مطالعے دا مضمون نمبر 1
ایس گل دا یقین رکھو کہ خدا دے کلام دا نچوڑ سچائی اے
2023 دی سالانہ ایت: تیرے کلام دا نچوڑ سچائی اے۔—زبور 119:160۔
گیت نمبر 31: خدا دے نال نال چلو
مضمون تے اِک نظر a
1. اَج بوہت سارے لوک بائبل تے بھروسا کیوں نئیں رکھدے؟
اَج بوہت سارے لوکاں نُوں سمجھ نئیں آندی کہ اوہ کدے تے بھروسا کر سکدے نیں تے کدے تے نئیں۔اوہ سیاستداناں، سائنسداناں تے کاروباری لوکاں دی عزت تے کردے نیں پر اوہ سوچدے نیں کہ کیہہ ایہہ لوک واقعی اوہناں دا بھلا چاہندے نیں؟ ایہدے علاوہ بوہت سارے لوک مسیحی ہون دا دعویٰ کرن والے مذہبی رہنماواں دی عزت نئیں کردے۔ ایس لئی اوہ بائبل تے وی بھروسا نئیں کردے جنہوں منن دا ایہہ مذہبی رہنما دعویٰ کردے نیں۔
2. زبور 119:160 دے مطابق سانوں کیہڑی گل دا یقین اے؟
2 یہوواہ دے سارے بندیاں نُوں ایس گل تے یقین اے کہ اوہ سچائی دا خدا اے تے ہمیشاں اپنے بندیاں دا بھلا چاہندا اے۔ (زبور 31:5؛ یسعیاہ 48:17) اَسی جو کجھ بائبل چ پڑھنے آں، اَسی اوہدے تے بھروسا کر سکنے آں کیونکہ خدا دے کلام دا نچوڑ سچائی اے۔ (زبور 119:160 نُوں پڑھو۔) اَسی وی اوہ گل مناں گے جیہڑی بائبل دے اِک عالم نے کہی۔ اوہنے کہیا: ”ایہہ بالکل نئیں کہیا جا سکدا کہ خدا دی کہی کوئی گل جھوٹھی اے یاں اوہ پوری نئیں ہو سکدی۔ خدا دے بندے اپنے خدا تے بھروسا کردے نیں، ایس لئی اوہ اوہدی کہی ہر گل تے اَکھاں بند کر کے بھروسا کر سکدے نیں۔“
3. ایس مضمون چ اَسی کیہڑیاں گلاں تے غور کراں گے؟
3 اَسی دُوجیاں دی مدد کیویں کر سکنے آں تاکہ اوہ وی خدا دے کلام تے اُنج ای بھروسا رکھن جیویں اَسی رکھنے آں؟ آؤ تِن ایہو جہیاں گلاں تے غور کرنے آں جنہاں توں پتہ چلدا اے کہ اَسی بائبل تے بھروسا کیوں رکھنے آں۔ (1) بائبل چ لکھی کوئی گل بدلی نئیں اے، (2) بائبل چ لکھیاں پیشینگوئیاں پوریاں ہوئیاں نیں تے (3) بائبل دی تلیم توں لوکاں دی زندگی بہتر ہوئی اے۔
کوئی وی بائبل دے پیغام نُوں بدل نئیں سکیا
4. کجھ لوکاں نُوں ایہہ کیوں لگدا اے کہ بائبل بدل گئی اے؟
4 یہوواہ نے اپنے تقریباً 40 بندیاں دے ذریعے بائبل دِیاں کتاباں لکھوائیاں۔ پر اَج ساڈے کول اوہ اصل کتاباں موجود نئیں۔ ساڈے کول بس اوہناں دِیاں کاپیاں نیں۔ ایس لئی کجھ لوکاں نُوں ایس گل تے شک اے کہ اَج ساڈے کول جیہڑی بائبل موجود اے، اوہدے چ اوہی گلاں لکھیاں نیں جیہڑیاں یہوواہ نے اصل چ لکھوائیاں سن۔ اَسی ایس گل تے یقین کیوں رکھ سکنے آں کہ بائبل نئیں بدلی؟
عبرانی صحیفیاں دِیاں کاپیاں تیار کرن والیاں نے بڑے دھیان نال کم کیتا تاکہ ایہناں نُوں تیار کردے ویلے کوئی غلطی نہ ہوئے۔ (پیراگراف نمبر5 نُوں ویکھو۔)
5. عبرانی صحیفیاں دِیاں کاپیاں کیویں بنائیاں گئیاں؟ (پہلے صفحے دی تصویر نُوں ویکھو۔)
5 بائبل چ لکھیاں گلاں نُوں محفوظ رکھن لئی یہوواہ نے اپنے بندیاں نُوں کہیا کہ اوہ ایہدیاں کاپیاں بنان۔ اوہنے بنیاِسرائیل دے بادشاہواں نُوں حکم دِتا کہ اوہ اپنے کول شریعت دِیاں کاپیاں بنا کے رکھن تے اوہنے لوکاں نُوں شریعت دی تلیم دین لئی لاویاں نُوں مقرر کیتا۔ (اِستثنا 17:18؛ 31:24-26؛ نحمیاہ 8:7) جدوں یہودی بابل دی غلامی توں آزاد ہوئے تے کاپیاں بنان والے کجھ ماہراں نے عبرانی صحیفیاں دِیاں بوہت ساریاں کاپیاں بنانیاں شروع کر دِتیاں۔ (عزرا 7:6) اِنج کردے ویلے اوہ دھیان نال کم کردے سن۔ بعد چ جنہاں نے کاپیاں بنائیاں، اوہناں نے لفظاں دے نال نال حرفاں نُوں وی گننا شروع کر دِتا تاکہ اوہ ایس گل دی تسلی کر لین کہ اوہناں نے صحی کاپیاں بنائیاں نیں۔ پر عیبدار ہون دی وجہ توں اوہناں کولوں چھوٹیاں موٹیاں غلطیاں ہو گئیاں۔ کیونکہ ہر کتاب دِیاں بوہت ساریاں کاپیاں بنائیاں گئیاں سن ایس لئی بعد چ ایہناں چوں غلطیاں لبھنا اسان سی۔ پر کیویں؟
6. بائبل دِیاں کتاباں دِیاں جیہڑیاں کاپیاں بنائیاں گئیاں، اوہناں وچوں غلطیاں لبھنا اسان کیوں سی؟
6 نویں زمانے دے عالماں کول بائبل دِیاں کاپیاں چوں غلطیاں لبھن دا بڑا چنگا طریقہ سی۔ ایہدے لئی ذرا اِک مثال تے غور کرو۔ فرض کرو کہ 100 بندیاں نُوں کہیا جاندا اے کہ اوہ ہتھ نال کسے کتاب دِیاں کاپیاں بنان۔ پر اوہناں وچوں اِک بندے توں کاپی بناندے ویلے تھوڑی بوہت غلطی ہو جاندی اے۔ غلطی لبھن دا اِک طریقہ ایہہ وے کہ اَسی اوہدی بنائی کاپی نُوں دُوجیاں کاپیاں نال ملا کے ویکھئے۔ ایسے طرحاں بائبل دِیاں کاپیاں دا آپس چ مقابلہ کر کے عالم ایہہ ویکھ پاندے سن کہ کاپی تیار کرن والے کسے بندے توں کیہڑی غلطی ہوئی اے۔
7. اَسی کیوں کہہ سکنے آں کہ بائبل دِیاں بالکل صحی صحی کاپیاں بنائیاں گئیاں سن؟
7 بائبل دِیاں کاپیاں تیار کرن والیاں نے بڑی سخت محنت کیتی تاکہ ایہدیاں صحی صحی کاپیاں تیار ہون۔ ایہدے ثبوت لئی اِک مثال تے غور کرو۔ ایس ویلے عبرانی صحیفیاں دی جیہڑی سب توں پرانی کاپی موجود اے، اوہ 1008 یاں 1009 عیسوی چ تیار کیتی گئی سی۔ اوس کاپی دا ناں لینن گراڈ کوڈیکس اے۔ کجھ چِر پہلاں ای بائبل دِیاں کجھ کاپیاں یاں ایہناں کاپیاں دے کجھ حصے ملے نیں جیہڑے لینن گراڈ کوڈیکس توں وی تقریباً 1000 سال پرانے نیں۔ کجھ لوک شاید سوچن کہ 1000 سال دے دوران تے بائبل دِیاں بوہت ساریاں کاپیاں تے فیر ایہناں کاپیاں توں ہور کاپیاں تیار کیتیاں گئیاں ہون گیاں۔ ایس لئی لینن گراڈ کوڈیکس چ جو کجھ لکھیا اے، شاید اوہ اوہناں کاپیاں چ لکھیاں گلاں توں بالکل فرق ہوئے جیہڑیاں پہلے تیار کیتیاں گئیاں سن۔ جدوں عالماں نے لینن گراڈ کوڈیکس دا مقابلہ 1000 سال پرانیاں کاپیاں نال کیتا تے اوہناں نُوں پتہ چلیا کہ اوہناں چ بس لفظاں دا تھوڑا بوہت فرق اے پر مطلب اِک ای اے۔
8. یونانی صحیفیاں دِیاں کاپیاں چ تے پرانے زمانے دِیاں دُوجیاں کتاباں دِیاں کاپیاں چ کیہہ فرق اے؟
8 جیویں عبرانی صحیفیاں دِیاں کاپیاں تیار کیتیاں گئیاں سن، اوسے طرحاں پہلی صدی دے مسیحیاں نے یونانی صحیفیاں دِیاں کاپیاں وی تیار کیتیاں۔ اوہناں نے بڑے دھیان نال یونانی صحیفیاں دِیاں 27 کتاباں دِیاں کاپیاں تیار کیتیاں جنہاں نُوں اوہ اپنیاں عبادتاں چ تے مُنادی کردے ویلے استمال کردے سن۔ پہلی صدی چ یونانی صحیفیاں دِیاں جیہڑیاں کاپیاں تیار کیتیاں گئیاں تے اوسے زمانے چ جیہڑیاں ہور کتاباں لکھیاں گئیاں، اوہناں دا مقابلہ کرن دے بعد اِک عالم نے کہیا: ”اوس زمانے دِیاں دُوجیاں کتاباں دے مقابلے چ یونانی صحیفیاں دِیاں زیادہ کاپیاں موجود نیں۔ تے دُوجیاں کتاباں دے مقابلے چ ایہدیاں کاپیاں دے زیادہتر حصے موجود نیں۔“ یونانی صحیفیاں تے تبصرہ کرن والی اِک کتاب چ لکھیا اے: ”اَسی ایس گل دا یقین رکھ سکنے آں کہ اَسی اَج یونانی صحیفیاں دے ترجمے چ جو کجھ پڑھنے آں، اوہ اوہی گلاں نیں جو اصل چ لکھیاں گئیاں سن۔“
9. یسعیاہ 40:8 دے مطابق بائبل دے پیغام بارے کیہڑی گل بالکل صحی اے؟
9 خدا دے کلام دِیاں کاپیاں تیار کرن والیاں نے اپنی ذمےداری نُوں بڑی محنت نال پورا کیتا تے اوہناں دی ایس سخت محنت دی وجہ توں بائبل دے پیغام چ کوئی تبدیلی نئیں ہوئی۔ b ایہدے چ کوئی شک نئیں کہ اصل چ یہوواہ نے ای انساناں لئی اپنے پیغام نُوں اوہدی اصلی حالت چ محفوظ رکھیا اے۔ (یسعیاہ 40:8 نُوں پڑھو۔) پر ایہدے باوجود ہو سکدا اے کہ کجھ لوک کہن کہ ایہہ گل تے صحی اے کہ بائبل دا پیغام اپنی اصلی حالت چ محفوظ اے۔ پر ایہدا مطلب ایہہ نئیں اے کہ ایہہ خدا وَلّوں اے۔ ایس لئی آؤ کجھ ثبوتاں تے غور کرنے آں جنہاں توں پتہ چلدا اے کہ بائبل واقعی خدا وَلّوں اے۔
بائبل دِیاں پیشینگوئیاں تے بھروسا کیتا جا سکدا اے
Right: C. Sappa/DeAgostini/Getty Images; left: Image © Homo Cosmicos/Shutterstock
بائبل دِیاں پیشینگوئیاں ماضی چ وی پوریاں ہوئیاں تے اَج وی پوریاں ہو رہیاں نیں۔ (پیراگراف نمبر 10، 11 نُوں ویکھو۔) d
10. کوئی ایہو جہی پیشینگوئی دَسو جدے پورا ہون توں ثابت ہوندا اے کہ 2-پطرس 1:21 چ لکھی گل بالکل سچ اے؟ (تصویراں نُوں ویکھو۔)
10 بائبل چ بوہت ساریاں ایہو جہیاں پیشینگوئیاں لکھیاں نیں جیہڑیاں پوریاں ہوئیاں۔ ایہناں وچوں کجھ تے ایہناں دے لکھے جان دے کئی سو سال بعد پوریاں ہوئیاں۔ تریخ توں ثابت ہوندا اے کہ ایہہ پیشینگوئیاں سچ مچ پوریاں ہوئیاں سن۔ ایہناں پیشینگوئیاں دا پورا ہونا کوئی حیرانی دی گل نئیں اے کیونکہ ایہناں نُوں لکھوان والا یہوواہ اے۔ (2-پطرس 1:21 نُوں پڑھو۔) ذرا شہر بابل دی تباہی تے غور کرو۔ ایہہ پیشینگوئی اٹھویں صدی قبل از مسیح چ یسعیاہ نبی نے خدا وَلّوں کیتی سی۔ اِک زمانے چ بابل بڑا ای طاقتور شہر ہوندا سی۔ پر یسعیاہ نبی نے دَسیا کہ دُشمن ایس شہر تے قبضہ کر لین گے۔ اوہنے تے ایہہ وی دَسیا سی کہ ایس شہر نُوں فتح کرن والے دا ناں خورس ہوئے گا تے اوہ کیویں ایس شہر نُوں فتح کرے گا۔ (یسعیاہ 44:27–45:2) یسعیاہ نبی نے ایہہ پیشینگوئی وی کیتی سی کہ ایہہ شہر پوری طرحاں تباہ تے ویران ہو جائے گا۔ (یسعیاہ 13:19، 20) تے بالکل اِنج ای ہویا۔ 539 قبل از مسیح چ مادیاں تے فارسیاں نے بابل تے قبضہ کر لیا۔ اوہ شہر جیہڑا کدی بڑا عالیشان ہوندا سی، ہُن ملبے دا ڈھیر اے۔—کتاب ”خوشیاں بھری زندگی پاؤ—ہُن تے ہمیشاں تک“ دے سبق نمبر 3 دے نکتہ نمبر 5 چ ویڈیو ”بابل دی تباہی بارے بائبل دی پیشینگوئی“ نُوں ویکھو۔
11. دانیایل 2:41-43 چ لکھی پیشینگوئی اَج کیویں پوری ہو رہی اے؟
11 بائبل دِیاں پیشینگوئیاں صرف ماضی چ ای نئیں پوریاں ہوئیاں سگوں اَج وی پوریاں ہو رہیاں نیں۔ ذرا دانیایل نبی دی اوس پیشینگوئی تے غور کرو جیہڑی اوہنے عالمی طاقت امریکہ تے برطانیہ بارے کیتی سی۔ (دانیایل 2:41-43 نُوں پڑھو۔) ایس پیشینگوئی چ دانیایل نے دَسیا سی کہ ایہہ حکومت لوھے وانگوں کجھ مضبوط تے مٹی وانگوں کجھ کمزور ہوئے گی۔ تے بالکل اِنج ای اے۔ دونویں عالمی جنگاں چ امریکہ تے برطانیہ دی جت نے ایہہ ثابت کیتا اے کہ اوہ لوھے وانگوں مضبوط نیں۔ اوہناں دِیاں فوجاں بوہت طاقتور نیں پر اپنے شہریاں وی وجہ توں ایہہ حکومتاں کمزور وی نیں کیونکہ ایہناں دے شہری اکثر اپنے حق لئی آواز چُک دے نیں،سیاسی تحریکاں چلاندے نیں تے دھرنے دیندے نیں۔ اِک سیاسی ماہر نے دَسیا: ”دُنیا دا کوئی وی ملک سیاسی لحاظ نال ایناں نئیں ونڈیا ہویا جِنّاں کہ امریکہ وَنڈیا ہویا اے۔“ ایس عالمی طاقت دا دُوجا حصہ یعنی برطانیہ وی پچھلے کجھ سالاں توں سیاسی لحاظ نال ونڈیا ہویا اے۔ برطانیہ دے شہری ایس بارے فرق فرق رائے رکھدے نیں کہ برطانیہ نُوں یورپی یونین دے نال کِنج دے سیاسی تعلقات رکھنے چاہی دے نیں۔ ایہناں گلاں دی وجہ توں برطانیہ تے امریکہ اپنی طاقت نُوں پوری طرحاں استمال نئیں کر پاندے۔
12. بائبل چ لکھیاں پیشینگوئیاں دی وجہ توں کیہڑی گل تے ساڈا بھروسا مضبوط ہو جاندا اے؟
12 بائبل دِیاں بوہت ساریاں پیشینگوئیاں پوریاں ہو چُکیاں نیں۔ ایہناں پیشینگوئیاں تے غور کرن نال ایس گل تے ساڈا بھروسا ودھدا اے کہ یہوواہ نے مستقبل بارے جیہڑے وعدے کیتے نیں، اوہ ضرور پورے ہون گے۔ اَسی وی بالکل اُنج ای محسوس کرنے آں جیویں زبور لکھن والے اِک بندے نے کیتا سی۔ اوہنے یہوواہ نُوں کہیا سی: میری جان تیری نجات لئی بےتاب اے کیونکہ مینوں تیرے کلام تے بھروسا اے۔ (زبور 119:81) بائبل دے ذریعے یہوواہ نے سانوں نیک انجام دی امید یعنی چنگے مستقبل دی امید دِتی اے۔ (یرمیاہ 29:11) اَسی انساناں دِیاں کوششاں دی وجہ توں نئیں سگوں یہوواہ دے وعدیاں دی وجہ توں اِک چنگے مستقبل دی امید رکھنے آں۔ ایس لئی بائبل چ لکھیاں پیشینگوئیاں دا گہرائی نال مطالعیا کرن نال خدا دے کلام تے اپنا بھروسا مضبوط کردے جاؤ۔
بائبل دے مشوریاں توں لکھاں لوکاں نُوں فائدہ ہو رہیا اے
13. زبور 119:66، 138 دے مطابق ایس گل دا اِک ہور ثبوت کیہہ اے کہ بائبل تے بھروسا کیتا جا سکدا اے؟
13 بائبل بھروسے دے لائق اے۔ ایہدا اِک ثبوت ایہہ وے کہ جیہڑے لوکاں نے ایہدے چ لکھیاں گلاں تے عمل کیتا، اوہناں نُوں بڑے فائدے ہوئے نیں۔ (زبور 119:66، 138 نُوں پڑھو۔) مثال لئی، کجھ میاں بیوی جیہڑے طلاق لین بارے سوچ رہے سن، ہُن اوہ بائبل چ لکھیاں گلاں تے عمل کرن دی وجہ توں خوشیاں بھری زندگی گزار رہے نیں۔ ایہدے توں اوہناں دے بچیاں نُوں وی بڑا فائدہ ہویا اے کیونکہ اوہ ویکھ سکدے نیں کہ اوہناں دے ماں پیو اوہناں نال پیار کردے نیں تے اوہناں دا خیال رکھ رہے نیں۔—اِفسیوں 5:22-29۔
14. اِک مثال دے کے دَسو کہ بائبل دی تلیم لوکاں نُوں چنگا انسان بنا دیندی اے؟
14 بائبل دی تلیم تے عمل کرن نال خطرناک مُجرم وی چنگے انسان بن جاندے نیں۔ غور کرو کہ بائبل دی تلیم نے اِک قیدی دی مدد کیویں کیتی۔ اوس قیدی دا ناں جیک سی۔ c جیک بڑا ای خطرناک مُجرم سی تے عدالت نے اوہنوں موت دی سزا سنائی سی۔ پر اِک دن جیک وی دُوجے قیدیاں نال بائبل کورس چ بیہہ گیا۔ بائبل کورس کران والا بھرا جیویں ساریاں نال پیش آ رہیا سی، اوہنوں ویکھ کے جیک نُوں بڑا چنگا لگیا تے اوہنے و ی بائبل کورس شروع کر دِتا۔ جدوں جیک نے بائبل دے اصولاں تے عمل کرنا شروع کیتا تے اوہ دُوجیاں نال چنگی طرحاں پیش آنا شروع ہو گیا، ایتھوں تک کہ اوہ اِک چنگا انسان بن گیا۔ اوہنے اپنے آپ نُوں ایناں بدل لیا کہ کجھ چِر بعد اوہ غیر بپتسمہیافتہ مبشر بن گیا تے فیر اوہنے بپتسمہ لے لیا۔ اوہنے بڑے جوش نال دُوجے قیدیاں نُوں خدا دی بادشاہی بارے دَسیا تے اوہناں وچوں چار نُوں تے اوہ بائبل کورس کران لگ پیا۔ جیس دن بھرا جیک نُوں پھانسی ہونی سی، اوس دن تک اوہ بالکل بدل چُکیا سی۔ اوہدی اِک وکیل نے کہیا: ”جیک ہُن اُنج دا نئیں رہیا جنج دا اوہ 20 سال پہلاں ہوندا سی۔ یہوواہ دے گواہواں دی تلیم نے اوہنوں اِک چنگا انسان بنا دِتا اے۔“ بھانویں کہ بھرا جیک نُوں پھانسی ہو گئی پر اوہدی مثال توں ثابت ہوندا اے کہ اَسی خدا دے کلام تے بھروسا کر سکنے آں تے ایہدے چ لوکاں نُوں بدلن دی طاقت اے۔—یسعیاہ 11:6-9۔
بائبل دی تلیم نے فرق فرق پسمنظر دے لوکاں دی زندگی بدل دِتی اے تے اوہناں نُوں اِک چنگا انسان بنا دِتا اے۔ (پیراگراف نمبر 15 نُوں ویکھو۔) e
15. بائبل دے اصولاں تے عمل کرن دی وجہ توں یہوواہ دے بندے دُوجے لوکاں توں فرق کیوں نظر آندے نیں؟ (تصویر نُوں ویکھو۔)
15 بائبل دے اصولاں تے عمل کرن دی وجہ توں یہوواہ دے بندے اِک دُوجے نال رَل مِل کے رہندے نیں۔ (یوحنا 13:35؛ 1-کُرنتھیوں 1:10) ساڈے وچ صلح تے اتحاد صاف نظر آندا اے۔ ایہدی وجہ ایہہ وے کہ دُنیا دے لوک سیاسی رائے،نسلاں تے امیری غریبی دے فرق دی وجہ توں وَنڈے ہوئے نیں۔ یان ناں دا اِک جوان بندہ یہوواہ دے گواہواں دے ایکے نُوں ویکھ کے بڑا متاثر ہویا۔ اوہ افریقہ دے اِک ملک چ جمیا پلیا سی۔ جدوں اوہدے ملک چ خانہجنگی شروع ہوئی تے اوہ فوج چ بھرتی ہو گیا۔ بعد چ اوہ اِک نال دے ملک چ بھج گیا جتھے اوہ یہوواہ دے گواہواں نُوں ملیا۔ یان نے کہیا: ”میں سکھیا اے کہ سچے مذہب نُوں منن والے لوک سیاست چ حصہ نئیں لیندے۔ اوہ رَل مِل کے رہندے نیں تے اِک دُوجے نال محبت کردے نیں۔ میں اپنی زندگی اپنے ملک دے ناں کر دِتی سی پر جدوں میں بائبل دِیاں سچائیاں سکھیاں تے میں اپنی زندگی یہوواہ دے ناں کرن دا فیصلہ کیتا۔“ یان نے اپنے آپ نُوں پوری طرحاں بدل لیا۔ پہلے اوہ اوہناں لوکاں نال لڑدا سی جیہڑے اوہدے توں فرق سن۔ پر ہُن اوہ جنہوں وی مِلدا اے، اوہنوں بائبل توں امن دا پیغام سناندا اے۔ بائبل دی تلیم فرق فرق قوماں دے لوکاں لئی فائدہمند ثابت ہوئی اے۔ ایہہ ایس گل دا ثبوت اے کہ اَسی بائبل تے بھروسا کر سکنے آں۔
خدا دے کلام تے بھروسا کرنا نہ چھڈو
16. ایہہ کیوں ضروری اے کہ اَسی خدا دے کلام تے اپنے بھروسے نُوں مضبوط کریئے؟
16 دُنیا دے حالات بھیڑے توں بھیڑے ہوندے جا رہے نیں۔ ایس لئی خدا دے کلام تے بھروسا کرنا شاید ساڈے لئی مشکل ہو جائے۔ شاید کجھ لوک ساڈے دل چ شک پیدا کرنا شروع کر دین۔ ہوسکدا اے کہ اَسی ایہہ سوچن لگ پئیے کہ پتہ نئیں بائبل چ لکھیاں گلاں سچ وی نیں کہ نئیں؟ یاں کیہہ واقعی یہوواہ نے وفادار تے سمجھدار غلام نُوں ساڈی رہنمائی لئی مقرر کیتا اے؟ پر جے سانوں ایس گل تے پورا یقین ہوئے گا کہ یہوواہ د ی کہی ہر گل ہمیشاں سچ ہوندی اے تے اَسی اپنے دل چ شک پیدا نئیں ہون دواں گے۔ اَسی پکا ارادہ کر لواں گے کہ اَسی ساری زندگی خدا دے حکم مناں گے تے مردے دم تک اِنج کر دے رہواں گے۔ (زبور 119:112) اَسی شرمندگی محسوس کیتے بغیر لوکاں نُوں پاک کلام دی تلیم دواں گے تے اوہناں نُوں دَساں گے کہ اوہ ایس تلیم تے کیویں عمل کر سکدے نیں۔ (زبور 119:46) ایہدے علاوہ اَسی صبر تے خوشی نال مشکلاں نُوں برداشت کر سکاں گے جدے چ اذیت وی شامل اے۔—کُلسّیوں 1:11؛ زبور 119:143، 157۔
17. ساڈی سالانہ ایت کیہڑی گل یاد رکھن چ ساڈی مدد کرے گی؟
17 اَسی یہوواہ دے بڑے شکرگزار آں کہ اوہنے سانوں سچائی سکھن دا موقع دِتا اے۔ ایس دُنیا دے لوک ایہہ نئیں جان دے کہ سانوں زندگی کیویں گزارنی چاہی دی اے۔ پر خدا دے کلام دی سچائی سانوں ڈولن نئیں دیندی۔ نالے ایہہ سانوں سکھاندی اے کہ سانوں اپنی زندگی کیویں گزارنی چاہی دی اے۔ ایہہ سچائی سانوں اِک چنگے مستقبل دی امید دیندی اے تے ایہہ مستقبل سانوں خدا دی بادشاہی دے ذریعے ملے گا۔ 2023 دی سالانہ ایت توں واقعی ایس گل تے ساڈا یقین ودھدا اے کہ خدا دے کلام دا نچوڑ سچائی اے۔—زبور 119:160۔
گیت نمبر 4: یہوواہ میرا چرواہا
a 2023 لئی جیہڑی سالانہ ایت چُنی گئی اے، اوہدے توں ساڈا ایمان مضبوط ہوندا اے۔ ایہہ زبور 119:160 اے، جتھے لکھیا اے: تیرے کلام دا نچوڑ سچائی اے۔ ایہدے چ کوئی شک نئیں کہ تُسی ایس گل تے پکا ایمان رکھدے او۔ پر بوہت سارے لوکاں نُوں بائبل تے یقین نئیں اے تے اوہ ایہہ نئیں من دے کہ بائبل توں سانوں چنگے مشورے مل سکدے نیں۔ ایس مضمون چ اَسی تِن ثبوتاں تے غور کراں گے جنہاں دے ذریعے اَسی ایس گل تے لوکاں نُوں قائل کر سکاں گے کہ اوہ بائبل تے ایہدے چ لکھے مشوریاں تے بھروسا کر سکدے نیں۔
b بائبل دے پیغام دے محفوظ رہن بارے ہور جانن لئی ساڈی ویبسائٹ jw.org تے جاؤ تے لبھو والے خانے چ ”تریخ تے بائبل“ لکھو۔
c ایس مضمون چ کجھ ناں بدل دِتے گئے نیں۔
d تصویر دی وضاحت: خدا نے پہلاں توں ای دَس دِتا سی کہ شہر بابل تباہ ہو جائے گا۔
e تصویر دی وضاحت: اصل واقعے تے بنائی گئی تصویر—اِک جوان بندے نے بائبل توں سکھیا کہ اوہ امن تے صلح نال کیویں رہ سکدا اے۔ ہُن اوہ دوجیاں نال لڑن دی بجائے اوہناں نُوں بائبل توں امن تے صلح نال رہنا سکھا رہیا اے۔
