1922—اَج توں 100 سال پہلاں
خدا سانوں یسوع مسیح دے ذریعے جت دَواندا اے۔ (1-کُرنتھیوں 15:57) ایہہ 1922 دی سالانہ ایت سی جدے ذریعے بائبل سٹوڈنٹس نُوں ایہہ یقین ہویا کہ اوہناں نُوں اپنی وفاداری دا اَجر ملے گا۔ اوس سال یہوواہ نے واقعی ایہناں جوشیلے مُناداں نُوں اجر دِتا۔ جدوں بائبل سٹوڈنٹس نے آپی اپنیاں کتاباں وغیرہ چھاپنا، اوہناں نُوں جِلد کرنا تے ریڈیو دے ذریعے بادشاہی دا پیغام پھیلانا شروع کیتا تے یہوواہ نے اوہناں نُوں بوہت برکت دِتی۔ اوسے سال امریکہ دی ریاست اوہائیو چ سیڈر پوائنٹ تے ہون والی کنونشن توں اِک واری فیر ایہہ گل ثابت ہو گئی کہ یہوواہ اپنے بندیاں نُوں برکت دے رہیا اے۔ اوس کنونشن دا اثر یہوواہ دی تنظیم دے کم اُتے حالے تک ہو رہیا اے۔
اِک بڑا ای زبردست مشورہ
جیویں جیویں مُنادی دا کم ودھدا گیا، کتاباں تے رسالیاں دی لوڑ وی ودھدی گئی۔ بروکلن بیتایل چ بھرا رسالے تے چھاپ رہے سن۔ پر اوہ کتاباں حالے وی دُوجیاں کمپنیاں کولوں چھپواندے سن۔ پر فیر اِنج ہویا کہ اِک کمپنی کئی مہینیاں تک ساڈی مانگ دے مطابق کتاباں نہ چھاپ سکی جدا اثر مُنادی دے کم تے پیا۔ اوس ویلے بھرا رابرٹ مارٹن ساڈے چھاپہخانے دی دیکھبھال کردے سن۔ بھرا رتھرفرڈ نے اوہنوں پچھیا:”کیہہ اَسی اپنیاں کتاباں نُوں آپ چھاپ سکنے آں؟“
ایس واقعے بارے بھرا رابرٹ نے دَسیا: ”ایہہ بڑا ای زبردست مشورہ سی جدی وجہ توں اَسی کتاباں تیار کرن لئی اِک ہور چھاپہخانہ کھول لیا۔“ بھراواں نے بروکلن چ اِک جگہ کرائے تے لئی تے کتاباں وغیرہ چھاپن لئی سامان وی خریدیا۔
پر ہر کوئی ایس گل توں خوش نئیں سی۔ جیہڑی کمپنی پہلے ساڈیاں کتاباں چھاپ دی سی، اوہدے صدر نے ساڈے نویں چھاپہخانے چ آ کے کہیا: ”تواڈے کول چھپائی لئی ودھیا توں ودھیا سامان اے پر تواڈے وچوں کسے نُوں وی ایہنوں استمال کرنا نئیں آندا۔ چھے مہینے دے اندر اندر ایہہ سب کجھ کباڑ بن جائے گا۔“
بھرا رابرٹ نے کہیا: ”اوہدی گل صحی لگ رہی سی پر اَسی سب کجھ یہوواہ تے چھڈ دِتا کیونکہ اوہ ہمیشاں ساڈی مدد کردا آیا سی۔“ بھرا رابرٹ دی گل بالکل صحی ثابت ہوئی۔ چھیتی ای ساڈے چھاپہخانے چ ہر روز 2000 کتاباں تیار ہون لگ پئیاں۔
ریڈیو دے ذریعے گواہی
اپنیاں کجھ کتاباں نُوں آپی چھاپن دے نال نال یہوواہ دے بندے ریڈیو دے ذریعے وی بادشاہی دی خوشخبری دا اعلان کرن لگے پئے۔ 26 فروری 1922 نُوں اِتوار دی اِک دوپہر،بھرا رتھرفرڈ نے پہلی وار ریڈیو تے تقریر کیتی۔ اوہنے امریکہ دی ریاست کیلیفورنیا دے شہر لاساینجلس
دے اِک ریڈیو سٹیشن تے تقریر دِتی جدا عنوان سی: ”لکھاں لوک جیہڑے اَج زندہ نیں کدی نئیں مرن گے۔“تقریباً 25 ہزار لوکاں نے ایس تقریر نُوں سُنیا۔ کجھ لوکاں نے تے خطاں دے ذریعے ایس تقریر لئی اپنی شکرگزاری وی ظاہر کیتی۔ اِک خط ریاست کیلیفورنیا توں آیا سی جیہڑا وِلرا ڈ ایشفرڈ ناں دے بندے نے لکھیا سی۔ اوہنے بھرا رتھرفرڈ دی تعریف کردے ہوئے کہیا کہ ”اینی دلچسپ تقریر سُن کے مزہ ای آ گیا۔ میرے گھر چ تِن لوک بیمار نیں تے جے ایہہ تقریر ریڈیو تے نشر نہ ہوندی تے سانوں ایہنوں سُنن دا موقع ای نہ مِلدا۔“
ایہدے بعد بھراواں نے ریڈیو تے ایہو جہے کجھ ہور پروگرام وی چلائے۔سال دے آخر چ اِک ”مینارِنگہبانی“ چ دَسیا گیا کہ تقریباً 3 لکھ لوکاں نے ریڈیو دے ذریعے بائبل دا پیغام سُنیا۔
کیونکہ ریڈیو دے ذریعے گواہی دینا بڑا فائدہمند ثابت ہو رہیا سی ایس لئی بائبل سٹوڈنٹس نے نیویارک چ اپنا ریڈیو سٹیشن بنان دا فیصلہ کیتا جدا ناں ڈبلیو بیبی آر رکھیا گیا۔ اگلے کئی سالاں تک بائبل سٹوڈنٹس نے ایس ریڈیو سٹیشن توں بوہت سارے لوکاں نُوں بائبل دا پیغام سُنایا۔
”اے ڈی وی“
15 جون 1922 دے ”مینارِنگہبانی“ چ ایہہ اعلان کیتا گیا کہ ”5 توں 13 ستمبر تک ریاست اوہائیو چ سیڈر پوائنٹ تے اِک کنونشن ہوئے گی۔“ جدوں بائبل سٹوڈنٹس اوتھے پونچے تے اوہناں دی خوشی دی کوئی اِنتہا نئیں سی۔
بھرا رتھرفرڈ نے اپنی پہلی تقریر چ کہیا: ”مینوں پورا یقین اے کہ مالک ایس کنونشن تے برکت پائے گا تے پہلے نالوں کِتے زیادہ لوکاں تک بادشاہی دا پیغام پونچے گا۔“ ایس کنونشن تے بھین بھراواں نُوں وار وار حوصلہ دِتا گیا کہ اوہ اپنی پوری وا لا کے مُنادی کرن۔
فیر جمعہ 8 ستمبر نُوں تقریباً 8000 لوک بڑے شوق نال بھرا رتھرفرڈ دی تقریر سُنن لئی ہال چ جمع ہوئے۔ اوہ اِنتظار کر رہے سن کہ کدوں بھرا انگریزی دے حرفاں ”اے ڈی وی“ دا مطلب دَسے گا جیہڑے کنونشن دے دعوت نامے اُتے چھپے ہوئے سن۔ جدوں سارے اپنیاں سیٹاں تے بیٹھ گئے تے اوہناں نے سٹیج دے اُتے اِک بینر ویکھیا جنہوں حالے تک کھولیا نئیں گیا سی۔ بھرا آرتھر کلاؤس کنونشن لئی ریاست اوکلاہوما توں آیا سی۔ اوہنوں بیٹھن لئی اِک ایہو جہی جگہ مِل گئی جِتھے اوہ تقریراں نُوں
بڑی چنگی طرحاں سُن سکدا سی۔ اوس ویلے تقریراں نُوں سُننا اینا اسان نئیں سی ہوندا کیونکہ اوہدوں مائیک تے سپیکر وغیرہ نئیں ہوندے سن۔”اَسی اِک اِک گل نُوں بڑے دھیان نال سُن رہے ساں۔“
چئیرمین نے ایس گل دا خیال رکھن لئی کہ بھرا رتھرفرڈ دی تقریر نُوں سُنن چ کوئی رکاوٹ پیدا نہ ہوئے ایہہ اعلان کیتا کہ کوئی وی تقریر دے دوران اندر نہ آوے۔ 30:9 وجے بھرا رتھر فرڈ نے اپنی تقریر متی 4:17 چ لکھی یسوع دی ایس گل نال شروع کیتی: اسمان دی بادشاہی نیڑے وے۔ جدوں اوہ گل کر رہیا سی کہ لوک ایس بادشاہی بارے کیویں سُنن گے تے اوہنے دَسیا: یسوع مسیح نے آپ کہیا سی کہ اوہ اپنی موجودگی دے دوران اپنے سچے تے وفادار پیروکاراں نُوں جمع کرے گا۔
بھرا آرتھر اوس ویلے مین ہال چ بیٹھا ہویا سی۔ اوہنے دَسیا: ”اَسی بھرا رتھرفرڈ دی اِک اِک گل نُوں بڑے دھیان نال سُن رہے ساں۔“ پر فیر اچانک بھرا آرتھر دی طبیعت خراب ہو گئی تے اوہنوں ہال توں جانا پیا۔ اوہنوں بڑی مجبوری چ اوتھوں نکلنا پیا کیونکہ اوہ جان دا سی کہ اوہ دُبارہ اندر نئیں جا سکے گا۔
کجھ منٹ بعد اوہدی طبیعت کجھ بہتر ہو گئی۔ اوہنے دَسیا کہ جدوں اوہ ہال دے اندر واپس جا رہیا سی تے اوہنے تالیاں دی بڑی اُچی آواز سنیُ تے اوہدا دل خوشی نال بھر گیا۔ اوہ ایس شاندار تقریر نُوں اَدھ چ نئیں چھڈنا چاہندا سی۔ اوہنے سوچیا کہ اوہ باقی دی تقریر چھت تے چڑھ کے سُن لوے گا۔ اوس ویلے بھرا آرتھر دی عمر 23 سال سی تے اوہ بلڈنگ دی سائیڈ توں ہو کے چھت تے چڑھ گیا۔ اوہنے دَسیا کہ چھت تے اوہ تقریر نُوں بڑی چنگی طرحاں سُن پایا۔
پر بھرا آرتھر اوتھے کلّا نئیں سی۔ اوہدے کجھ ہور دوست وی اوتھے سن۔ اوہناں وچوں اِک بھرا فرینک جانسن سی جیہڑا بھج کے بھرا آرتھر کول گیا تے اوہنوں کہیا: ”تیرے کول چھری ہے وے؟“
بھرا آرتھر نے کہیا: ”ہاں ہے وے۔“
فیر بھرا فرینک نے کہیا: ”یہوواہ نے تینوں ساڈے کول گھلیا اے کیونکہ اَسی اوہدے کولوں دُعا کر رہے ساں کہ سانوں کوئی ایہو جیہا بندہ مِل جائے a دی گل نُوں دھیان نال سنیں۔“
جدے کول چھری ہووے۔ تُوں ایہہ وڈا جیہا بینر ویکھ رہیا ایں نہ جنہوں لپیٹ کے کیل ٹھوکے ہوئے نیں؟ ہُن جججدوں اوہ کہوے مُنادی کرو، مُنادی کرو تے تُوں ایہناں چاراں رَسیاں نُوں کٹ دَویں۔ بھرا آرتھر ہتھ چ چھری پھڑ کے بھرا رتھرفرڈ دی گل نُوں دھیان نال سُنن لگ پیا۔ جدوں بھرا رتھر فرڈ اپنی تقریر دے ایس خاص حصے تے پونچیا تے اوہنے بڑے ای جوش تے خوشی نال کہیا: ”مالک دے سچے تے وفادار گواہ بنو۔ اوس ویلے تک مُنادی کردے رہوو جدوں تک وڈا بابل تباہ نئیں ہو جاندا۔ اچھائی دا پیغام دُنیا دے کونے کونے چ پونچا دَوو تاکہ ساریاں نُوں پتہ لگ جاوے کہ یہوواہ ای خدا اے تے یسوع مسیح بادشاہواں دا بادشاہ تے مالکاں دا مالک اے۔ اَج دا دن تریخ دا خاص دن اے۔ ویکھو! بادشاہ حکمرانی ر رہیا اے۔تُسی اوہدے مُناد او۔ ایس لئی مُنادی کرو، مُنادی کرو، مُنادی کرو۔ بادشاہ تے اوہدی بادشاہی دی مُنادی کرو۔“
بھرا آرتھر نے دَسیا کہ جدوں اوہنے تے دُوجے بھراواں نے رسیاں کٹیاں تے بینر بڑے ای آرام نال کُھل گیا۔ بینر تے لکھیا سی: ”بادشاہ تے بادشاہی دی مُنادی کرو“ تے انگریزی دے تِن حرف ”اے ڈی وی“ ایہدے وَل ای اشارہ کردے سن۔
خوشی دین والا اِک کم
سیڈر پوائنٹ تے ہون والی کنونشن توں بھین بھراواں نُوں مدد ملی کہ اوہ اپنا دھیان مُنادی دے کم تے رکھ سکن۔ جیہڑے بھین بھرا ایس کم نُوں کرن لئی تیار سن اوہناں نے بڑی خوشی نال تے ودھچڑھ کے ایس کم چ حصہ لیا۔ اوکلاہوما توں اِک پہلکار نے خط چ لکھیا: ”اَسی جیہڑے علاقے چ مُنادی کرنے ساں اوتھے بوہت سارے لوک کوئلے دی کان چ کم کردے سن تے بڑے ای غریب سن۔“ اوہنے ایہہ وی دَسیا: ”اکثر جدوں لوک ”گولڈن ایج“ رسالے چ ساڈا پیغام پڑھدے سن تے اوہناں دی اَکھاں چ اتھرو آ جاندے سن۔ اَسی بڑے خوش آں کہ اَسی ایس پیغام دے ذریعے لوکاں نُوں تسلی دے پائے۔“
ایہہ بائبل سٹوڈنٹس لُوقا 10:2 چ لکھی یسوع دی گل دی اہمیت نُوں سمجھ گئے سن جِتھے اوہنے کہیا: فصل تے بوہت اے پر ایہدی واڈھی لئی مزدور تھوڑے نیں۔ سال دے آخر تے اوہناں دا ایہہ عزم ہور وی پکا ہو گیا سی کہ اوہ بادشاہی دا پیغام دُنیا دے کونے کونے تک پھیلا دین گے۔
a بھین بھرا کدی کدار بھرا رتھرفرڈ نُوں جج وی کہندے سن کیونکہ اوہ امریکہ دی ریاست میسوری چ جج دے طور تے کم کر چُکیا سی۔