1.‏ توانوں ایہو جہے لوک کیوں چنگے لگدے نیں جیہڑے صبر نال کم لیندے نیں؟‏

 سانوں ساریاں نُوں اوہ لوک بڑے چنگے لگدے نیں جیہڑے صبر نال کم لیندے نیں۔ اَسی اوہناں لوکاں دی بڑی عزت کرنے آں جیہڑے تنگ پئے بغیر اِنتظار کردے نیں۔ جدوں اَسی غلطیاں کرنے آں تے دُوجے اوس ویلے وی ساڈے نال صبر نال پیش آندے نیں تے سانوں بڑا اچھا لگدا اے۔ نالے جیس بھین یاں بھرا نے سانوں بائبل کورس کرایا سی، اَسی اوہدے وی بڑے شکرگزار آں کیونکہ اوہ اوس ویلے ساڈے نال صبر نال پیش آیا جدوں سانوں بائبل دی کسے تلیم نُوں سکھنا، ایہنوں قبول کرنا تے ایہدے تے عمل کرنا مشکل لگ رہیا سی۔ ساریاں توں وَدھ کے اَسی یہوواہ دے شکرگزار آں کیونکہ اوہ ساڈے نال بڑے صبر نال پیش آندا اے۔—‏رومیوں 2:‏4‏۔‏

2.‏ سانوں کیہڑے معاملیاں چ صبر وکھانا مشکل لگ سکدا اے؟‏

² ایہہ گل سچ اے کہ جدوں اَسی ویکھنے آں کہ دُوجے کِنّے صبر نال کم لے رہے نیں تے سانوں بڑا اچھا لگدا اے۔ پر ہو سکدا اے کہ سانوں آپ صبر نال کم لینا ہمیشاں آسان نہ لگے۔ مثال لئی، جے اَسی کِتے پونچنا اے تے اَسی ٹریفک چ پھس گئے آں تے ہو سکدا اے کہ اوس ویلے ساڈے لئی صبر وکھانا مشکل ہو جائے۔ ہو سکدا اے کہ کوئی سانوں تنگ کرے تے سانوں غصہ آ جائے۔ تے کدی کدار ایہہ وی ہو سکدا اے کہ سانوں صبر نال نوِیں دُنیا دا اِنتظار کرنا مشکل لگے۔ کیہہ تُسی اپنے اندر ہور زیادہ صبر پیدا کرنا چاہندے او؟ ایس مضمون چ اَسی ویکھاں گے کہ صبر نال کم لین دا کیہہ مطلب اے تے اِنج کرنا ایناں ضروری کیوں اے۔ نالے اَسی ایہہ وی ویکھاں گے کہ اَسی اپنے اندر ہور زیادہ صبر پیدا کرن لئی کیہہ کر سکنے آں۔‏

3.‏ صبر نال کم لین والا بندہ اوس ویلے کیہہ کردا اے جدوں دُوجے اوہنوں غصہ دَواندے نیں؟‏

³ ذرا صبر وکھان دے چار طریقیاں تے غور کرو۔ پہلا ایہہ وے کہ جیہڑا بندہ صبر نال کم لیندا اے، اوہ چھیتی غصہ نئیں کردا‏۔ جدوں دُوجے اوہنوں غصہ دَواندے نیں تے اوہ اوس ویلے ٹھنڈا رہن دی کوشش کردا اے۔ نالے اِک دِیاں چار نئیں سناندا۔ جدوں اوہ اپنی کسے مشکل دی وجہ توں پریشان ہوندا اے تے اوہ دُوجیاں نال بُرے طریقے نال پیش نئیں آندا۔ اِصطلا‌ح ”‏غصہ کرن چ دھیما“‏ بائبل چ  سب توں پہلاں یہوواہ لئی استمال ہوئی اے۔ یہوواہ نُوں رحم‌دل تے مہربان خدا، غصہ کرن چ دھیما تے شفقت تے وفا چ غنی کہیا گیا اے۔—‏خروج 34:‏6‏۔‏

4.‏ صبر کرن والا بندہ اوس ویلے کیہہ کردا اے جدوں اوہنوں اِنتظار کرنا پیندا اے؟‏

⁴ دُوجا طریقہ ایہہ وے کہ صبر کرن والا بندہ سکون تے تسلی نال اِنتظار کردا اے‏۔ جے کسے کم چ دیر ہو جاندی اے تے اوہ اَکدا تھکدا نئیں اے۔ (‏متی 18:‏26، 27‏)‏ ایہو جہے کئی معاملے نیں جنہاں چ سانوں صبر نال اِنتظار کرن دی لوڑ ہوندی اے۔ مثال لئی، جدوں دُوجے گل کر رہے ہوندے نیں تے سانوں اوہناں دی گل ٹوکے بغیر صبر نال سننا چاہی دا اے۔ (‏ایوب 36:‏2‏)‏ سانوں اوہدوں وی صبر نال کم لینا چاہی دا اے جدوں اَسی بائبل کورس کرن والے کسے بندے دی مدد کر رہے ہُنے آں کہ اوہ بائبل دی کسے سچائی نُوں سمجھے یاں کسے بُری عادت تے قابو پائے۔‏

5.‏ صبر ظاہر کرن دا اِک ہور طریقہ کیہہ اے؟‏

⁵ تیجا طریقہ ایہہ وے کہ صبر نال کم لین والا بندہ کالیاں نئیں کردا۔‏ ایہہ گل سچ اے کہ کجھ معاملیاں چ فوراً قدم چُکنا ضروری ہوندا اے۔ پر جدوں صبر کرن والے بندے نُوں کوئی خاص کم کرنا پیندا اے تے نہ ای اوہ اوہنوں کالیاں چ شروع کردا اے تے نہ ای کالیاں چ مکاندا اے۔ ایہدی بجائے اوہ وقت کڈھ کے پہلاں توں سوچدا اے کہ اوہ کوئی کم کیویں کرے گا تے فیر اوس کم نُوں چنگی طرحاں کرن لئی پورا وقت لاندا اے۔‏

6.‏ صبر نال کم لین والا بندہ اوس ویلے کیہہ کردا اے جدوں اوہنوں مشکلاں دا سامنا ہوندا اے؟‏

⁶ چوتھا طریقہ ایہہ وے کہ صبر کرن والا بندہ شکایت کیتے بغیر مشکلاں نُوں برداشت کردا اے۔‏ ایس لحاظ نال صبر دا ثابت‌قدمی نال گُوڑھا تعلق اے۔ جے تُسی اپنے کسے قریبی دوست نُوں کُھل کے دَسدے او کہ تُسی کسے مشکل بارے کیہو جیہا محسوس کر رہے او تے ایہہ غلط نئیں اے۔ پر صبر کرن والا بندہ مشکلاں نُوں برداشت کردے ویلے اپنی سوچ نُوں صحی رکھن دی کوشش کردا اے۔ (‏کُلسّیوں 1:‏11‏)‏ کیونکہ اَسی یہوواہ دے بندے آں ایس لئی سانوں ایہناں ساریاں طریقیاں نال صبر ظاہر کرنا چاہی دا اے۔ آؤ غور کرنے آں کہ سانوں اِنج کیوں کرنا چاہی دا اے۔‏

7.‏ یعقوب 5:‏7، 8 دے مطابق صبر وکھانا ایناں ضروری کیوں اے؟ (‏تصویر نُوں وی ویکھو۔)‏

⁷ نجات حاصل کرن لئی صبر وکھانا بوہت ضروری اے۔ ماضی دے خدا دے بندیاں وانگوں سانوں وی صبر نال خدا دے وعدیاں دے پورا ہون دا اِنتظار کرنا چاہی دا اے۔ (‏عبرانیوں 6:‏11، 12‏)‏ بائبل چ دَسیا گیا اے کہ ساڈی صورتحال اِک کسان وانگوں اے۔ ‏(‏یعقوب 5:‏7، 8 نُوں پڑھو۔)‏ اِک کسان بیہہ نُوں بیجن لئی تے ایہنوں پانی دین لئی بوہت محنت کردا اے۔ اوہنوں ایہہ تے نئیں پتہ ہوندا کہ ایہہ کدوں وَدھے گا پر اوہنوں ایس گل دا یقین ضرور ہوندا کہ اوہ اِک دن ضرور فصل وڈھے گا۔ ایس لئی اوہ صبر نال اِنتظار کردا اے۔ ایسے طرحاں سانوں نئیں پتہ کہ ساڈا ”‏مالک کیہڑے دن آئے گا۔“‏ (‏متی 24:‏42‏)‏ پر فیر وی اَسی محنت نال خدمت کردے رہنے آں۔ اَسی صبر نال اِنتظار کرنے آں تے ایس گل دا یقین رکھنے آں کہ صحی وقت تے یہوواہ اپنے سارے وعدے پورے کرے گا۔ جے اَسی صبر کرنا چھڈ دَواں گے تے ہو سکدا اے کہ اَسی اِنتظار کردے کردے تھک جائیے تے ہولی ہولی یہوواہ توں دُور ہو جائیے۔ شاید اَسی ایہو جہیاں چیزاں دے پچھے بھجن لگ پئیے جنہاں نال سانوں بس تھوڑی دیر دی خوشی مِلدی اے۔ پر جے اَسی صبر نال کم لواں گے تے اَسی آخر تک اپنے ایمان تے ڈٹے رہواں گے تے نجات پانواں گے۔—‏میکاہ 7:‏7؛‏ متی 24:‏13‏۔‏

8.‏ دُوجیاں نال چنگے تعلقات رکھن چ صبر دی خوبی ساڈے کم کیویں آندی اے؟ (‏کُلسّیوں 3:‏12، 13‏)‏

⁸ دُوجیاں نال چنگے تعلقات رکھن چ صبر دی خوبی ساڈے بڑے کم آندی اے۔ ایہہ ساڈی مدد کردی اے کہ جدوں دُوجے گل کر رہے ہون تے اَسی اوہناں دی گل دھیان نال سنیے۔ (‏یعقوب 1:‏19‏)‏ ایس خوبی دی وجہ توں اَسی دُوجیاں نال صلح صفائی نال رہ سکنے آں۔ تے جدوں اَسی کسے مشکل دی وجہ توں پریشان ہُنے آں تے ایہہ خوبی ساڈی مدد کردی اے کہ اَسی فوراً کوئی ایہو جیہا کم یاں گل نہ کریئے جدے توں دُوجیاں نُوں دُکھ پونچے۔ جے اَسی صبر نال کم لواں گے تے اَسی اوس ویلے فوراً غصے چ نئیں آواں گے جدوں کوئی ساڈا دل دُکھاندا اے۔ اَسی بدلہ لین دی بجائے برداشت کراں گے تے اوہنوں دلوں معاف کراں گے۔‏‏—‏کُلسّیوں 3:‏12، 13 نُوں پڑھو۔‏

9.‏ فیصلے کردے ویلے صبر دی خوبی ساڈے کم کیویں آندی اے؟ (‏امثال 21:‏5‏)‏

⁹ صبر دی خوبی چنگے فیصلے کرن چ وی ساڈی مدد کردی اے۔ جے اَسی صبر نال کم لواں گے تے اَسی فیصلے کردے ویلے کالی نئیں کراں گے۔ سگوں اَسی سوچ وچار کراں گے کہ ساڈے کول مسئلے دے کیہڑے کیہڑے حل موجود نیں تے فیر فیصلہ کراں گے کہ اوہناں وچوں کیہڑا بہتر اے۔ ‏(‏امثال 21:‏5 نُوں پڑھو۔)‏ مثال لئی، جے اَسی نوکری لبھ رہے آں تے شاید اَسی اوہی نوکری قبول کر لئیے جیہڑی سانوں سب توں پہلاں ملی اے؛ فیر بھانویں ایہدی وجہ توں ساڈے لئی عبادتاں تے جانا یاں مُنادی کرنا مشکل ہوئے۔ پر جے اَسی صبر نال کم لواں گے تے اَسی وقت کڈھ کے پہلاں توں سوچاں گے کہ کم دی جگہ میرے گھروں کِنّی دُور اے، مینوں کِنّے گھنٹے کم کرنا پووے گا تے ایس نوکری دا میرے گھر والیاں تے یہوواہ نال میری دوستی تے کیہہ اثر پووے گا۔ جے اَسی صبر نال کم لواں گے تے اَسی غلط فیصلہ کرن توں بچ جاواں گے۔‏

10.‏ اِک مسیحی اپنے اندر صبر دی خوبی پیدا کرن تے ایہنوں قائم رکھن لئی کیہہ کر سکدا اے؟‏

¹⁰ دُعا چ یہوواہ کولوں ہور زیادہ صبر منگو‏۔‏ صبر دی خوبی پاک روح دے پھل چ شامل اے۔ (‏گلتیوں 5:‏22، 23‏)‏ ایس لئی سانوں یہوواہ کولوں پاک روح تے مدد منگنی چاہی دی اے تاکہ اَسی اپنے اندر ایس خوبی نُوں پیدا کر سکئے۔ (‏لُوقا 11:‏9،‏ 13‏)‏ جے سانوں کسے ایہو جہی صورتحال دا سامنا ہوندا اے جدے چ ساڈے صبر دا اِمتحان ہو سکدا اے تے سانوں یہوواہ کولوں اوہدی پاک روح منگدے رہنا چاہی دا اے تاکہ اَسی صبر نال کم لے سکئے۔ اَسی یہوواہ کولوں دُعا کر سکنے آں کہ اوہ ساڈی مدد کرے کہ اَسی معاملیاں نُوں اوہدی نظر نال ویکھئے۔ فیر دُعا کرن توں بعد سانوں ہر روز صبر نال کم لین دی پوری کوشش کرنی چاہی دی اے۔ جِنّاں زیادہ اَسی یہوواہ کولوں مدد منگاں گے تے صبر ظاہر کرن دی  کوشش کراں گے، اوناں ای زیادہ ایہہ خوبی ساڈے اندر رچ وَس جائے گی تے ساڈی شخصیت دا حصہ بن جائے گی۔‏

11، 12.‏ یہوواہ نے صبر کیویں ظاہر کیتا اے؟‏

¹¹ بائبل چ دَسیاں گئیاں مثالاں تے غور کرو۔‏ بائبل چ بوہت سارے ایہو جہے لوکاں بارے دَسیا گیا اے جنہاں نے صبر نال کم لیا۔ اوہناں دی مثال تے غور کرن نال اَسی سکھ سکنے آں کہ اَسی کیہڑے طریقیاں نال صبر ظاہر کر سکنے آں۔ پر اوہناں دِیاں مثالاں تے غور کرن توں پہلاں آؤ، یہوواہ دی مثال تے غور کریئے جنہے صبر ظاہر کرن دی سب توں ودھیا مثال قائم کیتی۔‏

¹² عدن دے باغ چ شیطان نے یہوواہ دے ناں نُوں بدنام کیتا تے حوا دے دل چ ایہہ شک پایا کہ یہوواہ چنگا حکمران نئیں اے۔ یہوواہ نے فوراً شیطان نُوں ختم نئیں کیتا سگوں صبر نال کم لیا کیونکہ اوہ جان‌دا سی کہ ایہہ ثابت کرن چ کجھ وقت لگے گا کہ اوہدی حکمرانی ای سب توں وَدھیا اے۔ پر ایس گل دا اِنتظار کردے ویلے یہوواہ نے اپنے ناں تے لگے داغ نُوں وی صبر نال برداشت کیتا اے۔ ایہدے علاوہ یہوواہ صبر نال اِنتظار کر رہیا اے کہ زیادہ توں زیادہ لوکاں نُوں ہمیشاں دی زندگی حاصل کرن دا موقع ملے۔ (‏2-‏پطرس 3:‏9،‏ 15‏)‏ اوہدے صبر دی وجہ توں لکھاں لوکاں نُوں اوہدے بارے سکھن دا موقع ملیا اے۔ جدوں اَسی ایس گل تے غور کراں گے کہ یہوواہ دے صبر دی وجہ توں کیہڑے فائدے ہو رہے نیں تے سانوں وی صبر نال ایس دُنیا دے خاتمے دا اِنتظار کرنا آسان لگے گا۔‏

13.‏ یسوع نے اپنے باپ وانگوں صبر کیویں وکھایا؟ (‏تصویر نُوں وی ویکھو۔)‏

¹³ یسوع وی اپنے باپ وانگوں صبر نال کم لیندا اے تے جدوں اوہ زمین تے سی اوہدوں وی اوہنے ایس خوبی نُوں ظاہر کیتا۔ اوہنوں ہمیشاں صبر نال کم لینا آسان نئیں لگیا ہوئے گا، خاص طور تے پاکھنڈی شریعت دے عالماں تے فریسیاں دے نال۔ (‏یوحنا 8:‏25-‏27‏)‏ پر اپنے باپ وانگوں اوہ چھیتی غصہ نئیں کردا سی۔ اوہنے بے‌عزتی دے بدلے بے‌عزتی تے غصے دے بدلے غصہ نئیں کیتا۔ (‏1-‏پطرس 2:‏23‏)‏ اوہنے شکایت کیتیاں بغیر صبر نال مشکلاں نُوں برداشت کیتا۔ ایسے لئی بائبل  چ سانوں کہیا گیا اے کہ اَسی اپنا دھیان اوہدے تے رکھئے جنہے گنہگاراں دے مُونہوں بھیڑیاں گلاں برداشت کیتیاں۔ (‏عبرانیوں 12:‏2، 3‏)‏ یہوواہ دی مدد نال اَسی وی زندگی چ آن والی ہر مشکل نُوں صبر نال برداشت کر سکنے آں۔‏

14.‏ اَسی ابراہام دے صبر توں کیہہ سکھنے آں؟ (‏عبرانیوں 6:‏15‏)‏ (‏تصویر نُوں وی ویکھو۔)‏

¹⁴ شاید ساڈے وچوں کجھ سوچدے سن کہ دُنیا دا خاتمہ بوہت پہلے آ جانا چاہی دا سی۔ پر ہُن سانوں ڈر اے کہ ساڈے جیوندے جی خاتمہ نئیں آئے گا۔ کیہڑی چیز ساڈی مدد کر سکدی اے کہ اَسی صبر نال اِنتظار کردے رہیے؟ ذرا ابراہام دی مثال تے غور کرو۔ جدوں ابراہام 75 سال دا سی تے اوہدی کوئی اولاد نئیں سی۔ اوہدوں یہوواہ نے اوہدے نال ایہہ وعدہ کیتا:‏ مَیں تینوں اِک وڈی قوم بنانواں گا۔ (‏پیدایش 12:‏1-‏4‏)‏ ابراہام نے مکمل طور تے ایس وعدے نُوں پورا ہوندیاں نئیں ویکھیا۔ دریائے فرات پار کرن تے 25 سال اِنتظار کرن توں بعد ابراہام دا پُتر اِضحاق پیدا ہویا تے ایہدے ہور 60 سالاں بعد اوہدے پوترے یعقوب تے عیسو پیدا ہوئے۔ ‏(‏عبرانیوں 6:‏15 نُوں پڑھو۔)‏ پر ابراہام نے اپنی نسل نُوں اِک وڈی قوم بن‌دیاں تے اوس ملک چ جاندیاں نئیں ویکھیا جنہوں دین دا وعدہ یہوواہ نے کیتا سی۔ پر اوہدی اپنے خالق یہوواہ نال گُوڑھی دوستی سی۔ (‏یعقوب 2:‏23‏)‏ مستقبل چ جدوں ابراہام زندہ ہوئے گا تے اوہنوں ایہہ ویکھ کے کِنّی خوشی ہوئے گی کہ اوہدے ایمان تے صبر دی وجہ توں زمین دِیاں ساریاں قوماں نُوں برکت ملی اے۔ (‏پیدایش 22:‏18‏)‏ ایہدے توں اَسی کیہہ سکھنے آں؟ ہو سکدا اے کہ اَج اَسی یہوواہ دے سارے وعدیاں نُوں اپنیاں اکھاں سامنے پورا ہوندیاں نہ ویکھ سکئے۔ پر جے اَسی ابراہام وانگوں صبر نال کم لواں گے تے اَسی ایس گل دا یقین رکھ سکاں گے کہ یہوواہ نہ صرف ہُن سگوں نوِیں دُنیا چ وی سانوں ساڈے صبر دا انعام دَوے گا۔—‏مرقس 10:‏29، 30‏۔‏

15.‏ اَسی اپنے ذاتی مطالعے چ کیہڑی گل تے غور کر سکنے آں؟‏

 ¹⁵ بائبل چ ہور وی ایہو جہے لوکاں دِیاں مثالاں نیں جنہاں نے صبر ظاہر کیتا۔ (‏یعقوب 5:‏10‏)‏ کیوں نہ اَسی اپنے ذاتی مطالعے چ اوہناں دِیاں مثالاں تے غور کریئے؟‏ b مثال لئی، جدوں یہوواہ نے داؤد نُوں اِسرائیل دا بادشاہ بنن لئی چنیا تے اوہدوں اوہ بوہت چھوٹا سی۔ پر حکومت شروع کرن لئی اوہنوں کئی سال اِنتظار کرنا پیا۔ شمعون تے حنّہ مسیح دا اِنتظار کردیاں ہوئیاں وفاداری نال یہوواہ دی خدمت کردے رہے۔ (‏لُوقا 2:‏25،‏ 36-‏38‏)‏ جدوں تُسی ایہناں واقعیاں بارے پڑھدے او تے ایہناں سوالاں دے جواب لبھن دی کوشش کرو:‏ کیہڑی چیز نے صبر نال کم لین چ ایس بندے دی مدد کیتی؟ صبر نال کم لین دی وجہ توں اوہنوں کیہہ فائدہ ہویا؟ مَیں اوہدی مثال تے کیویں عمل کر سکنا واں؟ توانوں اوہناں لوکاں بارے جان کے وی فائدہ ہوئے گا جنہاں نے صبر نال کم نئیں لیا۔ (‏1-‏سموئیل 13:‏8-‏14‏)‏ تُسی اپنے آپ کولوں پچھ سکدے او:‏ ”‏کیہڑی وجہ توں اوہناں لوکاں نے صبر نئیں وکھایا؟ ایس وجہ توں اوہناں نُوں کیہڑے نتیجے بُھگتنے پئے؟“‏

16.‏ صبر نال کم لین توں کیہڑے فائدے ہوندے نیں؟‏

¹⁶ صبر نال کم لین دے فائدیاں تے غور کرو۔‏ جدوں اَسی صبر نال کم لینے آں تے اَسی زیادہ خوش تے پُرسکون رہ پانے آں۔ ایہدی وجہ توں سانوں ذہنی سکون مِلدا اے تے ساڈی صحت وی چنگی رہندی اے۔ جدوں اَسی دُوجیاں نال صبر نال پیش آنے آں تے ساڈے اوہناں نال تعلقات چنگے رہندے نیں۔ ایہدے علاوہ ساڈی کلیسیا دا وی ایکا مضبوط ہوندا جاندا اے۔ جدوں کوئی سانوں غصہ دَواندا اے تے اَسی آپے توں باہر نئیں ہوندے تے اِنج معاملہ وگڑن توں بچ جاندا اے۔ (‏زبور 37:‏8؛‏ امثال 14:‏29‏)‏ سب توں وَدھ کے صبر وکھان نال اَسی اپنے اسمانی باپ یہوواہ دی مثال تے عمل کر رہے ہُنے آں تے اوہدے ہور نیڑے ہو جانے آں۔‏

17.‏ سانوں کیہہ عزم کرنا چاہی دا اے؟‏

¹⁷ صبر کِنّی ودھیا خوبی اے تے ایہدے توں سانوں کِنّاں فائدہ ہوندا اے!‏ساڈے لئی ہمیشاں صبر ظاہر کرنا آسان تے نئیں ہوندا۔ پر یہوواہ دی مدد نال اَسی ایس خوبی نُوں نکھار سکنے آں۔ صبر نال نوِیں دُنیا دا اِنتظار کردے ویلے اَسی ایس گل دا یقین رکھ سکنے آں کہ یہوواہ دی نگاہ اوہدے توں ڈرن والیاں تے وے جیہڑے اوہدی شفقت پان دی امید رکھدے نیں۔ (‏زبور 33:‏18‏)‏ آؤ اَسی ایہہ عزم کریئے کہ اَسی صبر دی خوبی نُوں نکھاردے رہواں گے۔‏