1.‏ جدوں تُسی یہوواہ بارے سوچدے او تے تواڈے ذہن چ کیہہ آندا اے؟‏

 کیہہ تُسی کدی ایہہ سوچن دی کوشش کیتی اے کہ یہوواہ کیہو جیہا نظر آندا اے؟ جدوں تُسی دُعا چ اوہدے نال گل کردے او تے تواڈے ذہن چ کیہہ آندا اے؟ ایہہ گل سچ اے کہ اَسی یہوواہ نُوں ویکھ نئیں سکدے پر بائبل چ اوہدے بارے فرق فرق گلاں دَسیاں گئیاں نیں جیویں کہ اوہنوں سورج، ڈھال تے بھسم کر دین والی اَگ کہیا گیا اے۔ (‏زبور 84:‏11؛‏ عبرانیوں 12:‏29‏)‏ ایہدے علاوہ اوہدی موجودگی نُوں نیلم دے پتھر، چمک‌دار دھات تے خوب‌صورت دھنک وانگوں کہیا گیا اے۔ (‏حِزقی‌ایل 1:‏26-‏28‏)‏ ایہناں وچوں کجھ گلاں شاید سانوں حیرت چ پا دین یاں ہو سکدا اے کہ ایہناں دی وجہ توں اَسی خوف‌زدہ ہو جائیے۔‏

2.‏ کیہڑیاں گلاں دی وجہ توں کجھ لوکاں نُوں یہوواہ دے نیڑے جانا مشکل لگ سکدا اے؟‏

² اَسی یہوواہ نُوں ویکھ نئیں سکدے ایس لئی ہو سکدا اے کہ سانوں ایس گل تے یقین کرنا مشکل لگے کہ اوہ ساڈے نال پیار کردا اے۔ کجھ لوکاں نے اپنی زندگی چ بڑیاں تکلیفاں ویکھیاں ہوندیاں نیں ایس لئی اوہناں نُوں لگدا اے کہ یہوواہ اوہناں نُوں پیار نئیں کردا۔ یاں فیر شاید اوہناں دے باپ نے اوہناں لئی کدی محبت نئیں وکھائی ہوندی۔ یہوواہ ایہناں سارے احساسات نُوں سمجھدا اے تے اوہ جان‌دا اے کہ ایہناں دا ساڈے تے کیہہ اثر ہوندا اے۔ ایس لئی اوہنے بائبل چ اپنے بارے بوہت کجھ لکھوایا اے۔‏

3.‏ سانوں یہوواہ دی محبت بارے گہرائی نال کیوں سوچنا چاہی دا اے؟‏

³ بائبل چ دَسیا گیا اے کہ یہوواہ محبت اے۔ (‏1-‏یوحنا 4:‏8‏)‏ اوہ ہر کم محبت دی وجہ توں کردا اے۔ اوہ ایناں محبت کرن والا خدا اے کہ اوہ اوہناں لوکاں لئی وی محبت ظاہر کردا اے جیہڑے اوہنوں پیار نئیں کردے۔ (‏متی 5:‏44، 45‏)‏ ایس مضمون چ اَسی یہوواہ تے اوہدی محبت بارے بوہت کجھ سکھاں گے۔ جِنّاں زیادہ اَسی یہوواہ بارے سکھاں گے اونی زیادہ ساڈے دل چ اوہدے لئی محبت ودھے گی۔‏

یہوواہ سانوں بوہت پیار کردا اے

4.‏ یہوواہ دی شفقت بارے سوچ کے توانوں کیہو جیہا محسوس ہوندا اے؟ (‏تصویر نُوں وی ویکھو۔)‏

⁴ یہوواہ بوہت ای شفیق اے۔ (‏یعقوب 5:‏11‏)‏ اوہنے بائبل چ دَسیا اے کہ اوہ اِک پیار کرن والی ماں  وانگوں اے۔ (‏یسعیاہ 66:‏12، 13‏)‏ ذرا اِک ماں بارے سوچو جیہڑی بڑے پیار نال اپنے چھوٹے بچے دی دیکھ‌بھال کردی اے۔ اوہ اوہنوں اپنی گودی چ بٹھاندی اے تے بڑے لاڈ نال اوہدے نال گلاں کردی اے۔ جدوں اوہ رو رہیا ہوندا اے یاں تکلیف چ ہوندا اے تے اوہ فوراً اوہدی تکلیف نُوں دُور کرن دی کوشش کردی اے۔ ایسے طرحاں جدوں اَسی تکلیف چ ہُنے آں تے اَسی یہوواہ دی محبت تے بھروسا کر سکنے آں۔ زبور لکھن والے اِک بندے نے کہیا:‏ جدوں میرا دل فکراں نال بھر جاندا اے تے تیری تسلی میری جان نُوں خوش کردی اے۔—‏زبور 94:‏19‏۔‏

5.‏ یہوواہ دی اَٹل محبت تواڈے لئی کِنّی اہم اے؟‏

⁵ یہوواہ ساڈے نال اَٹل محبت کردا اے۔ (‏زبور 103:‏8‏)‏ جدوں ساڈے کولوں کوئی غلطی ہو جاندی اے تے اوہ سانوں پیار کرنا چھڈ نئیں دیندا۔ بنی‌اِسرائیل نے وار وار یہوواہ دی نافرمانی کیتی پر جدوں اوہناں وچوں کجھ نے توبہ کیتی تے یہوواہ نے اوہناں لئی اپنی محبت دا اظہار اِنج کیتا:‏ تُوں میری نگاہ چ انمول تے عزت دے لائق ٹھہریا تے مَیں تینوں پیار کرنا واں۔ (‏یسعیاہ 43:‏4، 5‏)‏ یہوواہ دی محبت بدلی نئیں اے۔ اَسی ہمیشاں اوہدے تے آس لا سکنے آں۔ جدوں ساڈے کولوں کوئی بوہت وڈی غلطی ہو جاندی اے تے یہوواہ سانوں چھڈ نئیں دیندا۔ جدوں اَسی توبہ کرنے آں تے یہوواہ کول واپس آ جانے آں تے اَسی ایہہ ویکھ سکنے آں کہ اوہ ہُن وی ساڈے نال محبت کردا اے۔ اوہنے وعدہ کیتا اے کہ اوہ دل کھول کے معاف کرے گا۔ (‏یسعیاہ 55:‏7‏)‏ تے جدوں یہوواہ سانوں معاف کر دیندا اے تے اوہدے وَلّوں تازگی دے دن آندے نیں۔—‏اعمال 3:‏19‏۔‏

6.‏ زِکریاہ 2:‏8 توں سانوں یہوواہ بارے کیہہ پتہ چلدا اے؟‏

⁶ زِکریاہ 2:‏8 نُوں پڑھو۔‏ یہوواہ سانوں بڑا پیار کردا اے ایس لئی اوہ ساڈی تکلیف نُوں فوراً محسوس کردا اے تے سانوں بچانا چاہندا اے۔ جدوں اَسی دُکھی ہُنے آں تے اوہ وی دُکھی ہوندا اے۔ یہوواہ سانوں اپنی اَکھ دی پتلی وانگوں سمجھدا اے۔ (‏زبور 17:‏8‏)‏ اَکھ جسم دا بڑا خاص تے نازک حصہ ہوندی اے۔ جدوں یہوواہ سانوں اپنی اَکھ دی پتلی وانگوں کہندا تے اِک لحاظ نال اوہ ایہہ کہہ رہیا ہوندا اے کہ ”‏جیہڑا توانوں تکلیف پونچاندا اے، اوہ میری سب توں نازک چیز نُوں تکلیف پونچا رہیا ہوندا اے۔“‏ ایس لئی اَسی اوہدے کولوں دُعا کرسکنے آں کہ اوہ اپنی اَکھ دی پتلی وانگوں ساڈی حفاظت کرے۔‏

7.‏ سانوں یہوواہ دی محبت تے اپنے بھروسے نُوں کیوں ودھانا چاہی دا اے؟‏

⁷ یہوواہ چاہندا اے کہ اَسی ایس گل دا پکا یقین رکھیئے کہ اوہ سانوں پیار کردا اے۔ پر اوہ ایہہ وی جان‌دا اے کہ اپنی زندگی چ ہون والیاں بُریاں چیزاں دی وجہ توں شاید اَسی ایہہ سوچن لگ پئیے کہ پتہ نئیں اوہ سانوں پیار وی کردا اے یاں نئیں۔ یاں شاید اَسی ہُن ایہو جہی صورتحال دا سامنا کر رہے آں جدی وجہ توں یہوواہ دی محبت تے بھروسا کرنا سانوں مشکل لگ رہیا اے۔ یہوواہ دی محبت تے اپنے بھروسے نُوں ودھان لئی سانوں کیہہ کرنا  پووے گا؟ ایہدے لئی سانوں ایس گل تے غور کرن دی لوڑ اے کہ یہوواہ نے یسوع مسیح، مسح‌شُدہ مسیحیاں تے ساڈے ساریاں لئی محبت دا اظہار کیویں کیتا اے۔‏

یہوواہ اپنی محبت کیویں ظاہر کردا اے؟‏

8.‏ یسوع نُوں ایس گل دا یقین کیوں سی کہ اوہدا باپ اوہدے نال محبت کردا اے؟‏

⁸ یہوواہ تے اوہدا پُتر اِک دُوجے نال بڑا پیار کردے نیں۔ اوہناں دا رشتہ کائنات چ سب توں پرانا اے۔ کئی موقعیاں تے یہوواہ نے کُھل کے یسوع لئی اپنی محبت دا اظہار کیتا۔ ایہدی اِک مثال متی 17:‏5 توں مِلدی اے۔ ایس ایت چ یہوواہ یسوع بارے صرف ایہہ وی کہہ سکدا سی کہ ”‏مَیں ایہدے توں خوش آں۔“‏ پر یہوواہ دَسنا چاہندا سی کہ اوہ یسوع نُوں کِنّاں پیار کردا اے ایس لئی اوہنے ایہہ وی کہیا:‏ ”‏ایہہ میرا پیارا پُتر اے۔“‏ یہوواہ نُوں یسوع تے بڑا فخر سی خاص کر ایس لئی کہ اوہ اپنی جان دین لئی تیار سی۔ (‏اِفِسیوں 1:‏7)‏ تے یسوع نُوں وی ایس گل تے کوئی شک نئیں سی کہ اوہدا باپ اوہنوں پیار کردا اے۔ یسوع نے ایہہ گل کئی وار بڑے یقین نال کہی کہ باپ اوہنوں پیار کردا اے۔—‏یوحنا 3:‏35؛‏ 10:‏17؛‏ 17:‏24‏۔‏

9.‏ کیہڑی گل توں ظاہر ہوندا اے کہ یہوواہ پاک روح نال مسح ہوئے مسیحیاں نال پیار کردا اے؟ وضاحت کرو۔ (‏رومیوں 5:‏5‏)‏

⁹ یہوواہ پاک روح نال مسح ہوئے مسیحیاں نُوں اپنی محبت دا یقین دَواندا اے۔ ‏(‏رومیوں 5:‏5 نُوں پڑھو۔)‏ ذرا ایت دے ایس حصے تے غور کرو:‏ ساڈے دل خدا دی محبت نال بھر گئے نیں۔ اِک کتاب چ ایہدی وضاحت اِنج کیتی گئی اے:‏ ”‏جیس طرحاں چشمے توں لگاتار پانی نکلدا رہندا اے اوسے طرحاں خدا دی محبت لگاتار ساڈے دل نُوں بھردی رہندی اے۔“‏ ایس گل توں پتہ چلدا اے کہ یہوواہ پاک روح نال مسح کیتے ہوئے مسیحیاں نال کِنّاں زیادہ پیار کردا اے۔ تے ایہہ مسیحی جان‌دے نیں کہ خدا اوہناں نُوں پیار کردا اے۔ (‏یہوداہ 1‏)‏ یہوواہ دی محبت بارے اوہناں دے جذبات یوحنا رسول دی ایس گل توں پتہ چلدے نیں:‏ ”‏غور کرو کہ باپ نے سانوں ایناں پیار کیتا اے کہ اوہنے سانوں اپنے بچے ہون دا مان بخشیا اے۔“‏ (‏1-‏یوحنا 3:‏1‏)‏ کیہہ یہوواہ صرف مسح‌شُدہ مسیحیاں نال محبت کردا اے؟ جی نئیں، سگوں اوہنے ساڈے ساریاں لئی اپنا پیار ظاہر کیتا اے۔‏

10.‏ ساڈے لئی یہوواہ دی محبت دا سب توں وڈا ثبوت کیہہ اے؟‏

¹⁰ یہوواہ دی محبت دا سب توں وڈا ثبوت کیہہ اے؟ فدیے دے بندوبست توں ثابت ہو گیا کہ یہوواہ جِنّی محبت سانوں کوئی نئیں کر سکدا۔ (‏یوحنا 3:‏16؛‏ رومیوں 5:‏8‏)‏ یہوواہ نے ساڈے لئی اپنے پیارے پُتر نُوں قربان کر دِتا تاکہ ساڈے گُناہ معاف ہو سکن تے اَسی اوہدے دوست بن سکئے۔ (‏1-‏یوحنا 4:‏10‏)‏ جدوں اَسی ایس گل تے سوچ وچار کرنے آں کہ یہوواہ تے یسوع مسیح نے ساڈے لئی کِنّی وڈی قیمت دِتی اے تے اَسی سمجھ جانے آں کہ اوہ ساڈے وچوں ہر اِک نُوں کِنّاں پیار کردے نیں۔ (‏گلتیوں 2:‏20‏)‏ یہوواہ نے فدیے دا بندوبست صرف ایس لئی نئیں کیتا کہ انصاف کرن لئی ایہہ ضروری سی سگوں اوہنے محبت دی وجہ توں ایہہ بندوبست کیتا۔ اپنی سب توں قیمتی چیز نُوں قربان کر کے یہوواہ نے ایہہ ظاہر کیتا کہ اوہ سانوں کِنّاں پیار کردا اے۔ اوہنے ساڈے لئی اپنے پُتر نُوں تکلیف سہن دِتی تے مرن دِتا۔‏

11.‏ اَسی یرمیاہ 31:‏3 توں کیہہ سکھنے آں؟‏

¹¹ اَسی ویکھ لیا اے کہ یہوواہ اپنے جذبات لُکا کے نئیں رکھدا سگوں کُھل کے ایہناں بارے دَسدا اے۔ ‏(‏یرمیاہ 31:‏3 نُوں پڑھو۔)‏ یہوواہ سانوں پیار کردا اے ایس لئی اوہنے سانوں اپنے وَل کِھچ لیا اے۔ (‏اِستثنا 7:‏7، 8 تے غور کرو۔)‏ کوئی وی شے سانوں اوہدی محبت توں جدا نئیں کر سکدی۔ (‏رومیوں 8:‏38، 39‏)‏ یہوواہ دی محبت بارے تُسی کیہو جیہا محسوس کردے او؟ زبور 23 نُوں پڑھو تے غور کرو کہ داؤد تے یہوواہ دی محبت تے شفقت دا کیہہ اثر ہویا تے ایہدا ساڈے تے کیہہ اثر ہو سکدا اے۔‏

یہوواہ دی محبت تے غور کر کے توانوں کیہو جیہا محسوس ہوندا اے؟‏

12.‏ تُسی زبور 23 نُوں اپنے لفظاں چ کیویں بیان کرو گے؟‏

¹² زبور 23:‏1-‏6 نُوں پڑھو۔‏ زبور 23 چ داؤد نے دَسیا کہ اوہنوں ایس گل دا پکا یقین سی کہ یہوواہ اوہنوں پیار کردا اے تے اوہدا خیال رکھدا اے۔ داؤد نے اوس دوستی دا ذکر کیتا جیہڑی اوہدے تے اوہدے چرواہے یہوواہ دے درمیان سی۔ داؤد پوری طرحاں یہوواہ تے بھروسا کردا سی تے اوہ چاہندا سی کہ یہوواہ اوہدی رہنمائی کرے۔ داؤد نُوں ایس گل تے بھروسا سی کہ یہوواہ ہر دن اوہدے لئی محبت وکھائے گا۔ پر داؤد نُوں یہوواہ دی محبت تے ایناں یقین کیوں سی؟‏

13.‏ داؤد نُوں ایس گل دا پکا یقین کیوں سی کہ یہوواہ اوہدا خیال رکھے گا؟‏

¹³ مینوں کسے چیز دی کمی نئیں ہوئے گی۔‏ داؤد نے محسوس کیتا سی کہ یہوواہ نے ہمیشاں اوہدا خیال رکھیا اے تے جیس چیز دی اوہنوں لوڑ سی اوہنوں دِتی سی۔ داؤد یہوواہ دا قریبی دوست سی تے یہوواہ اوہدے توں خوش سی۔ ایس لئی اوہنوں ایس گل دا پکا یقین سی کہ بھانویں کجھ وی ہو جائے، یہوواہ اوہدیاں ضرورتاں نُوں پورا کردا رہوے گا۔ کیونکہ داؤد نُوں ایس گل دا پکا یقین سی کہ یہوواہ اوہنوں پیار کردا اے تے اوہدا خیال رکھے گا ایس لئی اوہ حدوں ودھ پریشان نئیں ہویا سگوں خوش تے مطمئن رہیا۔—‏زبور 16:‏11‏۔‏

14.‏ یہوواہ کیہڑے طریقیاں نال ساڈا خیال رکھدا اے؟‏

¹⁴ یہوواہ بڑے پیار نال ساڈا خیال رکھدا اے، خاص کر اوہدوں جدوں اَسی کسے مشکل چوں لنگھ رہے ہُنے آں۔ بھین کلیئر a جنہے 20 سال توں زیادہ عرصے تک بیت‌ایل چ خدمت کیتی، اوہدے گھر والیاں تے اِک توں بعد اِک مشکل آئی۔ بھین کلیئر نُوں سمجھ نئیں آ رہیا سی کہ اوہ اوہناں دی مدد کیویں کرے۔ اوہدے ابو نُوں فالج ہو گیا، اوہدی اِک بھین کلیسیا چوں خارج ہو گئی، اوہدے گھر والیاں دا کاروبار ٹھپ ہو گیا تے اوہناں دا گھر وی وِک گیا۔ ایس عرصے دے دوران یہوواہ نے اوہدے گھر والیاں دا خیال کیویں رکھیا؟ بھین کلیئر نے کہیا:‏ ”‏یہوواہ نے ایس گل دا خیال رکھیا کہ میرے گھر والیاں دِیاں ہر روز دِیاں ضرورتاں پوریاں ہوندیاں رہن۔ کئی وار یہوواہ نے سانوں اوہ چیزاں وی دِتیاں جنہاں بارے اَسی سوچیا وی نئیں سی۔ مَیں اکثر اوہناں موقعیاں بارے سوچنی آں جدوں یہوواہ نے ساڈی مدد کیتی۔ مَیں اوس وقت نُوں کدی وی نئیں بُھلاں گی۔ ایہناں گلاں نُوں یاد رکھن دی وجہ توں مَیں مشکلاں چ ہمت نئیں ہاردی۔“‏

15.‏ داؤد تازہ‌دم کیوں محسوس کردا سی؟ (‏تصویر نُوں وی ویکھو۔)‏

¹⁵ اوہ مینوں تازگی دیندا اے۔‏ کدی کدار داؤد اپنیاں مشکلاں دی وجہ توں بوہت پریشان ہو جاندا سی۔ (‏زبور 18:‏4-‏6‏)‏ جدوں اوہ ویکھدا سی کہ یہوواہ اوہنوں پیار کردا اے تے اوہدا خیال رکھدا اے تے اوہ تازہ‌دم  ہو جاندا سی۔ یہوواہ اپنے ایس دوست نُوں ہرے ہرے میداناں چ بٹھاندا سی تے اوہنوں راحت دے چشمیاں کول لے جاندا سی۔ ایس وجہ توں داؤد نُوں ہمت مِلدی سی تے اوہ مشکلاں دے باوجود وی یہوواہ دی خدمت کردا رہندا سی۔—‏زبور 18:‏28-‏32‏۔‏

16.‏ یہوواہ دی محبت نے توانوں تازہ‌دم کیویں کیتا اے؟‏

¹⁶ اَج جدوں اَسی مشکلاں دا سامنا کر رہے ہُنے آں تے اَسی وی کہہ سکنے آں کہ ایہہ یہوواہ دی شفقت اے کہ اَسی ہلاک نئیں ہوئے۔ (‏نوحہ 3:‏22؛‏ کُلسّیوں 1:‏11‏)‏ ذرا بھین ریچل دی مثال تے غور کرو۔جدوں کورونا دی وبا دے دوران اوہدے شوہر نے اوہنوں تے یہوواہ نُوں چھڈ دِتا تے اوہ بوہت دُکھی ہو گئی۔ یہوواہ نے بھین ریچل دا حوصلہ ودھان لئی کیہہ کیتا؟بھین نے دَسیا:‏ ”‏یہوواہ مینوں احساس دَواندا رہیا کہ اوہ مینوں بڑا پیار کردا اے۔ اوہنے مینوں ایہو جہے دوست دِتے جیہڑے میرے نال وقت گزاردے سن، میرے لئی کھانا لیاندے سن، میرا حوصلہ ودھان لئی مینوں ایتاں لکھ کے گھلدے سن تے میسج کردے سن، میرے وَل مسکرا کے ویکھدے سن تے مینوں ایہہ یقین دَواندے رہندے سن کہ یہوواہ میرا خیال رکھ رہیا اے۔ مَیں ہر روز ایس گل لئی یہوواہ دا شکر کرنی آں کہ اوہنے مینوں ایہو جیہا خاندان دِتا اے جیہڑا میرے نال بڑا پیار کردا اے۔“‏

17.‏ داؤد نے ایہہ کیوں کہیا کہ مَیں کسے بلا توں نئیں ڈراں گا؟‏

¹⁷ مَیں کسے بلا توں نئیں ڈراں گا کیونکہ تُوں میرے نال اے۔‏ اکثر داؤد دی جان خطرے چ ہوندی سی تے اوہدے بوہت سارے دُشمن سن۔ یہوواہ دی محبت دی وجہ توں اوہ ایہہ محسوس کردا سی کہ اوہ محفوظ اے۔ داؤد ایہہ ویکھ سکدا سی کہ یہوواہ ہر موقعے تے اوہدے نال اے۔ ایس گل توں اوہنوں تسلی مِلدی سی۔ ایس لئی اوہ کہہ سکدا سی:‏ یہوواہ نے میرا سارا ڈر دُور کر دِتا۔ (‏زبور 34:‏4‏)‏ داؤد بوہت ساریاں گلاں دی وجہ توں ڈردا سی۔ پر یہوواہ دی محبت دی وجہ توں اوہ ایس ڈر تے قابو پا سکیا۔‏

18.‏ جدوں تُسی ڈرے ہوندے او تے توانوں یہوواہ دی محبت توں تسلی کیویں مل سکدی اے؟‏

¹⁸ جدوں اَسی ڈرے ہُنے آں تے سانوں یہوواہ دی محبت توں تسلی کیویں مل سکدی اے؟ سوزی ناں دی اِک پہل‌کار بھین نے دَسیا کہ جدوں اوہدے پُتر نے خودکُشی کر لئی تے اوہنوں تے اوہدے شوہر نُوں کیہو جیہا محسوس ہویا۔ بھین نے کہیا:‏ ”‏جدوں تواڈے نال کجھ بوہت بُرا ہو جاندا اے تے تُسی بوہت دُکھی ہو جاندے او۔ تے توانوں ایہہ ڈر لگیا رہندا اے کہ ہور نہ کجھ بُرا ہو جائے۔ پر یہوواہ دی محبت دی وجہ توں اَسی اپنے ڈر تے قابو پا سکے تے سانوں محسوس ہویا کہ اَسی محفوظ آں۔“‏ بھین ریچل نے کہیا:‏”‏اِک رات مَیں اینی پریشان ساں کہ مینوں لگ رہیا سی کہ میرا دل ای پھٹ جائے گا۔ مَیں بوہت ڈری ہوئی ساں۔ فیر مَیں رو رو کے یہوواہ کولوں دُعا کیتی۔ ایہدے فوراً بعد مینوں اِنج محسوس ہویا کہ یہوواہ نے میرے دل نُوں سکون دے دِتا اے بالکل اونویں ای جیویں اِک ماں اپنے بچے نُوں سکون دیندی اے تے فیر مَیں سوں گئی۔ مَیں اوس وقت نُوں کدی وی نئیں  بُھل سکدی۔“‏ بھرا تاسوس جیہڑا کلیسیا چ بزرگ اے، اوہنے فوج چ بھرتی نہ ہون دی وجہ توں چار سال جیل چ گزارے۔ ایس عرصے دے دوران یہوواہ نے اوہدے لئی محبت کیویں ظاہر کیتی تے اوہدا خیال کیویں رکھیا؟ بھرا نے کہیا:‏ ”‏یہوواہ نے میری سوچ توں وی ودھ کے میریاں ضرورتاں دا خیال رکھیا۔ ایس گل دی وجہ توں مینوں پکا یقین ہو گیا کہ مَیں یہوواہ تے پورا بھروسا کر سکنا واں۔ اینے مایوس کر دین والے ماحول چ وی یہوواہ نے اپنی پاک روح دے ذریعے میری خوش رہن چ مدد کیتی۔ ایہدے توں مینوں ایہہ یقین ہو گیا کہ جِنّاں زیادہ مَیں یہوواہ تے بھروسا کراں گا، اوناں ای زیادہ مَیں یہوواہ دی محبت نُوں محسوس کر سکاں گا۔ ایس لئی مَیں جیل چ ای پہل‌کار دے طور تے خدمت کرنی شروع کر دِتی۔“‏

اپنے شفیق خدا دے نیڑے ہوندے جاؤ

19.‏ (‏الف)‏جدوں سانوں پتہ ہوئے گا کہ یہوواہ سانوں پیار کردا اے تے ساڈیاں دُعاواں کیہو جہیاں ہون گیاں؟ (‏ب)‏یہوواہ دی محبت بارے توانوں کیہڑی گل سب توں چنگی لگدی اے؟ (‏بکس ‏”‏ یہوواہ دی محبت بارے کجھ ایتاں‏“‏ نُوں ویکھو۔)‏

¹⁹ ایس مضمون چ اَسی جیہڑے تجربیاں تے غور کیتا اے، اوہناں توں سانوں یقین ہو جاندا اے کہ محبت دا خدا ساڈے نال رہوے گا۔ (‏2-‏کُرنتھیوں 13:‏11‏)‏ اوہ ساڈے چوں ہر اِک دی فکر کردا اے۔ سانوں پورا یقین اے کہ یہوواہ دی اَٹل محبت نے سانوں گھیریا ہویا اے۔ (‏زبور 32:‏10‏)‏ جِنّاں زیادہ اَسی ایس گل تے سوچ‌وچار کراں گے کہ یہوواہ نے ساڈے لئی محبت کیویں ظاہر کیتی اے، اوناں ای زیادہ اَسی اوہدے نیڑے ہوندے جاواں گے تے ایہہ ویکھ سکاں گے کہ اوہ کیویں ساڈا خیال رکھدا اے۔ اَسی کُھل کے اوہدے کولوں دُعا کر سکاں گے تے اوہنوں ایہہ دَس سکاں گے کہ سانوں اوہدی محبت دی کِنّی لوڑ اے۔ اَسی اوہنوں دَساں گے کہ کیہڑی چیز سانوں پریشان کردی اے تے ایس گل تے بھروسا رکھاں گے کہ اوہ ساڈے جذبات نُوں سمجھدا اے تے ساڈی مدد کرنا چاہندا اے۔—‏زبور 145:‏18، 19‏۔‏

20.‏ یہوواہ دی محبت سانوں اوہدے نیڑے کیویں لے کے جاندی اے؟‏

²⁰ جیویں سردیاں دے موسم چ ساڈا دل کردا اے کہ اَسی بس اَگ دے نیڑے رہیے اونویں ای یہوواہ دی محبت دی وجہ توں ساڈا دل کردا اے کہ اَسی اوہدے نیڑے رہیے۔ یہوواہ دی محبت چ بڑی طاقت اے۔ ایس لئی خوش ہووو کیونکہ یہوواہ توانوں پیار کردا اے۔ تے اوہدی محبت دے بدلے چ اوہنوں کہوو:‏ مَیں یہوواہ نُوں پیار کرنا واں۔—‏زبور 116:‏1‏۔‏