پولُس رسول نے تھسلُنیکے چ رہن والے مسیحیاں نُوں لکھیا:‏ جے کوئی بندہ ایس خط چ لکھیاں گلاں تے عمل نہ کرے تے اوہدے توں خبردار رہوو۔[‏فٹ‌نوٹ:‏ اوہدے تے نشان لاؤ۔]‏(‏2-‏تھسلُنیکیوں 3:‏14‏)‏ پہلاں اَسی مننے ساں کہ ایہہ ہدیت کلیسیا دے بزرگاں لئی اے۔ اَسی ایہہ وی مننے ساں کہ بزرگاں نُوں کلیسیا نُوں خبردار کرن لئی اوس بندے بارے اِک تقریر دینی چاہی دی اے جیہڑا پاک کلام دے اصولاں نُوں نظر انداز کر رہیا اے بھانویں کہ وار وار اوہدی درستی کیتی گئی اے۔ اِنج بزرگ اِک لحاظ نال اوس بندے تے ”‏نشان“‏ لاندے سن۔ ایہدے بعد کلیسیا دے بھین بھرا اوس بندے نال عبادتاں تے مُنادی دے علاوہ میل جول نئیں رکھدے سن۔‏

پر ایس وضاحت نُوں بدلن دی لوڑ اے۔اصل چ پولُس نے 2-‏تھسلُنیکیوں 3:‏14 چ جیہڑی نصیحت کیتی اوہ اِک ایہو جہے فیصلے وَل اشارہ کردی اے جیہڑا اِک مسیحی کجھ خاص صورتحال چ آپ کر سکدا اے۔ایس لئی بزرگاں نُوں کلیسیا دے بھین بھراواں نُوں اوس بندے بارے خبردار کرن لئی کوئی تقریر دین دی ضرورت نئیں اے۔ ایہہ تبدیلی کیوں کرنی پئی؟ آؤ غور کرنے آں کہ جدوں پولُس نے ایہہ نصیحت کیتی تے اوہ اصل چ کیس بارے گل کر رہیا سی۔‏

پولُس نے ویکھیا سی کہ تھسلُنیکے دی کلیسیا چ کجھ مسیحی اپنی من‌مرضی کر رہے نیں۔ ایہہ لوک اوہناں نصیحتاں نُوں منن توں اِنکار کر رہے سن جیہڑیاں پولُس خدا دی رہنمائی دے مطابق دے رہیا سی۔ جدوں اوہ پہلاں اوس کلیسیا دے بھین بھراواں نُوں مِلن گیا سی تے اوہنے اوہناں نُوں ایہہ نصیحت کیتی سی:‏ جیہڑا بندہ کم نئیں کرنا چاہندا اوہ کھانا وی نہ کھائے۔ پر ایہہ نصیحت سُنن دے بعد وی کجھ مسیحی اپنیاں ضرورتاں نُوں پورا کرن لئی کوئی کم نئیں کر رہے سن جد کہ اوہ محنت نال کم کرن دے قابل سن۔ایہدے علاوہ اوہ دُوجیاں دے معاملیاں چ دخل وی دے رہے سن۔ اِک مسیحی نُوں ایہو جہے بندے نال کیویں پیش آنا سی؟—‏2-‏تھسلُنیکیوں 3:‏6،‏ 10-‏12‏۔‏

پولُس نے کہیا:‏ اوہدے تے نشان لاؤ۔ یونانی زبان چ ایہہ اِصطلا‌ح ایس گل وَل اشارہ کردی اے کہ اَسی ایہو جہے بندے توں خبردار رہیے جیہڑا ساڈے تے بھیڑا اثر پا سکدا اے۔ پولُس رسول نے ایہو جہے بندے تے نشان لان دی نصیحت صرف بزرگاں نُوں ای نئیں سگوں پوری کلیسیا نُوں کیتی سی۔ (‏2-‏تھسلُنیکیوں 1:‏1؛‏ 3:‏6‏)‏ ایس لئی جے اِک مسیحی ویکھدا اے کہ اوہدا ہم‌ایمان بائبل چ لکھی نصیحت تے عمل نئیں کر رہیا تے اوہ اوہدے نال میل جول نہ رکھن دا فیصلہ کر سکدا اے۔‏

پر کیہہ ایہدا مطلب ایہہ وے کہ سانوں اوس بندے نال اِنج پیش آنا چاہی دا اے جیویں اوہنوں کلیسیا چوں کڈھ دِتا گیا اے؟ نئیں۔ پولُس رسول نے کہیا سی:‏ اوہنوں بھرا ہون دے ناتے نصیحت کردے رہوو۔ سو اِک مسیحی اوس بندے نُوں عبادتاں تے مُنادی دے دوران تے ملے گا پر تفریح تے دُوجے موقعیاں تے اوہدے نال وقت نئیں گزارے گا۔ پر کیوں؟ کیونکہ پولُس نے کہیا:‏ تاکہ اوہ شرمندہ ہوئے۔ جے اِک مسیحی ایہو جہے بندے توں خبردار رہوے گا جیہڑا اپنی من‌مرضی کردا اے تے ہو سکدا اے کہ اوہ بندہ شرمندہ ہوئے تے اپنی سوچ بدل لوے۔—‏2-‏تھسلُنیکیوں 3:‏14، 15‏۔‏

اَج مسیحی ایس نصیحت تے کیویں عمل کر سکدے نیں؟ سب توں پہلاں سانوں پکا یقین ہونا چاہی دا اے کہ اِک بندہ واقعی اوس لحاظ نال اپنی من‌مرضی کر رہیا اے جدا پولُس نے ذکر کیتا سی۔ اوہ ایہو جہے لوکاں دی گل نئیں کر رہیا سی جیہڑے اپنے ضمیر یاں اپنی پسند نہ پسند دی وجہ توں کسے معاملے نُوں ساڈے توں فرق نظر نال ویکھدے نیں یاں ساڈے توں فرق رائے رکھدے نیں۔ نالے پولُس ایہو جہے لوکاں دی گل وی نئیں کر رہیا سی جنہاں نے ساڈا دل دُکھایا اے۔ایہدی بجائے پولُس اوہناں لوکاں دی گل کر رہیا سی جیہڑے جان بجھ کے خدا وَلّوں مِلن والیاں ہدیتاں تے نصیحتاں نُوں منن توں اِنکار کردے نیں۔‏

جے اَسی ویکھنے آں کہ ساڈا کوئی ہم‌ایمان خدا دے کلام توں مِلن والیاں ہدیتاں تے نصیحتاں نُوں منن توں وار وار اِنکار کردا اے a تے شاید اَسی ایہہ فیصلہ کریئے کہ اَسی اوہدے نال تفریح نئیں کراں گے۔ ایہہ ہر مسیحی دا ذاتی فیصلہ اے۔ ایس لئی اَسی اپنے گھر والیاں توں علاوہ کسے ہور نال ایس بارے گل نئیں کراں گے۔ پر اَسی عبادتاں تے مُنادی دے دوران اوہدے نال ملاں گے۔ فیر جدوں اوہ اپنی سوچ نُوں بدلے گا تے اَسی دُوجیاں موقعیاں تے وی اوہدے نال میل جول رکھاں گے۔‏