مطالعے دا مضمون 4
یسوع مسیح دی موت دی یاد منان لئی جمع ہونا ایناں ضروری کیوں اے؟
میری یاد چ ایسے طرحاں کردے رہوو۔—لُوقا 22:19۔
گیت نمبر 20: انمول بیٹے دی قربانی
مضمون تے اِک نظر *
1، 2. (الف) اَسی خاص طور تے کدوں اپنے اوس عزیز نُوں یاد کرنے آں جیہڑا فوت ہو گیا اے؟ (ب) اپنی موت توں پہلاں یسوع مسیح نے کیہہ منان دا حکم دِتا؟
بھانویں ساڈے کسے عزیز نُوں فوت ہوئے کِنّاں ای عرصہ کیوں نہ ہو گیا ہوئے سانوں فیر وی اوہدی یاد آندی اے۔ پر ہر سال اوہدے فوت ہون دی تریخ تے اوہ سانوں سب توں زیادہ یاد آندا اے۔
2 ہر سال پوری دُنیا چ لکھاں لوک یسوع مسیح دی موت دی یاد منان لئی جمع ہوندے نیں۔ اَسی وی اوہناں چ شامل ہنے آں کیونکہ اَسی یسوع مسیح نُوں دلوں پیار کرنے آں۔ (1-پطرس 1:8) اَسی ایس لئی جمع ہنے آں کیونکہ اوہنے اپنی جان قربان کر کے ساڈے لئی گناہ تے موت توں نجات پان دی راہ کھولی۔ (متی 20:28) اصل چ یسوع چاہندا سی کہ اوہدے پیروکار اوہدی موت دی یاد منان۔ اپنی موت توں پہلاں یسوع نے اپنے شاگرداں نُوں وکھایا کہ اوہناں نُوں اوہدی موت دی یاد کیویں منانی چاہی دی اے تے حکم دِتا: میری یاد چ ایسے طرحاں کردے رہوو۔—لُوقا 22:19۔
3. ایس مضمون چ اَسی کیہڑیاں گلاں تے غور کراں گے؟
3 جیہڑے لکھاں لوک یسوع مسیح دی موت دی یاد منان لئی جمع ہوندے نیں اوہناں چوں بوہت تھوڑے لوک اسمان تے ہمیشاں دی زندگی حاصل کرن دی امید رکھدے نیں۔ زیادہتر لوک زمین تے ہمیشاں دی زندگی حاصل کرن دی امید رکھدے نیں۔ ایس مضمون چ اَسی ویکھاں گے کہ ایہہ دونویں گروہ ہر سال ایس خاص عبادت تے حاضر ہون لئی بےصبری نال کیوں اِنتظار کردے نیں۔ نالے اَسی غور کراں گے کہ ایس عبادت تے حاضر ہو کے سانوں کیہڑے فائدے ہوندے نیں۔ سب توں پہلاں آؤ ویکھئے کہ پاک روح نال مسحشُدہ مسیحی کیہڑیاں گلاں دی وجہ توں ایس عبادت تے حاضر ہوندے نیں۔
مسحشُدہ مسیحی ایس عبادت تے کیوں حاضر ہوندے نیں؟
4. مسحشُدہ مسیحی یسوع دی موت دی یاد منان دی عبادت چ روٹی تے مے کیوں کھاندے پیندے نیں؟
4 ہر سال مسحشُدہ مسیحی بڑی بےصبری نال اوس دن دا اِنتظار کردے نیں جدوں مسیح دی موت دی یاد منائی جائے گی۔ ایس خاص عبادت تے اوہ روٹی تے مے وچوں کھاندے پیندے نیں۔ پر صرف اوہ ای اِنج کیوں کر سکدے نیں؟ ایس سوال دا جواب جانن لئی غور کرو کہ زمین تے یسوع مسیح دی آخری رات دے دوران کیہہ ہویا۔عیدِفسح دا کھانا کھان توں بعد یسوع مسیح نے اپنے 11 وفادار رسولاں نُوں روٹی تے مے دِتی تے اوہناں نُوں ایہدے چوں کھان پین لئی کہیا۔ ایس طرحاں یسوع نے اوہناں نُوں وکھایا کہ اوہدی موت دی یاد کیویں منائی جائے گی۔ ایہنوں عشاِئےربانی یاں مالک دی یادگیری تقریب دا کھانا کہیا جاندا اے۔ ایس موقعے تے یسوع مسیح نے نویں عہد تے بادشاہی دے عہد بارے سمجھایا۔ * (لُوقا 22:19، 20، 28-30) ایہناں دونواں عہداں دی وجہ توں 1 لکھ 44 ہزار انساناں لئی اسمان تے بادشاہواں تے کاہناں دے طور تے خدمت کرن دی راہ کھل گئی۔ ایہناں چ یسوع دے 11 وفادار رسول وی شامل نیں۔ (مکاشفہ 5:10؛ 14:1) ایس خاص عبادت تے صرف مسحشُدہ مسیحی ای روٹی تے مے وچوں کھا پی سکدے نیں کیونکہ ایہہ ای اوہناں لوکاں چ شامل نیں جنہاں نال ایہہ دو عہد بنھے گئے نیں۔
5. مسحشُدہ مسیحی اپنی امید بارے کیہڑیاں گلاں جان دے نیں؟
5 مسحشُدہ مسیحی اِک ہور وجہ توں وی مسیح دی موت دی یاد منان لئی بڑی خوشی نال جمع ہوندے نیں۔ ایس عبادت تے حاضر ہو کے اوہناں نُوں اپنی امید تے سوچوچار کرن دا موقع مِلدا اے۔ یہوواہ نے اوہناں نُوں بوہت ای شاندار امید دِتی اے۔ اوہ اسمان تے غیر فانی یعنی کدی نہ ختم ہون والی زندگی حاصل کرن گے۔ یسوع مسیح تے باقی مسحشُدہ مسیحیاں نال مِل کے خدمت کرن گے تے سب توں ودھ کے اوہ یہوواہ خدا نُوں ویکھن گے۔ (1-کُرنتھیوں 15:51-53؛ 1-یوحنا 3:2) مسحشُدہ مسیحی جان دے نیں کہ اوہناں نُوں اسمان تے ایہہ سارے شرف حاصل کرن دی دعوت مِلی اے۔ پر اسمان تے جان لئی اوہناں نُوں اپنی موت تک یہوواہ دے وفادار رہنا ہوئے گا۔ (2-تیمُتھیُس 4:7، 8) مسحشُدہ مسیحیاں نُوں اپنی امید تے سوچوچار کر کے بے حد خوشی مِلدی اے۔ (طِطُس 2:13) پر یسوع دِیاں ہور وی بھیڈاں چ شامل لوکاں نُوں وی ایس عبادت تے حاضر ہو کے بڑی خوشی مِلدی اے۔ (یوحنا 10:16) آؤ ویکھئے کہ اوہ ایس خاص عبادت تے کیوں حاضر ہوندے نیں۔
ہور بھیڈاں چ شامل لوک ایس عبادت تے کیوں حاضر ہوندے نیں؟
6. ہور بھیڈاں چ شامل لوک ایس عبادت تے کیوں حاضر ہوندے نیں؟
6 مسیح دِیاں ہور بھیڈاں چ شامل لوک ایس خاص عبادت تے حاضر تے ضرور ہوندے نیں پر اوہ روٹی تے مے وچوں کھاندے پیندے نئیں۔ 1938 چ پہلی وار اوہناں لوکاں نُوں مسیح دی موت دی یاد منان لئی عبادت چ حاضر ہون دی دعوت دِتی گئی جیہڑے زمین تے ہمیشاں دی زندگی حاصل کرن دی امید رکھدے نیں۔ ایس بارے یکم مارچ 1938 دے ”دی واچٹاور“ چ ایہہ دَسیا گیا سی:”مسیح دِیاں ہور بھیڈاں چ شامل لوکاں نُوں وی اوہدی موت دی یاد منان دی عبادت تے حاضر ہونا چاہی دا اے تاکہ اوہ ایس گل تے سوچوچار کرن کہ یہوواہ تے یسوع نے اوہناں لئی کیہہ کجھ کیتا اے۔ ایہہ اوہناں لئی وی خوشی دا موقع اے۔“ جیویں کہ شادی تے آ کے مہماناں نُوں خوشی مِلدی اے اونویں ای ایس خاص عبادت تے آ کے مسیح دِیاں ہور بھیڈاں نُوں خوشی مِلدی اے۔
7. ہور بھیڈاں چ شامل لوک ایس عبادت تے دِتی جان والی تقریر دا اِنتظار کیوں کردے نیں؟
7 ہور بھیڈاں چ شامل لوک وی ایس خاص عبادت تے اپنی امید تے سوچوچار کردے نیں۔ اوہناں نُوں ایس عبادت تے پیش کیتی جان والی تقریر سنن دا بڑا اِنتظار ہوندا اے۔ ایہدی وجہ اے کہ ایس تقریر چ دَسیا جاندا اے کہ جدوں یسوع مسیح تے 1 لکھ 44 ہزار مسحشُدہ مسیحی 1000 سال لئی حکمرانی کرن گے تے اوہ وفادار انساناں لئی کیہہ کجھ کرن گے۔ ایہہ حکمران اپنے بادشاہ تے پیشوا یسوع مسیح نال مِل کے فیر توں ساری زمین نُوں عدن دے باغ وانگوں سوہنا بنان گے تے انساناں دی مدد کرن گے تاکہ اوہ ہر طرحاں دے عیب توں پاک ہو جان۔ ایس عبادت تے آن والے لکھاں لوکاں دے دل خوشی نال بھر جاندے نیں جدوں اوہ خدا دے وعدیاں تے غور کردے نیں۔ ایہناں چوں کجھ وعدیاں بارے یسعیاہ 35:5، 6؛ 65:21-23 تے مکاشفہ 21:3، 4 چ دَسیا گیا اے۔ ایہہ سوچ کے کہ بوہت چھیتی اوہ اپنے عزیزاں نال نوِیں دُنیا چ ہون گے اوہناں دی امید پکی ہوندی اے۔ نالے اوہناں دا ایہہ ارادہ ہور پکا ہوندا اے کہ اوہ کدی وی یہوواہ دی عبادت کرنا نئیں چھڈن گے۔—متی 24:13؛ گلتیوں 6:9۔
8. ہور بھیڈاں چ شامل لوک ہور کیہڑی وجہ توں مسیح دی موت دی یاد منان لئی جمع ہوندے نیں؟
8 ہور بھیڈاں چ شامل لوک اِک ہور وجہ توں مسیح دی موت دی یاد منان لئی جمع ہوندے نیں۔ اوہ ایہہ ظاہر کرنا چاہندے نیں کہ اوہ مسحشُدہ مسیحیاں نال کِنّاں پیار کردے نیں تے اوہناں دا ساتھ دیندے نیں۔ پاک کلام چ پہلاں ای دَس دِتا گیا سی کہ مسحشُدہ مسیحی تے زمین تے زندگی پان دی امید رکھن والے مسیحی مِل کے یہوواہ دی خدمت کرن گے۔ آؤ پاک کلام توں ایہدیاں کجھ مثالاں تے غور کرئیے۔
9. زکریاہ 8:23 دے مطابق ہور بھیڈاں چ شامل لوک مسحشُدہ مسیحیاں بارے کیہو جیہا محسوس کر دے نیں؟
9 زکریاہ 8:23 نُوں فٹنوٹ * چوں پڑھو۔ ایس پیشینگوئی چ بوہت ودھیا طریقے نال سمجھایا گیا اے کہ ہور بھیڈاں دے لوک مسحشُدہ مسیحیاں بارے کیہو جیہا محسوس کردے نیں۔ اِصطلاح ”اِک یہودی“ مسحشُدہ مسیحیاں وَل اشارہ کردی اے۔ (رومیوں 2:28، 29) اِصطلاح”قوماں دِیاں ساریاں زباناں بولن والے لوکاں وچوں دس آدمی“ ہور بھیڈاں دے لوکاں لئی استمال کیتی گئی اے۔ اوہناں نے مسحشُدہ مسیحیاں دے کپڑیاں دا دامن پھڑیا ہویا اے یعنی اوہناں نُوں اوہناں نال بوہت لگاؤ اے تے اوہ اوہناں نال مِل کے یہوواہ دی عبادت کردے نیں۔ ایس لئی اوہناں نال مسیح دی موت دی یاد منان لئی جمع ہو کے ہور بھیڈاں دے لوک ظاہر کردے نیں کہ اوہ مسحشُدہ مسیحیاں نُوں کِنّاں پیار کر دے نیں۔
10. حِزقیایل 37:15-19، 24، 25 چ لکھی پیشینگوئی دے مطابق یہوواہ نے کیہہ کیتا اے؟
10 حِزقیایل 37:15-19، 24، 25 نُوں پڑھو۔ ایس پیشینگوئی نُوں پورا کرن لئی یہوواہ نے مسحشُدہ مسیحیاں تے ہور بھیڈاں نُوں اِک اٹوٹ بندھن چ بنھیا اے۔ ایس پیشینگوئی چ دو سوٹیاں دا ذکر کیتا گیا اے۔ ”یہوداہ دی سوٹی“ اسمان تے ہمیشاں دی زندگی پان دی امید رکھن والیاں وَل اشارہ کردی اے۔ (یہوواہ خدا یہوداہ دے قبیلے توں اِسرائیل دے بادشاہواں نُوں چن دا سی۔) ”افرائیم دی سوٹی“ زمین تے ہمیشاں دی زندگی پان دی امید رکھن والیاں وَل اشارہ کردی اے۔ * یہوواہ نے ایہناں دونواں سوٹیاں نُوں جوڑ دِتا اے تاکہ اوہ اِک ای سوٹی بن جان۔ ایہدا مطلب اے کہ مسحشُدہ مسیحی تے ہور بھیڈاں اپنے بادشاہ یسوع مسیح دی رہنمائی چ اِک ہو کے یہوواہ دی خدمت کردے نیں۔ اوہ ہر سال یسوع دی موت دی یاد مِل کے مناندے نیں۔ ایہناں بھیڈاں دا اِک ای چرواہا اے۔ ایس لئی اوہ الگ الگ نئیں سگوں اِک گلہ بن کے ایس خاص عبادت لئی جمع ہوندے نیں۔—یوحنا 10:16۔
11. متی 25:31-36، 40 چ جنہاں بھیڈاں دا ذکر کیتا گیا اے اوہ خاص طور تے کیہڑے طریقے نال مسیح دے بھراواں دا ساتھ دیندیاں نیں؟
11 متی 25:31-36، 40 نُوں پڑھو۔ ایس مثال چ بھیڈاں آخری زمانے چ رہن والے نیک لوکاں وَل اشارہ کردیاں نیں، جیہڑے زمین تے ہمیشاں دی زندگی پان دی امید رکھدے نیں یعنی مسیح دِیاں ہور بھیڈاں۔اوہ بڑی وفاداری نال زمین تے موجود مسیح دے بھراواں یعنی مسحشُدہ مسیحیاں دا ساتھ دیندے نیں۔ خاص طور تے اوہ پوری دُنیا چ بادشاہی دی خوشخبری سنان تے لوکاں نُوں شاگرد بنان دے وڈے کم نُوں پورا کرن چ اوہناں دی مدد کردے نیں۔—متی 24:14؛ 28:19، 20۔
12، 13. ہور بھیڈاں چ شامل لوک ہور کیہڑے طریقیاں نال مسیح دے بھراواں دا ساتھ دیندے نیں؟
12 ہر سال پوری دُنیا چ اِک مہم ہوندی اے جدے چ لوکاں نُوں مسیح دی موت دی یاد منان دی عبادت چ حاضر ہون دی دعوت دِتی جاندی اے۔ ہور بھیڈاں چ شامل لوک مسحشُدہ مسیحیاں نال مِل کے ایہدے چ حصہ لیندے نیں۔ (بکس ” مسیح دی موت دی یاد منان لئی تیاری کرو“ نُوں ویکھو۔) بھانویں کہ زیادہتر کلیسیاواں چ کوئی مسحشُدہ مسیحی نئیں ہوندا۔ پر فیر وی ہور بھیڈاں چ شامل لوک اپنی اپنی کلیسیا لئی سارے بندوبست کردے نیں تاکہ ایہہ خاص عبادت کیتی جا سکے۔ ایہو جہے طریقیاں نال مسیح دے بھراواں دا ساتھ دے کے اوہناں نُوں بڑی خوشی ہوندی اے۔ اوہناں نُوں پتہ اے کہ اوہ مسحشُدہ مسیحیاں دا ساتھ دین لئی جو کجھ وی کردے نیں یسوع دی نظر چ اوہ اِنج اے جیویں کہ اوہ اوہدے لئی کر رہے نیں۔—متی 25:37-40۔
13 بھانویں اَسی اسمان تے یاں زمین تے ہمیشاں دی زندگی پان دی امید رکھنے آں اَسی سارے ہور کیہڑیاں گلاں دی وجہ توں مسیح دی موت دی یاد منان لئی جمع ہنے آں؟
سانوں ساریاں نُوں ایس خاص عبادت تے کیوں حاضر ہونا چاہی دا اے؟
14. یہوواہ خدا تے یسوع مسیح نے ساڈے لئی محبت کیویں ظاہر کیتی اے؟
14 اَسی یہوواہ تے یسوع دی محبت لئی اوہناں دے بڑے شکرگزار آں۔ یہوواہ خدا نے ساڈے لئی کئی طریقیاں نال محبت ظاہر کیتی اے۔ پر اوہدی محبت دا سب توں وڈا ثبوت ایہہ وے کہ اوہنے اپنے پیارے پُتر نُوں ساڈی خاطر اذیت تے موت سہن لئی زمین تے گھلیا۔ (یوحنا 3:16) یسوع مسیح نے وی ساڈی خاطر اپنی جان قربان کر کے ساڈے لئی بوہت زیادہ محبت ظاہر کیتی۔ (یوحنا 15:13) اَسی یہوواہ تے یسوع دی محبت دا قرض کدی وی نئیں چُکا سکدے۔ پر اَسی اوہناں دی محبت لئی شکر گزاری وکھا سکنے آں۔ اوہ کیویں؟ اَسی ہر روز اپنے کماں توں وکھا سکنے آں کہ اَسی یہوواہ تے یسوع دے کِنّے احسان مند آں۔ (کُلسّیوں 3:15) ایس لئی سانوں ہر سال مسیح دی موت دی یاد منان لئی جمع ہونا چاہی دا اے تاکہ اَسی یہوواہ تے یسوع دی محبت تے سوچوچار کر سکئے تے اوہناں لئی اپنی محبت دا ثبوت دے سکئے۔
15. مسحشُدہ مسیحی تے ہور بھیڈاں چ شامل لوک فدیے دی اینی قدر کیوں کردے نیں؟
15 اَسی فدیے دی بڑی قدر کرنے آں۔ (متی 20:28) مسحشُدہ مسیحیاں لئی فدیہ اِک بیشقیمت تحفہ اے کیونکہ ایہدے ذریعے اوہناں نُوں اِک شاندار امید مِلی اے۔ یسوع دی قربانی تے ایمان رکھن دی وجہ یہوواہ نے اوہناں نُوں نیک قرار دِتا اے تے اوہناں نُوں گود لے لیا اے۔ (رومیوں 5:1؛ 8:15-17، 23) ہور بھیڈاں چ شامل لوک وی فدیے دی بڑی قدر کردے نیں۔ یسوع دی قربانی تے ایمان رکھن دی وجہ توں اوہناں دا ضمیر صاف اے، اوہ یہوواہ دی عبادت کر سکدے نیں تے وڈی مصیبت چوں بچ نِکلن دی امید رکھ سکدے نیں۔ (مکاشفہ 7:13-15) فدیے لئی اپنی قدر ظاہر کرن لئی مسحشُدہ مسیحی تے ہور بھیڈاں چ شامل لوک ہر سال مسیح دی موت دی یاد منان لئی جمع ہوندے نیں۔
16. مسیح دی موت دی یاد منان لئی جمع ہون دی اِک ہور وجہ کیہہ اے؟
16 اَسی یسوع مسیح دا حکم مننا چاہنے آں۔ بھانویں اَسی اسمان تے زندگی پان دی امید رکھنے آں یاں زمین تے اَسی سارے یسوع دے اوس حکم تے عمل کرنا چاہنے آں جیہڑا اوہنے اپنی قربانی دین توں کجھ وقت پہلاں دِتا۔ اوہنے کہیا: میری یاد چ ایسے طرحاں کردے رہوو۔—1-کُرنتھیوں 11:23، 24۔
ایس خاص عبادت تے حاضر ہو کے سانوں کیہڑے فائدے ہوندے نیں؟
17. ایس خاص عبادت تے جا کے اَسی یہوواہ دے ہور نیڑے کیوں ہو جانے آں؟
17 اَسی یہوواہ دے ہور نیڑے ہو جانے آں۔ (یعقوب 4:8) ایس خاص عبادت تے جا کے سانوں اپنی امید تے ساڈے لئی یہوواہ دی گہری محبت تے سوچوچار کرن دا موقع مِلدا اے۔ (یرمیاہ 29:11؛ 1-یوحنا 4:8-10) اپنی امید تے خدا دی اَٹل محبت تے غور کر کے ساڈے دل چ اوہدے لئی محبت ودھدی جاندی اے تے اوہدے نال ساڈی دوستی ہور مضبوط ہو جاندی اے۔—رومیوں 8:38، 39۔
18. یسوع مسیح دی مثال تے غور کر کے ساڈے دل چ کیہڑی خواہش پیدا ہوندی اے؟
18 ساڈے دل چ یسوع مسیح دی مثال تے چلن دی خواہش پیدا ہوندی اے۔ (1-پطرس 2:21) جدوں ایہہ خاص عبادت نیڑے ہوندی اے تے اَسی بائبل چوں اوہناں گلاں نُوں پڑھنے آں جیہڑیاں زمین تے یسوع مسیح دی زندگی دے آخری ہفتے، اوہدی موت تے مُردیاں چوں جی اُٹھن بارے لکھیاں ہویاں نیں۔ فیر اوس خاص عبادت تے دِتی جان والی تقریر دے ذریعے سانوں یاد دوایا جاندا اے کہ یسوع مسیح نے ساڈے لئی کِنّی محبت ظاہر کیتی۔ (اِفسیوں 5:2؛ 1-یوحنا 3:16) جدوں اَسی ایس گل تے سوچوچار کرنے آں کہ یسوع نے ہمیشاں دُوجیاں لئی قربانیاں دین دی کِنّی شاندار مثال قائم کیتی تے ساڈے دل چ ایہہ خواہش ودھدی اے کہ اَسی وی اوسے طرحاں چلدے رہیے جیس طرحاں یسوع چلدا سی۔—1-یوحنا 2:6۔
19. اَسی خدا دی محبت چ قائم کیویں رہ سکنے آں؟
19 ساڈا ارادہ ہور مضبوط ہوندا اے کہ اَسی خدا دی محبت چ قائم رہیے۔ (یہوداہ 20، 21) جدوں اَسی خدا دی گل مننے آں، اوہدے ناں نُوں پاک ثابت کرنے آں تے اوہنوں خوش کرن دی پوری کوشش کرنے آں تے اَسی خدا دی محبت چ قائم رہنے آں۔ (امثال 27:11؛ متی 6:9؛ 1-یوحنا 5:3) یسوع دی موت دی یاد منان لئی جمع ہو کے ساڈا ایہہ ارادہ ہور مضبوط ہوندا ے کہ اَسی ہر روز اپنے کماں تے فیصلیاں توں ثابت کراں گا کہ اَسی ہمیشاں تک یہوواہ دی محبت چ قائم رہنا چاہنے آں۔
20. اَسی کیہڑیاں گلاں دی وجہ توں مسیح دی موت دی یاد منان لئی جمع ہنے آں؟
20 اَسی بوہت ساریاں گلاں دی وجہ توں مسیح دی موت دی یاد منان لئی جمع ہنے آں، فیر بھانویں اَسی اسمان تے ہمیشاں دی زندگی حاصل کرن دی امید رکھدے ہوئیے یاں زمین تے۔ ہر سال ایس خاص عبادت تے حاضر ہو کے اَسی یسوع دی قربانی نُوں یاد کرنے آں جنہوں اَسی بوہت پیار کرنے آں۔ سب توں ودھ کے اَسی اوس گہری محبت نُوں یاد کرنے آں جیہڑی یہوواہ نے اپنے پیارے پُتر نُوں قربان کر کے ساڈے لئی ظاہر کیتی۔ ایس سال اَسی جمعہ، 15 اپریل 2022 دی شام نُوں مسیح دی موت دی یاد منان لئی جمع ہوواں گے۔ اَسی یہوواہ تے یسوع نُوں بوہت زیادہ پیار کرنے آں۔ ایس لئی ایس خاص عبادت تے حاضر ہون توں زیادہ ضروری ساڈے لئی ہور کجھ نئیں۔
گیت نمبر 19: یسوع مسیح دی موت دی یادگیری
^ اَسی ہر سال یسوع مسیح دی موت دی یاد منان دا بڑی بےصبری نال اِنتظار کرنے آں، فیر بھانویں اَسی اسمان تے ہمیشاں دی زندگی حاصل کرن دی امید رکھدے ہوئیے یاں زمین تے۔ ایس مضمون چ اَسی ویکھاں گے کہ سانوں ایس عبادت تے کیوں حاضر ہونا چاہی دا اے تے ایہدے سانوں کیہڑے فائدے ہوندے نیں۔
^ نویں عہد تے بادشاہی دے عہد بارے ہور جانن لئی اُردو چ ”مینارِنگہبانی،“ 15 اکتوبر 2014 چ صفحہ نمبر 15-17 تے مضمون ”تُم ”کاہنوں کی ایک مملکت“ ہو گے“ نُوں ویکھو۔
^ زکریاہ 8:23 (ترجمہ نوِیں دُنیا): ”فوجاں دا رب یہوواہ ایہہ فرماندا اے کہ اوناں دِناں چ قوماں دِیاں ساریاں زباناں بولن والے لوکاں وچوں دس آدمی اِک یہودی دے کپڑیاں دا دامن پھڑن گے تے کہن گے کہ اَسی تواڈے نال جاواں گے کیونکہ اَسی سُنیا اے کہ خدا تواڈے نال اے۔
^ حِزقیایل 37 باب چ دو سوٹیاں والی پیشینگوئی بارے ہور جانن لئی اُردو چ جولائی 2016 دے ”مینارِنگہبانی“ چ ”قارئین کے سوال“ نُوں ویکھو۔