مطالعے دا مضمون نمبر 44
اپنی اُمید دی وجہ توں خوش ہووو
یہوواہ دی آس رکھ۔—زبور 27:14۔
گیت نمبر 144: انعام تے نظر رکھو!
مضمون تے اِک نظر a
1. یہوواہ نے سانوں کیہڑی اُمید دِتی اے؟
یہوواہ نے سانوں ہمیشاں دی زندگی حاصل کرن دی شاندار اُمید دِتی اے۔ کجھ لوک اسمان تے ہمیشاں دی زندگی حاصل کرن گے۔ (1-کُرنتھیوں 15:50، 53) پر زیادہتر لوک زمین تے چنگی صحت دے نال ہمیشاں تک خوشیاں بھری زندگی گزارن گے۔ (مکاشفہ 21:3، 4) بھانویں اَسی اسمان تے زندگی حاصل کرن دی اُمید رکھنے آں یاں زمین تے، ساڈے لئی ایہہ اُمید بڑی انمول اے۔
2. ساڈی اُمید دی بنیاد کیہہ اے تے اَسی اِنج کیوں کہہ سکنے آں؟
2 بائبل دے مطابق لفظ اُمید دا مطلب اے،”چنگیاں گلاں دے پورا ہون دی آس رکھنا۔“ اَسی پورا یقین رکھ سکنے آں کہ مستقبل بارے ساڈی اُمید ضروری پوری ہوئے گی کیونکہ ایہہ اُمید یہوواہ نے سانوں دِتی اے۔ (رومیوں 15:13) اَسی جاننے آں کہ اوہ اپنی گل دا پکا اے۔ (گنتی 23:19) سانوں پتہ اے کہ یہوواہ نے ساڈے نال جیہڑے وعدے کیتے نیں اوہ اوہناں نُوں پورا کرن دی نہ صرف خواہش رکھدا اے سگوں اِنج کرن دی طاقت وی رکھدا اے۔ ایس لئی ساڈی اُمید کوئی خواب نئیں اے سگوں ایہہ ثبوتاں تے حقیقت دی بنیاد تے قائم اے۔
3. ایس مضمون چ اَسی کیہڑیاں گلاں تے غور کراں گے؟ (زبور 27:14)
3 ساڈا اسمانی باپ سانوں بوہت پیار کردا اے تے اوہ چاہندا اے کہ اَسی اوہدے تے بھروسا رکھیئے۔ (زبور 27:14 نُوں پڑھو۔) جدوں اَسی یہوواہ تے پکی اُمید رکھاں گے تے اَسی ہُن تے مستقبل چ دلیری تے خوشی نال مشکلاں دا مقابلہ کر سکاں گے تے یہوواہ دے وفادار رہ سکاں گے۔ آؤ، ایس گل تے غور کرنے آں کہ ساڈی اُمید سانوں محفوظ کیویں رکھدی اے۔ سب توں پہلاں اَسی غور کراں گے کہ ساڈی اُمید اِک بحری جہاز دے لنگر تے اِک ہیلمٹ وانگوں کیویں اے۔ فیر اَسی ایس گل تے غور کراں گے کہ اَسی اپنی اُمید نُوں مضبوط کیویں کر سکنے آں۔
ساڈی اُمید بحری جہاز دے لنگر وانگوں اے
4. ساڈی اُمید کیس لحاظ نال بحری جہاز دے لنگر وانگوں اے؟ (عبرانیوں 6:19)
4 عبرانیوں دے ناں اپنے خط چ پولُس رسول نے کہیا کہ ساڈی اُمید اِک بحری جہاز دے لنگر وانگوں اے۔ (عبرانیوں 6:19 نُوں پڑھو۔) پولُس اکثر بحری جہاز تے سفر کردا سی ایس لئی اوہ جان دا سی کہ بحری جہاز دا لنگر ایہنوں طوفان چ رُڑھ کے دُور نئیں جان دیندا۔ اِک واری جدوں پولُس بحری جہاز دا سفر کر رہیا سی تے سمندر چ بڑا سخت طوفان آگیا۔ اوس ویلے اوہنے ویکھیا کہ بحری جہاز چلان والے لنگراں نُوں پانی چ سُٹ رہے نیں تاکہ جہاز چٹاناں نال نہ ٹکرائے۔ (اعمال 27:29، 39-41) جیویں بحری جہاز دا لنگر اوہنوں ڈولن نئیں دیندا اوسے طرحاں ساڈی اُمید وی سانوں مشکلاں چ ڈولن نئیں دیندی تے نہ ای یہوواہ توں دُور ہون دیندی اے۔ مشکلاں چوں لنگھ دے ویلے ساڈی اُمید سانوں حدوں ودھ پریشان نئیں ہون دیندی کیونکہ سانوں ایس گل دا یقین ہوندا اے کہ اَگے چل کے سب کجھ ٹھیک ہو جائے گا۔ یاد رکھو کہ یسوع مسیح نے پہلے ای دَس دِتا سی کہ سانوں اذیت دِتی جائے گی۔ (یوحنا 15:20) ایس لئی جدوں اَسی اوہناں وعدیاں تے سوچوچار کرنے آں جیہڑے یہوواہ نے مستقبل بارے کیتے نیں تے اَسی ہر حال چ اوہدی خدمت کرن دے قابل ہنے آں۔
5. جدوں یسوع موت دا سامنا کرن والا سی تے اُمید دی وجہ توں اوہنوں یہوواہ دا وفادار رہن چ مدد کیویں ملی؟
5 غور کرو کہ جدوں یسوع موت دا سامنا کرن والا سی تے اُمید دی وجہ توں اوہنوں یہوواہ دا وفادار رہن چ مدد کیویں ملی۔ 33 عیسوی دی عیدِپنتِکُست تے پطرس رسول نے زبور دی کتاب چوں اِک پیشینگوئی دا حوالہ دِتا جدے توں پتہ چلدا اے کہ موت دا سامنا کردے ویلے یسوع کِنّاں مطمئن سی۔ ایس پیشینگوئی چ لکھیا اے: میں اپنی اُمید تے قائم رہواں گا کیونکہ تُوں مینوں قبر چ نئیں رہن دَویں گا تے اپنے وفادار خادم دی لاش نُوں سڑن نئیں دَویں گا۔ تیرے حضور مینوں بڑی خوشی ملے گی۔ (اعمال 2:25-28؛ زبور 16:8-11) بھانویں کہ یسوع جان دا سی کہ اوہنوں موت دا سامنا کرنا پووے گا پر اوہنوں پکی اُمید سی کہ یہوواہ اوہنوں زندہ کر دے گا تے اوہ فیر توں اپنے باپ دے نال اسمان تے رہوے گا۔—عبرانیوں 12:2، 3۔
6. اِک بھرا نے اُمید بارے کیہہ کہیا؟
6 اُمید نے ساڈے بوہت سارے بھین بھراواں دی مدد کیتی اے کہ اوہ مشکل ویلے چ یہوواہ دے وفادار رہ سکن۔ ایس حوالے نال ذرا بھرا لینارڈ چن دی مثال تے غور کرو جیہڑا اِنگلینڈ چ رہندا سی۔ پہلی عالمی جنگ چ اوہنوں جیل چ پا دِتا گیا کیونکہ اوہنے فوج چ بھرتی ہون توں اِنکار کیتا سی۔ اوہنوں دو مہینے تک جیل دی اِک کوٹھڑی چ بند رکھیا گیا جتھے اوہ کلّا سی تے اوہدے کولوں سخت محنت کرائی گی۔ بعد چ اوہنے اِک خط چ لکھیا: ”میرے نال جو کجھ ہویا اوہدے توں میں سمجھ گیا کہ مشکل وقت چ یہوواہ دا وفادار رہن لئی سانوں اُمید دی کِنّی زیادہ لوڑ ہوندی اے۔ بائبل چ اَسی یسوع مسیح، رسولاں تے نبیاں دِیاں مثالاں تے یہوواہ دے شاندار وعدیاں بارے پڑھ سکنے آں۔ ایہناں توں سانوں مستقبل بارے شاندار اُمید مِلدی اے تے مشکلاں چ یہوواہ دا وفادار رہن دا ساڈا ارادہ ہور پکا ہو جاندا اے۔“ اُمید واقعی بھرا لینارڈ لئی بحری جہاز دے لنگر وانگوں ثابت ہوئی تے ساڈے نال وی اِنج ہو سکدا اے۔
7. مشکلاں دا سامنا کرن دی وجہ توں ساڈی اُمید پکی کیوں ہو جاندی اے؟ (رومیوں 5:3-5؛ یعقوب 1:12)
7 جدوں مشکلاں چ لنگھ دے ویلے اَسی ویکھنے آں کہ یہوواہ کیویں ساڈی مدد کر رہیا اے تے سانوں محسوس ہوندا اے کہ اوہ ساڈے توں خوش اے۔ (رومیوں 5:3-5؛ یعقوب 1:12 نُوں پڑھو۔) اِنج ساڈی اُمید پہلے توں وی ہور پکی ہو جاندی اے۔ شیطان چاہندا اے کہ اَسی اپنیاں مشکلاں اَگے ہار جائیے۔ پر یہوواہ دی مدد نال اَسی ہر مشکل دا سامنا کامیابی نال کر سکنے آں۔
ساڈی اُمید اِک ہیلمٹ وانگوں اے
8. ساڈی اُمید کیس لحاظ نال اِک ہیلمٹ وانگوں اے؟ (1-تھسلُنیکیوں 5:8)
8 بائبل چ ساڈی اُمید نُوں اِک ہیلمٹ وانگوں وی کہیا گیا اے۔ (1-تھسلُنیکیوں 5:8 نُوں پڑھو۔) اِک فوجی ہیلمٹ ایس لئی پاندا اے تاکہ اوہ اپنے سر نُوں دُشمناں دے وار توں بچا سکے۔ شیطان نال جنگ لڑدے ویلے سانوں اپنی سوچ نُوں اوہدے واراں توں بچان دی لوڑ اے۔ اوہ ساڈی سوچ نُوں وگاڑن لئی ساڈے تے وکھریاں وکھریاں ازمیشاں لیاندا اے تے غلط سوچ نُوں ہوا دیندا اے۔ پر جیویں اِک ہیلمٹ فوجی دے سر نُوں محفوظ رکھدا اے اونویں ساڈی اُمید ساڈی سوچ نُوں محفوظ رکھدی اے تاکہ اَسی یہوواہ دے وفادار رہ سکئے۔
9. جیہڑے لوکاں کول اُمید نئیں ہوندی اوہناں نال کیہہ ہوندا اے؟
9 جدوں ہمیشاں دی زندگی دی اُمید ساڈے ذہن چ ہوئے گی تے اَسی سمجھداری نال فیصلے کراں گے۔ پر جے ساڈی اُمید کمزور پے جائے گی تے اَسی صرف اپنیاں خواہشاں نُوں پورا کرن بارے سوچاں گے تے ساڈا دھیان ہمیشاں دی زندگی توں ہٹ جائے گا۔ غور کرو کہ پہلی صدی چ کُرنتھس چ رہن والے مسیحیاں نال کیہہ ہویا۔ اوہناں دا ایمان ایس وعدے تے کمزور ہون لگ پیا کہ یہوواہ مُردیاں نُوں زندہ کرے گا۔ (1-کُرنتھیوں 15:12) پولُس نے دَسیا کہ جیہڑے لوک مُردیاں دے زندہ ہون دی اُمید نئیں رکھدے، اوہ صرف اَج لئی زندہ رہندے نیں۔ (1-کُرنتھیوں 15:32) اَج وی بوہت سارے لوک یہوواہ دے وعدیاں دے پورا ہون دی اُمید نئیں رکھدے۔ ایس لئی اوہناں دا دھیان صرف اپنیاں خواہشاں نُوں پورا کرن تے رہندا اے۔ پر سانوں خدا دے وعدیاں تے پورا بھروسا اے۔ ساڈی اُمید اِک ہیلمٹ وانگوں ساڈی سوچ نُوں محفوظ رکھدی اے تے ساڈی مدد کردی اے تاکہ اَسی زندگی چ صرف اپنے بارے نہ سوچئے سگوں یہوواہ نال اپنی دوستی نُوں مضبوط رکھیئے۔—1-کُرنتھیوں 15:33، 34۔
10. ساڈی اُمید سانوں غلط سوچ توں کیویں محفوظ رکھدی اے؟
10 ساڈی اُمید سانوں ایس غلط سوچ توں وی محفوظ رکھدی اے کہ بھانویں اَسی یہوواہ نُوں خوش کرن دی جِنّی مرضی کوشش کر لئیے، ایہدا کوئی فائدہ نئیں۔ مثال لئی، شاہد کجھ لوک سوچن: ”مینوں ہمیشاں دی زندگی مِل ای نئیں سکدی۔ میں ایس لائق ای نئیں آں۔ میں کدی وی خدا دے معیاراں تے پورا نئیں اُتر سکدا۔“ یاد کرو کہ ایہو جہی گل ایوب دے جھوٹھے دوست الیفز نے اوہنوں کہی سی۔ اوہنے کہیا: انسان ہے ای کیہہ کہ اوہ پاک ہووے؟ ویکھو اوہ تے اپنے مُقدس لوکاں تے وی بھروسا نئیں کردا ایتھوں تک کہ اسمان وی اوہدی نظر چ پاک نئیں۔ (ایوب 15:14، 15) ایہہ کِنّاں وڈا جھوٹھ اے۔ ذرا سوچو کہ ایس سوچ پچھے کدا ہتھ سی؟ شیطان دا۔ اوہ جان دا اے کہ جے تُسی اِنج دِیاں گلاں بارے سوچدے رہوو گے تے تواڈی اُمید کمزور پین لگ پئے گی۔ ایس لئی ایہو جہیاں جھوٹھیاں گلاں تے بالکل یقین نہ کرو تے اپنا دھیان یہوواہ دے وعدیاں تے رکھو۔ یہوواہ چاہندا اے کہ توانوں ہمیشاں دی زندگی ملے تے اوہ ایہنوں حاصل کرن چ تواڈی مدد ضرور کرے گا۔—1-تیمُتھیُس 2:3، 4۔
اپنی اُمید نُوں قائم رکھو
11. جدوں اَسی اپنی اُمید دے پورا ہون دا اِنتظار کرنے آں تے سانوں صبر نال کم کیوں لینا چاہی دا اے؟
11 اپنی اُمید نُوں قائم رکھنا ہمیشاں آسان نئیں ہوندا۔ یہوواہ دے وعدیاں دے پورا ہون دا اِنتظار کردے ہوئے اَسی کالہے پے سکنے آں۔ پر جیہڑا وقت سانوں بوہت لما لگ رہیا اے، اوہ یہوواہ دی نظر چ بوہت گھٹ اے۔ (2-پطرس 3:8، 9) اوہ اپنے مقصد نُوں بڑے ای شاندار طریقے نال پورا کرے گا۔ پر شاید اوس ویلے نئیں جدوں اَسی ایہدی توقع کر رہے ہوئیے۔ اَج جدوں اَسی صبر نال یہوواہ دے وعدیاں دے پورا ہون دا اِنتظار کر رہے آں تے کیہڑی چیز ساڈی مدد کرے گی تاکہ اَسی اپنی اُمید نُوں مضبوط رکھیئے؟—یعقوب 5:7، 8۔
12. عبرانیوں 11:1، 6 دے مطابق اُمید دا ایمان نال کیہہ تعلق اے؟
12 جے اَسی یہوواہ دے نیڑے رہواں گے تے ساڈی اُمید مضبوط ہوئے گی کیونکہ اوہنے ای سانوں ایہہ اُمید دِتی اے تے اوہ ای ایہنوں پورا کرے گا۔ بائبل چ دَسیا گیا اے کہ ساڈی اُمید دا ایمان نال گُوڑھا تعلق اے۔ اُمید رکھن لئی ایس گل تے ایمان رکھنا ضروری اے کہ یہوواہ ہے وے تے اوہ اوہناں ساریاں نُوں اَجر دَوے گا جیہڑے لگن نال اوہدی خدمت کردے نیں۔ (عبرانیوں 11:1، 6 نُوں پڑھو۔) جِنّاں زیادہ سانوں ایس گل تے یقین ہوئے گا کہ یہوواہ واقعی ہے وے، اوہناں ای ساڈا ایس گل تے بھروسا ودھے گا کہ اوہ اپنے ہر وعدے نُوں پورا کرے گا۔ آؤ، کجھ ایہو جہے طریقیاں تے غور کرئیے جنہاں دے ذریعے اَسی یہوواہ نال اپنی دوستی نُوں ہور مضبوط کر سکنے آں تے اِنج اپنی اُمید نُوں ہور پکار کر سکنے آں۔
دُعا تے سوچوچار کرن نال اَسی اپنی اُمید نُوں مضبوط رکھ سکنے آں۔ (پیراگراف نمبر 13-15 نُوں ویکھو۔) b
13. اَسی خدا دے نیڑے کیویں جا سکنے آں؟
13 یہوواہ کولوں دُعا کرو تے اوہدا کلام پڑھو۔ سچ اے کہ اَسی یہوواہ نُوں ویکھ نئیں سکدے۔ پر فیر وی اَسی اوہدے نیڑے جا سکنے آں۔ اَسی دُعا کردے ویلے ایس گل تے یقین رکھ سکنے آں کہ اوہ ساڈی سنے گا۔ (یرمیاہ 29:11، 12) اَسی خدا دے کلام نُوں پڑھن تے ایہدے تے سوچوچار کرن نال اوہدی گل سُن سکنے آں۔ جدوں اَسی اوہدے کلام چ پڑھنے آں کہ ماضی چ اوہنے اپنے بندیاں دا خیال کیویں رکھیا تے ساڈی اُمید ہور مضبوط ہو جاندی اے۔ خدا دے کلام دی ہر گل ساڈی ہدیت لئی لکھی گی تاکہ اَسی صحیفیاں توں تسلی پا کے تے ثابتقدم رہ کے اُمید حاصل کرسکئے۔—رومیوں 15:4۔
14. یہوواہ نے اپنے بندیاں لئی جو کجھ کیتا اے، سانوں اوہدے تے سوچوچار کیوں کرنا چاہی دا اے؟
14 ایس گل تے سوچوچار کرو کہ یہوواہ نے اپنے وعدیاں نُوں کیویں پورا کیتا اے۔ ذرا سوچو کہ یہوواہ نے ابراہام تے سارہ لئی کیہہ کجھ کیتا۔ اوہناں دی بچے پیدا کرن دی عمر لنگھ چُکی سی۔ پر یہوواہ نے وعدہ کیتا سی کہ اوہناں دی اولاد ضرور ہوئے گی۔ (پیدایش 18:10) بائبل چ ابراہام بارے دَسیا گیا اے کہ اوہنوں اپنی اُمید دی وجہ توں پورا یقین سی کہ اوہ بوہت ساریاں قوماں دا باپ ہوئے گا۔ (رومیوں 4:18) انسان ہوندے ہوئے سوچو تے ایہہ گل ناممکن لگدی اے۔ پر ابراہام نُوں پکا یقین سی کہ خدا اپنے وعدے نُوں ضرور پورا کرے گا۔ ایس لئی اوہ مایوس نئیں ہویا۔ (رومیوں 4:19-21) بائبل چ لکھے وعدیاں توں پتہ چلدا اے کہ بھانویں سانوں یہوواہ دے وعدیاں دے پورا ہون دی کوئی راہ نظر نہ وی آئے فیر وی اَسی پورا یقین رکھ سکنے آں کہ ایہہ ضرور پورے ہون گے۔
15. سانوں ایس گل تے سوچوچار کیوں کرنا چاہی دا اے کہ یہوواہ نے ساڈے لئی کیہہ کجھ کیتا اے؟
15 سوچو کہ یہوواہ نے تواڈے لئی کیہہ کجھ کیتا اے۔ ایس گل تے سوچوچار کرو کہ توانوں بائبل چ لکھے وعدیاں دے پورا ہون توں کیہہ فائدہ ہویا اے۔ مثال لئی، یسوع مسیح نے وعدہ کیتا سی کہ ساڈا اسمانی باپ ساڈیاں بنیادی ضرورتاں نُوں پورا کرے گا۔ (متی 6:32، 33) یسوع مسیح نے سانوں ایہہ یقین وی دَوایا کہ جے اَسی یہوواہ کولوں پاک روح منگاں گے تے اوہ سانوں پاک روح ضرور دَوے گا۔ (لُوقا 11:13) یہوواہ نے اپنے ایہناں وعدیاں نُوں پورا کیتا اے۔ تواڈے ذہن چ ہور وی کئی ایہو جہے وعدے ہون گے جیہڑے یہوواہ نے پورے کیتے نیں جیویں کہ خدا نے وعدہ کیتا اے کہ اوہ توانوں معاف کرے گا، توانوں تسلی دے گا تے توانوں اوہ سب کجھ دَوے گا جدے ذریعے تُسی اوہدے نیڑے رہ سکدے او۔ (متی 6:14؛ 24:45؛ 2-کُرنتھیوں 1:3) جدوں تُسی ایس گل تے سوچوچار کرو گے کہ یہوواہ نے تواڈے لئی کیہہ کجھ کیتا اے تے تواڈی ایہہ اُمید ہور پکی ہو جائے گی کہ اوہ مستقبل چ وی اپنے وعدیاں نُوں پورا کرے گا۔
اُمید دی وجہ توں خوش ہووو
16. ساڈی اُمید اینی قیمتی کیوں اے؟
16 ہمیشاں دی زندگی دی اُمید اِک قیمتی تحفہ اے جیہڑا یہوواہ نے سانوں دِتا اے۔ اَسی اِک شاندار مستقبل دی راہ ویکھ رہے آں۔ ساڈی اُمید بحری جہاز دے لنگر وانگوں اے جیہڑی سانوں مشکلاں چ ڈولن نئیں دیندی تے اذیت نُوں برداشت کرن، ایتھوں تک کہ موت دا سامنا کرن دے لائق بناندی اے۔ ساڈی اُمید اِک ہیلمٹ وانگوں وی اے جیہڑی ساڈی سوچ نُوں محفوظ رکھدی اے تاکہ اَسی غلط گلاں توں بچ سکئے تے چنگیاں گلاں نال جُڑے رہیے۔ بائبل چ سانوں جیہڑی اُمید دِتی گئی اے اوہدے ذریعے اَسی یہوواہ دے ہور نیڑے ہو جانے آں تے یہوواہ دی محبت نُوں ہور چنگی طرحاں جان جانے آں۔ جدوں اَسی اپنی اُمید نُوں زندہ رکھنے آں تے سانوں بڑا فائدہ ہوندا اے۔
17. سانوں اُمید توں خوشی کیوں مِلدی اے؟
17 پولُس نے رومیوں دی کلیسیا دے ناں جیہڑا خط لکھیا اوہدے چ اوہناں دا حوصلہ ودھاندے ہوئے اوہنے کہیا: اپنی اُمید دی وجہ توں خوش ہووو۔ (رومیوں 12:12) پولُس اپنی اُمید دی وجہ توں خوش رہندا سی کیونکہ اوہنوں پکا یقین سی کہ جے اوہ یہوواہ دا وفادار رہوے گا تے اوہنوں اسمان تے ہمیشاں دی زندگی ملے گی۔ اَسی وی اپنی اُمید دی وجہ توں خوش رہ سکنے آں کیونکہ سانوں پکا یقین اے کہ یہوواہ اپنے سارے وعدے پورے کرے گا۔ ایہہ ای گل زبور لکھن والے اِک بندے نے وی کہی۔ اوہنے کہیا: اوہ انسان خوش رہندا اے جیہڑا یہوواہ اپنے خدا تے آس لاندا اے، اوس خدا تے جیہڑا ہمیشاں وفادار رہندا اے۔—زبور 146:5، 6۔
گیت نمبر 140: ہمیشاں دی زندگی
a یہوواہ نے سانوں مستقبل بارے اِک بڑی شاندار اُمید دِتی اے۔ایس اُمید دی وجہ توں ساڈی زندگی روشن ہو جاندی اے تے ساڈا دھیان اپنیاں مشکلاں توں ہٹ جاندا اے۔ ایہہ اُمید سانوں ہر طرحاں دی مشکل چ یہوواہ دا وفادار رہن دی طاقت دیندی اے تے سانوں ایہو جہیاں گلاں توں محفوظ رکھدی اے جیہڑیاں ساڈی سوچ نُوں وگاڑ سکدیاں نیں۔ ایس مضمون چ اَسی ویکھاں گے کہ سانوں اپنی اُمید نُوں مضبوط کیوں کردے رہنا چاہی دا اے۔
b تصویر دی وضاحت: جیویں اِک ہیلمٹ فوجی دے سر نُوں محفوظ رکھدا اے اونویں ای ساڈی اُمید ساڈی سوچ نُوں محفوظ رکھدی اے تے جیویں بحری جہاز دا لنگر ایہنوں ڈولن نئیں دیندا اونویں ساڈی اُمید وی سانوں مشکلاں چ ڈولن نئیں دیندی۔ اِک بھین ایمان نال یہوواہ کولوں دُعا کر رہی اے۔ اِک بھرا سوچوچار کر رہیا اے کہ یہوواہ نے کیویں ابراہام نال کیتے ہوئے اپنے وعدیاں نُوں پورا کیتا۔ اِک ہور بھرا سوچوچار کر رہیا اے کہ یہوواہ نے اوہنوں کیہڑیاں کیہڑیاں برکتاں دِتیاں نیں۔
