1.‏ ہر سال یسوع دی موت دی یادگیری تے جان نال سانوں کیہہ فائدہ ہوندا اے؟‏

 یقیناً تُسی ایہہ گل منو گے کہ فدیہ بوہت قیمتی تحفہ اے۔ (‏2-‏کُرنتھیوں 9:‏15‏)‏ یسوع دی قربانی دی وجہ توں تُسی یہوواہ نال دوستی کر سکدے او۔ ایس قربانی دی وجہ توں تُسی ہمیشاں دی زندگی پان دی امید رکھ سکدے او۔ ایسے لئی اَسی یہوواہ دے بڑے شکرگزار آں کہ اوہنے محبت دی وجہ توں فدیے دا بندوبست کیتا اے۔ (‏رومیوں 5:‏8‏)‏ یسوع نے سانوں حکم دِتا اے کہ اَسی ہر سال اوہدی موت دی یادگیری منائیے تاکہ اَسی فدیے لئی شکرگزار رہیے۔—‏لُوقا 22:‏19، 20

2.‏ ایس مضمون چ اَسی کیس بارے گل کراں گے؟‏

² ایس سال یسوع مسیح دی موت دی یادگیری 12 اپریل، ہفتے والے دن ہوئے گی۔ یقیناً اَسی سارے ایہدے تے ضرور جانواں گے۔ پر ایہہ چنگا ہوئے گا کہ اَسی یادگیری توں پہلاں تے بعد والے ہفتیاں چ ایس گل تے سوچ‌وچار کرئیے کہ یہوواہ تے اوہدے پُتر نے ساڈے لئی کیہہ کجھ کیتا اے۔ ایس مضمون چ اَسی ویکھاں گے کہ فدیے توں اَسی یہوواہ تے اوہدے پُتر بارے کیہہ سکھنے آں۔ اگلے مضمون چ اَسی سکھاں گے کہ سانوں فدیے توں کیہڑے فائدے ہوندے نیں تے اَسی ایہدے لئی شکرگزاری کیویں وکھا سکنے آں۔‏

فدیے دے بندوبست توں اَسی یہوواہ بارے کیہہ سکھنے آں؟‏

3.‏ صرف اِک انسان دی قربانی توں لکھاں لوکاں نُوں گُناہ تے موت دی غلامی توں آزادی کیویں مِل سکدی اے؟ (‏تصویر نُوں وی ویکھو۔)‏

³ فدیے توں سانوں یہوواہ دے اِنصاف بارے پتہ چلدا اے۔ (‏اِستثنا 32:‏4‏)‏ پر کیویں؟ ذرا ایس گل تے غور کرو:‏ آدم دے گُناہ دی وجہ توں سانوں گُناہ تے موت ورثے چ مِلی اے۔ (‏رومیوں 5:‏12‏)‏ یہوواہ نے سانوں گُناہ تے موت دی غلامی توں آزاد کران لئی یسوع مسیح نُوں گھلیا تاکہ اوہ ساڈے لئی فدیہ دَوے۔ پر صرف اِک انسان دی قربانی توں لکھاں لوکاں نُوں گُناہ تے موت دی غلامی توں آزادی کیویں مِل سکدی اے؟ پولُس رسول نے دَسیا:‏ جیویں اِک آدمی یعنی آدم دی نافرمانی دی وجہ توں بوہت  سارے لوکاں نُوں گُناہ‌گار ٹھہرایا گیا اوسے طرحاں اِک آدمی یعنی یسوع دی فرمانبرداری دی وجہ توں بوہت سارے لوکاں نُوں نیک ٹھہرایا جائے گا۔ (‏رومیوں 5:‏19؛‏ 1-‏تیمُتھیُس 2:‏6‏)‏ اسان لفظاں چ کہیے تے اِک بے‌عیب انسان دی نافرمانی دی وجہ توں اَسی گُناہ تے موت دے غلام بن گئے۔ پر اِک بے‌عیب انسان دی قربانی دی وجہ توں اَسی ایس غلامی توں آزاد ہو سکنے آں۔‏

4.‏ یہوواہ نے آدم دی اولاد وچوں فرمانبردار لوکاں نُوں ای ہمیشاں تک زندہ کیوں نئیں رہن دِتا؟‏

⁴ کیہہ سانوں بچان لئی ایہہ ضروری سی کہ یسوع اپنی جان قربان کردا؟ شاید اَسی سوچئے کہ یہوواہ آدم دی اولاد وچوں فرمانبردار لوکاں نُوں ہمیشاں تک زندہ رہن وی تے دے سکدا سی۔ اَسی عیب‌دار آں ایس لئی شاید سانوں لگے کہ ایہی بہترین حل ہوندا۔ پر یہوواہ دی نظر چ ایہہ اِنصاف دی گل نہ ہوندی۔ اِنج ایہہ لگدا کہ آدم دا گُناہ ایناں وڈا نئیں اے تے اوہدی اولاد کدی گُناہ‌گار ہوئی ای نئیں سی۔ پر سانوں پتہ اے کہ ایہہ سچ نئیں اے۔‏

5.‏ اَسی پکا یقین کیوں رکھ سکنے آں کہ یہوواہ ہمیشاں اِنصاف نال کم لوے گا؟‏

⁵ پر جے یہوواہ فدیے دا بندوبست نہ کردا سگوں آدم دی اولاد نُوں ای ہمیشاں تک زندہ رہن دیندا تے کیہہ ہوندا؟ شاید ایہدے توں لوک ایہہ سوچدے کہ یہوواہ دُوجے معاملیاں چ وی اِنصاف نال کم نئیں لوے گا۔ شاید لوکاں دے ذہن چ ایہہ شک وی پیدا ہوندا کہ یہوواہ اپنے کجھ وعدیاں نُوں پورا نئیں کرے گا۔ پر سانوں ایس بارے پریشان ہون دی لوڑ نئیں اے کیونکہ یہوواہ نے اِنصاف کرن لئی بڑی وڈی قربانی دِتی اے یعنی اپنے پیارے پُتر نُوں قربان کیتا اے۔ ایہدے توں سانوں ایس گل دا پکا یقین ہو جاندا اے کہ یہوواہ ہمیشاں اِنصاف نال کم لوے گا۔‏

6.‏ فدیے توں یہوواہ دی محبت کیویں نظر آندی اے؟ (‏1-‏یوحنا 4:‏9، 10‏)‏

⁶ فدیے توں اَسی ایہہ سمجھ جانے آں کہ یہوواہ اِنصاف کرن والا خدا اے۔ پر ایہدے توں سانوں خاص طور تے اوہدی محبت دا پتہ چلدا اے۔ (‏یوحنا 3:‏16‏؛‏ 1-‏یوحنا 4:‏9، 10 نُوں پڑھو۔)‏ فدیے دے بندوبست توں پتہ چلدا اے کہ یہوواہ نہ صرف چاہندا اے کہ اَسی ہمیشاں دی زندگی حاصل کرئیے سگوں ایہہ وی چاہندا اے کہ اَسی اوہدے خاندان دا حصہ بنئے۔ غور کرو کہ جدوں آدم نے گُناہ کیتا سی تے یہوواہ نے اوہنوں اپنے خاندان چوں کڈھ دِتا سی تے ایس وجہ توں آدم دی اولاد وچوں کوئی وی یہوواہ دے خاندان دا حصہ نئیں سی۔ پر فدیے دی وجہ توں یہوواہ ساڈے گُناہواں نُوں معاف کردا اے تے اِک دن اوہ سارے لوک اوہدے خاندان دا حصہ بن جان گے جیہڑے اوہدے تے ایمان ظاہر کردے نیں تے اوہدی گل من دے نیں۔ پر اَسی ہُن وی یہوواہ خدا تے اپنے ہم‌ایماناں نال مضبوط رشتہ رکھ سکنے آں۔ واقعی، یہوواہ سانوں بڑا پیار کردا اے۔—‏رومیوں 5:‏10، 11‏۔‏

7.‏ یسوع دے تکلیف سہن دی وجہ توں سانوں یہوواہ دی محبت بارے کیہہ پتہ چلدا اے؟‏

⁷ جدوں اَسی ایس گل بارے سوچنے آں کہ ساڈے لئی فدیے دا بندوبست کرن نال یہوواہ نُوں کِنّی وڈی قربانی دینی پئی تے اَسی اوہدی محبت  نُوں ہور چنگی طرحاں سمجھ جانے آں۔ شیطان دا دعویٰ اے کہ یہوواہ دا کوئی وی بندہ مشکل وقت آن تے اوہدا وفادار نئیں رہوے گا۔ اوہدے ایس دعوے نُوں جھوٹھا ثابت کرن لئی یہوواہ نے یسوع نُوں دردناک موت سہن دِتی۔ (‏ایوب 2:‏1-‏5؛‏ 1-‏پطرس 2:‏21‏)‏ جدوں لوک یسوع دا مذاق اُڈا رہے سن، فوجی اوہنوں مار کٹ رہے سن تے اوہدے ہتھاں پیراں نُوں سُولی تے ٹھوک رہے سن تے یہوواہ ایہہ سب کجھ ویکھ رہیا سی۔ یہوواہ ایہہ وی ویکھ رہیا سی کہ اوہدا پُتر سُولی تے کِنّی تکلیف چ وے۔ (‏متی 27:‏28-‏31،‏ 39‏)‏ جے یہوواہ چاہندا تے اوہ ایہہ سب کجھ کسے وی وقت روک سکدا سی۔ مثال لئی، جدوں یسوع دے مخالفاں نے کہیا کہ ”‏جے خدا واقعی ایہدے توں خوش اے تے اوہی ایہنوں بچائے“‏ تے یہوواہ اِنج کر سکدا سی۔ (‏متی 27:‏42، 43‏)‏ پر جے اوہ اِنج کر دیندا تے فدیہ ادا نئیں ہونا سی تے نہ ای ساڈے کول کوئی امید ہونی سی۔ ایس لئی یہوواہ نے اپنے پیارے پُتر نُوں آخری ساہ تک تکلیف سہن دِتی۔‏

8.‏ اَسی پورے یقین نال ایہہ کیوں کہہ سکنے آں کہ اپنے پُتر نُوں تکلیف چ ویکھ کے یہوواہ نُوں بڑا دُکھ ہویا؟ (‏تصویر نُوں وی ویکھو۔)‏

⁸ یہوواہ ایس کائنات دی سب توں طاقت‌ور ہستی اے۔ ایس وجہ توں سانوں ایہہ نئیں سوچنا چاہی دا کہ اوہدے اندر کوئی جذبات نئیں نیں۔ یہوواہ نے انساناں نُوں اپنی صورت تے بنایا اے۔ جے ساڈے اندر جذبات نیں تے ایہدا مطلب اے کہ یہوواہ چ وی نیں۔ بائبل چ دَسیا گیا اے کہ کدی کدی اوہ دُکھی ہویا تے اوہنوں تکلیف پونچی۔ (‏زبور 78:‏40، 41‏)‏ ذرا ابراہام تے اِضحاق دے واقعے تے غور کرو۔ توانوں یاد ہوئے گا کہ یہوواہ نے ابراہام نُوں حکم دِتا سی کہ اوہ اپنے اکلوتے پُتر نُوں اوہدے لئی قربان کر دَوے۔ (‏پیدائش 22:‏9-‏12؛‏ عبرانیوں 11:‏17-‏19‏)‏ ذرا سوچو کہ جدوں ابراہام اپنے پُتر اِضحاق نُوں قربان کرن لئی لے جا رہیا سی تے اوہدے تے چھری چلان والا سی تے اوس ویلے اوہدے تے کیہہ بیت رہی ہوئے گی۔ ہُن ذرا سوچو کہ یہوواہ تے اوس ویلے کیہہ بیت رہی ہوئے گی جدوں اوہ ویکھ رہیا ہوئے گا کہ لوک اوہدے پُتر تے کِنّاں ظلم کر رہے نیں تے کِنّی بے‌رحمی نال اوہدی جان لے رہے نیں۔—‏ویب‌سائٹ jw.org تے ایہہ ویڈیو ویکھو:‏ ‏”‏اوہناں ورگا ایمان ظاہر کرو—‏ابراہام، دُوجا حصہ۔“‏

9.‏ رومیوں 8:‏32،‏ 38، 39 توں سانوں یہوواہ دی محبت بارے کیہہ پتہ چلدا اے؟‏

⁹ فدیے دے بندوبست توں پتہ چلدا اے کہ جِنّی محبت یہوواہ سانوں کردا اے اونی محبت ہور کوئی نئیں کر سکدا، ایتھوں تک کہ ساڈے قریبی رشتے‌دار تے پکے دوست وی نئیں۔ ‏(‏رومیوں 8:‏32،‏ 38، 39 نُوں پڑھو۔)‏ اصل چ یہوواہ ساڈے نال اینی محبت کردا اے جِنّی اَسی اپنے آپ نال وی نئیں کردے۔ کیہہ تُسی ہمیشاں تک زندہ رہنا چاہندے او؟ تواڈے نالوں کِتے زیادہ یہوواہ چاہندا اے کہ تُسی ہمیشاں تک زندہ رہوو۔ کیہہ تُسی چاہندے او کہ تواڈے گُناہ معاف ہو جان؟ تواڈے نالوں کِتے زیادہ یہوواہ چاہندا اے کہ اوہ تواڈے گُناہ معاف کرے۔ ایہدے بدلے بس اوہ ایہہ چاہندا اے کہ اَسی اوہدے تے ایمان ظاہر کرئیے تے اوہدے فرمانبردار رہ کے فدیے دے بندوبست لئی قدر وکھائیے۔ ایہہ یہوواہ وَلّوں واقعی اِک بڑا قیمتی تحفہ اے۔ ایہدے توں پتہ چلدا اے کہ اوہ ساڈے نال کِنّی محبت کردا اے۔ نوِیں دُنیا چ اَسی یہوواہ دی محبت بارے ہور زیادہ سکھاں گے۔—‏واعظ 3:‏11‏۔‏

 فدیے دے بندوبست توں اَسی یسوع بارے کیہہ سکھنے آں؟‏

10.‏ (‏الف)‏یسوع نُوں خاص طور تے کیس گل دی فکر سی؟ (‏ب)‏یسوع نے اپنے باپ دے ناں نُوں پاک کیویں ثابت کیتا؟ (‏ایس بکس نُوں وی ویکھو:‏ ‏”‏ یسوع نے وفادار رہ کے اپنے باپ دا ناں پاک ثابت کیتا۔‏‏“‏‏)‏

¹⁰ یسوع اپنے باپ دے ناں نُوں پاک ثابت کرنا چاہندا سی۔‏ (‏یوحنا 14:‏31‏)‏ یسوع ایس گل دی وجہ توں بوہت پریشان سی کہ اوہدے تے خدا دے خلاف کفر بکن تے اوہدے ناں دی توہین کرن دا اِلزام لایا جائے گا تے ایس وجہ توں اوہدے باپ دے ناں دی بڑی بدنامی ہوئے گی۔ ایس لئی اوہنے دُعا چ یہوواہ نُوں کہیا:‏ ”‏اَے میرے باپ، جے ہو سکے تے ایہہ پیالہ میرے توں ہٹا دے۔“‏ (‏متی 26:‏39‏)‏ یسوع مردے دم تک یہوواہ دا وفادار رہیا تے اِنج اوہنے اوہدا ناں پاک ثابت کیتا۔‏

11.‏ یسوع نے لوکاں لئی محبت کیویں وکھائی؟ (‏یوحنا 13:‏1‏)‏

¹¹ فدیے دے بندوبست توں ایہہ گل وی پتہ چلدی اے کہ یسوع نُوں لوکاں دی بڑی فکر سی، خاص طور تے اپنے شاگرداں دی۔ (‏اَمثال 8:‏31؛‏ یوحنا 13:‏1 نُوں پڑھو۔)‏ مثال لئی، اوہنوں پتہ سی کہ جدوں اوہ زمین تے خدمت کرے گا تے اوہنوں کجھ مشکل کم وی کرنے پین گے، خاص کر اوہنوں بڑی تکلیف‌دہ موت سہنی پئے گی۔ پر یسوع نے ایہناں سارے مشکل کماں نُوں بڑے چنگے طریقے نال کیتا۔ اوہنے صرف ایس لئی نئیں اِنج کیتا کہ یہوواہ نے اوہنوں اِنج کرن لئی کہیا سی سگوں ایس لئی کیتا کہ اوہنوں انساناں نال پیار اے۔ یسوع مسیح نے پورے دل تے جان نال مُنادی کرن، تلیم دین تے دُوجیاں دی مدد کرن نال اوہناں لئی محبت وکھائی۔ جیس دن اوہنوں سُولی تے چڑھایا جانا سی، اوس دن وی اوہنے اپنے رسولاں دے پیر دھوتے، اوہناں دا حوصلہ ودھایا تے اوہناں نُوں ضروری ہدیتاں دِتیاں۔ (‏یوحنا 13:‏12-‏15‏)‏ تے فیر جدوں اوہ سُولی تے بڑی تکلیف چ سی تے اوہنے اپنے نال والی سُولی تے ٹنگے مُجرم نُوں مستقبل بارے امید دِتی تے اپنی ماں دا خیال رکھن دا وی بندوبست کیتا۔ (‏لُوقا 23:‏42، 43؛‏ یوحنا 19:‏26، 27‏)‏ یسوع نے صرف اپنی جان قربان کرن نال ای نئیں سگوں اپنی زندگی توں وی لوکاں لئی محبت ظاہر کیتی۔‏

12.‏ یسوع مسیح کیس لحاظ نال اَج وی ساڈے لئی قربانیاں دے رہیا اے؟‏

 ¹² ایہہ گل سچ اے کہ یسوع نے اِکو وار ساڈے لئی اپنی جان قربان کر دِتی اے۔ پر اوہ اَج وی ساڈے لئی قربانیاں دے رہیا اے۔ (‏رومیوں 6:‏10‏)‏ کیویں؟ اوہ ہُن وی ساڈے لئی اپنا وقت تے طاقت استمال کر رہیا اے تاکہ اَسی فدیے توں فائدہ حاصل کر سکئے۔ غور کرو کہ اَج اوہ کیہڑے کیہڑے کم کر رہیا اے۔ اوہ ساڈے بادشاہ، اعلیٰ کاہن تے کلیسیا دے سربراہ دے طور تے کم کر رہیا اے۔ (‏1-‏کُرنتھیوں 15:‏25؛‏ اِفسیوں 5:‏23؛‏ عبرانیوں 2:‏17‏)‏ اوہ پاک روح نال مسح ہوئے مسیحیاں تے وڈی بِھیڑ چ شامل لوکاں نُوں جمع کرن دے کم دی نگرانی کر رہیا اے۔ ایہہ کم وڈی مصیبت دے ختم ہون توں پہلاں مکمل ہو جائے گا۔‏ a (‏متی 25:‏32؛‏ مرقس 13:‏27‏)‏ یسوع ایس گل دا خیال وی رکھ رہیا اے کہ ایس آخری زمانے چ اوہدے پیروکاراں نُوں روحانی کھانا مِلدا رہوے۔ (‏متی 24:‏45‏)‏ تے اپنی ہزار سالہ بادشاہی دے دوران وی اوہ ساڈے فائدے لئی بوہت سارے کم کرے گا۔ واقعی، یہوواہ نے صحی معنیاں چ سانوں اپنا پُتر دے دِتا اے۔‏

فدیے بارے سکھدے رہوو

13.‏ جدوں تُسی فدیے تے سوچ وچار کرو گے تے توانوں یہوواہ تے یسوع دی محبت بارے ہور زیادہ سکھن چ مدد کیویں ملے گی؟‏

¹³ جے تُسی ایس گل تے سوچ وچار کردے رہوو گے کہ یہوواہ خدا تے یسوع مسیح نے تواڈے لئی کیہہ کجھ کیتا اے تے توانوں اوہناں دی محبت بارے ہور وی نوِیاں نوِیاں گلاں پتہ چلن گیاں۔ ایس سال تُسی مسیح دی یادگیری توں پہلاں تے بعد والے ہفتیاں چ اِک یاں اِک توں زیادہ اِنجیلاں نُوں دھیان نال پڑھ سکدے او۔ اِک ای وقت چ بوہت زیادہ باب پڑھن دی کوشش نہ کرو۔ ایہدی بجائے تھوڑا تھوڑا پڑھو تے ایہو جہیاں ہور زیادہ گلاں لبھن دی کوشش کرو جنہاں دی وجہ توں تُسی یہوواہ تے یسوع لئی محبت وکھا سکو۔ جیہڑیاں گلاں تُسی پڑھدے ویلے سکھدے او، اوہناں بارے دُوجیاں نُوں وی دَسو۔‏

14.‏ تحقیق کرن نال سانوں فدیے تے کئی ہور موضوعاں بارے ہور زیادہ گلاں سکھن چ مدد کیویں ملے گی؟ (‏زبور 119:‏97‏)‏ (‏تصویر نُوں وی ویکھو۔)‏

¹⁴ جے تُسی کافی سالاں توں یہوواہ دے گواہ او تے شاید تُسی سوچو کہ اَسی یہوواہ دے اِنصاف، اوہدی محبت تے فدیے بارے پہلاں توں ای بوہت کجھ جاننے آں تے ہُن اَسی ایہناں بارے ہور کیہڑیاں گلاں سکھ سکنے آں؟ پر سچ تے ایہہ وے کہ ایہہ ایہو جہے موضوع نیں جنہاں بارے اَسی جِنّاں وی سکھ لئیے، اوہ گھٹ اے۔ فیر تُسی کیہہ کر سکدے او؟ یہوواہ دی تنظیم نے ایہناں موضوعاں بارے سانوں بوہت ساری معلومات دِتی اے۔ ایس معلومات توں پورا فائدہ چکو۔ جدوں تُسی بائبل چ کوئی ایہو جہی گل پڑھدے او جنہوں تُسی صحی طرحاں نئیں سمجھ پاندے تے تحقیق کرو۔ فیر  پورا دن اوہناں گلاں تے سوچ وچار کرو جیہڑیاں توانوں تحقیق کرن توں پتہ چلیاں نیں تے سوچو کہ ایہناں توں توانوں یہوواہ تے اوہدے پُتر دی محبت بارے کیہہ پتہ چلیا اے۔‏‏—‏زبور 119:‏97 تے ایہدے نال دِتے فٹ‌نوٹ نُوں پڑھو۔‏

15.‏ سانوں بائبل چوں نوِیاں نوِیاں گلاں سکھن دی کوشش کیوں کرنی چاہی دی اے؟‏

¹⁵ جے ہر دفعہ بائبل پڑھدے تے تحقیق کردے ویلے توانوں کوئی نوِیں تے دلچسپ گل سکھن نُوں نئیں مِلدی تے ہمت نہ ہارو سگوں سوچو کہ تُسی اِک ایہو جہے بندے ورگے او جیہڑا سونا لبھ رہیا اے۔ جیہڑے لوک سونا لبھدے نیں، اوہناں نُوں سونے دے اِک چھوٹے جہے ٹکڑے نُوں وی لبھن چ کئی گھنٹے تے دن لگ جاندے نیں۔ پر اوہ ہمت نئیں ہاردے سگوں صبر نال ایس کم چ لگے رہندے نیں کیونکہ اوہناں دی نظر چ سونے دا اِک اِک ٹکڑا وی بڑا قیمتی ہوندا اے۔ بائبل دی ہر گل ایس سونے توں وی زیادہ قیمتی اے۔ (‏زبور 119:‏127؛‏ امثال 8:‏10‏)‏ ایس لئی صبر نال کم لوو، بائبل نُوں پڑھدے رہوو تے ایہدے چوں نوِیاں نوِیاں گلاں سکھدے رہوو۔—‏زبور 1:‏2‏۔‏

16.‏ اَسی یہوواہ تے یسوع دی مثال تے کیویں عمل کر سکنے آں؟‏

¹⁶ جدوں تُسی بائبل دا مطالعیا کردے او تے ایس بارے سوچو کہ جو کجھ تُسی سکھ رہے او، تُسی اوہدے تے کیویں عمل کر سکدے او۔ مثال لئی، جیویں یہوواہ اِنصاف‌پسند اے اونویں ای تُسی وی دُوجیاں نال اِکو جیہا سلوک کر سکدے او۔ تُسی یسوع وانگوں اپنے اسمانی باپ تے اپنے ہم‌ایماناں لئی محبت وکھا سکدے او۔ تُسی ایہہ محبت یہوواہ دے ناں دی خاطر ظلم برداشت کرن تے اپنے ہم ایماناں دی مدد کرن نال ظاہر کر سکدے او۔ ایہدے علاوہ، تُسی یسوع وانگوں دُوجیاں نُوں دَس سکدے او کہ یہوواہ نے ساڈے لئی کیہہ کجھ کیتا اے تاکہ اوہ وی یہوواہ دے قیمتی تحفے یعنی فدیے توں فائدہ چُک سکن۔‏

17.‏ اگلے مضمون چ اَسی کیس بارے گل کراں گے؟‏

¹⁷ جِنّاں زیادہ اَسی فدیے بارے سکھاں گے تے اپنے دل چ ایہدے لئی قدر ودھاواں گے اونی زیادہ ساڈے دل چ یہوواہ تے یسوع لئی محبت ودھے گی۔ بدلے چ اوہ وی ساڈے نال ہور زیادہ محبت کرن گے۔ (‏یوحنا 14:‏21؛‏ یعقوب 4:‏8‏)‏ ایس لئی آؤ یہوواہ نے سانوں جیہڑیاں سہولتاں دِتیاں نیں، اوہناں نُوں استمال کر کے فدیے بارے ہور سکھدے رہیے۔ اگلے مضمون چ اَسی ویکھاں گے کہ اَسی فدیے توں فائدہ کیویں چُک سکنے آں تے یہوواہ دی محبت لئی قدر کیویں وکھا سکنے آں۔‏