جیہڑے لفظ دا ترجمہ بائبل دے ‏”‏ترجمہ نوِیں دُنیا“‏ چ ”‏رتھ“‏ کیتا گیا اے اوہ فرق فرق قسماں دے رتھاں وَل اشارہ کردا اے۔ (‏اعمال 8:‏28، 29،‏ 38‏)‏ پر اِنج لگدا اے کہ ایتھوپیا دا خوجہ جیہڑے رتھ تے بیٹھیا ہویا سی، اوہ اوہناں عام رتھاں نالوں وڈا سی جیہڑے جنگ یاں دوڑ دے مقابلے چ استمال ہوندے سن۔ اَسی ایہہ گل کیہڑیاں گلاں دی بنیاد تے کہہ سکنے آں؟‏

ایتھوپیا دا خوجہ اِک بوہت وڈا افسر سی جنہے اِک بڑا لما سفر کیتا سی۔‏ اوہ ایتھوپیا دی ملکہ کنداکے دا اعلیٰ افسر سی تے اوہدے سارے خزانے دا مختار سی۔ (‏اعمال 8:‏27‏)‏ اوس زمانے دے ایتھوپیا چ اَج دا ملک سوڈان تے مصر دا جنوبی حصہ شامل سی۔ پر ایتھوپیا دے خوجے نے سارا سفر اِک ای رتھ تے نئیں کیتا ہونا کیونکہ اوہدے کول لمے سفر لئی سامان وی سی۔ پہلی صدی چ سفر لئی جیہڑے رتھ استمال ہوندے سن اوہناں وچوں کجھ چار پہیاں والے ہوندے سن تے اوہناں دی چھت وی ہوندی سی۔ ایہناں بارے اِک کتاب چ دَسیا گیا اے کہ ”‏ایہناں رتھاں چ زیادہ سامان رکھیا جا سکدا سی، سفر آرام‌دہ ہوندا سی تے اِک بندہ لما سفر وی کر سکدا سی۔“‏

جدوں فِلپّس ایتھوپیا دے خوجے کول آیا تے اوہ پڑھ رہیا سی۔‏ بائبل چ دَسیا گیا اے کہ فِلپّس حبشی خوجے دے رتھ کول بھج کے گیا۔ اوہنے سنیا کہ حبشی خوجہ یسعیاہ نبی دی کتاب پڑھ رہیا سی۔ (‏اعمال 8:‏30‏)‏ سفر کرن والے رتھ اِنج بنائے جاندے سن کہ اوہ تیز نئیں بھج سکدے سن۔ کیونکہ رتھ ہولی ہولی چل رہیا سی ایس لئی خوجے لئی وی رتھ چ بہہ کے پڑھنا مشکل نئیں سی تے فِلپّس وی بھج کے رتھ کول پونچ سکیا سی۔‏

ایتھوپیا دے خوجے نے فِلپّس نُوں درخاست کیتی کہ اوہ رتھ تے اوہدے نال بہہ جائے۔‏ (‏اعمال 8:‏31‏)‏ جیہڑے رتھاں نُوں دوڑ دے مقابلے چ استمال کیتا جاندا سی، اوہناں نُوں صرف کھلو کے ای چلایا جا سکدا سی۔ پر سفر لئی استمال ہون والے رتھاں چ بیٹھن دی جگہ ہوندی سی۔ ایس لئی فِلپّس تے حبشی خوجہ اوہدے تے بہہ سکے سن۔‏

اعمال 8 باب چ لکھے فِلپّس تے ایتھوپیائی خوجے دے واقعے دا جائزہ تریخ چوں مِلن والے ثبوتاں نال لیا گیا۔ ایس لئی ہُن ساڈیاں کتاباں تے رسالیاں چ ایتھوپیائی خوجے نُوں اِک ایہو جہے رتھ چ بیٹھے ہوئے وکھایا جاندا اے جیہڑا اوہناں رتھاں نالوں وڈا ہوندا اے جیہڑے جنگ یاں دوڑ دے مقابلے چ استمال ہوندے سن۔‏