مطالعے دا مضمون نمبر 41
توانوں سچی خوشی مِل سکدی اے
خوش اے ہر اوہ بندہ جیہڑا یہوواہ توں ڈردا تے اوہدیاں راہواں تے چلدا اے۔—زبور 128:1۔
گیت نمبر 110: یہوواہ وَلّوں مِلن والی خوشی
مضمون تے اِک نظر a
1. اَسی ایہہ کیوں کہہ سکنے کہ سانوں سچی خوشی ”خدا دی رہنمائی“ حاصل کرن نال ای مِل سکدی اے؟
وقتی طور تے مِلن والی خوشی، سچی خوشی نئیں ہوندی سگوں ایہہ اوہ خوشی ہوندی اے جیہڑی ساری زندگی قائم رہندی اے۔ اَسی اِنج کیوں کہہ سکنے آں؟ یسوع مسیح نے کہیا: ”خوش نیں اوہ جیہڑے خدا دی رہنمائی لئی ترس دے نیں کیونکہ اسمان دی بادشاہی اوہناں دی اے۔“ (متی 5:3) یسوع مسیح جان دا سی کہ یہوواہ نے ای انساناں چ ایہہ خواہش پائی اے کہ اوہ اوہنوں جانن تے اوہدی عبادت کرن۔ یہوواہ اِک خوشدل خدا اے ایس لئی جیہڑے لوک اوہدی عبادت کر دے نیں اوہ وی خوش رہ سکدے نیں۔—1-تیمُتھیُس 1:11۔
”خوش نیں اوہ جنہاں نُوں صحی کم کرن دی وجہ توں ستایا جاندا اے۔“—متی 5:10۔ (پیراگراف نمبر 2، 3 نُوں ویکھو۔) c
2، 3. (الف) یسوع مسیح دی گل دے مطابق ہور کیہڑے لوک خوش رہ سکدے نیں؟(ب) ایس مضمون چ اَسی کیہڑی گل تے غور کراں گے تے اِنج کرنا ضروری کیوں اے؟
2 کیہہ اَسی صرف اوہدوں ای خوش رہ سکنے آں جدوں ساڈی زندگی چ مشکلاں یاں پریشانیاں نئیں ہوندیاں؟ یسوع مسیح نے اِک ہور گل وی کہی سی جنہوں سُن کے شاید کجھ لوک بوہت حیران ہوئے ہون۔ اوہنے کہیا: ”خوش نیں اوہ جیہڑے سوگ مناندے نیں۔“ فیر بھانویں اوہ ایہہ سوگ اپنے گُناہواں دی وجہ توں مناندے ہون یاں اپنی زندگی دی کسے مشکل دی وجہ توں۔ ایہدے علاوہ اوہنے ایہہ وی کہیا کہ خوش نیں اوہ جنہاں نُوں صحی کم کرن دی وجہ توں ستایا جاندا اے یاں اوہدے شاگرد ہون دی وجہ توں جنہاں دی بےعزتی کیتی جاندی اے۔ (متی 5:4، 10، 11) پر اِنج دے حالاتاں چ کوئی بندہ کیویں خوش رہ سکدا اے؟
3 یسوع مسیح سانوں ایہہ سکھا رہیا سی کہ سچی خوشی دا تعلق ساڈے حالاتاں نال نئیں اے سگوں ایہدا تعلق خدا دی رہنمائی حاصل کرن تے اوہدے نیڑے رہن نال اے۔ (یعقوب 4:8) پر اَسی خدا دی رہنمائی کیویں حاصل کر سکنے آں تے اوہدے نیڑے کیویں جا سکنے آں؟ایس مضمون چ اَسی سچی خوشی حاصل کرن دے تِن طریقیاں بارے گل کراں گے۔
روحانی کھانا کھاؤ
4. سچی خوشی حاصل کرن دا پہلا طریقہ کیہہ اے؟ (زبور 1:1-3)
4 سچی خوشی حاصل کرن دا پہلا طریقہ: بائبل پڑھو تے ایہدے تے سوچوچار کرو۔ یسوع مسیح نے کہیا سی کہ خدا دا کلام کھانے وانگوں اے۔ انساناں تے جانوراں دونواں نُوں ای زندہ رہن لئی کھانے دی لوڑ ہوندی اے۔ پر روحانی کھانا صرف انسان ای کھا سکدے نیں تے سانوں ایہدی ضرورت وی اے۔ایس لئی یسوع مسیح نے کہیا سی: ”انسان نُوں زندہ رہن لئی صرف روٹی دی لوڑ نئیں سگوں ہر اوس گل دی لوڑ اے جیہڑی یہوواہ دے موُنہہ چوں نکل دی اے۔“ (متی 4:4) سانوں ایس گل دا خیال رکھنا چاہی دا اے کہ ساڈا اِک وی دن روحانی کھانا کھائے بغیر یعنی خدا دا کلام پڑھے بغیر نہ لنگھے۔ زبور لکھن والے اِک بندے نے کہیا سی کہ اوہ بندہ خوش رہندا اے جیہڑا خدا دی شریعت نُوں دن رات پڑھدا اے تے ایہدے تے عمل کر دا اے۔—زبور 1:1-3 نُوں پڑھو۔
5، 6. (الف) اَسی خدا دے کلام چوں کیہہ سکھنے آں؟ (ب) بائبل پڑھن نال سانوں کیویں فائدہ ہو سکدا اے؟
5 یہوواہ سانوں بوہت پیار کردا اے ایس لئی اوہنے سانوں اپنے کلام چ ایہو جہیاں گلاں دَسیاں نیں جنہاں دی وجہ توں اَسی خوشیاں بھری زندگی گزار سکنے آں۔ ایہدے توں اَسی سکھنے آں کہ ساڈی زندگی دا مقصد کیہہ اے، اَسی خدا دے نیڑے کیویں جا سکنے آں تے اوہدے کولوں اپنے گُناہواں دی معافی کیویں حاصل کر سکنے آں۔ یہوواہ دے کلام توں اَسی اوس شاندار اُمید بارے وی سکھنے آں جیہڑی اوہنے سانوں مستقبل بارے دِتی اے۔ (یرمیاہ 29:11) جدوں اَسی بائبل چوں ایہناں سچائیاں بارے جان جانے آں تے ساڈا دل خوشی نال بھر جاندا اے۔
6 سانوں پتہ اے کہ بائبل چ روز دے معاملیاں بارے وی بڑے چنگے مشورے دِتے گئے نیں۔ ایہناں مشوریاں تے عمل کرن دی وجہ توں سانوں خوشی مِل سکدی اے۔ جدوں وی کسے پریشانی دی وجہ توں تُسی مایوس ہو جاؤ تے خدا دے کلام نُوں ہور زیادہ پڑھو تے ایہدے تے سوچوچار کرو۔ یسوع مسیح نے کہیا سی کہ اوہ بندہ خوش رہندا اے جیہڑا خدا دے کلام نُوں سُن دا تے اوہدے تے عمل کر دا اے۔—لُوقا 11:28۔
7. تُسی کیہہ کر سکدے او تاکہ تُسی خدا دے کلام نُوں پڑھن توں زیادہ توں زیادہ فائدہ حاصل کرو؟
7 جدوں تُسی خدا دے کلام نُوں پڑھدے او تے ایہنوں آرام آرام نال پڑھو تاکہ توانوں ایہنوں پڑھن دا مزہ آئے۔ ایس حوالے نال ذرا اِک مثال تے غور کرو۔ فرض کرو کہ کوئی بندہ تواڈے لئی تواڈی پسند دا کھانا بناندا اے۔ پر شاید تُسی ایہنے مصروف او یاں تواڈے ذہن چ ہور اینیاں گلاں چل رہیاں نیں کہ تُسی ایس کھانے نُوں چھیتی چھیتی کھا جاندے او۔ جدوں تُسی اوہنوں کھا لیندے او تے فیر توانوں احساس ہوندا اے کہ کاش تُسی اوہنوں آرام آرام نال کھادا ہوندا تے ہر نوالے دا مزہ لیا ہوندا۔ بائبل پڑھدے ویلے وی اِنج ہو سکدا اے۔شاید اَسی ایہنوں اینی چھیتی چھیتی پڑھنے آں کہ اَسی اوہناں گلاں دا مزہ نئیں لے پاندے جیہڑیاں یہوواہ سانوں سکھانا چاہندا اے۔ ایس لئی بائبل توں پورا فائدہ حاصل کرن لئی ایہنوں آرام آرام نال پڑھو۔ کسے واقعے نُوں پڑھدے ہوئیاں اپنے ذہن چ اوہدی تصویر بناؤ، سوچو کہ اوس ویلے آلے دوالے کیہو جہیاں آوازاں آندیاں ہون گیاں۔ نالے جو کجھ تُسی پڑھدے او اوہدے تے سوچوچار کرو۔ اِنج توانوں ہور زیادہ فائدہ ہوئے گا۔
8. وفادار تے سمجھدار غلام اپنی ذمےداری نُوں کیویں پورا کر رہیا اے؟ (فٹنوٹ نُوں وی ویکھو۔)
8 یسوع مسیح نے وفادار تے سمجھدار غلام نُوں مقرر کیتا اے تاکہ اوہ سانوں صحی وقت تے کھانا دَوے تے اوہ واقعی سانوں بوہت زیادہ روحانی کھانا دے رہیا اے۔ b (متی 24:45) ایہہ وفادار غلام جیہڑا وی روحانی کھانا تیار کر دا اے اوہنوں خدا دے کلام بائبل توں تیار کردا اے۔ (1-تھسلُنیکیوں 2:13) ایس روحانی کھانے دے ذریعے سانوں پتہ چلدا اے کہ بائبل دے مطابق یہوواہ دی سوچ کیہہ اے۔ ایس لئی اَسی ”مینارِنگہبانی“ تے ”جاگو“ رسالے تے ویبسائٹ jw.org تے مضمون پڑھنے آں۔ اَسی ہفتے دے دوران تے ہفتے دے آخر تے ہون والیاں عبادتاں دی تیاری کرنے آں تے جے ساڈی زبان چ جےڈبلیو براڈکاسٹنگ آندی تے اَسی اوہنوں وی ویکھنے آں۔ جے اَسی بائبل پڑھاں گے تے ایہدے تے سوچوچار کر دے رہواں گے تے اَسی ہر اوہ کم کر سکاں گے جدے توں سانوں سچی خوشی مِلدی اے۔
یہوواہ دے اصولاں مطابق زندگی گزارو
9. سچی خوشی حاصل کرن دا دُوجا طریقہ کیہہ اے؟
9 سچ خوشی حاصل کرن دا دُوجا طریقہ: یہوواہ دے اصولاں مطابق زندگی گزارو۔ زبور لکھن والے اِک بندے نے کہیا: خوش اے ہر اوہ بندہ جیہڑا یہوواہ توں ڈردا تے اوہدیاں راہواں تے چلدا اے۔ (زبور 128:1) یہوواہ توں ڈرن دا مطلب ایہہ وے کہ اَسی اوہدا اینا احترام کرئیے کہ اَسی ہر اوس کم توں دُور بھجئے جیہڑا اوہنوں پسند نئیں۔ (امثال 16:6) سانوں صحی تے غلط بارے یہوواہ دے اصولاں تے چلن دی پوری کوشش کرنی چاہی دی اے۔ ایہہ اصول سانوں اوہدے کلام چ مِلدے نیں۔ (2-کُرنتھیوں 7:1) جے اَسی اوہ کم کراں گے جیہڑے یہوواہ نُوں پسند نیں تے اوہناں کماں توں دُور رہواں گے جنہاں توں اوہنوں نفرت اے تے اَسی خوش رہواں گے۔—زبور 37:27؛ 97:10؛ رومیوں 12:9۔
10. رومیوں 12:2 دے مطابق ساڈی کیہہ ذمےداری اے؟
10 رومیوں 12:2 نُوں پڑھو۔ شاید اِک بندے نُوں ایہہ تے پتہ اے کہ یہوواہ کول صحی تے غلط بارے اصول بنان دا اِختیار اے۔ پر اوہنوں ایہہ مننا وی چاہی دا اے کہ اوہنوں ایہناں اصولاں تے عمل وی کرن دی لوڑ اے۔ مثال لئی، شاید اِک بندے نُوں پتہ ہوئے کہ حکومت کول ایہہ طے کرن دا اِختیار اے کہ ہائیوے تے گڈی کِنّی سپیڈ چ چلانی چاہی دا اے۔ پر شاید اوہ ایہہ منن لئی تیار نہ ہووے کہ اوہنوں ایس اصول تے عمل وی کرنا چاہی دا اے۔ ایس لئی اوہ طے کیتی ہوئی رفتار توں زیادہ تیز گڈی چلاندا اے۔ ایسے طرحاں سانوں اپنے کماں توں ثابت کرنا چاہی دا اے کہ سانوں ایس گل تے پورا یقین اے کہ یہوواہ دے معیاراں تے چلن چ ای ساڈی بھلائی اے۔ (امثال 12:28) داؤد وی اِنج ای محسوس کردا سی۔ اوہنے یہوواہ بارے کہیا: تُوں مینوں زندگی دی راہ وکھانا ایں۔ تیری حضوری وچ خوشیاں ای خوشیاں نیں۔ تیرے سجے ہتھ رہ کے مینوں ہمیشاں خوشی مِلدی اے۔—زبور 16:11۔
11، 12. (الف) جدوں اَسی پریشان یاں مایوس ہنے آں تے سانوں کیہڑی گل توں خبردار رہنا چاہی دا اے؟ (ب) اَسی تفریح دے حوالے نال فِلپّیوں 4:8 توں کیہہ سکھ سکنے آں؟
11 جدوں اَسی پریشان یاں مایوس ہنے آں تے شاید اَسی سوچئے کہ سانوں کوئی ایہو جیہا کم کرنا چاہی دا اے جدی وجہ توں ساڈا دھیان اپنی پریشانی توں ہٹ جائے۔ اِنج کرن چ کوئی حرج نئیں اے۔ پر سانوں خبردار رہنا چاہی دا اے کہ اَسی کوئی وی ایہو جیہا کم نہ کرئیے جدے توں یہوواہ نُوں نفرت اے۔—اِفسیوں 5:10-12؛ 15-17۔
12 جدوں پولُس نے فِلپّی دے مسیحیاں نُوں خط لکھیا تے اوہدے چ اوہنے اوہناں نُوں ہلاشیری دِتی کہ اوہ اوہناں گلاں تے دھیان دیندے رہن جیہڑیاں سچیاں نیں، جیہڑیاں پاک نیں، جیہڑیاں محبت کرن دی ہلاشیری دیندیاں نیں تے جیہڑیاں چنگیاں نیں۔ (فِلپّیوں 4:8 نُوں پڑھو۔) بھانویں کہ پولُس اپنے خط چ خاص طور تے تفریح بارے گل نئیں کر رہیا سی پر تفریح بارے فیصلہ کردے ویلے اَسی اوہدی ایس گل تے غور کر سکنے آں۔ جدوں تُسی ایس ایت چ پڑھدے او کہ جیہڑیاں گلاں سچیاں نیں، جیہڑیاں گلاں پاک نیں تے جیہڑیاں گلاں چنگیاں نیں تے لفظ گلاں دی جگہ گانے،فلماں،کتاباں،تے ویڈیوز لا کے ویکھو تے جدوں تُسی اِنج کرو گے تے تُسی ایہہ جان سکو گے کہ کیہڑیاں فلماں، گانے، کتاباں تے ویڈیو گیمز یہوواہ دی نظر چ صحی نیں تے کیہڑیاں صحی نئیں نیں۔ (زبور 119:1-3) اَسی چاہنے آں کہ اَسی اپنی زندگی یہوواہ دے اصولاں دے مطابق گزارئیے۔ اِنج اَسی صاف ضمیر نال اوہ تیجا کم کر سکاں گے جدے توں سانوں خوشی ملے گی۔—اعمال 23:1۔
یہوواہ دی عبادت نُوں سب توں زیادہ اہمیت دَوو
13. سچی خوشی حاصل کرن دا تیجا طریقہ کیہہ اے؟ (یوحنا 4:23، 24)
13 سچی خوشی حاصل کرن دا تیجا طریقہ: یہوواہ دی عبادت نُوں اپنی زندگی چ سب توں زیادہ اہمیت دَوو۔ یہوواہ ای ساڈی عبادت دا حقدار اے کیونکہ اوہنے سانوں بنایا اے۔ (مکاشفہ 4:11؛ 14:6، 7) ایس لئی ساڈی زندگی چ سب توں اہم گل ایہہ ہونی چاہی دی اے کہ اَسی یہوواہ دی اوسے طرحاں عبادت کر ئیے جیویں اوہ چاہندا اے یعنی روح تے سچائی نال۔ (یوحنا 4:23، 24 نُوں پڑھو۔) خدا روح اے تے اوہدی عبادت کرن والیاں نُوں وی روح تے سچائی نال عبادت کرنی چاہی دی اے۔ اَسی چاہنے آں کہ جدوں اَسی یہوواہ دی عبادت کرئیے تے اوہدی پاک روح ساڈی رہنمائی کرے تاکہ ساڈی عبادت اوہناں سچائیاں دے مطابق ہووے جیہڑیاں اوہدے کلام چ نیں۔ جے اَسی کسے ایہو جے ملک چ رہنے آں جِتھے ساڈے کم تے پابندی اے تے فیر وی سانوں یہوواہ دی عبادت نُوں اپنی زندگی چ سب توں زیادہ اہمیت دینی چاہی دی اے۔ ایس ویلے ساڈے 100 توں زیادہ بھین بھرا صرف ایس وجہ توں قید چ نیں کیونکہ اوہ یہوواہ دی عبادت نُوں اہمیت دیندے نیں۔ پر ایس مشکل وقت چ وی ساڈے ایہہ بھین بھرا یہوواہ کولوں دُعا کرن، اوہدے کلام نُوں پڑھن تے دُوجیاں نُوں اوہدے بارے تے اوہدی بادشاہی بارے دَسن دی پوری کوشش کر دے نیں۔ جدوں سانوں بےعزت کیتا جاندا اے یاں سانوں اذیت دِتی جاندی اے تے اَسی ایس گلوں خوش ہو سکنے آں کہ یہوواہ ساڈے نال اے تے اوہ سانوں برکتاں دے رہیا اے۔
اِک زندہ مثال
14. تاجکستان چ رہن والے اِک بھرا نال کیہہ ہویا تے ایہدی کیہہ وجہ سی؟
14 ساڈے بھین بھرا ایس گل دی زندہ مثال نیں کہ بھانویں ساڈے حالات جِنّے وی مشکل ہون، اَسی اوہناں تِن طریقیاں تے عمل کرن نال سچی خوشی حاصل کر سکنے آں جنہاں تے اَسی گل کیتی اے۔ ذرا تاجکستان چ رہن والے اِک بھرا جووِیڈن بوبو ہونوو دی مثال تے غور کرو جدی عمر 19 سال اے۔ اوہنے فوج چ بھرتی ہون توں انکار کیتا سی۔ ایس لئی 4 اکتوبر 2019 نُوں اوہنوں اوہدے گھروں چُک لیا گیا تے جیل چ بھیج دِتا گیا جِتھے اوہدے نال مُجرماں ورگا سلوک کیتا گیا۔ ایس نااِنصافی دا ذکر کئی مُلکاں دِیاں خبراں چ وی ہویا۔ خبراں چ دَسیا گیا کہ اوہنوں ماریا کٹیا گیا تاکہ اوہ فوجی بنے تے وردی پائے۔ ایہدے بعد عدالت نے اوہنوں مُجرم قرار دے دِتا تے اوہنوں اوس کیمپ چ بھیج دِتا جِتھے قیدیاں کولوں مزدوری کرائی جاندی سی۔ اوہ اوہدوں تک اوتھے ای رہیا جدوں تک ملک دے صدر نے اوہنوں معاف نئیں کر دِتا تے اوہدی رہائی دا حکم نئیں دِتا۔ ایس مشکل وقت چ بھرا جووِڈن نے اپنی خوشی کیویں قائم رکھی تے اوہ یہوواہ دا وفادار کیویں رہیا؟اوہنے اپنا دھیان ایس گل تے رکھیا کہ اوہنوں یہوواہ دی رہنمائی دی ضرورت اے۔
بھرا جووِیڈن روحانی کھانا کھاندا رہیا، یہوواہ دے اصولاں تے چلدا رہیا تے یہوواہ دی عبادت نُوں اپنی زندگی چ سب توں زیادہ اہمیت دیندا رہیا۔ (پیراگراف نمبر 15-17 نُوں ویکھو۔)
15. بھرا جووِیڈن نُوں قید چ وی روحانی کھانا کیویں مِلدا رہیا؟
15 قید چ ہون دے باوجود بھرا جووِیڈن روحانی کھانا کھاندا رہیا بھانویں کہ اوہدے کول نہ تے بائبل سی تے نہ ای تنظیم دی کوئی کتاب وغیرہ۔ پر اوہنوں روحانی کھانا کیویں مِلدا رہیا؟ بھین بھرا جیہڑے بیگ چ اوہنوں کھان پین دِیاں چیزاں بھیج دے سن اوہدے تے اوہ روزانہ دی ایت لکھ دیندے سن۔ ایس طرحاں بھرا جووِیڈن بائبل پڑھ سکیا تے اوہدے تے ہر روز سوچوچار کر سکیا۔ قید چوں رِہا ہون دے بعد اوہنے اوہناں بھین بھراواں نُوں اِک ودھیا مشورہ دِتا جیہڑے حالے تک کسے سخت مشکل چوں نئیں لنگھے۔ اوہنے کہیا:”ایہہ بوہت ضروری اے کہ تُسی اپنی آزادی توں پورا فائدہ حاصل کرو تے بائبل تے ساڈی تنظیم دِیاں کتاباں نُوں پڑھدے رہوو تاکہ تُسی یہوواہ بارے ہور سکھ سکو۔“
16. بھرا جووِیڈن نے اپنا دھیان کیہڑیاں گلاں تے رکھیا؟
16 بھرا جووِیڈن یہوواہ دے اصولاں دے مطابق چلدا رہیا۔ اوہنے اپنا دھیان غلط خواہشاں تے نئیں رکھیا تے نہ ای اوہ بھیڑے کماں چ پیا۔ ایہدی بجائے اوہنے اپنا دھیان یہوواہ تے اوہدے معیاراں تے رکھیا۔ یہوواہ دِیاں بنائیاں ہوئیاں چیزاں تے غور کرن نال اوہدے تے بوہت گُوڑھا اثر ہویا۔ ہر صبح اوہ پرندیاں دِیاں خوبصورت آوازاں سُن کے اُٹھدا سی تے رات نُوں اوہ چن تے تاریاں نال بھریا اسمان ویکھدا سی۔ اوہنے کہیا:”یہوواہ دِیاں ایہناں نعمتاں نُوں ویکھ کے میں خوش ہو جانا ساں تے میرا حوصلہ ودھدا سی۔“ جدوں اَسی یہوواہ دِیاں بنائیاں ہوئیاں چیزاں تے اوہدیاں ہدیتاں لئی اوہدے شکرگزار ہنے آں تے ساڈا دل خوشی نال بھر جاندا اے تے ایس خوشی دی وجہ توں اَسی یہوواہ دے وفادار رہ پانے آں۔
17. جیہڑا بندہ بھرا جووِیڈن ورگے حالاتاں چوں لنگھ رہیا ہوندا اے، اوہدے تے 1-پطرس 1:6، 7 چ لکھی گل کیویں لاگو ہوندی اے؟
17 بھرا جووِیڈن نے یہوواہ دی عبادت نُوں سب توں زیادہ اہمیت دِتی۔ اوہ جان دا سی کہ یہوواہ دا وفادار رہنا کِنّاں ضروری اے۔ یسوع مسیح نے کہیا سی کہ صرف یہوواہ اپنے خدا دی پرستش کرو تے صرف اوہدی عبادت کرو۔ (لُوقا 4:8) فوجی کمانڈر تے دُوجے فوجی چاہندے سن کہ بھرا جووِیڈن اپنا مذہب چھڈ دَوے پر اوہنے اِنج نئیں کیتا سگوں اوہ دن رات یہوواہ کولوں مدد منگدا رہیا کہ اوہ ہمت نہ ہارے تے اپنے ایمان تے قائم رہوے۔ اینی زیادہ ناانصافی سہن دے باوجود اوہ یہوواہ دا وفادار رہیا۔ بھرا جووِیڈن ایس گل توں بڑا خوش اے کہ اوہدا ایمان پرکھیا گیا کیونکہ ہُن ایہہ پہلے توں کِتے زیادہ مضبوط ہو گیا اے۔—1-پطرس 1:6، 7 نُوں پڑھو۔
18. اَسی اپنی خوشی کیویں قائم رکھ سکنے آں؟
18 یہوواہ خدا جان دا اے کہ سچی خوشی حاصل کرن لئی سانوں کیہڑیاں چیزاں دی لوڑ اے۔ جے اَسی اوہناں تِن طریقیاں تے عمل کراں گے جنہاں توں سانوں سچی خوشی مِل سکدی اے تے اَسی مشکلاں چ وی خوش رہ سکاں گے۔ ایس طرحاں اَسی وی ایہہ گل کہہ سکاں گے: خوش اے اوہ قوم جدا خدا یہوواہ اے۔—زبور 144:15۔
گیت نمبر 111: خوشی نال دل باغ باغ
a بوہت سارے لوکاں نُوں سچی خوشی ایس لئی نئیں مِلدی کیونکہ اوہ ایہنوں پیسے، شہرت تے رُتبے چ لبھدے نیں۔ پر جدوں یسوع مسیح زمین تے سی تے اوہنے لوکاں نُوں دَسیا کہ اوہ سچی خوشی کیویں حاصل کر سکدے نیں۔ ایس مضمون چ اَسی سچی خوشی حاصل کرن دے تِن طریقیاں تے غور کراں گے۔
b 15 اگست 2014 دے ”مینارِنگہبانی“ چ مضمون ”کیا آپ کو وقت پر روحانی خوراک مل رہی ہے؟“ نُوں ویکھو۔
c تصویر دی وضاحت: تصویر چ وکھایا گیا اے کہ اِک بھرا نُوں گرفتار کیتا گیا اے تے اوہدے تے مقدمہ چلان لئی اوہنوں عدالت چ لیایا جا رہیا اے۔اوہدے ہمایمان اوہدا ساتھ دین لئی اوتھے موجود نیں۔
