مطالعے دا مضمون نمبر 33
گیت نمبر 130 دِلوں معاف کرو
کلیسیا وڈا گُناہ کرن والے بندے بارے یہوواہ ورگی سوچ کیویں ظاہر کر سکدی اے؟
”جے کسے کولوں کوئی گُناہ ہو وی جائے تے باپ کول ساڈا اِک مددگار اے۔“—1-یوحنا 2:1۔
غور کرو:
ایس مضمون چ اَسی ویکھاں گے کہ جدوں پہلی صدی عیسوی چ کُرنتھس دی کلیسیا چ اِک بندے نے وڈا گُناہ کیتا تے کلیسیا نے اوس معاملے بارے کیہہ کیتا تے اَسی اوہدے توں کیہہ سکھنے آں۔
1. یہوواہ سارے انساناں کولوں کیہہ چاہندا اے؟
یہوواہ خدا نے سارے انساناں نُوں اپنی مرضی نال فیصلے کرن دی آزادی دِتی اے۔ جدوں تُسی اپنی زندگی چ کوئی وی چھوٹا یاں وڈا فیصلہ کردے او تے تُسی خدا دی ایس نعمت نُوں استمال کر رہے ہوندے او۔ اِک انسان دی زندگی دا سب توں وڈا تے اہم فیصلہ اوہ ہوندا اے جدوں اوہ اپنی زندگی یہوواہ دے ناں کردا اے تے اوہدے خاندان دا حصہ بن جاندا اے۔ یہوواہ چاہندا اے کہ ہر انسان ایہہ فیصلہ کرے۔ پر کیوں؟ کیونکہ یہوواہ سارے انساناں نال پیار کردا اے تے اوہناں دا بھلا چاہندا اے۔ اوہ چاہندا اے کہ اَسی اوہدے دوست بنئے تے ہمیشاں تک زندہ رہیے۔—اِستثنا 30:19، 20؛ گلتیوں 6:7، 8۔
2. یہوواہ اوہناں لوکاں بارے کیہو جیہا محسوس کردا اے جیہڑے اپنے گُناہ توں توبہ نئیں کردے؟ (1-یوحنا 2:1)
2 یہوواہ کسے وی انسان نُوں مجبور نئیں کردا کہ اوہ اوہدی عبادت کرے۔ اوہ چاہندا اے کہ ہر انسان آپ ایہہ فیصلہ کرے۔ پر جے اِک بپتسمہ یافتہ مسیحی کوئی وڈا گُناہ کردا اے تے فیر کیہہ کرنا چاہی دا اے؟ جے اوہ اپنے گُناہ توں توبہ نئیں کردا تے اوہنوں کلیسیا چوں کڈھ دینا چاہی دا اے۔ (1-کُرنتھیوں 5:13) پر فیر وی یہوواہ ایس گل دی امید نئیں چھڈدا کہ گُناہ کرن والا بندہ اِک دن اوہدے وَل مُڑ آئے گا۔ اصل چ ایہی وجہ اے کہ اوہنے انساناں لئی فدیہ دِتا اے تاکہ اوہناں لوکاں نُوں معافی مِل سکے جیہڑے اپنے گُناہ توں توبہ کردے نیں۔ (1-یوحنا 2:1 نُوں پڑھو۔) ساڈا مہربان خدا گُناہ کرن والے لوکاں نُوں بڑے پیار نال کہندا اے کہ اوہ توبہ کرن۔—زکریاہ 1:3؛ رومیوں 2:4؛ یعقوب 4:8۔
3. ایس مضمون چ اَسی کیس بارے گل کراں گے؟
3 یہوواہ چاہندا اے کہ گُناہ بارے تے گُناہ کرن والے بندے بارے اَسی اوہدے ورگی سوچ رکھیے۔ ایس مضمون چ اَسی ویکھاں گے کہ اَسی اِنج کیویں کر سکنے آں۔ مضمون نُوں پڑھدے ویلے ایہناں تِن گلاں تے غور کرو: (1)پہلی صدی عیسوی چ جدوں کُرنتھس دی کلیسیا چ اِک مسیحی نے وڈا گُناہ کیتا تے پولُس نے کلیسیا نُوں کیہہ ہدیت دِتی، (2)جدوں اوس بندے نے اپنے گُناہ توں توبہ کیتی تے فیر پولُس نے کلیسیا نُوں کیہہ ہدیت دِتی تے (3)ایس واقعے توں وڈا گُناہ کرن والے مسیحی لئی یہوواہ دی سوچ بارے کیہہ پتہ چلدا اے۔
پہلی صدی عیسوی چ وڈے گُناہ دے مسئلے نُوں کیویں حل کیتا گیا
4. پہلی صدی عیسوی چ کُرنتھس دی کلیسیا چ کیہڑا مسئلہ پیدا ہویا؟ (1-کُرنتھیوں 5:1، 2)
4 1-کُرنتھیوں 5:1، 2 نُوں پڑھو۔ جدوں پولُس اپنے تیجے مشنری دورے تے سی تے اوہنوں پتہ چلیا کہ کُرنتھس چ قائم ہوئی نوِیں کلیسیا چ اِک بندہ اپنی سوتیلی ماں نال جنسیبدکاری کر رہیا اے۔ ایس خبر بارے سُن کے اوہ بڑا پریشان ہو گیا کیونکہ ایہو جہی حرکت تے غیرایمان لوک وی نئیں کردے سن۔ پر اوہ کلیسیا اوس بندے دی بدکاری نُوں نہ صرف برداشت کر رہی سی سگوں اوہدے تے فخر وی محسوس کر رہی سی۔ کجھ لوک شاید ایہہ سوچ رہے سن کہ اوہ ایس بندے دی حرکت نُوں برداشت کرن نال یہوواہ ورگی رحمدلی وکھا رہے نیں۔ پر یہوواہ کلیسیا چ ہون والی کسے وی بُرائی نُوں برداشت نئیں کردا۔ اوس بندے دی ایس گھٹیا حرکت دی وجہ توں پوری کلیسیا بدنام ہو رہی سی۔ نالے اوہناں لوکاں تے وی بھیڑا اثر پے رہیا سی جیہڑے گُناہ کرن والے بندے نال وقت گزاردے سن۔ ایس معاملے بارے پولُس نے کلیسیا نُوں کیہہ ہدیت دِتی؟
5. پولُس نے کلیسیا نُوں کیہہ کرن لئی کہیا تے اوہدی گل دا کیہہ مطلب سی؟ (1-کُرنتھیوں 5:13) (تصویر نُوں وی ویکھو۔)
5 1-کُرنتھیوں 5:13 نُوں پڑھو۔ پولُس رسول نے یہوواہ دی رہنمائی چ اوس کلیسیا نُوں اِک خط لکھیا جدے چ اوہنے ہدیت دِتی کہ اوہ توبہ نہ کرن والے بندے نُوں کلیسیا چوں کڈھ دین۔ پر یہوواہ دے معیاراں نُوں قائم رکھن لئی بھین بھراواں نے اوہدے نال کیویں پیش آنا سی؟ پولُس نے اوہناں نُوں ایہہ ہدیت دِتی کہ اوہ اوہدے نال کوئی میل جول نہ رکھن۔ اوہدی ایس گل دا کیہہ مطلب سی؟ پولُس نے اوہناں نُوں سمجھایا کہ ایس حکم چ ایہہ گل وی شامل اے کہ اوہ اوہدے نال کھانا تک نہ کھان۔ (1-کُرنتھیوں 5:11) جدوں اَسی کسے بندے نال کھانا کھا رہے ہُنے آں تے اوہدوں اَسی اوہدے نال دوستی ودھا رہے ہُنے آں۔ پولُس دی گل دا مطلب ایہہ سی کہ اوہدے بھیڑے کماں دے اثر توں بچن لئی بھین بھرا اوہدے نال کوئی میل جول نہ رکھن۔ (1-کُرنتھیوں 5:5-7) اِنج شاید اوس بندے نُوں وی احساس ہونا سی کہ اوہ یہوواہ توں کِنّاں دُور چلا گیا اے۔ شاید اوہنوں اپنی ایس حرکت تے شرمندگی محسوس ہوندی تے اوہ توبہ کردا۔
پولُس نے پاک روح دی رہنمائی چ کلیسیا نُوں اِک خط لکھیا جدے چ اوہنے ہدیت دِتی کہ اوہ اوس بندے نُوں اپنے وچوں کڈھ دین جیہڑا توبہ نئیں کر رہیا سی۔ (پیراگراف نمبر 5 نُوں ویکھو۔)
6. پولُس دے خط دا کُرنتھس دی کلیسیا تے گُناہ کرن والے بندے تے کیہہ اثر پیا؟
6 کُرنتھس دی کلیسیا نُوں خط گھلن دے بعد پولُس سوچن لگ پیا کہ ایس خط چ لکھیاں گلاں نُوں پڑھ کے کلیسیا نُوں کیہو جیہا لگیا ہوئے گا۔ پر فیر طِطُس نے پولُس نُوں اِک ایہو جہی خبر دِتی جنہوں سُن کے پولُس بوہت خوش ہویا۔ پولُس نُوں پتہ چلیا کہ اوس کلیسیا نے اوہدیاں ہدیتاں تے عمل کیتا اے۔ (2-کُرنتھیوں 7:6، 7) ایہدے علاوہ خط بھیجن دے کجھ مہینے بعد ای گُناہ کرن والے بندہ نے توبہ کر لئی سی۔ اوہنے اپنے بھیڑے کم چھڈ دِتے سن تے اپنی سوچ بدل لئی سی تے ہُن اوہ یہوواہ دے پاک معیاراں مطابق چلن لگ پیا سی۔ (2-کُرنتھیوں 7:8-11) فیر اَگے پولُس نے کلیسیا نُوں کیہہ کرن لئی کہیا؟
کلیسیا گُناہ توں توبہ کرن والے بندے نال کیویں پیش آئی؟
7. اپنے گُناہ توں توبہ نہ کرن والے بندے نُوں کلیسیا چوں کڈھن دا کیہہ فائدہ ہویا؟ (2-کُرنتھیوں 2:5-8)
7 2-کُرنتھیوں 2:5-8 نُوں پڑھو۔ پولُس رسول نے کہیا کہ اوس بندے لئی اوہ سزا کافی اے جیہڑی تواڈے چوں زیادہتر نے اوہنوں دِتی اے۔ پولُس دے کہن دا مطلب سی کہ اصل چ اوس بندے نُوں سزا دین دا مقصد پورا ہو گیا اے۔ کیہڑا مقصد؟ ایہہ کہ اوہ بندہ توبہ وَل آئے۔—عبرانیوں 12:11۔
8. پولُس نے کلیسیا نُوں ہور کیہہ کرن لئی کہیا؟
8 پولُس نے کلیسیا نُوں ہدیت دِتی کہ اوہ گُناہ توں توبہ کرن والے مسیحی نُوں دِلوں معاف کرن تے اوہنوں تسلی دین تے ایس گل دا یقین دَوان کہ اوہ اوہنوں پیار کردے نیں۔ غور کرو کہ پولُس صرف ایہی نئیں چاہندا سی کہ اوہدے ہم ایمان اوس بندے نُوں واپس کلیسیا دا حصہ بنا لین سگوں اوہ ایہہ وی چاہندا سی کہ بھین بھرا اپنیاں گلاں تے کماں نال اوہنوں یقین دَوان کہ اوہناں نے اوہنوں دِلوں معاف کر دِتا اے تے اوہ اوہنوں بوہت پیار کردے نیں۔ اِنج اوہ ثابت کر سکدے سن کہ اوہناں نے اوس بندے نُوں کلیسیا چ قبول کر لیا اے۔
9. کجھ بھین بھراواں نُوں شاید اوس بندے نُوں معاف کرنا کیوں مشکل لگ رہیا سی جنہے توبہ کر لئی سی؟
9 شاید اوس کلیسیا دے کجھ مسیحی ایس گل توں خوش نہ ہوئے ہون کہ اوہ بندہ فیر توں کلیسیا دا حصہ بن گیا اے۔ بائبل چ ایہدے بارے نئیں دَسیا گیا، پر اِنج ہو وی سکدا اے۔ ویکھیا جائے تے اوہدے کماں دی وجہ توں پوری کلیسیا نُوں مشکل چوں لنگھنا پیا سی تے شاید اوہدی وجہ توں کجھ بھین بھراواں نُوں دُکھ وی پونچیا سی۔ اوہناں نے یہوواہ دے اصولاں مطابق اپنے چال چلن نُوں پاک رکھن لئی سخت محنت کیتی سی۔ ایس وجہ توں شاید اوہناں چوں کجھ نُوں لگیا ہوئے کہ ایہہ تے بڑی نااِنصافی اے کہ اوس بندے دے اینے وڈے گُناہ دے بعد وی کلیسیا نے اوہنوں قبول کر لیا اے۔ (لُوقا 15:28-30 تے غور کرو۔) ایہہ ایناں ضروری کیوں سی کہ کلیسیا اوس بندے لئی سچی محبت وکھاندی جیہڑا واپس آ گیا اے؟
10، 11. جے بزرگ توبہ کرن والے بندے نُوں معاف نہ کردے تے کیہہ ہوندا؟
10 ذرا سوچو کہ جے کلیسیا دے بزرگ توبہ کرن والے بندہ نُوں فیر توں کلیسیا دا حصہ نہ بنن دیندے یاں کلیسیا اوس بندے لئی محبت نہ وکھاندی تے کیہہ ہوندا۔ اِنج اوہ بندہ اپنے غم دے بھار تھلے دَب جاندا تے ایہہ سوچن لگ پیندا کہ اوہ کدی وی یہوواہ دی خدمت کرن دے لائق نئیں بن سکدا۔ نالے ہو سکدا اے کہ اوہ فیر توں یہوواہ دے نیڑے جان دی کوشش کرنا ای چھڈ دیندا۔
11 جے اوہ اوس بندے نُوں معاف نہ کردے تے نقصان صرف اوس بندے نُوں ای نئیں سگوں پوری کلیسیا نُوں ہوندا۔ یہوواہ نال اوہناں دا رشتہ کمزور ہو جاندا کیونکہ اوہ یہوواہ وانگوں رحمدلی وکھان دی بجائے شیطان وانگوں بےرحمی ظاہر کر رہے ہوندے۔ اِنج اوہ شیطان نُوں ایہہ موقع دے رہے ہوندے کہ اوہ اوہناں دے ذریعے اوس بھرا نُوں یہوواہ توں دُور کردے۔—2-کُرنتھیوں 2:10، 11؛ اِفسیوں 4:27۔
12. کُرنتھس دی کلیسیا یہوواہ دی مثال تے کیویں عمل کر سکدی سی؟
12 کُرنتھس دی کلیسیا دے بھین بھراواں نُوں شیطان دی بجائے یہوواہ دی مثال تے چلن لئی کیہہ کرن دی لوڑ سی؟ اوہناں نُوں توبہ کرن والے بندے نُوں معاف کرن دی لوڑ سی۔ غور کرو کہ بائبل چ خدا دے بندیاں نے اوہدے بارے کیہہ کہیا۔ داؤد نے کہیا: یہوواہ، تُوں چنگا ایں تے معاف کرن نُوں تیار رہنا ایں۔ (زبور 86:5) میکاہ نبی نے لکھیا: یہوواہ تیرے ورگا خدا کون اے جیہڑا بدکاری نُوں معاف کرے تے غلطیاں نُوں بُھل جائے؟ (میکاہ 7:18) نالے یسعیاہ نبی نے کہیا: بھیڑا بندہ اپنی بھیڑی راہ نُوں چھڈ دَوے تے دُوجیاں نُوں نقصان پونچان والا اپنے بھیڑے خیالاں نُوں۔ اوہ یہوواہ وَل آئے جیہڑا اوہدے تے رحم کرے گا، ہاں ساڈے خدا وَل کیونکہ اوہ دل کھول کے معاف کرے گا۔—یسعیاہ 55:7۔
13. توبہ کرن والے بندے نُوں کلیسیا چ بحال کرنا مناسب کیوں سی؟ (بکس ” کُرنتھس دی کلیسیا چ توبہ کرن والے بندے نُوں کدوں بحال کیتا گیا؟“ نُوں ویکھو۔)
13 یہوواہ وانگوں کُرنتھس دی کلیسیا دے بھین بھراواں نُوں توبہ کرن والے بندے نُوں کلیسیا چ قبول کرنا سی تے اوہنوں اپنی محبت دا یقین دَوانا سی۔ پولُس دی ہدیت دے مطابق اوس بندے نُوں معاف کر کے کلیسیا نے فرمانبرداری ظاہر کیتی۔ (2-کُرنتھیوں 2:9) ایہہ گل سچ اے کہ اوس بندے نُوں کلیسیا چوں کڈھے حالے کجھ ای مہینے ہوئے سن، پر اوہدی درستی کرن دا مقصد پورا ہو گیا سی یعنی اوہنے اپنے گُناہ توں توبہ کر لئی سی۔ ایس لئی اوہنوں کلیسیا چ بحال کرن چ دیر لان دی کوئی وجہ نئیں سی۔
یہوواہ وانگوں اِنصاف تے رحمدلی ظاہر کرو
14، 15. کُرنتھس دی کلیسیا چ ایس معاملے نُوں جیویں حل کیتا گیا اوہدے توں اَسی کیہہ سکھنے آں؟ (2-پطرس 3:9) (تصویر نُوں وی ویکھو۔)
14 یہوواہ نے پاک کلام چ ایس واقعے نُوں ایس لئی لکھوایا تاکہ سانوں ہدیت ملے۔ (رومیوں 15:4) ایس واقعے توں اَسی سکھنے آں کہ یہوواہ کلیسیا چ ایہو جہے لوکاں نُوں بالکل برداشت نئیں کردا جیہڑے اپنے گُناہ توں توبہ نئیں کردے۔ شاید کجھ لوکاں نُوں لگے کہ یہوواہ رحمدل خدا اے، ایس لئی اوہ ایہو جہے بندے نُوں کلیسیا چ رہن دَوے گا جیہڑا اپنے گُناہ توں توبہ نئیں کردا۔ پر یہوواہ دے رحمدل ہون دا ایہہ مطلب نئیں کہ اوہ اِک بندے دے گُناہ نُوں برداشت کردا رہوے گا۔ (یہوداہ 4) ایہدے علاوہ یہوواہ صحی تے غلط بارے اپنے معیار نئیں بدل دا۔ جے اوہ اِنج کرے گا تے ایہدے توں کلیسیا دے دُوجے لوکاں لئی رحم ظاہر نئیں ہوئے گا کیونکہ گُناہ کرن والا بندہ اوہناں تے بھیڑا اثر پا سکدا اے۔—اَمثال 13:20؛ 1-کُرنتھیوں 15:33۔
15 پر سانوں ایہہ وی پتہ اے کہ یہوواہ نئیں چاہندا کہ کوئی وی بندہ ماریا جائے سگوں اوہ لوکاں نُوں بچانا چاہندا اے۔ اوہ اوہناں لوکاں تے رحم کردا اے جیہڑے اپنے بھیڑے کماں توں باز آندے نیں تے اپنے آپ نُوں بدلدے نیں تے اوہدے نال اپنے رشتے نُوں فیر توں مضبوط کرن دی کوشش کردے نیں۔ (حِزقیایل 33:11؛ 2-پطرس 3:9 نُوں پڑھو۔) ایس لئی جدوں کُرنتھس دی کلیسیا چ گُناہ کرن والے بندے نے توبہ کیتی تے اپنے آپ نُوں بدلیا تے یہوواہ نے پولُس دے ذریعے کلیسیا نُوں سمجھایا کہ اوہ اوہنوں معاف کر دَوے تے اوہنوں دِلوں قبول کر لوے۔
یہوواہ وانگوں کلیسیا وی اوہناں لئی بڑی محبت تے رحم وکھاندی اے جنہاں نُوں کلیسیا چ بحال کیتا جاندا اے۔ (پیراگراف نمبر 14، 15 نُوں ویکھو۔)
16. کُرنتھس دی کلیسیا دے ایس واقعے توں سانوں یہوواہ بارے کیہہ پتہ چلدا اے؟
16 کُرنتھس دی کلیسیا چ ہون والے معاملے توں اَسی ویکھ سکے کہ یہوواہ پیار کرن والا، نیک تے اِنصاف کرن والا خدا اے۔ (زبور 33:5) کیہہ ایہہ جان کے تواڈے دل چ ایہہ خواہش پیدا نئیں ہوندی کہ تُسی اپنے اسمانی باپ دی ہور وی زیادہ وڈیائی کرو؟ اَسی سارے گُناہگار آں تے سانوں ساریاں نُوں معافی دی لوڑ اے۔ اَسی یہوواہ دے بڑے شکرگزار آں کہ اوہنے فدیے دا بندوبست کیتا اے جدی وجہ توں سانوں اپنے گُناہواں توں معافی مِل سکدی اے۔ سانوں ایہہ جان کے بڑی تسلی تے امید مِلدی اے کہ یہوواہ ساڈے نال پیار کردا اے تے ساڈا بھلا چاہندا اے۔
17. اگلے مضموناں چ اَسی کیہڑے سوالاں دے جواب حاصل کراں گے؟
17 اَج جدوں کلیسیا چ کوئی وڈا گُناہ کردا اے تے اوس معاملے نُوں کیویں حل کیتا جاندا اے؟ کلیسیا دے بزرگ توبہ کرن والے بندے لئی یہوواہ ورگی محبت کیویں وکھاندے نیں تے اوہدی مدد کیویں کردے نیں؟ جدوں بزرگ کلیسیا چوں کسے نُوں کڈھن یاں بحال کرن دا فیصلہ کردے نیں تے کلیسیا نُوں کیہہ کرنا چاہی دا اے؟ ایہناں سوالاں دے جواب اگلے مضموناں چ دِتے جان گے۔
گیت نمبر 106 سچی محبت وکھاؤ
