صلاح تے عمل کردے ہوئیاں باقاعدگی نال
یہوواہ کولوں دُعا کرے گا تے اوہدے کلام نُوں پڑھے گا۔ اوہ ایہو جہی کسے وی صورتحال توں دُور رہن دی پوری کوشش کرے گا جدے چ اوہ فیر گُناہ کرن دے خطرے چ پے سکدا اے۔ جے اوہ یہوواہ نال فیر توں اپنی دوستی مضبوط کرن دی کوشش کرے گا تے اوہ پکا یقین رکھ سکدا اے کہ یہوواہ اوہنوںمعاف کر دے گا تے بزرگ اوہنوںکلیسیا چ بحال کر دین گے۔ بےشک جدوں بزرگ ایہہ جانن دی کوشش کردے نیں کہ گُناہ کرن والے بندے نے دلوں توبہ کیتی اے کہ نئیں تے اوہ ایس گل نُوں ذہن چ رکھدے نیں کہ ہر معاملہ اِک دُوجے توں فرق ہوندا اے۔ ایس لئی اوہ ہر معاملے دی بڑی گہرائی نال چھانبین کردے نیں تے فیصلہ کردے ویلے سختی نئیں کردے۔19. دلوں توبہ کرن چ کیہہ کجھ شامل اے؟ (حِزقیایل 33:14-16)
19 اَسی سکھ لیا اے کہ جدوں اِک بندے کولوں سنگین گُناہ ہو جاندا اے تے معافی منگ لینا کافی نئیں ہوندا۔ ایہہ وی بوہت ضروری اے کہ اوہ بندہ اپنی سوچ نُوں بدلے تے اپنے کماں توں ظاہر کرے کہ اوہنے دلوں توبہ کر لئی اے۔ ایہدے چ ایہہ شامل اے کہ اوہ بندہ اپنے بھیڑے کماں نُوں چھڈ دَوے تے فیر توں یہوواہ دے معیاراں مطابق زندگی گزارے۔ (حِزقیایل 33:14-16 نُوں پڑھو۔) گُناہ کرن والے بندے لئی سب توں ضروری گل ایہہ ہونی چاہی دی اے کہ اوہ یہوواہ نال اپنی دوستی نُوں بحال کرے۔
گُناہگاراں دی مدد کرو تاکہ اوہ توبہ کرن
20، 21. اَسی اوس بندے دی مدد کیویں کر سکنے آں جدے کولوں سنگین گُناہ ہو جاندا اے؟
20 یسوع مسیح نے دَسیا سی کہ اوہدے زمین تے آن دی اِک اہم وجہ کیہہ سی۔ اوہنے کہیا کہ میں دینداراں نُوں بلان نئیں آیا سگوں گناہگاراں نُوں تاکہ اوہ توبہ کرن۔ (لُوقا 5:32) ساڈی وی ایہی خواہش ہونی چاہی دی اے۔ تے فیر جے سانوں پتہ چلدا اے کہ ساڈے کسے قریبی دوست کولوں کوئی سنگین گُناہ ہو گیا اے تے سانوں کیہہ کرنا چاہی دا اے؟
21 جے اَسی اوہدا گُناہ چھپان دی کوشش کراں گے تے اصل چ اَسی اپنے دوست دا ای نقصان کر رہے ہونواں گے۔ تے اُنج وی اوہدے گُناہ نُوں چھپان دا کوئی فائدہ نئیں ہوئے گا کیونکہ یہوواہ سب کجھ ویکھ رہیا اے۔ (امثال 5:21، 22؛ 28:13) تُسی اپنے دوست نُوں دَس سکدے او کہ بزرگ گُناہ کرن والے بندے دی دلوں مدد کرنا چاہندے نیں۔ پر جے اوہ بزرگاں کول جا کے اپنا گُناہ نئیں من دا تے فیر توانوں بزرگاں نُوں ایہدے بارے دَسنا چاہی دا اے۔ اِنج تُسی ظاہر کرو گے کہ تُسی واقعی اوہدی مدد کرنا چاہندے او۔ ایہہ بوہت ضروری اے کہ تواڈا دوست بزرگاں کولوں مدد لوے تے توبہ کرے کیونکہ جے اوہ اِنج نئیں کرے گا تے یہوواہ نال اوہدی دوستی ٹُٹ جائے گی۔
22. اگلے مضمون چ اَسی کیس بارے گل کراں گے؟
22 ہو سکدا اے کہ اِک بندہ گُناہ دی راہ تے بوہت اَگے نکل گیا ہووے تے بزرگ اوہنوں کلیسیا چوں کڈھن دا فیصلہ کرن۔ کیہہ اوہناں دے ایس فیصلے دا مطلب ایہہ وے کہ اوہ اوس بندے تے رحم نئیں کر رہے؟ اگلے مضمون چ اَسی ایس بارے گل کراں گے کہ یہوواہ گُناہ کرن والے لوکاں دی اِصلاح کردے ویلے رحم کیویں ظاہر کردا اے تے اَسی اوہدی مثال تے کیویں عمل کر سکنے آں۔
گیت نمبر 106 (خوشی نال گاؤ): سچی محبت وکھاؤ
^ پیراگراف 5 سچی توبہ دا مطلب ایہہ نئیں کہ اَسی اپنے گُناہ دی بس معافی منگئے۔ ایس مضمون چ اَسی بادشاہ اخیاب، بادشاہ منسّی تے سدھی راہ توں بھٹکے ہوئے اوس پُتر دی مثال تے غور کراں گے جدا ذکر یسوع مسیح نے کیتا سی۔ ایس طرحاں اَسی چنگی طرحاں سمجھ جاواں گے کہ توبہ کرن دا اصل چ کیہہ مطلب اے۔ ایس مضمون چ اَسی کجھ ایہو جہیاں گلاں تے وی غور کراں گے جنہاں دے ذریعے بزرگ ایہہ اندازہ لا سکدے نیں کہ اِک سنگین گُناہ کرن والے بندے نے دلوں توبہ کیتی اے یاں نئیں۔
^ پیراگراف 60 تصویر دی وضاحت: بادشاہ اخیاب بڑے غصے چ اپنے سپاہیاں نُوں حکم دے رہیا اے کہ اوہ میکایاہ نبی نُوں جیل چ پا دین۔
^ پیراگراف 62 تصویر دی وضاحت: بادشاہ منسّی کجھ بندیاں نُوں ایہہ ہدیت دے رہیا اے کہ اوہ اوہناں مورتیاں نُوں تباہ کر دین جیہڑیاں اوہنے ہیکل چ رکھوائیاں نیں۔
^ پیراگراف 64 تصویر دی وضاحت: سدھی راہ توں بھٹک جان والا پُتر اِک لما سفر کرن دے بعد بوہت تھک گیا اے۔ پر جدوں اوہ تھوڑی دُور اپنے گھر نُوں ویکھدا اے تے اوہناں حوصلہ مِلدا اے۔