1.‏ زندگی دی دوڑ نُوں پورا کرن لئی عبرانیوں 12:‏1 دے مطابق سانوں کیہہ کرنا چاہی دا اے؟‏

 بائبل چ دَسیا گیا اے کہ مسیحیاں دے طور تے ساڈی زندگی اِک دوڑ وانگوں اے۔ جیہڑے کھیڈاری ایس دوڑ نُوں پورا کر لین گے، اوہناں نُوں انعام چ ہمیشاں دی زندگی ملے گی۔ (‏2-‏تیمُتھیُس 4:‏7، 8‏)‏ سانوں پوری کوشش کرنی چاہی دی اے کہ اَسی ایس دوڑ چ دوڑدے رہیے کیونکہ ایہہ دوڑ بوہت چھیتی ختم ہون والی اے۔ پولُس رسول زندگی دی دوڑ نُوں پورا کرن چ کامیاب ہویا سی تے اوہنے دَسیا سی کہ کیہڑی چیز ایس دوڑ نُوں جتن چ ساڈی مدد کرے گی۔ اوہنے کہیا سی کہ اَسی ہر طرحاں دے بوجھ نُوں لا کے سُٹ دَئیے تے ثابت قدمی نال اوس دوڑ چ دوڑدے رہیے جیہڑی اَسی دوڑنی اے۔—‏عبرانیوں 12:‏1 نُوں پڑھو۔‏

2.‏ ہر طرحاں دے بوجھ نُوں لا کے سُٹن دا کیہہ مطلب اے؟‏

² جدوں پولُس نے کہیا کہ سانوں ہر طرحاں دے بوجھ نُوں لا کے سُٹ دینا چاہی دا اے تے کیہہ اوہدا مطلب ایہہ سی کہ مسیحیاں نُوں کسے طرحاں دا وی بھار نئیں چُکنا چاہی دا؟ ایہہ گل نئیں اے۔ اصل چ اوہ ایہہ کہنا چاہ رہیا سی کہ سانوں ہر طرحاں دے فالتو بوجھ نُوں لا کے سٹنا اے کیونکہ ایہدی وجہ توں ساڈی رفتار گھٹ ہو سکدی اے تے اَسی تھک سکنے آں۔ ثابت‌قدم رہن لئی ایہہ بوہت ضروری اے کہ اَسی ویکھئے کہ کیہڑیاں چیزاں فالتو بوجھ نیں تے اوہناں نُوں لا کے سُٹ دَئیے۔ پر ایہدے نال نال سانوں ایہو جہے بھار نُوں چُکن توں جان نئیں چھڈانی چاہی دی جنہوں چُکنا ساڈے لئی ضروری اے۔ جے اَسی ضروری بھار نئیں چُکاں گے تے اَسی دوڑ توں باہر ہو جاواں گے۔ (‏2-‏تیمُتھیُس 2:‏5‏)‏ کیہڑیاں ذمے‌داریاں دا بھار چُکنا ساڈے لئی ضروری اے؟‏

3.‏ (‏الف)‏ گلتیوں 6:‏5 دے مطابق کیہڑا بھار چُکنا ساڈے لئی ضروری اے؟ (‏ب)‏ ایس مضمون چ اَسی کیس بارے گل کراں گے تے کیوں؟‏

³ گلتیوں 6:‏5 نُوں پڑھو۔‏ پولُس رسول نے اِک ایہو جہے بھار بارے گل کیتی جنہوں چُکنا ساڈے  لئی بوہت ضروری اے۔ اوہنے کہیا:‏ ہر کوئی اپنی ذمے‌داری دا بھار آپ چُکے گا۔ ایتھے پولُس ساڈی ذاتی ذمے‌داریاں دے بھار دی گل کر رہیا سی یعنی اوہناں کماں دی ذمے‌داری جیہڑے یہوواہ چاہندا اے کہ اَسی کریئے۔ ایہہ اِک ایہو جیہا کم اے جیہڑا ساڈے لئی کوئی ہور نئیں کر سکدا۔ ایس مضمون چ اَسی ویکھاں گے کہ اپنی ذمے‌داری دے بھار چ کیہہ کجھ شامل اے تے اَسی ایہنوں کیویں چُک سکنے آں۔ اَسی ایہو جہے فالتو بوجھ بارے وی گل کراں گے جیہڑا شاید اَسی چُکیا ہویا اے تے ویکھاں گے کہ اَسی ایہنوں کیویں لا کے سُٹ سکنے آں۔ اپنیاں ذمے‌داریاں دا بھار چُکن تے فالتو بوجھ نُوں لا کے سُٹن نال اَسی زندگی دی دوڑ چ کامیابی نال دوڑدے رہواں گے۔‏

4.‏ اپنی زندگی یہوواہ دے ناں کرن دا وعدہ اِک بوجھ کیوں نئیں اے؟ (‏تصویر نُوں وی ویکھو۔)‏

⁴ اپنی زندگی یہوواہ دے ناں کرن دا وعدہ۔‏ جدوں اَسی اپنی زندگی یہوواہ دے ناں کیتی سی تے اَسی ایہہ وعدہ کیتا سی کہ اَسی ہمیشاں تک اوہدی عبادت کراں گے تے اوہدی مرضی تے چلاں گے۔ ایس وعدے نُوں پورا کرنا بوہت ضروری اے۔ ایس وعدے دے مطابق زندگی گزارنا اِک بوہت وڈی ذمے‌داری اے۔ پر ایہہ بوجھ نئیں اے۔ اصل چ یہوواہ نے سانوں اِنج بنایا اے کہ اَسی اوہدی مرضی تے چل سکئے۔ (‏مکاشفہ 4:‏11‏)‏ اوہنے ساڈے دل چ ایہہ خواہش پائی اے کہ اَسی اوہنوں جانیے تے اوہدی  عبادت کریئے نالے اوہنے سانوں اپنی صورت تے بنایا اے۔ ایس وجہ توں اَسی اوہدے نیڑے جا سکنے آں تے اوہدی مرضی تے چلن نال خوشی حاصل کر سکنے آں۔ (‏زبور 40:‏8‏)‏ ایہدے علاوہ، جدوں اَسی خدا دی مرضی دے مطابق چلنے آں تے اوہدے پُتر دے پچھے پچھے ٹُرنے آں تے سانوں ’‏تازگی مِلدی اے۔‘‏—‏متی 11:‏28-‏30‏۔‏

5.‏ تُسی یہوواہ نال کیتے وعدے نُوں کیویں پورا کر سکدے او؟ (‏1-‏یوحنا 5:‏3‏)‏

⁵ تُسی ایس ذمے‌داری دا بھار کیویں چُک سکدے او؟‏ اِنج کرن چ دو گلاں تواڈی مدد کر سکدیاں نیں۔ پہلی گل ایہہ وے کہ یہوواہ لئی اپنی محبت نُوں ودھاندے جاؤ۔ اِنج کرن لئی تُسی ایس گل تے سوچ وچار کر سکدے او کہ یہوواہ نے تواڈے لئی کیہہ کجھ کیتا اے تے اوہ مستقبل چ توانوں کیہڑیاں برکتاں دَوے گا۔ جِنّی زیادہ تواڈے دل چ یہوواہ لئی محبت ودھے گی، اوناں ای زیادہ اوہدی گل مننا تواڈے لئی آسان ہوئے گا۔ ‏(‏1-‏یوحنا 5:‏3 نُوں پڑھو۔)‏ دُوجی گل ایہہ وے کہ یسوع دی مثال تے عمل کرو‏۔‏ اوہ یہوواہ دی مرضی نُوں پورا کرن چ ایس لئی کامیاب ہویا سی کیونکہ اوہ مدد لئی یہوواہ کولوں اِلتجا کردا سی تے اوس انعام تے اپنا دھیان رکھدا سی جیہڑا اوہنوں ملنا سی۔ (‏عبرانیوں 5:‏7؛‏ 12:‏2‏)‏ یسوع وانگوں اَسی وی یہوواہ کولوں ہمت منگ سکنے آں تے ہمیشاں دی زندگی دی اُمید نُوں یاد رکھ سکنے آں۔ جدوں تُسی اپنے دل چ یہوواہ لئی محبت نُوں ودھاؤ گے تے اوہدے پُتر دی مثال تے عمل کرو گے تے تُسی یہوواہ نال کیتے وعدے نُوں پورا کر سکو گے۔‏

6.‏ سانوں اپنے گھر دِیاں ذمے‌داریاں کیوں پوریاں کرنیاں چاہی دِیاں نیں؟ (‏تصویر نُوں وی ویکھو۔)‏

⁶ گھر دِیاں ذمے‌داریاں۔‏ زندگی دی دوڑ چ دوڑدے رہن لئی ایہہ بوہت ضروری اے کہ اَسی اپنے گھر والیاں نالوں بوہتا یہوواہ تے یسوع نال پیار کریئے۔ (‏متی 10:‏37‏)‏ پر ایہدا مطلب ایہہ نئیں اے کہ اَسی ایہہ سوچ کے خاندان چ اپنیاں ذمے‌داریاں نُوں پورا کرن توں بھجئے کہ ایہناں دی وجہ توں اَسی یہوواہ تے یسوع نُوں خوش نئیں کر سکاں گے۔ سگوں جے اَسی یہوواہ تے یسوع نُوں خوش کرنا چاہنے آں تے سانوں خاندان چ اپنی ذمے‌داری نُوں پورا کرنا چاہی دا اے۔ (‏1-‏تیمُتھیُس 5:‏4،‏ 8‏)‏ جدوں اَسی اِنج کراں گے تے اَسی خوش رہ سکاں گے۔ یہوواہ جان‌دا اے کہ اِک خاندان اوسے ویلے خوش رہ سکے گا جدوں میاں بیوی اِک دُوجے لئی عزت تے پیار وکھان گے، ماں پیو پیار نال اپنے بچیاں دی تربیت کرن گے تے بچے اپنے ماں پیو دی گل منن گے۔—‏اِفسیوں 5:‏33؛‏ 6:‏1،‏ 4‏۔‏

7.‏ تُسی گھر چ اپنی ذمے‌داری نُوں کیویں پورا کر سکدے او؟‏

⁷ تُسی ایس ذمے‌داری دا بھار کیویں چُک سکدے او؟‏ بھانویں تُسی شوہر او، بیوی او یاں بچے او؛ اپنی سوچ، آلے دوالے دے لوک یاں عالماں دی بجائے بائبل چ لکھے مشوریاں تے بھروسا کرو۔ (‏امثال 24:‏3، 4‏)‏ بائبل چوں تیار کیتیاں گئیاں ویڈیوز، کتاباں تے رسالیاں توں پورا فائدہ چکو۔ ایہناں چ دَسیا جاندا اے کہ تُسی بائبل چ لکھے اصولاں تے کیویں عمل کر سکدے او۔ مثال لئی، اُردو زبان چ سلسلہ وار مضامین ”‏گھریلو زندگی کو خوش‌گوار بنائیں“‏ چ کجھ ایہو جہیاں مشکلاں تے گل کیتی گئی اے جنہاں دا میاں بیوی، ماں پیو تے نوجواناں نُوں سامنا کرنا پیندا اے۔‏ b ایس گل دا پورا عزم کرو کہ تُسی بائبل چ لکھیاں گلاں تے عمل کرو گے، اوس ویلے وی جدوں تواڈے گھر دے دُوجے جی اِنج نئیں کردے۔ جے تُسی اِنج کرو گے تے سارے گھر والیاں نُوں فائدہ ہوئے گا تے یہوواہ توانوں برکتاں دَوے گا۔—‏1-‏پطرس 3:‏1، 2‏۔‏

8.‏ ساڈے فیصلیاں دا ساڈی زندگی تے کیہہ اثر پیندا اے؟‏

⁸ ساڈے فیصلیاں دے نتیجے۔‏ یہوواہ نے سانوں اپنی مرضی نال فیصلے کرن دی آزادی دِتی اے تے اوہ چاہندا اے کہ اَسی چنگے فیصلے کرن توں فائدہ حاصل کریئے۔ پر اوہ غلط فیصلیاں دے نتیجیاں توں سانوں بچاندا نئیں اے۔ ایس لئی سانوں اپنے غلط فیصلیاں، سوچے سمجھے بغیر کیتیاں گئیاں گلاں تے کالیاں چ کیتے گئے کماں دے نتیجے بُھگتنے پیندے نیں۔ (‏گلتیوں 6:‏7، 8‏)‏ ساڈے کسے کم دی وجہ توں ساڈا ضمیر سانوں تنگ کر سکدا  اے۔ پر جے سانوں پتہ ہوئے گا کہ اَسی اپنے فیصلیاں دے آپ ذمے‌دار آں تے اَسی اپنیاں غلطیاں نُوں مناں گے، اوہناں نُوں سدھاراں گے تے اوہناں نُوں دہران توں بچ جاواں گے۔ ایہہ کم ساڈی مدد کرن گے کہ اَسی زندگی دی دوڑ چ دوڑدے رہیے۔‏

9.‏ جے تُسی کوئی غلط فیصلہ کر بیٹھے او تے تُسی کیہہ کر سکدے او؟ (‏تصویر نُوں وی ویکھو۔)‏

⁹ تُسی ایس ذمے‌داری دا بھار کیویں چُک سکدے او؟‏ جے تُسی کوئی غلط فیصلہ کر بیٹھے او تے تُسی کیہہ کر سکدے او؟ ایس گل نُوں سمجھن دی کوشش کرو کہ جو کجھ ہو گیا اے، تُسی اوہنوں بدل نئیں سکدے۔ اپنا وقت تے طاقت پچھتان چ، اپنے آپ نُوں صحی ثابت کرن چ یاں دُوجیاں نُوں اِلزام دین چ ضائع نہ کرو۔ ایہدی بجائے اپنیاں غلطیاں نُوں منو تے صورتحال نُوں بہتر کرن لئی جو کجھ کر سکدے او، کرو۔ جے تُسی اپنی کسے غلطی تے شرمندہ او تے خاکساری نال یہوواہ کولوں دُعا کرو، اپنی غلطی نُوں منو تے اوہدے کولوں معافی لئی اِلتجا کرو۔ (‏زبور 25:‏11؛‏ 51:‏3، 4‏)‏ اوہناں لوکاں کولوں وی معافی منگو جنہاں دے خلاف تُسی غلطی کیتی اے۔ نالے جے ضروری ہوئے تے بزرگاں کولوں وی مدد لوو۔ (‏یعقوب 5:‏14، 15‏)‏ اپنیاں غلطیاں توں سکھو تے ایہناں نُوں دہران توں بچو۔ اِنج کرن نال تُسی ایس گل دا یقین رکھ سکو گے کہ یہوواہ تواڈے تے رحم کرے گا تے توانوں اوہ مدد دَوے گا جدی توانوں ضرورت اے۔—‏زبور 103:‏8-‏13‏۔‏

10.‏ اپنے آپ کولوں حد توں زیادہ کرن دی توقع رکھنا اِک بوجھ وانگوں کیوں اے؟ (‏گلتیوں 6:‏4‏)‏

¹⁰ حد توں زیادہ کرن دی توقع رکھنا۔‏ جدوں اَسی اپنا مقابلہ دُوجیاں نال کرنے آں تے اَسی اپنے آپ کولوں حد توں زیادہ کرن دی توقع کرن لگ پینے آں۔ اِنج اَسی اپنے اُتے فالتو بوجھ پا رہے ہُنے آں۔ ‏(‏گلتیوں 6‏:‏4نُوں پڑھو۔)‏ جے اَسی ہر ویلے اپنا مقابلہ دُوجیاں نال کردے رہواں گے تے ہو سکدا اے کہ اَسی اوہناں کولوں سڑن لگ پئیے تے اوہناں توں اَگے ودھن دی کوشش کریئے۔ (‏گلتیوں 5:‏26‏)‏ جے اَسی دُوجیاں دے ویکھا ویکھی اوہ کم کرن دی کوشش کرنے آں جیہڑے ساڈے وسوں باہر نیں تے اَسی اپنے آپ نُوں نقصان پونچا رہے ہُنے آں۔ بائبل چ دَسیا گیا اے کہ جیہڑی امید وقت تے پوری نہ ہوئے اوہ دل نُوں بیمار کر دیندی اے۔ ہُن ذرا سوچو کہ سانوں اوہدوں کِنّی تکلیف ہوئے گی جدوں اَسی اپنے آپ کولوں کوئی ایہو جیہا کم کرن دی امید لا رہے ہوواں گے جنہوں کرنا ساڈے وَس چ ای نئیں اے۔ (‏امثال 13:‏12‏)‏ اِنج کرن نال اَسی تھک جاواں گے تے زندگی دی دوڑ چ سُست ہو جاواں گے۔—‏امثال 24:‏10‏۔‏

11.‏ کیہڑی چیز تواڈی مدد کر سکدی اے تاکہ تُسی اپنے آپ کولوں حد توں زیادہ کرن دی توقع نہ رکھو؟‏

¹¹ تُسی ایس بوجھ نُوں کیویں لا کے سُٹ سکدے او؟‏ اپنے آپ کولوں اوس توں زیادہ کرن دی توقع نہ کرو جِنّاں یہوواہ تواڈے کولوں چاہندا اے۔ اوہ کدی وی تواڈے کولوں کوئی ایہو جیہا کم کرن دی توقع نئیں کردا جیہڑا تواڈے وَس چ نہ ہووے۔ (‏2-‏کُرنتھیوں 8:‏12‏)‏ ایس گل دا یقین رکھو کہ یہوواہ تواڈا مقابلہ دُوجیاں نال نئیں کردا۔ (‏متی 25:‏20-‏23‏)‏ اوہ تواڈی خدمت، تواڈی وفاداری تے تواڈی ثابت‌قدمی دی بڑی قدر کردا اے۔ خاکساری نال ایس گل نُوں منو کہ اپنی عمر، صحت تے حالاتاں دی وجہ توں تُسی اوہ سب کجھ نئیں کر سکدے جو تُسی کرنا چاہندے او۔ جے تواڈی عمر یاں صحت توانوں یہوواہ دی خدمت چ کوئی ذمے‌داری چُکن دی اجازت نئیں دیندی تے برزِلی وانگوں اوس ذمے‌داری نُوں قبول نہ کرو۔ (‏2-‏سموئیل 19:‏35، 36‏)‏ موسیٰ وانگوں دُوجیاں دی مدد نُوں قبول کرو تے صحی وقت تے اوہناں نُوں ذمے‌داریاں دَوو۔ (‏خروج 18:‏21، 22‏)‏ جے تُسی خاکسار ہووو گے تے فیر تُسی اپنے آپ کولوں ایہو جہے کم کرن دی توقع نئیں کرو گے جیہڑے زندگی دی دوڑ چ توانوں تھکا سکدے نیں۔‏

12.‏ کیہہ دُوجیاں دے غلط فیصلیاں دے ذمے‌دار اَسی ہُنے آں؟ وضاحت کرو۔‏

¹² اپنے آپ نُوں دُوجیاں دے غلط فیصلیاں دا ذمے‌دار سمجھنا۔‏ اَسی دُوجیاں لئی فیصلے نئیں کر سکدے تے نہ ای اَسی اوہناں نُوں غلط فیصلیاں دے نتیجیاں توں بچا سکنے آں۔ مثال لئی، ہوسکدا اے کہ کوئی نوجوان یہوواہ دی خدمت کرنا چھڈ دَوے۔ اوہدے ایس فیصلے دی وجہ توں اوہدے ماں پیو نُوں بوہت دُکھ ہوئے گا۔ پر جیہڑے ماں پیو اپنے بچیاں دے غلط فیصلیاں دے ذمے‌دار اپنے آپ نُوں سمجھدے نیں، اوہ اپنے اُتے  اِک بوجھ پا رہے ہوندے نیں۔ یہوواہ نئیں چاہندا کہ ماں پیو ایس بوجھ نُوں چُکن۔—‏رومیوں 14:‏12‏۔‏

13.‏ جدوں کوئی بچہ غلط فیصلہ کردا اے تے ماں پیو کیہہ کر سکدے نیں؟‏

¹³ تُسی ایس بوجھ نُوں کیویں لا کے سُٹ سکدے او؟‏ ایس گل نُوں سمجھو کہ یہوواہ نے سانوں ساریاں نُوں اپنی مرضی نال فیصلے کرن دی آزادی دِتی اے۔ ایہدے چ یہوواہ دی عبادت کرن یاں نہ کرن دا فیصلہ وی شامل اے۔ ماں پیو، یہوواہ جان‌دا اے کہ تُسی عیب دار او۔ اوہ بس تواڈے کولوں ایہہ چاہندا اے کہ تُسی اپنے بچیاں دی چنگی تربیت کرن دی پوری کوشش کرو۔ تواڈے بچے جیہڑے فیصلے کردے نیں؛ اوہدے ذمے‌دار اوہ آپ نیں، تُسی نئیں او۔ (‏امثال 20:‏11‏)‏ پر ہوسکدا اے کہ اپنے بچے دی تربیت کردے ویلے تواڈے کولوں کجھ غلطیاں ہوئیاں ہون۔ شاید تُسی اوہناں غلطیاں بارے سوچ سوچ کے پریشان ہوندے رہندے او۔ جے ایہہ گل اے تے یہوواہ نُوں دَسو کہ تُسی کیہو جیہا محسوس کر رہے او تے اوہدے کولوں معافی منگو۔ اوہ جان‌دا اے کہ ہُن جو کجھ ہو گیا اے، تُسی اوہنوں بدل نئیں سکدے۔ نالے اوہ تواڈے کولوں ایہہ توقع وی نئیں کردا کہ تُسی اپنے بچے نُوں اوہدے غلط فیصلیاں دے نتیجیاں توں بچاؤ۔ ایس گل نُوں یاد رکھو کہ جے تواڈا بچہ یہوواہ وَل واپس آن دی کوشش کرے گا تے یہوواہ خوشی نال اوہنوں قبول کرے گا۔—‏لُوقا 15:‏18-‏20‏۔‏

14.‏ شرمندگی دا بوجھ اِک ایہو جیہا بوجھ کیوں اے جنہوں سانوں لا کے سُٹ دینا چاہی دا اے؟‏

¹⁴ شرمندگی دا بوجھ۔‏ جدوں ساڈے کولوں کوئی گُناہ ہو جاندا اے تے ظاہری جہی گل اے کہ سانوں شرمندگی محسوس ہوندی اے۔ پر یہوواہ نئیں چاہندا کہ اَسی ہر ویلے شرمندگی دے بوجھ تھلے دبے رہیے۔ ایہہ اِک ایہو جیہا بوجھ اے جنہوں سانوں لا کے سُٹ دینا چاہی دا اے۔ اَسی کیویں جان سکنے آں کہ اَسی شرمندگی دے بوجھ تھلے دبے ہوئے آں؟ جے اَسی اپنے گُناہ دا اِقرار کر لیا اے، توبہ کر لئی اے تے پوری کوشش کر رہے آں کہ اَسی اپنے گُناہ نُوں نہ دہرائیے تے اَسی ایس گل دا یقین رکھ سکنے آں کہ یہوواہ نے سانوں معاف کر دِتا اے۔ (‏اعمال 3:‏19‏)‏ پر جے ایہہ سارے کم کرن توں بعد وی سانوں شرمندگی محسوس ہوندی رہندی اے تے ایہدا مطلب اے کہ اَسی حالے تک ایہہ بوجھ چُکیا ہویا اے تے یہوواہ نئیں چاہندا کہ اَسی ایس بوجھ تھلے دبے رہیے۔ اوہ جان‌دا اے کہ ایس بوجھ نُوں چُکن نال سانوں نقصان ہوندا اے۔ (‏زبور 31:‏10‏)‏  جے اَسی ایس بوجھ دی وجہ توں مایوس رہواں گے تے شاید اَسی زندگی دی دوڑ چ ہمت ہار جائیے۔—‏2-‏کُرنتھیوں 2:‏7‏۔‏

15.‏ جے اَسی شرمندگی دے بوجھ تھلے دبے ہوئے آں تے کیہڑی چیز اوہدے چوں نِکلن چ ساڈی مدد کر سکدی اے؟ (‏1-‏یوحنا 3:‏19، 20‏)‏ (‏تصویر نُوں وی ویکھو۔)‏

¹⁵ تُسی ایس بوجھ نُوں کیویں لا کے سُٹ سکدے او؟‏ جے تُسی شرمندگی دے بوجھ تھلے دبے ہوئے او تے ایس گل تے دھیان دَوو کہ یہوواہ دلوں معاف کردا اے۔ (‏زبور 130:‏4‏)‏ جدوں اوہ کسے ایہو جہے بندے نُوں معاف کر دیندا اے جنہے دلوں توبہ کر لئی اے تے اوہ وعدہ کردا اے کہ اوہ اوہدے گُناہواں نُوں دُبارہ یاد نئیں کرے گا۔ (‏یرمیاہ 31:‏34‏)‏ ایہدا مطلب اے کہ یہوواہ معاف کرن توں بعد غلطیاں نُوں بُھل جاندا اے۔ ایس لئی جے توانوں اپنیاں غلطیاں دی وجہ توں مشکلاں دا سامنا کرنا پے رہیا اے تے ایہہ نہ سوچو کہ یہوواہ نے توانوں معاف نئیں کیتا۔ جے اپنیاں غلطیاں دی وجہ توں ہُن توانوں کلیسیا چ کجھ ذمے‌داریاں‌نئیں مل سکدیاں تے اپنے آپ نُوں نہ کوسو۔ جے یہوواہ تواڈے گُناہواں بارے سوچدا نئیں رہندا تے توانوں وی اِنج نئیں کرنا چاہی دا۔‏‏—‏1-‏یوحنا 3:‏19، 20 نُوں پڑھو۔‏

16.‏ زندگی دی دوڑ چ دوڑن والیاں دے طور تے سانوں کیہڑی گل سمجھنی چاہی دی اے؟‏

¹⁶ زندگی دی دوڑ چ سانوں اِنج دوڑنا چاہی دا اے کہ اَسی انعام جت سکئے۔ (‏1-‏کُرنتھیوں 9:‏24‏)‏ اِنج کرن لئی سانوں ایہہ سمجھن دی لوڑ اے کہ کجھ بھار ایہو جہے نیں جنہاں نُوں چُکنا ساڈے لئی ضروری اے۔ پر کجھ بوجھ ایہو جہے نے جنہاں نُوں سانوں لا کے سُٹ دینا چاہی دا اے۔ ایس مضمون چ اَسی کجھ ایہو جہیاں چیزاں تے غور کیتا جنہاں دا بھار سانوں چُکنا چاہی دا اے تے جنہاں دا بوجھ سانوں لا کے سُٹ دینا چاہی دا اے۔ پر ایہدے چ کجھ ہور چیزاں وی شامل نیں۔ یسوع نے کہیا سی کہ اَسی حد توں زیادہ کھانا کھان تے حدوں ودھ شراب پین تے زندگی دِیاں پریشانیاں دی وجہ توں دَب سکنے آں۔ (‏لُوقا 21:‏34‏)‏ ایس ایت تے بائبل دِیاں دُوجیاں ایتاں توں تُسی ویکھ سکدے او کہ زندگی دی دوڑ چ دوڑدیاں ہوئیاں توانوں اپنے اندر کتھے بہتری لیان دی لوڑ اے۔‏

17.‏ اَسی ایس گل دا یقین کیوں رکھ سکنے آں کہ اَسی زندگی دی دوڑ چ جتاں گے؟‏

¹⁷ اَسی ایس گل دا یقین رکھ سکنے آں کہ اَسی زندگی دی دوڑ چ جت جاواں گے کیونکہ یہوواہ سانوں اوہ طاقت دَوے گا جدی سانوں ضرورت اے۔ (‏یسعیاہ 40:‏29-‏31‏)‏ ایس لئی زندگی دی دوڑ چ سُست نہ پووو۔ پولُس رسول دی مثال تے عمل کرو جنہے زندگی دا انعام جتن لئی اپنی پوری وا لا دِتی۔ (‏فِلپّیوں 3:‏13، 14‏)‏ ایس دوڑ چ تواڈی جگہ کوئی ہور نئیں دوڑ سکدا۔ پر یہوواہ دی مدد نال تُسی کامیابی نال ایہنوں پورا کر سکدے او۔ یہوواہ تواڈی مدد کر سکدا اے تاکہ تُسی ضروری بھار چُک سکو تے فالتو بوجھ نُوں لا کے سُٹ دَوو۔ (‏زبور 68:‏19‏)‏ کیونکہ یہوواہ تواڈے نال اے ایس لئی تُسی ایس دوڑ چ دوڑدے رہوو گے تے جت جاؤ گے۔‏