1، 2.‏ (‏الف)‏یہوواہ اوہناں لوکاں بارے کیہو جیہا محسوس کردا اے جیہڑے اپنے گُناہ توں توبہ نئیں کردے؟ (‏ب)‏یہوواہ گُناہ کرن والیاں لئی کیہہ چاہندا اے؟‏

 یہوواہ کسے وی قسم دی بُرائی نُوں برداشت نئیں کردا۔ (‏زبور 5:‏4-‏6‏)‏ اوہ چاہندا اے کہ اَسی اوہناں حکماں تے عمل کرئیے جیہڑے اوہنے اپنے کلام چ دِتے نیں۔ پر یہوواہ جان دا اے کہ اَسی مٹی دے بنے انسان آں تے ساڈے کولوں غلطیاں ہو سکدیاں نیں۔ (‏زبور 130:‏3، 4‏)‏ فیر وی یہوواہ ایہہ برداشت نئیں کردا کہ کوئی وی اوہدی ”‏عظیم رحمت نُوں بہانہ بنا کے بے‌حیائی نال غلط کم“‏ کردا رہوے۔ (‏یہوداہ 4‏)‏ ایسے لئی بائبل چ دَسیا گیا اے کہ ہر مجدون دی جنگ چ اوہ بھیڑے لوکاں نُوں تباہ کر دَوے گا۔—‏2-‏پطرس 3:‏7؛‏ مُکاشفہ 16:‏16‏۔‏

² پر یہوواہ نئیں چاہندا کہ کوئی وی مرے۔‏ ایس شمارے دے مضموناں چ اَسی سکھیا اے کہ بائبل چ صاف صاف دَسیا گیا اے کہ اوہ چاہندا اے کہ سارے لوک توبہ کرن۔ (‏2-‏پطرس 3:‏9‏)‏ یہوواہ وانگوں کلیسیا دے بزرگ وی بڑے صبر نال گُناہ کرن والے بندے دی مدد کردے نیں تاکہ اوہ توبہ کرے تے فیر توں یہوواہ دے نیڑے آئے۔ پر ہو سکدا اے کہ گُناہ کرن والا اِک بندہ توبہ نہ کرے۔ (‏یسعیاہ 6:‏9‏)‏ کجھ لوک بزرگاں دی وار وار کوششاں دے باوجود اپنے بھیڑے کماں توں باز نئیں آندے۔ ایس صورت چ بزرگاں نُوں کیہہ کرنا چاہی دا اے؟‏

 بھیڑے بندے نُوں اپنے چوں کڈھ دَوو

3.‏ (‏الف)‏جیہڑا بندہ اپنے گُناہ توں توبہ نئیں کردا، بائبل دے مطابق اوہدے نال کیہہ ہونا چاہی دا اے؟ (‏ب)‏گُناہ کرن والا بندہ اِک لحاظ نال آپ ایہہ فیصلہ کیویں کردا اے کہ اوہنوں کلیسیا چوں کڈھ دِتا جائے؟‏

³ جدوں گُناہ کرن والا بندہ توبہ نئیں کردا تے فیر بزرگ 1-‏کُرنتھیوں 5:‏13 چ لکھی ایس ہدیت تے عمل کردے نیں:‏ بھیڑے بندے نُوں اپنے چوں کڈھ دَوو۔ اِک لحاظ نال اوہ آپ ایہہ فیصلہ کردا اے کہ اوہنوں کلیسیا چوں کڈھیا جائے۔ (‏گلتیوں 6:‏7‏)‏ اَسی ایہہ کیوں کہہ سکنے آں؟ کیونکہ بزرگاں دے وار وار سمجھان دے باوجود اوہنے توبہ نئیں کیتی۔ (‏2-‏سلاطین 17:‏12-‏15‏)‏ اوہدے کماں توں ظاہر ہوندا اے کہ اوہ یہوواہ دے حکماں تے نئیں چلنا چاہندا۔—‏اِستثنا 30:‏19، 20‏۔‏

4.‏ جدوں کسے بندے نُوں کلیسیا چوں کڈھیا جاندا اے تے ایس بارے اعلان کیوں ہوندا اے؟‏

⁴ جدوں توبہ نہ کرن والے بندے نُوں کلیسیا چوں کڈھیا جاندا اے تے کلیسیا چ اعلان کیتا جاندا اے کہ فلاں بندہ ہُن توں یہوواہ دا گواہ نئیں اے۔‏ a اعلان دا مقصد گُناہ کرن والے بندے نُوں شرمندہ کرنا نئیں ہوندا۔ ایہدی بجائے ایہدا مقصد ایہہ ہوندا اے کہ بھین بھرا بائبل چ دِتی ہدیت تے عمل کرن یعنی اوس بندے نال میل جول رکھنا چھڈ دین جنہوں کلیسیا چوں کڈھ دِتا گیا اے، ایتھوں تک کہ اوہدے نال کھانا وی نہ کھان۔ (‏1-‏کُرنتھیوں 5:‏9-‏11‏)‏ ایس ہدیت تے عمل کرن نال کلیسیا نُوں فائدہ ہوندا اے۔ پولُس رسول نے لکھیا:‏ تھوڑا جیہا خمیر پورے آٹے نُوں خمیرا کر دیندا اے۔ (‏1-‏کُرنتھیوں 5:‏6‏)‏ جے گُناہ کرن والے بندے نُوں کلیسیا چوں نئیں کڈھیا جاندا تے دُوجیاں نُوں وی لگے گا کہ یہوواہ دے حکماں تے عمل کرنا ایناں ضروری نئیں اے۔—‏اَمثال 13:‏20؛‏ 1-‏کُرنتھیوں 15:‏33‏۔‏

5.‏ جدوں کسے بندے نُوں کلیسیا چوں کڈھیا جاندا اے تے سانوں اوہدے بارے کیہو جہی سوچ رکھنی چاہی دی اے تے کیوں؟‏

⁵ جدوں ساڈے کسے ہم‌ایمان نُوں کلیسیا چوں کڈھیا جاندا اے تے سانوں اوہدے نال کیویں پیش آنا چاہی دا اے؟ بھانویں کہ اَسی اوہدے نال میل جول نئیں رکھدے، پر اوہ اِک ایہو جہی بھیڈ وانگوں اے جیہڑی بھٹک گئی اے۔ سانوں ایہہ امید رکھنی چاہی دی اے کہ اوہ اِک دن واپس آ جائے گا۔ اوس بندے نے اپنی زندگی یہوواہ دے ناں کیتی سی۔ پر افسوس دی گل اے کہ اوہ یہوواہ نال کیتے اپنے وعدے نُوں حالے پورا نئیں کر رہیا تے ہُن اوہ خطرے چ وے۔ (‏حِزقی‌ایل 18:‏31‏)‏ ایس لئی جدوں تک یہوواہ رحم وکھان لئی تیار اے اوہدوں تک اوس بندے لئی واپس آن دی راہ کُھلی اے۔ بزرگ اوس بندے دی مدد کیویں کر سکدے نیں جنہوں کلیسیا چوں کڈھیا گیا اے؟‏

بزرگ کلیسیا چوں کڈھے گئے بندے دی مدد کیویں کردے نیں؟‏

6.‏ بزرگ اوس بندے دی مدد کرن لئی کیہہ کرن گے جنہوں کلیسیا چوں کڈھ دِتا گیا اے؟‏

⁶ جدوں کسے بندے نُوں کلیسیا چوں کڈھیا جاندا اے تے کیہہ بزرگ یہوواہ وَل واپس آن چ اوہدی کوئی مدد نئیں کردے؟ ایہہ گل نئیں اے۔ جدوں بزرگاں دی کمیٹی توبہ نہ کرن والے بندے نُوں دَسدی اے کہ اوہنوں کلیسیا چوں کڈھیا جا رہیا اے تے کمیٹی اوہنوں ایہہ وی دَسدی اے کہ اوہنوں کلیسیا چ واپس آن لئی کیہہ کرن دی لوڑ اے۔ ایناں ای نئیں سگوں بزرگ ایہو جہے زیادہ‌تر لوکاں نال کجھ مہینیاں بعد دُبارہ مِلن دا بندوبست بناندے نیں تاکہ ویکھ سکن کہ اوہناں نے اپنی سوچ یاں رویے نُوں بدلیا اے کہ نئیں۔ جے اوہ بندہ مِلن لئی تیار ہوندا اے تے بزرگ اوس ملاقات دے دوران اوہنوں حوصلہ دین گے کہ اوہ توبہ کرے تے کلیسیا چ واپس آ جائے۔ جے اوس ملاقات دے دوران وی اوہ توبہ نئیں کردا تے بزرگ تھوڑے تھوڑے عرصے بعد اوہنوں مِلن دی کوشش کردے رہن گے۔‏

7.‏ بزرگ اوس بندے لئی یہوواہ ورگا رحم کیویں وکھا سکدے نیں جنہوں کلیسیا چوں کڈھیا گیا اے؟ (‏یرمیاہ 3:‏12‏)‏

⁷ بزرگ یہوواہ دی مثال تے عمل کردے نیں تے اوہناں لوکاں نال بڑے رحم نال پیش آندے نیں جنہاں نُوں کلیسیا چوں کڈھیا گیا اے۔  مثال لئی، یہوواہ نے ایس گل دا اِنتظار نئیں کیتا کہ پہلاں اِسرائیلی توبہ کرن تے فیر ای اوہ اوہناں دی مدد کرے گا۔ایہدی بجائے اوہناں دے توبہ کرن توں پہلاں ای یہوواہ نے اوہناں دی مدد کرن لئی اپنے نبی گھلے۔ جیویں کہ ایس شمارے دے دُوجے مضمون چ دَسیا گیا سی یہوواہ نے اپنے نبی ہوسیع دے ذریعے اِسرائیلیاں نُوں سمجھایا کہ اوہ کِنّاں رحم‌دل اے۔ یہوواہ نے ہوسیع نُوں کہیا کہ اوہ اپنی بیوی نُوں معاف کر دَوے تے اوہنوں قبول کر لوے جیہڑی حالے وی گُناہ کر رہی سی۔ (‏ہوسیع 3:‏1؛‏ ملاکی 3:‏7‏)‏ یہوواہ وانگوں کلیسیا دے بزرگاں دی ایہہ دِلی خواہش اے کہ گُناہ کرن والا بندہ توبہ کرے تے کلیسیا چ واپس آ جائے۔ ایس لئی اوہ اوہدی مدد کرن دی پوری کوشش کردے نیں۔‏‏—‏یرمیاہ 3:‏12 نُوں پڑھو۔‏

8.‏ یسوع نے جیہڑی مثال دِتی اوہدے توں اَسی یہوواہ دے رحم تے شفقت بارے کیہہ سکھنے آں؟ (‏لُوقا 15:‏7‏)‏

⁸ یاد کرو کہ یسوع نے اِک باپ دی مثال دِتی جدا پُتر بھٹک گیا سی۔ باپ نے جیویں ای ویکھیا کہ اوہدا پُتر گھر واپس آ رہیا اے تے اوہ ”‏اوہدے وَل بھجا بھجا گیا تے اوہنوں گلے لا لیا تے بڑے پیار نال اوہنوں چُمیا۔“‏ (‏لُوقا 15:‏20‏)‏ غور کرو کہ اوس باپ نے ایہہ اِنتظار نئیں کیتا کہ اوہدا پُتر اوہدے کولوں معافی دی بھیک منگے سگوں اوہ آپ بھجا بھجا اوہدے وَل گیا کیونکہ اوہ اوہنوں پیار کردا سی۔ یہوواہ وی اوہناں لوکاں لئی ایہو جیہا ای محسوس کردا اے جیہڑے اوہنوں چھڈ کے چلے گئے نیں۔ بزرگ وی یہوواہ دی مثال تے عمل کرن دی پوری کوشش کردے نیں۔ اوہ چاہندے نیں کہ اوہ لوک یہوواہ وَل واپس آ جان جیہڑے بھٹک گئے نیں۔ (‏لُوقا 15:‏22-‏24،‏ 32‏)‏ جدوں اِک گُناہ‌گار بندہ توبہ کردا اے تے اوہدوں یہوواہ، یسوع، فرشتے تے پوری کلیسیا نُوں بڑی خوشی ہوندی اے۔‏‏—‏لُوقا 15:‏7 نُوں پڑھو۔‏

9.‏ یہوواہ گُناہ کرن والیاں توں کیہہ چاہندا اے؟‏

⁹ ہُن تک اَسی غور کیتا اے کہ یہوواہ توبہ نہ کرن والے کسے وی بندے نُوں کلیسیا چ برداشت نئیں کردا۔ پر فیر وی یہوواہ اوہدی فکر کرنا نئیں چھڈدا۔ اوہ چاہندا اے کہ اوہ بندہ اوہدے وَل واپس آ جائے۔ غور کرو کہ جدوں ایہو جہے لوک توبہ کردے نیں تے یہوواہ نُوں کیہو جیہا لگدا اے، ہوسیع 14:‏4 چ لکھیا اے:‏ مَیں اوہناں دی بے‌وفائی دے اثر نُوں مٹاواں گا۔ مَیں دِلوں اوہناں نال پیار کراں گا کیونکہ اوہناں لئی میرا غصہ ٹھنڈا ہو گیا اے۔ یہوواہ وانگوں بزرگ وی ایہو جہیاں تبدیلیاں تے دھیان دیندے نیں جنہاں توں ظاہر ہوندا اے کہ اوہ بندہ توبہ وَل آ رہیا اے۔ نالے یہوواہ دی ایس گل توں اوہناں لوکاں نُوں وی حوصلہ مِلدا اے جیہڑے اوہنوں چھڈ کے چلے گئے نیں۔ اوہ ویکھ سکدے نیں کہ یہوواہ اوہناں نُوں پیار کردا اے تے چاہندا اے کہ اوہ چھیتی کلیسیا چ واپس آ جان۔‏

10، 11.‏ بزرگ اوہناں لوکاں دی مدد کیویں کردے نیں جنہاں نُوں کلیسیا چوں کڈھے کئی سال ہو گئے نیں؟‏

¹⁰ بزرگ اوہناں لوکاں دی مدد کیویں کر سکدے نیں جنہاں نُوں کئی سال پہلاں کلیسیا چوں کڈھیا گیا سی؟ ہو سکدا اے کہ اوہناں نے اوہ گُناہ کرنا چھڈ دِتا اے جدی وجہ توں اوہناں نُوں کڈھیا گیا سی۔ کدی کدار تے کجھ نُوں یاد وی نئیں ہوندا کہ اوہناں نُوں کیوں کڈھیا گیا سی۔ ایہو جہے لوکاں نُوں کلیسیا توں دُور ہوئیاں بھانویں جِنّاں وی عرصہ ہو گیا ہوئے،بزرگ اوہناں نُوں لبھن تے اوہناں نال مِلن دی کوشش کرن گے۔ جے ممکن ہوئے تے ملاقات دے دوران بزرگ اوس بندے نال دُعا کرن گے تے اوہنوں کلیسیا چ واپس آن دا حوصلہ دین گے۔ جے اِک بندے نُوں کلیسیا توں دُور ہوئیاں کئی سال ہو گئے نیں تے اوہنوں فیر توں یہوواہ بارے جانن تے بائبل دِیاں سچائیاں نُوں سکھن دی لوڑ اے۔ جے اوہ بندہ واپس آنا چاہندا اے تے بزرگ اوہدے کلیسیا چ بحال ہون توں پہلاں ای اوہنوں بائبل کورس کران دا بندوبست کر سکدے نیں۔ ایس گل دا فیصلہ بزرگ ای کرن گے کہ کون اوہنوں بائبل کورس کرائے گا۔‏

¹¹ بزرگ ایہو جہے لوکاں لئی یہوواہ ورگا رحم وکھاندے نیں۔ ایس لئی اوہ ایہو جہے سارے لوکاں نال مِلن گے تے اوہناں نُوں واپس آن دا حوصلہ دین گے جیہڑے یہوواہ توں دُور ہو گئے نیں۔ جدوں گُناہ کرن والا بندہ توبہ کردا اے تے اپنے آپ نُوں بدل دا اے تے اوہنوں بغیر دیر کیتے کلیسیا چ بحال کیتا جا سکدا اے۔—‏2-‏کُرنتھیوں 2:‏6-‏8‏۔‏

12.‏ (‏الف)‏بزرگاں نُوں کیہڑے معاملیاں چ بوہت ای سوچ سمجھ کے فیصلہ کرن دی لوڑ ہوندی اے؟ (‏ب)‏گُناہ کرن والے کجھ لوکاں بارے سانوں ایہہ کیوں نئیں سوچنا چاہی دا کہ اوہ یہوواہ دے رحم دے لائق نئیں؟ (‏فٹ‌نوٹ نُوں وی ویکھو۔)‏

 ¹² کجھ معاملیاں چ کسے نُوں بحال کردے ویلے بزرگاں نُوں بوہت ای سوچ سمجھ کے فیصلہ کرن دی لوڑ ہوندی اے۔ مثال لئی، جے اِک بندے نُوں ایس لئی کڈھیا گیا سی کیونکہ اوہنے کسے بچے نال جنسی زیادتی کیتی سی یاں اوہ یہوواہ دی تنظیم دے خلاف ہو گیا سی یاں فیر اوہنے اپنی شادی نُوں ختم کرن لئی سازش کیتی سی تے بزرگ اوہنوں بحال کرن توں پہلاں ایس گل دی تسلی کرن گے کہ اوہنے واقعی توبہ کر لئی اے۔ (‏ملاکی 2:‏14؛‏ 2-‏تیمُتھیُس 3:‏6‏)‏ بزرگاں دی ذمے‌داری اے کہ اوہ کلیسیا نُوں  محفوظ رکھن۔ ایہدے نال نال اَسی ایس گل نُوں سمجھنے آں کہ خدا ہر اوس بندے نُوں قبول کرن لئی تیار اے جیہڑا دِلوں توبہ کردا اے تے اپنے بھیڑے کم چھڈ دیندا اے۔ ایہہ سچ اے کہ بزرگ پہلاں تسلی کرن گے کہ دُوجیاں نُوں دھوکھا دین والے کسے بندے نے دِلوں توبہ کیتی اے، پر فیر وی اوہناں نُوں ایہہ نئیں سوچنا چاہی دا کہ اوہ بندہ یہوواہ دے رحم دے لائق نئیں اے۔‏ b‏—‏1-‏پطرس 2:‏10‏۔‏

کلیسیا کیویں مدد کر سکدی اے؟‏

13.‏ (‏الف)‏اَسی اوس بندے نال کیویں پیش آنے آں جدی بزرگاں نے درستی کیتی اے؟ (‏ب)‏اَسی اوس بندے نال کیویں پیش آنے آں جنہوں کلیسیا چوں کڈھیا جاندا اے؟‏

¹³ پچھلے مضمون چ اَسی سکھیا سی کہ جدوں کسے بندے دی درستی کیتی جاندی اے تے کدی کدار کلیسیا چ اوہدے بارے اعلان ہوندا اے۔ ایس صورت چ اَسی اوس بندے نال میل جول رکھ سکنے آں کیونکہ اوہنے توبہ کیتی اے تے اپنے بھیڑے کماں توں باز آ گیا اے۔ (‏1-‏تیمُتھیُس 5:‏20‏)‏ اوہ بندہ حالے وی کلیسیا دا حصہ اے تے اوہنوں اپنے ہم‌ایماناں وَلّوں پیار تے حوصلے دی لوڑ اے۔ (‏عبرانیوں 10:‏24، 25‏)‏ پر جدوں کسے بندے نُوں کلیسیا چوں کڈھیا جاندا اے تے اوہدوں گل فرق ہوندی اے۔ اَسی اوس بندے نال کوئی میل جول نئیں رکھدے ایتھوں تک کہ اوہدے نال کھانا وی نئیں کھاندے۔—‏1-‏کُرنتھیوں 5:‏11‏۔‏

14.‏ جنہاں نُوں کلیسیا چوں کڈھ دِتا گیا اے اوہناں نال پیش آن بارے ہر مسیحی اپنے ضمیر دے مطابق کیہہ فیصلہ کر سکدا اے؟ (‏تصویر نُوں وی ویکھو۔)‏

¹⁴ جدوں کسے نُوں کلیسیا چوں کڈھیا جاندا اے تے کیہہ ایہدا مطلب ایہہ وے کہ اَسی اوہنوں سلام وی نئیں کر سکدے؟ ایہہ گل نئیں اے۔ سچ اے کہ اَسی اوس بندے نال کوئی میل جول نئیں رکھاں گے، پر ہُن ہر مسیحی بائبل دے اصولاں نُوں ذہن چ رکھدے ہوئے اپنے ضمیر دے مطابق ایہہ فیصلہ کر سکدا اے کہ اوہ اوس بندے نُوں عبادت تے آن دی دعوت دَوے گا یاں نئیں۔ ہو سکدا اے کہ اوہ بندہ اوہدا رشتے‌دار اے یاں اوہدا قریبی دوست سی۔ جے اوہ عبادت تے آندا اے تے سانوں اوہدے نال کیویں پیش آنا چاہی دا اے؟ پہلاں اَسی ایہو جہے بندے نُوں سلام نئیں کرنے ساں۔ پر ہُن ایس صورت چ وی اِک مسیحی بائبل دے اصولاں نُوں ذہن چ رکھدے ہوئے اپنے ضمیر دے مطابق فیصلہ کر سکدا اے۔ شاید کجھ بھین بھرا ایہہ فیصلہ کرن کہ اوہ اوہدے نال سلام دُعا کرن گے۔ پر فیر وی اَسی اوہدے نال لمی چوڑی گل بات نئیں کراں گے تے نہ ای عبادت دے علاوہ اوہدے نال میل جول رکھاں گے۔‏

15.‏ 2-‏یوحنا 9-‏11 چ کیہو جہے گُناہ کرن والے بندے دی گل کیتی گئی اے؟ (‏بکس ‏”‏ کیہہ یوحنا تے پولُس اِکو جہے گُناہ بارے گل کر رہے سن؟‏‏“‏ نُوں وی ویکھو۔)‏

 ¹⁵ کجھ لوک شاید ایہہ سوچن کہ ”‏کیہہ بائبل چ ایہہ نئیں لکھیا کہ جے اِک مسیحی ایہو جہے بندے نُوں سلام کر دا اے تے اوہ اوہدے بھیڑے کماں چ شامل ہو جاندا اے؟“‏ ‏(‏2-‏یوحنا 9-‏11 نُوں پڑھو۔)‏ جدوں اَسی یوحنا دے ایس پورے خط تے غور کرنے آں تے پتہ چلدا اے کہ یوحنا دا اشارہ اوس بندے وَل سی جیہڑا یہوواہ دی تنظیم دے خلاف ہو گیا اے تے جان‌بجھ کے جھوٹھی تلیم پھیلا رہیا اے یاں فیر اوہ دُوجیاں نُوں ایہو جہے کم کرن دی ہلاشیری دیندا اے جیہڑے بائبل دے خلاف نیں۔ (‏مُکاشفہ 2:‏20‏)‏ ایس لئی بزرگ کسی ایہو جہے بندے نال نئیں مِلدے جیہڑا جھوٹھی تلیم پھیلاندا اے یاں بھیڑے کماں دی ہلاشیری دیندا اے۔پر فیر وی ممکن اے کہ کدی نہ کدی اوس بندے نُوں ہوش آ جائے۔ پر جدوں تک اوہ اپنے بھیڑے کماں توں باز نئیں آندا، اَسی نہ تے اوہنوں سلام کراں گے تے نہ ای اوہنوں عبادت تے آن دی دعوت دَواں گے۔‏

یہوواہ ورگا رحم وکھاؤ

16، 17.‏ (‏الف)‏یہوواہ گُناہ‌گاراں توں کیہہ چاہندا اے؟ (‏حِزقی‌ایل 18:‏32‏)‏ (‏ب)‏گُناہ کرن والے بندے دی مدد کردے ویلے بزرگ یہوواہ نال مِل کے کم کیویں کردے نیں؟‏

¹⁶ اَسی ایس شمارے دے پنج مضموناں چوں کیہہ سکھیا اے؟ ایہہ کہ یہوواہ نئیں چاہندا کہ کوئی وی ماریا جائے۔ ‏(‏حِزقی‌ایل 18:‏32 نُوں پڑھو۔)‏ اوہ چاہندا اے کہ گُناہ‌گار توبہ کرن تے اوہدے وَل واپس آن۔ (‏2-‏کُرنتھیوں 5:‏20‏)‏ ایہی وجہ اے کہ یہوواہ نے وار وار اپنی باغی قوم تے ہر بھٹکے ہوئے بندے نُوں حوصلہ دِتا کہ اوہ توبہ کر کے فیر توں اوہدے نیڑے آن۔ کلیسیا دے بزرگاں کول ایہہ شرف اے کہ اوہ یہوواہ نال مِل کے کم کردے نیں یعنی بھٹکے ہوئے لوکاں نُوں توبہ وَل لیان دی کوشش کردے نیں۔—‏رومیوں 2:‏4؛‏ 1-‏کُرنتھیوں 3:‏9‏۔‏

¹⁷ ذرا اوس خوشی بارے سوچو جیہڑی اسمان تے اوس ویلے منائی جاندی اے جدوں اِک گُناہ‌گار بندہ توبہ کردا اے۔ جدوں وی یہوواہ دی کوئی بھٹکی ہوئی بھیڈ کلیسیا چ واپس آندی اے تے اوہ بڑا خوش ہوندا اے۔ یہوواہ دی عظیم رحمت، مہربانی تے شفقت بارے سوچ کے ساڈے دل چ اوہدے لئی محبت ہور وی ودھ جاندی اے۔—‏لُوقا 1:‏78‏۔‏