مطالعے دا مضمون نمبر 4
مسیح دی یادگیری منان دِیاں کوششاں تے یہوواہ برکت پاندا اے
میری یاد چ ایسے طرحاں کردے رہوو۔—لُوقا 22:19۔
گیت نمبر 19: یسوع مسیح دی موت دی یادگیری
مضمون تے اِک نظر a
1، 2. اَسی ہر سال مسیح دی موت دی یادگیری تے کیوں جانے آں؟
تقریباً 2 ہزار سال پہلے یسوع نے ساڈی خاطر اپنی جان قربان کیتی سی۔ ایس وجہ توں ساڈے لئی ہمیشاں دی زندگی پانا ممکن ہو گیا اے۔ اپنی موت توں کجھ دیر پہلاں یسوع نے اپنے شاگرداں نُوں حکم دِتا سی کہ اوہ اوہدی قربانی نُوں یاد رکھن لئی اِک سادہ جہی تقریب منان جدے چ روٹی تے مے شامل ہووے۔—1-کُرنتھیوں 11:23-26۔
2 اَسی یسوع دا ایہہ حکم ایس لئی مننے آں کیونکہ اَسی اوہدے نال بوہت پیار کرنے آں۔ (یوحنا 14:15) ہر سال یادگیری دی عبادت توں پہلے تے بعد والے ہفتیاں چ اَسی یسوع دی قربانی لئی قدر وکھانے آں۔ اِنج کرن لئی اَسی دُعا کرنے آں تے خاص طور تے ایس بارے سوچ وچار کر نے آں کہ یسوع دی قربانی دی انساناں لئی کیہہ اہمیت اے۔ ایہدے علاوہ اَسی ودھ چڑھ کے مُنادی کر نے آں تے زیادہ توں زیادہ لوکاں نُوں ایس خاص عبادت تے آن دی دعوت دینے آں۔ اَسی آپ وی ایہہ عزم کیتا ہویا اے کہ بھانویں کجھ وی ہو جائے، اَسی ایس خاص عبادت تے ضرور جاواں گے۔
3. ایس مضمون چ اَسی کیہڑیاں گلاں تے غور کراں گے؟
3 ایس مضمون چ اَسی تِن ایہو جہیاں گلاں تے غور کراں گے جنہاں توں پتہ چلدا اے کہ اَج تک یہوواہ دے بندیاں نے یسوع دی موت دی یادگیری نُوں منان لئی کِنّیاں سخت کوششاں کیتیاں نیں۔ ایہہ تِن گلاں ایہہ نیں: (1) یسوع دے دَسے ہوئے طریقے مطابق اوہدی موت دی یادگیری منانا، (2) دُوجیاں نُوں ایہدے تے آن دی دعوت دینا تے (3) مشکل حالاتاں چ وی ایس تقریب نُوں منانا۔
یسوع دے دَسے ہوئے طریقے مطابق اوہدی موت دی یادگیری منانا
4. (الف) ہر سال یادگیری دی عبادت تے بائبل توں کیہڑیاں خاص سچائیاں دَسیاں جاندیاں نیں؟ (ب) ایہناں سچائیاں بارے جاننا ساڈے لئی ایناں ضروری کیوں اے؟ (لُوقا 22:19، 20)
4 ہر سال اَسی یادگیری دی عبادت تے بائبل چوں اِک تقریر سننے آں جدے چ بوہت سارے سوالاں دے جواب دِتے جاندے نیں۔ ایہدے چ دَسیا جاندا اے کہ انساناں نُوں فدیے دی لوڑ کیوں سی تے کیویں اِک انسان دی موت دے ذریعے کئی لوکاں دے گُناہواں دی قیمت دِتی جا سکدی سی۔ اَسی ایہہ وی سکھنے آں کہ روٹی تے مے کدے وَل اشارہ کر دے نیں تے ایہناں نُوں کون کھا پی سکدے نیں۔ (لُوقا 22:19، 20 نُوں پڑھو۔) اَسی اوہناں برکتاں بارے وی سوچنے آں جیہڑیاں آن والے وقت چ اوہناں لوکاں نُوں مِلن گیاں جیہڑے زمین تے ہمیشاں دی زندگی حاصل کرن دی امید رکھدے نیں۔ (یسعیاہ 35:5، 6؛ 65:17، 21-23) ایہناں سچائیاں بارے جاننا ساڈے لئی بوہت ضروری اے۔ کروڑاں لوک ایہناں گلاں بارے نئیں جان دے تے اوہ ایہہ نئیں سمجھدے کہ یسوع دی قربانی ساڈے لئی کِنّی خاص اے۔ ایہدے علاوہ اوہ یسوع دی موت دی یادگیری نُوں اوس طریقے نال نئیں مناندے جیہڑا اوہنے سکھایا سی۔ پر اِنج کیوں اے؟
5. جدوں زیادہتر رسول مر گئے تے لوکاں نے یادگیری تقریب کیویں منانی شروع کر دِتی؟
5 جدوں یسوع دے زیادہتر رسول مر گئے تے ایہدے کجھ عرصے بعد ای جھوٹھے مسیحی کلیسیا چ شامل ہو گئے۔ (متی 13:24-27، 37-39) اوہ سچائی نُوں توڑ مروڑ کے پیش کرن لگ پئے تاکہ شاگرداں نُوں اپنے پیچھے لا لین۔ (اعمال 20:29، 30) پاک کلام دی اِک تلیم جنہوں جھوٹھے مسیحیاں نے توڑ مروڑ کے پیش کرنا شروع کیتا، اوہ ایہہ سی کہ مسیح اِک ای وار بوہت سارے لوکاں دے گُناہواں لئی قربان ہویا۔ ایہہ جھوٹھے مسیحی ایہہ تلیم دین لگ پئے کہ مسیح اِک ای وار ساریاں لئی قربان نئیں ہویا سی سگوں ایہہ قربانی وار وار دِتی جانی چاہی دی سی۔ (عبرانیوں 9:27، 28) اَج کل بوہت سارے لوک ایس جھوٹھی تلیم نُوں من دے نیں۔ اوہ ہر ہفتے، کدی کدار تے ہر روز اپنے چرچاں چ جمع ہو کے یسوع دی قربانی دی یادگیری مناندے نیں۔ ایس تقریب نُوں کیتھولک مذہب چ ”پاک ماس“کہیا جاندا اے۔ b دُوجے مسیحی فرقے اینی وار تے ایس تقریب نُوں نئیں مناندے پر اوہ ایہہ وی نئیں جاندے کہ یسوع دی قربانی دی کیہہ اہمیت اے۔ کجھ لوک شاید سوچن کیہہ یسوع دی قربانی دی وجہ توں واقعی میرے گُناہ معاف ہو سکدے نیں؟ اوہ اِنج کیوں سوچدے نیں؟ اوہ ایس لئی اِنج سوچدے نیں کیونکہ اوہناں تے ایہو جہے لوکاں دا اثر اے جیہڑے ایہہ من دے نیں کہ یسوع دی قربانی دے ذریعے سانوں گُناہواں توں معافی نئیں مِل سکدی۔ پر یسوع دے پیروکاراں نے لوکاں دی ایہہ سمجھن چ مدد کیتی اے کہ یسوع دی قربانی ساڈے لئی کیہہ اہمیت رکھدی اے تے اوہدی موت دی یادگیری منان دا صحی طریقہ کیہہ اے۔
6. 1872 تک بائبل سٹوڈنٹس کیہڑی گل سمجھ گئے سن؟
6 اُنیسویں صدی دے آخر تک کجھ بائبل سٹوڈنٹس نے بھرا چارلس ٹیز رسل دے نال مِل کے بائبل دا گہرائی نال مطالعیا کرنا شروع کیتا۔ اوہ ایہہ جاننا چاہندے سن کہ یسوع دی قربانی دی کیہہ اہمیت اے تے سانوں اوہدی موت دی یادگیری کیویں منانی چاہی دی اے۔ 1872 تک اوہ ایہہ گل سمجھ گئے کہ یسوع نے ساریاں انساناں لئی اپنی جان قربان کیتی سی۔ تحقیق کرن توں بعد اوہناں نے جو کجھ وی سکھیا، اوہنوں اپنے تک ای نئیں رکھیا۔ سگوں اوہناں نے ایہہ گلاں کتاباں، اخباراں تے رسالیاں دے ذریعے دُوجیاں نُوں وی دَسیاں۔ ایہدے توں کجھ وقت بعد ای اوہ پہلی صدی دے مسیحیاں وانگوں سال چ اِک واری جمع ہو کے مسیح دی موت دی یادگیری منان لگ پئے۔
7. بائبل سٹوڈنٹس دی تحقیق توں اَج سانوں کیہہ فائدہ ہو رہیا اے؟
7 کئی سال پہلاں بائبل سٹوڈنٹس نے جیہڑی تحقیق کیتی سی، اوہدے توں اَج سانوں وی فائدہ ہو رہیا اے۔ کیویں؟ یہوواہ نے ساڈے ذہن نُوں کھولیا اے تاکہ اَسی مسیح دی قربانی دی اہمیت نُوں سمجھ جائیے تے ایہہ وی سمجھ جائیے کہ ایہدے ذریعے انساناں نُوں کیہڑے فائدے ہون گے۔ (1-یوحنا 2:1، 2) اَسی ایہہ وی سکھیا اے کہ جیہڑے انساناں توں یہوواہ خوش اے، اوہناں کول دو طرحاں دِیاں امیداں نیں۔ پہلی، اسمان تے ہمیشاں دی زندگی حاصل کرن دی امید جیہڑی کجھ لوکاں کول اے تے دُوجی، زمین تے ہمیشاں دی زندگی حاصل کرن دی امید جیہڑی لکھاں لوکاں کول اے۔ جدوں اَسی ایس گل تے غور کر نے آں کہ یہوواہ سانوں کِنّاں پیار کردا اے تے یسوع دی قربانی توں سانوں ذاتی طور تے کِنّاں فائدہ ہوندا اے تے اَسی یہوواہ دے ہور نیڑے ہو جانے آں۔ (1-پطرس 3:18؛ 1-یوحنا 4:9) ایس لئی بائبل سٹوڈنٹس وانگوں اَسی وی دُوجیاں نُوں دعوت دینے آں کہ اوہ ساڈے نال مِل کے اوسے طریقے نال یادگیری منان جیہڑا طریقہ یسوع نے اپنے پیروکاراں نُوں سکھایا سی۔
دُوجیاں نُوں مسیح دی یادگیری تے آن دی دعوت دینا
تُسی کیہہ کر سکدے او تاکہ تُسی مسیح دی یادگیری دے دعوتنامے ونڈن دی مہم چ ودھ چڑھ کے حصہ لے سکو؟ (پیراگراف نمبر 8-10 نُوں ویکھو۔) d
8. یہوواہ دے بندیاں نے دُوجیاں نُوں یادگیری تے آن دی دعوت دین لئی کیہہ کجھ کیتا اے؟ (تصویر نُوں ویکھو۔)
8 یہوواہ دے بندے کئی سالاں توں دُوجیاں نُوں یسوع دی موت دی یادگیری تے آن دی دعوت دے رہے نیں۔ 1881 دے مینارِنگہبانی چ ایہہ اعلان کیتا گیا سی کہ بھین بھرا یادگیری منان لئی امریکہ دی ریاست پنسلوانیا دے شہر ایلیگنی چ اِک بھرا دے گھر جمع ہون۔ بعد چوں ہر کلیسیا ایس تقریب نُوں منان لگ پئی۔ مارچ 1940 چ مبشراں نُوں کہیا گیا کہ جے اوہناں دے علاقے چ کسے بندے نے پاک کلام دے پیغام چ دلچسپی وکھائی سی تے اوہ اوہنوں ایس عبادت تے آن دی دعوت دے سکدے نیں۔ 1960 چ پہلی وار بیتایل نے کلیسیاواں نُوں چھپے ہوئے دعوتنامے دِتے۔ اوہدوں توں لے کے ہُن تک کروڑاں دعوتنامے دِتے جا چُکے نیں۔ اَسی دُوجیاں نُوں یادگیری تے بلان لئی اینی محنت کیوں کرنے آں تے ایناں وقت کیوں لانے آں؟
9، 10. اَسی دُوجیاں نُوں یادگیری تے آن دی دعوت دین لئی جیہڑیاں کوششاں کر نے آں، اوہدے توں کنہاں نُوں فائدہ ہوندا اے؟ (یوحنا 3:16)
9 دُوجیاں نُوں یادگیری تے آن دی دعوت دین دی اِک وجہ ایہہ وے کہ اَسی چاہنے آں کہ جیہڑے لوک پہلی وار ایس عبادت تے آن،اوہ ایہہ سکھن کہ یہوواہ تے یسوع نے ساڈے لئی کیہہ کجھ کیتا اے۔ (یوحنا 3:16 نُوں پڑھو۔) اَسی ایہہ وی چاہنے آں کہ اوہ ایس عبادت تے جو کجھ وی ویکھدے یاں سُن دے نیں، اوہدے توں اوہناں دل چ ایہہ خواہش پیدا ہووے کہ اوہ یہوواہ بارے ہور سکھن تے اوہدے بندیاں چ شامل ہو جان۔ پر ایہدے توں ہور لوکاں نُوں وی فائدہ ہوندا اے۔
10 اَسی اوہناں لوکاں نُوں وی ایس عبادت تے آن دی دعوت دینے آں جیہڑے کلیسیا توں دُور ہو گئے نیں۔ اَسی اِنج ایس لئی کر نے آں تاکہ اَسی اوہناں نُوں یاد دَوا سکئے کہ یہوواہ ہُن وی اوہناں نُوں پیار کردا اے۔ اوہناں چوں زیادہتر لوک ایس عبادت تے آندے نیں تے سانوں اوہناں نُوں ویکھ کے بڑی خوشی ہوندی اے۔ ایس عبادت تے آ کے اوہناں نُوں یاد آندا اے کہ جدوں اوہ یہوواہ دی عبادت کردے سن تے اوہ کِنّے خوش سن۔ ذرا بھین مونیکا دی مثال تے غور کرو۔ c کورونا دی وبا دے دوران اوہنے فیر توں مُنادی کرنی شروع کیتی۔ 2021 دی یادگیری دی عبادت تے آن توں بعد اوہنے کہیا:”ایس سال دی یادگیری دی عبادت میرے لئی بڑی خاص سی کیونکہ میں 20 سالاں بعد دُبارہ توں مُنادی کرنی شروع کیتی۔ میں بڑے دل نال لوکاں نُوں ایس عبادت تے آن دی دعوت دِتی کیونکہ یہوواہ تے یسوع نے میرے لئی جو کجھ کیتا اے، میں اوہدے لئی بڑی شکرگزار آں۔“ (زبور 103:1-4) بھانویں لوک ایس عبادت تے آن یاں نہ آن، اَسی فیر وی اوہناں نُوں ایہدے تے آن دی دعوت دیندے رہنے آں کیونکہ اَسی جاننے آں کہ یہوواہ ساڈیاں کوششاں دی بوہت قدر کر دا اے۔
11. اَسی دُوجیاں نُوں یادگیری تے آن دی دعوت دین لئی جیہڑیاں کوششاں کیتیاں نیں، یہوواہ نے اوہناں چ کیویں برکت پائی اے؟ (حجی 2:7)
11 اَسی دُوجیاں نُوں یادگیری تے آن دی دعوت دین لئی جیہڑیاں کوششاں کیتیاں نیں، یہوواہ نے اوہناں چ بڑی برکت پائی اے۔ کورونا دی وجہ توں لگیاں پابندیاں دے باوجود وی 2021 چ 2 کروڑ 13 لکھ 67 ہزار 603 لوکاں نے ایہہ تقریب منائی سی۔ ایہہ تعداد پوری دُنیا چ گواہواں دی تعداد توں ڈھائی گُنا زیادہ سی۔ یہوواہ ایس گل تے دھیان نئیں دیندا کہ ایس عبادت تے کِنّے لوک آندے نیں سگوں اوہ ایس گل تے دھیان دیندا اے کہ کیہڑے کیہڑے لوک آندے نیں۔ (لُوقا 15:7؛ 1-تیمُتھیُس 2:3، 4) سانوں ایس گل دا پورا یقین اے کہ جدوں اَسی ایس عبادت تے آن لئی دُوجیاں نُوں دعوت دینے آں تے یہوواہ ساڈی مدد کردا اے کہ اَسی ایہو جہے لوکاں نُوں لبھ سکئے جیہڑے دلوں سچائی سکھنا چاہندے نیں۔—حجی 2:7 نُوں پڑھو۔
مشکل حالاتاں چ وی یادگیری دی تقریب منانا
جدوں اَسی مسیح دی موت دی یادگیری منان لئی کوششاں کرنے آں تے یہوواہ سانوں برکتاں دیندا اے۔ (پیراگراف نمبر 12 نُوں ویکھو۔) e
12. کیہڑے حالاتاں وی وجہ توں ساڈے لئی یادگیری منانا مشکل ہو سکدا اے؟ (تصویر نُوں ویکھو۔)
12 یسوع نے پہلے ای دَس دِتا سی کہ آخری زمانے چ سانوں بوہت ساریاں مشکلاں دا سامنا کرنا پووے گا، جیویں کہ خاندان وَلّوں مخالفت، اذیت، جنگاں، وباواں تے دُوجیاں مصیبتاں۔ (متی 10:36؛ مرقس 13:9؛ لُوقا 21:10، 11) کدی کدار ایہو جہے حالاتاں دی وجہ توں ساڈے لئی مسیح دی یادگیری منانا مشکل ہوسکدا اے۔ ساڈے بھین بھراواں نے کیہہ کیہہ کیتا اے تاکہ اوہ ایہناں مشکلاں دے باوجود وی یادگیری دی تقریب منانا نہ چھڈن؟ تے یہوواہ نے اِنج کرن چ اوہناں دی مدد کیویں کیتی اے؟
13. جدوں بھرا آرٹم جیل چ سی تے مسیح دی یادگیری منانا چاہندا سی تے یہوواہ نے اوہدی مدد کیویں کیتی تاکہ اوہدا عزم کمزور نے پووے؟
13 قید۔ ساڈے جیہڑے بھین بھرا اپنے ایمان دی وجہ توں قید چ نیں، اوہ وی مسیح دی یادگیری نُوں منان دی پوری کوشش کردے نیں۔ ایس بارے ذرا بھرا آرٹم دی مثال تے غور کرو جنہوں جیل چ اِک بوہت ای تنگ کمرے چ رکھیا گیا سی۔ جدوں 2020 دی یادگیری دی عبادت آن والی سی تے اوہ اوسے کمرے چ قید سی جدے چ پنج ہور قیدی وی سن۔ اوتھے وی اوہنے یادگیری دی عبادت لئی ضروری چیزاں دا بندوبست کر لیا تے اوہنے سوچیا کہ اوہ اپنے لئی آپ ای یادگیری دی تقریر دَوے گا۔ پر اوہدے نال دے قیدی سگریٹ پیندے سن تے بڑی گندی زبان استمال کردے سن۔ ایس مسئلے لئی اوہنے کیہہ کیتا؟ اوہنے قیدیاں کولوں پچھیا کہ کیہہ اوہ صرف اِک گھنٹے لئی گندی زبان استمال کرنا تے سگریٹ پینا بند کر سکدے نیں۔ بھرا آرٹم نُوں ایس گل تے بڑی حیرانی ہوئی کہ اوہ قیدی اوہدی گل من گئے۔ نالے بھرا کہندا اے کہ میں اوہناں کولوں پچھیا کہ کیہہ اوہ ایس یادگیری دی تقریب بارے ہور جاننا چاہندے نیں۔ اوس ویلے اوہناں نے جواب دِتا کہ اوہ ایس تقریب بارے کجھ نئیں جاننا چاہندے۔ پر جدوں بھرا ایہہ تقریب منا رہیا سی تے اوہنوں ویکھ کے تے اوہدی تقریر سُن کے اوہناں دے ذہن چ بوہت سارے سوال آئے جیہڑے اوہناں نے اوہدے کولوں پچھے۔
14. کورونا دی وبا دے دوران وی یہوواہ دے بندیاں نے مسیح دی یادگیری منان لئی کیہڑیاں کوششاں کیتیاں؟
14 کورونا دی وبا۔ ایس وبا دی وجہ توں یہوواہ دے بندے اِک جگہ کٹھے ہو کے یادگیری نئیں منا سکدے سن۔ پر ایہہ وبا وی اوہناں نُوں ایہہ تقریب منان توں نئیں روک سکی۔ جیہڑیاں کلیسیاواں کول انٹرنیٹ دی سہولت موجود سی، اوہناں نے یاد گیری دی تقریب ویڈیو کال دے ذریعے منائی۔ پر اوہناں لکھاں لوکاں لئی کیہڑا بندوبست کیتا گیا جنہاں کول انٹرنیٹ دی سہولت نئیں سی؟ کجھ مُلکاں چ ایہہ بندوبست کیتا گیا کہ یادگیری دی تقریر نُوں ٹیوی یاں ریڈیو تے چلایا جائے گا۔ ایہدے علاوہ کجھ برانچاں نے ایس تقریر نُوں 500 توں وی زیادہ زباناں چ ریکارڈ کیتا تاکہ بوہت دُور دے علاقیاں چ رہن والے بھین بھرا وی ایس تقریب نُوں منا سکن۔ تے فیر ساڈے بھراواں نے ایہہ ریکارڈنگز ایہو جہے علاقیاں چ رہن والے بھین بھراواں تک پونچائیاں۔
15. تُسی بائبل کورس کرن والی اِک عورت توں کیہہ سکھیا اے؟
15 خاندان وَلّوں مخالفت۔ کجھ لوکاں لئی مسیح دی یادگیری منان چ سب توں وڈی رکاوٹ ایہہ ہوندی اے کہ اوہناں دے گھر والے اوہناں دی مخالفت کردے نیں۔ ایہدے بارے ذرا بائبل کورس کرن والی اِک عورت دی مثال تے غور کرو۔ 2021 چ یادگیری دی تقریب توں اِک دن پہلے اوہنے بائبل کورس کران والی بھین نُوں دَسیا کہ اوہدے گھر والے اوہدی بڑی مخالفت کر رہے نیں۔ ایس لئی اوہ ایس تقریب نُوں نئیں منا پائے گی۔ بائبل کورس کران والی بھین نے لُوقا 22:44 پڑھی تے فیر اوس عورت نُوں دَسیا کہ جدوں سانوں مشکلاں دا سامنا ہوندا اے تے سانوں مسیح وانگوں یہوواہ کولوں دُعا کرنی چاہی دی اے تے باقی سب کجھ اوہدے تے چھڈ دینا چاہی دا اے۔ اگلے دن اوس عورت نے روٹی تے مے دا بندوبست کیتا تے jw.org تے یادگیری والے دن لئی صبح دی عبادت دا پروگرام ویکھیا۔ تے فیر شام نُوں اوہ اپنے کمرے چ گئی تے اپنے فون تے یادگیری دی تقریر نُوں سُنیا۔ بعد چوں اوہنے بائبل کورس کران والی بھین نُوں لکھیا: ”تُسی کل میری بڑی ہمت ودھائی سی۔ میں ایس تقریب نُوں منان لئی اپنے وَلّوں پوری کوشش کیتی تے یہوواہ نے میری بڑی مدد کیتی۔ میں توانوں دَس نئیں سکدی کہ میں کِنّی خوش آں تے میں یہوواہ دی بڑی شکر گزار وی آں۔“ کیہہ توانوں لگدا اے کہ جے توانوں ایہو جہی مشکل دا سامنا ہوئے گا تے یہوواہ تواڈی وی مدد کرے گا؟
16. سانوں پورا یقین کیوں اے کہ جدوں اَسی مسیح دی موت دی یادگیری منان دی پوری کوشش کرنے آں تے یہوواہ سانوں برکت دیندا اے؟ (رومیوں 8:31، 32)
16 جدوں اَسی یسوع دی موت دی یادگیری منان دی پوری کوشش کرنے آں تے یہوواہ ایہدی بڑی قدر کردا اے۔ جدوں اَسی اوہناں کماں لئی شکرگزاری ظاہر کرنے آں جیہڑے یہوواہ نے ساڈے لئی کیتے نیں تے اَسی ایس گل دا یقین رکھ سکنے آں کہ اوہ سانوں برکتاں دَوے گا۔ (رومیوں 8:31، 32 نُوں پڑھو۔) آؤ اَسی عزم کریئے کہ اَسی ایس سال وی مسیح دی موت دی یادگیری ضرور مناواں گے۔ تے ایہدے توں پہلاں تے بعد والے ہفتیاں چ یہوواہ دی خدمت چ زیادہ توں زیادہ کرن دی کوشش کراں گے۔
گیت نمبر 18: فدیے لئی احسانمند
a منگل 4 اپریل 2023 نُوں پوری دُنیا چ لکھاں لوک مسیح دی موت دی یادگیری منان گے۔ بوہت سارے لوک پہلی واری ایس عبادت تے آن گے۔ ایہدے تے کئی ایہو جہے لوک وی آن گے جنہاں نے نہ صرف یہوواہ دی عبادت کرنی چھڈ دِتی سی سگوں اوہ کئی سالاں توں یادگیری دی عبادت تے وی نئیں آئے سن۔ کجھ لوکاں نُوں ایہو جہے حالاتاں دا سامنا ہوئے گا جنہاں دی وجہ توں اوہناں لئی ایس عبادت تے آنا بوہت مشکل ہوئے گا۔ پر فیر وی اوہ ایہدے تے آن گے۔ بھانویں تواڈے حالات جیہو جہے وی ہون؛ تُسی ایس گل دا یقین رکھ سکدے او کہ تُسی ایس عبادت تے آن لئی جیہڑیاں وی کوششاں کرو گے، یہوواہ اوہناں توں بوہت خوش ہوئے گا۔
b کیتھولک لوک من دے نیں کہ ایس عبادت دے دوران روٹی یسوع دے جسم چ تے مے اوہدے خون چ تبدیل ہو جاندی اے۔ اوہ من دے نیں کہ جِنّی واری کوئی بندہ ایس عبادت چ شامل ہوندا اے، اونی واری یسوع اوہدے لئی قربان ہوندا اے۔
c ایس مضمون چ کجھ ناں بدل دِتے گئے نیں۔
