1.‏ سانوں ہر روز کیہڑا مشکل کم کرنا پیندا اے؟‏

 سانوں ہر روز فیصلے کرنے پیندے نیں۔ کجھ فیصلے کرنا بوہت اسان ہوندا اے، جیویں کہ اَسی ناشتے چ کیہہ کھانواں گے تے کیس ویلے سوواں گے۔ پر کجھ معاملیاں بارے فیصلے کرنا بوہت مشکل ہوندا اے۔ ہو سکدا اے کہ ایہہ ایہو جہے فیصلے ہون جنہاں دا اثر ساڈی صحت، ساڈی خوشی، ساڈے گھر والیاں یاں یہوواہ دی عبادت تے ہوئے۔ یقیناً اَسی ایہو جہے فیصلے کرنا چاہنے آں جنہاں نال سانوں تے ساڈے گھر والیاں نُوں فائدہ ہوئے۔ پر ساڈے لئی سب توں اہم گل ایہہ ہونی چاہی دی اے کہ ساڈے فیصلیاں توں یہوواہ خوش ہوئے۔—‏رومیوں 12:‏1، 2‏۔‏

2.‏ کیہڑے کم چنگے فیصلے کرن چ تواڈی مدد کر سکدے نیں؟‏

² چنگے فیصلے کرن لئی ضروری اے کہ تُسی (‏1)‏فیصلہ کرن توں پہلاں ساریاں گلاں تے غور کرو، (‏2)‏معاملے بارے یہوواہ دی سوچ جانن دی کوشش کرو تے (‏3)‏ویکھو کہ تُسی کیہڑے کیہڑے فیصلے کر سکدے او تے کیہڑے فیصلے دا پلڑا بھارا ہوئے گا۔ ایس مضمون چ ایہناں تِناں کماں بارے گل کیتی جائے گی۔ اَسی ایہہ وی سکھاں گے کہ اَسی اپنی سوچن سمجھن دی صلاحیت نُوں تیز کیویں کر سکنے آں۔—‏امثال 2:‏11‏۔‏

ساریاں گلاں تے غور کرو

3.‏ اِک مثال دے کے دَسو کہ توانوں کوئی فیصلہ کرن توں پہلاں ساریاں گلاں تے غور کرن دی لوڑ کیوں اے؟‏

³ چنگے فیصلے کرن لئی سب توں پہلا قدم ایہہ وے کہ تُسی ساریاں گلاں تے غور کرو۔ اِنج کرنا ضروری کیوں اے؟ فرض کرو کہ اِک بندے نُوں کوئی وڈی بیماری اے تے اوہ ڈاکٹر کول جاندا اے۔ کیہہ اوہ ڈاکٹر اوس بندے نُوں چیک کرن تے اوہدے کولوں سوال پچھن توں پہلاں ای ایہہ فیصلہ کر لوے گا کہ اوہ اوہدا علاج کیویں کرے گا؟ نئیں۔ ایسے طرحاں توانوں وی کوئی فیصلہ کرن توں پہلاں ساریاں گلاں تے غور کرن دی لوڑ اے فیر تُسی صحی فیصلہ کر سکو گے۔ پر تُسی اِنج کیویں کر سکدے او؟‏

4.‏ اَمثال 18:‏13 دے مطابق تُسی کسے معاملے بارے ساریاں گلاں جانن لئی کیہہ کر سکدے او؟ (‏تصویر نُوں وی ویکھو۔)‏

 ⁴ اکثر کجھ سوالاں تے غور کرن نال اَسی کسے معاملے بارے ساریاں گلاں جان سکنے آں۔ مثال لئی، فرض کرو کہ توانوں کسے پارٹی تے جان دی دعوت مِلدی اے۔ جے تُسی دعوت دین والے نُوں اینی چنگی طرحاں نئیں جان دے یاں توانوں اوس پارٹی دے اِنتظام بارے زیادہ کجھ نئیں پتہ تے تُسی دعوت دین والے بندے کولوں ایہہ سوال پچھ سکدے او:‏ پارٹی کدوں تے کتھے ہوئے گی؟ ایہدے چ کِنّے لوک آ ن گے؟ سارے اِنتظام کون ویکھے گا؟ کون کون آئے گا؟ اوتھے کیہہ کجھ کیتا جائے گا؟ کیہہ اوتھے شراب وی پیش کیتی جائے گی؟ ایہناں سوالاں تے غور کرن نال توانوں مدد ملے گی کہ تُسی صحی فیصلہ کر سکو۔‏‏—‏اَمثال 18:‏13 نُوں پڑھو۔‏

5.‏ ساریاں گلاں تے غور کرن توں بعد توانوں کیہہ کرنا چاہی دا اے؟‏

⁵ ساریاں گلاں تے غور کرن توں بعد صورتحال دا چنگی طرحاں جائزہ لَوو۔ مثال لئی فرض کرو کہ توانوں پتہ چلدا اے کہ جیس پارٹی چ توانوں بلا‌یا گیا اے، اوتھے ایہو جہے لوک وی ہون گے جیہڑے بائبل دے اصولاں تے نئیں چلدے۔ یاں فیر اوس پارٹی چ شراب وی پیش کیتی جائے گی پر اوتھے کوئی ایہو جیہا ذمے‌دار بندہ نئیں ہوئے گا جیہڑا ایس گل دا خیال رکھے کہ لوک کیس حد تک شراب پین گے۔ کیہہ توانوں لگدا اے کہ اوس پارٹی چ غلط کم ہو سکدے نیں؟ (‏1-‏پطرس 4:‏3‏)‏ یاں فیر تُسی اوہدوں کیہہ کرو گے جے پارٹی ایہو جہے وقت تے رکھی گئی ہوئے جدوں توانوں عبادت لئی یاں فیر مُنادی لئی جانا اے؟ جدوں تُسی پوری صورتحال دا دھیان نال جائزہ لَوو گے تے تواڈے لئی چنگا فیصلہ کرن اسان ہو جائے گا۔  پر توانوں اِک ہور قدم وی چُکن دی لوڑ اے۔ تُسی پوری صورتحال نُوں اپنے طور تے ویکھ لیا اے پر ہُن توانوں ایہہ جانن دی ضرورت اے کہ یہوواہ دی ایس معاملے بارے کیہہ سوچ اے۔—‏اَمثال 2:‏6‏۔‏

یہوواہ دی سوچ نُوں جانو

6.‏ یعقوب 1:‏5 دے مطابق سانوں یہوواہ کولوں مدد لئی دُعا کیوں کرنی چاہی دی اے؟‏

⁶ یہوواہ کولوں دُعا کرو کہ اوہ تواڈی مدد کرے تاکہ تُسی اوہدی سوچ نُوں سمجھ سکو۔ یہوواہ نے ساڈے نال وعدہ کیتا اے کہ اوہ سانوں حکمت دَوے گا تاکہ اَسی سمجھ سکئے کہ ساڈے فیصلے توں اوہ خوش ہوئے گا کہ نئیں۔ یہوواہ ایہہ حکمت ”‏ناراض ہوئے بغیر ساریاں نُوں دل کھول کے دیندا اے۔“‏‏—‏یعقوب 1:‏5 نُوں پڑھو۔‏

7.‏ تُسی کسے معاملے بارے یہوواہ دی سوچ نُوں کیویں جان سکدے او؟ اِک مثال دَوو۔‏

⁷ دُعا کرن توں بعد یہوواہ دے جواب تے دھیان دَوو۔ ایس گل نُوں سمجھن لئی ذرا اِک مثال تے غور کرو:‏ فرض کرو کہ تُسی سفر کردے ویلے راہ بُھل گئے او۔ جیس علاقے چ تُسی پونچ گئے او، تُسی اوتھے رہن والے اِک بندے کولوں راہ پچھدے او۔ پر کیہہ تُسی اوس بندے دا جواب سُنن توں پہلاں ای اوتھوں چلے جاؤ گے؟ بالکل نئیں۔ تُسی اوہدی گل نُوں بڑے دھیان نال سُنو گے۔ ایسے طرحاں جدوں تُسی کسے معاملے بارے یہوواہ کولوں حکمت منگدے او تے ایہدے بعد ایہہ سمجھن دی کوشش کرو کہ اوہ اپنے کلام چ دِتے گئے اصولاں تے حکماں دے ذریعے توانوں کیہہ جواب دے رہیا اے۔ مثال لئی، جے اوسے پارٹی دی گل کیتی جائے تے  اوتھے جان بارے کوئی فیصلہ کرن توں پہلاں تُسی سوچ سکدے او کہ بائبل چ محفلاں چ رنگ رلیاں منان، بھیڑے ساتھیاں تے خدا دی بادشاہی نُوں اپنی زندگی چ سب توں زیادہ اہمیت دین بارے کیہہ دَسیا گیا اے۔—‏متی 6:‏33؛‏ رومیوں 13:‏13؛‏ 1-‏کُرنتھیوں 15:‏33‏۔‏

8.‏ جے توانوں کوئی معلومات لبھن لئی مدد دی لوڑ اے تے تُسی کیہہ کر سکدے او؟ (‏تصویر نُوں وی ویکھو۔)‏

⁸ کدی کدار ہو سکدا اے کہ توانوں کوئی معلومات لبھن لئی مدد دی لوڑ ہوئے۔ ایہدے لئی تُسی کسے پُختہ مسیحی کولوں مدد لے سکدے او۔ پر توانوں آپ تحقیق کرن نال وی بوہت فائدہ ہوئے گا۔ ساڈی تنظیم نے تحقیق کرن لئی شاندار سہولتاں دِتیاں نیں جیویں کہ اُردو زبان چ کتاب ”‏یہوواہ کے گواہوں کے لئی مطالعے کے حوالے“‏ تے کتاب ”‏پاک کلام چوں رہنمائی۔“‏ تحقیق کردے ویلے ہمیشاں یاد رکھو کہ تواڈا مقصد ایہہ ہونا چاہی دا اے کہ تُسی اِک ایہو جیہا فیصلہ کرو جدے توں یہوواہ خوش ہوئے۔‏

9.‏ اَسی ایس گل دا پکا یقین کیویں کر سکنے آں کہ ساڈے فیصلے توں یہوواہ خوش ہوئے گا؟ (‏اِفسیوں 5:‏17‏)‏

⁹ اَسی ایس گل دا پکا یقین کیویں کر سکنے آں کہ اَسی جیہڑا فیصلہ کرن والے آں، اوہدے توں یہوواہ خوش ہوئے گا؟ ایہدے لئی سب توں پہلاں سانوں یہوواہ نُوں چنگی طرحاں جانن دی لوڑ اے۔ بائبل چ لکھیا اے:‏ سب توں پاک خدا دا علم سمجھداری اے۔ (‏اَمثال 9:‏10‏)‏ جدوں اَسی جان جانے آں کہ یہوواہ چ کیہڑیاں خوبیاں نیں، اوہدا مقصد کیہہ اے، اوہنوں کیہڑے کم پسند نیں تے کیہڑے کماں توں نفرت اے تے اَسی سمجھدار بننے آں۔ ایس لئی اپنے آپ کولوں پچھو:‏ ”‏مَیں یہوواہ بارے جو کجھ جاننا واں، اوہنوں ذہن چ رکھدے ہوئیاں مَیں کیہڑا فیصلہ کر سکنا واں جدے توں اوہ خوش ہوئے؟“‏‏—‏اِفسیوں 5:‏17 نُوں پڑھو۔‏

10.‏ بائبل دے اصول ساڈے خاندان تے ثقافت نالوں اہم کیوں نیں؟‏

¹⁰ یہوواہ نُوں خوش کرن لئی کدی کدار سانوں اپنے دوستاں تے رشتے‌داراں نُوں ناراض کرنا پیندا اے۔ مثال لئی، ہو سکدا اے کہ اِک ماں پیو اپنی دھی دی شادی اِک ایہو جہے بندے نال کرانا چاہن جیہڑا بڑا چنگا کماندا اے پر اوہدی یہوواہ نال دوستی اینی مضبوط نئیں اے۔ سچ اے کہ اوہ چاہندے نیں کہ اوہناں دی دھی نُوں پیسے دھیلے دی تنگی دا سامنا نہ کرنا پووے پر اوس کُڑی نُوں اپنے آپ کولوں ایہہ سوال پچھنا چاہی دا اے:‏ ”‏کیہہ ایہہ بندہ یہوواہ دے ہور نیڑے جان چ میری مدد کرے گا؟“‏ یہوواہ دی ایس بارے کیہہ سوچ اے؟ ایس سوال دا جواب سانوں متی 6:‏33 توں مِلدا اے۔ ایس ایت چ مسیحیاں نُوں کہیا گیا اے کہ اوہ ”‏خدا دی بادشاہی نُوں اپنی زندگی چ سب توں زیادہ اہمیت“‏ دین۔ ایہہ سچ اے کہ اَسی اپنے ماں پیو تے رشتے‌داراں دی عزت کرنے آں پر ساڈی نظر چ یہوواہ نُوں خوش کرنا سب توں زیادہ اہم ہونا چاہی دا اے۔‏

ویکھو کہ کیہڑے فیصلے دا پلڑا بھارا اے

11.‏ فِلپّیوں 1:‏9، 10 دے مطابق کیہڑی خوبی ایہہ جانن چ تواڈی مدد کرے گی کہ کیہڑے فیصلے دا کیہہ نتیجہ نکلے گا؟‏

¹¹ جدوں تُسی بائبل دے اصولاں تے غور کر لیندے او جیہڑے اِک معاملے تے لاگو ہوندے نیں تے ایہدے بعد توانوں ایہہ ویکھنا چاہی دا اے کہ تُسی کیہڑے کیہڑے فیصلے کر سکدے او۔ ‏(‏فِلپّیوں 1:‏9، 10 نُوں پڑھو۔)‏ سمجھداری دی خوبی دی وجہ توں تُسی ایہہ جان سکو گے کہ کیہڑے فیصلے دا کیہہ نتیجہ نکلے گا۔ کدی کدار اَسی کسے معاملے بارے بڑی اسانی نال فیصلہ کر لینے آں۔ پر ہر دفعہ اِنج کرنا اسان نئیں ہوندا۔ سمجھداری دی خوبی مشکل توں مشکل معاملے چ وی صحی فیصلہ کرن چ تواڈی مدد کرے گی۔‏

12، 13 سمجھداری دی خوبی تواڈی مدد کیویں کر سکدی اے تاکہ تُسی نوکری بارے صحی فیصلہ کر سکو؟‏

¹² فرض کرو کہ تُسی کوئی چنگی نوکری لبھ رہے او تاکہ تُسی اپنے خاندان دِیاں ضرورتاں پوریاں کر سکو۔ تواڈی نظر چ دو نوکریاں نیں۔ تُسی ساریاں گلاں تے غور کر لیا اے جیویں کہ تُسی کیہو جیہا کم کرنا اے، کِنّے گھنٹے دی نوکری اے، کِنّے وجے شروع ہو کے کِنّے وجے ختم ہوئے گی تے ایہدے تے آن جان چ کِنّاں وقت لگے گا۔ ایہہ دونویں نوکریاں بائبل دے اصولاں دے مطابق ٹھیک نیں۔ پر ہو سکدا اے کہ اِک نوکری توانوں زیادہ چنگی لگی اے کیونکہ اوہدے چ شاید تواڈی پسند دا کم اے یاں شاید اوہدی تنخواہ اچھی اے۔ پر فیصلہ کرن توں پہلاں توانوں کجھ ہور گلاں تے وی غور کرن دی لوڑ اے۔‏

 ¹³ مثال لئی، کیہہ ایہناں وچوں اِک نوکری ایہو جہی اے جدے لئی توانوں اوہدوں وی جانا پے سکدا اے جدوں عبادت دا وقت ہوندا اے؟ یاں کیہہ ایس نوکری دا وقت ایناں زیادہ اے کہ تواڈے لئی اپنے گھر والیاں نال وقت گزارنا تے یہوواہ دے نیڑے رہن چ اوہناں دی مدد کرنا مشکل ہو جائے گا؟ ایہو جہے سوالاں تے غور کرن نال توانوں ایہہ مدد ملے گی کہ تُسی اپنا دھیان اوہناں گلاں تے لا سکو جیہڑیاں ”‏زیادہ اہم“‏ نیں یعنی یہوواہ دی عبادت تے اپنے خاندان تے۔ اِنج تُسی اِک ایہو جیہا فیصلہ کر سکو گے جدے تے یہوواہ برکت پائے گا۔‏

14.‏ سمجھداری تے محبت دی وجہ توں اَسی دُوجیاں دے ضمیر نُوں ٹھیس پونچان توں کیویں بچ سکاں گے؟‏

¹⁴ سمجھداری دی خوبی دی وجہ توں اَسی ایس گل تے وی غور کراں گے کہ ساڈے فیصلیاں دا دُوجیاں تے کیہہ اثر ہوندا اے تاکہ اَسی اوہناں دے ضمیر نُوں ٹھیس پونچان توں بچ سکئے۔ (‏فِلپّیوں 1:‏10‏)‏اِنج کرنا اوہدوں بوہت ضروری ہوندا اے جدوں اَسی سجن سنورن، والاں دے سٹائل بنان تے ایہو جہے دُوجے معاملیاں بارے فیصلے کرنے آں۔ ہو سکدا اے کہ سانوں کوئی کپڑے یاں والاں دا کوئی سٹائل بڑا پسند اے۔ پر جے کلیسیا دے بھین  بھراواں تے دُوجے لوکاں نُوں ایہہ ویکھ کے چنگا نہ لگے تے فیر اَسی کیہہ کراں گے؟ سمجھداری دی خوبی ساڈی مدد کرے گی کہ اَسی اوہناں دے جذباتاں دا احترام کرئیے۔ محبت دی خوبی دی وجہ توں اَسی خاکساری نال کم لواں گے تے اپنے فائدے دا نئیں سگوں دُوجیاں دے فائدے دا سوچاں گے۔ (‏1-‏کُرنتھیوں 10:‏23، 24،‏ 32؛‏ 1-‏تیمُتھیُس 2:‏9، 10‏)‏ فیر اَسی ایہو جیہا فیصلہ کر سکاں گے جدے توں دُوجیاں لئی ساڈی محبت تے احترام ظاہر ہووے۔‏

15.‏ کسے وڈے فیصلے تے عمل کرن توں پہلاں توانوں کیہہ کرنا چاہی دا اے؟‏

¹⁵ جے تُسی کوئی وڈا فیصلہ کرنا اے تے سوچو کہ ایہدے تے عمل کرن لئی توانوں کیہہ کرنا ہوئے گا۔ یسوع نے سکھایا سی کہ اَسی بہہ کے پورا حساب لائیے۔ (‏لُوقا 14:‏28‏)‏ایس لئی پہلاں توں ای سوچو کہ اپنے فیصلے تے عمل کرن لئی تواڈا کِنّاں وقت، پیسہ تے محنت لگے گی۔ کجھ معاملیاں چ تُسی اپنے خاندان نال وی گل کر سکدے او تاکہ تُسی ایہہ جان سکو کہ گھر دا ہر فرد ایس فیصلے چ تواڈا ساتھ کیویں دے سکدا اے۔ اِنج تُسی جان سکو گے کہ کیہہ توانوں اپنے فیصلے چ کجھ تبدیلیاں کرن یاں فیر کوئی فرق فیصلہ کرن دی لوڑ اے۔ جے تُسی کوئی فیصلہ کردے ویلے اپنے خاندان نال وی گل کرو گے تے اوہناں دی گل دھیان نال سُنو گے تے اوہناں لئی ایس فیصلے چ تواڈا ساتھ دینا زیادہ اسان ہو جائے گا۔—‏اَمثال 15:‏22‏۔‏

کامیاب فیصلے کرو

16.‏ کیہڑے قدم چُکن نال تُسی اِک کامیاب فیصلہ کر سکو گے؟ (‏ایس بکس نُوں وی ویکھو:‏ ‏”‏ اَسی چنگے فیصلے کیویں کر سکنے آں؟‏‏“‏‏)‏

¹⁶ جے تُسی اوہ سارے قدم چُکے نیں جنہاں دا ایس مضمون چ ذکر ہویا اے تے تُسی چنگے فیصلے تے عمل کرن لئی تیار او۔ تُسی ساریاں گلاں تے غور کر لیا اے تے بائبل دے اوہناں اصولاں تے وی غور کر لیا اے جیہڑے یہوواہ دی مرضی مطابق فیصلہ کرن چ تواڈی مدد کرن گے۔ ہُن توانوں یہوواہ کولوں مدد منگن دی لوڑ اے کہ اوہ تواڈے فیصلے نُوں کامیاب کرے۔‏

17.‏ کیہڑی چیز چنگے فیصلے کرن لئی سب توں اہم اے؟‏

¹⁷ بھانویں کہ ماضی چ تواڈے کئی فیصلے کامیاب ہوئے نیں۔ فیر وی ایس گل نُوں یاد رکھو کہ تُسی اِک چنگا فیصلہ اوہدوں ای کر سکو گے جدوں تُسی اپنی سمجھ تے تجربے تے نئیں سگوں یہوواہ دی حکمت تے بھروسا کرو گے کیونکہ اوہی توانوں علم تے سمجھ دے سکدا اے تے تواڈی سوچن سمجھن دی صلاحیت نُوں ودھان چ تواڈی مدد کر سکدا اے۔ (‏اَمثال 2:‏1-‏5‏)‏ ایہہ ساریاں چیزاں اوس حکمت چ شامل نیں جیہڑی یہوواہ توانوں دیندا اے۔ تُسی ایس گل تے بھروسا رکھ سکدے او کہ یہوواہ ایہو جہے فیصلے کرن چ تواڈی مدد ضرور کرے گا جنہاں توں تُسی اوہنوں خوش کر سکو۔—‏زبور 23:‏2، 3‏۔‏