مطالعے دا مضمون نمبر 3
اَسی یسوع مسیح دے اَتھرواں توں کیہہ سکھنے آں؟
یسوع دے اَتھرو ووگن لگ پئے۔—یوحنا 11:35۔
گیت نمبر 102: کمزوراں دی مدد کرو
مضمون تے اِک نظر *
1-3. کیہڑیاں گلاں دی وجہ توں سانوں رونا آ سکدا اے؟
تُسی آخری وار کدوں روئے سو؟ کدی کدی خوشی دی وجہ توں ساڈی اَکھاں چ اَتھرو آ جاندے نیں، پر اکثر اَسی دُکھی ہون دی وجہ توں رونے آں۔ مثال لئی اَسی اپنے کسے عزیز دی موت دی وجہ توں رونے آں۔ امریکہ چ رہن والی ماریہ ناں دی بھین نے اِک خط چ لکھیا: ”میری دھی دے فوت ہون دی وجہ توں میں پوری طرحاں ٹُٹ گئی۔ کدی کدی میں اینی دُکھی ہونی ساں کہ مینوں لگدا سی کہ مینوں کسے وی چیز توں تسلی نئیں مِل سکدی۔ اوس ویلے میں سوچنی ساں کہ ایناں وڈا صدمہ برداشت کرن توں بعد میں زندہ کیویں آں۔“ *
2 کئی وار شاید اَسی کسے ہور وجہ توں روئیے۔ غور کرو کہ جاپان چ رہن والی ہیرومی ناں دی اِک پہلکار بھین نے ایہہ کہیا: ”مُنادی چ جدوں لوک ساڈا پیغام نئیں سن دے تے کدی کدی میں بوہت بےحوصلہ ہو جانی آں۔ کدی کدی میں رو رو کے دُعا چ یہوواہ کولوں مدد منگنی آں تاکہ مینوں کوئی ایہو جیہا شخص ملے جیہڑا سچائی سکھنا چاہندا اے۔“
3 اَسی ایہناں بھیناں دے جذباتاں نُوں سمجھ سکنے آں۔ (1-پطرس 5:9) اَسی سارے خوشی نال یہوواہ دی خدمت کرنا چاہنے آں پر شاید اپنے کسے عزیز دی موت دی وجہ توں، بےحوصلہ ہون یاں ایمان دے کسے اِمتحان چوں لنگھن دی وجہ توں اَسی رون لگ پئے۔ (زبور 6:6؛ 100:2) ایہو جہے حالاتاں چ اَسی کیہہ کر سکنے آں؟
4. ایس مضمون چ اَسی کیہڑیاں گلاں تے غور کراں گے؟
4 اَسی یسوع مسیح دی مثال تے غور کر سکنے آں۔ کجھ موقعیاں تے اوہ ایناں جذباتی ہو گیا کہ اوہدے اَتھرو ووگن لگ پئے۔ (یوحنا 11:35؛ لُوقا 19:41؛ 22:44؛ عبرانیوں 5:7) آؤ ایہناں تے غور کر کے ویکھئے کہ اَسی یسوع تے اوہدے باپ یہوواہ توں کیہہ سکھ سکنے آں۔ نالے اَسی کجھ ایہو جہے طریقے وی ویکھاں گے جنہاں دی مدد نال اَسی اوہناں مشکلاں دا سامنا کر سکاں گے جنہاں دی وجہ توں سانوں رونا آندا اے۔
یسوع اپنے دوستاں لئی رویا
یسوع مسیح وانگوں دُکھی لوکاں نُوں تسلی دَوو۔ (پیراگراف نمبر 5-9 نُوں ویکھو۔) *
5. یوحنا 11:32-36 توں اَسی یسوع بارے کیہہ سکھنے آں؟
5 32 عیسوی چ جدوں ٹھنڈ دا موسم سی یسوع مسیح دا قریبی دوست لعزر بیمار ہون دی وجہ توں فوت ہو گیا۔ (یوحنا 11:3، 14) یسوع لعزر تے اوہدیاں دو بھیناں مریم تے مارتھا نُوں بوہت پیار کردا سی۔ مریم تے مارتھا اپنے بھرا دی موت دی وجہ توں پوری طرحاں ٹُٹ گیاں۔ جدوں لعزر فوت ہو گیا تے یسوع مریم تے مارتھا نُوں مِلن اوہناں دے پِنڈ بیتعنیاہ گیا۔ جدوں مارتھا نے سُنیا کہ یسوع آیا اے تے اوہ بھج کے اوہنوں مِلن گئی۔ ذرا سوچو کہ مارتھا اوس ویلے کِنّی دُکھی سی جدوں اوہنے یسوع نُوں کہیا: مالک جے تُسی ایتھے ہوندے تے میرا بھرا نہ مردا۔ (یوحنا 11:21) ایہدے تھوڑی دیر بعد جدوں یسوع نے مریم تے باقی لوکاں نُوں روندے ویکھیا تے اوہدے اَتھرو ووگن لگ پئے۔—یوحنا 11:32-36 نُوں پڑھو۔
6. یسوع مسیح کیوں رون لگ پیا؟
6 یسوع ایس موقعے تے کیوں رویا؟ ساڈی اِک کتاب چ ایہدے بارے ایہہ دَسیا گیا اے: اپنے دوست لعزر دی موت تے اوہدیاں بھیناں دے دُکھ نُوں ویکھ کے یسوع دا دل بھر آیا تے اوہدے اَتھرو ووگن لگ پئے۔ یسوع شاید سوچ رہیا سی کہ اوہدے پیارے دوست لعزر نُوں بیماری دی وجہ توں کِنّی تکلیف سہنی پئی ہوئے گی تے اوہنوں اوہدوں کیہو جیہا لگیا ہوئے گا جدوں اوہنوں احساس ہویا کہ اوہدی زندگی ہولی ہولی ختم ہوندی جا رہی اے۔ یسوع مسیح ایہہ ویکھ کے وی رویا ہوئے گا کہ مریم تے مارتھا اپنے بھرا دی موت دی وجہ توں کِنّیاں دُکھی نیں۔ جے تواڈا کوئی عزیز موت دی وجہ توں تواڈے توں وِچھڑ گیا اے تے تُسی وی اِنج ای محسوس کیتا ہوئے گا۔ آؤ ویکھئے کہ اَسی ایس واقعے توں کیہڑیاں تِن گلاں سکھنے آں۔
7. یسوع مسیح دے رون توں اَسی یہوواہ بارے کیہہ سکھنے آں؟
7 یہوواہ تواڈا دُکھ محسوس کردا اے۔ یسوع مسیح ہو بہو اپنے باپ یہوواہ ورگا اے۔ (عبرانیوں 1:3) یسوع مسیح دے رون توں اوہدے باپ دے جذباتاں بارے پتہ چلدا اے۔ (یوحنا 14:9) جے تُسی اپنے کسے عزیز دی موت دا غم سہہ رہے او تے پکا یقین رکھو کہ یہوواہ تواڈے دُکھ نُوں صرف ویکھدا ای نئیں سگوں ایہنوں محسوس وی کردا اے۔ اوہ تواڈے زخمی دل تے مرہم لانا چاہندا ے۔—زبور 34:18؛ 147:3۔
8. اَسی یقین کیوں رکھ سکنے آں کہ یسوع ساڈے مرے ہوئے عزیزاں نُوں زندہ کرے گا؟
8 یسوع تواڈے مرے ہوئے عزیزاں نُوں زندہ کرنا چاہندا اے۔ لعزر دی موت تے رون توں تھوڑی دیر پہلاں یسوع نے مارتھا نُوں ایہہ یقین دَوایا: تیرا بھرا جی اُٹھے گا۔ مارتھا نے یسوع دی گل تے یقین کیتا۔ (یوحنا 11:23-27) مارتھا یہوواہ دی عبادت کردی سی ایس لئی اوہنوں پتہ سی کہ یہوواہ خدا نے ایلیاہ نبی تے الیشبع نبی دے ذریعے مُردیاں نُوں زندہ کیتا سی۔ (1-سلاطین 17:17-24؛ 2-سلاطین 4:32-37) اوہنے ایہہ وی سُنیا ہوئے گا کہ یسوع نے وی کجھ مُردیاں نُوں زندہ کیتا اے۔ (لُوقا 7:11-15؛ 8:41، 42، 49-56) تُسی وی پورا یقین رکھ سکدے او کہ تُسی اپنے اوہناں عزیزاں نُوں دُبارہ ملو گے جیہڑے فوت ہو گئے نیں۔ جدوں یسوع اپنے دُکھی دوستاں نُوں تسلی دیندے ویلے رویا تے ایہدے توں پتہ چلدا اے کہ اوہ مُردیاں نُوں زندہ کرن لئی کِنّاں بےتاب اے۔
9. یسوع مسیح وانگوں تُسی دُکھی لوکاں نُوں تسلی کیویں دے سکدے او؟ اِک مثال دَوو۔
9 تُسی دُکھی لوکاں نُوں تسلی دے سکدے او۔ یسوع مارتھا تے مریم نال صرف رویا ای نئیں سگوں اوہنے اوہناں دی گل دھیان نال سنی تے اوہناں نُوں تسلی وی دِتی۔ اَسی وی اِنج ای کر سکنے آں۔ آسٹریلیا چ رہن والا اِک بزرگ جدا ناں ڈینئل اے، کہندا اے: ”جدوں میری بیوی فوت ہوئی تے مینوں تسلی دی بڑی ضرورت سی۔ بوہت سارے شادی شُدہ بھین بھرا میری گل سُنن لئی ہر ویلے تیار رہندے سن۔ اوہناں نے مینوں موقع دِتا کہ میں دل کھول کے اپنے دُکھ دا اظہار کراں تے جدوں میں رون لگ پینا ساں تے اوہ میرے بارے کجھ غلط نئیں سوچ دے سن۔ جدوں میں اپنے کجھ کم نئیں کر پانا ساں تے اوہ میرے لئی ایہہ کم کر دیندے سن، جیویں کہ گڈی دھونا، بازار توں چیزاں لیانا یاں کھانا بنانا۔ نالے اوہ اکثر میرے نال مِل کے دُعا وی کردے سن۔ اوہ میرے لئی دوست تے اوہ بھرا ثابت ہوئے جیہڑے مصیبت دے دن لئی پیدا ہوئے ہون۔“—امثال 17:17۔
یسوع اوہناں لئی رویا جنہاں نُوں اوہنے گواہی دِتی
10. لُوقا 19:36-40 چ لکھے واقعے بارے دَسو۔
10 جدوں یسوع 9 نیسان 33 عیسوی نُوں یروشلیم پونچیا تے لوکاں دی بِھیڑ جمع ہو گئی۔ لوک یسوع نُوں اپنا بادشاہ من دے ہوئیاں اوہدی راہ چ اپنیاں چادراں وچھان لگ پئے۔ ایہہ بڑی خوشی دا موقع سی۔ (لُوقا 19:36-40 نُوں پڑھو۔) ایس لئی اَگے جو ہویا یسوع دے شاگرداں نے اوہدے بارے سوچیا وی نئیں ہوئے گا۔ جدوں یسوع یروشلیم دے نیڑے پونچیا تے اوہنے شہر نُوں ویکھیا تے اوہ رون لگ پیا تے اوہنے پیشینگوئی کیتی کہ یروشلیم دے لوکاں تے بوہت بُرا وقت آن والا اے۔—لُوقا 19:41-44۔
11. یسوع یروشلیم دے لوکاں لئی کیوں رویا؟
11 ایہہ سچ اے کہ یروشلیم دے لوکاں نے بڑی خوشی نال یسوع دا استقبال کیتا۔ پر فیر وی یسوع دا دل غم نال بھر گیا کیونکہ اوہنوں پتہ سی کہ بوہت سارے یہودی بادشاہی دے پیغام نُوں قبول نئیں کرن گے۔ایسے وجہ توں یروشلیم نے تباہ ہو جانا سی۔ جے کوئی یہودی ایس تباہی توں بچ وی جاندا تے اوہنوں غلام بنا لیا جانا سی۔ (لُوقا 21:20-24) افسوس کہ یسوع دے کہن دے مطابق بوہت سارے لوکاں نے اوہدا پیغام قبول نئیں کیتا۔ کیہہ عام طور تے تواڈے علاقے دے لوک بادشاہی دا پیغام سن دے نیں؟ جے بوہت ای گھٹ لوک پاک کلام دِیاں سچائیاں نُوں قبول کردے نیں تے تُسی اوس واقعے توں بوہت اہم گلاں سکھ سکدے او جدوں یسوع اوہناں لوکاں لئی رویا جنہاں نُوں اوہ بادشاہی دا پیغام سُناندا سی۔ آؤ ایہناں وچوں تِن گلاں تے غور کرئیے۔
12. یسوع دے رون توں سانوں یہوواہ بارے کیہڑی گل پتہ چلدی اے؟
12 یہوواہ نُوں لوکاں دی فکر اے۔ یسوع دے رون توں سانوں پتہ چلدا اے کہ یہوواہ نُوں لوکاں دی کِنّی فکر اے۔ یہوواہ نئیں چاہندا کہ کوئی وی ہلاک ہووے سگوں اوہ چاہندا اے کہ سارے توبہ کرن۔ (2-پطرس 3:9) اَج جدوں اَسی لوکاں نُوں بادشاہی دے پیغام بارے سکھان دی پوری کوشش کرنے آں تے اَسی محبت ظاہر کرنے آں۔ اوہ نئیں چاہندا کہ کوئی وی ہلاک ہووے سگوں اوہ چاہندا اے کہ سارے لوک توبہ کرن۔—متی 22:39۔ *
یسوع مسیح وانگوں فرق فرق وقت تے طریقیاں نال گواہی دَوو۔ (پیراگراف نمبر 13، 14 نُوں ویکھو۔) *
13، 14. یسوع مسیح نے لوکاں لئی ہمدردی کیویں ظاہر کیتی، تے اَسی ایہہ خوبی کیویں پیدا کر سکنے آں؟
13 یسوع مسیح نے بڑی محنت نال مُنادی کیتی۔ اوہ ہر موقعے تے لوکاں نُوں تلیم دین لئی تیار رہندا سی۔ (لُوقا 19:47، 48) اوہ اِنج کیوں کردا سی؟ کیونکہ اوہنوں لوکاں نال ہمدردی سی۔ کدی کدی تے اینے زیادہ لوک یسوع توں تلیم پانا چاہندے سن کہ اوہنوں تے اوہدے شاگرداں نُوں کھانا کھان دا وقت تک نئیں مِلدا سی۔ (مرقس 3:20) جدوں اِک بندہ رات نُوں یسوع توں تلیم پانا چاہندا سی تے یسوع رات دے ویلے اوہنوں ملیاِ۔ (یوحنا 3:1، 2) جنہاں لوکاں نے یسوع دِیاں گلاں سُنیاں اوہناں وچوں زیادہتر اوہدے شاگرد نئیں بنے۔ یسوع نے فیر وی اوہناں ساریاں نُوں چنگی طرحاں گواہی دِتی۔ اَج اَسی وی سارے لوکاں نُوں خوشخبری سُنن دا موقع دینا چاہنے آں۔ (اعمال 10:42) اِنج کرن لئی شاید سانوں وی مُنادی کرن دے وقت یاں طریقے چ تبدیلی کرنی پووے۔
14 تبدیلیاں کرن لئی تیار رہوو۔ جے اَسی ہمیشاں اِک ای وقت تے مُنادی کراں گے تے شاید اَسی کجھ ایہو جہے لوکاں نُوں نہ مِل پائیے جیہڑے خدا دی بادشاہی بارے سکھنا چاہندے نیں۔ ایس بارے نیتا ناں دی پہلکار بھین دی گل تے غور کرو۔ اوہنے کہیا: ” میرا شوہر تے میں فرق فرق وقت تے لوکاں نُوں گواہی دین دی کوشش کرنے آں۔ سویرے سویرے اَسی دُکاناں چ جا کے گواہی دینے آں۔ دوپہر نُوں کھانے دے وقفے دے دوران جدوں بوہت سارے لوک باہر ہوندے نیں تے اَسی کتاباں تے رسالیاں والی ٹرالی دے ذریعے اوہناں نُوں گواہی دینے آں۔ فیر بعد چوں اَسی اوسے دن گھر گھر مُنادی کرنے آں کیونکہ اوہدوں سانوں زیادہ لوک گھراں چ مِلدے نیں۔“ سانوں بس اوس وقت ای مُنادی نئیں کرنی چاہی دی جدوں ساڈے لئی اِنج کرنا اسان ہوئے سگوں سانوں اوس وقت وی مُنادی کرن لئی تیار رہنا چاہی دا اے جدوں سانوں زیادہ لوک مِل سکدے نیں۔ جے اَسی اِنج کراں گے تے اَسی پکا یقین رکھ سکنے آں کہ یہوواہ ساڈے توں خوش ہوئے گا۔
یسوع مسیح اپنے باپ دے ناں دی خاطر رویا
یسوع مسیح وانگوں پریشانیاں دا سامنا کردے ویلے یہوواہ توں اِلتجاواں کرو۔ (پیراگراف نمبر 15-17 نُوں ویکھو۔) *
15. لُوقا 22:39-44 دے مطابق یسوع دی زندگی دی آخری رات کیہہ ہویا؟
15 یسوع 14 نیسان 33 عیسوی دی رات نُوں گتسمنی دے باغ چ گیا۔ اوتھے اوہنے یہوواہ نال دل کھول کے گل کیتی۔ (لُوقا 22:39-44 نُوں پڑھو۔) ایہی اوہ موقع سی جدوں یسوع نے رو رو کے خدا دے اَگے درخاستاں تے اِلتجاواں کیتیاں۔ (عبرانیوں 5:7) یسوع مسیح نے اپنی زندگی دی آخری رات کیس بارے دُعا کیتی؟ اوہنے یہوواہ توں طاقت منگی تاکہ اوہ اوہدا وفادار رہ سکے تے اوہدی مرضی پوری کر سکے۔ یہوواہ نے اپنے بیٹے دی دُہائی سنی، اوہدا درد سمجھیا ایس لئی اوہنے یسوع دی ہمت ودھان لئی اوہدے کول اِک فرشتہ گھلیا۔
16. یسوع گتسمنی دے باغ چ دُعا کردے ویلے ایناں پریشان کیوں سی؟
16 بےشک یسوع گتسمنی دے باغ چ دُعا کردے ویلے رویا ہوئے گا کیونکہ اوہنوں ایہہ سوچ کے بوہت تکلیف ہو رہی سی کہ اوہدے تے خدا دے خلاف کفر بکن دا اِلزام لایا جائے گا۔ ایہدے علاوہ اوہنوں ایہہ وی پتہ سی کہ اوہدے لئی اپنے باپ دا وفادار رہنا تے اوہدے ناں دی وڈیائی کرنا کِنّاں ضروری اے۔ جدوں یہوواہ لئی تواڈی وفاداری پرکھی جاندی اے تے تُسی یسوع دے رون توں کیہہ سکھ سکدے او؟ آؤ تِن گلاں تے غور کرنے آں۔
17. یہوواہ نے یسوع مسیح دِیاں اِلتجاواں دا جیہڑا جواب دِتا اوہدے توں اَسی یہوواہ بارے کیہہ سکھنے آں؟
17 یہوواہ تواڈیاں اِلتجاواں سُن دا اے۔ یہوواہ نے یسوع دِیاں اوہ دُعاواں سُنیاں جیہڑیاں اوہنے دِلوں کیتیاں سن۔ کیوں؟ کیونکہ یسوع نے ایہہ دُعاواں ایس لئی کیتیاں تاکہ اوہ اپنے باپ دا وفادار رہ کے اوہدے ناں دی وڈیائی کر سکے۔ جے تُسی وی ایس وجہ توں دُعا کرو گے تے یہوواہ تواڈیاں دُعاواں دا جواب دے کے وی تواڈی مدد کرے گا۔—زبور 145:18، 19۔
18. یسوع مسیح اِک ایہو جہے دوست وانگوں کیوں اے جیہڑا ساڈے درد نُوں سمجھدا اے؟
18 یسوع تواڈے جذباتاں نُوں سمجھدا اے۔ سانوں اوہدوں کِنّی خوشی ہوندی اے جدوں مشکلاں دا سامنا کردے ویلے ساڈا کوئی ایہو جیہا دوست ساڈے نال ہوندا اے جیہڑا ساڈے درد نُوں سمجھ سکدا اے۔ خاص کر کے اوہ دوست جنہے اُنج دِیاں ای مشکلاں دا سامنا کیتا ہوئے جنہاں دا سامنا اَسی کر رہے آں۔ یسوع مسیح ساڈا اِنج دا ای دوست اے۔ اوہ چنگی طرحاں جان دا اے کہ اَسی اوہدوں کیہو جیہا محسوس کرنے آں جدوں اَسی کمزور ہنے آں تے سانوں مدد دی لوڑ ہوندی اے۔ اوہ ساڈیاں کمزوریاں نُوں سمجھدا اے تے ضرورت دے وقت ساڈی مدد وی کرے گا۔ (عبرانیوں 4:15، 16) جیس طرحاں گتسمنی دے باغ چ یسوع نے فرشتے دی مدد قبول کیتی، اوسے طرحاں سانوں یہوواہ وَلّوں مِلن والی مدد نُوں قبول کرنا چاہی دا اے۔ فیر بھانویں ایہہ مدد تنظیم دی کسے کتاب، رسالے، ویڈیو، تقریر، کسے بزرگ یاں کسے ہور پُختہ مسیحی دے ذریعے ملے۔
19. جدوں یہوواہ لئی تواڈی وفاداری پرکھی جاندی اے تے توانوں طاقت کتھوں مِلدی اے؟ اِک مثال دَوو۔
19 یہوواہ توانوں اطمینان دَوے گا۔ اوہ سانوں طاقت کیویں دَوے گا؟ جدوں اَسی دُعا کرنے آں تے یہوواہ سانوں اوہ اطمینان دیندا اے جیہڑا سمجھ توں باہر اے۔ (فِلپّیوں 4:6، 7) ایس اطمینان دے ذریعے ساڈے دل نُوں سکون مِلدا اے تے ساڈی سوچ صحی رہندی اے۔ مارگریٹ ناں دی بھین نال اِنج ای ہویا۔ اوہ کہندی اے: ”میں اکثر کلّی محسوس کرنی آں۔ کدی کدی مینوں لگدا اے کہ یہوواہ مینوں پیار نئیں کردا۔ پر جدوں وی میں اِنج محسوس کرنی آں تے میں فوراً یہوواہ نُوں دَسنی آں۔ دُعا کر کے مینوں سکون مِلدا اے تے میری سوچ صحی رہندی اے۔“ بھین مارگریٹ دی گل توں ظاہر ہوندا اے کہ دُعا کر کے سانوں وی اطمینان مل سکدا اے۔
20. یسوع مسیح دے رون توں تُسی کیہہ سکھیا اے؟
20 اَسی ویکھیا اے کہ جنہاں موقعیاں تے یسوع مسیح رویا اوہناں توں اَسی بوہت کجھ سکھ سکنے آں تے اوہناں توں سانوں تسلی وی مِلدی اے۔ اَسی سکھیا کہ سانوں اپنے دُکھی دوستاں نُوں سہارا دینا چاہی دا اے تے یقین رکھنا چاہی دا اے کہ جے ساڈا کوئی عزیز فوت ہو جائے تے یہوواہ تے یسوع سانوں حوصلہ ضرور دین گے ۔ اَسی ایہہ وی سکھیا کہ سانوں مُنادی کردے تے تلیم دیندے وقت یہوواہ تے یسوع دی مثال تے چل کے دُوجیاں لئی ہمدردی وکھانی چاہی دی اے۔ سانوں ایس گل توں وی تسلی مِلی اے کہ یہوواہ تے اوہدا پیارا پُتر ساڈے جذبات تے کمزوریاں نُوں سمجھدے نیں تے ساڈی مدد کرنا چاہندے نیں۔ آؤ اوہدوں تک ایہناں گلاں تے عمل کردے رہیے جدوں تک یہوواہ اپنے وعدے دے مطابق ساڈے سارے اَتھرو پونجھ نئیں دیندا۔—مکاشفہ 21:4۔
گیت نمبر 13: مسیح دی ودھیا مثال
^ کجھ موقعیاں تے یسوع مسیح ایناں جذباتی ہو گیا کہ اوہ رون لگ پیا۔ ایس مضمون چ اَسی تِن ایہو جہے موقعیاں توں کجھ خاص گلاں سکھاں گے۔
^ ایس مضمون چ کجھ ناں بدل دِتے گئے نیں۔
^ متی 22:39 جیس یونانی لفظ دا ترجمہ پڑوسی کیتا گیا اے اوہدے چ بس اوہ لوک ای شامل نئیں جیہڑے ساڈے آلے دوالے رہندے نیں سگوں ایہدے چ اوہ سارے لوک شامل نیں جنہاں نُوں اَسی ملنے آں۔
^ تصویر دی وضاحت: یسوع مسیح نے مریم تے مارتھا نُوں تسلی دِتی۔ اَسی وی اوہناں لوکاں نُوں تسلی دے سکنے آں جیہڑے اپنے کسے عزیز دی موت دا غم سہہ رہے نیں۔
^ تصویر دی وضاحت: یسوع نے خوشی خوشی نیکُدیمس نُوں رات نُوں گواہی دِتی۔ سانوں وی لوکاں نُوں اوس وقت بائبل کورس کرانا چاہی دا اے جیس وقت اوہناں لئی اِنج کرنا اسان ہوندا اے۔
^ تصویر دی وضاحت: یسوع نے یہوواہ توں دُعا کیتی کہ اوہ اوہدی مدد کرے تاکہ اوہ اوہدا وفادار رہ سکے۔ سانوں وی مشکلاں دا سامنا کردے ویلے اِنج ای کرنا چاہی دا اے۔
