1.‏ کدی کدار سانوں ڈر کیوں لگ سکدا اے؟‏

 ہر بندے نُوں کدی کدار ڈر لگدا اے۔ سچ اے کہ بائبل دا مطالعیا کرن نال اَسی مُردیاں تے ڈراؤنیاں چیزاں دے خوف توں آزاد ہو گئے آں نالے سانوں ایہہ ڈر وی نئیں رہیا کہ مستقبل چ کیہہ ہوئے گا۔ پر فیر وی اَسی اِک ایہو جہے وقت چ رہ رہے آں جدے چ سانوں خوف‌ناک نظارے ویکھن نُوں مل رہے نیں یعنی کہ جنگاں،جُرم تے بیماریاں دا سامنا کرنا پے رہیا اے۔ (‏لُوقا 21:‏11‏)‏ شاید سانوں انساناں دا وی ڈر ہووے جیویں کہ حکومتاں دا جیہڑیاں ساڈے تے ظلم کردیاں نیں یاں اپنے گھر والیاں دا جیہڑے ساڈی مخالفت کردے نیں۔ کجھ لوک شاید سوچن کہ جے میرے تے ہُن یاں مستقبل چ کوئی مشکل آ گئی تے مَیں ایہنوں برداشت نئیں کر سکاں گا۔‏

2.‏ جدوں داؤد جات چ سی تے اوہدے نال کیہہ ہویا؟‏

² داؤد دی زندگی چ ایہو جہے وقت آئے جدوں اوہنوں بڑا ڈر لگیا۔ مثال لئی، جدوں بادشاہ ساؤل اوہدا پچھا کر رہیا سی تے اوہ بھج کے فلستیاں دے شہر جات چلا گیا۔ جات دے بادشاہ اکیس نُوں چھیتی ایہہ پتہ چل گیا کہ داؤد ای اوہ طاقت‌ور جنگجو اے جدے بارے اوہ گیت مشہور اے کہ اوہنے لکھاں فلستیاں نُوں ماریا اے۔ (‏1-‏سموئیل 21:‏10-‏12‏)‏ داؤد ایس گلوں بوہت ڈر گیا۔ اوہ سوچن لگ پیا کہ ہُن اکیس اوہدے نال کیہہ کرے گا۔ داؤد اپنے خوف تے قابو کیویں پا سکیا؟‏

3.‏ زبور 56:‏1-‏3،‏ 11 دے مطابق داؤد نے اپنے ڈر تے کیویں قابو پایا؟‏

³ داؤد نے زبور 56 اوہدوں لکھیا جدوں اوہ جات چ سی۔ ایس زبور چ اوہنے دَسیا کہ اوہ کیوں ایناں ڈریا ہویا سی۔ پر فیر اوہنے ایہہ وی دَسیا کہ اوہ اپنے ڈر تے کیویں قابو پا سکیا۔ اوہنے دَسیا کہ اوہنے یہوواہ تے بھروسا رکھیا۔ ‏(‏زبور 56:‏1-‏3،‏ 11 نُوں پڑھو۔)‏ اِنج کرن دا چنگا نتیجہ نکلیا۔ یہوواہ دی مدد نال اوہنے اپنی جان بچان لئی اِک ایہو جیہا طریقہ کڈھیا جیہڑا عجیب تے ہے سی پر کامیاب ہویا۔ داؤد نے بادشاہ اکیس دے سامنے اِنج ظاہر کیتا جیویں اوہ پاگل اے۔ ایس وجہ توں اکیس نُوں اوہدے توں کھج  چڑھن لگ پئی۔ ہُن اوہ اوہنوں قتل کرن دی بجائے باہر کڈھن دی سوچن لگ پیا۔ اِنج داؤد دی جان بچ گئی۔—‏1-‏سموئیل 21:‏13–‏22:‏1‏۔‏

4.‏ اَسی یہوواہ تے اپنے بھروسے نُوں کیویں ودھا سکنے آں؟ مثال دَوو۔‏

⁴ اَسی وی یہوواہ تے بھروسا کرن نال اپنے ڈر تے قابو پا سکنے آں۔ پر اَسی ایس بھروسے نُوں کیویں ودھا سکنے آں، خاص کر اوہدوں جدوں اَسی ڈرے ہنے آں؟ ایہدے لئی اِک مثال تے غور کرو۔ فرض کرو کہ جے توانوں پتہ لگدا اے کہ توانوں کوئی بیماری اے تے شروع چ ضرور تُسی خوف محسوس کرو گے۔ پر فیر توانوں اِک ایہو جیہا ڈاکٹر مِلدا اے جیہڑا تواڈے ورگے کئی مریضاں دا علاج بڑی چنگی طرحاں کر چُکیا اے۔ شاید جدوں تُسی اوہدے کول جاؤ تے اوہ تواڈی گل بڑے دھیان نال سُنے تے توانوں یقین دَوائے کہ اوہ تواڈی تکلیف نُوں سمجھدا اے۔ اوہ شاید توانوں اِک ایہو جیہا علاج دَسے جیہڑا بوہت سارے مریضاں لئی کامیاب ثابت ہویا اے۔ جیویں جیویں تواڈا اپنے ڈاکٹر تے بھروسا ودھے گا، تواڈا ڈر گھٹ ہوندا جاوے گا۔ ایسے طرحاں اَسی یہوواہ تے وی اپنے بھروسے نُوں ودھا سکنے آں۔ ایہدے لئی اَسی غور کرسکنے آں کہ اوہنے ماضی چ کیہہ کجھ کیتا اے، اوہ ہُن کیہہ کر رہیا اے تے اوہ مستقبل چ کیہہ کجھ کرے گا۔ داؤد نے وی ایہی کیتا سی۔ ایس مضمون چ جدوں اَسی زبور 56 دِیاں کجھ ایتاں تے غور کراں گے تے اَسی ایس گل تے سوچ وچار کراں گے کہ اَسی یہوواہ تے اپنے بھروسے نُوں کیویں ودھا سکنے آں تے اِنج اپنے ڈر تے قابو کیویں پا سکنے آں۔‏

یہوواہ نے ماضی چ کیہہ کجھ کیتا اے؟‏

5.‏ داؤد نے اپنے خوف تے قابو پان لئی کیہڑیاں گلاں تے سوچ وچار کیتا؟ (‏زبور 56:‏12، 13‏)‏

⁵ بھانویں کہ داؤد دی جان خطرے چ سی پر فیر وی اوہنے ایس گل تے غور کیتا کہ یہوواہ نے ماضی چ کیہہ کجھ کیتا اے۔ (‏زبور 56:‏12، 13 نُوں پڑھو۔)‏ اوہ ساری زندگی ایس گل تے سوچ وچار کردا رہیا۔ مثال لئی، کدی کدار اوہ یہوواہ دِیاں بنائیاں ہوئیاں چیزاں تے سوچ‌وچار کردا سی تے اِنج اوہنوں احساس ہوندا سی کہ یہوواہ کِنّاں طاقت‌ور اے تے انساناں نال کِنّاں پیار کردا اے۔ (‏زبور 65:‏6-‏9‏)‏ اوہنے ایس گل تے وی سوچ وچار کیتا کہ یہوواہ نے دُوجیاں لئی کیہہ کجھ کیتا اے۔ (‏زبور 31:‏19؛‏ 37:‏25، 26‏)‏  اوہنے خاص طور تے ایس بارے سوچیا کہ یہوواہ نے اوہدے لئی کیہہ کجھ کیتا اے۔ جیویں کہ اوہنے غور کیتا کہ یہوواہ کیویں ماں دے پیٹ توں ای اوہدی حفاظت کردا رہیا اے۔ (‏زبور 22:‏9، 10‏)‏ ایہناں گلاں تے سوچ وچار کرن نال داؤد دا یہوواہ اُتے بھروسا کِنّاں ودھ گیا ہوئے گا۔‏

6.‏ جدوں سانوں خوف محسوس ہوندا اے تے اوہدوں کیہڑی چیز یہوواہ تے بھروسا رکھن چ ساڈی مدد کردی اے؟‏

⁶ جدوں توانوں خوف محسوس ہوندا اے تے سوچو کہ ”‏یہوواہ نے ماضی چ کیہہ کجھ کیتا اے۔“‏ اِنج کرن دا اِک طریقہ ایہہ وے کہ اوہدیاں بنائیاں ہوئیاں چیزاں تے غور کرو۔ مثال لئی، اَسی پرندیاں تے پُھلاں تے ”‏غور“‏ کر سکنے آں جیہڑے نہ تے یہوواہ دی صورت تے بنائے گئے نیں تے نہ ای اوہدی عبادت کر سکدے نیں فیر وی یہوواہ اوہناں دا خیال رکھدا اے۔ ایس گل تے غور کرن نال ساڈا ایہہ بھروسا ودھے گا کہ یہوواہ ساڈا وی خیال رکھے گا۔ (‏متی 6:‏25-‏32‏)‏ ایہدے علاوہ ایس گل تے وی سوچ وچار کرو کہ یہوواہ نے اپنے بندیاں لئی کیہہ کجھ کیتا اے۔ اِنج کرن لئی تُسی بائبل چوں یہوواہ دے کسے ایہو جہے بندے بارے پڑھ سکدے او جنہے مضبوط ایمان ظاہر کیتا۔ یاں تُسی اَج دے زمانے دے یہوواہ دے کسے بندے بارے پڑھ سکدے او۔‏ a ایہدے نال نال ایس گل تے وی غور کرو کہ یہوواہ نے تواڈے لئی فکر کیویں وکھائی اے۔ اوہ توانوں اپنے وَل کیویں لیایا اے؟ (‏یوحنا 6:‏44‏)‏ اوہنے تواڈیاں دُعاواں دا جواب کیویں دِتا اے؟ (‏1-‏یوحنا 5:‏14‏)‏ توانوں اوہدے پیارے پُتر دی قربانی توں ہر روز کیویں فائدہ ہو رہیا اے؟—‏اِفِسیوں 1:‏7؛ عبرانیوں 4:‏14-‏16‏۔‏

7.‏ دانی‌ایل نبی دے واقعے تے غور کرن نال بھین ونیسا نُوں اپنے ڈر تے قابو پان چ کیویں مدد ملی؟‏

⁷ ہیٹی چ رہن والی اِک بھین جدا ناں ونیسا b اے، اوہنوں اِک بڑی خوف‌ناک صورتحال دا سامنا ہویا۔ اوہدے علاقے دا اِک بندہ ہر روز فون تے میسج کر کے اوہدے تے دباؤ پاندا سی کہ اوہ اوہدے نال جنسی تعلق بنائے۔ بھین ونیسا نے صاف اِنکار کر دِتا۔ پر اوہ بندہ بڑے غصے چ آ گیا، ایتھوں تک کہ اوہ اوہنوں دھمکیاں دین لگ پیا۔ بھین نے دَسیا:‏ ”‏مَیں بوہت ڈر گئی۔“‏ بھین ونیسا اپنے ڈر تے کیویں قابو پا سکی؟ سب توں پہلاں تے اوہنے اپنی حفاظت لئی کجھ قدم چُکے۔ اِک بزرگ دی مدد نال اوہنے پولیس نال رابطہ کیتا۔ ایہدے نال نال اوہنے ایس گل تے وی غور کیتا کہ ماضی چ یہوواہ نے اپنے بندیاں دی حفاظت کیویں کیتی۔ اوہ کہندی اے:‏ ”‏سب توں پہلا بندہ جیہڑا میرے ذہن چ آیا، اوہ دانی‌ایل نبی سی۔ اوہ بے‌قصور سی پر فیر وی اوہنوں بُھکھے شیراں دی غار چ سُٹ دِتا گیا۔ پر یہوواہ نے اوہنوں بچایا۔ مَیں یہوواہ کولوں درخاست کیتی کہ اوہ سارے معاملے نُوں اپنے ہتھ چ لَوے۔ ایس توں بعد میرا ڈر ختم ہو گیا۔“‏—‏دانی‌ایل 6:‏12-‏22‏۔‏

یہوواہ ہُن ساڈی مدد کیویں کر رہیا اے؟‏

8.‏ داؤد نُوں کیہڑی گل دا یقین سی؟ (‏زبور 56:‏8‏)‏

⁸ بھانویں کہ جات چ داؤد دی جان خطرے چ سی پر فیر وی اوہنے اپنے ڈر نُوں اپنے اُتے حاوی نئیں ہون دِتا۔ ایہدی بجائے اوہنے ایس گل تے غور کیتا کہ یہوواہ اوس ویلے اوہدی مدد کیویں کر رہیا سی۔ داؤد نُوں محسوس ہویا کہ یہوواہ اوہدی رہنمائی تے حفاظت کر رہیا اے تے اوہدے احساسات نُوں سمجھدا اے۔ ‏(‏زبور 56:‏8 نُوں پڑھو۔)‏ داؤد دے دوستاں نے وی اوہدا ساتھ دِتا، جیویں کہ یونتن تے کاہن اخیملک نے اوہدا حوصلہ ودھایا تے اوہدی مدد کیتی۔ (‏1-‏سموئیل 20:‏41، 42؛‏ 21:‏6،‏ 8، 9‏)‏ ایہدے علاوہ بھانویں کہ بادشاہ ساؤل اوہدی جان دا دُشمن بنیا ہویا سی پر فیر وی داؤد بچ گیا۔ ایہناں ساریاں گلاں دی وجہ توں داؤد نُوں یقین ہو گیا سی کہ یہوواہ اوہدیاں مشکلاں نُوں جان‌دا اے تے اوہنوں پتہ اے کہ اوہ کیہو جیہا محسوس کر رہیا اے۔‏

9.‏ یہوواہ ساڈے بارے کیہڑیاں گلاں نُوں چنگی طرحاں جان‌دا اے؟‏

⁹ جدوں تُسی کسے ایہو جہی مشکل چوں لنگھ رہے ہوندے او جدی وجہ توں تُسی بوہت ڈر جاندے او تے یاد رکھو کہ یہوواہ نُوں اوس مشکل دا پتہ ہوندا اے تے اوہ ایہہ وی جاندا اے کہ تُسی اوہدے چ کیہو جیہا محسوس کر رہے او۔ مثال لئی، یہوواہ نے نہ صرف ایہہ ویکھیا کہ مصر چ بنی‌اِسرائیل دے نال کیہڑیاں کیہڑیاں نااِنصافیاں ہو رہیاں سن سگوں اوہ اوہناں دے درد نُوں وی چنگی طرحاں جان‌دا سی۔ (‏خروج 3:‏7‏)‏ داؤد نے اِک زبور  چ لکھیا کہ یہوواہ نے اوہدا دُکھ وی ویکھیا اے تے اوہ اوہدے دل دِیاں پریشانیاں وی جاندا اے۔ (‏زبور 31:‏7‏)‏ ایہدے علاوہ جدوں بنی اِسرائیل تے اوہناں دِیاں اپنیاں غلطیاں دی وجہ توں وی مصیبتاں آندیاں سن تے یہوواہ دُکھی ہوندا سی۔ (‏یسعیاہ 63:‏9‏)‏ ایس لئی یاد رکھو جدوں توانوں ڈر لگدا اے تے یہوواہ تواڈے احساسات نُوں سمجھدا اے تے تواڈی مدد کرن دی خواہش رکھدا اے تاکہ تُسی اپنے ڈر تے قابو پا سکو۔‏

10.‏ توانوں ایس گل دا پورا یقین کیوں اے کہ یہوواہ تواڈی مشکل نُوں جان‌دا اے تے ایہدا مقابلہ کرن چ تواڈی مدد کرے گا؟‏

¹⁰ جدوں تُسی کسے مشکل دی وجہ توں ڈر محسوس کردے او تے شاید توانوں ایہہ سمجھ نہ آوے کہ یہوواہ تواڈی مدد کیویں کر رہیا اے۔ تے فیر تُسی کیہہ کر سکدے او؟ دُعا چ یہوواہ کولوں درخاست کرو کہ اوہ ایہہ ویکھن چ تواڈی مدد کرے کہ اوہنے تواڈا ساتھ کیویں دِتا اے۔ (‏2-‏سلاطین 6:‏15-‏17‏)‏ فیر غور کرو کہ کیہہ توانوں کسے تقریر یاں کسے بھین بھرا دے جواب توں حوصلہ ملیا اے؟ یاں فیر کیہہ توانوں کسے کتاب، رسالے، ویڈیو یاں گیت توں تسلی ملی اے؟ کیہہ کسے نے توانوں کوئی ایہو جہی گل کہی اے یاں کوئی ایہو جہی ایت وکھائی اے جدے توں توانوں بڑی ہمت ملی اے؟ شاید کدی کدار ساڈے دل چ بھین بھراواں تے یہوواہ وَلّوں مِلن والی تلیم دی قدر گھٹ ہو جائے۔ پر سانوں یاد رکھنا چاہی دا اے کہ ایہہ چیزاں یہوواہ وَلّوں بڑا زبردست تحفہ نیں۔ (‏یسعیاہ 65:‏13؛‏ مرقس 10:‏29، 30‏)‏ ایہہ ثابت کردیاں نیں کہ اوہ ساڈی فکر رکھدا اے۔ (‏یسعیاہ 49:‏14-‏16‏)‏ ایہناں توں ایہہ وی پتہ چلدا اے کہ اَسی یہوواہ تے پورا بھروسا کر سکنے آں۔‏

11.‏ اپنے ڈر تے قابو پان چ کیہڑی چیز نے آئدہ دی مدد کیتی؟‏

¹¹ سینیگال چ رہن والی اِک بھین جدا ناں آئدہ اے، اوہنے ویکھیا کہ یہوواہ نے اِک مشکل چ اوہدی مدد کیویں کیتی۔ اوہ اپنے بھین بھراواں وچوں سب توں وڈی اے ایس لئی اوہدے ماں پیو چاہندے سن کہ اوہ نوکری کرے تے اپنا تے اپنے بھین بھراواں دا خرچہ چُکے۔ پر جدوں اوہنے پہل‌کار بنن لئی اپنی زندگی نُوں سادہ کیتا تے اوہنوں پیسے دھیلے دی تنگی دا سامنا ہون لگ پیا۔ اوہدے گھر والے اوہدے توں ناراض ہو گئے تے اوہنوں گلاں کرن لگ پئے۔ بھین کہندی اے:‏ ”‏مینوں ڈر سی کہ مَیں اپنے امی‌ابو دی مدد نئیں کر سکاں گی تے اوہ مینوں چھڈ دین گے۔ مَیں تے ایہناں حالاتاں لئی یہوواہ نُوں وی اِلزام دِتا۔“‏ فیر بھین آئدہ نے عبادت تے اِک تقریر سنی۔ ایس توں بعد اوہنے کہیا:‏ ”‏بھرا نے تقریر چ دَسیا کہ ساڈے دل چ جیہڑے وی دُکھ ہوندے نیں، یہوواہ اوہناں نُوں جان‌دا اے۔ بزرگاں تے بھین بھراواں دے مشوریاں دی وجہ توں ہولی ہولی  مینوں یقین ہو گیا کہ یہوواہ مینوں پیار کردا اے۔ مَیں اِک نویں جذبے نال فیر توں یہوواہ کولوں دُعا کرنی شروع کر دِتی تے جدوں مَیں ویکھیا کہ اوہ میریاں دُعاواں دا جواب کیویں دے رہیا اے تے میرے دل نُوں بڑا سکون ملیا۔“‏ کجھ چِر بعد آئدہ نُوں نوکری وی مل گئی جدی وجہ توں اوہ نہ صرف پہل‌کار دے طور تے اپنے خرچے پورے کر سکی سگوں اپنے گھر والیاں دی وی مدد کر سکی۔ ہُن اوہ کہندی اے:‏ ”‏مَیں یہوواہ تے پورا بھروسا کرنا سکھ لیا اے۔ ہُن جدوں مَیں دُعا کرنی آں تے میرے سارے ڈر غائب ہو جاندے نیں۔“‏

یہوواہ مستقبل چ کیہہ کجھ کرے گا؟‏

12.‏ زبور 56:‏9 دے مطابق داؤد نُوں کیہڑی گل دا یقین سی؟‏

¹² زبور 56:‏9 نُوں پڑھو۔‏ ایس ایت توں پتہ چلدا اے کہ داؤد نے اپنے ڈر تے قابو پان لئی ہور کیہہ کیتا۔ بھانویں کہ اوہدی زندگی خطرے چ سی پر فیر وی اوہنے ایس گل تے غور کیتا کہ یہوواہ اوہدے لئی کیہہ کجھ کرے گا۔‏ داؤد جان‌دا سی کہ یہوواہ صحی وقت تے اوہنوں اوہدیاں مصیبتاں توں نجات دَوائے گا کیونکہ اوہنے وعدہ کیتا سی کہ داؤد بنی‌اِسرائیل دا اگلا بادشاہ ہوئے گا۔ (‏1-‏سموئیل 16:‏1،‏ 13‏)‏ داؤد دی نظر چ یہوواہ دا وعدہ اِنج سی جیویں اوہ پورا ہو چُکیا ہوئے۔‏

13.‏ اَسی یہوواہ تے کیس گل دا بھروسا رکھ سکنے آں؟‏

¹³ یہوواہ نے تواڈے لئی کیہہ کرن دا وعدہ کیتا اے؟ اَسی ایہہ توقع نئیں کر سکدے کہ یہوواہ ساڈے تے کوئی مشکل نئیں آن دَوے گا۔ پر اَسی پورا یقین رکھ سکنے آں کہ اَج ساڈے تے جیہڑیاں مصیبتاں آندیاں نیں، یہوواہ نوِیں دُنیا چ اوہناں دا ناں نشان مٹا دَوے گا۔ (‏یسعیاہ 25:‏7-‏9‏)‏ ساڈے خالق یہوواہ چ اینی طاقت اے کہ اوہ مُردیاں نُوں زندہ کر دَوے گا تے ساڈیاں بیماریاں تے پریشانیاں نُوں ختم کر دَوے گا۔—‏1-‏یوحنا 4:‏4‏۔‏

14.‏ اَسی کیہڑیاں گلاں تے سوچ وچار کر سکنے آں؟‏

¹⁴ جدوں توانوں ڈر لگدا اے تے ایس گل تے سوچ وچار کرو کہ یہوواہ مستقبل چ کیہہ کجھ کرے گا۔ سوچو کہ اوس ویلے توانوں کیہو جیہا لگے گا جدوں شیطان نئیں ہوئے گا، دُنیا چ بھیڑے لوکاں دی جگہ چنگے لوک ہون گے تے ہر گزردے دن دے نال نال ساڈے وچوں کمیاں، کمزوریاں تے گُناہ ختم ہوندے جان گے۔ 2014 دی کنونشن تے اِک منظر چ وکھایا گیا سی کہ اَسی اپنی امید تے کیویں سوچ وچار کر سکنے آں۔ اوس منظر چ اِک پیو اپنے خاندان نُوں دَسدا اے کہ جے 2-‏تیمُتھیُس 3:‏1-‏5 نوِیں دُنیا بارے لکھی جاندی تے ایہدے چ کیہہ لکھیا ہوندا:‏ ”‏نوِیں دُنیا چ خوشیاں نال بھریا وقت آئے گا۔ کیونکہ لوک دُوجیاں نال پیار کرن والے، سچائی نال پیار کرن والے، فروتن، خاکسار، خدا دی وڈیائی کرن والے، ماں پیو دے فرمانبردار، شکرگزار، وفادار، خاندانی محبت نال بھرے ہوئے، لچک رکھن والے، دُوجیاں بارے چنگیاں گلاں کرن والے، اپنے آپ تے قابو رکھن والے، نرم‌مزاج، اچھائی نال پیار کرن والے، بھروسے دے لائق، گل منن والے تے دُوجیاں نُوں اپنے نالوں بہتر سمجھن والے ہون گے۔ اوہ موج مستی نُوں پیار کرن دی بجائے خدا نال پیار کرن گے۔ اوہ دلوں خدا دی عبادت کرن والے ہون گے۔ ایس طرحاں دے لوکاں نال جُڑے رہوو۔“‏ کیہہ تُسی اپنے گھر والیاں تے ہم‌ایماناں نال ایس بارے گل کردے او کہ نوِیں دُنیا چ زندگی کیہو جہی ہوئے گی؟‏

15.‏ کیہڑی چیز نے اپنے ڈر تے قابو پان چ تانیہ دی مدد کیتی؟‏

¹⁵ شمالی مقدونیہ چ رہن والی اِک بھین جدا ناں تانیہ اے، جدوں اوہنے مستقبل چ مِلن والیاں برکتاں تے سوچ وچار کیتا تے اوہنوں اپنے ڈر تے قابو پان چ مدد ملی۔ اوہدے ماں پیو اوہدے بائبل کورس کرن دے بڑے خلاف سن۔ اوہ کہندی اے:‏ ”‏مینوں جیس گل دا ڈر سی، اوہی ہویا۔ ہر عبادت دے بعد مینوں امی توں مار پیندی سی۔ امی‌ابو نے مینوں دھمکی لائی کہ جے مَیں یہوواہ دی گواہ بن گئی تے اوہ مینوں جانوں مار دین گے۔“‏ اخیر تانیہ دے ماں پیو نے اوہنوں گھروں کڈھ دِتا۔ ایہدے تے اوہنے کیہو جیہا رویہ وکھایا؟ اوہ دَسدی اے:‏ ”‏مَیں اپنا دھیان ایس گل تے رکھیا کہ یہوواہ دی وفادار رہن نال مَیں نویں دُنیا چ ہمیشاں تک خوش رہ سکاں گی۔ مَیں ایس بارے وی سوچیا کہ اَج جو کجھ میرے کول نئیں رہیا، اوہدے بدلے یہوواہ نوِیں دُنیا چ مینوں کیہہ کجھ دَوے گا تے کیویں اوہ پرانیاں یاداں نُوں مٹا دَوے گا۔“‏ تانیہ یہوواہ دی وفادار رہی تے اوہدی مدد نال اوہنوں رہن لئی اِک جگہ وی مل گئی۔ ہُن اوہدی شادی اِک بڑے چنگے بھرا  نال ہو گئی اے تے اوہ دونویں مل کے بڑی خوشی نال کل وقتی طور تے یہوواہ دی خدمت کر رہے نیں۔‏

یہوواہ اُتے اپنے بھروسے نُوں ودھاندے جاؤ

16.‏ جدوں لُوقا 21:‏26-‏28 چ لکھے واقعے ساڈیاں اکھاں دے سامنے ہون گے تے اوہدوں کیہڑی چیز قائم تے مضبوط رہن چ ساڈی مدد کرے گی؟‏

¹⁶ وڈی مصیبت دے دوران لوک خوف دے مارے چکرا جان گے۔ پر خدا دے بندے قائم تے مضبوط رہن گے۔ ‏(‏لُوقا 21:‏26-‏28 نُوں پڑھو۔)‏ اوس ویلے اَسی ڈر نُوں اپنے اُتے کیوں نئیں حاوی ہون دَواں گے؟ کیونکہ اَسی پہلے توں ای یہوواہ تے بھروسا کرنا سکھیا ہوئے گا۔ تانیہ جدا پچھلے پیراگراف چ ذکر ہویا سی دَسدی اے کہ یہوواہ نے ماضی چ جیویں اوہدی مدد کیتی، اوہدی وجہ توں اوہ ہُن اپنیاں دُوجیاں مشکلاں دا وی مقابلہ کر پا رہی اے۔ اوہ کہندی اے:‏ ”‏مَیں سکھیا اے کہ یہوواہ سانوں کسے وی مشکل نُوں برداشت کرن دے قابل بنا سکدا اے تے سانوں برکتاں دیندا اے۔ کدی کدار سانوں لگ سکدا اے کہ دُوجیاں دا جو دل کردا اے، اوہ ساڈے نال کردے نیں۔ پر سچ تے ایہہ وے کہ اوہ یہوواہ نالوں زیادہ طاقت‌ور نئیں نیں۔ تے نالے کوئی صورتحال بھانویں کِنّی ای مشکل کیوں نہ لگے، اوہ اخیر ختم ہو ای جاندی اے۔“‏

17.‏ 2024 لئی ساڈی سالانہ ایت ساڈی مدد کیویں کرے گی؟ (‏پہلے صفحے دی تصویر نُوں ویکھو۔)‏

¹⁷ اَج دے زمانے چ ڈر بوہت عام ہو گیا اے۔ پر داؤد وانگوں اَسی اپنے ڈر تے قابو پا سکنے آں۔ 2024 لئی ساڈی سالانہ ایت داؤد دی دُعا اے جدے چ اوہنے یہوواہ نُوں کہیا:‏ جدوں مینوں ڈر لگدا اے تے مَیں تیرے تے بھروسا کرنا واں۔ (‏زبور 56:‏3‏)‏ اِک کتاب چ ایس ایت بارے دسیا گیا اے کہ داؤد ”‏اپنیاں مشکلاں تے اوہناں گلاں بارے نئیں سوچدا رہیا جنہاں دی وجہ توں اوہنوں ڈر لگ سکدا سی۔ ایہدی بجائے اوہنے اوہدے تے بھروسا رکھیا جیہڑا اوہنوں مصیبتاں توں چھڈا سکدا سی۔“‏ آن والے مہینیاں چ سالانہ ایت بارے سوچدے رہوو، خاص کر اوہدوں جدوں توانوں ڈر لگدا اے۔ وقت کڈھ کے ایس گل تے سوچ‌وچار کرو کہ یہوواہ نے ماضی چ کیہہ کجھ کیتا اے، اوہ ہُن ساڈی مدد کیویں کر رہیا اے تے اوہ مستقبل چ کیہہ کجھ کرے گا۔ فیر داؤد وانگوں تُسی وی کہہ سکو گے:‏ مَیں خدا تے بھروسا رکھنا واں ایس لئی مینوں کوئی ڈر نئیں۔—‏زبور 56:‏4‏۔‏