1.‏ یہوواہ نے مرد تے عورت لئی شادی دا بندوبست کیوں کیتا؟‏

 یہوواہ خوش‌دل خدا اے تے اوہ چاہندا اے کہ اَسی وی خوش رہیے۔ (‏1-‏تیمُتھیُس 1:‏11‏)‏ اوہنے سانوں خوش رہن تے زندگی دا مزہ لین لئی بوہت ساریاں نعمتاں دِتیاں نیں۔ (‏یعقوب 1:‏17‏)‏ ایہناں وچوں اِک نعمت شادی دا بندھن اے۔ جدوں اِک کُڑی تے منڈے دی شادی ہوندی اے تے اوہ ایہہ وعدہ کردے نیں کہ اوہ اِک دُوجے نال پیار کرن گے، اِک دُوجے دا خیال رکھن گے تے اِک دُوجے دی عزت کرن گے۔ جدوں میاں بیوی اِک دُوجے لئی اپنی محبت نُوں قائم رکھن دی کوشش کردے نیں تے اوہ خوش رہندے نیں۔—‏امثال 5:‏18‏۔‏

2.‏ اَج کل بوہت سارے شوہر اپنی بیوی نال کیہو جیہا سلوک کردے نیں؟‏

² ایہہ کِنّے افسوس دی گل اے کہ اَج بوہت سارے شادی‌شُدہ لوک اوس وعدے نُوں بُھل جاندے نیں جیہڑا اوہ اپنے جیون ساتھی نال شادی دے دن کردے نیں۔ ایس وجہ توں اوہ خوش نئیں رہندے۔ تھوڑے چِر پہلاں صحت دے عالمی اِدارے دی اِک رپورٹ چ دَسیا گیا سی کہ بوہت سارے شوہر اپنیاں بیویاں نُوں ماردے کٹ دے نیں، اوہناں دی بے‌عزتی کردے نیں یاں ہور دُوجے طریقیاں نال اوہناں نُوں دُکھی کردے نیں۔ ہو سکدا اے کہ ایہو جہے شوہر دُوجیاں دے سامنے تے اپنی بیوی نال بڑی عزت نال پیش آن پر کلّے چ اوہدے نال بھیڑا سلوک کرن۔ بوہت سارے شوہر گندیاں تصویراں تے ویڈیوز ویکھن نال وی اپنی بیوی نُوں بڑی تکلیف پونچاندے نیں۔‏

3.‏ کجھ شوہر اپنی بیوی نال بھیڑا سلوک کیوں کردے نیں؟‏

³ کجھ شوہر اپنی بیوی نال بھیڑا سلوک کیوں کردے نیں؟ شاید اوہناں نے بچپن توں ای اپنے پیو نُوں اپنی ماں نال بھیڑا سلوک کردے ویکھیا ہوئے۔ ایس لئی اوہ سوچدے نیں کہ اپنی بیوی نال بھیڑا سلوک کرنا غلط نئیں اے۔ کجھ آدمی اپنی ثقافت دی وجہ توں سوچدے نیں کہ اصل مرد اوہی ہوندا اے جیہڑا اپنی بیوی نُوں دبا کے رکھدا اے۔ تے کجھ آدمیاں نے اپنے غصے نُوں قابو چ رکھنا سکھیا ای نئیں ہوندا۔ کجھ مرد گندیاں تصویراں تے فلماں ویکھن دی وجہ توں عورتاں بارے تے جنسی تعلقات بارے غلط سوچ  رکھدے نیں۔ ایہدے علاوہ کجھ رپورٹاں دے مطابق کورونا دی وبا دے دوران لوکاں نے اپنیاں بیویاں نال زیادہ بھیڑا سلوک کرنا شروع کر دِتا۔ بھانویں وجہ کوئی وی ہوئے، پر کسے شوہر دا اپنی بیوی نال بھیڑا سلوک کرنا کسے وی طرحاں جائز نئیں اے۔‏

4.‏ مسیحی شوہراں نُوں کیس گل توں خبردار رہنا چاہی دا اے تے کیوں؟‏

⁴ مسیحی شوہراں نُوں عورتاں بارے ایس دُنیا دی سوچ نئیں اپنانی چاہی دی۔‏ a ایہدی اِک وجہ ایہہ وے کہ اِک بندے دی سوچ دا اثر اوہدے کماں تے ہوندا اے۔ پولُس رسول نے روم چ رہن والے مسح‌شُدہ مسیحیاں نُوں خبردار کیتا کہ اوہ ایس زمانے دے طور طریقیاں دی نقل کرنا چھڈ دین۔ (‏رومیوں 12:‏1، 2‏)‏ جدوں پولُس نے اوہناں نُوں ایہہ خط لکھیا سی تے اوس وقت اوہناں نُوں مسیحی بنے کئی سال ہو چُکے سن۔ پر پولُس دی گل توں پتہ چلدا اے کہ اوس کلیسیا دے کجھ بھین بھراواں تے حالے وی دُنیا دی سوچ تے طور طریقیاں دا اثر سی۔ ایس لئی پولُس نے اوہناں نُوں ہلاشیری دِتی کہ اوہ اپنی سوچ تے اپنے رویے نُوں بدلن۔ پولُس دی نصیحت تے اَج مسیحی شوہراں نُوں وی عمل کرنا چاہی دا اے۔ افسوس دی گل اے کہ کجھ مسیحی شوہراں تے وی ایس دُنیا دی سوچ دا اثر اے تے اوہ اپنی بیوی نال بڑا بھیڑا سلوک کردے نیں۔‏ b اِک شوہر نُوں اپنی بیوی نال کیویں پیش آنا چاہی دا اے تے ایس بارے یہوواہ اوہدے کولوں کیہہ توقع کردا اے؟ ایس سوال دا جواب سانوں ایس مضمون دی مرکزی ایت چ مِلدا اے۔‏

5.‏ 1-‏پطرس 3:‏7 دے مطابق اِک شوہر نُوں اپنی بیوی نال کیویں پیش آنا چاہی دا اے؟‏

⁵ 1‏-‏پطرس 3:‏7 نُوں پڑھو۔‏ یہوواہ نے شوہراں نُوں حکم دِتا اے کہ اوہ اپنی بیوی دی عزت کرن۔ ایس مضمون چ اَسی سکھاں گے کہ اِک شوہر اپنی بیوی لئی عزت کیویں وکھا سکدا اے۔ پر آؤ، سب توں پہلاں ایس گل تے غور کرنے آں کہ شوہر دے کیہڑے کماں دی وجہ توں بیوی لئی عزت ظاہر نئیں ہوندی۔‏

اوہ کم جنہاں توں بیوی لئی عزت ظاہر نئیں ہوندی

6.‏ یہوواہ اوہناں بندیاں بارے کیہو جہی سوچ رکھدا اے جیہڑے اپنی بیوی نُوں ماردے کٹ دے نیں؟ (‏کُلسّیوں 3:‏19‏)‏

⁶ اِک شوہر نُوں اپنی بیوی نُوں مارنا کُٹنا نئیں چاہی دا۔‏ یہوواہ مار کُٹائی کرن والیاں توں نفرت کردا اے۔ (‏زبور 11:‏5‏)‏ اوہ خاص طور تے ایہو جہے شوہراں نُوں سخت ناپسند کردا اے جیہڑے اپنی بیوی تے ہتھ چُک دے نیں۔ (‏ملاکی 2:‏16؛‏ کُلسّیوں 3:‏19 نُوں پڑھو۔)‏ ایس مضمون دی مرکزی ایت یعنی 1-‏پطرس 3:‏7 چ دَسیا گیا اے کہ جے اِک شوہر اپنی بیوی نال بھیڑا سلوک کرے گا تے یہوواہ نال اوہدی دوستی ٹُٹ جائے گی، ایتھوں تک کہ یہوواہ اوہدیاں دُعاواں وی نئیں سُنے گا۔‏

7.‏ اِفسیوں 4:‏31، 32 دے مطابق شوہراں نُوں اپنی بیوی نال کیہو جہیاں گلاں نئیں کرنیاں چاہی دِیاں؟ (‏‏”‏اِصطلاح دی وضاحت“‏ نُوں ویکھو۔)‏

⁷ اِک شوہر نُوں اپنی بیوی نال غصے نال گل نئیں کرنی چاہی دی۔‏ کجھ شوہر اپنی بیوی نال بڑے غصے نال گل کردے نیں تے اوہنوں بڑی تکلیف پونچان والیاں گلاں کردے نیں۔ پر یہوواہ نُوں غصے، قہر، چیخ چیاڑے تے گالی‌گلوچ توں نفرت اے۔‏ c ‏(‏اِفسیوں 4:‏31، 32 نُوں پڑھو۔)‏ یہوواہ انساناں دی گل بات سُن دا اے۔ اوہدی نظر چ ایہہ گل وی اہم اے کہ اِک شوہر اپنی بیوی نال کلّے چ کیویں گل کردا اے۔ جیہڑا شوہر اپنی بیوی نال سختی نال گل کردا اے، اوہ نہ صرف اوہدے نال سگوں یہوواہ نال اپنے رشتے نُوں وی کمزور کر دیندا اے۔—‏یعقوب 1:‏26‏۔‏

8.‏ گندیاں تصویراں تے فلماں ویکھن بارے یہوواہ دی سوچ کیہہ اے تے کیوں؟‏

⁸ اِک شوہر نُوں گندیاں تصویراں تے فلماں نئیں ویکھنیاں چاہی دِیاں۔‏ گندیاں تصویراں تے فلماں ویکھن بارے یہوواہ دی سوچ کیہہ اے؟ اوہ ایہدے توں سخت نفرت کردا اے۔ جے اِک بندہ گندیاں تصویراں ویکھدا اے تے اوہ یہوواہ نال اپنے رشتے نُوں کمزور کر دیندا اے تے اِک لحاظ  نال اوہ اپنی بیوی دی بے‌عزتی کر رہیا ہوندا اے۔‏ d یہوواہ چاہندا اے کہ شوہر اپنی بیوی دا وفادار رہوے تے زناکاری تے دُور دی گل اے، اوہ کسے ہور عورت بارے غلط سوچے وی نہ۔ یسوع مسیح نے دَسیا سی کہ”‏جیہڑا بندہ کسے عورت نُوں گندی نظر نال ویکھدا رہندا اے، اوہنے اپنے دل چ اوہدے نال زِنا کر لیا اے۔“‏ e‏—‏متی 5:‏28، 29‏۔‏

9.‏ یہوواہ نُوں ایس گل توں نفرت کیوں اے کہ اِک شوہر اپنی بیوی نُوں ایہو جہے جنسی کماں تے مجبور کرے جنہاں توں اوہنوں بے‌عزتی محسوس ہوندی اے؟‏

⁹ اِک شوہر نُوں اپنی بیوی نال جنسی تعلق قائم کردے ویلے اوہنوں ایہو جہے کم کرن تے مجبور نئیں کرنا چاہی دا جدے توں اوہنوں بے‌عزتی محسوس ہوئے۔ کجھ شوہر اپنی بیوی نال جنسی تعلق قائم کردے ویلے اوہنوں ایہو جہے کم کرن تے مجبور کردے نیں جنہاں نُوں کرن دی اوہدا ضمیر اجازت نئیں دیندا، اوہنوں بے‌عزتی محسوس ہوندی اے یاں اوہنوں اِنج لگدا اے کہ اوہدا شوہر اوہنوں پیار نئیں کردا۔ یہوواہ نُوں شوہراں دے ایس خودغرض رویے توں نفرت اے۔ یہوواہ چاہندا اے کہ شوہر اپنی بیوی نال محبت کرے، اوہدا خیال رکھے تے اوہدے جذبات نُوں سمجھے۔ (‏اِفسیوں 5:‏28، 29‏)‏ جے اِک مسیحی شوہر اپنی بیوی لئی عزت نئیں وکھاندا یاں گندیاں تصویراں تے فلماں ویکھدا اے تے اوہ اپنی سوچ تے کماں نُوں کیویں بدل سکدا اے؟‏

اِک شوہر اپنے بھیڑے رویے نُوں کیویں بدل سکدا اے؟‏

10.‏ شوہراں نُوں یسوع دی مثال تے غور کرن نال کیہہ فائدہ ہو سکدا اے؟‏

¹⁰ کیہڑی گل اِک شوہر دی مدد کر سکدی اے کہ اوہ اپنی بیوی نال بُری طرحاں پیش آنا چھڈ دَوے؟ ایہدے لئی اوہ یسوع مسیح دی مثال تے عمل کر سکدا اے۔ بھانویں کہ یسوع شادی‌شُدہ نئیں سی پر اوہ جیس طریقے نال اپنے شاگرداں نال پیش آندا سی تے اوہناں نال گل کردا سی، اوہدے توں شوہر سکھ سکدے نیں کہ اوہناں نُوں اپنی بیوی نال کیویں پیش آنا چاہی دا اے۔—‏اِفسیوں 5:‏25‏۔‏

11.‏ یسوع اپنے رسولاں نال کیویں پیش آندا سی؟‏

¹¹ یسوع اپنے رسولاں نال بڑے پیار تے عزت نال پیش آندا سی۔ اوہ کدی وی اوہناں تے سختی نئیں کردا سی۔ بھانویں کہ اوہ اوہناں دا مالک سی پر فیر وی اوہ اوہناں تے رُعب نئیں پاندا سی سگوں یسوع خاکساری نال اوہناں دی خدمت کردا سی۔ (‏یوحنا 13:‏12-‏17‏)‏ اوہنے اپنے شاگرداں نُوں کہیا:‏ ”‏میرے کولوں سکھو کیونکہ مَیں نرم‌مزاج تے دِلوں خاکسار آں۔ فیر توانوں آرام تے تازگی ملے گی۔“‏ (‏متی 11:‏28-‏30‏)‏ غور کرو کہ یسوع نرم‌مزاج سی۔ اِک نرم‌مزاج بندہ کمزور نئیں ہوندا۔ سگوں اوہ اندروں مضبوط ہوندا اے کیونکہ اوہ ایہو جہی صورتحال چ وی پُرسکون رہندا اے جنہاں چ اپنے غصے نُوں قابو چ رکھنا مشکل ہو سکدا اے۔‏

12.‏ یسوع دُوجیاں نال کیویں گل کردا سی؟‏

¹² یسوع جیویں لوکاں نال گل کردا سی اوہدے توں اوہناں نُوں تسلی تے تازگی مِلدی سی۔ اوہ اپنے پیروکاراں نال سختی نال گل نئیں کردا سی۔ (‏لُوقا 8:‏47، 48‏)‏ جدوں اوہدے مخالف اوہدی بے‌عزتی کردے سن تے اوہنوں غصہ دَوان دی کوشش کردے سن تے اوہ اَگوں اوہناں دی بے‌عزتی نئیں کردا سی۔ (‏1-‏پطرس 2:‏21-‏23‏)‏ کدی کدی تے یسوع دُوجیاں نُوں سخت جواب دین دی بجائے خاموش ہو جاندا سی۔ (‏متی 27:‏12-‏14‏)‏ یسوع نے واقعی مسیحی شوہراں لئی بڑی ودھیا مثال قائم کیتی اے۔‏

13.‏ متی 19:‏4-‏6 دے مطابق اپنی بیوی دے نال رہن دا کیہہ مطلب اے؟ (‏تصویر نُوں وی ویکھو۔)‏

¹³ یسوع مسیح نے شوہراں نُوں ہدیت دِتی کہ اوہ اپنی بیوی دے وفادار رہن۔ اوہنے اپنے اسمانی باپ دی گل دا حوالہ دیندیاں ہوئیاں کہیا کہ ”‏اِک شوہر نُوں اپنی بیوی دے نال رہنا چاہی دا اے۔“‏ ‏(‏متی 19:‏4-‏6 نُوں پڑھو۔)‏ ایس ایت چ ”‏نال رہن“‏ لئی جیہڑا یونانی لفظ استمال ہویا اے، اوہدا لفظی مطلب اے ”‏گُوند نال جوڑنا۔“‏ ایہدا مطلب اے کہ اِک میاں بیوی دا شادی دا بندھن ایناں مضبوط ہونا چاہی دا اے جیویں اوہ اِک دُوجے نال گُوند نال جُڑے ہون۔ ایس لئی جے اوہناں وچوں اِک وی اپنے ساتھی نُوں تکلیف پونچائے گا تے نقصان دونواں نُوں ہوئے گا۔ جیہڑا بندہ اپنی بیوی نال ایہو جیہا رشتہ رکھے گا، اوہ گندیاں تصویراں یاں فلماں نئیں ویکھے گا۔ اوہ فوراً اپنیاں نظراں نُوں بے‌کار چیزاں توں پھیر لوے گا۔ (‏زبور 119:‏37‏)‏ ایوب وانگوں اوہ  اپنیاں اَکھاں نال عہد کرے گا کہ اوہ کسے وی عورت نُوں غلط نظر نال نئیں ویکھے گا۔—‏ایوب 31:‏1‏۔‏

14.‏ اِک شوہر نُوں یہوواہ تے اپنی بیوی نال اپنے رشتے نُوں فیر توں مضبوط کرن لئی کیہڑے قدم چُکن دی لوڑ اے؟‏

¹⁴ جے اِک شوہر اپنی بیوی نُوں ماردا کٹ دا اے یاں اوہدی بے‌عزتی کردا اے تے اوہنوں یہوواہ تے اپنی بیوی نال اپنے رشتے نُوں فیر توں مضبوط کرن لئی کجھ ہور قدم چُکن دی وی لوڑ اے۔ پہلا،‏ اوہنوں ایہہ منن دی لوڑ اے کہ اوہ جو کجھ کر رہیا اے، اوہ اِک وڈا مسئلہ اے تے یہوواہ اوہنوں ویکھ رہیا اے۔ (‏زبور 44:‏21؛‏ واعظ 12:‏14؛‏ عبرانیوں 4:‏13‏)‏ دُوجا،‏ اوہنوں اپنی بیوی نال اپنے بھیڑے رویے نُوں بدلنا پووے گا۔ (‏امثال 28:‏13‏)‏ تیجا،‏ اوہنوں اپنی بیوی تے یہوواہ کولوں معافی منگن دی لوڑ اے۔ (‏اعمال 3:‏19‏)‏ اوہنوں یہوواہ کولوں ایہہ اِلتجا وی کرنی چاہی دی اے کہ اوہ اوہدے اندر اپنے آپ نُوں بدلن دی خواہش پاوے تے اوہدی مدد کرے تاکہ اوہ اپنی غلط سوچ تے زبان تے قابو پا سکے تے ایہو جہے کم کرے جیہڑے یہوواہ نُوں پسند نیں۔ (‏زبور 51:‏10-‏12؛‏ 2-‏کُرنتھیوں 10:‏5؛‏ فِلپّیوں 2:‏13‏)‏ چوتھا،‏ اوہنوں اپنیاں دُعاواں مطابق عمل وی کرنا چاہی دا اے۔ ایس لئی اوہنوں ہر طرحاں دے ظلم تے گالی‌گلوچ توں نفرت کرن دی لوڑ اے۔ (‏زبور 97:‏10‏)‏ پنجواں،‏ اوہنوں کلیسیا دے بزرگاں کولوں فوراً مدد لین دی لوڑ اے۔ (‏یعقوب 5:‏14-‏16‏)‏ چھیواں،‏ اوہنوں ایہہ پہلاں توں سوچن دی لوڑ اے کہ اوہ اَگے چل کے وی کیہہ کر سکدا اے تاکہ اوہ ہر طرحاں دے بھیڑے کم توں دُور رہ سکے۔ جے اِک شوہر گندیاں تصویراں تے فلماں ویکھدا اے تے اوہنوں وی ایہی سارے قدم چُکنے چاہی دے نیں۔جدوں اِک شوہر اپنے آپ نُوں بدلن دی کوشش کردا اے تے یہوواہ اوہدیاں کوششاں تے برکت پاندا اے۔ (‏زبور 37:‏5‏)‏ پر صرف ایہی کافی نئیں اے سگوں اِک شوہر نُوں ایہہ وی سکھن دی لوڑ اے کہ اوہ اپنی بیوی لئی عزت کیویں وکھا سکدا اے۔‏

تُسی اپنی بیوی لئی عزت کیویں وکھا سکدے او؟‏

15.‏ اِک شوہر اپنی بیوی لئی محبت دا اظہار کیویں کر سکدا اے؟‏

¹⁵ اپنی بیوی لئی محبت دا اظہار کرو۔‏ کجھ بھرا جیہڑے اپنی شادی‌شُدہ زندگی توں بڑے خوش نیں، اوہ ہر روز اپنی بیوی لئی کوئی نہ کوئی ایہو جیہا کم کردے نیں جدے توں اوہ اوہدے لئی محبت ظاہر کر سکن۔ (‏1-‏یوحنا 3:‏18‏)‏ جیویں کہ شاید اوہ اپنی بیوی دا ہتھ پھڑن یاں اوہنوں گلے لان وغیرہ۔ ایہدے علاوہ اِک شوہر دن دے دوران اپنی بیوی نُوں میسج کر کے اوہدا حال چال پچھ سکدا اے تے اوہنوں کہہ سکدا اے کہ اوہ اوہنوں یاد کر رہیا اے۔ اوہ اوہنوں کدی کدار کارڈ وی دے سکدا اے تے اوہدے چ ایہو جہیاں گلاں لکھ  سکدا اے جدے توں اوہدی بیوی نُوں محسوس ہوئے کہ اوہ اوہنوں کِنّی محبت کردا اے۔ اِنج اِک شوہر اپنی بیوی لئی عزت وکھا رہیا ہوندا اے تے اوہدا شادی دا بندھن وی مضبوط ہوندا اے۔‏

16.‏ اِک شوہر نُوں اپنی بیوی دی تعریف کیوں کرنی چاہی دی اے؟‏

¹⁶ اپنی بیوی نُوں دَسو کہ تُسی اوہدی بوہت قدر کردے او۔‏ جیہڑا شوہر اپنی بیوی دی عزت کردا اے، اوہ اوہدا حوصلہ ودھاندا اے تے اوہنوں دَسدا اے کہ اوہ اوہدی اینی قدر کیوں کردا اے۔ اِک طریقہ جدے ذریعے اوہ اِنج کر سکدا اے اوہ ایہہ وے کہ اوہ ہر اوس کم لئی اپنی بیوی دا شکریہ ادا کرے جدے چ اوہ اوہدا ساتھ دیندی اے۔ (‏کُلسّیوں 3:‏15‏)‏ جدوں اِک شوہر دِلوں اپنی بیوی دی تعریف کردا اے تے اوہدی بیوی نُوں بڑی خوشی ہوندی اے نالے اوہنوں محسوس ہوندا اے کہ اوہ محفوظ اے، اوہدا شوہر اوہدے نال پیار کردا اے تے اوہدی عزت کردا اے۔—‏امثال 31:‏28‏۔‏

17.‏ اِک شوہر اپنی بیوی لئی عزت کیویں وکھا سکدا اے؟‏

¹⁷ اپنی بیوی نال نرمی تے عزت نال پیش آؤ۔‏ جیہڑا شوہر اپنی بیوی نال پیار کردا اے، اوہ اوہدی قدر کردا اے تے اوہدا خیال رکھدا اے۔ اوہ اوہنوں یہوواہ وَلّوں اِک قیمتی تحفہ سمجھدا اے۔ (‏امثال 18:‏22؛‏ 31:‏10‏)‏ ایس لئی اوہ کلّے چ تے اوہدے نال جنسی تعلق قائم کردے ویلے وی اوہدے نال پیار نال پیش آندا اے تے اوہدے لئی عزت وکھاندا اے۔ اوہ اوہدے نال جنسی تعلق قائم کردے ویلے اوہنوں کوئی وی ایہو جیہا کم کرن تے مجبور نئیں کردا جنہوں کرنا اوہدی بیوی نُوں بُرا لگدا اے، اوہنوں بے‌عزتی محسوس ہوندی اے یاں جنہوں کرن دی اجازت اوہدا ضمیر اوہنوں نئیں دیندا۔‏ f اوہ آپ وی پوری کوشش کردا اے کہ اوہ کوئی ایہو جیہا کم نہ کرے جدی اجازت اوہدا ضمیر نئیں دیندا۔—‏اعمال 24:‏16‏۔‏

18.‏ شوہراں نُوں کیہہ عزم کرنا چاہی دا اے؟ (‏ایس بکس نُوں وی ویکھو:‏ ‏”‏ بیوی لئی عزت ظاہر کرن دے چار طریقے۔‏‏“‏‏)‏

¹⁸ شوہرو، یہوواہ ایس گل نُوں ویکھدا اے کہ تُسی اپنی بیوی لئی عزت ظاہر کرن دی کِنّی کوشش کر رہے او۔ ایس لئی ایہہ عزم کرو کہ تُسی کوئی وی ایہو جیہا کم نئیں کرو گے جدے توں تواڈی بیوی نُوں بے‌عزتی محسوس ہوئے سگوں تُسی اوہدے نال نرمی تے عزت نال پیش آؤ گے تے اوہدے لئی پیار وکھاؤ گے۔ ایس طرحاں اوہ ویکھ سکے گی کہ تُسی اوہدی کِنّی قدر کردے او۔ شوہرو، جدوں تُسی اپنی بیوی دی عزت کرو گے تے تُسی اپنے سب توں اہم رشتے دی قدر کر رہے ہووو گے یعنی یہوواہ نال اپنے رشتے دی۔—‏زبور 25:‏14‏۔‏