مطالعے دا مضمون نمبر 3
یہوواہ کامیاب ہون چ تواڈی مدد کر رہیا اے
یہوواہ یوسف دے نال سی تے . . . جیہڑے وی کم نُوں اوہ ہتھ لاندا سی یہوواہ اوہنوں کامیاب کردا سی۔—پیدایش 39:2، 3۔
گیت نمبر 122: تگڑے ہوو، ڈٹے رہوو
مضمون تے اِک نظر a
1، 2. (الف) ایہدے چ حیرانی دی گل کیوں نئیں اے کہ سانوں مشکلاں دا سامنا کرنا پیندا اے؟ (ب) ایس مضمون چ اَسی کیہڑیاں گلاں تے غور کراں گے؟
یہوواہ دے بندیاں دے طور تے جدوں سانوں مشکلاں دا سامنا کرنا پیندا اے تے اَسی حیران نئیں ہوندے۔ اَسی جاننے آں کہ بائبل چ دَسیا گیا اے کہ خدا دی بادشاہی چ جان لئی سانوں بوہت ساریاں مصیبتاں سہنیاں پین گیاں۔ (اعمال 14:22) اَسی ایہہ وی جاننے آں کہ ساڈیاں کجھ مشکلاں تے خدا دی بادشاہی چ ای پوری طرحاں ختم ہون گیاں جتھے نہ موت رہوے گی، نہ ماتم، نہ رونا، نہ درد۔—مکاشفہ 21:4۔
2 یہوواہ سانوں مشکلاں توں بچاندا تے نئیں پر اوہ سانوں ایہناں نُوں برداشت کرن دی طاقت ضرور دیندا اے۔ غور کرو کہ پولُس رسول نے روم چ رہن والے مسیحیاں نُوں کیہہ کہیا۔ پہلے اوہنے ایہناں مسیحیاں نُوں دَسیا کہ اوہنوں تے اوہدے بھراواں نُوں کیہڑیاں کیہڑیاں مشکلاں دا سامنا کرنا پے رہیا اے۔ فیر اوہنے کہیا: سانوں اوہدے ذریعے مکمل جت مِلدی اے جیہڑا ساڈے نال محبت کردا اے۔ (رومیوں 8:35-37) ایہدا مطلب اے کہ جدوں اَسی مصیبتاں دا سامنا کر رہے ہنے آں تے اوہدوں وی یہوواہ ساڈی مدد کردا اے تے سانوں کامیاب کردا اے۔ آؤ ویکھئے کہ یہوواہ نے مشکل ویلے چ یوسف دی مدد کیویں کیتی تے اوہ تواڈی مدد کیویں کردا اے۔
جدوں حالات اچانک بدل جان
3. یوسف دی زندگی چ اچانک کیہڑی تبدیلی آئی؟
3 یعقوب دِیاں گلاں تے کماں توں صاف پتہ چلدا سی کہ اوہ اپنے پُتر یوسف نال کِنّاں پیار کردا سی۔ (پیدایش 37:3، 4) ایس وجہ توں یوسف دے وڈے بھرا اوہدے توں سڑن لگ پئے۔ اوہناں نے موقع مِلدے ای یوسف نُوں مِدیانی تاجراں نُوں ویچ دِتا۔ ایہہ تاجر یوسف نُوں اوہدے گھر توں کئی سو کلومیٹر دُور مصر لے آئے تے اوتھے یوسف نُوں فوطیفار نُوں ویچ دِتا جیہڑا فرعون دا اِک وڈا افسر سی۔ یوسف دی زندگی اِک دم بدل گئی۔ اوہ اپنے پیو دا بڑا لاڈلا سی پر ہُن اوہ اِک معمولی جیہا مصری غلام سی۔—پیدایش 39:1۔
4. سانوں کیس لحاظ نال اُنج دِیاں مشکلاں دا سامنا کرنا پے سکدا اے جنہاں دا سامنا یوسف نے کیتا سی؟
4 بائبل چ لکھیا اے کہ کسے نال وی اچانک کجھ وی بُرا ہو سکدا اے۔ (واعظ 9:11) کدی کدار سانوں جیہڑیاں مشکلاں دا سامنا کر نا پیندا اے، اوہ دُوجیاں تے وی آندیاں نیں۔ (1-کُرنتھیوں 10:13) نالے کدی کدی سانوں یسوع دا شاگرد ہون دی وجہ توں مشکلاں دا سامنا کرنا پیندا اے۔ مثال لئی، شاید ساڈے ایمان دی وجہ توں لوک ساڈا مذاق اُڈان، ساڈی مخالفت کرن، ایتھوں تک کہ سانوں اذیت دین۔ (2-تیمُتھیُس 3:12) بھانویں سانوں جیہڑی وی مشکل دا سامنا ہوئے، یہوواہ ساڈی مدد کر سکدا اے تے سانوں کامیاب کر سکدا اے۔ آؤ ویکھنے آں کہ اوہنے یوسف دی مدد کیویں کیتی۔
یہوواہ نے اوہدوں وی یوسف دی مدد کیتی تے اوہنوں کامیابی دِتی جدوں اوہنوں مصر چ غلام دے طور تے فوطیفار نُوں ویچ دِتا گیا سی۔ (پیراگراف نمبر 5 نُوں ویکھو۔)
5. ہر کم چ یوسف دی کامیابی نُوں ویکھ کے فوطیفار کیہڑے نتیجے تے پونچیا؟ (پیدایش 39:2-6)
5 پیدایش 39:2-6 نُوں پڑھو۔ فوطیفار نے ویکھیا کہ یوسف اِک بوہت ای قابل تے محنتی نوجوان اے۔ اوہ ایہہ وی جان دا سی کہ اِنج کیوں اے۔ فوطیفار نے ویکھیا سی کہ یوسف جیہڑے وی کم نُوں ہتھ لاندا اے، یہوواہ اوہنوں کامیاب کردا اے۔ b فیر یوسف فوطیفار دا اِک خاص بندہ بن گیا، ایتھوں تک کہ فوطیفار نے اوہنوں اپنے گھر دا مختار بنا دِتا۔ ایہدی وجہ توں فوطیفار نُوں بوہت ساریاں برکتاں مِلن لگ پئیاں۔
6. شاید یوسف نُوں اپنے حالات بارے کیہو جیہا محسوس ہویا ہوئے گا؟
6 ذرا یوسف دے حالات نُوں اوہدی نظر نال ویکھن دی کوشش کرو۔ اوہ ایہناں سارے حالاتاں چ کیہہ چاہندا سی؟ کیہہ اوہ ایہہ چاہندا سی کہ اوہ فوطیفار دِیاں نظراں چ بڑا چنگا بن جائے تے فوطیفار اوہدے توں خوش ہو کے اوہنوں انعام دَوے؟ ایہہ گل نئیں سی۔ شاید یوسف بس ایہی چاہندا ہوئے گا کہ اوہ آزاد ہو جائے تے اپنے باپ کول واپس چلا جائے۔ بھانویں کہ فوطیفار دے گھر چ اوہدے کول بوہت ساریاں ذمےداریاں سن، پر فیر وی اوتھے اوہ اِک ایہو جہے بندے دا غلام سی جیہڑا یہوواہ دی عبادت نئیں کردا سی۔ یہوواہ نے یوسف نُوں فوطیفار توں آزادی نئیں دَوائی۔ اَگے چل کے تے یوسف دے حالات ہور وی زیادہ خراب ہون والے سن۔
جے حالات ہور زیادہ خراب ہو جان
7. کیس لحاظ نال یوسف دے حالات ہور زیادہ خراب ہون لگ پئے؟ (پیدایش 39:14، 15)
7 جیویں کہ پیدایش 39 باب چ دَسیا گیا اے، فوطیفار دی بیوی دا یوسف تے دل آگیا سی تے اوہ وار وار اوہنوں حرامکاری کرن لئی اُکساندی سی۔ پر ہر وار یوسف اوہنوں صاف صاف منع کر دیندا سی۔ ایس وجہ توں اوہنوں یوسف تے ایناں غصہ آیا کہ اوہنے یوسف تے اِلزام لایا کہ اوہنے اوہدی عزت لُٹن دی کوشش کیتی اے۔ (پیدایش 39:14، 15 نُوں پڑھو۔) جدوں فوطیفار نے ایہہ سُنیا تے اوہنے یوسف نُوں قید چ پوا دِتا جتھے اوہ کجھ سالاں تک رہیا۔ (پیدایش 39:19، 20) ایہہ قید خانہ کیہو جیہا سی؟ یوسف نے قیدخانے لئی جیہڑا عبرانی لفظ استمال کیتا، اوہدا مطلب کُھوں یاں گھڑا وی ہوسکدا اے۔ ایہدے توں پتہ چلدا اے کہ اوہدے آلے دَوالے بوہت نھیرا سی تے اوہ اپنے آپ نُوں بڑا بےبس محسوس کر رہیا سی۔ (پیدایش 40:15) ایہدے علاوہ بائبل توں پتہ چلدا اے کہ کجھ وقت لئی یوسف دے پیر بیڑیاں چ تے اوہدی گردن لوھے دی زنجیراں چ جکڑی ہوئی سی۔ (زبور 105:17، 18) یوسف دے حالات بھیڑے توں بھیڑے ہوندے جا رہے سن۔ ہُن اوہ اِک بھروسےمند غلام توں اِک قیدی بن گیا سی۔
8. جے تواڈے حالات ہور بھیڑے ہو جان تے فیر وی تُسی کیہڑی گل دا یقین رکھ سکدے او؟
8 کیہہ تُسی کدی کسے ایہو جہی مشکل چوں لنگھے او جدے چ تُسی یہوواہ کولوں بوہت دُعا کیتی پر فیر وی تواڈے حالات بھیڑے توں بھیڑے ہوندے گئے؟ اِنج ہوسکدا اے۔ شیطان دی ایس دُنیا چ یہوواہ سانوں مشکلاں توں بچاندا نئیں اے۔ (1-یوحنا 5:19) پر فیر وی تُسی ایس گل دا یقین رکھ سکدے او کہ یہوواہ نُوں چنگی طرحاں پتہ اے کہ تواڈے تے کیہہ بیت رہی اے تے اوہنوں تواڈی فکر اے۔ (متی 10:29-31؛ 1-پطرس 5:6، 7) اوہنے ایہہ وعدہ کیتا اے: میں تینوں کدی نئیں چھڈاں گا۔ میں تینوں کدی رد نئیں کراں گا۔ (عبرانیوں 13:5) جے تُسی کسے ایہو جہی مشکل چوں وی لنگھ رہے ہووو جدے چ توانوں کوئی امید نظر نئیں آندی تے فیر وی یہوواہ ایہنوں برداشت کرن چ تواڈی مدد کر سکدا اے۔ آؤ ویکھنے آں کہ ایہو جہے حالات چ یہوواہ نے یوسف دی مدد کیویں کیتی۔
یہوواہ اوہدوں وی یوسف دے نال سی جدوں اوہ قید چ سی تے اوہنوں سارے قیدیاں دا اِنچارج بنا دِتا گیا سی۔ (پیراگراف نمبر 9 نُوں ویکھو۔)
9. کیہڑی گل توں پتہ چلدا اے کہ جدوں یوسف قید چ سی تے اوہدوں وی یہوواہ اوہدے نال سی؟ (پیدایش 39:21-23)
9 پیدایش 39:21-23 نُوں پڑھو۔ قید چ یوسف دی زندگی بڑی مشکل سی۔ پر اوس ویلے وی یہوواہ اوہدے نال سی تے اوہنے اوہنوں کامیابی دِتی سی۔ اوہنے اِنج کیویں کیتا؟ ہولی ہولی یوسف نے قیدخانے دے نگران دا بھروسا جت لیا، بالکل اُنج ای جیویں اوہنے فوطیفار دا بھروسا جتیا سی۔ کجھ عرصے بعد قیدخانے دے نگران نے یوسف نُوں سارے قیدیاں دا اِنچارج بنا دِتا۔ ذرا غور کرو کہ بائبل چ لکھیا اے کہ نگران اوہناں سارے کماں وَلّوں جیہڑے اوہنے یوسف نُوں دِتے سن، بے فکر سی۔ ایس مشکل ویلے چ یوسف دے کول ہُن اِک ایہو جیہا کم سی جدے چ اوہ مصروف رہ سکدا سی۔ ایہہ کِنّی وڈی تبدیلی سی۔ ذرا سوچو کہ اِک ایہو جیہا مُجرم جدے تے اِک وڈے سرکاری افسر دی بیوی دی عزت لُٹن دا اِلزام سی، اوہنوں اینی وڈی ذمےداری کیویں مل سکدی سی؟ ایہدی بس اِک ای وجہ سی جیہڑی پیدایش 39:23 توں پتہ چلدی اے۔ ایس ایت چ لکھیا اے: یہوواہ یوسف دے نال سی تے یہوواہ نے ہر کم چ اوہنوں کامیابی دِتی سی۔
10. شاید یوسف نُوں ایہہ کیوں نئیں لگ رہیا ہوئے گا کہ اوہنوں ہر چیز چ کامیابی مل رہی اے؟
10 ذرا فیر توں یوسف دے حالات نُوں اوہدی نظر نال ویکھن دی کوشش کرو۔ اوہدے تے جھوٹھا اِلزام لا کے اوہنوں قید چ پا دِتا گیا سی۔ تواڈے خیال چ کیہہ اوہنوں لگ رہیا ہوئے گا کہ اوہنوں ہر چیز چ کامیابی مل رہی اے؟ ایہناں حالاتاں چ یوسف کیہہ چاہ رہیا ہوئے گا؟ کیہہ اوہ ایہہ چاہ رہیا سی کہ اوہ قیدخانے دے نگران دی نظر چ بڑا چنگا بن جائے؟ نئیں۔ اوہ تے بس ایہہ چاہ رہیا ہوئے گا کہ اوہدے تے لگیا اِلزام مٹ جائے تے اوہ قید چوں آزاد ہو جائے۔ اوہنے تے اِک ہور قیدی نُوں وی کہیا کہ اوہ آزاد ہون دے بعد فرعون نال اوہدے وَلّوں گل کرے تاکہ اوہ ایس خوفناک قید چوں آزاد ہو سکے۔ (پیدایش 40:14) پر اوہ قیدی فرعون نال یوسف بارے گل کرنا بُھل گیا جدی وجہ توں یوسف نُوں ہور دو سالاں تک قید چ رہنا پیا۔ (پیدایش 40:23؛ 41:1، 14) پر ایس عرصے چ وی یہوواہ یوسف دے نال رہیا تے اوہنے اوہنوں کامیابی دِتی۔ آؤ ویکھنے آں کہ اوہنے اِنج کیویں کیتا؟
11. (الف) یہوواہ نے یوسف نُوں کیہڑی خاص صلاحیت دِتی؟ (ب) ایس صلاحیت دی وجہ توں یہوواہ دا مقصد کیویں پورا ہویا؟
11 جدوں یوسف قید چ سی تے یہوواہ نے فرعون نُوں دو خواب وکھائے جدی وجہ توں فرعون بڑا پریشان ہو گیا۔ فرعون ایہناں خواباں دا مطلب جاننا چاہندا سی۔ جدوں اوہنوں پتہ چلیا کہ یوسف خواباں دا مطلب دَس سکدا اے تے اوہنے اوہنوں بلایا۔ یہوواہ دی مدد نال یوسف نے فرعون نُوں اوہدے خواباں دا مطلب دَسیا تے نالے اوہنوں اِک چنگا مشورہ وی دِتا جنہوں سُن کے فرعون بڑا خوش ہویا۔جدوں فرعون نے ویکھیا کہ یہوواہ یوسف دے نال اے تے اوہنے یوسف نُوں مصر دے سارے اناج دی دیکھبھال دی ذمےداری دے دِتی۔ (پیدایش 41:38، 41-44) ایہدے بعد بڑا سخت کال پے گیا۔ ایہہ کال صرف مصر چ ای نئیں سگوں کنعان چ وی سی جتھے یوسف دے گھر والے رہندے سن۔ ہُن یوسف ایس قابل سی کہ اوہ اپنے گھر والیاں نُوں مرن توں بچا سکے تے اِنج اوہ نسل وی بچ سکدی سی جدے توں مسیح نے آنا سی۔
12. یہوواہ نے کیہڑے کیہڑے طریقیاں نال یوسف نُوں کامیابی دِتی؟
12 ذرا یوسف دی زندگی دے اوہناں واقعیاں تے غور کرو جنہاں بارے اوہنے سوچیا وی نئیں سی۔ ذرا سوچو کہ فوطیفار دے دل چ کنہے ایہہ گل پائی ہوئے گی کہ اوہ یوسف ورگے اِک عام جہے غلام تے دھیان دَوے؟ کنہے قیدخانے دے نگران دے دل چ ایہہ گل پائی ہوئے گی کہ اوہ یوسف ورگے اِک عام جہے قیدی نُوں اینی وڈی ذمہ داری دَوے؟ کنہے فرعون نُوں ایہو جہے خواب وکھائے کہ اوہ پریشان ہو گیا؟ تے کنہے یوسف نُوں اوہناں خواباں دا مطلب دَسن دی صلاحیت دِتی؟ ایس فیصلے دے پچھے کدا ہتھ سی کہ یوسف مصر دے سارے اناج دی دیکھ بھال کرے گا؟ (پیدایش 45:5) ایہدے چ کوئی شک نئیں کہ یہوواہ نے ای یوسف نُوں ہر چیز چ کامیابی دِتی۔ یوسف دے بھرا اوہنوں جانوں مار دینا چاہندے سن۔ پر یہوواہ نے حالات نُوں اِنج بدلیا کہ اوہدا مقصد پورا ہو سکے۔
یہوواہ توانوں کامیابی کیویں دیندا اے؟
13. ساڈیاں مشکلاں بارے ہمیشاں کیہڑی گل سچ نئیں ہوندی؟ وضاحت کرو۔
13 یوسف دے نال جو کجھ ہویا، اوہدے توں اَسی کیہہ سکھنے آں؟ کیہہ یہوواہ ہر مشکل چ ساڈی ڈھال بن جاندا اے؟ کیہہ اوہ ساڈی زندگی چ ہون والے ہر واقعے دا رُخ موڑ دیندا اے تاکہ بھیڑیاں چیزاں دے چنگے نتیجے نکلن؟ نئیں، پاک کلام چ ایہہ تلیم نئیں دِتی گئی۔ (واعظ 8:9؛ 9:11) پر اَسی اِک گل ضرور جاننے آں کہ جدوں سانوں کسے مشکل دا سامنا ہوندا اے تے یہوواہ نُوں پتہ ہوندا اے کہ ساڈے تے کیہہ بیت رہی اے تے جدوں اَسی اوہنوں مدد لئی پکارنے آں تے اوہ ساڈی سُن دا اے۔ (زبور 34:15؛ 55:22؛ یسعیاہ 59:1) ایس توں وی وڈی گل ایہہ وے کہ یہوواہ مشکلاں نُوں برداشت کرن چ ساڈی مدد کردا اے۔اوہ اِنج کیویں کردا اے؟
14. مشکل وقت چ یہوواہ ساڈی مدد کیویں کردا اے؟
14 اِک طریقہ جدے ذریعے یہوواہ مشکل وقت چ ساڈی مدد کردا اے، اوہ ایہہ وے کہ اوہ سانوں تسلی تے ہمت دیندا اے۔ اکثر اوہ اِنج ٹھیک اوس ویلے کردا اے جدوں سانوں ایہدی ضرورت ہوندی اے۔ (2-کُرنتھیوں 1:3، 4) بھرا عزیز دے نال وی اِنج ای ہویا۔ اوہ ترکمانستان چ رہندا سی تے اوہنوں اوہدے ایمان دی وجہ توں دو سال جیل دی سزا سُنائی گئی سی۔ اوہ کہندا اے: ”جیس دن میرے کیس دی سُنوائی سی، اوس دن اِک بھرا نے مینوں یسعیاہ 30:15وکھائی جدے چ لکھیا اے: اطمینان تے بھروسا رکھن چ تواڈا زور اے۔ ایس ایت نے ہمیشاں میری مدد کیتی اے کہ میں اپنا اطمینان قائم رکھاں تے ہر چیز لئی یہوواہ تے بھروسا رکھاں۔ جدوں میں جیل چ ساں تے ایس ایت تے غور کرن نال مینوں بڑی ہمت ملی۔“ کیہہ توانوں وی کوئی ایہو جیہا وقت یاد اے جدوں یہوواہ نے ٹھیک اوس ویلے توانوں ہمت تے تسلی دِتی جدوں توانوں ایہدی بوہت زیادہ ضرورت سی؟
15، 16. بھین ٹوری نال جو کجھ ہویا، اوہدے توں تُسی کیہہ سکھیا اے؟
15 اکثر کسے مشکل دے ختم ہون دے بعد سانوں ایہہ سمجھ آندی اے کہ یہوواہ نے اوس مشکل نُوں برداشت کرن چ کیویں ساڈی مدد کیتی سی۔ بھین ٹوری نال وی اِنج ای ہویا۔ اوہدا اِک پُتر سی جدا ناں میسن سی۔ میسن چھ سال تک کینسر دی بیماری نال لڑ دا رہیا پر اخیر اوہ فوت ہو گیا۔ بھین ٹور ی ایس وجہ توں بالکل ٹُٹ گئی۔ اوہنے کہیا: ”مینوں نئیں لگدا کہ اِک ماں لئی اپنے بچے دی موت توں وڈی کوئی تکلیف ہو سکدی اے۔ مینوں یقین اے کہ دُوجے ماں پیو وی منن گے کہ اپنے بچے نُوں کسے تکلیف چ ویکھنا، آپ اوس تکلیف چوں لنگھن نالوں زیادہ اذیتناک ہوندا اے۔“
16 جدوں بھین ٹوری دا پُتر بیمار سی تے اوہدے لئی ایہہ وقت بڑا مشکل سی۔ پر بعد چ اوہنے غور کیتا کہ یہوواہ نے اوس سارے وقت چ کیویں اوہدی مدد کیتی سی۔ اوہ کہندی اے: ”جدوں میں اوس ویلے بارے سوچنی آں جدوں میرا پُتر بیمار سی تے مینوں محسوس ہوندا اے کہ یہوواہ نے کیویں اوس سارے وقت چ ساڈا ساتھ دِتا۔ مثال لئی، جدوں میرا پُتر ایناں بیمار سی کہ اوہ کسے نُوں مل نئیں سکدا سی تے اوہدوں وی بھین بھرا دو دو گھنٹے دا سفر کر کے ہسپتال آندے سن۔ ساڈی ہمت ودھان لئی ہسپتال چ کوئی نہ کوئی بھین بھرا ضرور ہوندا سی۔ بھین بھراواں نے سانوں ہر اوہ چیز دِتی جدی سانوں ضرورت سی۔ مشکل توں مشکل وقت چ وی سانوں کسے چیز دی کمی نئیں ہوئی۔“ یہوواہ نے مشکلاں نُوں برداشت کرن لئی بھین ٹوری نُوں اوہ سب کجھ دِتا جدی اوہنوں ضرورت سی۔ نالے اوہنے میسن دی وی بڑی مدد کیتی۔—بکس ” یہوواہ نے صحی وقت تے سانوں اوہ سب کجھ دِتا جدی سانوں لوڑ سی“ نُوں ویکھو۔
یہوواہ وَلّوں مِلن والیاں برکتاں تے اپنا دھیان رکھو
17، 18. کیہڑی چیز ایس گل تے غور کرن تے یہوواہ دا شکر ادا کرن چ تواڈی مدد کرے گی کہ اوہ مشکل وقت چ وی تواڈے نال کھلوتا اے؟ (زبور 40:5)
17 زبور 40:5 نُوں پڑھو۔ بوہت سارے لوک پہاڑاں تے چڑھدے نیں۔ اوہناں دا مقصد ایہہ ہوندا اے کہ اوہ پہاڑ دی چوٹی تک پونچن۔ پر رستے چ بوہت ساریاں ایہو جہیاں تھانواں آندیاں نیں جتھے رُک کے اوہ آلے دوالے دی خوبصورتی نُوں ویکھ سکدے نیں۔ ایسے طرحاں جدوں تُسی پہاڑ ورگیاں مشکلاں چوں لنگھ رہے ہووو تے باقاعدگی نال تھوڑی دیر لئی رُکو تے غور کرو کہ یہوواہ کیویں تواڈی مدد کر رہیا اے تے توانوں کامیابی دے رہیا اے۔ ہر دن دے آخر تے اپنے آپ کولوں پچھو: ”اَج یہوواہ نے مینوں کیہڑی برکت دِتی اے؟ بھانویں کہ میری مشکل حالے ختم نئیں ہوئی پر فیر وی ایہنوں برداشت کرن چ یہوواہ میری مدد کیویں کر رہیا اے؟“ گھٹو گھٹ اِک ایہو جہی گل بارے سوچن دی کوشش ضرور کرو جدے ذریعے یہوواہ مشکل وقت چ تواڈا ساتھ دے رہیا اے تے توانوں کامیابی دے رہیا اے۔
18 ہوسکدا اے کہ تُسی یہوواہ کولوں ایہہ دُعا کر رہے ہووو کہ اوہ تواڈی مشکل نُوں ختم کر دَوے۔ اِنج کرنا صحی اے۔ (فِلپّیوں 4:6) پر سانوں ایس گل تے وی دھیان دینا چاہی دا اے کہ یہوواہ ایس مشکل ویلے چ سانوں کیہڑیاں برکتاں دے رہیا اے۔ ایس گل نُوں کدی نہ بھلو کہ یہوواہ نے وعدہ کیتا اے کہ اوہ مشکلاں نُوں برداشت کرن لئی سانوں طاقت دَوے گا تے ساڈی مدد کرے گا۔ ایس لئی ہمیشاں ایس گل لئی شکر گزار رہوو کہ یہوواہ ہر قدم تے تواڈا ساتھ دے رہیا اے۔ اِنج تُسی ویکھ سکو گے کہ یہوواہ مشکل وقت چ وی تواڈا ساتھ دے کے توانوں کامیابی دے رہیا اے، بالکل اُنج ای جیویں اوہنے یوسف نُوں دِتی سی۔—پیدایش 41:51، 52۔
گیت نمبر 32: یہوواہ ول ہووو
a جدوں اَسی مشکلاں چوں لنگھ رہے ہنے آں تے شاید سانوں لگے کہ یہوواہ ساڈے نال نئیں اے۔ شاید اَسی سوچئے کہ جدوں ساڈی مشکل ختم ہو جائے گی تے اوہدے توں ای پتہ چلے گا کہ یہوواہ ساڈے نال اے۔ پر یوسف دی زندگی چ جو کجھ ہویا،اوہدے توں پتہ چلدا اے کہ مشکلاں چ وی یہوواہ ہمیشاں اوہدے نال سی تے اوہنے ہر قدم تے یوسف نُوں کامیاب کیتا سی۔ ایس مضمون چ اَسی ویکھاں گے کہ یہوواہ مشکلاں چ وی اپنے بندیاں نُوں کیویں کامیاب کردا اے۔
b بائبل دِیاں صرف کجھ ای ایتاں چ دَسیا گیا اے کہ جدوں یوسف غلام سی تے شروع شروع چ اوہدی زندگی چ کیہڑیاں تبدیلیاں آئیاں۔ پر شاید اوہدی زندگی چ ایہہ تبدیلیاں اِک دم نئیں سگوں اِک لمے عرصے دے دوران آئیاں ہون گیاں۔
