مطالعے دا مضمون نمبر 5
مسیح دی محبت سانوں مجبور کردی اے
مسیح دی محبت سانوں مجبور کردی اے . . . تاکہ جیہڑے جی رہے نیں اوہ اَگے توں اپنے لئی زندگی نہ گزارن۔—2-کُرنتھیوں 5:14، 15۔
گیت نمبر 13: مسیح دی ودھیا مثال
مضمون تے اِک نظر a
1، 2. (الف) جدوں اَسی زمین تے یسوع دی زندگی تے خدمت تے سوچ وچار کر نے آں تے شاید سانوں کیہہ محسوس ہووے؟ (ب) ایس مضمون چ اَسی کیس بارے گل کراں گے؟
جدوں ساڈا کوئی عزیز فوت ہو جاندا اے تے سانوں اوہدی بڑی یاد آندی اے۔ شروع شروع چ جدوں اَسی سوچنے آں کے اوہدے مرن دے کجھ دن پہلاں کیہہ ہویا سی تے شاید سانوں بوہت دُکھ ہوئے، خاص کر اوہدوں جدوں اوہنے اپنے مرن توں پہلاں بڑی تکلیف سہی ہوندی اے۔ پر بعد چ اَسی اپنے اوس عزیز دِیاں گلاں بارے سوچنے آں کہ اوہ کیویں ساڈا حوصلہ ودھاندا سی، ساڈی مدد کردا سی تے کیویں سانوں ہساندا سی تے اَسی تھوڑے خوش ہو جانے آں۔
2 ایسے طرحاں جدوں اَسی یسوع دی موت بارے سوچنے آں نالے ایس بارے سوچنے آں کہ اوہنے مرن توں پہلاں کِنّی تکلیف سہی سی تے سانوں بڑا دُکھ ہوندا اے۔ یادگیری توں پہلے تے بعد والے ہفتیاں چ اَسی خاص طور تے وقت کڈھ کے ایس بارے سوچ وچار کر نے آں کہ یسوع دی قربانی ساڈے لئی کِنّی اہم اے۔ (1-کُرنتھیوں 11:24، 25) پر جدوں اَسی اوہناں گلاں بارے سوچنے آں جیہڑیاں یسوع نے کہیاں سن تے اوہناں کماں بارے سوچنے آں جیہڑے زمین تے رہندے ہوئے اوہنے کیتے سن تے سانوں بڑی خوشی ہوندی اے۔ سانوں ایہہ سوچ کے وی بڑا حوصلہ مِلدا اے کہ یسوع ہُن ساڈے لئی کیہہ کر رہیا اے تے مستقبل چ کیہہ کجھ کرے گا۔ایہناں گلاں تے یسوع دی محبت تے سوچ وچار کرن نال ساڈا دل کردا اے کہ اَسی اپنے کماں توں اوہدے لئی قدر وکھائیے۔ ایس مضمون چ اَسی ویکھاں گے کہ اَسی اِنج کیویں کر سکنے آں۔
شکرگزاری دی وجہ توں اَسی یسوع دی پیروی کرنے آں
3. اَسی کیہڑیاں گلاں دی وجہ توں یسوع دے فدیے لئی بڑے شکرگزار آں؟
3 جدوں اَسی یسوع دی زندگی تے قربانی بارے سوچنے آں تے ساڈے دل شکرگزاری نال بھر جاندے نیں۔ جدوں یسوع زمین تے سی تے اوہنے لوکاں نُوں دَسیا کہ خدا دی بادشاہی دے ذریعے انساناں نُوں کیہڑیاں برکتاں مِلن گیاں۔ بائبل چ یسوع دے فدیے تے ایہدے ذریعے مِلن والیاں برکتاں بارے جو کجھ دَسیا گیا اے، اَسی اوہدی بڑی قدر کرنے آں۔ اَسی یسوع دی قربانی لئی بڑے شکرگزار آں کیونکہ ایہدے ذریعے اَسی یہوواہ تے یسوع نال دوستی کر سکنے آں۔ جیہڑے لوک یسوع تے ایمان رکھدے نیں، اوہناں کول ہمیشاں تک زندہ رہن دی امید تے اپنے اوہناں عزیزاں نال دُبارہ مِلن دی امید اے جیہڑے فوت ہو گئے نیں۔ (یوحنا 5:28، 29؛ رومیوں 6:23) اَسی ایہو جیہا کوئی کم نئیں کیتا جدی وجہ توں سانوں ایہہ برکتاں مِلن تے نہ ای ایہدے بدلے چ اَسی یہوواہ تے یسوع نُوں کجھ دے سکنے آں۔ (رومیوں 5:8، 20، 21) پر اَسی ایہہ ضرور ثابت کر سکنے آں کہ اَسی اوہناں دے کِنّے شکرگزار آں۔اَسی اِنج کیویں کر سکنے آں؟
مریم مگدلینی دی مثال تے سوچ وچار کرن نال ساڈے دل چ ایہہ خواہش کیویں پیدا ہوندی اے کہ اَسی شکرگزاری وکھائیے؟ (پیراگراف نمبر 4، 5 نُوں ویکھو۔)
4. مریم مگدلینی نے ایہہ کیویں ثابت کیتا کہ یسوع نے اوہدے لئی جو کجھ کیتا سی، اوہ اوہدے لئی بڑی شکرگزار سی؟ (تصویر نُوں ویکھو۔)
4 ذرا اِک یہودی عورت دی مثال تے غور کرو جدا ناں مریم مگدلینی سی۔ اوہ بڑی تکلیف چ سی کیونکہ اوہدے اندر ست بُرے فرشتے سن۔ یقیناً اوہ ایہہ سوچ رہی ہوئے گی کہ اوہدے کول ایس مشکل توں نجات پان دا کوئی رستہ نئیں اے۔ ذرا سوچو کہ جدوں یسوع نے اوہدے چوں ست بُرے فرشتیاں نُوں کڈھ دِتا سی تے اوہ یسوع دی کِنّی شکرگزار ہوئی ہوئے گی۔ ایس شکرگزاری دی وجہ توں اوہ یسوع دی پیروکار بن گئی تے اپنے وقت، طاقت تے پیسے نال یسوع دا ساتھ دیندی رہی۔ (لُوقا 8:1-3) یسوع نے مریم لئی جو کجھ کیتا سی، اوہ اوہدی دلوں قدر کر دی سی۔ پر شاید اوہ حالے تک ایہہ نئیں جاندی سی کہ یسوع اوہدے لئی ہور کیہہ کجھ کرن والا اے۔ یسوع سارے انساناں لئی جان قربان کرن والا سی تاکہ جیہڑا وی اوہدے تے ایمان ظاہر کرے اوہ ہلاک نہ ہوئے سگوں ہمیشاں دی زندگی پائے۔ (یوحنا 3:16) پر مریم فیر وی یسوع لئی شکرگزاری ظاہر کردی رہی تے اوہدی وفادار رہی۔ جدوں یسوع سُولی تے سی تے مریم اوہدے کول کھلوتی رہی کیونکہ اوہنوں یسوع دی فکر سی تے اوہ اوہناں ساریاں نُوں تسلی دینا چاہندی سی جیہڑے اوتھے موجود سن۔ (یوحنا 19:25) جدوں یسوع فوت ہو گیا تے مریم تے دو ہور عورتاں خوشبودار مصالحے لے کے یسوع دی قبر تے گئیاں تاکہ اوہناں نُوں اوہدی لاش تے لا سکن۔ (مرقس 16:1، 2) یہوواہ نے مریم نُوں اوہدی وفاداری دا بوہت وڈا اَجر دِتا۔ یسوع زندہ ہون توں بعد مریم نُوں ملیا تے اوہدے نال گل کیتی۔ ایہہ اعزاز تے بوہت ای گھٹ شاگرداں نُوں ملیا سی۔—یوحنا 20:11-18۔
5. اَسی ایہہ کیویں ثابت کر سکنے آں کہ یہوواہ تے یسوع نے ساڈے لئی جو کجھ کیتا اے، اَسی اوہدے لئی بڑے شکرگزار آں؟
5 اَسی وی ایہہ ثابت کر سکنے آں کہ یہوواہ تے یسوع نے ساڈے لئی جو کجھ کیتا اے، اَسی اوہدے لئی اوہناں دے بڑے شکرگزار آں۔ اِنج کرن لئی اَسی اپنا وقت، طاقت تے پیسہ یہوواہ دی عبادت لئی استمال کر سکنے آں۔ جیویں کہ اَسی یہوواہ دی عبادت چ استمال ہون والیاں عمارتاں نُوں بنان تے اوہناں دی دیکھبھال کرن دے کم چ حصہ لے سکنے آں۔
یہوواہ تے یسوع نال محبت دی وجہ توں اَسی دُوجیاں لئی محبت وکھانے آں
6. اَسی ایہہ کیوں کہہ سکنے آں کہ فدیہ ہر انسان لئی اِک تحفہ اے؟
6 جدوں اَسی ایس گل تے غور کر نے آں کہ یہوواہ تے یسوع سانوں کِنّاں پیار کردے نیں تے ساڈے دل چ ایہہ خواہش پیدا ہوندی اے کہ اَسی وی اوہناں نال پیار کریئے۔ (1-یوحنا 4:10، 19) ساڈے دل چ اوہناں لئی محبت اوہدوں ہور وی ودھ جاندی اے، جدوں اَسی ایہہ سمجھ جانے آں کہ یسوع نے ساڈے وچوں ہر اِک لئی اپنی جان دِتی۔ پولُس رسول وی ایس گل نُوں من دا سی۔ اوہنے ایہدے لئی شکرگزاری ظاہر کردے ہوئے گلتیوں دے ناں خط چ لکھیا: خدا دے پُتر نے مینوں محبت کیتی تے میرے لئی جان دے دِتی۔ (گلتیوں 2:20) فدیے دی وجہ توں یہوواہ سانوں اپنے نیڑے لے آیا اے تاکہ اَسی اوہدے دوست بن سکئے۔ (یوحنا 6:44) کیہہ ایہہ گل تواڈے دل تے گُوڑھا اثر نئیں پاندی کہ یہوواہ نے تواڈے اندر کوئی اچھائی ویکھی اے تے توانوں اپنا دوست بنان لئی اِک وڈی قیمت دِتی اے؟ کیہہ ایس گل دی وجہ توں ساڈے دل چ یہوواہ تے یسوع لئی محبت ہور ودھ نئیں جاندی؟ سانوں اپنے آپ کولوں پچھنا چاہی دا اے: ”یہوواہ تے یسوع دی محبت مینوں کیہہ کرن تے مجبور کردی اے؟“
خدا تے مسیح نال محبت کرن دی وجہ توں ساڈے اندر ایہہ خواہش پیدا ہوندی اے کہ اَسی ہر طرحاں دے لوکاں نُوں بادشاہی دا پیغام سنائیے۔ (پیراگراف نمبر 7 نُوں ویکھو۔)
7. جیویں کہ تصویر چ وکھایا گیا اے، اَسی ایہہ کیویں ثابت کر سکنے آں کہ اَسی یہوواہ تے یسوع نال محبت کر نے آں؟ (2-کُرنتھیوں 5:14، 15؛ 6:1، 2)
7 یہوواہ تے یسوع نال محبت کرن دی وجہ توں ساڈے دل چ ایہہ خواہش پیدا ہوندی اے کہ اَسی دُوجیاں نال وی محبت کریئے۔ (2-کُرنتھیوں 5:14، 15؛ 6:1، 2 نُوں پڑھو۔) یہوواہ تے یسوع مسیح لئی اپنی محبت ظاہر کرن دا اِک طریقہ ایہہ وے کہ اَسی ودھ چڑھ کے مُنادی کریئے۔ اَسی ہر اوس بندے نال گل کرنے آں جنہوں اَسی ملنے آں۔ اَسی ایہہ نئیں سوچدے کہ اوہ کیہڑی نسل یاں قبیلے توں اے،اوہ امیر اے یاں غریب، پڑھیا لکھیا اے یاں اَنپڑھ۔ جدوں اَسی اِنج کرنے آں تے اَسی یہوواہ دی مرضی پوری کر رہے ہنے آں کیونکہ اوہدی ایہی مرضی اے کہ ہر طرحاں دے لوک نجات پان تے سچائی بارے صحی علم حاصل کرن۔—1-تیمُتھیُس 2:4۔
8. اَسی ایہہ کیویں ثابت کر سکنے آں کہ اَسی اپنے بھین بھراواں نال محبت کرنے آں؟
8 خدا تے یسوع مسیح لئی محبت ظاہر کرن دا اِک طریقہ ایہہ وی اے کہ اَسی اپنے بھین بھراواں نال محبت کریئے۔ (1-یوحنا 4:21) اَسی اپنے بھین بھراواں لئی فکر وکھانے آں تے مشکلاں چ اوہناں دی مدد کر نے آں۔ جدوں اوہناں دا کوئی عزیز فوت ہو جاندا اے تے اَسی اوہناں نُوں تسلی دینے آں۔ جدوں اوہ بیمار ہوندے نیں تے اَسی اوہناں دا پتہ کرن جا نے آں تے جدوں اوہ مایوس ہوندے نیں تے اَسی اوہناں دا حوصلہ ودھان دی پوری کوشش کر نے آں۔ (2-کُرنتھیوں 1:3-7؛ 1-تھسلُنیکیوں 5:11، 14) ایہدے علاوہ اَسی اوہناں لئی دُعا کردے رہنے آں کیونکہ اَسی جاننے آں کہ نیک بندے دی اِلتجا دا اثر بڑا زبردست ہوندا اے۔—یعقوب 5:16۔
9. اپنے بھین بھراواں لئی محبت ظاہر کرن دا اِک ہور طریقہ کیہہ اے؟
9 اپنے بھین بھراواں لئی محبت ظاہر کرن دا اِک ہور طریقہ ایہہ وے کہ اَسی اوہناں نال صلح صفائی نال رہن دی پوری کوشش کریئے۔ اَسی یہوواہ وانگوں دُوجیاں نُوں معاف کرن دی کوشش کرنے آں۔ جے یہوواہ نے ساڈے گُناہواں لئی اپنے پُتر نُوں مرن دِتا تے کیہہ ایہہ ضروری نئیں کہ جدوں دُوجے ساڈے خلاف گُناہ کردے نیں تے اَسی وی اوہناں نُوں معاف کر دئیے؟ اَسی اوس گھٹیا غلام وانگوں نئیں بننا چاہندے جدا ذکر یسوع نے اِک مثال چ کیتا سی۔اوہدے مالک نے اوہدا بوہت وڈا قرضہ معاف کر دِتا سی پر اوہنے دُوجے غلام دا چھوٹا جیہا قرضہ وی معاف نئیں کیتا۔ (متی 18:23-35) جے کلیسیا چ تواڈی کسے نال اَن بن ہو جاندی اے تے کیہہ تُسی یادگیری توں پہلاں اوہدے نال صلح کرن چ پہل کر سکدے او؟ (متی 5:23، 24) اِنج کرن نال تُسی ظاہر کرو گے کہ تُسی یہوواہ تے یسوع نال گُوڑھی محبت کردے او۔
10، 11. کلیسیا دے بزرگ یہوواہ تے یسوع لئی محبت کیویں ظاہر کر سکدے نیں؟ (1-پطرس 5:1، 2)
10 کلیسیا دے بزرگ یہوواہ تے یسوع لئی محبت کیویں ظاہر کر سکدے نیں؟ اِنج کرن دا اِک خاص طریقہ ایہہ وے کہ اوہ یسوع دِیاں بھیڈاں دی دیکھ بھال کرن۔ (1-پطرس 5:1، 2 نُوں پڑھو۔) یسوع نے ایہہ گل پطرس رسول نُوں صاف صاف دَسی۔ تِن واری یسوع دا انکار کرن توں بعد پطرس بڑا دُکھی سی۔ ایہدے بعد شاید اوہدی شدید خواہش ہوئے گی کہ اوہ یسوع لئی اپنی محبت نُوں ثابت کرے۔ یسوع نے مُردیاں چوں زندہ ہون توں بعد پطرس نُوں پچھیا: یوحنا دے پُتر شمعون کیہہ توں مینوں پیار کرنا ایں؟ اَسی یقین نال کہہ سکنے آں کہ پطرس نے اوہ سب کجھ کیتا ہوئے گا جدے توں ثابت ہوئے کہ اوہ اپنے مالک نُوں پیار کردا سی۔ یسوع نے پطرس نُوں کہیا: میریاں چھوٹیاں بھیڈاں دی دیکھ بھال کر۔ (یوحنا 21:15-17) پطرس نے ساری زندگی بڑی شفقت نال اپنے مالک دِیاں بھیڈاں دی دیکھبھال کیتی۔ اِنج کرن نال اوہنے ثابت کیتا کہ اوہ یسوع نال بوہت محبت کردا سی۔
11 بزرگو،یادگیری توں پہلے تے بعد والے ہفتیاں چ تُسی ایہہ کیویں ثابت کر سکدے او کہ یسوع نے پطرس نُوں جیہڑی گل کہی، اوہ تواڈے لئی وی بڑی اہم اے؟ جدوں تُسی باقاعدگی نال بھین بھراواں دا حوصلہ ودھان لئی وقت کڈھدے او تے اوہناں لوکاں دی یہوواہ وَل واپس آن چ مدد کردے او جنہاں نے عبادتاں تے آنا تے مُنادی کرنا چھڈ دِتا اے تے اِنج تُسی ثابت کردے او کہ تُسی یہوواہ تے یسوع نال محبت کردے او۔ (حِزقیایل 34:11، 12) تُسی اوہناں لوکاں دا حوصلہ ودھان دی وی کوشش کر سکدے او جیہڑے حالے بائبل کورس کر رہے نیں یاں جیہڑے پہلی واری یادگیری تے آئے نیں۔ ساڈی خواہش اے کہ ایہہ لوک کلیسیا چ اپنائیت محسوس کرن کیونکہ سانوں امید اے کہ اِک نہ اِک دن ایہہ یسوع دے شاگرد بن جان گے۔
یسوع نال محبت دی وجہ توں اَسی دلیر بننے آں
12. یسوع نے اپنی موت توں کجھ دیر پہلاں جو کجھ کہیا، اوہدے تے سوچ وچار کرن نال سانوں ہمت کیوں مِلدی اے؟ (یوحنا 16:32، 33)
12 اپنی موت توں کجھ دیر پہلاں یسوع نے اپنے شاگرداں نُوں کہیا: دُنیا چ توانوں مصیبتاں سہنیاں پین گیاں پر حوصلہ رکھو میں دُنیا تے جت حاصل کر لئی اے۔ (یوحنا 16:32، 33 نُوں پڑھو۔) کیہڑی چیز نے دلیری نال اپنے دُشمناں دا سامنا کرن تے موت تک یہوواہ دا وفادار رہن چ یسوع دی مدد کیتی؟ یہوواہ تے بھروسے نے۔ یسوع جان دا سی کہ اوہدے پیروکاراں نُوں وی ایہو جہیاں ازمیشاں چوں لنگھنا پووے گا۔ ایس لئی اوہنے یہوواہ کولوں درخاست کیتی کہ اوہ اوہناں دی حفاظت کرے۔ (یوحنا 17:11) ایس گل توں سانوں ہمت کیوں مِلدی اے؟ کیونکہ اَسی جاننے آں کہ یہوواہ ساڈے کسے وی دُشمن توں کِتے زیادہ طاقتور اے۔ (1-یوحنا 4:4) اوہ سب کجھ ویکھ سکدا اے۔ سانوں ایس گل دا پورا یقین اے کہ جے اَسی یہوواہ تے بھروسا کراں گے تے اوہ ساڈی مدد کرے گا تاکہ اَسی اپنے ڈر تے قابو پا سکئے تے ہمت نال کم لئیے۔
13. ارمتیاہ چ رہن والے یوسف نے دلیری کیویں ظاہر کیتی؟
13 ذرا ارمتیاہ چ رہن والے یوسف دی مثال تے غور کرو۔ یہودی لوک اوہدی بڑی عزت کردے سن۔اوہ یہودیاں دی وڈی عدالت دا ممبر سی۔ پر جدوں یسوع زمین تے یہوواہ دی خدمت کر رہیا سی تے یوسف بالکل وی دلیر نئیں سی۔ یوحنا نے دَسیا کہ یوسف یسوع دا شاگرد سی پر اوہنے یہودیاں دے ڈر دی وجہ توں ایہہ گل لُکا کے رکھی سی۔ (یوحنا 19:38) یوسف بادشاہی دے پیغام چ بوہت دلچسپی رکھدا سی۔ پر اوہنے ایہہ گل راز چ رکھی سی کہ اوہ یسوع تے ایمان لے آیا اے۔ شاید اوہ ایس گل توں ڈردا سی کہ جے لوکاں نُوں پتہ چل گیا کہ اوہ یسوع دا شاگرد اے تے کوئی وی اوہدی عزت نئیں کرے گا۔ وجہ بھانویں کوئی وی ہووے،بائبل چ دَسیا گیا اے کہ یسوع دی موت دے بعد اوہ ہمت کر کے پیلاطُس کول گیا تے اوہدے توں یسوع دی لاش منگی۔ (مرقس 15:42، 43) ہُن ایہہ گل راز نئیں رہی سی کہ یوسف یسوع دا شاگرد اے۔
14. جے توانوں وی انساناں دا ڈر اے تے تُسی کیہہ کر سکدے او؟
14 کیہہ یوسف وانگوں توانوں وی انساناں دا ڈر اے؟ کیہہ سکول چ یاں اپنے کم تے توانوں ایہہ دَسن چ شرمندگی محسوس ہوندی اے کہ تُسی یہوواہ دے گواہ او؟ کیہہ تُسی ایس لئی مبشر نئیں بن رہے یاں بپتسمہ نئیں لے رہے کیونکہ توانوں ایہہ فکر اے کہ لوک تواڈے بارے کیہہ سوچن گے؟ ایس سوچ دی وجہ توں کدی وی صحی کم کرن توں پچھے نہ ہٹو۔ دل کھول کے یہوواہ کولوں دُعا کرو۔ اوہدے توں اِلتجا کرو کہ اوہ توانوں ہمت دَوے کہ تُسی اوہدی مرضی تے چل سکو۔ جدوں تُسی ویکھو گے کہ یہوواہ تواڈیاں دُعاواں دا جواب دے رہیا اے تے تُسی ہور مضبوط تے دلیر بن جاؤ گے۔—یسعیاہ 41:10، 13۔
خوشی دی وجہ توں اَسی ہمت ہارے بغیر یہوواہ دی خدمت کرنے آں
15. جدوں یسوع زندہ ہون دے بعد اپنے شاگرداں نُوں ملیا تے شاگرداں دے دل چ خوشی دی وجہ توں کیہہ کرن دی خواہش پیدا ہوئی؟ (لُوقا 24:52، 53)
15 جدوں یسوع فوت ہو گیا تے اوہدے شاگرد بڑے دُکھی ہو گئے۔ ذرا اپنے آپ نُوں شاگرداں دی جگہ تے رکھ کے سوچو۔ شاگرداں نے نہ صرف اپنے قریبی دوست نُوں کھو دِتا سی سگوں اوہناں نُوں لگ رہیا سی کہ اوہناں نے اپنی امید وی کھو دِتی اے۔ (لُوقا 24:17-21) پر زندہ ہون توں بعد جدوں یسوع اوہناں نُوں ملیا تے یسوع نے اوہناں دی ایہہ سمجھن چ مدد کیتی کہ اوہنے بائبل دی پیشینگوئی نُوں پورا کرن چ اپنا کردار ادا کیتا اے۔ یسوع نے اوہناں نُوں اِک بڑا اہم کم وی دِتا۔ (لُوقا 24:26، 27، 45-48) جدوں 40 دناں بعد یسوع اسمان تے چلا گیا تے اوس ویلے تک شاگرداں دا دُکھ خوشی چ بدل چُکیا سی۔ اوہ جان دے سن کہ اوہناں دا مالک زندہ اے تے اوس کم نُوں پورا کرن چ اوہناں دی مدد کرے گا جیہڑا اوہنے اوہناں نُوں دِتا اے۔ ایس خوشی دی وجہ توں اوہ یہوواہ دی وڈیائی کردے رہے۔—لُوقا 24:52، 53 نُوں پڑھو؛ اعمال 5:42۔
16. اَسی یسوع دے شاگرداں دی مثال تے کیویں عمل کر سکنے آں؟
16 اَسی یسوع دے شاگرداں دی مثال تے کیویں عمل کر سکنے آں؟ اَسی صرف یادگیری توں پہلے تے بعد والے ہفتیاں چ ای نئیں سگوں پورے سال یہوواہ دی عبادت کرن توں خوشی حاصل کر سکنے آں۔ ایہدے لئی ضروری اے کہ اَسی خدا دی بادشاہی نُوں اپنی زندگی چ پہلی تھاں تے رکھیے۔ مثال لئی، بوہت سارے بھین بھراواں نے اپنے کم دے وقت چ تھوڑا ردّوبدل کیتا اے تاکہ اوہ مُنادی کر سکن، عبادتاں چ جا سکن تے باقاعدگی نال خاندانی عبادت کر سکن۔ کجھ نے ایہہ فیصلہ کیتا اے کہ اوہ ایہو جہیاں چیزاں نُوں جمع کرن چ وقت ضائع نئیں کرن گے جیہڑیاں لوکاں دی نظر چ بوہت اہم نیں۔ اوہ اِنج ایس لئی کردے نیں تاکہ اوہ ودھ چڑھ کے کلیسیا چ کم کر سکن یاں کسے ایہو جہے علاقے چ شفٹ ہو سکن جتھے زیادہ مبشراں دی ضرورت اے۔ سچ اے کہ یہوواہ دی خدمت کرن لئی سانوں سخت محنت کرن دی لوڑ اے۔ پر اوہنے وعدہ کیتا اے کہ جے اَسی اوہدی عبادت نُوں اپنی زندگی چ پہلی تھاں تے رکھاں گے تے اوہ سانوں بوہت ساریاں برکتاں دَوے گا۔—امثال 10:22؛ متی 6:32، 33۔
یادگیری توں پہلے تے بعد والے ہفتیاں چ وقت کڈھ کے ایس بارے سوچ وچار کرو کہ یہوواہ تے یسوع نے تواڈے لئی کیہہ کجھ کیتا اے۔ (پیراگراف نمبر 17 نُوں ویکھو۔)
17. تُسی یادگیری توں پہلے تے بعد والے ہفتیاں چ کیہہ کرن دا عزم کیتا اے؟ (تصویر نُوں ویکھو۔)
17 اَسی منگل،4 اپریل دا اِنتظار کر رہے آں جدوں اَسی مسیح دی موت دی یادگیری مناواں گے۔ پر اَسی یہوواہ تے یسوع دی محبت تے یسوع دی زندگی تے موت بارے سوچ وچار کرن لئی اوس دن تک دا اِنتظار نئیں کراں گے۔ یادگیری توں پہلے تے بعد والے ہفتیاں چ ایہناں گلاں تے زیادہ توں زیادہ سوچ وچار کرو۔ جیویں کہ کجھ وقت کڈھ کے اوہناں واقعیاں بارے پڑھو تے اوہناں تے سوچ وچار کرو جیہڑے چارٹ ”زمین تے یسوع دا آخری ہفتہ“ چ دِتے گئے نیں۔ جدوں تُسی یسوع دی زندگی بارے پڑھ رہے ہوندے او تے ایہو جہیاں ایتاں ویکھو جنہاں توں تواڈے دل چ یہوواہ تے یسوع لئی شکرگزاری تے محبت ودھے تے توانوں ہمت تے خوشی ملے۔ فیر ایہو جہے طریقیاں بارے سوچو جنہاں دے ذریعے تُسی اوہناں لئی شکرگزاری وکھا سکدے او۔تُسی ایس گل دا یقین رکھ سکدے او کہ تُسی یادگیری توں پہلے تے بعد والے ہفتیاں چ جو کجھ کردے او، یسوع اوہدی دلوں قدر کردا اے۔—مکاشفہ 2:19۔
گیت نمبر 130: دلوں معاف کرو
a یادگیری توں پہلے تے بعد والے ہفتیاں چ سانوں یسوع مسیح دی زندگی تے موت بارے سوچ وچار کرنی چاہی دی اے۔ سانوں ایس گل بارے وی سوچنا چاہی دا اے کہ یسوع تے اوہدے باپ نے ساڈے لئی کِنّی محبت ظاہر کیتی اے۔ اِنج کرن نال ساڈے دل چ خواہش پیدا ہوئے گی کہ اَسی اپنے کماں توں ثابت کریئے کہ اَسی یسوع دی قربانی تے یہوواہ تے یسوع دی محبت لئی بڑے شکرگزار آں۔ ایس مضمون چ اَسی ایس شکرگزاری نُوں ظاہر کرن دے تِن طریقیاں تے گل کراں گے۔ اَسی ایہہ وی ویکھاں گے کہ کیہڑی گل توں ساڈے دل چ خواہش پیدا ہوئے گی کہ اَسی اپنے بھین بھراواں لئی محبت ظاہر کریئے، ہمت نال کم لئیے تے یہوواہ دی خدمت توں خوشی حاصل کریئے۔
