مطالعے دا مضمون 5
اپنے وقت نُوں سمجھداری نال استمال کرو
اپنے چال چلن تے کڑی نظر رکھو تاکہ تُسی بیوقوفاں وانگوں نئیں سگوں عقلمنداں وانگوں زندگی گزارو۔ تے اپنے وقت نُوں سمجھداری نال استمال کرو۔—اِفسیوں 5:15، 16۔
گیت نمبر 8: یہوواہ ساڈا سہارا
مضمون تے اِک نظر *
1. اَسی یہوواہ نال وقت کیویں گزارنے آں؟
سانوں اپنے عزیزاں تے دوستاں نال وقت گزار کے بڑی خوشی ہوندی اے۔ میاں بیوی نُوں اِک دُوجے نال وقت گزارنا بڑا چنگا لگدا اے۔ نوجواناں نُوں اپنے دوستاں نال گھم پھر کے بڑا مزہ آندا اے تے سانوں ساریاں نُوں کلیسیا دے بھین بھراواں نال ملنا جلنا بڑا پسند اے۔ پر سانوں سب توں زیادہ خوشی یہوواہ خدا نال وقت گزار کے مِلدی اے۔ اَسی دُعا کر کے، اوہدا کلام پڑھ کے تے اوہدے مقصد تے خوبیاں تے سوچوچار کر کے اوہدے نال وقت گزارنے آں۔ واقعی اَسی یہوواہ نال جیہڑا وقت گزارنے آں اوہ بوہت ای خاص ہوندا اے۔—زبور 139:17۔
2. سانوں کیہڑے مسٔلے دا سامنا ہو سکدا اے؟
2 بھانویں کہ سانوں یہوواہ نال وقت گزار کے بڑی خوشی مِلدی اے پر بوہت زیادہ مصروف ہون دی وجہ توں ساڈے لئی یہوواہ دی عبادت لئی وقت کڈھنا مشکل ہو سکدا اے۔ ہو سکدا اے کہ اَسی نوکری، گھر دِیاں ذمےداریاں تے دُوجے کماں چ اینے مصروف ہو جائیے کہ سانوں لگے کہ ساڈے کول دُعا کرن، بائبل پڑھن تے سوچوچار کرن لئی وقت ای نئیں اے۔
3. ہور کیہڑی چیز ساڈا وقت چوری کر سکدی اے؟
3 اِک ہور چیز ساڈا بوہت سارا وقت کھا سکدی اے۔ کجھ کم اپنے آپ چ غلط نئیں ہوندے پر جے اَسی دھیان نئیں رکھاں گے تے ساڈا اوہ سارا وقت برباد ہو سکدا اے جیہڑا سانوں یہوواہ دے نیڑے جان لئی استمال کرنا چاہی دا اے۔مثال لئی، آرام کرنا تے کدی کدی تفریح کرنا چنگی گل اے۔ پر صحی قسم دی تفریح وی ساڈا ایناں سارا وقت چوری کر سکدی اے کہ یہوواہ دی عبادت لئی ساڈے کول وقت ای نہ بچے۔ایس لئی تفریح نُوں ساڈے لئی سب توں اہم نئیں ہونا چاہی دا۔—امثال 25:27؛ 1-تیمُتھیُس 4:8۔
4. ہُن اَسی کیہڑیاں گلاں تے غور کراں گے؟
4 ایس مضمون چ اَسی ویکھاں گے کہ سانوں کجھ کماں نُوں اپنی زندگی چ سب توں زیادہ اہمیت کیوں دینی چاہی دی اے۔ نالے اَسی غور کراں گے کہ اَسی یہوواہ نال اپنے وقت نُوں سمجھداری نال کیویں استمال کر سکنے آں تے ایہدے سانوں کیہڑے فائدے ہون گے۔
صحی فیصلے کرو تے زیادہ ضروری کماں نُوں اہمیت دَوو
5. اِفسیوں 5:15-17 چ دِتی نصیحت تے غور کر کے نوجوان سب توں ودھیا راہ کیویں چُن سکدے نیں؟
5 زندگی دی سب توں ودھیا راہ چُنو۔ نوجواناں نُوں اکثر ایہہ سمجھ نئیں آندا کہ اوہ زندگی چ کیہہ کرن گے۔ ہو سکدا اے کہ اِک پاسے سکول دے ٹیچر تے غیر ایمان رشتےدار اوہناں نُوں یونیورسٹی جان دی ہلاشیری دین تاکہ اوہناں نُوں ودھیا نوکری ملے تے اوہ زیادہ توں زیادہ پیسے کمان۔ پر یونیورسٹی دی پڑھائی اوہناں دا بوہت سارا وقت لے سکدی اے۔ دُوجے پاسے ہو سکدا اے کہ اوہناں دے ماں پیو تے کلیسیا چ دوست اوہناں نُوں کہن کہ اوہ اپنی زندگی یہوواہ دی خدمت کرن چ لان۔ یہوواہ نُوں پیار کرن والا اِک نوجوان صحی فیصلہ کیویں لے سکدا اے؟ اوہنوں اِفسیوں 5:15-17 چ لکھی گل تے سوچوچار کر کے بڑا فائدہ ہوئے گا۔ (ایتاں نُوں پڑھو۔) ایہناں ایتاں نُوں پڑھن توں بعد اِک نوجوان اپنے آپ کولوں پچھ سکدا اے: ”یہوواہ دی مرضی کیہہ اے؟ میرا کیہڑا فیصلہ اوہنوں خوش کرے گا؟ کیہڑا فیصلہ کر کے میں اپنے وقت نُوں سمجھداری نال استمال کر سکاں گا؟ نوجوانو، یاد رکھو، زمانہ بُرا اے تے بوہت چھیتی شیطان دی بُری دُنیا ختم ہو جائے گی۔ ایس لئی سمجھداری دی گل ایہہ وے کہ تُسی زندگی دی اوہ راہ چُنو جدے تے چل کے تُسی یہوواہ نُوں خوش کرو گے۔
6. مریم نے کیہڑا فیصلہ کیتا تے ایہہ صحی فیصلہ کیوں سی؟
6 زیادہ ضروری کماں نُوں اہمیت دَوو۔ اپنے وقت نُوں سمجھداری نال استمال کرن لئی کدی کدی سانوں دو صحی کماں وچوں اِک نُوں چُننا پیندا اے۔ ایہہ گل سمجھن لئی یاد کرو کہ اوہدوں کیہہ ہویا جدوں یسوع مریم تے مارتھا دے گھر گیا۔ یسوع نُوں ویکھ کے مارتھا اینی خوش سی کہ اوہ اوہدے لئی مزے مزے دے کھانے بنان لگ پئی۔ پر اوہدی بھین مریم یسوع دے قدماں چ بیٹھ کے اوہدی گلاں سنن لگ پئی۔ مارتھا نے جو کیتا اوہ غلط نئیں سی پر یسوع نے کہیا کہ مریم نے سب توں ودھیا چیز چُنی اے۔ (لُوقا 10:38-42) بعد چوں شاید مریم ایہہ بُھل گئی ہوئے گی کہ اوہنے کیہہ کھادا پر یسوع توں سکھیاں گلاں اوہ کدی نئیں بھلی ہوئے گی۔ جیس طرحاں مریم لئی یسوع نال وقت گزارنا سب توں خاص سی اوسے طرحاں جیہڑا وقت اَسی یہوواہ نال گزارنے آں اوہ ساڈے لئی سب توں خاص اے۔ پر اَسی ایس وقت نُوں سمجھداری نال کیویں استمال کر سکنے آں تاکہ اَسی یہوواہ دے ہور قریب جا سکئے؟
یہوواہ نال اپنے وقت نُوں سمجھداری نال استمال کرو
7. دُعا کرنا بائبل پڑھنا تے ایہدے تے سوچوچار کرنا ایناں ضروری کیوں اے؟
7 دُعا کرنا، بائبل پڑھنا تے ایہدے تے سوچوچار کرنا یہوواہ دی عبادت دا حصہ اے۔ دُعا کردے وقت اَسی اپنے اسمانی باپ یہوواہ نال گل کر رہے ہنے آں جیہڑا سانوں بوہت پیار کردا اے۔ (زبور 5:7) بائبل پڑھدے وقت اَسی کائنات دی سب توں سمجھدار ہستی یہوواہ کولوں سکھ رہے ہنے آں۔ (امثال 2:1-5) سکھیاں ہوئیاں گلاں تے سوچوچار کرن نال سانوں یہوواہ دِیاں شاندار خوبیاں تے ایس گل تے غور کرن دا موقع مِلدا اے کہ اوہ ساڈے لئی تے سارے انساناں لئی کیہہ کرنا چاہندا اے۔ واقعی ایہہ ای اپنا وقت استمال کرن دا سب توں ودھیا طریقہ اے۔ پر اَسی یہوواہ نال جیہڑا وقت گزارنے آں اوہدے توں پورا فائدہ حاصل کرن لئی اَسی کیہہ کر سکنے آں؟
کیہہ تُسی بائبل پڑھن لئی کوئی خاموش جگہ لبھ سکدے او؟ (پیراگراف نمبر 8، 9 نُوں ویکھو۔)
8. وقت نُوں سمجھداری نال استمال کرن بارے اَسی یسوع توں کیہہ سکھنے آں؟
8 جے ہو سکے تے کوئی خاموش جگہ چُنو۔ ذرا یسوع دی مثال تے غور کرو۔ زمین تے یہوواہ دی خدمت کرن توں پہلاں یسوع نے 40 دن بیابان چ گزارے۔ (لُوقا 4:1، 2) اوتھے بڑی خاموشی سی ایس لئی یسوع پورے دھیان نال یہوواہ کولوں دُعا کر سکدا سی تے ایس گل تے سوچوچار کر سکدا سی کہ یہوواہ اوہدے توں کیہہ چاہندا اے۔ اِنج کرن نال یسوع اوہناں ازمیشاں لئی تیار ہو گیا جیہڑیاں بوہت چھیتی اوہدے تے آن والیاں سن۔ تُسی یسوع دی مثال توں کیہہ سکھ سکدے او؟ جے تواڈا گھرانہ بوہت وڈا اے تے تواڈے لئی کوئی خاموش جگہ لبھنا مشکل ہو سکدا اے۔ تُسی گھر توں باہر کوئی خاموش جگہ لبھ سکدے او۔ جُولی ناں دی اِک بھین خدا نال دُعا چ وقت گزارن لئی اِنج ای کردی اے۔ اوہ تے اوہدا شوہر ملک فرانس چ رہندے نیں تے اوہناں دا گھر بوہت چھوٹا اے۔ ایس لئی بھین جُولی لئی کوئی خاموش جگہ لبھنا مشکل ہوندا اے۔ بھین جُولی دَسدی اے : ”میں ہر روز اِک پارک جانی آں تاکہ میں کلّی پورے دھیان نال یہوواہ کولوں دُعا کر سکاں۔“
9. بوہت زیادہ مصروف ہون دے باوجود یسوع نے یہوواہ نال وقت گزارن لئی کیہہ کیتا؟
9 جدوں یسوع زمین تے یہوواہ دی خدمت کر رہیا سی تے اوہ بڑا مصروف رہندا سی۔ اوہ جِتھے وی جاندا سی بِھیڑ اوہدے پچھے پچھے آ جاندی سی، لوک اوہدے نال نال رہنا چاہندے سن۔ اِک وار تے سارا شہر اوہنوں ویکھن لئی دروازے تے جمع ہو گیا۔ اینے مصروف ہون دے باوجود یسوع نے یہوواہ کولوں دُعا کرن لئی وقت کڈھیا تاکہ اوہ اپنے باپ دے نیڑے رہ سکے۔ اگلے دن سویرے سویرے اوہ اِک سنسان جگہ گیا تاکہ اوہ یہوواہ نال وقت گزار سکے۔—مرقس 1:32-35۔
10، 11. متی 26:40، 41 دے مطابق یسوع نے گتسمنی باغ چ اپنے شاگرداں نُوں کیہڑی ہدیت دِتی تے شاگرداں نے کیہہ کیتا؟
10 زمین تے اپنی آخری رات یسوع نے فیر توں اِک خاموش جگہ لبھی تاکہ اوہ دُعا تے سوچوچار کر سکے۔ اوہ گتسمنی باغ گیا۔ (متی 26:36)اوس موقع تے یسوع نے اپنے شاگرداں نُوں دُعا بارے اِک اہم گل دَسی۔
11 غور کرو کہ ایہدے بعد کیہہ ہویا۔ جدوں یسوع تے شاگرد گتسمنی دے باغ چ پونچے تے اَدھی رات ہو چُکی سی۔ یسوع نے رسولاں نُوں ہدیت کیتی: چوکس رہوو، تے فیر اوہ دُعا کرن لئی چلا گیا۔ (متی 26:37-39) پر جدوں یسوع واپس آیا تے شاگرد سوں گئے سن۔ اوہناں نُوں سُتے ہوئے ویکھ کے یسوع نے اِک وار فیر اوہناں نُوں کہیا: چوکس رہوو تے دُعا کردے رہوو۔ (متی 26:40، 41 نُوں پڑھو۔) یسوع جان دا سی کہ شاگرد بڑے پریشان تے تھکے ہوئے نیں۔ ایس لئی یسوع نُوں اوہناں تے ترس آیا تے اوہنے کہیا: ”جسم کمزور اے۔“ ایس توں بعد یسوع فیر توں دو وار دُعا کرن لئی گیا تے دونویں وار جدوں اوہ واپس آیا تے شاگرد دُعا کرن دی بجائے سوں رہے سن۔—متی 26:42-45۔
کیہہ تُسی اوہدوں دُعا کر سکدے او جدوں تُسی زیادہ تھکے نہ ہووو؟ (پیراگراف نمبر 12 نُوں ویکھو۔)
12. جے پریشان یاں تھکے ہون دی وجہ توں توانوں دُعا کرنا مشکل لگدا اے تے تُسی کیہہ کر سکدے او؟
12 صحی وقت چُنو۔ کدی کدی اَسی اینے تھکے ہوئے یاں پریشان ہنے آں کہ دُعا کرن نُوں ساڈا دل نئیں کردا۔ جے تواڈے نال اِنج ہویا اے تے تُسی کلّے نئیں او۔ تُسی کیہہ کر سکدے او؟ کجھ بھین بھرا پہلاں رات نُوں دُعا کردے سن، پر اوہدوں اوہ بوہت تھکے ہوندے سن ایس لئی ہُن اوہناں نے شام دا وقت چُنیا اے تاکہ اوہ دھیان نال دُعا کر سکن۔ کجھ ہور بھین بھراواں نے ویکھیا اے کہ جدوں اوہ بالکل سدھے بیٹھ کے دُعا کردے نیں تے اوہ ہور چوکس رہندے نیں۔ پر تُسی اوہدوں کیہہ کر سکدے او جدوں بوہت زیادہ پریشان یاں بے حوصلہ ہون دی وجہ توں تواڈے چ دُعا کرن دی طاقت ای نئیں ہوندی؟ یہوواہ نُوں دَسو کہ تُسی کیہو جیہا محسوس کر رہے او۔ تُسی یقین رکھ سکدے او کہ ساڈا رحم دل باپ تواڈے جذبات ضرور سمجھے گا۔—زبور 139:4۔
کیہہ تُسی عبادتاں دوران ایمیل یاں میسج دا جواب نہ دین دی پوری کوشش کر سکدے او؟ (پیراگراف نمبر13، 14 نُوں ویکھو۔)
13. یہوواہ نال وقت گزاردے ویلے فون یاں ٹیبلٹ دی وجہ توں ساڈا دھیان کیویں بھٹک سکدا اے؟
13 بائبل پڑھدے ویلے اپنا دھیان نہ بھٹکن دَوو۔ دُعا دے علاوہ یہوواہ نال اپنی دوستی مضبوط کرن لئی سانوں اوہدے کلام نُوں سمجھن لئی اوہدا مطالعیا کرنا تے عبادتاں تے جانا چاہی دا اے۔ بائبل دا مطالعیا کردے ویلے یاں عبادتاں دوران اَسی اپنے وقت نُوں سمجھداری نال کیویں استمال کر سکنے آں؟ اپنے آپ کولوں پچھو: ”عبادتاں تے یاں بائبل دا مطالعیا کردے ویلے کیہڑیاں چیزاں دی وجہ توں میرا دھیان بھٹک جاندا اے؟“ شاید کسے دا فون، ایمیل یاں کوئی میسج آ جاندا اے۔ اَج کل بوہت سارے لوک فون یاں ٹیبلٹ استمال کردے نیں۔ کجھ ماہر لوکاں دا کہنا اے کہ جدوں اَسی کوئی کم دھیان نال کرن دی کوشش کرنے آں تے فون یاں ٹیبلٹ دی وجہ توں ساڈا دھیان اسانی نال بھٹک سکدا اے۔ اِک پروفیسر نے کہیا کہ فون دی وجہ توں ساڈا دھیان کسے کم توں ہٹ کے ہور گلاں تے چلا جاندا اے۔ ساڈیاں کنونشناں شروع ہون توں پہلاں سانوں دَسیا جاندا اے کہ اَسی اپنے فون یاں ٹیبلٹ نُوں ایس طرحاں سیٹ کرئیے کہ ایہدی وجہ توں دُوجیاں دا دھیان پروگرام توں نہ ہٹے۔ کیہہ اَسی اوہدوں وی اِنج کر سکنے آں جدوں اَسی کلّے یہوواہ نال وقت گزار رہے ہنے آں تاکہ ساڈا دھیان نہ بھٹکے؟
14. فِلپّیوں 4:6، 7 دے مطابق یہوواہ ساڈی مدد کیویں کردا اے تاکہ ساڈا دھیان نہ بھٹکے؟
14 دُعا چ یہوواہ کولوں مدد منگو کہ تُسی اپنا پورا دھیان اوہدے کلام تے رکھ سکو۔ جدوں توانوں لگدا اے کہ دُعا کردے ویلے یاں بائبل پڑھدے ویلے یاں عبادتاں دوران تواڈا دھیان بھٹک رہیا اے تے یہوواہ توں مدد منگو۔ جے تُسی کسے وجہ توں پریشان او تے ہو سکدا اے کہ توانوں اپنا دھیان اوس پریشانی توں ہٹا کے خدا دے کلام تے لانا مشکل لگے۔ پر ایس طرحاں کرنا بوہت ضروری اے۔ یہوواہ کولوں اوہ اِطمینان منگو جیہڑا نہ صرف تواڈے دل نُوں سگوں تواڈی سوچ نُوں وی محفوظ رکھے گا۔—فِلپّیوں 4:6، 7 نُوں پڑھو۔
یہوواہ نال وقت گزارن دے فائدے
15. یہوواہ نال وقت گزارن دا اِک فائدہ کیہہ اے؟
15 جے تُسی یہوواہ نال گل کرن، اوہدی سنن تے اوہدے بارے سوچوچار کرن لئی وقت کڈھو گے تے توانوں بڑے فائدے ہون گے۔ کیہڑے فائدے؟ پہلا فائدہ ایہہ وے کہ تُسی چنگے فیصلے کرو گے۔بائبل چ سانوں دَسیا گیا اے کہ جیہڑا دنا لوکاں نال چلدا اے اوہ دنا بنے گا۔ (امثال 13:20) ایس لئی جدوں تُسی کائنات دی سب توں دانشمند ہستی یعنی یہوواہ خدا نال وقت گزارو گے تے تُسی وی دانشمند بن جاؤ گے۔ تُسی ایہہ چنگی طرحاں سمجھ جاؤ گے کہ تُسی یہوواہ نُوں کیویں خوش کر سکدے او تے ایہو جہے فیصلے کرن توں کیویں بچ سکدے او جنہاں توں اوہ دُکھی ہووے گا۔
16. یہوواہ نال وقت گزار کے تلیم دین دی ساڈی مہارت کیویں نکھر جاندی اے؟
16 یہوواہ نال وقت گزارن دا دُوجا فائدہ ایہہ ہوئے گا کہ تُسی اِک ودھیا استاد بن جاؤ گے۔ کسے نُوں بائبل کورس کران دا اِک اہم مقصد ایہہ ہوندا اے کہ یہوواہ دے نیڑے جان چ اَسی اوہدی مدد کرئیے۔ اَسی ایہہ کیویں کر سکنے آں؟ جِنّاں زیادہ اَسی اپنے اسمانی باپ نال گل کراں گے اونی زیادہ ساڈے دل چ اوہدے لئی محبت ودھے گی۔ نالے اَسی ایس قابل بناں گے کہ اَسی بائبل کورس کرن والے نُوں یہوواہ نال پیار کرنا سکھا سکئے۔ ایہہ گل یسوع دی مثال توں صاف پتہ چلدی اے۔ یہوواہ بارے یسوع دِیاں گلاں توں پتہ چلیا کہ اوہ اپنے باپ نُوں کِنّاں پیار کردا اے۔ ایہدی وجہ توں اوہدے شاگرد وی یہوواہ نُوں پیار کرن لگ پئے۔—یوحنا 17:25، 26۔
17. دُعا تے بائبل دا مطالعیا کرن نال ساڈا ایمان مضبوط کیوں ہوندا اے؟
17 یہوواہ نال وقت گزارن دا تیجا فائدہ ایہہ ہوئے گا کہ تواڈا ایمان ہور مضبوط ہو جائے گا۔ ذرا سوچو کہ جدوں تُسی یہوواہ کولوں رہنمائی، تسلی تے مدد لئی دُعا کردے او تے کیہہ ہوندا اے؟ ہر وار جدوں یہوواہ تواڈی دُعا دا جواب دیندا اے تے اوہدے تے تواڈا ایمان ہور مضبوط ہو جاندا اے۔ (1-یوحنا 5:15) تُسی اپنا ایمان مضبوط کرن لئی ہور کیہہ کر سکدے او؟ بائبل چ لکھیاں گلاں دا مطالعیا کر و۔ یاد رکھو کہ کوئی ایمان اوہدوں ای لیاندا اے جدوں اوہ پہلاں پاک کلام دا پیغام سُن دا اے۔ (رومیوں 10:17) پر ایمان پیدا کرن لئی صرف پاک کلام دِیاں گلاں سکھنا ای کافی نئیں اے۔ آؤ ویکھئے کہ سانوں ہور کیہہ کرن دی ضرورت اے۔
18. مثال دے کے سمجھاؤ کہ سانوں سوچوچار کیوں کرنا چاہی دا اے۔
18 سانوں پاک کلام توں سکھیاں گلاں تے سوچوچار کرن دی ضرورت اے۔ ذرا زبور 77 لکھن والے دی مثال تے غور کرو۔ اوہنوں لگیا کہ یہوواہ اوس توں تے باقی اِسرائیلیاں توں خوش نئیں اے۔ ایس لئی اوہ ایناں زیادہ پریشان ہو گیا کہ اوہ رات نُوں سوں نئیں پاندا سی۔ (2-8 ایتاں) اوہنے کیہہ کیتا؟ اوہنے یہوواہ نُوں کہیا: میں تیرے سارے کماں تے سوچوچار کراں گا تے جو کجھ وی تُوں کرنا ایں اوہدے تے دھیان دَواں گا۔ (12 ایت) بے شک ایس زبور نُوں لکھن والا چنگی طرحاں جان دا سی کہ یہوواہ نے ماضی چ اپنے بندیاں لئی کیہہ کجھ کیتا اے۔ پر فیر وی اوہ پریشان ہون دی وجہ توں ایہہ سوچن لگ پیا کہ کیہہ خدا کرم کرنا بُھل گیا اے؟ کیہہ اوہنے غصے دی وجہ توں اپنی رحمت روک لئی اے؟ (9 ایت) اوہنے یہوواہ دے کماں تے سوچوچار کیتا تے ایس گل تے وی کہ ماضی چ یہوواہ اپنے بندیاں نال کِنّے رحم تے ہمدردی نال پیش آیا۔ (11 ایت) ایہناں گلاں تے سوچوچار کرن دی وجہ توں اوہنوں پکا یقین ہو گیا کہ یہوواہ اپنے بندیاں نُوں کدی کلّا نئیں چھڈے گا۔ (15 ایت) ایسے طرحاں جے تُسی ایس گل تے سوچوچار کرو گے کہ یہوواہ نے تواڈے لئی کیہہ کجھ کیتا اے تے تواڈا ایمان ہور مضبوط ہوئے گا۔
19. یہوواہ نال وقت گزار کے سانوں ہور کیہڑا فائدہ ہوئے گا؟
19 یہوواہ نال وقت گزارن دا چوتھا تے سب توں وڈا فائدہ ایہہ وے کہ تواڈے دل چ یہوواہ لئی محبت ہور وی گُوڑھی ہو جائے گی۔ کسے ہور خوبی نالوں زیادہ محبت دی خوبی دی وجہ توں ساڈے دل چ ایہہ خواہش پیدا ہوئے گی کہ اَسی یہوواہ دے حکم منیے، اوہنوں خوش کرن لئی قربانیاں دَئیے تے ہر مشکل چ ثابت قدم رہیے۔ (متی 22:37-39؛ 1-کُرنتھیوں 13:4، 7؛ 1-یوحنا 5:3) یہوواہ نال ساڈی قریبی دوستی نالوں زیادہ قیمتی چیز ہور کوئی ہو ای نئیں سکدی۔—زبور 63:1-8۔
20. تُسی یہوواہ نال جیہڑا وقت گزار دے او تُسی اوہنوں سمجھداری نال استمال کرن لئی کیہہ کرو گے؟
20 یاد رکھو کہ دُعا کردے، بائبل پڑھدے تے ایہدے تے سوچوچار کردے ویلے اَسی یہوواہ دی عبادت کر رہے ہنے آں۔ یہوواہ نال وقت گزارن لئی یسوع وانگوں کوئی خاموش جگہ لبھو تے دھیان بھٹکان والیاں چیزاں نُوں دُور رکھو۔ جدوں تُسی یہوواہ دی عبادت نال جُڑیا کوئی کم کردے او تے دُعا چ اوہدے کولوں مدد منگو تاکہ تُسی اپنا سارا دھیان اوس کم تے رکھ سکو۔ جے تُسی ہن سمجھداری نال اپنے وقت نُوں استمال کرو گے تے یہوواہ توانوں نوِیں دُنیا چ ہمیشاں دی زندگی دا انعام دَوے گا۔
گیت نمبر 32: یہوواہ ول ہووو
^ یہوواہ ساڈا سب توں قریبی دوست اے تے اوہدے نال ساڈی دوستی ساڈے لئی بڑی انمول اے تے اَسی اوہنوں سب توں زیادہ پیار کرنے آں۔ ایس لئی اَسی اوہنوں ہور چنگی طرحاں جاننا چاہنے آں۔ جیس طرحاں کسے نُوں جانن لئی وقت لگدا اے۔ اوسے طرحاں یہوواہ نُوں چنگی طرحاں جانن لئی وی وقت لگے گا۔ پر اَسی سارے بڑے مصروف رہنے آں تے فیر اَسی اپنے اسمانی باپ دے ہور نیڑے جان لئی وقت کیویں کڈھ سکنے آں، تے اِنج کر کے سانوں کیہڑے فائدے ہون گے؟
