1، 2.‏ یہوواہ دے بندیاں نُوں کیہڑیاں مشکلاں دا سامنا ہو سکدا اے؟‏

 جدوں ساڈے نال کجھ بُرا ہوندا اے تے ساڈی زندگی راتوں رات بدل جاندی اے۔ مثال لئی لُوک a ناں دے اِک بھرا نُوں پتہ چلیا کہ اوہنوں اِک خطرناک قسم دا کینسر اے تے ڈاکٹر نے اوہنوں دَسیا کہ اوہ صرف کجھ ای مہینے زندہ رہ سکے گا۔ بھین مونیکا تے اوہدا شوہر یہوواہ دی خدمت چ مصروف سن۔ تے فیر اِک دن مونیکا نُوں پتہ چلیا کہ اوہدا شوہر اوہنوں تے یہوواہ نُوں دھوکھا دے رہیا اے۔ اولیویا ناں دی اِک غیرشادی‌شُدہ بھین نُوں اِک خطرناک طوفان دی وجہ توں اپنا گھر بار چھڈ کے بھجنا پیا۔ جدوں اوہ واپس آئی تے اوہنے ویکھیا کہ اوہدا گھر بالکل تباہ ہو گیا اے۔ ایہناں بھین بھراواں دی زندگی اِک دم بدل گئی۔ کیہہ تواڈے نال وی کدی اِنج ہویا اے جدی وجہ توں تواڈی زندگی بالکل بدل گئی ہووے؟‏

² بھانویں کہ اَسی یہوواہ دے بندے آں پر فیر وی سانوں دُوجے لوکاں وانگوں مشکلاں دا سامنا کرنا پیندا اے۔ ہو سکدا اے کہ سانوں اوہناں لوکاں وَلّوں ظلم تے مخالفت دا سامنا کرنا پووے جیہڑے یہوواہ دے بندیاں توں نفرت کردے نیں۔ ایہہ گل سچ اے کہ یہوواہ سانوں ہر مشکل توں نئیں بچاندا پر اوہنے وعدہ کیتا اے کہ اوہ ساڈی مدد ضرور کرے گا۔ (‏یسعیاہ 41:‏10‏)‏ اوہدی مدد نال اَسی مشکل ویلے چ وی اپنی خوشی نُوں قائم رکھ سکنے آں، چنگے فیصلے کر سکنے آں تے اوہدے وفادار رہ سکنے آں۔ ایس مضمون چ اَسی چار ایہو جہے طریقیاں تے غور کراں گے جنہاں دے ذریعے یہوواہ ساڈی مدد کردا اے۔ اَسی ایہہ وی ویکھاں گے کہ اَسی اوہدے کولوں مدد حاصل کرن لئی کیہہ کر سکنے آں۔‏

یہوواہ تواڈی حفاظت کرے گا

3.‏ جدوں اَسی کسے مشکل چوں لنگھ رہے ہُنے آں تے سانوں کیہہ کرنا مشکل لگ سکدا اے؟‏

³ مشکل۔‏ ہو سکدا اے کہ جدوں اَسی مشکلاں دا سامنا کر رہے ہوئیے تے سانوں صحی طرحاں سوچنا تے فیصلے کرنا مشکل لگے۔ پر کیوں؟ شاید اَسی بڑی تکلیف چ ہوئیے تے ساڈے تے پریشانیاں دا بوجھ  ہووے۔ ہوسکدا اے کہ سانوں اِنج لگے کہ اَسی اِک ایہو جہی سڑک تے ٹُر رہے آں جتھے دھند ای دھند اے تے سانوں سمجھ نئیں آ رہی کہ اَسی کیہڑے پاسے جانا اے۔ ذرا غور کرو کہ جنہاں بھیناں دا ذکر پیراگراف نمبر 1 چ ہویا اے، اوہناں نے اپنیاں پریشانیاں بارے کیہو جیہا محسوس کیتا۔ بھین اولیویا کہندی اے:‏”‏طوفان دی وجہ توں میرا گھر ملبے دا ڈھیر بن گیا۔ جدوں مَیں اوس ملبے نُوں ویکھیا تے مَیں اینی پریشان ہو گئی کہ مینوں کجھ سمجھ ای نئیں آ رہیا سی کہ میرے آلے دَوالے کیہہ ہو رہیا اے۔“‏ بھین مونیکا نے دَسیا کہ جدوں اوہنوں اپنے شوہر دے دھوکھے بارے پتہ چلیا تے اوہنوں کیہو جیہا محسوس ہویا۔ اوہنے کہیا:‏ ”‏مینوں اِنج محسوس ہو رہیا سی کہ جیویں کسے نے میرے سینے چ چُھرا گھونپ دِتا اے۔ میرے لئی اپنے روز دے کم کرنا وی مشکل ہو گیا۔ مَیں سوچیا وی نئیں سی کہ میرے نال اِنج کدی ہوئے گا۔“‏ یہوواہ اپنے وعدے دے مطابق مشکلاں چ ساڈی مدد کیویں کردا اے؟‏

4.‏ فِلپّیوں 4:‏6، 7 چ یہوواہ نے ساڈے نال کیہہ وعدہ کیتا اے؟‏

⁴ یہوواہ کیویں مدد کردا اے؟‏ بائبل چ یہوواہ نے ساڈے نال وعدہ کیتا اے کہ اوہ سانوں اطمینان دَوے گا۔ ‏(‏فِلپّیوں 4:‏6، 7 نُوں پڑھو۔)‏ ایس اِطمینان دا مطلب اوہ ذہنی سکون اے جیہڑا سانوں اوہدوں مِلدا اے جدوں ساڈا یہوواہ نال مضبوط رشتہ ہوندا اے۔ ایہہ اِطمینان سمجھ توں باہر اے تے ایہہ ساڈی سوچ نالوں وی ودھ کے ہوندا اے۔ کیہہ توانوں کدی دُعا کرن توں بعد اِک عجیب جیہا سکون محسوس ہویا اے؟ ایہہ احساس اصل چ اوہ اِطمینان اے جیہڑا یہوواہ وَلّوں سانوں مِلدا اے۔‏

5.‏ خدا وَلّوں مِلن والا اِطمینان ساڈے دل تے سوچ نُوں کیویں محفوظ رکھدا اے؟‏

⁵ فِلپّیوں 4:‏7 چ ایہہ وی دَسیا گیا اے کہ خدا وَلّوں مِلن والا اِطمینان ساڈے دل تے سوچ نُوں محفوظ رکھے گا۔ جیس یونانی لفظ دا ترجمہ ”‏محفوظ“‏ کیتا گیا اے، اوہ ایہو جہے فوجیاں لئی استمال ہوندا سی جیہڑے اِک شہر دی حفاظت کردے سن تے اوہنوں دُشمناں توں بچاندے سن۔ ایس لئی شہر چ رہن والے لوک پُرسکون ہو کے سو سکدے سن کیونکہ اوہناں نُوں پتہ ہوندا سی کہ فوجی اوہناں دی حفاظت کر رہے نیں۔ ایسے طرحاں جدوں خدا وَلّوں مِلن والا اِطمینان ساڈے دل تے سوچ دی حفاظت کردا اے تے اَسی پُرسکون رہنے آں کیونکہ سانوں پتہ ہوندا اے کہ اَسی محفوظ آں۔ (‏زبور 4:‏8‏)‏ جے حنّہ وانگوں ساڈے حالات فوراً نئیں بدلدے تے فیر وی اَسی کسے حد تک پُرسکون رہنے آں۔ (‏1-‏سموئیل 1:‏16-‏18‏)‏ تے جدوں اَسی پُرسکون ہُنے آں تے ساڈے لئی صحی طرحاں سوچنا تے چنگے فیصلے کرنا آسان ہوندا اے۔‏

6.‏ اَسی یہوواہ وَلّوں مِلن والے اِطمینان توں فائدہ کیویں حاصل کر سکنے آں؟ (‏تصویر نُوں وی ویکھو۔)‏

⁶ سانوں کیہہ کرنا چاہی دا اے؟‏ جدوں تُسی پریشان ہوندے او تے یہوواہ کولوں مدد منگو۔ پر کیویں؟ اوہدوں تک یہوواہ کولوں دُعا کردے رہوو جدوں تک توانوں اِطمینان نہ مل جاوے۔ (‏لُوقا 11:‏9؛‏ 1-‏تھسلُنیکیوں 5:‏17‏)‏ بھرا لُوک جدا ایس مضمون چ پہلاں وی ذکر ہویا اے، جدوں اوہنوں تے اوہدی بیوی نُوں پتہ لگیا کہ اوہ ہُن کجھ ای مہینے زندہ رہوے گا تے ایس مشکل ویلے چ اوہناں نے کیہہ کیتا۔ بھرا نے کہیا:‏ ”‏ایہو جہی صورتحال چ صحت تے دُوجے معاملیاں بارے فیصلے کرنا مشکل  ہو جاندا اے۔ پر یہوواہ کولوں دُعا کردے رہن نال اَسی ایس مشکل صورتحال چ وی پُرسکون رہ سکے۔“‏ بھرا لُوک تے اوہدی بیوی نے دَسیا کہ اوہناں نے بڑی شدت نال تے وار وار دُعا کیتی تے یہوواہ کولوں دلی سکون، ذہنی اِطمینان تے چنگے فیصلے کرن لئی دانش‌مندی منگی۔ فیر اوہناں نے محسوس کیتا کہ یہوواہ نے اوہناں دی مدد کیتی اے۔ جے تُسی وی کسے مشکل دا سامنا کر رہے او تے دُعا کرن چ لگے رہوو تے فیر یہوواہ توانوں ایہو جیہا اِطمینان دَوے گا جیہڑا تواڈے دل تے سوچ نُوں محفوظ رکھے گا۔—‏رومیوں 12:‏12‏۔‏

یہوواہ توانوں ڈولن نئیں دَوے گا

7.‏ جدوں ساڈے تے کوئی مشکل آندی اے تے ساڈے جذبات کیہو جہے ہو سکدے نیں؟‏

⁷ مشکل۔‏ جدوں اَسی کسے بڑی وڈی مشکل چوں لنگھ رہے ہُنے آں تے اوس ویلے شاید ساڈی سوچ، جذبات تے کم اوہو جہے نہ ہون جیہو جہے عام طور تے ہوندے نیں۔ شاید ساڈے جذبات اوس کشتی وانگوں ہون جیہڑی طوفان چ ڈول کے کدی ایدھر چلی جاندی اے تے کدی اودھر۔ بھین اینا نے دَسیا کہ اپنے شوہر دے مرن توں بعد اوہدے کیہہ جذبات سن۔ اوہنے دَسیا:‏ ”‏میری تے دُنیا ای اُجڑ گئی سی۔ مینوں اپنے اُتے ترس آندا سی۔ کدی کدی مینوں غصہ آندا سی کہ لُوک مینوں کیوں چھڈ گیا اے۔“‏ ایہدے علاوہ بھین اینا اپنے آپ نُوں کلّا محسوس کرن لگ پئی تے اوہ ایس گل توں بڑی پریشان ہوندی سی کہ اوہنوں ہُن ایہو جہے معاملیاں بارے فیصلے کرنے پے رہے نیں جیہڑے لُوک کردا سی۔ کدی کدار اوہنوں اِنج لگدا سی کہ اوہ کسے طوفان چ پھس گئی اے۔ جدوں اَسی وی اِنج محسوس کرنے آں تے یہوواہ ساڈی مدد کیویں کردا اے؟‏

8.‏ 1-‏پطرس 5:‏10 چ یہوواہ نے سانوں کیس گل دا یقین دَوایا اے؟‏

⁸ یہوواہ کیویں مدد کردا اے؟‏ یہوواہ نے سانوں یقین دَوایا اے کہ اوہ سانوں قائم رکھے گا۔ ‏(‏1-‏پطرس 5:‏10 نُوں پڑھو۔)‏ جدوں اِک جہاز طوفان چ پھس جاندا اے تے شاید اوہ بڑی بُری طرحاں ڈولن لگ پئے۔ جہاز نُوں ڈولن توں روکن لئی پانی دے اندر ایہدیاں دونواں سائڈاں تے دو پر ہوندے نیں۔ اِنج جہاز چ سفر کرن والے لوک محفوظ رہندے نیں تے اوہناں نُوں سفر چ کوئی پریشانی نئیں ہوندی۔ پر زیادہ‌تر بحری جہاز دے ایہہ پر اوہدوں ای صحی طرحاں کم کردے نیں جدوں ایہہ اَگے ودھ رہیا ہوندا اے۔ ایسے طرحاں یہوواہ سانوں اوہدوں ای قائم رکھ سکدا اے جدوں اَسی مشکلاں دے باوجود اوہدی خدمت چ اَگے ودھدے رہنے آں۔‏

9.‏ تحقیق کرن دِیاں سہولتاں توں سانوں مشکلاں چ قائم رہن چ مدد کیویں مِلدی اے؟ (‏تصویر نُوں وی ویکھو۔)‏

⁹ سانوں کیہہ کرنا چاہی دا اے؟‏ جدوں تُسی جذباتاں دے طوفان وچ گِھرے ہوندے او تے اوہدوں یہوواہ کولوں دُعا کرن، باقاعدگی نال عبادتاں تے جان تے مُنادی کرن دی کوشش کردے رہوو۔ ایہہ گل سچ اے کہ شاید تُسی اوس ویلے اوناں نئیں کر سکو گے جِنّاں تُسی پہلاں کردے سو۔ پر یاد رکھو کہ یہوواہ تواڈی صورتحال نُوں سمجھدا اے تے اوہ تواڈے کولوں حدوں ودھ توقع نئیں کرے گا۔ (‏لُوقا 21:‏1-‏4 تے غور کرو۔)‏ ایہدے نال نال ذاتی طور تے بائبل دا مطالعیا کرن تے سوچ وچار کرن لئی وقت کڈھو۔ پر توانوں اِنج کیوں کرنا چاہی دا اے؟ کیونکہ یہوواہ اپنی تنظیم  دے ذریعے سانوں اپنے کلام چوں ایہو جہی تلیم دیندا اے جیہڑی مشکلاں چ قائم رہن چ ساڈی مدد کردی اے۔ اپنی ضرورت مطابق معلومات نُوں لبھن لئی تحقیق کرن دِیاں اوہناں سہولتاں نُوں استمال کرو جیہڑیاں تواڈی زبان چ موجود نیں جیویں کہ ‏”‏جے ڈبلیو لائبریری“‏ ایپ تے اُردو زبان چ ‏”‏یہوواہ کے گواہوں کے لئے مطالعے کے حوالے۔“‏ بھین مونیکا جدا پہلاں وی ذکر ہویا سی دَسدی اے کہ جدوں اوہ اپنے جذبات دے طوفان چ پھسی ہوندی سی تے اوہ تحقیق کرن لئی تنظیم وَلّوں مِلن والیاں سہولتاں نُوں استمال کردی سی۔ مثال لئی، اوہ ”‏لبھو“‏ والے خانے چ ”‏غصہ،“‏ ”‏دھوکھا“‏ یاں ”‏وفاداری“‏ لکھ کے لبھدی سی۔ تے فیر اوہنوں جیہڑی معلومات مِلدی سی، اوہ اوہنوں اوہدوں تک پڑھدی رہندی سی جدوں تک اوہدے دل نُوں سکون نئیں مل جاندا سی۔ بھین نے کہیا:‏ ”‏جدوں مَیں تحقیق کرنی شروع کیتی تے مَیں بڑی پریشان ساں۔ پر جیویں جیویں مَیں معلومات نُوں پڑھیا مینوں اِنج لگیا جیویں یہوواہ مینوں گلے لا رہیا اے تے مَیں سمجھ گئی کہ یہوواہ میرے سارے جذباتاں نُوں سمجھدا اے تے اوہ میری مدد کر رہیا اے۔“‏ ایسے طرحاں یہوواہ تواڈی وی سکون حاصل کرن چ مدد کر سکدا اے۔—‏زبور 119:‏143، 144‏۔‏

یہوواہ تواڈی مدد کرے گا

10.‏ کسے مشکل صورتحال توں بعد شاید تُسی کیہو جیہا محسوس کرو؟‏

¹⁰ مشکل۔‏ کسے تکلیف‌دہ صورتحال چوں لنگھن توں بعد ہو سکدا اے کہ اَسی اپنے آپ نُوں جسمانی تے جذباتی لحاظ نال بڑا کمزور محسوس کریئے۔ شاید سانوں محسوس ہوئے کہ اَسی اِک ایہو جہے زخمی کھیڈاری وانگوں آں جیہڑا پہلاں تے بڑا تیز دوڑدا سی پر ہُن لنگڑا کے چلدا اے۔ شاید ساڈے لئی اوہ کم کرنا وی مشکل ہو جائے جیہڑے پہلاں اَسی بڑی آسانی نال کر لینے ساں یاں ساڈا اوہ کم کرن نُوں دل ای نہ کرے جیہڑے سانوں پسند سن۔ ہوسکدا اے کہ ایلیاہ وانگوں سانوں وی لگے کہ ساڈے لئی بسترے توں اُٹھنا وی مشکل اے تے اَسی بس سونا چاہنے آں۔ (‏1-‏سلاطین 19:‏5-‏7‏)‏ جدوں اَسی اِنج محسوس کرنے آں تے یہوواہ اپنے وعدے دے مطابق کیہہ کردا اے؟‏

11.‏ یہوواہ ہور کیہڑے طریقے نال ساڈی مدد کردا اے؟ (‏زبور 94:‏18‏)‏

¹¹ یہوواہ کیویں مدد کردا اے؟‏ یہوواہ نے وعدہ کیتا اے کہ اوہ سانوں سہارا دَوے گا۔ ‏(‏زبور 94:‏18 نُوں پڑھو۔)‏ جیویں اِک زخمی کھیڈاری نُوں چلن پھرن لئی کسے دے سہارے دی لوڑ ہوندی اے اوسے طرحاں سانوں وی یہوواہ دی خدمت کرن لئی اوہدے سہارے دی لوڑ اے۔ ایہو جہے ویلے چ یہوواہ سانوں یقین دَواندا اے:‏ مَیں یہوواہ تیرا خدا تیرا سجا ہتھ پھڑ کے کہواں گا نہ ڈر۔ مَیں تیری مدد کراں گا۔ (‏یسعیاہ 41:‏13‏)‏ بادشاہ داؤد نُوں وی یہوواہ وَلّوں مدد ملی۔ جدوں اوہ مشکلاں تے دُشمناں دا سامنا کر رہیا سی تے اوہنے یہوواہ نُوں کہیا:‏ تیرا سجا ہتھ مینوں سہارا دیندا اے۔ (‏زبور 18:‏35‏)‏ پر یہوواہ سانوں کیویں سہارا دیندا اے؟‏

12.‏ جدوں اَسی کمزور ہُنے آں تے یہوواہ کدے ذریعے ساڈی مدد کردا اے؟‏

¹² یہوواہ اکثر دُوجیاں دے ذریعے ساڈی مدد کردا اے۔ مثال لئی،  جدوں داؤد اپنے آپ نُوں کمزور محسوس کر رہیا سی تے اوہدا دوست یونتن اوہنوں مِلن آیا تے اوہدا حوصلہ ودھایا۔ (‏1-‏سموئیل 23:‏16، 17‏)‏ ایسے طرحاں یہوواہ نے اِلیشع دے ذریعے ایلیاہ دی مدد کیتی۔ (‏1-‏سلاطین 19:‏16،‏ 21؛‏ 2-‏سلاطین 2:‏2‏)‏ اَج شاید یہوواہ کلیسیا دے بزرگاں، ساڈے دوستاں یاں گھر والیاں دے ذریعے ساڈی مدد کرے۔ پر ہو سکدا اے کہ جدوں اَسی بوہت دُکھی ہوئیے تے اَسی دُوجیاں توں دُور رہن لگ پئیے۔ ساڈا بس کلّے رہن نُوں دل کرے۔ مشکل حالات چ کوئی وی بندہ ایہو جیہا محسوس کر سکدا اے۔ پر اَسی کیہہ کر سکنے آں تاکہ سانوں یہوواہ وَلّوں مدد مِلدی رہوے؟‏

13.‏ جے اَسی یہوواہ وَلّوں مِلن والی مدد توں فائدہ حاصل کرنا چاہنے آں تے سانوں کیہہ کرنا چاہی دا اے؟ (‏تصویر نُوں وی ویکھو۔)‏

¹³ سانوں کیہہ کرنا چاہی دا اے؟‏ اپنے آپ نُوں دُوجیاں توں الگ نہ کرو۔ جے اَسی اِنج کراں گے تے اَسی صرف اپنے بارے تے اپنیاں مشکلاں بارے ای سوچدے رہواں گے۔ ایہو جہی سوچ دا ساڈے فیصلیاں تے وی اثر پووے گا۔ (‏اَمثال 18:‏1‏)‏ سچ اے کہ سانوں کدی کدار کلّے وقت گزارن دی لوڑ ہوندی اے، خاص کر اوہدوں جدوں اَسی کسے وڈی مشکل چوں لنگھ رہے ہُنے آں۔ پر جے اَسی لمے عرصے لئی اپنے آپ نُوں دُوجیاں توں الگ کر لواں گے تے اَسی اپنے آپ نُوں اوہناں لوکاں توں دُور کر رہے ہونواں گے جنہاں دے ذریعے یہوواہ ساڈی مدد کرنا چاہندا اے۔ ایس لئی مشکل ویلے چ اپنے گھر والیاں، کلیسیا دے بھین بھراواں تے بزرگاں وَلّوں مِلن والی مدد نُوں قبول کرو، فیر بھانویں ایہہ توانوں مشکل ای کیوں نہ لگے۔ ایس گل تے دھیان دَوو کہ یہوواہ ایہناں لوکاں دے ذریعے تواڈی مدد کرنا چاہندا اے۔—‏اَمثال 17:‏17؛‏ یسعیاہ 32:‏1، 2‏۔‏

یہوواہ توانوں تسلی دَوے گا

14.‏ کیہڑی صورتحال چ سانوں ڈر لگ سکدا اے؟‏

¹⁴ مشکل۔‏ شاید سانوں کسے ایہو جہی صورتحال دا سامنا ہووے جدی وجہ توں اَسی بوہت ڈر جائیے۔ بائبل چ اکثر خدا دے بندیاں نے ایہو جہے موقعیاں دا ذکر کیتا جدوں اوہ اپنے دُشمناں یاں دُوجیاں گلاں دی وجہ توں بڑے پریشان سن تے ڈرے ہوئے سن۔ (‏زبور 18:‏4؛‏ 55:‏1،‏ 5‏)‏ ایسے طرحاں شاید سانوں اپنے نال پڑھن والیاں، اپنے نال کم کرن والیاں، اپنے گھر والیاں یاں حکومت وَلّوں مخالفت دا سامنا ہو رہیا ہووے۔ یاں شاید سانوں کوئی بیماری ہووے تے سانوں ایس گل دا ڈر ہووے کہ اَسی مر نہ جائیے۔ ایہو جہی صورتحال دا سامنا کردے ویلے شاید اَسی اپنے آپ نُوں ایہو جہے بچے وانگوں سمجھئے جیہڑا اپنے آپ کجھ نئیں کر سکدا۔ ایہو جہے حالات چ یہوواہ ساڈی مدد کیویں کردا اے؟‏

15.‏ زبور 94:‏19 چ یہوواہ سانوں کیہڑی گل دا یقین دَوا رہیا اے؟‏

¹⁵ یہوواہ کیویں مدد کردا اے؟‏ یہوواہ سانوں تسلی دیندا اے تے تازہ‌دم کردا اے۔ ‏(‏زبور 94:‏19 نُوں پڑھو۔)‏ شاید زبور 94 نُوں پڑھ کے ساڈے ذہن چ اِک چھوٹی بچی آئے جیہڑی بدّل گرجن تے بجلی  چمکن دی وجہ توں ڈر جاندی اے تے سو نئیں پاندی۔ پر فیر اوہدا ابو اوہدے کول آندا اے، اوہنوں گودی چ چُک‌دا اے تے اوہنوں اوہدوں تک گلے لا کے رکھدا اے جدوں تک اوہ سکون نال سو نئیں جاندی۔ بھانویں طوفان رُکے یاں نہ رُکے، اوہ بچی اپنے ابو کول محفوظ محسوس کردی اے۔ جدوں اَسی ایہو جہیاں مشکلاں دا سامنا کر رہے ہُنے آں جنہاں دی وجہ توں اَسی بوہت ڈر جانے آں تے شاید اوہدوں ساڈا وی ایہی دل کرے کہ یہوواہ وی سانوں اپنے گلے لا لوے تے اوہدوں تک نہ چھڈے جدوں تک سانوں سکون نہ مل جائے۔ پر سانوں ایہو جہی تسلی کیویں مل سکدی اے؟‏

16.‏ اَسی یہوواہ وَلّوں مِلن والی تسلی توں فائدہ حاصل کرن لئی کیہہ کر سکنے آں؟ (‏تصویر نُوں وی ویکھو۔)‏

¹⁶ سانوں کیہہ کرنا چاہی دا اے؟‏ ہر روز یہوواہ نال وقت گزارو۔ اِنج کرن لئی تُسی ہر روز دُعا کر سکدے او تے بائبل پڑھ سکدے او۔ (‏زبور 77:‏1،‏ 12-‏14‏)‏ جدوں توانوں ایہہ عادت پے جاوے گی تے فیر تُسی مشکل وقت چ مدد حاصل کرن لئی یہوواہ تے آس لاوو گے۔ یہوواہ نُوں دَسو کہ تُسی کیہڑیاں گلاں دی وجہ توں پریشان تے ڈرے ہوئے او۔ اوہدا کلام پڑھن نال اوہدی گل سنو تے ویکھو کہ یہوواہ کیویں توانوں تسلی دیندا اے۔ (‏زبور 119:‏28‏)‏ شاید بائبل دے کجھ خاص حصے یاں کتاباں پڑھن توں توانوں اوس ویلے تسلی ملے جدوں تُسی خوف‌زدہ ہووو۔ مثال لئی، جدوں تُسی ایوب، زبور، اَمثال یاں متی 6 باب نُوں پڑھدے او تے توانوں بوہت حوصلہ مِلدا اے۔ جدوں تُسی یہوواہ کولوں دُعا کردے او تے اوہدے کلام نُوں پڑھدے او تے تُسی ایہہ ویکھ پاندے او کہ یہوواہ کیویں توانوں تسلی دے رہیا اے۔‏

17.‏ اَسی کیس گل دا یقین رکھ سکنے آں؟‏

¹⁷ اَسی ایس گل دا یقین رکھ سکنے آں کہ یہوواہ اوکھے ویلے چ ساڈے نال ہووے گا۔ اَسی کدی وی کلّے نئیں ہوواں گے۔ (‏زبور 23:‏4؛‏ 94:‏14‏)‏ یہوواہ نے ایہہ وعدہ کیتا اے کہ اوہ ہمیشاں ساڈی حفاظت کرے گا، سانوں قائم رکھے گا تے سانوں سہارا تے تسلی دَوے گا۔ یہوواہ بارے یسعیاہ 26:‏3 چ لکھیا اے:‏ تُوں اوہناں دی حفاظت کریں گا جیہڑے پورے دل نال تیرے تے بھروسا کردے نیں۔ تُوں اوہناں نُوں ہمیشاں لئی سلامتی بخشیں گا کیونکہ اوہ تیرے تے بھروسا کردے نیں۔ ایس لئی یہوواہ تے بھروسا کردے رہوو تے اوہدے وَلّوں مِلن والی مدد توں فائدہ حاصل کردے رہوو۔ جے تُسی اِنج کرو گے تے مشکل ویلے چ توانوں طاقت ملے گی۔‏