1.‏ بوہت سارے لوکاں دا دھیان اَج کیس گل تے وے؟‏

 شاید تُسی ایہہ غور کیتا ہوئے کہ اَج کل زیادہ‌تر لوک صرف اپنے بارے سوچدے نیں۔ مثال لئی، کجھ لوک سوشل میڈیا دے ذریعے اپنے اُتے توجہ دَواندے نیں تے اوہ اِنج کرن لئی کسے وی حد تک چلے جاندے نیں۔ پر کجھ لوک ایہو جہے وی نیں جیہڑے اپنیاں تعریفاں نئیں چاہندے سگوں اوہ یہوواہ دی وڈیائی کردے نیں۔ ایس مضمون چ اَسی سکھاں گے کہ یہوواہ دی وڈیائی کرن دا کیہہ مطلب اے تے کیہڑی گل سانوں ہلاشیری دیندی اے کہ اَسی یہوواہ دی وڈیائی کرئیے۔ اَسی ایہہ وی سکھاں گے کہ اَسی یہوواہ دی وڈیائی کیویں کر سکنے آں تے مستقبل چ یہوواہ آپ اپنے ناں دی وڈیائی کیویں کرے گا۔‏

یہوواہ دی وڈیائی کرن دا کیہہ مطلب اے؟‏

2.‏ یہوواہ نے سینا دے پہاڑ تے اپنا جلال کیویں وکھایا؟ (‏ تصویر نُوں وی ویکھو۔)‏

² بائبل توں پتہ چلدا اے کہ یہوواہ بوہت عظیم تے طاقت‌ور خدا اے۔ اوہنے بنی‌اِسرائیل نُوں مصر دی غلامی چوں چھڈان دے تھوڑے چِر بعد اوہناں نُوں اپنے جلال دا اِک نظارہ وکھایا۔ ذرا اوس منظر بارے سوچو جدوں لکھاں اِسرائیلی سینا دے پہاڑ دے نیڑے کھلوتے ہوئے سن تاکہ اوہ یہوواہ دی گل سُن سکن۔ اچانک پہاڑ تے کالا بدّل چھا گیا تے زور دار زلزلے نال زمین ہلنا شروع ہو گئی تے پہاڑ چوں لاوے دا دھواں نِکلن لگ پیا۔ بدّل زور دی گرجن لگ پئے تے بجلی چمکن لگ پئی، ہوا چ نرسنگے دی اُچی آواز گُونجن لگ پئی۔ (‏خروج 19:‏16-‏18؛‏ 24:‏17؛‏ زبور 68:‏8‏)‏ ذرا سوچو، جدوں اِسرائیلیاں نے یہوواہ دے جلال دا ایہہ نظارہ ویکھیا ہوئے گا تے اوہ کِنّے حیران ہوئے ہون گے۔‏

3.‏ اَسی یہوواہ دی وڈیائی کیویں کر سکنے آں؟‏

³ پر کیہہ انسان وی یہوواہ دے ناں نُوں جلال دے سکدے نیں تے اوہدی وڈیائی کر سکدے نیں؟ جی بالکل۔ ایہدا اِک طریقہ ایہہ وے کہ اَسی دُوجیاں نُوں یہوواہ دی زبردست طاقت تے  اوہدیاں شاندار خوبیاں بارے دَسیئے۔ اَسی ایس طرحاں وی یہوواہ دی وڈیائی کر سکنے آں کہ اَسی ہر اوس کم لئی اوہدی تعریف کرئیے جیہڑے اَسی اوہدی طاقت نال ای کرنے آں۔ (‏یسعیاہ 26:‏12‏)‏ بادشاہ داؤد نے یہوواہ دی وڈیائی کرن دی بڑی ودھیا مثال قائم کیتی۔ داؤد نے بنی‌اِسرائیل دے سامنے جیہڑی دُعا کیتی، اوہدے چ اوہنے یہوواہ نُوں کہیا:‏ اَے یہوواہ، عظمت، قدرت، جلال تے شان‌وشوکت تیرے لئی نیں۔ کیونکہ اسمان تے زمین اُتے جو کجھ وی اے، سب تیرا اے۔ جدوں داؤد نے دُعا کر لئی تے ساری جماعت نے یہوواہ دی وڈیائی کیتی۔—‏1-‏تواریخ 29:‏11،‏ 20‏۔‏

4.‏ یسوع مسیح نے یہوواہ دی وڈیائی کیویں کیتی؟‏

⁴ جدوں یسوع مسیح زمین تے سی تے اوہنے لوکاں نُوں دَسیا کہ اوہ جیہڑے وی معجزے کردا اے، اپنے اسمانی باپ دی طاقت نال کردا اے۔ (‏مرقس 5:‏18-‏20‏)‏ یسوع مسیح نے جیس طریقے نال اپنے باپ بارے دُوجیاں نُوں دَسیا تے جیویں اوہ دُوجیاں نال پیش آیا، اوہدے توں وی اوہنے یہوواہ دی وڈیائی کیتی۔ اِک وار یسوع مسیح یہودیاں دی عبادت‌گاہ چ تلیم دے رہیا سی۔ جیہڑے لوک اوہدیاں گلاں سُن رہے سن، اوہناں چ اِک ایہو جہی عورت وی سی جنہوں 18 سال توں اِک باغی فرشتہ چِمبڑیا ہویا سی۔ اوس باغی فرشتے دی وجہ توں اوہدا کُب نکل آیا سی تے اوہ سدھی کھلو نئیں سکدی سی۔ اوس عورت دی حالت ویکھ کے ترس آندا سی۔ اوہنوں ویکھ کے یسوع نُوں بڑا دُکھ ہویا۔ ایس لئی یسوع نے اوہدے کول جا کے اوہنوں کہیا:‏ بی‌بی، تینوں اپنی بیماری توں چھٹکارا مِل گیا اے۔ فیر اوہنے اوس عورت تے ہتھ رکھے تے اوہ فوراً سدھی کھلو گئی تے خدا دی وڈیائی کرن لگ پئی۔ اوہ فیر توں تندرست ہو گئی۔ (‏لُوقا 13:‏10-‏13‏)‏ واقعی اوس عورت دا یہوواہ خدا دی وڈیائی کرنا بن دا سی تے ایہو جہیاں بوہت ساریاں گلاں نیں جنہاں دی وجہ توں سانوں وی یہوواہ دی وڈیائی کرنی چاہی دی اے۔‏

اَسی یہوواہ دی وڈیائی کیوں کرنے آں؟‏

5.‏ کیہڑیاں گلاں دی وجہ توں اَسی یہوواہ دا احترام کرنے آں؟‏

⁵ اَسی یہوواہ دی وڈیائی ایس لئی کرنے آں کیونکہ اَسی اوہدا گُوڑھا احترام کرنے آں۔‏ اَسی کئی گلاں دی وجہ توں یہوواہ دا احترام کرنے آں جیویں کہ یہوواہ چ بڑی طاقت اے۔ (‏زبور 96:‏4-‏7‏)‏ اوہدے چ بڑی حکمت اے تے ایہہ حکمت اوہدیاں بنائیاں ہوئیاں چیزاں چ نظر آندی اے۔ اوہنے سانوں زندگی دِتی اے تے زندہ رہن لئی نعمتاں وی دِتیاں نیں۔ (‏مُکاشفہ 4:‏11‏)‏ اوہ وفادار خدا اے۔ (‏مُکاشفہ 15:‏4‏)‏ اوہ اپنے ہر کم چ کامیاب ہوندا اے تے اپنا ہر وعدہ پورا کردا اے۔ (‏یشوع 23:‏14‏)‏ ایسے لئی یرمیاہ نبی نے یہوواہ بارے کہیا:‏ زمین دِیاں ساریاں بادشاہیاں وچ جنہے وی حکمت والے لوک نیں، اوہناں وچوں اِک وی تیرے ورگا نئیں۔ (‏یرمیاہ 10:‏6، 7‏)‏ واقعی یہوواہ دی وڈیائی کرن دِیاں بوہت ساریاں وجہ نیں۔ یہوواہ نہ صرف عزت دا حق‌دار اے سگوں اوہ اپنیاں خوبیاں توں ساڈا دل وی جت لیندا اے۔‏

6.‏ اَسی یہوواہ نُوں پیار کیوں کرنے آں؟‏

⁶ اَسی یہوواہ دی وڈیائی ایس لئی کرنے آں کیونکہ اَسی اوہنوں پیار کرنے آں۔‏ ذرا یہوواہ دِیاں کجھ ایہو جہیاں خوبیاں تے غور کرو جنہاں دی وجہ توں اَسی اوہنوں بوہت پیار کرنے آں۔ اوہ بڑا مہربان تے رحم‌دل خدا اے۔ (‏زبور 103:‏13؛‏ یسعیاہ 49:‏15‏)‏ جدوں اَسی تکلیف چ ہنے آں تے اوہ ساڈی تکلیف نُوں محسوس کردا اے۔ (‏زکریاہ 2:‏8‏)‏ اوہ ساڈی مدد کردا اے کہ اَسی اوہنوں جانیے تے اوہدے دوست بنئے۔ (‏زبور 25:‏14؛‏ اعمال 17:‏27‏)‏ اوہ بوہت فروتن اے۔ اوہ اسمان تے زمین نُوں ویکھن لئی جُھک دا اے، اوہ معمولی انسان نُوں خاک وچوں چُک دا اے۔ (‏زبور 113:‏6، 7‏)‏ ایہناں گلاں دی وجہ توں ساڈا دل کردا اے کہ اَسی اپنے عظیم خدا یہوواہ دی وڈیائی کرئیے۔—‏زبور 86:‏12‏۔‏

7.‏ سانوں کیہڑا خاص موقع مِلیا اے؟‏

⁷ اَسی یہوواہ دی وڈیائی ایس لئی کرنے آں کیونکہ اَسی چاہنے آں کہ دُوجے وی اوہنوں جانن۔‏ بوہت سارے لوک یہوواہ بارے سچائی نئیں جان دے۔ پر کیوں؟ کیونکہ شیطان نے یہوواہ بارے جھوٹھ پھیلا کے لوکاں دِیاں عقلاں نُوں اَنھا کر دِتا اے۔ (‏2-‏کُرنتھیوں 4:‏4‏)‏ اوہنے لوکاں نُوں ایس گل دا یقین دَوایا اے کہ یہوواہ  سزا دین والا خدا اے، اوہنوں کسے دی پرواہ نئیں تے مصیبتاں پچھے اوہدا ای ہتھ اے۔ پر اَسی سچ جاننے آں۔ ساڈے کول موقع اے کہ اَسی لوکاں نُوں دَسیئے کہ یہوواہ اصل چ کیہو جیہا خدا اے تے اِنج اوہدے ناں دی وڈیائی کرئیے۔ (‏یسعیاہ 43:‏10‏)‏ زبور 96 چ یہوواہ دی وڈیائی کرن تے زور دِتا گیا اے۔ ایس زبور دِیاں کجھ ایتاں تے غور کردے ویلے اوہناں طریقیاں بارے سوچو جنہاں دے ذریعے تُسی یہوواہ دی وڈیائی کر سکدے او جدا اوہ حق‌دار اے۔‏

اَسی یہوواہ دی وڈیائی کیویں کر سکنے آں جدا اوہ حق‌دار اے؟‏

8.‏ یہوواہ دی وڈیائی کرن دا اِک طریقہ کیہہ اے؟ (‏زبور 96:‏1-‏3‏)‏

⁸ زبور 96:‏1-‏3 نُوں پڑھو۔ اَسی اپنیاں گلاں توں یہوواہ دی وڈیائی کر سکنے آں۔‏ ایہناں ایتاں چ یہوواہ دے بندیاں نُوں کہیا گیا اے کہ اوہ یہوواہ لئی گیت گان، اوہدے ناں دی وڈیائی کرن تے ایہہ خوش‌خبری سنان کہ یہوواہ ای نجات دیندا اے تے قوماں چ اعلان کرن کہ اوہ کِنّاں عظیم خدا اے۔ اَسی ایہناں سارے طریقیاں نال اپنے اسمانی باپ یہوواہ دی وڈیائی کر سکنے آں۔ پرانے زمانے تے پہلی صدی چ یہوواہ دے بندے بڑی دلیری نال دُوجیاں نُوں دَسدے سن کہ یہوواہ نے اوہناں لئی کیہہ کجھ کیتا اے تے اوہ کیہو جیہا خدا اے۔ (‏دانی‌ایل 3:‏16-‏18؛‏ اعمال 4:‏29‏)‏ اَسی اِنج کیویں کر سکنے آں؟‏

9، 10.‏ تُسی بھین کرسٹین توں کیہہ سکھیا اے؟ (‏تصویر نُوں وی ویکھو۔)‏

⁹ ذرا امریکہ چ رہن والی اِک بھین کرسٹین a دی مثال تے غور کرو۔ اوہ جیہڑی کمپنی چ کم کردی سی، اوتھے اوہنے بڑی دلیری نال یہوواہ دے ناں دی وڈیائی کیتی۔ اوہدی نوِیں نوِیں نوکری لگی سی۔ اوہدی کمپنی چ ایہو جہے لوکاں نال اِک میٹنگ کیتی گئی جیہڑے نویں نویں آئے سن۔ ایس میٹنگ چ اوہناں نے دُوجیاں نُوں اپنے بارے دَسنا سی۔ کرسٹین نے سوچیا کہ اوہ ایس میٹنگ چ اپنیاں کجھ تصویراں وکھائے گی تاکہ اوہ دُوجیاں نُوں دَس سکے کہ یہوواہ دی گواہ ہون دی وجہ توں اوہ کِنّی خوش اے۔ پر اوہدے توں پہلاں جیہڑے بندے دی واری سی، اوہنے اپنے بارے دَسیا کہ اوہ یہوواہ دے گواہ خاندان چ پیدا ہویا پر اوہ آپ یہوواہ دا گواہ نئیں اے۔ ایہدے بعد اوہ یہوواہ دے گواہواں دے عقیدیاں دا مذاق اُڈان لگ پیا۔ بھین کرسٹین نے دَسیا:‏ ”‏ڈر نال میرے دل دی دھڑکن تیز ہو گئی۔ پر فیر مَیں سوچیا:‏ ”‏کیہہ مَیں ایویں ای کسے بندے نُوں یہوواہ بارے جھوٹھ بولن دَواں؟ مَیں یہوواہ دے حق چ نہ بولاں۔“‏“‏

¹⁰ جدوں اوس بندے نے اپنی گل ختم کیتی تے بھین کرسٹین نے اپنے دل چ چھوٹی جہی دُعا کیتی۔ فیر اوہنے اوس بندے نُوں بڑی نرمی نال کہیا:‏ ”‏مَیں وی تواڈے وانگوں یہوواہ دے گواہ خاندان چ ای جمی  پلی آں تے مَیں اَج تک یہوواہ دی گواہ واں۔“‏ بھانویں کہ ماحول تھوڑا گرم ہو گیا سی پر بھین کرسٹین پُر سکون رہی۔ فیر اوہنے ساریاں نُوں اوہ تصویراں وکھائیاں جنہاں چ اوہ تے اوہدے دوست یہوواہ دی عبادت کر کے بڑے خوش نظر آ رہے سن۔ فیر اوہنے بڑی سمجھداری تے احترام نال ساریاں نُوں اپنے عقیدیاں بارے دَسیا۔ (‏1-‏پطرس 3:‏15‏)‏ ایہدا کیہہ نتیجہ نکلیا؟ جدوں بھین کرسٹین نے اپنی گل ختم کیتی تے اوہدوں تک اوس بندے دا رویہ کافی نرم ہو گیا سی۔ فیر اوہنے وی یہوواہ دے گواہواں نال جُڑیاں اپنے بچپن دِیاں کجھ اچھیاں یاداں بارے دَسیا۔ بھین کرسٹین نے کہیا:‏ ”‏یہوواہ ایس لائق اے کہ اوہدے حق چ بولیا جائے۔ اوہدے ناں دی وڈیائی کرنا اِک بوہت وڈا اعزاز اے۔“‏ سانوں وی یہوواہ دی وڈیائی کرن دا اعزاز مِلیا اے فیر بھانویں دُوجے اِنج کرن یاں نہ کرن۔‏

11.‏ پرانے زمانے توں لے کے ہُن تک یہوواہ دے بندیاں نے زبور 96:‏8 تے کیویں عمل کیتا اے؟‏

¹¹ زبور 96:‏8 نُوں پڑھو۔ اَسی اپنے پیسے تے چیزاں توں یہوواہ دی وڈیائی کر سکنے آں۔‏ یہوواہ دے بندیاں نے شروع توں ای اپنے پیسے تے چیزاں توں اوہدی وڈیائی کیتی اے۔ (‏امثال 3:‏9‏)‏ مثال لئی، بنی‌اِسرائیل نے ہیکل نُوں بنان تے ایہدی مرمت کرن لئی پیسے تے قیمتی چیزاں دِتیاں۔ (‏2-‏سلاطین 12:‏4، 5؛‏ 1-‏تواریخ 29:‏3-‏9‏)‏ یسوع دے کجھ شاگرداں نے اپنیاں چیزاں تے پیسیاں توں یسوع تے اوہدے رسولاں دی خدمت کیتی۔ (‏لُوقا 8:‏1-‏3‏)‏ ایہدے علاوہ جدوں پہلی صدی چ کجھ مسیحیاں نُوں کال دا سامنا کرنا پیا تے دُوجے علاقے چ رہن والے اوہناں دے ہم‌ایماناں نے اوہناں دی مدد کیتی۔ (‏اعمال 11:‏27-‏29‏)‏ اَج اَسی وی عطیات دے کے یہوواہ دی وڈیائی کر سکنے آں۔‏

12.‏ ساڈے عطیات توں یہوواہ دی وڈیائی کیویں ہوندی اے؟ (‏تصویر نُوں وی ویکھو۔)‏

¹² ذرا اِک مثال تے غور کرو جدے توں پتہ چلدا اے کہ ساڈے عطیات توں یہوواہ دی وڈیائی کیویں ہوندی اے۔ 2020 چ ملک زمبابوے چ سخت کال پے گیا جیہڑا کافی لمے عرصے تک چلیا۔ لکھاں لوک بُھکھے مر رہے سن۔ ایہناں لوکاں چ ساڈی بھین پرسکہ وی شامل سی۔ بھانویں کہ کال دی وجہ توں لوکاں دی زندگی بڑی مشکل ہو گئی سی پر فیر وی بھین پرسکہ ہر بدھ تے جمعے والے دن مُنادی تے جاندی سی۔ اوہ اوس ویلے وی مُنادی تے جاندی سی جدوں ہل واہن دا وقت چل رہیا سی۔ بھین پرسکا دے گوانڈھی اوہدا مذاق اُڈاندے سن کہ اوہ کھیتاں چ کم کرن دی بجائے مُنادی تے جا رہی اے۔ اوہ اوہنوں کہندے سن:‏ ”‏تُوں بُھکھ نال مر جانا اے۔“‏ پر اوہ پورے یقین نال اوہناں نُوں کہندی سی کہ ”‏یہوواہ اپنے بندیاں نُوں کدی نئیں چھڈدا۔“‏ ایہدے کجھ چِر بعد ای بھین نُوں تنظیم وَلّوں کجھ اِمداد مِلی۔ اوہنوں کھان پین تے ضرورت  دِیاں چیزاں ساڈے عطیات دی وجہ توں ای مِل سکیاں۔ جدوں بھین پرسکہ دے گوانڈھیاں نے ایہہ ویکھیا تے اوہناں دے دل تے گُوڑھا اثر ہویا۔ اوہناں نے بھین نُوں کہیا:‏ ”‏تیرے خدا نے تینوں واقعی کلّا نئیں چھڈیا۔ اَسی وی اوہدے بارے ہور جاننا چاہنے آں۔“‏ اوہدے گوانڈھیاں وچوں سَت لوک عبادتاں تے آن لگ پئے۔‏

13.‏ ساڈے اچھے چال‌چلن توں یہوواہ دی وڈیائی کیویں ہوندی اے؟ (‏زبور 96:‏9‏)‏

¹³ زبور 96:‏9 نُوں پڑھو۔ اَسی اپنے چال‌چلن توں یہوواہ دی وڈیائی کر سکنے آں۔‏ پرانے زمانے چ جدوں کاہن ہیکل چ یہوواہ دی خدمت کرن لئی جاندے سن تے اوہناں نُوں اپنے آپ نُوں پاک صاف کرنا ہوندا سی۔ (‏خروج 40:‏30-‏32‏)‏ پر اپنے جسم نُوں پاک صاف رکھن توں وی زیادہ ضروری ایہہ وے کہ اَسی اپنے چال‌چلن نُوں پاک رکھیے۔ (‏زبور 24:‏3، 4؛‏ 1-‏پطرس 1:‏15، 16‏)‏ سانوں سخت محنت کرنی چاہی دی اے تاکہ اَسی اپنی پرانی شخصیت نُوں لا کے سُٹ دَئیے یعنی ناپاک سوچ تے کماں نُوں۔ ایہدے نال نال سانوں نوِیں شخصیت نُوں وی پان دی لوڑ اے یعنی سانوں ایہو جہی سوچ نُوں اپنان تے ایہو جہے کم کرن دی لوڑ اے جنہاں توں ساڈے خدا دِیاں شاندار خوبیاں ظاہر ہون۔ (‏کُلسّیوں 3:‏9، 10‏)‏ یہوواہ دی مدد نال بوہت ای بدکار تے ظالم لوک وی بدل سکدے نیں تے نوِیں شخصیت پا سکدے نیں۔‏

14.‏ تُسی بھرا جیک دے تجربے توں کیہہ سکھیا اے؟ (‏تصویر نُوں وی ویکھو۔)‏

¹⁴ ذرا جیک دی مثال تے غور کرو جیہڑا بڑا ظالم تے خطرناک مُجرم سی۔ اوہ ایناں بھیڑا سی کہ لوک اوہنوں شیطان کہندے سن۔ اوہنے جیہڑے جُرم کیتے سن، اوہناں دی وجہ توں اوہنوں موت دی سزا سُنائی گئی سی۔ اوہدی پھانسی توں کجھ عرصہ پہلاں اِک بھرا نے اوہنوں بائبل کورس کرن لئی کہیا۔ ایہہ بھرا جیل چ قیدیاں نُوں گواہی دین لئی گیا سی۔ جیک اوس بھرا کولوں بائبل کورس کرن لگ پیا۔ بھانویں کہ اوہنے اپنی زندگی چ بڑے بھیڑے کم کیتے سن پر فیر وی اوہنے اپنی پرانی شخصیت نُوں لا کے سُٹ دِتا تے بعد چوں یہوواہ دے گواہ دے طور تے بپتسمہ لے لیا۔ بھرا جیک ایناں بدل گیا سی کہ جدوں اوہدی پھانسی دا دن آیا تے جیل دے کجھ سپاہیاں دِیاں اَکھاں چ آنسو سن۔ اِک سپاہی نے تے کہیا:‏ ”‏اِک وقت سی کہ جدوں جیک ایتھوں دا سب توں بھیڑا قیدی سی۔ پر ہُن اوہ سب توں چنگا قیدی اے۔“‏ بھرا جیک دی پھانسی دے اِک ہفتے بعد جدوں بھرا عبادت کران لئی جیل گئے تے اوہناں دی ملاقات اِک ایہو جہے قیدی نال ہوئی جیہڑا پہلی وار عبادت چ آیا سی۔ اوہنے عبادت تے آن دا فیصلہ ایس لئی کیتا سی کیونکہ اوہ بھرا جیک دے چنگے چال‌چلن توں بوہت متاثر ہویا سی۔ اوہ جاننا چاہندا سی کہ اوہنوں یہوواہ دی عبادت کرن لئی کیہہ کرن دی لوڑ اے۔ ایس تجربے توں صاف پتہ چلدا اے کہ ساڈے چنگے چال‌چلن توں ساڈے اسمانی باپ یہوواہ دی وڈیائی ہوندی اے۔—‏1-‏پطرس 2:‏12‏۔‏

 بوہت چھیتی یہوواہ اپنے ناں دی وڈیائی کیویں کرے گا؟‏

15.‏ یہوواہ مستقبل چ پوری طرحاں اپنے ناں دی وڈیائی کیویں کرے گا؟ (‏زبور 96:‏10-‏13‏)‏

¹⁵ زبور 96:‏10-‏13 نُوں پڑھو۔‏ زبور 96 دِیاں ایہناں آخری ایتاں چ یہوواہ بارے کہیا گیا اے کہ اوہ بادشاہ تے اِنصاف نال عدالت کرن والا خدا اے۔ اوہ مستقبل چ اپنے ناں دی وڈیائی کیویں کرے گا؟ بوہت چھیتی اوہ وڈے بابل نُوں ختم کر دَوے گا جنہے اوہدے پاک ناں نُوں بدنام کیتا اے۔ (‏مُکاشفہ 17:‏5،‏ 16؛‏ 19:‏1، 2‏)‏ ایہدی تباہی نُوں ویکھ کے ہو سکدا اے کہ کجھ لوک ساڈے نال مِل کے یہوواہ دی عبادت کرن لگ پین۔ فیر آخر چ یہوواہ ہرمجدون دی جنگ چ شیطان دی دُنیا دے ہر نظام نُوں مٹا دَوے گا۔ اوہ اوہناں سارے لوکاں نُوں ختم کر دَوے گا جیہڑے اوہدے خلاف نیں تے اوہدے بارے جھوٹھ پھیلا کے اوہنوں بدنام کردے نیں۔ پر اوہ اوہناں سارے لوکاں نُوں بچا لوے گا جیہڑے اوہنوں پیار کردے نیں، اوہدے حکماں تے چلدے نیں تے فخر نال اوہدی وڈیائی کردے نیں۔ (‏مرقس 8:‏38؛‏ 2-‏تھسلُنیکیوں 1:‏6-‏10‏)‏ مسیح دی ہزار سالہ بادشاہی دے آخر چ انساناں دا آخری اِمتحان ہوئے گا۔ اوہدوں تک ایہہ گل پوری طرحاں ثابت ہو گئی ہوئے گی کہ یہوواہ دا ناں پاک اے تے اوہی عبادت دا حق‌دار اے۔ (‏مُکاشفہ 20:‏7-‏10‏)‏ اوس ویلے جیویں سمندر پانی نال بھریا ہویا اے، اوسے طرحاں زمین یہوواہ دے جلال دے علم نال بھری ہوئے گی۔—‏حبقوق 2:‏14‏۔‏

16.‏ تواڈا کیہہ عزم اے؟ (‏تصویر نُوں وی ویکھو۔)‏

¹⁶ اوہ کِنّاں شاندار وقت ہوئے گا جدوں ہر انسان یہوواہ دی وڈیائی کرے گا جدا اوہ حق‌دار اے۔ پر جدوں تک اوہ وقت نئیں آندا، اَسی جی جان نال یہوواہ دی وڈیائی کردے رہواں گے۔ ایس اہم گل تے زور دین لئی گورننگ باڈی نے زبور 96:‏8 نُوں 2025 دی سالانہ ایت دے طور تے چُنیا اے۔ ایس ایت چ لکھیا اے:‏ ‏”‏یہوواہ دے ناں دی وڈیائی کرو کیونکہ اوہ ایہدا حق‌دار اے۔“‏