1.‏ اَسی یہوواہ نُوں کیویں خوش کر سکنے آں؟‏

 فرض کرو کہ تُسی اپنے کسے دوست نُوں بڑا خاص تحفہ دیندے او جیہڑا بڑا خوب‌صورت اے تے بڑے کم دا اے۔ پر جے اوہ بندہ اوس تحفے نُوں کِتے رکھ چھڈے تے اوہنوں استمال نہ کرے تے توانوں کیہو جیہا لگے گا؟ توانوں یقیناً بڑا دُکھ ہوئے گا۔ پر جے اوہ بندہ اوہنوں بڑی چنگی طرحاں استمال کرے گا تے اوہدے لئی قدر وکھائے گا تے توانوں بڑی خوشی ہوئے گی۔ ایس مثال توں اَسی کیہہ سکھنے آں؟ یہوواہ نے سانوں اپنا پُتر دِتا اے۔ اوہنے محبت دی وجہ توں ای اوہدا فدیہ دِتا اے۔ جے اَسی یہوواہ دے ایس تحفے تے اوہدی محبت لئی شکرگزاری ظاہر کراں گے تے اوہنوں بڑی خوشی ہوئے گی۔‏‏—‏یوحنا 3:‏16؛‏ رومیوں 5:‏7، 8‏۔‏

2.‏ ایس مضمون چ اَسی کیس بارے گل کراں گے؟‏

² وقت دے نال نال شاید ساڈے دل چ فدیے لئی قدر گھٹ ہون لگ پئے۔ ایہہ اِنج ای ہوئے گا جیویں اَسی خدا دے ایس تحفے نُوں کتھے سانبھ کے رکھ دِتا اے تے ہُن اَسی نہ ای ایہنوں ویکھنے آں تے نہ ای ایہدے بارے سوچنے آں۔ جے اَسی چاہنے آں کہ اِنج نہ ہوئے تے سانوں باقاعدگی نال ایس گل تے سوچ‌وچار کرنا چاہی دا اے کہ یہوواہ تے یسوع نے ساڈے لئی کیہہ کجھ کیتا اے۔ ایہہ مضمون اِنج کرن چ ساڈی مدد کر سکدا اے۔ ایس مضمون چ اَسی ویکھاں گے کہ فدیے دی وجہ توں اَج سانوں کیہڑے فائدے ہوندے نیں تے مستقبل چ کیہڑے فائدے ہون گے۔ اَسی ایس گل تے وی غور کراں گے کہ اَسی یہوواہ دی محبت لئی شکرگزاری کیویں وکھا سکنے آں، خاص کر مسیح دی یادگیری توں پہلے تے بعد والے ہفتیاں چ۔‏

فدیے دی وجہ توں اَج سانوں کیہڑے فائدے ہوندے نیں؟‏

3.‏ فدیے دی وجہ توں اَج سانوں کیہڑا فائدہ ہوندا اے؟‏

³ یسوع دی قربانی توں سانوں اَج وی بڑے فائدے ہوندے نیں۔ مثال لئی، ایہدی وجہ توں یہوواہ ساڈے گُناہواں نُوں معاف کر دیندا اے۔‏ یہوواہ تے اِنج کرنا فرض نئیں اے۔ پر فیر وی اوہ ساڈے گُناہ معاف کرنا چاہندا اے۔ زبور لکھن والا اِک بندہ یہوواہ دی ایس مہربانی لئی اوہدا بڑا شکرگزار سی۔  ایس لئی اوہنے اپنے گیت چ ایہہ کہیا:‏ اَے یہوواہ، تُوں نیک ایں تے معاف کرن لئی تیار رہنا ایں۔—‏زبور 86:‏5؛‏ 103:‏3،‏ 10-‏13‏۔‏

4.‏ یہوواہ نے فدیے دا بندوبست کنہاں لئی کیتا اے؟ (‏لُوقا 5:‏32؛‏ 1-‏تیمُتھیُس 1:‏15‏)‏

⁴ شاید کجھ لوکاں نُوں لگے کہ اوہ یہوواہ کولوں معافی حاصل کرن دے لائق نئیں نیں۔ اصل چ تے ساڈے وچوں کوئی وی ایس لائق نئیں اے۔ پولُس وی ایہہ گل چنگی طرحاں سمجھدا سی ایس لئی اوہنے کہیا:‏ مَیں ایس لائق نئیں کہ مینوں رسول کہیا جائے۔ پر اوہنے اَگے ایہہ وی کہیا:‏ خدا دی عظیم رحمت دی وجہ توں مینوں رسول دا رُتبہ مِلیا۔ (‏1-‏کُرنتھیوں 15:‏9، 10‏)‏ جدوں اَسی اپنے گُناہواں توں توبہ کرنے آں تے یہوواہ سانوں معاف کر دیندا اے۔ اوہ سانوں ایس لئی معاف نئیں کردا کہ اَسی ایہدے لائق آں سگوں اوہ پیار دی وجہ توں سانوں معاف کردا اے۔ جے تُسی ایس گلوں پریشان رہندے او کہ تُسی یہوواہ کولوں معافی حاصل کرن دے لائق نئیں او تے یاد ر کھو کہ یہوواہ نے فدیے دا بندوبست بے‌عیب لوکاں لئی نئیں سگوں عیب‌دار لوکاں لئی کیتا اے جیہڑے اپنے گُناہواں تے پچھتاندے نیں تے توبہ کرنا چاہندے نیں۔‏‏—‏لُوقا 5:‏32؛‏ 1-‏تیمُتھیُس 1:‏15 نُوں پڑھو۔‏

5.‏ کیہہ اَسی ایہہ کہہ سکنے آں کہ ساڈا حق اے کہ یہوواہ سانوں معاف کرے؟‏

⁵ ساڈے وچوں کسے نُوں وی ایہہ نئیں سوچنا چاہی دا کہ اَسی کئی سالاں توں یہوواہ دی خدمت کر رہے آں ایس لئی ایہہ ساڈا حق اے کہ یہوواہ سانوں معاف کرے۔ ایہہ سچ اے کہ یہوواہ ساڈی وفاداری دی بڑی قدر کردا اے۔ (‏عبرانیوں 6:‏10‏)‏ پر اوہنے اپنا پُتر ساڈی خدمت دے بدلے چ نئیں سگوں اِک تحفے دے طور تے دِتا اے۔ اَسی ایہہ دعویٰ نئیں کر سکدے کہ اَسی یہوواہ دی خدمت لئی بڑا کجھ کیتا اے ایس لئی اوہنوں ساڈے گُناہ معاف کرنے چاہی دے نیں۔ جے اَسی اِنج سوچاں گے تے اِک لحاظ نال اَسی کہہ رہے ہونواں گے کہ مسیح دی قربانی دا کوئی فائدہ نئیں۔—‏گلتیوں 2:‏21 تے غور کرو۔‏

6.‏ پولُس نے یہوواہ دی خدمت چ اینی محنت کیوں کیتی؟‏

⁶ پولُس جان دا سی کہ اوہ یہوواہ دی خدمت کر کے اوہدے کولوں معافی حاصل کرن دے لائق نئیں بن سکدا۔ تے فیر اوہنے یہوواہ دی خدمت کرن چ اینی محنت کیوں کیتی؟ اوہنے اِنج ایس لئی نئیں کیتا تاکہ اوہ ایہہ ثابت کر سکے کہ اوہ یہوواہ دے رحم دا حق‌دار اے سگوں ایس لئی کیتا تاکہ اوہ یہوواہ دی عظیم رحمت لئی قدر وکھا سکے۔ (‏اِفسیوں 3:‏7‏)‏ پولُس وانگوں اَسی وی جوش نال یہوواہ دی خدمت کرنے آں۔ اَسی اِنج ایس لئی نئیں کردے کہ یہوواہ ساڈے تے رحم کرے سگوں ایس لئی کرنے آں کیونکہ اَسی اوہدے رحم لئی قدر وکھانا چاہنے آں۔‏

7.‏ اَج سانوں فدیے توں ہور کیہڑا فائدہ ہوندا اے؟ (‏رومیوں 5:‏1؛‏ یعقوب 2:‏23‏)‏

⁷ اَج سانوں فدیے توں اِک ہور فائدہ ایہہ ہو رہیا اے کہ اَسی یہوواہ نال دوستی کر سکنے آں۔‏ a جیویں کہ اَسی پچھلے مضمون چ سکھیا سی، جدوں اَسی پیدا ہنے آں تے اوہدوں ساڈی خدا نال دوستی نئیں ہوندی۔ پر فدیے دی وجہ توں اَسی خدا نال صلح کر سکنے آں تے اوہدے نیڑے جا سکنے آں۔‏‏—‏رومیوں 5:‏1؛‏ یعقوب 2:‏23 نُوں پڑھو‏۔‏

8.‏ سانوں دُعا دے اعزاز لئی یہوواہ دا شکرگزار کیوں ہونا چاہی دا اے؟‏

⁸ یہوواہ نال دوستی کرن دی وجہ توں سانوں ایہہ اعزاز مِلیا اے کہ اَسی اوہدے کولوں دُعا کر سکنے آں۔ یہوواہ نہ صرف اپنے بندیاں دِیاں اوہناں دُعاواں نُوں سُن دا اے جیہڑیاں اوہ او س ویلے کردے نیں جدوں اوہ اوہدی عبادت لئی کٹھے ہوندے نیں سگوں اوہ ساڈے وچوں ہر اِک دِیاں ذاتی دُعاواں نُوں وی سُن دا اے۔ جدوں اَسی دُعا کرنے آں تے ساڈے دل تے دماغ نُوں سکون مِلدا اے۔ سب توں ودھ کے ایہہ کہ اِنج کرن نال یہوواہ نال ساڈی دوستی مضبوط ہوندی اے۔ (‏زبور 65:‏2؛‏ یعقوب 4:‏8؛‏ 1-‏یوحنا 5:‏14‏)‏ جدوں یسوع زمین تے سی تے اوہنے وار وار اپنے اسمانی باپ کولوں دُعا کیتی کیونکہ اوہنوں پتہ سی کہ اوہدا باپ اوہدیاں دُعاواں نُوں سُن رہیا اے تے اِنج اوہ اپنے باپ نال اپنا رشتہ وی مضبوط رکھ سکے گا۔ (‏لُوقا 5:‏16‏)‏ اَسی یہوواہ دے بڑے شکرگزار آں کہ اوہدے پُتر دی قربانی دی وجہ توں اَسی اوہدے دوست بن سکنے آں تے دُعا چ اوہدے نال گل وی کر سکنے آں۔‏

 فدیے دی وجہ توں سانوں مستقبل چ کیہڑے فائدے ہون گے؟‏

9.‏ یہوواہ خدا دے وفادار بندیاں نُوں مستقبل چ فدیے توں کیہڑا فائدہ ہوئے گا؟‏

⁹ یہوواہ دے وفادار بندیاں نُوں مستقبل چ فدیے توں کیہڑے فائدے ہون گے؟ یہوواہ اوہناں نُوں ہمیشاں دی زندگی دَوے گا۔ کئی لوکاں نُوں لگدا اے کہ اِنج نئیں ہو سکدا کیونکہ ہزاراں سالاں توں انسان مر رہے نیں۔ پر یہوواہ دا مقصد سی کہ انسان ہمیشاں تک زندہ رہن۔ جے آدم گُناہ نہ کردا تے کسے وی انسان لئی ہمیشاں دی زندگی اِک خواب نئیں ہونی سی۔ ایہہ سچ اے کہ ساڈے لئی ایہہ سوچنا مشکل اے کہ اَسی ہمیشاں تک زندہ رہ سکنے آں۔ پر اَسی ایس گل دا پکا یقین رکھ سکنے آں کہ یہوواہ سانوں ہمیشاں دی زندگی دَوے گا کیونکہ یہوواہ نے ایہدے لئی بڑی وڈی قیمت دِتی اے یعنی اپنے پُتر دی قربانی۔—‏رومیوں 8:‏32‏۔‏

10.‏ پاک روح نال مسح ہوئے مسیحی تے مسیح دِیاں ہور وی بھیڈاں کیس وقت دا اِنتظار کر رہیاں نیں؟‏

¹⁰ بھانویں کہ سانوں ہمیشاں دی زندگی مستقبل چ ملے گی پر یہوواہ چاہندا اے کہ اَسی حالے وی ایہدے بارے سوچدے رہیے۔ پاک روح نال مسح ہوئے مسیحی اوس وقت دا اِنتظار کر رہے نیں جدوں اوہ اسمان تے یسوع نال مِل کے حکمرانی کرن گے۔ (‏مُکاشفہ 20:‏6‏)‏ تے مسیح دِیاں ہور وی بھیڈاں اوس وقت دا اِنتظار کر رہیاں نیں جدوں اوہ زمین تے دُکھ تے تکلیف توں پاک زندگی گزارن گیاں۔ (‏مُکاشفہ 21:‏3، 4‏)‏ کیہہ تُسی وی مسیح دِیاں ہور وی بھیڈاں چ شامل او تے زمین تے ہمیشاں دی زندگی پان دی امید رکھدے او؟ ایہہ اعزاز اسمان تے زندگی پان دے اعزاز نالوں گھٹ نئیں اے۔ اصل چ تے یہوواہ نے انساناں نُوں زمین تے رہن لئی بنایا سی۔ ایس لئی زمین تے ہمیشاں تک رہن نال سانوں بڑی خوشی ملے گی۔‏

11، 12.‏ اَسی نوِیں دُنیا چ کیہڑیاں برکتاں دا اِنتظار کر رہے آں؟ (‏تصویراں نُوں وی ویکھو۔)‏

¹¹ ذرا سوچو کہ نوِیں دُنیا چ تواڈی زندگی کیہو جہی ہوئے گی۔ اوتھے توانوں بیمار ہون تے مرن دا خوف نئیں ہوئے گا۔ (‏یسعیاہ 25:‏8؛‏ 33:‏24‏)‏ یہوواہ تواڈی ہر جائز خواہش نُوں پورا کرے گا۔ تُسی اوس ویلے کیہہ کجھ سکھنا چاہوو گے؟ کیہہ تُسی جانوراں تے پرندیاں بارے ہور سکھو گے؟ یاں کیہہ تُسی کوئی ساز وجانا یاں تصویراں بنانا سکھو گے؟ یقیناً نوِیں دُنیا چ ایہو جہے لوکاں دی وی لوڑ ہوئے گی جیہڑے تعمیر دا کم تے گھراں دے ڈیزائن بنانا جان دے نیں۔ اوتھے ایہو جہے لوکاں دی وی لوڑ ہوئے گی  جیہڑے فصلاں اُگا سکن، اوزار بنا سکن، باغ لا سکن تے اوہناں دا خیال رکھ سکن۔ (‏یسعیاہ 35:‏1؛‏ 65:‏21‏)‏ جدوں توانوں ہمیشاں دی زندگی ملے گی تے اوہدوں تواڈے کول ہر اوہ ہنر سکھن لئی وقت ہوئے گا جیہڑا تُسی سکھنا چاہندے او۔‏

¹² ذرا ایس بارے وی سوچو کہ جدوں اَسی مُردیاں چوں زندہ ہون والے لوکاں نُوں ملاں گے تے سانوں کِنّی خوشی ہوئے گی۔ (‏اعمال 24:‏15‏)‏ ایہہ وی سوچو کہ جدوں اَسی یہوواہ دِیاں بنائیاں ہوئیاں چیزاں بارے ہور زیادہ سکھاں گے تے سانوں کِنّاں مزہ آئے گا۔ (‏زبور 104:‏24؛‏ یسعیاہ 11:‏9‏)‏ سب توں زیادہ خوشی تے سانوں ایس گل توں ملے گی کہ اَسی صاف ضمیر نال یہوواہ دی عبادت کر سکاں گے کیونکہ اوہدوں اَسی گُناہ توں پاک ہو جاواں گے۔ کیہہ تُسی ایہناں شاندار برکتاں نُوں گُناہ دا وقتی مزہ لین لئی قربان کر دَوو گے؟ (‏عبرانیوں 11:‏25‏)‏ یقیناً تُسی اِنج نئیں کرو گے۔ ایہناں برکتاں دے اَگے اوہ قربانیاں کجھ وی نئیں نیں جیہڑیاں اَج اَسی یہوواہ دی خدمت کرن لئی دے رہے آں۔ ایہہ وی یاد رکھو کہ زمین تے ہمیشاں دی زندگی پان دی امید اِک دن حقیقت بن جائے گی۔ جے یہوواہ سانوں پیار نہ کردا تے ساڈے لئی اپنا پُتر نہ دیندا تے ساڈے کول ایہناں برکتاں نُوں پان دی امید نہ ہوندی۔‏

یہوواہ دی محبت لئی قدر وکھاؤ

13.‏ اَسی یہوواہ دی محبت لئی قدر کیویں وکھا سکنے آں؟ (‏2-‏کُرنتھیوں 6:‏1‏)‏

¹³ یہوواہ نے ساڈے لئی جیہڑا فدیہ دِتا اے، اَسی اوہدے لئی قدر کیویں وکھا سکنے آں؟ اوہدی خدمت نُوں اپنی زندگی چ سب توں زیادہ اہمیت دین نال۔‏ (‏متی 6:‏33‏)‏ یسوع نے ایسے لئی اپنی جان قربان کیتی تاکہ اَسی اپنے لئی نئیں سگوں اوہدے لئی جئے جیہڑا ساڈی خاطر مریا تے جنہوں دُبارہ زندہ کیتا گیا۔ (‏2-‏کُرنتھیوں 5:‏15‏)‏ یہوواہ ساڈے نال بڑی مہربانی تے رحم نال پیش آیا اے۔ ایس لئی سانوں پوری وا لا کے اوہدی خدمت کرنی چاہی دی اے۔ اِنج کرن نال اَسی ظاہر کراں گے کہ یہوواہ نے ساڈے لئی جو کجھ کیتا اے، اَسی دِلوں اوہدی قدر کرنے آں۔‏‏—‏2-‏کُرنتھیوں 6:‏1 نُوں پڑھو۔‏

14.‏ اَسی یہوواہ دِیاں ہدیتاں تے بھروسا کیویں ظاہر کر سکنے آں؟‏

¹⁴ یہوواہ دی محبت لئی قدر وکھان دا اِک ہور طریقہ ایہہ وے کہ اَسی اوہدیاں ہدیتاں تے بھروسا کرئیے تے اوہناں نُوں منیے۔‏ اَسی اِنج کیویں کر سکنے آں؟ جدوں سانوں نوکری، تلیم تے ایہو جہے ہور معاملیاں بارے فیصلے کرنے پیندے نیں تے سانوں ایس گل تے سوچ‌وچار کرنا چاہی دا اے کہ یہوواہ ساڈے کولوں کیہہ چاہندا اے۔ (‏1-‏کُرنتھیوں 10:‏31؛‏ 2-‏کُرنتھیوں 5:‏7‏)‏ جدوں اَسی اپنے ایمان نُوں اپنے کماں توں ثابت کراں گے تے ایہدے بڑے چنگے نتیجے نِکلن گے۔ یہوواہ تے ساڈا ایمان تے اوہدے نال ساڈی دوستی مضبوط ہوئے گی۔ ایہدے علاوہ ہمیشاں تک زندہ رہن دی ساڈی امید وی ہور پکی ہو جائے گی۔—‏رومیوں 5:‏3-‏5؛‏ یعقوب 2:‏21، 22‏۔‏

15.‏ اَسی مسیح دی یادگیری توں پہلاں تے بعد والے ہفتیاں چ یہوواہ دی محبت لئی شکرگزاری کیویں وکھا سکنے آں؟‏

¹⁵ اَسی اِک ہور طریقے نال وی یہوواہ دی محبت لئی شکرگزاری وکھا سکنے آں۔ اَسی مسیح دی یاد گیری توں پہلاں تے بعد والے ہفتیاں چ اپنے کماں توں ظاہر کر سکنے آں کہ اَسی فدیے لئی یہوواہ دے بڑے شکرگزار آں۔‏ اَسی آپ تے مسیح دی یادگیری تے جاواں گے ای سگوں دُوجیاں نُوں وی ایہدے تے آن دی دعوت دَواں گے۔ (‏1-‏تیمُتھیُس 2:‏4‏)‏ جنہاں لوکاں نُوں تُسی ایس عبادت تے آن دی دعوت دَوو گے، اوہناں نُوں دَسو کہ اوتھے کیہہ کجھ ہوئے گا۔ ایہدے لئی تُسی اوہناں نُوں jw.org تے ایہہ ویڈیوز وی وکھا سکدے او:‏ ”‏یسوع مسیح نے اپنی جان کیوں قربان کیتی؟‏‏“‏ تے ”‏یسوع مسیح دی موت نُوں یاد رکھو۔‏‏“‏ کلیسیا  دے بزرگاں نُوں اوہناں لوکاں نُوں یادگیری تے آن دی دعوت ضرور دینی چاہی دی اے جنہاں نے عبادتاں تے آنا تے مُنادی دے کم چ حصہ لینا چھڈ دِتا اے۔ ذرا سوچو کہ جدوں یہوواہ دی کوئی گواچی ہوئی بھیڈ اوہدے کول واپس آ جاندی اے تے اسمان تے زمین اُتے کِنّی خوشی منائی جاندی اے۔ (‏لُوقا 15:‏4-‏7‏)‏ آؤ، اَسی ایہہ عزم کرئیے کہ یاد گیری تے اَسی صرف اِک دُوجے نُوں ای نئیں سگوں اوہناں لوکاں نُوں وی خاص طور تے ملاں گے جیہڑے ایس عبادت تے پہلی دفعہ یاں بڑے عرصے بعد آن گے۔ اَسی چاہنے آں کہ اوہناں نُوں اوتھے آ کے اپنائیت محسوس ہوئے۔—‏رومیوں 12:‏13‏۔‏

16.‏ سانوں مسیح دی یاد گیری توں پہلاں تے بعد والے ہفتیاں چ زیادہ توں زیادہ مُنادی کیوں کرنی چاہی دی اے؟‏

¹⁶ کیہہ تُسی یاد گیری توں پہلاں تے بعد والے ہفتیاں چ زیادہ توں زیادہ مُنادی کر سکدے او؟ جدوں اَسی اِنج کراں گے تے اَسی اوہناں کماں لئی شکرگزاری ظاہر کر سکاں گے جیہڑے یہوواہ تے یسوع نے ساڈے لئی کیتے نیں۔ جِنّاں زیادہ اَسی مُنادی دے کم چ حصہ لواں گے اونی زیادہ اَسی یہوواہ دی مدد نُوں محسوس کر سکاں گے تے اِنج اوہدے تے ساڈا بھروسا ودھے گا۔ (‏1-‏کُرنتھیوں 3:‏9‏)‏ ایہدے علاوہ کتاب ”‏ہر روز پاک کلام تے غور کرو“‏ چ دِتیاں گئیاں اوہناں ایتاں نُوں وی ضرور پڑھو جیہڑیاں مسیح دی یادگیری توں پہلاں تے بعد والے ہفتیاں لئی چُنیاں گئیاں نیں۔ یاں فیر تُسی عبادت لئی قاعدے چ دِتے گئے چارٹ چوں وی ایہناں ایتاں نُوں پڑھ سکدے او۔ جے تُسی چاہوو تے ایہناں ایتاں دے ذریعے تُسی بائبل دا ذاتی مطالعیا وی کر سکدے او۔‏

17.‏ یہوواہ کیس گل توں خوش ہوندا اے؟ (‏ایس بکس نُوں وی ویکھو:‏ ‏”‏ تُسی یہوواہ دی محبت لئی شکرگزاری کیویں وکھا سکدے او؟‏‏“‏‏)‏

¹⁷ شاید تواڈے حالات توانوں اوہناں سارے مشوریاں تے عمل کرن دی اجازت نہ دین جیہڑے ایس مضمون چ دَسے گئے نیں۔ پر یاد رکھو کہ تُسی یہوواہ دی جِنّی خدمت کردے او، یہوواہ اوہدا مقابلہ دُوجیاں دی خدمت نال نئیں کردا۔ اوہ ویکھدا اے کہ تواڈے دل چ اوہدے لئی کِنّی محبت اے تے اوہ ایہدی بڑی قدر کردا اے۔ جدوں اوہ ویکھدا اے کہ تُسی فدیے دے تحفے لئی اوہدے کِنّے شکرگزار او تے اوہ بڑا خوش ہوندا اے۔—‏1-‏سموئیل 16:‏7؛‏ مرقس 12:‏41-‏44‏۔‏

18.‏ اَسی یہوواہ خدا تے یسوع مسیح دے شکرگزار کیوں آں؟‏

¹⁸ صرف فدیے دی وجہ توں ای سانوں اپنے گُناہواں توں معافی مِلدی اے، اَسی یہوواہ دے دوست بن جانے آں تے سانوں ہمیشاں دی زندگی دی امید مِلدی اے۔ ایس لئی یہوواہ دی محبت لئی قدر وکھاندے رہوو جدی وجہ توں اوہنے سانوں ایہہ برکتاں دِتیاں نیں۔ (‏1-‏یوحنا 4:‏19‏)‏ ایہدے علاوہ آؤ، اَسی یسوع لئی وی قدر وکھاندے رہیے جیہڑا سانوں ایناں پیار کردا اے کہ اوہنے ساڈے لئی اپنی جان دے دِتی۔—‏یوحنا 15:‏13‏۔‏