مطالعے دا مضمون نمبر 42
پورے یقین نال سچائی نُوں پھڑی رکھو
ساریاں گلاں دا جائزہ لوو تے جیہڑیاں چنگیاں ہون اوہناں نُوں پھڑی رکھو۔—1-تھسلُنیکیوں 5:21۔
گیت نمبر 34 (خوشی نال گاؤ): وفا دی راہ تے چلو
مضمون تے اِک نظر *
1.بوہت سارے لوک اُلجھن چ کیوں نیں؟
اَج دُنیا چ بوہت سارے مسیحی فرقے نیں جیہڑے دعویٰ کردے نیں کہ جیس طریقے نال اوہ عبادت کردے نیں، اوہی طریقہ خدا نُوں پسند اے۔ ایس لئی بوہت سارے لوک اُلجھن چ پئے ہوئے نیں تے اکثر ایہہ سوچدے نیں کہ کیہہ واقعی کوئی سچا مذہب ہے وے یاں کیہہ خدا نُوں سارے مذہب پسند نیں؟ کیہہ سانوں ایس گل تے پکا یقین اے کہ یہوواہ دے گواہواں دے طور تے جیہڑی تلیم اَسی لوکاں نُوں دینے آں اوہ سچی اے؟ تے جیس طریقے نال اَسی یہوواہ دی عبادت کرنے آں اوہ اوہنوں پسند اے؟ کیہہ اَسی ایہناں گلاں تے یقین رکھ سکنے آں؟ آؤ، ایس بارے کجھ ثبوتاں تے غور کرئیے۔
2. پہلا تھسلُنیکیوں 1:5 دے مطابق پولُس رسول نُوں ایس گل تے پکا یقین کیوں سی کہ جیہڑیاں گلاں تے اوہ ایمان رکھدا اے اوہ سچیاں نیں؟
2 پولُس رسول نُوں ایس گل تے پورا یقین سی کہ اوہ جیہڑیاں گلاں تے ایمان رکھدا اے اوہ سچیاں نیں۔ (1-تھسلُنیکیوں 1:5 نُوں پڑھو۔) اوہدے ایس یقین دی بنیاد اوہدے جذبات نئیں سگوں خدا دا کلام سی کیونکہ اوہ خدا دے کلام دا گہرائی نال مطالعیا کردا سی۔ اوہنوں پکا یقین سی کہ پاک صحیفیاں چ جو کجھ وی لکھیا اے اوہ خدا دے الہام توں اے۔ (2-تیمُتھیُس 3:16) اوہنے خدا دے کلام توں کیہہ کجھ سکھیا؟ پاک صحیفیاں دا مطالعیا کرن نال پولُس رسول نُوں ایس گل دے پکے ثبوت ملے کہ یسوع ای مسیح سی۔ایہہ اوہ سچائی سی جنہوں یہودی مذہبی رہنما نئیں من دے سن۔ ایہہ مذہبی رہنما ایہہ دعویٰ کردے سن کہ اوہ خدا دے نمائندے نیں پر اوہناں دے کم بالکل اُلٹ سن۔ (طِطُس 1:16) پر پولُس ایہناں مذہبی رہنماواں ورگا نئیں سی۔ اوہ ایہہ نئیں سی سوچدا کہ اوہ پاک کلام دی فلاں سچائی نُوں منے گا تے فلاں نُوں نئیں منے گا۔ ایہدی بجائے اوہ لوکاں نُوں خدا دی مرضی بارے دَسدا سی تے آپ وی ایہدے مطابق چلدا سی۔—اعمال 20:27۔
3. ایہہ جانن لئی کہ اَسی سچائی جان گئے آں، کیہہ ساڈے کول ساڈے سارے سوالاں دے جواب ہونے چاہی دے نیں؟ (بکس ” یہوواہ دے خیال تے کم شمار توں وی باہر نیں“ نُوں وی ویکھو۔)
3 کجھ لوکاں نُوں لگدا اے کہ سچا مذہب اوہی ہوندا اے جیہڑا ہر سوال دا جواب دَوے، اوہناں سوالاں دا وی جنہاں بارے بائبل چ کجھ نئیں دَسیا گیا۔ پر کیہہ ایہہ توقع کرنا سمجھداری دی گل ہوئے گی؟ ایس بارے ذرا پولُس دی مثال تے غور کرو۔ اوہنے اپنے ہمایماناں نُوں کہیا کہ اوہ ساریاں گلاں دا جائزہ لین پر اوہنے ایہہ وی منیا کہ اوہ حالے وی بوہت ساریاں گلاں سمجھ نئیں سکیا۔ (1-تھسلُنیکیوں 5:21) اوہنے کہیا کہ ساڈا علم مکمل نئیں اے۔ فیر اوہنے اَگے کہیا کہ اَسی دُھندلی تصویر ویکھ رہے آں جیویں کہ دھات دے شیشے چ ویکھ رہے ہوئیے۔ (1-کُرنتھیوں 13:9، 12) پولُس رسول خدا بارے ساریاں سچائیاں نُوں سمجھ نئیں سکیا سی تے نہ ای اَسی سمجھ سکنے آں۔ پر اوہ خدا بارے بنیادی سچائیاں سمجھ گیا سی۔ اوہنے ایناں علم حاصل کر لیا سی کہ اوہنوں ایس گل تے پکا یقین ہو گیا کہ اوہ سچائی نُوں جان گیا اے۔
4. (الف) اَسی اپنے ایس یقین نُوں پکا کیویں کر سکنے آں کہ اَسی سچائی نُوں جان گئے آں؟ (ب) اَسی سچے مسیحیاں بارے کیہڑیاں گلاں تے غور کراں گے؟
4 اِک طریقہ کیہہ اے جدے توں اَسی ایس گل تے اپنا یقین پکا کر سکنے آں کہ اَسی سچائی نُوں جان گئے آں؟ ایہدا اِک طریقہ ایہہ وے کہ اَسی ایہہ ویکھئے کہ یسوع مسیح نے یہوواہ دی عبادت کیویں کیتی تے اَج یہوواہ د ے گواہ اوہدی عبادت کیس طرحاں کردے نیں۔ ایس مضمون چ اَسی ویکھاں گے کہ سچے مسیحی (1) بُتپرستی توں دُور رہندے نیں (2) یہوواہ دے ناں دی عزت کردے نیں (3) سچائی نُوں پیار کردے نیں تے (4) دلوں اِک دُوجے نُوں پیار کردے نیں۔
اَسی بُتپرستی توں دُور رہنے آں
5. اَسی صحی طریقے نال یہوواہ دی عبادت کرن بارے یسوع مسیح توں کیہہ سکھنے آں؟
5 یسوع مسیح یہوواہ خدا نال بوہت پیار کردا سی۔ ایس لئی بھانویں اوہ اسمان تے سی یاں زمین تے، اوہنے صرف یہوواہ خدا دی عبادت کیتی۔ (لُوقا 4:8) اوہنے اپنے شاگرداں نُوں وی ایہی سکھایا۔ یہوواہ خدا دی عبادت کردے ویلے نہ تے یسوع مسیح نے تے نہ ای اوہدے شاگرداں نے بُتاں نُوں استمال کیتا۔ خدا روح اے ایس لئی دُنیا دا کوئی وی انسان ایہو جہی شکل نئیں بنا سکدا جیہڑی ذرا وی خدا دی شکل ورگی ہوئے۔ (یسعیاہ 46:5) پر کیہہ اوہناں انساناں دِیاں تصویراں یاں بُتاں اَگے دُعا کرنا صحی اے جنہاں نُوں لوک مُقدس سمجھدے نیں؟ غور کرو کہ خدا نے جیہڑے دس حکم دِتے اوہناں چوں دُوجا حکم کیہڑا سی۔ یہوواہ نے کہیا کہ تُوں اپنے لئی کوئی مورت یاں بُت نہ بنائیں تے نہ ای کسے شے دی صورت بنائیں جیہڑی اسمان چ ہوئے یاں زمین تے ہوئے۔ تُوں ایہناں نُوں سجدہ نہ کریں۔ (خروج 20:4، 5) جیہڑے لوک خدا نُوں خوش کرنا چاہندے نیں اوہ جان دے نیں کہ ایہناں ایتاں دے مطابق خدا ایہہ بالکل نئیں چاہندا کہ اَسی بُتاں دی عبادت کرئیے۔
6. یہوواہ دے گواہ عبادت کردے ویلے کدی مثال تے عمل کردے نیں؟
6 تریخدان من دے نیں کہ یسوع مسیح دے شاگرد صرف خدا دی عبادت کردے سن۔ مثال لئی، تریخ دی اِک کتاب چ دَسیا گیا اے:”پہلی صدی دے مسیحی عبادت دی جگہ تے تصویراں یاں بُتاں نُوں رکھنا بالکل پسند نئیں کردے سن۔ “ اَج یہوواہ دے گواہ وی اوہناں مسیحیاں دی مثال تے عمل کردے نیں۔ اَسی مُقدساں یاں فرشتیاں دِیاں تصویراں اَگے دُعا نئیں کردے۔ اَسی تے یسوع مسیح کولوں وی دُعا نئیں کردے۔ ایہدے علاوہ اَسی جھنڈے نُوں سلامی نئیں دیندے تے نہ ای کوئی ایہو جیہا کم کرنے آں جدے توں ظاہر ہووے کہ اَسی اپنے ملک دی حکومت دا حدوں ودھ احترام کرنے آں۔ بھانویں کوئی سانوں ایہہ کم کرن لئی جِنّاں وی مجبور کرے، اَسی یسوع مسیح دی ایس گل تے عمل کراں گے: صرف یہوواہ اپنے خدا دی پرستش کرو تے صرف اوہدی عبادت کرو۔—متی 4:10۔
7. یہوواہ دے گواہ کیہڑے طریقیاں نال دُوجے سارے مذہباں توں فرق نیں؟
7 اَج بوہت سارے لوک چرچ دے مشہور رہنماواں دی پیروی کردے نیں۔ اوہ اوہناں دی اینی زیادہ عزت تے تعریف کردے نیں کہ اِنج لگدا اے کہ جیویں اوہ اوہناں دی عبادت کر رہے نیں۔ اوہ اوہناں دے ای چرچ جاندے نیں، اوہناں دِیاں ای کتاباں خرید دے نیں تے اوہناں تنظیماں نُوں ای بوہت زیادہ چندہ دیندے نیں جنہاں دی حمایت اوہ رہنما کردے نیں۔ کجھ لوک تے اوہناں دی ہر گل تے اَکھاں بند کر کے یقین کر لیندے نیں۔ اوہ اپنے رہنماواں نُوں ویکھ کے خوشی نال اینے پاگل ہو جاندے نیں کہ جیویں یسوع اوہناں دے سامنے آ کے کھلو گیا ہووے۔ پر یہوواہ دی عبادت کرن والے لوک کسے انسان دی پیروی نئیں کردے۔ بھانویں کہ اَسی اوہناں بھراواں دی عزت کرنے آں جیہڑے ساڈی پیشوائی کردے نیں پر اَسی یسوع مسیح دی ایس گل نُوں ہمیشاں یاد رکھنے آں کہ تُسی سارے آپس چ بھرا او۔ (متی 23:8-10) بھانویں کوئی مذہبی رہنما ہووے یاں سیاسی رہنما، اَسی انساناں دے پیروکار نئیں بن دے۔ اَسی اوہناں دے کسے مذہبی یاں سیاسی منصوبے دی حمایت نئیں کردے۔ اَسی کسے دی طرفداری وی نئیں کردے تے نہ ای ایس دُنیا دا حصہ بننے آں۔ ایہناں ساریاں گلاں چ اَسی دُوجے مسیحی مذہباں نالوں بالکل فرق آں۔—یوحنا 18:36۔
اَسی یہوواہ دے ناں دا احترام کرنے آں
سچے مسیحی بڑے مان تے خوشی نال دُوجیاں نُوں یہوواہ بارے دَسدے نیں۔ (پیراگراف نمبر 8-10 نُوں ویکھو۔) *
8. اَسی کیویں جاننے آں کہ یہوواہ چاہندا اے کہ اوہدے ناں دی وڈیائی ہوئے تے سارے اوہدا ناں جانن؟
8 اِک وار یسوع نے دُعا چ کہیا: باپ اپنے ناں دی وڈیائی کر۔ یہوواہ نے آپ یسوع دی دُعا دا جواب دِتا تے وعدہ کیتا کہ اوہ اپنے ناں دی وڈیائی کرے گا۔ (یوحنا 12:28) زمین تے یہوواہ دی خدمت کردے ویلے یسوع نے ہمیشاں اوہدے ناں دی وڈیائی کیتی۔ (یوحنا 17:26) ایس لئی سچے مسیحی وی خدا دے ناں نُوں استمال کرنا بڑے مان دی گل سمجھدے نیں تے خوشی نال دُوجیاں نُوں ایہدے بارے دَسدے نیں۔
9. پہلی صدی عیسوی دے مسیحیاں نے ایہہ کیویں ظاہر کیتا کہ اوہ خدا دے ناں دا احترام کردے نیں؟
9 پہلی صدی عیسوی چ مسیحی کلیسیا دے قائم ہون توں تھوڑی دیر بعد یہوواہ نے غیریہودیاں تے توجہ دِتی تاکہ اوہناں وچوں اِک ایہو جہی قوم چُن لوَے جدی پچھان اوہدے ناں توں ہووے۔ (اعمال 15:14) ایہہ مسیحی خدا دے ناں نُوں استمال کرنا اپنے لئی بڑی عزت دی گل سمجھدے سن تے بڑی خوشی نال دُوجیاں نُوں ایہدے بارے دَسدے سن۔ جدوں رسولاں تے شاگرداں نے مُنادی کیتی تے پاک کلام دِیاں کتاباں لکھیاں تے اوہناں نے خدا دے ناں نُوں استمال کیتا۔ * اِنج اوہناں نے ظاہر کیتا کہ اوہ اِک ایہو جہی قوم دا حصہ نیں جدی پچھان خدا دا ناں اے۔—اعمال 2:14، 21۔
10. کیہڑیاں گلاں توں ثابت ہوندا اے کہ یہوواہ دے گواہ اوہ قوم نیں جدی پچھان یہوواہ دا ناں اے؟
10 کیہہ یہوواہ دے گواہ اوہ قوم نیں جدی پچھان یہوواہ دا ناں اے؟ جی بالکل! ایس بارے ذرا کجھ ثبوتاں تے غور کرو۔ اَج بوہت سارے مذہبی رہنماواں نے خدا دے ناں نُوں چھپان لئی اپنی پوری طاقت لا دِتی اے۔ اوہناں نے ایہنوں بائبل دے ترجمیاں چوں کڈھ دِتا اے تے کئیاں نے اپنے چرچاں چ ایس ناں نُوں استمال کرن تے پابندی لا دِتی اے۔ * کیہہ کوئی ایس گل توں انکار کر سکدا اے کہ صرف یہوواہ دے گواہ ای یہوواہ دے ناں نُوں اوہ عزت دے رہے نیں جیہڑی ایہنوں ملنی چاہی دی اے؟ صرف اَسی خدا دے ناں نُوں پوری دُنیا چ پھیلا رہے آں۔ اِنج اَسی اوس ناں تے پورا اُتر رہے آں جیہڑا ساڈی پچھان اے یعنی یہوواہ دے گواہ کیونکہ اَسی اوہدے بارے گواہی دینے آں۔ (یسعیاہ 43:10-12) اَسی کتابِمُقدس ترجمہ نئی دُنیا دِیاں 24 کروڑ توں زیادہ کاپیاں چھاپیاں نیں۔ ایہناں چ یہوواہ دا ناں اوہناں تھانواں تے دُبارہ پایا گیا اے جتھوں بائبل دے دُوجے ترجمیاں چوں ایہنوں کڈھ دِتا گیا سی۔ اَسی 1000 توں زیادہ زباناں چ بائبل چوں لئے گئے موضوعاں بارے بوہت ساریاں کتاباں تے ویڈیوز وی تیار کرنے آں جنہاں چ یہوواہ دا ناں استمال کیتا جاندا اے۔
اَسی سچائی نُوں پیار کرنے آں
11. پہلی صدی عیسوی دے مسیحیاں نے سچائی لئی محبت کیویں ظاہر کیتی؟
11 یسوع مسیح سچائی نُوں پیار کردا سی۔ ایہہ سچائیاں خدا تے اوہدے مقصد بارے سن۔ یسوع نے ایہناں سچائیاں مطابق زندگی گزاری تے ایہناں بارے دُوجیاں نُوں وی دَسیا۔ (یوحنا 18:37) پہلی صدی عیسوی چ رہن والے سچے مسیحی وی سچائی نال بوہت پیار کردے سن۔ (یوحنا 4:23، 24) پطرس رسول نے تے مسیحیاں دے ایمان نُوں ای سچائی دی راہ آکھیا۔ (2-پطرس 2:2) سچائی نال پیار کرن دی وجہ توں اوہناں مسیحیاں نے ایہو جہی مذہبی تے ذاتی سوچ تے ایہو جہیاں رسماں نُوں رد کیتا جیہڑیاں سچائی دے مطابق نئیں سن۔ (کلسیوں 2:8) ایسے طرحاں اَج وی سچے مسیحی یہوواہ دے کلام دے مطابق اپنی زندگی تے اپنے سارے عقیدیاں نُوں ڈھالدے نیں تے اِنج سچائی دے مطابق چلن دی پوری کوشش کردے نیں۔—3-یوحنا 3، 4۔
12. (الف) یہوواہ دے گواہواں دی پیشوائی کرن والے بھرا اوس ویلے کیہہ کردے نیں جدوں اوہناں نُوں لگدا اے کہ بائبل دی کسے سچائی دی وضاحت نُوں بدلن دی لوڑ اے؟ (ب) اوہ اِنج کیوں کردے نیں؟
12 یہوواہ دے گواہواں نے کدی ایہہ دعویٰ نئیں کیتا کہ اوہ بائبل چ لکھی ہر گل نُوں پوری طرحاں سمجھدے نیں۔ کدی کدی کجھ معاملیاں چ اوہناں کولوں وی غلطیاں ہوئیاں نیں جیویں کہ بائبل دی کسے تلیم دی وضاحت کرن چ یاں فیر کلیسیا نُوں ہدیتاں دین چ۔ پر ایہہ کوئی حیرانی دی گل نئیں۔ بائبل چ صاف دَسیا گیا اے کہ خدا دے بندے وقت دے نال نال سچائیاں نُوں بہتر طور تے سمجھ جان گے۔ (کلسیوں 1:9، 10) یہوواہ خدا ہولی ہولی ساڈے تے سچائیاں ظاہر کردا اے۔ ایس لئی سانوں صبر نال اوس وقت تک اِنتظار کرنا چاہی دا اے جدوں تک سچائی دی روشنی ودھ نئیں جاندی۔ (امثال 4:18) جدوں یہوواہ دے گواہواں دی گورننگ باڈی نُوں لگدا اے کہ اوہنوں بائبل دی کسے تلیم دی وضاحت چ تبدیلی کرنی چاہی دی اے تے اوہ فوراً اِنج کردی اے۔ اَج بوہت سارے مسیحی مذہباں دے رہنما بائبل دی تلیم نُوں ایس لئی بدل دیندے نیں کیونکہ اوہ اپنے چرچ دے لوکاں نُوں خوش کرنا چاہندے نیں یاں فیر اپنی واہ واہ چاہندے نیں۔ پر یہوواہ دی تنظیم ایس لئی تبدیلیاں کردی اے تاکہ خدا نال ساڈی دوستی ہور پکی ہو سکے تے اَسی اوسے طرحاں اوہدی عبادت کرئیے جیس طرحاں یسوع مسیح نے کیتی سی۔ (یعقوب 4:4) جدوں اَسی بائبل دی کسے تلیم دی نوِیں وضاحت پیش کرنے آں تے اَسی ایس لئی اِنج نئیں کردے کیونکہ دُنیا دے لوکاں دی سوچ بدل رہی اے سگوں اَسی ایس لئی اِنج کرنے آں کیونکہ اَسی بائبل دی اوس تلیم نُوں ہور چنگی طرحاں سمجھ جانے آں۔—1-تھسلُنیکیوں 2:3، 4۔
اَسی اِک دُوجے نال پیار کرنے آں
13. پہلی صدی عیسوی دے مسیحیاں نے کیہڑی اہم خوبی ظاہر کیتی تے ایہہ خوبی اَج یہوواہ دے گواہواں چ کیویں نظر آندی اے؟
13 پہلی صدی عیسوی دے مسیحی اپنیاں خوبیاں دی وجہ توں مشہور سن۔ اوہناں دی مشہوری دی خاص وجہ اوہناں دی آپسی محبت سی۔ یسوع مسیح نے کہیا: جے تواڈے وچ محبت ہووے گی تے سارے لوک پچھان جان گے کہ تُسی میرے شاگرد او۔ (یوحنا 13:34، 35) اَج پوری دُنیا چ یہوواہ دے گواہ اِک دُوجے نال سچی محبت کردے نیں تے آپس چ اِک مُٹھ ہو کے رہندے نیں۔ بھانویں کہ اَسی فرق فرق مُلکاں تے قوماں توں آں، پر اَسی سارے اِک خاندان وانگوں رہنے آں۔ ایہہ اِک ایہو جہی گل اے جیہڑی کسے ہور مذہب دے لوکاں چ نظر نئیں آندی۔ اِک دُوجے لئی ساڈی محبت دا ثبوت ساڈیاں عبادتاں تے کنونشناں توں مِلدا اے۔ ایہدے توں ایس گل تے ساڈا یقین ہور وی پکا ہو جاندا اے کہ اَسی یہوواہ دی عبادت اوسے طرحاں کرنے آں جیس طرحاں اوہ چاہندا اے تے جدے توں اوہنوں خوشی مِلدی اے۔
14. کلسیوں 3:12-14 دے مطابق اِک دُوجے لئی محبت ظاہر کرن دا اِک طریقہ کیہہ اے؟
14 پا ک کلام چ سانوں نصیحت کیتی گئی اےکہ اَسی دل دی گہرائی توں اِک دُوجے نُوں محبت کرئیے۔ (1-پطرس 4:8) ایہہ محبت ظاہر کرن دا اِک طریقہ ایہہ وے کہ اَسی دلوں اِک دُوجے نُوں معاف کرئیے تے اِک دُوجے دِیاں کمیاں کمزوریاں تے دھیان نہ دَئیے۔ اَسی محبت ظاہر کرن دے ایہو جہے موقعے وی لبھ سکنے آں جدوں اَسی کلیسیا دے سارے بھین بھراواں دی کھل کے مدد کرئیے تے اوہناں دی مہماننوازی کرئیے، اوہناں بھین بھراواں دی وی جنہاں نے شاید ساڈا دل دُکھایا ہووے۔ (کلسیوں 3:12-14 نُوں پڑھو۔) جدوں اَسی دلوں اِک دُوجے نال محبت کرنے آں تے اَسی ثابت کرنے آں کہ اَسی یسوع دے سچے شاگرد آں۔
اِک ای ایمان اے
15. ہور کیہڑے طریقیاں نال ظاہر ہوندا اے کہ اَسی اوسے طرحاں یہوواہ دی عبادت کرنے آں جیس طرحاں پہلی صدی عیسوی دے مسیحی کردے سن؟
15 ہور وی کئی طریقیاں توں ایہہ ظاہر ہوندا اے کہ اَسی اوسے طرحاں یہوواہ دی عبادت کرنے آں جیس طرحاں پہلی صدی عیسوی دے مسیحی کردے سن۔ مثال لئی، ساڈیاں کلیسیاواں چ وی اوہی اِنتظام اے جیہڑا پہلی صدی عیسوی دی کلیسیا واں چ سی۔ اوہناں وانگوں ساڈے وی حلقے دے نگہبان، بزرگ تے خادم نیں۔ (فِلپّیوں 1:1؛ طِطُس 1:5) ایہدے علاوہ پہلی صدی عیسوی دے مسیحیاں وانگوں اَسی وی خون دے استمال، جنسی تعلقات تے شادی بارے یہوواہ دے معیاراں تے چلنے آں۔ اوہناں مسیحیاں وانگوں اَسی وی اپنیاں کلیسیاواں نُوں اوہناں لوکاں توں محفوظ رکھنے آں جیہڑے سنگین گناہ کردے نیں تے توبہ نئیں کردے۔—اعمال 15:28، 29؛ 1-کُرنتھیوں 5:11-13؛ 6:9، 10؛ عبرانیوں 13:4۔
16. اَسی اِفسیوں 4:4-6 توں کیہہ سکھنے آں؟
16 یسوع مسیح نے کہیا سی کہ بوہت سارے لوک اوہدے شاگرد ہون دا دعویٰ کرن گے پر اوہ سارے اوہدے سچے شاگرد نئیں ہون گے۔ (متی 7:21-23) ایہدے علاوہ پاک کلام چ سانوں پہلاں توں خبردار کیتا گیا سی کہ آخری زمانے چ بوہت سارے لوک ویکھن چ تے بڑے خدا پرست لگن گے۔ (2-تیمتھیس 3:1، 5) پر ایہدے چ ایہہ وی دَسیا گیا اے کہ ایمان اِک ای اے جدے توں یہوواہ خوش اے۔—اِفسیوں 4:4-6 نُوں پڑھو۔
17. اَج کیہڑے لوک یسوع مسیح دی پیروی کر رہے نیں تے سچا ایمان ظاہر کر رہے نیں؟
17 اَج کیہڑے لوک سچے ایمان دے مطابق زندگی گزار رہے نیں؟ اَسی ایس بارے کئی ثبوتاں تے غور کیتا اے۔ اَسی عبادت کرن دے اوس طریقے تے غور کیتا جیہڑا یسوع مسیح نے سکھایا سی تے جدے تے پہلی صدی عیسوی دے مسیحی چلدے سن۔ ایس لئی اَج صرف یہوواہ دے گواہ ای سچے ایمان تے چلدے نیں۔ ایہہ ساڈے لئی بڑے مان دی گل اے کہ اَسی یہوواہ دے بندے آں تے اوہدے مقصد بارے سچائی نُوں جاننے آں۔ آؤ، اَسی ہمیشاں پورے یقین نال سچائی نُوں پھڑی رکھئے۔
گیت نمبر 3 (خوشی نال گاؤ): تُوں ساڈا سہارا، تُوں ساڈی امید
^ پیراگراف 5 ایس مضمون چ اَسی ویکھاں گے کہ یسوع مسیح نے صحی طریقے نال یہوواہ دی عبادت کرنا سکھایا تے اوہدے شاگرداں نے وی اوہدی مثال تے عمل کیتا۔ اَسی کجھ ایہو جہے ثبوتاں تے وی غور کراں گے جنہاں توں پتہ چلے گا کہ اَج یہوواہ دے گواہ وی اوسے طریقے نال یہوواہ دی عبادت کردے نیں۔
^ پیراگراف 9 اُردو زبان چ 1 اگست 2010 دے مینارِنگہبانی چ صفحہ 6 تے بکس ”کیا ابتدائی مسیحی خدا کا نام لیتے تھے؟“ نُوں ویکھو۔
^ پیراگراف 10 مثال لئی، 2008 چ پوپ بینیڈِکٹ نے کہیا کہ کسے وی کیتھولک مذہبی رسم نُوں مناندے ویلے، گیت گاندے ویلے یاں دُعا کردے ویلے خدا دا ناں نہ تے استمال کیتا جائے تے نہ ای ایہنوں زبان تے لیایا جائے۔
^ پیراگراف 63 تصویر دی وضاحت: یہوواہ خدا دی تنظیم نے ترجمہ نئی دُنیا نُوں 200 توں زیادہ زباناں چ شائع کیتا اے تاکہ لوک اپنی زبان چ بائبل دا اِک ایہو جیہا ترجمہ پڑھ سکن جدے چ خدا دا ناں استمال ہویا اے۔
