مطالعے دا مضمون نمبر 1
یہوواہ کولوں رہنمائی منگن والیاں نُوں کسے چنگی چیز دی کمی نئیں ہوئے گی
2022 دی سالانہ ایت: یہوواہ کولوں رہنمائی منگن والیاں نُوں کسے چنگی چیز دی کمی نئیں ہوئے گی۔—زبور 34:10۔
گیت نمبر 4: یہوواہ میرا چرواہا
مضمون تے اِک نظر *
داؤد نُوں مشکل ویلے چ وی لگیا کہ اوہنوں کسے وی چنگی چیز دی کمی نئیں اے۔ (پیراگراف نمبر 1-3 نُوں ویکھو۔) *
1. داؤد کیہڑی مشکل چ سی؟
اِسرائیل دا بادشاہ ساؤل، داؤد نُوں جانوں مارنا چاہندا سی۔ ایس لئی داؤد نُوں اپنی جان بچان لئی بھجنا پیا۔ جدوں اوہنوں بُھکھ لگی تے اوہ شہر نوب رُکیا تے اوہنے کاہن کولوں اپنے تے اپنے ساتھیاں لئی صرف 5 روٹیاں منگیاں۔ (1-سموئیل 21:1، 3) بعد چ داؤد تے اوہدے ساتھیاں نُوں پناہ لئی اِک غار چ لکنا پیا۔ (1-سموئیل 22:1) پر ساؤل داؤد نُوں کیوں مارنا چاہندا سی؟
2. ساؤل اپنا ای نقصان کیویں کر رہیا سی؟ (1-سموئیل 23:16، 17)
2 ساؤل داؤد توں سڑدا سی کیونکہ داؤد نے بوہت ساریاں جنگاں جتیاں سن جدی وجہ توں لوک اوہدی بڑی تعریف کردے سن۔ نالے ساؤل جان دا سی کہ اوہدی نافرمانی دی وجہ توں یہوواہ نے اوہنوں بادشاہ دے طور تے ٹھکرا دِتا سی تے داؤد نُوں اگلا بادشاہ چُنیا سی۔ (1-سموئیل 23:16، 17 نُوں پڑھو۔) پر بادشاہ ساؤل کول حالے وی اِک وڈی فوج سی تے بوہت سارے لوک اوہدا ساتھ دیندے سن۔ ایس لئی داؤد نُوں اپنی جان بچان لئی بھجنا پیا۔ کیہہ ساؤل نُوں ایہہ لگدا سی کہ اوہ خدا دے خلاف جا کے داؤد نُوں بادشاہ بنن توں روک سکدا سی؟ (یسعیاہ 55:11) بائبل چ ایہدے بارے نئیں دَسیا گیا۔ پر اِک گل پکی اے کہ اِنج کر کے ساؤل اپنا ای نقصان کر رہیا سی۔ خدا دے خلاف جان والیاں دی ہمیشاں ہار ہوندی اے۔
3. مشکلاں دے باوجود داؤد نے کیہو جیہا محسوس کیتا؟
3 داؤد نُوں کسے عہدے دا لالچ نئیں سی۔ اوہنے آپ اِسرائیل دا بادشاہ بنن دا فیصلہ نئیں کیتا سی سگوں یہوواہ نے اوہنوں ایس ذمےداری لئی چُنیا سی۔ (1-سموئیل 16:1، 12، 13) ساؤل داؤد توں اینی نفرت کردا سی کہ اوہ اوہنوں اپنا جانی دُشمن سمجھن لگ پیا۔ پر داؤد نُوں جیہڑے خطریاں دا سامنا کرنا پیا اوہناں دا اِلزام اوہنے یہوواہ نُوں نئیں دِتا۔ اوہنے ایہہ شکایت وی نئیں کیتی کہ اوہنوں کھان پین دی کمی ہو رہی اے تے پناہ لین لئی اِک غار چ چھپنا پے رہیا اے۔ ایہدی بجائے شاید اوسے غار چ داؤد نے یہوواہ دی وڈیائی لئی اِک خوبصورت گیت لکھیا۔ ایس مضمون دی مرکزی ایت اوسے گیت چوں لئی گئی اے جِتھے لکھیا اے: یہوواہ کولوں رہنمائی منگن والیاں نُوں کسے چنگی چیز دی کمی نئیں ہوئے گی۔—زبور 34:10۔
4. اَسی کیہڑے سوالاں تے غور کراں گے تے کیوں؟
4 اَج وی یہوواہ دے بوہت سارے بندیاں نُوں کھان پین تے ہور ضرورت دِیاں چیزاں دی کمی ہوندی اے۔ * خاص کر کہ کورونا وائرس دی وجہ توں بوہت سارے بھین بھراواں نُوں ایس طرحاں دے حالاتاں دا سامنا ہویا اے تے جیویں جیویں وڈی مصیبت نیڑے آ رہی اے حالات ہور وی وگڑدے جان گے۔ (متی 24:21) ایس لئی آؤ اَسی ایہناں چار سوالاں دے جواباں تے غور کرئیے: داؤد نے ایہہ کیوں کہیا کہ اوہنوں کسے چنگی چیز دی کمی نئیں سی؟ سانوں اوہناں چیزاں توں کیوں راضی رہنا چاہی دا اے جیہڑیاں ساڈے کول ہے نیں؟ اَسی کیوں بھروسا رکھ سکنے آں کہ یہوواہ ساڈی دیکھبھال کرے گا؟ تے اَسی آن والیاں مشکلاں لئی اپنے آپ نُوں کیویں تیار کر سکنے آں؟
مینوں کمی نہ ہوئے گی
5، 6. زبور 23 تے غور کر کے سانوں داؤد دی ایہہ گل سمجھن چ مدد کیویں مِلدی اے کہ خدا دے بندیاں نُوں” کسے چنگی چیز دی کمی نئیں ہوئی گی“؟
5 داؤد دی ایس گل دا کیہہ مطلب سی کہ یہوواہ دے بندیاں نُوں کسے چیز دی کمی نئیں ہوئے گی؟ ایہدا جواب سانوں زبور 23 توں مِل سکدا اے۔ ایس زبور چ داؤد نے ایہدے نا ل مِلدی جلدی گل کہی۔ (زبور 23:1-6 نُوں پڑھو۔) ایس زبور دے شروع چ داؤد نے کہیا: ”یہوواہ میرا چرواہا اے۔ مینوں کمی نہ ہوئے گی۔“ فیر اوہنے دَسیا کہ کیہڑی گل اوہدے لئی سب توں زیادہ اہمیت رکھدی اے۔ اوہ یہوواہ نُوں اپنا چرواہا من دا سی جدی وجہ توں اوہنوں بےشمار برکتاں ملیاں۔ یہوواہ نے صداقت یعنی نیکی دِیاں راہواں تے چلن چ داؤد دی مدد کیتی۔ نالے چنگے تے بُرے وقت چ ہمیشاں اوہدا ساتھ دِتا۔ پر داؤد نُوں ایہہ وی پتہ سی کہ یہوواہ دے ہرے ہرے میداناں چ بیٹھن دا مطلب ایہہ نئیں کہ اوہدی زندگی چ کوئی مشکل نئیں آئے گی۔ اوہ جان دا سی کہ کدی کدی اوہ بےحوصلہ ہو جائے گا تے اوہنوں لگے گا کہ اوہ موت دے سائے دی وادی چوں لنگھ رہیا اے۔ نالے اوہنوں دُشمناں دا سامنا وی کرنا پووے گا۔ پر اوہنوں کسے مصیبت توں ڈر نئیں سی کیونکہ اوہدا چرواہا یہوواہ اوہدے نال سی۔
6 ایس زبور توں سانوں ایس سوال دا جواب مِل گیا اے کہ داؤد نے ایہہ کیوں کہیا کہ اوہنوں کسے چنگی چیز دی کمی نئیں سی۔ اوہدا مطلب سی کہ اوہدے کول اوہ سب کجھ سی جدی یہوواہ دے قریب رہن لئی اوہنوں ضرورت سی۔ داؤد نُوں چیزاں توں نئیں سگوں یہوواہ نال اوہدی دوستی توں سب توں زیادہ خوشی مِلی۔ نالے اوہ اوہناں چیزاں توں خوش سی جیہڑیاں یہوواہ نے اوہنوں دِتیاں سن۔ داؤد لئی سب توں اہم ایہہ سی کہ یہوواہ اوہنوں برکتاں دے رہیا اے تے اوہدی حفاظت کر رہیا اے۔
7. لُوقا 21:20-24 دے مطابق یہودیہ چ رہن والے مسیحیاں نُوں کیہڑیاں مشکلاں دا سامنا کرن پیا؟
7 داؤد دِیاں گلاں توں پتہ چلدا اے کہ پیسے تے چیزاں بارے صحی سوچ رکھنا کِنّاں ضروری اے۔ ایہہ سچ اے کہ پیسے تے چیزاں توں سانوں کسے حد تک خوشی مِل سکدی اے پر سانوں ایہناں نُوں سب توں زیادہ اہمیت نئیں دینی چاہی دی۔ ایہہ خاص سچائی پہلی صدی چ یہودیہ دے مسیحی چنگی طرحاں سمجھ گئے۔ (لُوقا 21:20-24 نُوں پڑھو۔) یسوع مسیح نے اوہناں نُوں پہلاں ای خبردار کیتا سی کہ اِک وقت آئے گا جدوں فوجاں یروشلیم نُوں گھیر لین گیاں۔ نالے اوہنے کہیا کہ جدوں اوہ ایہہ ویکھن تے اپنی جان بچان لئی اوہ پہاڑاں وَل بھج جان۔ پر ایہدے لئی اوہناں نُوں بوہت کجھ قربان کرن پینا سی۔ اوس وقت بارے اِک ”مینارِنگہبانی“ چ ایہہ دَسیا گیا سی: اوہناں مسیحیاں نے اپنے گھر بار تے کھیت چھڈ دِتے۔ ایتھوں تک کہ اوہناں نے اپنے گھراں وچوں اپنا سامان وی نئیں لیا۔ اوہناں نُوں پورا بھروسا سی کہ یہوواہ اوہناں دی مدد تے حفاظت ضرور کرے گا۔ اوہناں نے یہوواہ دی عبادت نُوں سب توں زیادہ اہمیت دِتی، نہ کے اوہناں چیزاں نُوں جنہاں نُوں لوک اہم سمجھدے نیں۔
8. اَسی پہلی صدی دے مسیحیاں توں کیہڑی ضروری گل سکھ سکنے آں؟
8 اوسے ”مینارِنگہبانی“ چ دَسیا گیا سی کہ اَسی اوہناں مسیحیاں توں ایہہ سکھ سکنے آں: مستقبل چ شاید ساڈے تے ایہو جہیاں مشکلاں آن گیاں جنہاں توں ظاہر ہوئے گا کہ ساڈے لئی سب توں ضروری کیہہ اے۔ ساڈیاں چیزاں تے پیسے؟ یاں یہوواہ وَلّوں مِلن والی نجات؟ وڈی مصیبت دے دوران شاید سانوں قربانیاں دینیاں پین گیاں تے کئی چیزاں دی کمی برداشت کرنی پئے گی۔ یہودیہ چ پہلی صدی عیسوی دے مسیحیاں وانگوں اوہدوں سانوں اپنی جان بچان لئی کوئی وی قدم چکن لئی تیار رہنا پووے گا۔ *
9. عبرانیوں 13:5، 6 چ پولس دی ہدیت توں توانوں کیہہ حوصلہ مِلدا اے؟
9 ذرا سوچو کہ اوہناں مسیحیاں لئی اپنا گھر بار چھڈنا تے نویں سِرے توں زندگی شروع کرنا کِنّاں مشکل رہیا ہوئے گا۔ اوہناں نُوں پورا یقین رکھن دی لوڑ سی کہ یہوواہ اوہناں دِیاں ضرورتاں نُوں پورا کرے گا۔ کیہڑی گل نے اوہناں دا ایمان مضبوط کیتا؟ رومی فوج دے یروشلیم نُوں گھیرن توں پنج سال پہلاں پولس نے عبرانی مسیحیاں نُوں ایہہ فائدےمند ہدیت دِتی : تواڈی زندگی توں ظاہر ہووے کہ توانوں پیسے نال پیار نئیں اے سگوں تُسی اوہناں چیزاں توں راضی او جیہڑیاں تواڈے کول نیں۔ کیونکہ اوہنے کہیا اے کہ میں تینوں کدی نئیں چھڈاں گا۔ میں تینوں کدی رد نئیں کراں گا۔ ایس لئی اَسی پورے اعتماد نال کہہ سکنے آں کہ یہوواہ میرا مددگار اے۔ میں نئیں ڈراں گا۔ انسان میرا کیہہ وگاڑ سکدا اے؟ (عبرانیوں 13:5، 6) جنہاں مسیحیاں نے رومی فوج دے حملے توں پہلاں پولس دی ایس ہدیت تے عمل کیتا اوہناں لئی کسے نوِیں جگہ تے جا کے رہنا یاں تھوڑیاں چیزاں تے گزارہ کرنا ایناں مشکل نئیں رہیا ہوئے گا۔اوہناں نُوں پورا بھروسا سی کہ یہوواہ اوہناں دِیاں بنیادی ضرورتاں نُوں پورا کرے گا۔ اوہناں مسیحیاں وانگوں پولس دی گل توں سانوں وی ایہہ حوصلہ مِلدا اے کہ یہوواہ ساڈی وی ہر ضرورت پوری کرے گا۔
اَسی ایہناں چیزاں توں راضی رہواں گے
10. پولس دی خوشی دا راز کیہہ سی؟
10 پولس نے تیمُتھیُس نُوں وی اوہی ہدیت دِتی جیہڑی اوہنے عبرانی مسیحیاں نُوں دِتی سی۔ اوہنے کہیا: ایس لئی جے ساڈے کول روٹی تے کپڑے ہے نیں تے اَسی ایہناں چیزاں توں راضی رہواں گے۔ (1-تیمُتھیُس 6:8) سانوں وی ایس گل تے عمل کرنا چاہی دا اے۔ کیہہ پولس ایہہ کہہ رہیا سی کہ اَسی چنگا کھانا نئیں کھا سکدے، اِک سوہنے گھر چ نئیں رہ سکدے یاں فیر کدی کدی نویں کپڑے نئیں خرید سکدے؟ نئیں۔ اصل چ اوہ کہہ رہیا سی کہ سانوں اوہناں چیزاں توں راضی یعنی خوش رہنا چاہی دا اے جیہڑیاں ساڈے کول ہے نیں۔ (فِلپّیوں 4:12) ایہہ ای پولس دی خوشی دا راز سی۔ ایہدے توں اَسی سکھنے آں کہ ساڈے لئی سب توں زیادہ قیمتی یہوواہ نال ساڈی دوستی اے نہ کہ ساڈا پیسہ یاں چیزاں۔—حبقوق 3:17، 18۔
اِسرائیلیاں نُوں ویرانے چ 40 سالاں دے دوران کسے چنگی چیز دی کمی نئیں ہوئی۔ کیہہ اَسی اوہناں چیزاں توں راضی آں جیہڑیاں ہُن ساڈے کول نیں؟ (پیراگراف نمبر 11 نُوں ویکھو۔) *
11. موسیٰ نے اِسرائیلیاں نُوں جو کہیا اوہدے توں اَسی کیہہ سکھنے آں؟
11 ہو سکدا اے کہ جیہڑیاں چیزاں ساڈی نظر چ بوہت ضروری ہون، یہوواہ دا اوہناں بارے فرق نظریہ ہووے۔ غور کرو کہ موسیٰ نے اِسرائیلیاں نُوں کیہہ کہیا جدوں اوہناں نُوں ویرانے چ رہندے 40 سال ہو گئے سن۔ اوہنے کہیا: یہوواہ تیرا خدا تیرے ہتھ دی کمائی چ برکت دیندا رہیا تے اوہ ایس وڈے ویرانے چ تیرے سفر بارے سب کجھ جان دا اے۔ ایہناں 40 سالاں دوران یہوواہ تیرا خدا ہمیشاں تیرے نال رہیا تے تینوں کسے چیز دی کمی نئیں ہوئی۔ (اِستثنا 2:7) اوہناں 40 سالاں دوران یہوواہ نے اِسرائیلیاں نُوں کھان لئی من دِتا تے جیہڑے کپڑیاں چ اوہ مصر توں نکلے سن اوہ کدی نئیں پھٹے۔ (اِستثنا 8:3، 4) شاید کجھ اِسرائیلیاں نُوں لگیا ہوئے کہ ایہہ چیزاں اوہناں لئی کافی نئیں۔ پر موسیٰ نے اوہناں نُوں دَسیا کہ یہوواہ نے اوہناں نُوں اوہ سب کجھ دِتا جدی اوہناں نُوں ضرورت سی۔ جے اَسی اوہناں چیزاں توں راضی رہنا سکھاں گے جیہڑیاں ساڈے کول ہے نیں تے یہوواہ ساڈے توں خوش ہوئے گا۔ اوہ چاہندا اے کہ اَسی اوہدے وَلّوں ہر چھوٹی توں چھوٹی چیز لئی شکرگزار ہوئیے تے اوہنوں اِک تحفہ سمجھئے۔
بھروسا رکھو کہ یہوواہ تواڈی دیکھبھال کرے گا
12. سانوں کیویں پتہ اے کہ داؤد اپنے تے نئیں سگوں یہوواہ تے بھروسا رکھدا سی؟
12 داؤد جان دا سی کہ یہوواہ وفادار خدا اے تے اوہناں دا بڑا خیال رکھدا اے جیہڑے اوہدے نال محبت کر دے نیں۔ بھانویں کہ جدوں داؤد نے زبور 34 لکھیا اوہدی جان خطرے چ سی پر فیر وی اوہنے ایمان دِیاں اَکھاں نال ویکھیا کہ یہوواہ دے فرشتے نے اوہدے آلے دوالے خیمہ لایا ہویا اے۔ (زبور 34:7) شاید داؤد کہہ رہیا سی کہ یہوواہ دا فرشتہ اِک فوجی وانگوں اے جنہے میدان چ خیمہ لایا ہویا اے تے جیہڑا ہر وقت دُشمناں تو ں چوکس رہندا اے۔بھانویں داؤد آپ اِک دلیر فوجی سی تے یہوواہ نے اوہدے نال وعدہ کیتا سی کہ اوہ اوہنوں بادشاہ بنائے گا پر فیر وی دُشمن نُوں ہران لئی داؤد نے اپنی صلاحیت تے بھروسا نئیں کیتا کہ اوہ فلاخن تے تلوار چلان چ بڑا ماہر اے۔ (1-سموئیل 16:13؛ 24:12) ایہدی بجائے اوہنوں یہوواہ تے پورا بھروسا سی کیونکہ اوہنوں پورا یقین سی کہ یہوواہ دا فرشتہ اوہناں نُوں بچاندا اے جیہڑے یہوواہ توں ڈردے نیں۔ اَج اَسی ایہہ امید نئیں رکھدے کہ یہوواہ ساڈی حفاظت کرن لئی کوئی معجزہ کرے۔ پر سانوں پورا بھروسا اے کہ بھانویں اَسی مر وی جائیے فیر وی یہوواہ سانوں ہمیشاں دی زندگی دے سکدا اے۔
وڈی مصیبت دوران شاید ماجوج دے جوج دِیاں فوجاں ساڈے گھراں چ آ کے ساڈے تے حملہ کرن۔ پر سانوں ایس گل توں تسلی مِلدی اے کہ یسوع تے اوہدے فرشتے ایہہ ویکھ رہے ہون گے تے اوہ ساڈی خاطر لڑن گے۔ (پیراگراف نمبر 13 نُوں ویکھو۔)
13. جدوں ماجوج دا جوج ساڈے تے حملہ کرے گا تے اَسی اوہنوں کمزور کیوں لگاں گے؟ پر سانوں ڈرن دی ضرورت کیوں نئیں ہوئے گی؟ (پہلے صفحے دی تصویر نُوں ویکھو۔)
13 بوہت چھیتی ساڈا ایہہ بھروسا پرکھیا جائے گا کہ یہوواہ سانوں بچان دی طاقت رکھدا اے یاں نئیں۔ جدوں ماجوج دا جوج یعنی قوماں دا اِک گروہ مِل کے یہوواہ دے بندیاں تے حملہ کرے گا تے شاید لگے کہ دُشمن سانوں ختم کر دین گے۔اوس ویلے سانوں پورا بھروسا رکھنا ہوئے گا کہ یہوواہ سانوں نجات دین دی طاقت رکھدا اے تے اوہ سانوں بچائے گا وی۔ قوماں نُوں لگے گا کہ اَسی اوہناں بھیڈاں وانگوں آں جنہاں نُوں اوہناں دے ہتھوں کوئی نئیں بچا سکدا۔ (حِزقیایل 38:10-12) اوہناں نُوں اِنج ایس لئی لگے گا کیونکہ نہ تے ساڈے کول کوئی ہتھیار ہون گے تے نہ ای سانوں لڑن دی تربیت مِلی اے۔ ایس لئی اوہ سوچن گیاں کہ اوہ اسانی نال سانوں پیراں تھلے رول سکدیاں نیں۔ پر اوس وقت اَسی اپنے ایمان دِیاں اَکھاں نال ویکھاں گے کہ یہوواہ دے فرشتیاں نے ساڈے آلے دوالے خیمہ لایا ہویا اے تے او ہ سانوں بچان لئی تیار نیں۔ قوماں اوہناں نُوں نئیں ویکھ پان گیاں کیونکہ اوہ یہوواہ تے ایمان نئیں رکھدیاں۔ ذرا سوچو کہ ایہہ ویکھ کے اوہناں دے ہوش اُڈ جان گے کہ یہوواہ دِیاں اسمانی فوجاں ساڈے لئی اوہناں دے خلاف لڑ رہیاں نیں۔—مکاشفہ 19:11، 14، 15۔
ہُن توں اپنے آپ نُوں مستقبل لئی تیار کرو
14. اَسی آن والیاں مشکلاں لئی اپنے آپ نُوں ہُن کیویں تیار کر سکنے آں؟
14 اَسی ہُن توں ای اپنے آپ نُوں آن والے وقت لئی کیویں تیار کر سکنے آں؟ سب توں پہلاں سانوں پیسے تے اپنیاں چیزاں بارے صحی سوچ رکھن دی ضرورت اے۔ سانوں یاد رکھنا چاہی دا اے کہ اِک دن سانوں ایہہ چیزاں پچھے چھڈنیاں پین گیاں۔ ایہدے علاوہ سانوں اوہناں چیزاں توں راضی رہنا چاہی دا اے جیہڑیاں ساڈے کول ہے نیں تے یہوواہ نال دوستی ساڈی خوشی دی سب توں وڈی وجہ ہونی چاہی دی اے۔اَسی اپنے خدا یہوواہ نُوں جنہاں زیادہ جاناں گے، اوہناں ای زیادہ ساڈا یقین مضبوط ہوئے گا کہ اوہ سانوں ماجوج دے جوج توں بچان دی طاقت رکھدا اے۔
15. داؤد نُوں ایہہ یقین کیوں سی کہ یہوواہ ہمیشاں اوہدی مدد کرے گا؟
15 آؤ ویکھیے کہ ہور کیہڑی چیز نے مشکلاں برداشت کرن چ داؤد دی مدد کیتی۔ ایہی چیز سانوں وی آن والیاں مشکلاں برداشت کرن دے قابل بنا سکدی اے۔ داؤد نے کہیا: ازما کے ویکھو کہ یہوواہ کِنّاں مہربان اے۔ خوش اے اوہ بندہ جیہڑا یہوواہ تے بھروسا کردا اے۔ (زبور 34:8) ایس گل توں پتہ چلدا اے کہ داؤد نُوں یہوواہ تے ایناں بھروسا کیوں سی کہ یہوواہ ہر حال چ اوہدی مدد کرے گا۔ داؤد نے کئی وار یہوواہ تے بھروسا ظاہر کیتا تے یہوواہ نے کدی وی اوہنوں مایوس نئیں کیتا۔ جدوں داؤد چھوٹا سی تے اوہ جولیت نال لڑیا جیہڑا اِک بڑا اُچا لماں تے طاقتور فوجی سی۔ داؤد نے جولیت نُوں کہیا: اَج ای یہوواہ تینوں میرے ہتھ چ کر دَوے گا۔ (1-سموئیل 17:46) بعد وچ جدوں داؤد بادشاہ ساؤل دی خدمت کردا سی تے ساؤل نے کئی وار اوہنوں جانوں مارن دی کوشش کیتی۔ پر یہوواہ داؤد دے نال سی۔ (1-سموئیل 18:12) داؤد نے کئی موقعیاں تے یہوواہ دی مدد دا تجربہ کیتا، ایس لئی اوہ جان دا سی کہ اوہ ہُن جیہڑیاں مشکلاں دا سامنا کر رہیا اے یہوواہ اوہناں چ وی اوہدی مدد کرے گا۔
16. اَسی کیویں ازما کے ویکھ سکنے آں کہ یہوواہ مہربان اے؟
16 جِنّاں زیادہ اَسی ہُن یہوواہ دی رہنمائی تے بھروسا کراں گے، اوناں ای زیادہ ساڈا یقین مضبوط ہوئے گا کہ مستقبل چ یہوواہ سانوں بچائے گا۔ شاید کنونشن تے جان لئی سانوں کم توں چھٹی لینی پووے یاں فیر اپنے کم چ کوئی تبدیلی کرن لئی اپنے باس نال گل کرنی پووے تاکہ اَسی ساریاں عبادتاں تے جا سکئے یاں مُنادی چ حصہ لے سکئے۔ اِنج کرن لئی سانوں یہوواہ تے مضبوط ایمان رکھن دی ضرورت اے۔ پر فرض کرو کہ ساڈا باس ساڈی گل نئیں من دا تے سانوں کم توں کڈھ دیندا اے۔ کیہہ اَسی اوہدوں وی یہوواہ تے بھروسا رکھاں گے کہ اوہ سانوں کدی وی کلّا نئیں چھڈے گا؟ تے ساڈیاں بنیادی ضرورتاں نُوں پورا کرے گا؟ (عبرانیوں 13:5) کلوقتی خدمت کرن والے بوہت سارے بھین بھرا اپنے تجربیاں توں دَس سکدے نیں کہ یہوواہ نے اوہدوں اوہناں دی کیویں مدد کیتی جدوں اوہناں نُوں مدد دی سخت ضرورت سی۔ یہوواہ واقعی وفادار خدا اے۔
17. 2022 دی سالانہ ایت کیہہ اے تے ایہنوں کیوں چنیا گیا اے؟
17 یہوواہ ساڈے نال اے، ایس لئی سانوں مستقبل توں ڈرن دی کوئی ضرورت نئیں۔ جے اَسی خدا دی بادشاہی نُوں اپنی زندگی چ سب توں زیادہ اہمیت دیندے رہواں گے تے اوہ سانوں کدی وی کلّا نئیں چھڈے گا۔ ایہہ بوہت ضروری اے کہ اَسی ہُن توں آن والیاں مشکلاں لئی اپنے آپ نُوں تیار کرئیے تے پورا بھروسا رکھئے کہ یہوواہ سانوں کدی کلّا نئیں چھڈے گا۔ ایس لئی گورننگ باڈی نے 2022 دی سالانہ ایت لئی زبور 34:10 نُوں چنیا اے، جِتھے لکھیا اے: یہوواہ کولوں رہنمائی منگن والیاں نُوں کسے چنگی چیز دی کمی نئیں ہوئے گی۔
گیت نمبر 38: وہ توانوں تگڑا کرے گا
^ 2022 دی سالانہ ایت زبور 34:10 توں لئی گئی اے جِتھے لکھیا اے: یہوواہ کولوں رہنمائی منگن والیاں نُوں کسے چنگی چیز دی کمی نئیں ہوئے گی۔ زیادہتر یہوواہ دے گواہواں کول بوہت گھٹ پیسہ تے چیزاں نیں تے فیر اَسی ایہہ کیوں کہہ سکنے آں کہ سانوں کسے چنگی چیز دی کمی نئیں؟ نالے ایس ایت دے مطلب نُوں سمجھن نال اَسی آن والیاں مشکلاں لئی کیویں تیار ہو سکنے آں؟ ایس مضمون چ سانوں ایہناں سوالاں دے جواب مِلن گے۔
^ اُردو زبان چ ”مینارِنگہبانی،“ 15 ستمبر 2014 چ مضمون ”قارئین کے سوال“ نُوں ویکھو۔
^ اُردو زبان چ ”مینارِنگہبانی،“ 1 مئی 1999، صفحہ نمبر 19 نُوں ویکھو۔
^ تصویردی وضاحت: بھانویں کہ داؤد ساؤل توں اپنی جان بچان لئی غار چ لُکیا ہویا سی پر فیر وی اوہ یہوواہ وَلّوں مِلن والیاں چیزاں لئی اوہدا شکرگزار سی۔
^ تصویردی وضاحت: اِسرائیلیاں نُوں مصر دی غلامی توں آزاد کران توں بعد یہوواہ نے اوہناں نُوں کھان لئی من دِتا تے اوہناں دے کپڑیاں نُوں پھٹن نہ دِتا۔
