بنیاِسرائیل نے جنگاں لڑیاں—پر اَسی کیوں نئیں لڑدے؟
”جے تواڈے وچوں کسے نیں وی فرانس یاں اِنگلینڈ دے خلاف جنگ لڑن توں اِنکار کیتا تے تُسی زندہ نئیں بچو گے۔“ ایہہ گل دُوجی عالمی جنگ چ نازیاں دے اِک افسر نے بڑے ای غصے چ یہوواہ دے گواہواں دے اِک گروہ نُوں کہی سی۔ بھانویں کہ فوجی اوس افسر دے حکم تے عمل کرن لئی بالکل تیار کھلوتے سن پر ساڈے اِک وی بھین بھرا نے اوہناں دے اَگے گوڈے نئیں ٹیکے۔ اوہ بوہت دلیر سن۔ اوہناں دی مثال توں پتہ چلدا اے کہ جنگ چ حصہ لین بارے یہوواہ دے گواہواں دی سوچ کیہہ اے۔ اَسی یہوواہ دے گواہ جنگاں چ حصہ نئیں لیندے بھانویں سانوں جانوں مارن دی دھمکی ای کیوں نہ دِتی جائے۔ اَسی سیاسی معاملیاں چ کسے دی طرفداری نئیں کردے۔
پر مسیحی ہون دا دعویٰ کرن والا ہر بندہ ایہہ سوچ نئیں رکھدا۔ اوہناں وچوں کئی ایہہ من دے نیں کہ اِک مسیحی نُوں اپنے ملک لئی لڑنا چاہی دا اے۔ شاید اوہ کہن کہ بنیاِسرائیل وی تے خدا دے بندے سن۔ اوہ وی تے جنگاں لڑدے سن تے فیر اَسی کیوں نئیں لڑ سکدے؟ تُسی ایس گل دا کیہہ جواب دَوو گے؟ ایہدے لئی سانوں وضاحت کرنی پئے گی کہ بنیاِسرائیل تے اَج دے خدا دے بندیاں دی صورتحال چ بڑا فرق اے۔ آؤ ویکھئے کہ ساڈے چ تے اوہناں چ کیہڑیاں پنج گلاں فرق نیں۔
1. خدا دے سارے بندیاں دا تعلق اِک ای قوم نال سی
ماضی چ یہوواہ نے صرف بنیاِسرائیل نُوں اپنی قوم دے طور تے چُنیا سی۔ اوہنے کہیا کہ بنیاِسرائیل ساریاں قوماں چوں اوہدی خاص ملکیت نیں۔ (خروج 19:5) اوہنے اوہناں نُوں اِک خاص ملک وی دِتا۔ ایس لئی جدوں خدا نے بنیاِسرائیل نُوں حکم دِتا کہ اوہ دُوجیاں قوماں نال جنگ کرن تے اوہناں نے اپنے ہمایماناں نال نئیں لڑنا سی یاں اوہناں نُوں قتل نئیں کرنا سی۔ a
اَج یہوواہ دے بندیاں دا تعلق ساریاں قوماں، قبیلیاں، نسلاں تے زباناں نال اے۔ (مکاشفہ 7:9) ایس لئی جے اوہ اَج جنگاں چ حصہ لین گے تے اوہ اپنے ای ہمایماناں نال لڑ رہے ہون گے ایتھوں تک کہ اوہناں نُوں قتل کر رہے ہون گے۔
2. خدا نے آپ بنیاِسرائیل نُوں جنگ لڑن دا حکم دِتا
ماضی چ یہوواہ فیصلہ کردا سی کہ بنیاِسرائیل کیوں تے کدوں جنگ لڑن گے۔ مثال لئی، یہوواہ نے بنیاِسرائیل نُوں حکم دِتا کہ اوہ کنعانیاں نُوں ختم کر دین کیونکہ اوہ اوہناں نُوں سزا دینا چاہندا سی۔ کنعانی بُرے فرشتیاں دی پوجا کر دے سن، بڑے ای بےہودہ جنسی کم کر دے سن تے بچیاں دی قربانی چڑھاندے سن۔ یہوواہ بنیاِسرائیل نُوں کنعانیاں دا ملک دینا چاہندا سی۔ ایس لئی اوہنے اوہناں نُوں حکم دِتا کہ اوہ اوس ملک توں ایہناں بھیڑے لوکاں دے اثر نُوں پوری طرحاں ختم کر دین۔ (احبار 18:24، 25) جدوں بنیاِسرائیل ملک کنعان چ وَس گئے تے یہوواہ نے اوہناں نُوں کدی کدار دُوجے مُلکاں نال لڑن دی اجازت دِتی جیہڑے اوہناں تے ظلم کر دے سن۔ (2-سموئیل 5:17-25) پر یہوواہ نے کدی وی بنیاِسرائیل نُوں جنگ کرن دا فیصلہ آپ کرن دی اجازت نئیں دِتی تے جدوں کدی اوہناں نے اِنج کیتا، ایہدے بڑے ای بھیڑے نتیجے نکلے۔—گنتی 14:41-45؛ 2-تواریخ 35:20-24۔
اَج یہوواہ انساناں نُوں جنگ لڑن لئی نئیں کہندا سگوں قوماں اپنے فائدے لئی جنگ لڑدیاں نیں نہ کہ خدا دی مرضی پوری کرن لئی۔ قوماں ایس لئی اِک دُوجے نال جنگ لڑدیاں نیں کیونکہ اوہ اِک دُوجے دے ملک تے قبضہ کرنا چاہندیاں نیں، زیادہ پیسہ حاصل کرنا چاہندیاں نیں یاں اپنے سیاسی نظریے پھیلانا چاہندیاں نیں۔ پر اوہناں لوکاں بارے کیہہ کہیا جا سکدا اے جیہڑے مذہب دے ناں تے جنگاں لڑدے نیں تے اوہ ایہہ دعویٰ کردے نیں کہ اوہ خدا دے دُشمناں نُوں مار رہے نیں؟ اصل چ خدا مستقبل چ اِک جنگ کرے گا جدے چ اوہ اپنے دُشمناں نُوں ختم کر دَوے گا تے اپنے بندیاں نُوں بچا لوے گا۔ ایس جنگ نُوں ہرمجِدّون دی جنگ کہیا جاندا اے۔ (مکاشفہ 16:14، 16) ایس جنگ چ صرف خدا دِیاں اسمانی فوجاں شامل ہون گیاں۔—مکاشفہ 19:11-15۔
3. بنیاِسرائیل نے اوہناں لوکاں نُوں نئیں ماریا جنہاں نے یہوواہ تے ایمان ظاہر کیتا
ماضی چ بنیاِسرائیل نے اکثر اوہناں لوکاں تے رحم کیتا جنہاں نے خدا تے ایمان ظاہر کیتا۔ بنیاِسرائیل نے صرف اوہناں لوکاں نُوں ماریا جنہاں نُوں خدا نے سزا دین دا حکم دِتا سی۔ ایس حوالے نال ذرا دو مثالاں تے غور کرو: بھانویں کہ خدا نے یریحو نُوں تباہ کرن دا حکم دِتا سی پر فیر وی بنیاِسرائیل نے راحب تے اوہدے گھر والیاں نُوں زندہ چھڈ دِتا کیونکہ اوہ خدا تے ایمان لے یشوع 2:9-16؛ 6:16، 17) بعد چ اِسرائیلیاں نے جبعونیاں تے وی رحم کیتا کیونکہ اوہناں نے یہوواہ لئی گُوڑھا احترام وکھایا سی۔—یشوع 9:3-9، 17-19۔
آئے سن۔ (اَج قوماں جنگ لڑدے ویلے اوہناں لوکاں تے رحم نئیں کردیاں جیہڑے خدا تے ایمان ظاہر کردے نیں۔ کدی کدار قوماں دی لڑائی چ نقصان بےگُناہ لوکاں دا ای ہوندا اے۔
4. بنیاِسرائیل نے جنگ بارے یہوواہ دے حکماں تے عمل کیتا
ماضی چ یہوواہ بنیاِسرائیل توں توقع کردا سی کہ اوہ جنگ دے حوالے نال اوہدیاں ہدیتاں تے عمل کرن۔ مثال لئی، کجھ موقعیاں تے خدا نے اوہناں نُوں کہیا کہ جدوں تُسی کسے شہر نال جنگ لڑن لئی اوہدے نیڑے پونچو تے پہلے اوہنوں صلح دا پیغام دینا۔ (اِستثنا 20:10) یہوواہ اِسرائیلیاں توں ایہہ توقع وی کردا سی کہ ہر بندہ اپنے آپ نُوں تے اپنے خیمے نُوں پاک صاف رکھے تے کوئی وی ناپاک حرکت نہ کرے۔ (اِستثنا 23:9-14) اوہناں دے آنڈ گوانڈ دِیاں قوماں جدوں کسے ملک نُوں فتح کر لیندیاں سن تے اکثر اوہ اوس ملک دِیاں عورتاں دی عزت لٹ لیندیاں سن۔ پر یہوواہ نے بنیاِسرائیل نُوں اِنج کرن توں سختی نال منع کیتا سی۔ اوہ جیہڑے ملک نُوں فتح کردے سن اوہ اوس ملک دِیاں عورتاں نال اِک مہینے تک شادی نئیں کر سکدے سن۔—اِستثنا 21:10-13۔
اَج زیادہتر مُلکاں نے ایہو جہے معاہدیاں تے دستخط کیتے ہوئے نیں جنہاں چ جنگاں دے حوالے نال اصول لکھے ہوئے نیں۔ ایہہ اصول شہریاں دی حفاظت لئی بنائے گئے نیں۔ پر بڑے افسوس دی گل اے کہ اکثر ایہناں تے عمل نئیں کیتا جاندا۔
5. خدا نے اپنے بندیاں واسطے جنگاں لڑیاں
ماضی چ یہوواہ بنیاِسرائیل لئی لڑیا۔ کئی وار اوہنے معجزے کر کے اپنے بندیاں نُوں جتوایا۔ ذرا غور کرو کہ یہوواہ نے شہر یریحو نُوں فتح کرن لئی بنیاِسرائیل دی مدد کیویں کیتی؟ جدوں یہوواہ دی ہدیت تے بنیاِسرائیل نے اُچی آواز چ جنگ دا نعرہ لایا تے شہر دِیاں دیواراں ڈِگ پئیاں۔ اِنج اوہناں لئی شہر تے قبضہ کرنا اسان ہو گیا۔ (یشوع 6:20) یہوواہ نے عموریاں نال جنگ لڑن چ بنیاِسرائیل دی مدد کیویں کیتی؟ اوہنے اسمان توں اوہناں اُتے وڈے وڈے اولے ورسائے تے اوہ مر گئے۔ جیہڑے اولیاں نال مرے اوہ اوہناں لوکاں توں کِتے زیادہ سن جنہاں نُوں بنیاِسرائیل نے ماریا سی۔—یشوع 10:6-11۔
اَج یہوواہ کسے وی قوم لئی نئیں لڑدا۔اوہدی بادشاہی تے بادشاہ یسوع مسیح دا ایس دُنیا نال کوئی تعلق نئیں اے۔ (یوحنا 18:36) اصل چ دُنیا دِیاں حکومتاں تے شیطان دا اِختیار اے۔ دُنیا چ لڑئیاں جان والیاں خطرناک جنگاں توں اوہدی ای سوچ ظاہر ہوندی اے۔—لُوقا 4:5، 6؛ 1-یوحنا 5:19۔
سچے مسیحی صلح پسند نیں
اَسی ویکھ لیا اے کہ اَج ساڈی صورتحال تے بنیاِسرائیل دی صورتحال چ بوہت فرق اے۔ پر اَسی صرف ایہناں ای گلاں دی وجہ توں جنگ چ حصہ نئیں لیندے سگوں ہور وی بوہت ساریاں گلاں نیں۔ مثال لئی، خدا نے پہلے توں ای دَس دِتا سی کہ آخری زمانے چ اوہدے بندے جنگ کرنا نئیں سکھن گے یعنی کہ اوہ جنگ چ حصہ نئیں لین گے۔ (یسعیاہ 2:2-4) ایہدے علاوہ یسوع مسیح نے وی کہیا سی کہ اوہدے پیروکار دُنیا دا حصہ نئیں ہون گے جدا مطلب اے کہ اوہ دُنیا دے معاملیاں چ کسے دی طرف داری نئیں کرن گے۔—یوحنا 15:19
یسوع مسیح نے تے اپنے پیروکاراں نُوں اِک ایہو جیہا کم کرن لئی کہیا جدی وجہ توں اوہناں نُوں جنگ لڑن دی لوڑ ای نئیں اے۔ اوہنے اوہناں نُوں ہدیت دِتی کہ اوہ ایہو جہی سوچ نُوں ای اپنے اندروں کڈھ دین جدی وجہ توں اوہناں نُوں غصہ آئے تے اوہ جنگ لڑن۔ (متی 5:21، 22) اوہنے اپنے پیروکاراں نُوں ایہہ ہدیت وی دِتی کہ اوہ صلح پسند بنن تے اپنے دُشمناں نال محبت کرن۔—متی 5:9، 44۔
اَسی کیہہ کر سکنے آں؟ایہہ سچ اے کہ اَسی جنگ چ تے حصہ نئیں لیندے پر کیہہ ساڈے دل چ کسے بھین بھرا لئی دُشمنی اے جدی وجہ توں کلیسیا چ لڑائیاں پیدا ہو سکدیاں نیں۔ آؤ اَسی اپنے دل چوں ایہو جہیاں گلاں کڈھ دَئیے۔—یعقوب 4:1، 11۔
قوماں دے آپس چ جیہڑے مسئلے چل دے نیں اَسی اوہناں چ نئیں اُلجھ دے۔ ایہدی بجائے اَسی اپنے ہمایماناں نال پیار تے صلح نُوں وَدھان دی کوشش چ لگے رہنے آں۔ (یوحنا 13:34، 35) جدوں تک یہوواہ جنگ نُوں ہمیشاں لئی ختم نئیں کر دیندا، آؤ اَسی عزم کرئیے کہ اَسی سیاسی معاملیاں چ کسے دی طرف داری نئیں کراں گے۔—زبور 46:9۔
a کدی کدار اِسرائیلی قبیلیاں نے آپس چ وی جنگ کیتی بھانویں کہ یہوواہ ایہدے توں بالکل وی خوش نئیں سی۔ (1-سلاطین 12:24) پر کجھ موقعیاں تے یہوواہ نے ایہہ جنگاں ہون دِتیاں کیونکہ کجھ قبیلیاں نے اوہدے توں موُنہہ موڑ لیا سی یاں فیر اوہدے خلاف بوہت وڈے گُناہ کیتے سن۔—قضاۃ 20:3-35؛ 2-تواریخ 13:3-18؛ 25:14-22؛ 28:1-8۔