یہوواہ نال دُبارہ دوستی کرو
ہر سال یہوواہ دِیاں کئی بھیڈاں جیہڑیاں بھٹک گئیاں سن اوہدے وَل واپس آ جاندیاں نیں۔ ذرا تصور کرو کہ ہر بھیڈ جدوں واپس آ جاندی اے تے اسمان تے کِنّی زیادہ خوشی منائی جاندی اے۔ (لُوقا 15:7، 10) جے تُسی وی کلیسیا چ بحال ہو گئے او تے ایس گل دا یقین رکھو کہ یسوع مسیح، فرشتے تے یہوواہ خدا بڑے خوش نیں کہ تُسی دُبارہ توں کلیسیا دا حصہ بن گئے او۔ پر ہُن جدوں تُسی یہوواہ نال اپنی دوستی نُوں دُبارہ توں مضبوط کر رہے او تے توانوں کجھ مشکلاں دا سامنا ہو سکدا اے۔ اوہ کیہڑیاں مشکلاں نیں تے تُسی اوہناں نال کیویں نبڑ سکدے او؟
توانوں کیہڑیاں مشکلاں دا سامنا ہو سکدا اے؟
بوہت سارے بھین بھرا یہوواہ وَل واپس آن دے بعد وی شرمندگی تے پچھتاوے ورگے جذباتاں نال لڑ رہے نیں۔ داؤد بادشاہ نال وی اِنج ای ہویا سی۔ بھانویں کہ خدا نے اوہدے گُناہ معاف کر دِتے سن پر فیر وی اوہنے کہیا کہ اوہ اپنیاں غلطیاں دے بھار تھلے دَب گیا اے۔ (زبور 40:12؛ زبور 65:3، ترجمہ نئی دُنیا) جدوں یہوواہ توں دُور ہو جان والا اِک بندہ اوہدے وَل واپس آندا اے تے ہو سکدا اے کہ شرمندگی تے پچھتاوے دا احساس اوہدے دل چوں نہ جائے۔ ذرا بھین ایزابیلا دی گل تے غور کرو۔ * اوہنوں کلیسیا چوں کڈھ دِتا گیا سی تے ایس گل نُوں 20 سالاں توں وی زیادہ عرصہ ہو گیا سی۔ اوہ کہندی اے: ”مینوں ایس گل تے یقین کرنا بڑا مشکل لگ رہیا سی کہ یہوواہ مینوں کدی معاف کرے گا۔“ یاد رکھو جے تُسی بےحوصلہ ہو جاؤ گے تے یہوواہ نال تواڈی دوستی فیر توں کمزور ہو جائے گی۔ (امثال 24:10) ایس لئی پوری کوشش کرو کہ اِنج نہ ہوئے۔
کجھ بھین بھرا ایس گلوں گھبراندے نیں کہ اوہ اوہناں سارے کماں نُوں نئیں کر سکن گے جیہڑے یہوواہ نال دُبارہ دوستی کرن لئی ضروری نیں۔ کلیسیا چ واپس آن والے بھرا انٹونی نے کہیا: ”میں محسوس کیتا کہ میں کئی ایہو جہیاں گلاں بُھل گیا ساں جیہڑیاں میں گواہ بنن دے بعد سکھیاں سن۔“ ایہو جہیاں گلاں دی وجہ توں ای کجھ لوک دُبارہ توں پورے دل نال یہوواہ دی عبادت کرن توں گھبراندے نیں۔
پر ذرا ایس مثال تے غور کرو۔ جے اِک بندے دا گھر طوفان دی وجہ توں تباہ ہو جائے تے ہو سکدا اے کہ اوہ ایہہ سوچ کے گھبرائے کہ گھر نُوں دُبارہ بنان چ بوہت سارا وقت تے محنت لانی پئے گی۔ ایسے طرحاں جے سنگین گُناہ کرن دی وجہ توں یہوواہ نال تواڈی دوستی تباہ ہو جائے تے شاید تُسی ایہہ سوچ کے گھبراؤ کہ ایہنوں دُبارہ قائم کرن لئی توانوں بڑی محنت کرنی پئے گی۔ پر توانوں گھبران دی لوڑ نئیں۔ ایس معاملے چ توانوں کئی طریقیاں نال مدد مِل سکدی اے۔
یہوواہ خدا سانوں ایہہ کہندا اے کہ آؤ، اَسی آپس چ معاملیاں نُوں سلجھا لئیے۔ (یسعیاہ 1:18، ترجمہ نئی دُنیا) تُسی پہلاں ای معاملے نُوں حل کرن لئی کافی محنت کر لئی اے تے یہوواہ تواڈی ایس محنت دی بڑی قدر کردا اے۔ ذرا سوچو کہ یہوواہ وَل واپس آن نال تُسی اوہنوں ایہہ موقع دِتا اے کہ اوہ اپنے دُشمن شیطان نُوں موُنہہ توڑ جواب دَوے۔—امثال 27:11۔
یہوواہ وَل واپس آن نال تُسی پہلاں ای اوہدے نیڑے آ گئے او تے اوہنے ایہہ وعدہ کیتا اے کہ اوہ وی تواڈے نیڑے آ جائے گا۔ (یعقوب 4:8) ایہہ چنگی گل اے کہ سارے لوک ایہہ ویکھن کہ تُسی کلیسیا چ واپس آ گئے او۔ پر توانوں ایہدے علاوہ وی کجھ کرن دی لوڑ اے۔ توانوں اپنے دل چ اپنے باپ تے دوست یہوواہ لئی محبت نُوں ودھان دی لوڑ اے۔ تُسی اِنج کیویں کر سکدے او؟
ایہو جہے منصوبے بناؤ جیہڑے تُسی پورے کر سکو
یہوواہ نال اپنی دوستی نُوں مضبوط کرن لئی ایہو جہے منصوبے بناؤ جنہاں نُوں تُسی پورا وی کر سکو۔ یقیناً توانوں حالے وی یاد ہوئے گا کہ تُسی یہوواہ خدا تے نوِیں دُنیا بارے اوہدے وعدیاں توں کیہہ سکھیا سی۔ پر ہُن توانوں یہوواہ دی عبادت کرن لئی دُبارہ توں اِک چنگا شیڈول بنان دی لوڑ اے۔ مثال لئی، توانوں باقاعدگی نال مُنادی کرن، عبادتاں تے جان تے بھین بھراواں نال وقت گزارن دی لوڑ اے۔ کیوں نہ تُسی اپنے لئی ایہو جہے منصوبے بناؤ:
باقاعدگی نال یہوواہ کولوں دُعا کرو۔ تواڈے اسمانی باپ نُوں پتہ اے کہ شرمندگی دے بھار دی وجہ توں تواڈے لئی اوہدے کولوں دُعا کرنا مشکل ہو سکدا اے۔ (رومیوں 8:26) پر فیر وی تُسی دُعا کردے رہوو۔ یہوواہ نُوں دَسو کہ تُسی اوہدے نال فیر توں دوستی کرنا چاہندے او۔ (رومیوں 12:12) اِک بھرا جدا ناں آندرے وے، اوہنے دَسیا: ”میں شرمندگی تے پچھتاوے دے بھار تھلے دَب جانا ساں۔ پر ہر وار جدوں میں دُعا کرنا ساں تے میں بہتر محسوس کرنا ساں۔ مینوں ہور زیادہ ذہنی سکون مِل جاندا سی۔“ جے توانوں سمجھ نئیں آندا کہ تُسی دُعا چ کیہہ کہنا اے تے بادشاہ داؤد دِیاں دُعاواں تے غور کرو جیہڑیاں اوہنے اپنے گُناہواں دی معافی منگن لئی کیتیاں سن۔ ایہہ دُعاواں زبور 51 تے 65 چ لکھیاں نیں۔
باقاعدگی نال بائبل پڑھو۔ اِنج کرن نال تواڈا ایمان مضبوط ہوئے گا تے تواڈے دل چ یہوواہ لئی محبت ودھے گی۔ (زبور 19:7-11) ایس بارے ذرا اِک بھرا دی گل تے غور کرو جدا ناں فلپ اے۔ اوہ کہندا اے: ”میں باقاعدگی نال بائبل نئیں پڑھنا ساں ایسے لئی میرا ایمان کمزور ہو گیا تے میں یہوواہ دا دل دُکھا بیٹھا۔ میں ایہہ غلطی دُبارہ نئیں کرنا چاہنا ساں، ایس لئی میں فیصلہ کیتا کہ ہُن میں باقاعدگی نال بائبل پڑھیا کراں گا۔“ تُسی وی اِنج کر سکدے او۔ جے تُسی ایہہ جاننا چاہندے او کہ بائبل دا مطالعیا کردے ویلے توانوں کیہڑے کیہڑے موضوعاں تے غور کرنا چاہی دا اے تے کسے ایہو جہے دوست کولوں مدد لوو جدی یہوواہ نال گُوڑھی دوستی اے۔
بھین بھراواں نال دُبارہ دوستی کرو۔ کلیسیا چ واپس آن والے کجھ بھین بھراواں نُوں ایس گل دی فکر ہوندی اے کہ دُوجے بھین بھرا اوہناں بارے پٹھیاں سدھیاں گلاں کرن گے۔ اِک بھین جدا ناں لاریسا اے، اوہ کہندی اے: ”مینوں بڑی شرمندگی محسوس ہوندی سی۔ مینوں اِنج لگدا سی جیویں میں اپنی کلیسیا نُوں دھوکھا دِتا اے۔ ایس سوچ نے کئی سالاں تک میرا پچھا نہ چھڈیا۔“ ایس گل دا یقین رکھو کہ بزرگ تے دُوجے پُختہ مسیحی دلوں تواڈی مدد کرنا چاہندے نیں تاکہ تُسی دُبارہ توں یہوواہ نال دوستی کر سکو۔ (بکس ” بزرگ کیہہ کر سکدے نیں؟“ نُوں ویکھو۔) اوہ بڑے خوش نیں کہ تُسی کلیسیا چ واپس آ گئے او تے اوہ چاہندے نیں کہ تُسی وی ایس گلوں خوش ہووو۔—امثال 17:17۔
تُسی کلیسیا دے بھین بھراواں نال دوستی کیویں کر سکدے او؟ اوہناں نال ہر عبادت چ شامل ہووو تے باقاعدگی نال اوہناں نال مِل کے مُنادی کرو۔ اِنج کرن نال توانوں کیہہ فائدہ ہوئے گا؟ ذرا بھرا فیلکس دی گل تے غور کرو۔ اوہنے کہیا: ”میری کلیسیا میری راہ ویکھ رہی سی۔ میں بھین بھراواں دی محبت نُوں محسوس کیتا۔ اوہناں نے میری مدد کیتی تاکہ میں فیر توں اپنے آپ نُوں کلیسیا دا حصہ سمجھاں، ایہہ یقین رکھاں کہ یہوواہ نے مینوں معاف کر دِتا اے تے دُبارہ توں اوہدی عبادت کراں۔“—بکس ” تُسی کیہہ کر سکدے او؟“ نُوں ویکھو۔
ہمت نہ ہارو!
جدوں تُسی یہوواہ نال دُبارہ دوستی کرو گے تے شیطان توانوں روکن لئی تواڈے سامنے بڑیاں مشکلاں لیائے گا۔ (لُوقا 4:13) پر یہوواہ نال اپنی دوستی مضبوط کرکے تُسی ایہناں مشکلاں دا مقابلہ کر سکو گے۔
یہوواہ نے اپنیاں بھیڈاں بارے وعدہ کیتا اے کہ میں گواچی ہوئی نُوں لبھاں گا تے بھٹکی ہوئی نُوں واپس لیاواں گا تے زخمی نُوں مرہم پٹی کراں گا تے کمزور نُوں مضبوط کراں گا۔ (حِزقیایل 34:16) یہوواہ نے بوہت سارے بھین بھراواں دی مدد کیتی اے تاکہ اوہ اوہدے نال دُبارہ دوستی کر سکن۔ ایس گل دا پکا یقین رکھو کہ اوہ تواڈی وی مدد کرنا چاہندا اے تاکہ تُسی اوہدے نال پکی دوستی کر سکو۔
^ پیراگراف 4 ایس مضمون چ فرضی ناں استمال کیتے گئے نیں۔
