• ”‏مینوں اِنج لگ رہیا سی کہ جیویں میرا شوہر وار وار حرام‌کاری کر رہیا اے۔“‏

• ”‏مینوں لگ رہیا سی جیویں میری کوئی عزت نئیں اے، مَیں سوہنی نئیں آں تے بے‌کار آں۔“‏

• ”‏مَیں کسے نال ایس بارے گل نئیں کر سکنی ساں تے کلّی سب کجھ سہہ رہی ساں۔“‏

• ”‏مینوں لگ رہیا سی کہ یہوواہ نُوں میری کوئی فکر نئیں اے۔“‏

ایہناں گلاں توں پتہ چلدا اے کہ جدوں اِک شوہر گندیاں تصویراں تے فلماں ویکھدا اے تے اوہدی بیوی نُوں کیہہ محسوس ہوندا اے۔ جے اوہ کئی مہینیاں تے سالاں توں لُک کے اِنج کر رہیا اے تے ہو سکدا اے کہ اوہدی بیوی دا اوہدے توں بھروسا اُٹھ جائے۔اِک بیوی نے دَسیا:‏ ”‏مینوں لگ رہیا سی کہ مَیں اپنے شوہر نُوں جان‌دی ای نئیں۔ مَیں سوچنی ساں کہ پتہ نئیں اوہ میرے توں ہور کیہہ کجھ لُکا رہیا اے۔“‏

ایہہ مضمون ایہو جہیاں بیویاں لئی لکھیا گیا اے جنہاں دے شوہراں نُوں گندیاں تصویراں تے فلماں ویکھن دی عادت اے۔‏ a ایہدے چ بائبل دے کجھ ایہو جہے اصولاں تے گل کیتی جائے گی جنہاں توں بیویاں نُوں تسلی ملے گی تے ایس گل دا یقین ہو جائے گا کہ یہوواہ اوہناں دے نال اے۔ نالے اوہناں نُوں مدد ملے گی تاکہ اوہ فیر توں ذہنی سکون حاصل کر سکن تے یہوواہ دے نیڑے رہ سکن۔‏ b

ایہہ گل سچ اے کہ تواڈا شوہر جو کجھ کردا اے، تُسی اوہنوں پوری طرحاں روک نئیں سکدے۔ پر تُسی کجھ ایہو جہے کم ضرور کر سکدے او جنہاں توں تواڈی تکلیف گھٹ ہووے تے توانوں ذہنی سکون ملے۔ ایہناں وچوں کجھ کم ایہہ نیں:‏

اپنے آپ نُوں اِلزام نہ دَوو۔‏ شاید اِک بیوی نُوں اِنج محسوس ہووے کہ جے اوہدا شوہر گندیاں تصویراں تے فلماں ویکھ رہیا اے تے ایہدے چ کِتے نہ کِتے اوہدی ای کوئی غلطی اے۔ اِک بھین جدا ناں ایلس c اے، اوہنوں ایہہ محسوس ہون لگ پیا کہ اوہ اینی سوہنی نئیں اے۔ اوہ کہندی اے:‏ ”‏شاید میرے چ ای کوئی کمی اے کہ میرا شوہر مینوں چھڈ کے دُوجیاں عورتاں نُوں ویکھدا اے۔“‏ کجھ عورتاں اپنے آپ نُوں اِلزام دیندیاں نیں کہ ایس مسئلے چ اوہ جنج دا رویہ وکھا رہیاں نیں، اوہدی وجہ توں معاملہ ہور وگڑ رہیا اے۔ بھین ڈیزی نے کہیا:‏ ”‏مینوں لگ رہیا سی کہ میرے غصے دی وجہ توں ساڈی شادی‌شُدہ زندگی ہور خراب ہو رہی اے۔“‏

جے توانوں وی اِنج ای لگدا اے تے ایہہ گل یاد رکھو کہ یہوواہ دی نظر چ اپنے شوہر دے بھیڑے کماں لئی تُسی ذمے‌دار نئیں او۔ یعقوب 1:‏14 چ لکھیا اے:‏ ہر کوئی اپنیاں  خواہشاں دی وجہ توں ازمایا تے اُکسایا جاندا اے۔ (‏رومیوں 14:‏12؛‏ فِلپّیوں 2:‏12‏)‏ ایس لئی یاد رکھو کہ یہوواہ توانوں قصوروار نئیں ٹھہراندا سگوں اوہ ایس گل دی بڑی قدر کردا اے کہ تُسی اوہدے وفادار او۔—‏2-‏تواریخ 16:‏9‏۔‏

اِک بیوی نُوں ایہہ گل وی یاد رکھنی چاہی دی اے کہ اوہدا شوہر گندیاں تصویراں تے فلماں ایس لئی نئیں ویکھدا کیونکہ اوہ اپنی کسے کمی دی وجہ توں اوہدیاں جنسی خواہشاں نُوں پورا نئیں کر سکدی۔ ایس بارے کجھ عالماں دا کہنا اے کہ گندیاں تصویراں تے فلماں کسے بندے دے دل چ ایہو جہیاں جنسی خواہشاں پیدا کردیاں نیں جنہاں نُوں کوئی وی عورت پورا نئیں کر سکدی۔‏

حدوں ودھ پریشان نہ ہووو۔‏ کیتھرین کہندی اے کہ اوہنوں ہر ویلے ایہی گل کھاندی رہندی سی کہ اوہدا شوہر گندیاں تصویراں تے فلماں ویکھدا اے۔ بھین فرانسس نے کہیا:‏ ”‏جدوں وی مینوں نئیں پتہ ہوندا سی کہ میرا شوہر کتھے وے تے مَیں پریشان ہو جانی ساں۔ مَیں پورا دن بے چین رہنی ساں۔“‏ کجھ بیویاں نے دَسیا اے کہ اوہ اوس ویلے بڑی شرمندگی محسوس کردیاں نیں جدوں اوہ ایہو جہے بھین بھراواں نال ہوندیاں نیں جنہاں نُوں اوہناں دے شوہر دے مسئلے بارے پتہ ہوندا اے۔ تے کجھ اپنے آپ نُوں بڑا کلّا محسوس کردیاں نیں کیونکہ اوہناں نُوں لگدا اے کہ کوئی نئیں سمجھ سکدا کہ اوہناں تے کیہہ بیت رہی اے۔‏

ایہو جہیاں گلاں دل چ آ سکدیاں نیں۔ پر جے تُسی ہر ویلے ایہناں بارے سوچدے رہوو گے تے تواڈی پریشانی ودھے گی۔ ایس لئی ایہناں گلاں بارے سوچن دی بجائے یہوواہ نال اپنی دوستی تے دھیان دَوو۔ اِنج کرن نال توانوں ہمت ملے گی۔—‏زبور 62:‏2؛‏ اِفسیوں 6:‏10‏۔‏

ایس حوالے نال تُسی بائبل چوں ایہو جہیاں عورتاں بارے پڑھ سکدے او تے اوہناں دی مثال تے سوچ وچار کر سکدے او جنہاں نُوں یہوواہ کولوں دُعا کرن نال بوہت تسلی ملی۔ یہوواہ نے ہمیشاں اوہناں دِیاں مشکلاں نُوں ختم تے نئیں کیتا پر اوہنے اوہناں نُوں ذہنی سکون ضرور دِتا۔ مثال لئی، حنّہ اپنے حالاتاں دی وجہ توں بوہت دُکھی سی پر فیر جدوں اوہنے بڑی دیر تک یہوواہ کولوں دُعا کیتی تے اوہنوں ذہنی سکون ملیا، بھانویں کہ اوہنوں ایہہ پتہ نئیں سی کہ اوہدے حالات بدلن گے یاں نئیں۔—‏1-‏سموئیل 1:‏10،‏ 12،‏ 18؛‏ 2-‏کُرنتھیوں 1:‏3، 4‏۔‏

اپنی کلیسیا دے بزرگاں کولوں مدد لوو کیونکہ اوہ نھیری توں پناہ تے طوفان توں لکن دی جگہ وانگوں نیں۔ (‏یسعیاہ 32:‏2‏)‏ شاید اوہ توانوں کسے ایہو جہی بھین بارے دَسن جدے نال تُسی کُھل کے اپنے دل دی گل کر سکدے او تے تسلی حاصل کر سکدے او۔—‏امثال 17:‏17‏۔‏

کیہہ تُسی گندیاں تصویراں تے فلماں ویکھن دی عادت تے قابو پان چ اپنے شوہر دی مدد کر سکدے او؟ شاید تُسی اِنج کر سکدے او۔ بائبل چ دَسیا گیا اے کہ کسے مسئلے نُوں حل کرن تے کسے طاقت‌ور دُشمن نال لڑن لئی اِک نالوں دو بہتر ہوندے نیں۔ (‏واعظ 4:‏9-‏12‏)‏ کجھ عالم کہندے نیں کہ جدوں میاں بیوی مل کے کم کردے نیں تاکہ جیہڑے ساتھی نُوں گندیاں تصویراں تے فلماں ویکھن دی عادت اے، اوہ ایس عادت نُوں چھڈ سکے  تے اکثر ایہدا بوہت فائدہ ہوندا اے تے اوہ فیر توں اِک دُوجے تے بھروسا کرن لگ پیندے نیں۔‏

پر ایہہ گل زیادہ اہم اے کہ کیہہ تواڈے جیون ساتھی دے دل چ ایس بُری عادت نُوں چھڈن دی خواہش ہے وے؟ نالے کیہہ اوہ اِنج کرن لئی قدم چُک رہیا اے؟ کیہہ اوہنے یہوواہ کولوں دُعا کیتی اے کہ اوہ اوہنوں ہمت دَوے؟ نالے کیہہ اوہنے بزرگاں کولوں وی مدد لئی اے؟ (‏2-‏کُرنتھیوں 4:‏7؛‏ یعقوب 5:‏14، 15‏)‏ کیہہ اوہنے سوچیا اے کہ اوہ آپ کیہہ کرے گا تاکہ اوہ گندیاں تصویراں تے فلماں ویکھن دے خطرے توں بچ سکے؟ مثال لئی، کیہہ اوہنے اپنے فون یاں ٹیبلٹ نُوں گھٹ استمال کرن بارے سوچیا اے؟ نالے کیہہ اوہنے ایہہ سوچیا اے کہ اوہ اوہدوں کیہہ کرے گا جدوں اوہدے سامنے گندیاں تصویراں تے فلماں ویکھن دی ازمیش آئے گی؟ (‏امثال 27:‏12‏)‏ کیہہ اوہ تواڈی مدد نُوں قبول کر رہیا اے تے توانوں سب کجھ سچ سچ دَسدا اے؟ جے اوہ اِنج کردا اے تے فیر تواڈے لئی اوہدی مدد کرنا اسان ہوئے گا۔‏

تُسی اپنے جیون ساتھی دی مدد کیویں کر سکدے او؟ ذرا اِک مثال تے غور کرو۔ بھین فلے‌شیا دی شادی ایتھن نال ہوئی سی جنہوں چھوٹی عمر توں گندیاں تصویراں تے فلماں ویکھن دی عادت سی۔ فلے‌شیا دے چنگے رویے دی وجہ توں ایتھن نُوں اوس ویلے اوہدے نال گل کرنا مشکل نئیں لگدا سی جدوں اوہدا گندیاں تصویراں تے فلماں ویکھن نُوں دل کردا سی۔ ایتھن نے کہیا:‏ ”‏مَیں اپنی بیوی نُوں ہر گل کُھل کے دَسنا واں۔ اوہ بڑے پیار نال میری مدد کردی اے تاکہ مَیں اپنی ایس غلط خواہش تے قابو پا سکاں۔ اوہ میرے کولوں پچھدی رہندی اے کہ سب کجھ کیہو جیہا چل رہیا اے۔ نالے اوہ میری مدد کردی اے کہ میں اِنٹرنیٹ نُوں حدوں ودھ استمال نہ کراں۔“‏ ایہہ گل سچ اے کہ فلے‌شیا نُوں اوہدوں بڑا دُکھ ہوندا ہوئے گا جدوں اوہدے شوہر دا گندیاں تصویراں تے فلماں ویکھن نُوں دل کردا اے۔ اوہ کہندی اے:‏ ”‏مینوں غصے تے تکلیف چ ویکھ کے میرے شوہر نُوں اپنی ایس بھیڑی عادت توں دُور رہن چ کوئی مدد نئیں مل رہی سی۔ پر جدوں اَسی مل کے اوہدے مسئلے بارے گل کیتی تے اوہنوں مدد ملی تے اوہ مینوں وی تکلیف چوں کڈھن لئی تیار ہو گیا۔“‏

ایس طرحاں کُھل کے گل بات کرن نال نہ صرف شوہر نُوں ایس بھیڑی عادت نُوں چھڈن دی ہمت مِلدی اے سگوں بیوی دا دُبارہ توں اوہدے تے بھروسا وی ودھدا اے۔ جدوں شوہر کُھل کے اپنی بیوی نُوں اپنیاں خامیاں بارے دَسدا اے نالے ایہہ وی دَسدا اے کہ اوہ کیہہ کر رہیا اے تے کتھے جا رہیا اے تے بیوی لئی اوہدے تے بھروسا کرنا اسان ہو جاندا اے کیونکہ اِنج اوہدا شوہر اوہدے توں کجھ وی لُکا نئیں رہیا ہوندا۔‏

کیہہ توانوں وی لگدا اے کہ اِنج تُسی اپنے شوہر دی مدد کر سکدے او؟ جے توانوں اِنج لگدا اے تے فیر اپنے شوہر نال مل کے ایس مضمون نُوں پڑھو تے ایہدے تے گل کرو۔ تواڈے شوہر دا ایہہ مقصد ہونا چاہی دا اے کہ اوہ گندیاں تصویراں تے فلماں نُوں ویکھنا چھڈ دَوے تے تواڈا بھروسا جتے۔ اوہنوں غصہ کرن دی بجائے ایس گل نُوں سمجھنا چاہی دا اے کہ اوہدے مسئلے دا تواڈے تے کیہہ اثر ہو رہیا اے۔ تواڈا مقصد ایہہ ہونا چاہی دا اے کہ تُسی اپنے شوہر دی ایس گندی عادت نُوں چھڈن چ مدد کرو تے اوہنوں ایہہ موقع دَوو کہ اوہ دُبارہ توں تواڈا بھروسا جت سکے۔ توانوں دونواں نُوں ای ایہہ جانن دی لوڑ اے کہ لوک گندیاں تصویراں تے فلماں نُوں ویکھن دی عادت چ کیوں پے جاندے نیں تے ایس عادت نُوں چھڈن لئی کیہہ کیتا جا سکدا اے۔‏ d

 جے توانوں ڈر اے کہ ایس گل دی وجہ توں تواڈے دونواں دی لڑائی ہو سکدی اے تے تُسی کسے ایہو جہے بزرگ کولوں مدد لے سکدے او جدے نال گل کرنا توانوں دونواں نُوں اسان لگدا اے۔ تُسی اوہنوں کہہ سکدے او کہ اوہ گل بات دے دوران تواڈے نال ہووے۔ ایہہ گل یاد رکھو کہ جے تواڈا جیون ساتھی ایس عادت تے قابو پا وی لیندا اے تے فیر وی توانوں اوہدے تے دُبارہ توں بھروسا کرن چ وقت لگے گا۔ پر ہمت نہ ہارو۔ ایس گل تے غور کردے رہوو کہ تواڈے رشتے چ کیویں بہتری آئی اے۔اُمید رکھو کہ وقت دے نال نال تے صبر وکھان نال تواڈی شادی‌شُدہ زندگی فیر توں بہتر ہو جائے گی۔—‏واعظ 7:‏8؛‏ 1-‏کُرنتھیوں 13:‏4‏۔‏

جے تواڈا شوہر کجھ عرصے بعد فیر توں گندیاں تصویراں تے فلماں ویکھن لگ پیندا اے تے کیہہ ایہدا مطلب ایہہ وے کہ اوہ کدی نئیں بدل سکدا؟ ایہہ گل نئیں اے۔ ہو سکدا اے کہ اوہنوں اپنی ایس عادت تے قابو پان لئی ساری زندگی محنت کرنی پووے، خاص کر جے اوہدی ایہہ عادت بڑی پرانی اے۔ ایس عادت نُوں چھڈن توں کئی سال بعد وی اوہ ایس خطرے چ دُبارہ پے سکدا اے۔ ایس لئی اوہنوں ہور محنت نال اوہ سارے کم کردے رہنے چاہی دے نیں جیہڑے اوہ گندیاں تصویراں تے فلماں نُوں چھڈن لئی کر رہیا سی، فیر بھانویں اوہنوں لگے کہ اوہنے اپنی ایس عادت تے قابو پا لیا اے۔ (‏امثال 28:‏14؛‏ متی 5:‏29؛‏ 1-‏کُرنتھیوں 10:‏12‏)‏ اوہنوں اپنی سوچ نُوں نواں بناندے رہنا چاہی دا اے تے بدی توں نفرت کرنی چاہی دی اے۔ ایس بدی چ گندیاں تصویراں تے فلماں ویکھنا تے اپنے ہتھاں نال اپنے جنسی حصیاں نُوں چھیڑنا تے ایہو جہے ہور بھیڑے کم کرنا شامل نیں۔ (‏اِفسیوں 4:‏23؛‏ زبور 97:‏10؛‏ رومیوں 12:‏9‏)‏ کیہہ اوہ ایس عادت تے قابو پان لئی ایہہ سارے کم کرن لئی تیار اے؟ جے اوہ تیار اے تے فیر اوہ ہولی ہولی ایس عادت تے قابو پا لوے گا۔‏ e

جے تواڈا جیون ساتھی ایس عادت نُوں نئیں چھڈنا چاہندا تے تُسی کیہہ کر سکدے او؟ ظاہری جہی گل اے کہ تُسی افسردہ ہو جاؤ گے، توانوں غصہ آئے گا تے توانوں اِنج لگے گا جیویں توانوں دھوکھا دِتا گیا اے۔ ذہنی سکون حاصل کرن لئی معاملے نُوں یہوواہ دے ہتھ وچ چھڈ دَوو۔ (‏1-‏پطرس 5:‏7‏)‏ ذاتی مطالعیا، سوچ وچار تے دُعا کرن نال یہوواہ دے نیڑے ہوندے جاؤ۔ اِنج کردے ویلے یقین رکھو کہ یہوواہ وی تواڈے نیڑے آ رہیا اے۔ یسعیاہ 57:‏15 چ دَسیا گیا اے کہ یہوواہ اوہناں نال رہندا اے جیہڑے کچلے ہوئے تے خاکسار نیں تے اوہ اوہناں دی مدد کردا اے تاکہ اوہ فیر توں خوشی حاصل کر سکن۔ چنگا مسیحی بنن دی پوری کوشش کرو، بزرگاں کولوں مدد لوو تے ایس گل دی امید رکھو کہ اِک دن تواڈا شوہر اپنے آپ نُوں بدل لوے گا۔—‏رومیوں 2:‏4؛‏ 2-‏پطرس 3:‏9‏۔‏