1، 2.‏ (‏الف)‏جدوں پولُس رسول نے عبرانیوں دے ناں خط لکھیا تے اوہدوں یہودیہ چ حالات کیہو جہے سن؟ (‏ب)‏ایہہ خط عبرانی مسیحیاں لئی فائدےمند کیویں ثابت ہویا؟‏

 یسوع دی موت توں بعد اوہناں عبرانی مسیحیاں نُوں بوہت ساریاں مشکلاں دا سامنا ہویا جیہڑے یروشلم تے یہودیہ چ رہندے سن۔ مسیحی کلیسیا دے بنن دے تھوڑے چِر بعد ای اوہناں نُوں سخت اذیت دا سامنا کرنا پیا۔ (‏اعمال 8:‏1‏)‏ فیر ایہدے کوئی 20 سالاں بعد اوہناں نُوں کال تے غریبی دا سامنا کرنا پیا۔ (‏اعمال 11:‏27-‏30‏)‏ پر تقریباً 61 عیسوی چ مسیحیاں نُوں کسے حد تک سکون مِلیا۔ ایس عرصے دے دوران پولُس رسول نے خدا دی پاک روح دی رہنمائی چ اوہناں مسیحیاں نُوں اِک خط لکھیا۔ اوس خط چ پولُس رسول نے جیہڑیاں نصیحتاں تے ہدیتاں دِتیاں، اوہناں دی واقعی اوہناں مسیحیاں نُوں بڑی لوڑ سی کیونکہ آن والے وقت چ اوہناں تے ہور زیادہ مشکلاں آن والیاں سن۔‏

² عبرانی مسیحیاں نُوں بالکل صحی وقت تے پولُس دا خط مِلیا کیونکہ جیہڑے امن تے سکون دے دَور چ اوہ رہ رہے سن، اوہ بوہت چھیتی ختم ہون والا سی۔ ایس خط چ پولُس رسول نے ایہو جہیاں ہدیتاں دِتیاں جنہاں دی مدد نال اوہ مسیحی آن والے مشکل وقت نُوں برداشت کر سکدے سن۔ یسوع مسیح نے یروشلم دی تباہی بارے جیہڑی پیشین‌گوئی کیتی سی، اوہ بوہت چھیتی پوری ہون والی سی۔ (‏لُوقا 21:‏20‏)‏ سچ اے کہ نہ تے پولُس تے نہ ای یہودیہ چ رہن والے مسیحیاں نُوں ایہہ صحی طرحاں پتہ سی کہ ایہہ تباہی کدوں ہوئے گی۔ پر فیر وی ایس تباہی دے آن تک اوہناں کول جیہڑا وقت سی، اوہدے چ اوہ اپنے اندر صبر دی خوبی پیدا کر سکدے سن تے اپنے ایمان نُوں ہور مضبوط کر سکدے سن۔—‏عبرانیوں 10:‏25؛‏ 12:‏1، 2‏۔‏

3.‏ اَج سانوں عبرانیوں دے ناں خط تے دھیان کیوں دینا چاہی دا اے؟‏

³ بوہت چھیتی اَسی اِک ایہو جہی مصیبت دا سامنا کرن والے آں جیہڑی اوس مصیبت نالوں  کِتے وڈی ہوئے گی جدا سامنا عبرانی مسیحیاں نے کیتا سی۔ (‏متی 24:‏21؛‏ مُکاشفہ 16:‏14،‏ 16‏)‏ ایس لئی آؤ کجھ ایہو جہیاں ہدیتاں تے نصیحتاں تے غور کرنے آں جیہڑیاں یہوواہ نے عبرانی مسیحیاں نُوں دِتیاں سن۔ ایہناں تے غور کرن نال اَج سانوں وی بڑا فائدہ ہو سکدا اے۔‏

پختہ مسیحی بن دے جاؤ

4.‏ عبرانی مسیحیاں نُوں کیہڑے مسئلیاں دا سامنا کرنا پیا؟ (‏تصویر نُوں وی ویکھو۔)‏

⁴ پہلی صدی چ اوہناں مسیحیاں نُوں اِک بوہت وڈے مسئلے دا سامنا کرنا پیا جیہڑے پہلے یہودی سن۔ اِک وقت سی جدوں یہودی یہوواہ دی چُنی ہوئی قوم سن تے بوہت سالاں تک یروشلم اِک خاص شہر سی کیونکہ ایتھوں ای اوہ بادشاہ حکومت کردے سن جیہڑے یہوواہ دی حکمرانی دی نمائندگی کردے سن۔ ایسے شہر چ یہوواہ دی عبادت کرن لئی ہیکل سی۔ یہوواہ دے وفادار یہودی موسیٰ دی شریعت تے اوہناں حکماں تے عمل کردے سن جیہڑے مذہبی رہنما اوہناں نُوں سکھاندے سن۔ ایہناں حکماں چ کھان پین، ختنے تے غیریہودیاں نال پیش آن بارے حکم شامل سن۔ پر یسوع مسیح دی قربانی توں بعد یہوواہ اوہناں قربانیاں نُوں قبول نئیں کردا سی جیہڑیاں ہیکل چ چڑھائیاں جاندیاں سن۔ ایس لئی اوہناں مسیحیاں لئی نویں طریقے نال یہوواہ دی عبادت کرنا ایناں اسان نئیں سی جیہڑے پہلے یہودی سن۔ (‏عبرانیوں 10:‏1،‏ 4،‏ 10‏)‏ ایتھوں تک کہ پُختہ مسیحیاں جیویں کہ پطرس رسول نُوں وی کجھ تبدیلیاں مطابق ڈھلنا مشکل لگ رہیا سی۔ (‏اعمال 10:‏9-‏14؛‏ گلتیوں 2:‏11-‏14‏)‏ یہودی مذہبی رہنما ایہناں مسیحیاں دے نویں عقیدیاں دی وجہ توں ایہناں دی مخالفت کر رہے سن۔‏

5.‏ مسیحیاں نُوں کیہڑی گل توں خبردار رہن دی لوڑ سی؟‏

⁵ عبرانی مسیحیاں نُوں دو طرحاں دے لوکاں وَلّوں مخالفت دا سامنا کرنا پے رہیا سی۔ اِک تے یہودی مذہبی رہنماواں وَلّوں جنہاں نُوں لگدا سی کہ مسیحی لوک خدا دی تلیم توں پھر گئے نیں تے دُوجا کلیسیا چ کجھ مسیحیاں وَلّوں جیہڑے ایس گل تے زور دے رہے سن کہ مسیح دے پیروکاراں نُوں موسیٰ دی شریعت تے عمل کردے رہنا چاہی دا اے۔ شاید اوہ اِنج ایس لئی کہہ رہے سن تاکہ اوہ اذیت توں بچ سکن۔ (‏گلتیوں 6:‏12‏)‏ کیہڑی چیز نے ایہناں مسیحیاں دی مدد کیتی ہوئے گی کہ اوہ یہوواہ دے وفادار رہن؟‏

6.‏ پولُس رسول نے اپنے ہم‌ایماناں نُوں کیہہ کرن دی ہلاشیری دِتی؟ (‏عبرانیوں 5:‏14–‏6:‏1‏)‏

⁶ عبرانیوں دے ناں خط چ پولُس رسول نے اپنے ہم‌ایماناں نُوں ہلاشیری دِتی کہ اوہ خدا دے کلام دا گہرائی نال مطالعیا کرن۔ ‏(‏عبرانیوں 5:‏ 14–‏6:‏1 نُوں پڑھو۔)‏ اوہنے عبرانی صحیفیاں دے ذریعے اپنے ہم‌ایماناں نُوں دلیلاں دِتیاں کہ مسیحی جیس طریقے نال یہوواہ دی عبادت کردے نیں، اوہ اوس طریقے نالوں کِتے بہتر اے جیس طریقے نال یہودی یہوواہ دی عبادت کردے نیں۔‏ a پولُس رسول نُوں پتہ سی کہ جے اوہدے ہم‌ایمان یہوواہ بارے اپنے علم نُوں ودھان گے تے پاک کلام دِیاں سچائیاں نُوں گہرائی نال سمجھن گے تے اوہ اوہناں جھوٹھیاں گلاں نُوں پچھان سکن گے جیہڑیاں اوہناں نُوں یہوواہ توں دُور کر سکدیاں سن۔‏

7.‏ اَج سانوں کیہڑے مسئلیاں دا سامنا کرنا پیندا اے؟‏

⁷ عبرانی مسیحیاں وانگوں اَج سانوں وی ایہو جہے لوکاں دا سامنا ہوندا اے جیہڑے ایہہ ثابت کرن دی کوشش کردے نیں کہ یہوواہ دے معیار غلط نیں۔ کجھ لوک ساڈے تے ایس لئی اِعتراض کردے نیں کیونکہ اَسی اوہناں حکماں تے عمل کرنے آں جیہڑے بائبل چ جنسی معاملیاں بارے دِتے گئے نیں۔ ایہہ لوک کہندے نیں کہ اَسی بوہت ظالم آں تے لوکاں نال فرق کرنے آں۔ دُنیا دی سوچ دن بدن یہوواہ دی سوچ توں دُور ہوندی جا رہی اے۔ (‏اَمثال 17:‏15‏)‏ ایس لئی ایہہ بوہت ضروری اے کہ اَسی غلط سوچ نُوں پچھانیے تے ایہدے مطابق چلن توں بچئے۔ سانوں اپنے مخالفاں دِیاں گلاں دی وجہ توں نہ تے بے‌حوصلہ ہونا چاہی دا اے تے نہ ای یہوواہ توں دُور جانا چاہی دا اے۔—‏عبرانیوں 13:‏9‏۔‏

8.‏ کیہڑی چیز پُختہ مسیحی بنن چ ساڈی مدد کر سکدی اے؟‏

⁸ پولُس رسول نے عبرانی مسیحیاں نُوں نصیحت کیتی کہ اوہ پُختہ مسیحی بنن۔ اَج سانوں وی ایس نصیحت تے دھیان دینا چاہی دا اے۔ اِنج کرن چ ایہہ شامل اے کہ اَسی گہرائی نال پاک کلام دِیاں سچائیاں دا علم حاصل کرئیے تے یہوواہ دی سوچ نُوں اپنائیے۔ ایہہ اِک ایہو جیہا کم اے جیہڑا سانوں اپنی زندگی یہوواہ دے ناں کرن تے بپتسمہ لین توں بعد وی کردے رہنا چاہی دا اے۔ بھانویں سانوں یہوواہ دا گواہ بنے کافی لما چِر ہو گیا اے، فیر وی سانوں ساریاں نُوں پاک کلام نُوں روز پڑھنا تے ایہدے تے سوچ وچار کرنا چاہی دا اے۔ (‏زبور 1:‏2‏)‏ جدوں اَسی باقاعدگی نال بائبل دا مطالعیا کراں گے تے اَسی اپنی اوس خوبی نُوں ہور زیادہ نکھار سکاں گے جدا ذکر پولُس رسول نے عبرانیوں دے ناں خط چ کیتا یعنی کہ ایمان دی خوبی نُوں۔—‏عبرانیوں 11:‏1،‏ 6‏۔‏

ایمان رکھو تے اپنی جان بچاؤ

9.‏ عبرانی مسیحیاں نُوں مضبوط ایمان دی لوڑ کیوں سی؟‏

⁹ یہودیہ چ آن والی مصیبت توں بچن لئی عبرانی مسیحیاں نُوں مضبوط ایمان دی لوڑ سی۔ (‏عبرانیوں 10:‏37-‏39‏)‏ یسوع نے اپنے پیروکاراں نُوں آگاہ کیتا سی کہ جدوں اوہ ویکھن کہ فوجاں نے یروشلم نُوں گھیریا ہویا اے تے اوہ پہاڑاں وَل بھج جان۔ یسوع دی ایس آگاہی تے سارے مسیحیاں نُوں عمل کرن دی لوڑ سی فیر بھانویں اوہ شہر یروشلم چ رہ رہے سن یاں یہودیہ دے پِنڈ چ۔ (‏لُوقا 21:‏20-‏24‏)‏ اوس زمانے چ جدوں لوکاں نُوں دُشمن دی فوج توں خطرہ ہوندا سی تے پنڈاں چ رہن والے لوک شہراں چ بھج جاندے سن کیونکہ شہراں دے آلے دَوالے مضبوط دیواراں ہوندیاں سن۔ ایس لئی شہر یروشلم چ رہن دی بجائے پہاڑاں وَل بھجن دی ہدیت شاید کجھ لوکاں نُوں عجیب لگی ہوئے تے ایہدے تے عمل کرن لئی مسیحیاں نُوں مضبوط ایمان دی لوڑ سی۔‏

10.‏ مضبوط ایمان دی وجہ توں مسیحیاں نُوں کیہہ کرن چ مدد مِلی ہوئے گی؟ (‏عبرانیوں 13:‏17‏)‏

¹⁰ عبرانی مسیحیاں نُوں اوہناں لوکاں تے وی اپنے بھروسے نُوں مضبوط کرن دی لوڑ سی جنہاں دے ذریعے یسوع کلیسیا دی رہنمائی کر رہیا سی۔ جیہڑے لوک کلیسیا چ پیشوائی کر رہے سن، اوہناں نے مسیحیاں نُوں ایس بارے شاید کجھ خاص ہدیتاں دِتیاں کہ اوہناں نُوں یسوع دی آگاہی تے عمل کردے ہوئے کدوں تے کیویں بھجنا اے۔ ‏(‏عبرانیوں 13:‏17 نُوں پڑھو۔)‏ پولُس رسول نے اپنے ہم‌ایماناں نُوں کہیا کہ اوہ اوہناں لوکاں دے فرمانبردار ہون جیہڑے اوہناں دی پیشوائی کر رہے نیں۔ پولُس دی گل دا ایہہ مطلب نئیں سی کہ اوہ پیشوائی کرن والیاں دے ایس لئی فرمانبردار ہون کیونکہ ایہہ اوہناں دا فرض اے سگوں اوہ اوہناں تے بھروسا کرن دی وجہ توں اِنج  کرن۔ ایہدا مطلب اے کہ عبرانی مسیحیاں نُوں مصیبت دے آن توں پہلاں ای پیشوائی کرن والے بھراواں تے اپنے بھروسے نُوں ودھان دی لوڑ سی کیونکہ جے اوہ چنگے حالاتاں چ اوہناں دِیاں ہدیتاں نُوں من دے تے اوہناں لئی بھیڑے حالاتاں چ وی اِنج کرنا اسان ہونا سی۔‏

11.‏ اَج مسیحیاں لئی مضبوط ایمان رکھنا کیوں ضروری اے؟‏

¹¹ عبرانی مسیحیاں وانگوں سانوں وی اپنے ایمان نُوں مضبوط کرن دی لوڑ اے۔ اَسی اِک ایہو جہے دَور چ رہ رہے آں جدے چ زیادہ‌تر لوک ایس گل تے یقین نئیں رکھدے کہ بوہت چھیتی ایس دُنیا دا خاتمہ ہون والا اے سگوں اوہ ایس گل تے ایمان رکھن دی وجہ توں ساڈا مذاق اُڈاندے نیں۔ (‏2-‏پطرس 3:‏3، 4‏)‏ سچ اے کہ سانوں بائبل چ وڈی مصیبت بارے کجھ گلاں دَسیاں گئیاں نیں پر ایہو جہیاں بوہت ساریاں گلاں نیں جیہڑیاں اَسی نئیں جان دے۔ ایس لئی سانوں ایس گل تے اپنے ایمان نُوں مضبوط کرن دی لوڑ اے کہ یہوواہ بالکل صحی وقت تے ایس بھیڑی دُنیا نُوں ختم کر دَوے گا تے مصیبت دے اوس ویلے چ ساڈا خیال رکھے گا۔—‏حبقّوق 2:‏3‏۔‏

12.‏ کیہڑی چیز ساڈی مدد کرے گی کہ اَسی وڈی مصیبت دے دوران اپنی جان بچا سکئے؟‏

¹² اَج سانوں وی اوہناں بھراواں تے اپنے بھروسے نُوں ودھانا چاہی دا اے جنہاں دے ذریعے یہوواہ ساڈی رہنمائی کر رہیا اے۔ اَج یہوواہ ”‏وفادار تے سمجھدار غلام“‏ دے ذریعے ساڈی رہنمائی کردا اے تے سانوں ہدیتاں دیندا اے۔ (‏متی 24:‏45‏)‏ جدوں رومی فوج نے یروشلم نُوں گھیر لیا سی تے عبرانی مسیحیاں نُوں اپنی جان بچان لئی شاید کجھ ہدیتاں مِلیاں ہون گیاں۔ ایسے طرحاں جدوں وڈی مصیبت شروع ہوئے گی تے شاید سانوں وی ایہو جہیاں ہدیتاں مِلن جنہاں تے عمل کر کے اَسی اپنی جان بچ سکاں گے۔ ایس لئی سانوں ہُن توں ای اوہناں ہدیتاں تے اپنے بھروسے نُوں ودھان دی لوڑ اے جیہڑیاں تنظیم چ پیشوائی کرن والے بھرا سانوں دیندے نیں۔ جے سانوں ہُن اوہناں دِیاں ہدیتاں تے عمل کرنا مشکل لگدا اے تے وڈی مصیبت دے دوران ساڈے لئی اِنج کرنا ہور وی مشکل ہوئے گا۔‏

13.‏ مسیحیاں لئی عبرانیوں 13:‏5 چ لکھی نصیحت اینی فائدہ‌مند کیوں سی؟‏

¹³ جدوں عبرانی مسیحی اپنے شہر یاں پِنڈ چوں بھجن دی ہدیت مِلن دا اِنتظار کر رہے سن تے ایس دوران اوہناں نُوں اپنی زندگی نُوں سادہ رکھن تے پیسے نال پیار کرن توں بچن دی لوڑ سی۔ ‏(‏عبرانیوں 13:‏5 نُوں پڑھو۔)‏ اوہناں وچوں کجھ مسیحی کال تے غریبی دا سامنا کر چُکے سن۔ (‏عبرانیوں 10:‏32-‏34‏)‏ سچ اے کہ پہلے اوہ خوش‌خبری دی خاطر مصیبتاں سہن لئی تیار سن پر شاید ہُن اوہناں وچوں کجھ ایہہ سوچن لگ پئے سن کہ غریبی تے بُرے وقت توں بچن لئی اوہناں کول زیادہ پیسہ ہونا چاہی دا اے۔ پر سچ تے ایہہ وے کہ جدوں یروشلم نے تباہ ہونا سی تے پیسہ اوہناں دے کم نئیں آنا سی۔ (‏یعقوب 5:‏3‏)‏ اصل چ جیہڑا وی مسیحی اپنے پیسے تے چیزاں نال پیار کردا سی اوہنوں اپنے گھر بار نُوں چھڈ کے بھجنا بوہت مشکل لگیا ہوئے گا۔‏

14.‏ جے ساڈا ایمان مضبوط اے تے اَسی ہُن توں ای پیسے تے چیزاں بارے کیہو جہے فیصلے کراں گے؟‏

¹⁴ جے اَسی ایس گل تے مضبوط ایمان رکھنے آں کہ یہوواہ بوہت چھیتی ایس بھیڑی دُنیا نُوں ختم کر دَوے گا تے فیر اَسی اپنی زندگی چ زیادہ توں زیادہ پیسہ کمان تے چیزاں حاصل کرن نُوں اہمیت نئیں دَواں گے۔ وڈی مصیبت دے دوران پیسہ لوکاں دے کم نئیں آئے گا۔ بائبل چ دَسیا گیا اے کہ لوک اپنی چاندی سڑکاں تے سُٹ دین گے۔ پر کیوں؟ کیونکہ اوہناں نُوں احساس ہو جائے گا کہ یہوواہ دے غضب دے دن چ اوہناں دا سونا چاندی اوہناں نُوں بچا نئیں سکدا۔ (‏حِزقی‌ایل 7:‏19‏)‏ ایس لئی سانوں زیادہ توں زیادہ پیسہ حاصل کرن دی بجائے ایہو جہے فیصلے کرنے چاہی دے نیں جنہاں توں اَسی اپنی تے اپنے گھر والیاں دِیاں ضرورتاں پوریاں کرن دے نال نال یہوواہ دی خدمت وی کر سکئے۔ سمجھداری نال فیصلے کرن چ ایہہ وی شامل اے کہ اَسی بِلاوجہ قرضے نہ لئیے تے اپنا زیادہ‌تر وقت اپنیاں چیزاں دی دیکھ‌بھال کرن چ نہ لائیے۔ سانوں ایس گل دا وی خیال رکھنا چاہی دا اے کہ اَسی اپنیاں چیزاں نال حدوں ودھ پیار نہ کرئیے۔ (‏متی 6:‏19،‏ 24‏)‏ جیویں جیویں ایس دُنیا دا خاتمہ نیڑے آ رہیا اے، سانوں ایہہ فیصلہ کرنا پووے گا کہ اَسی یہوواہ تے بھروسا کراں گے یاں اپنے پیسے تے چیزاں تے۔‏

 توانوں صبر دی لوڑ اے

15.‏ عبرانی مسیحیاں نُوں صبر نال یہوواہ دی خدمت نُوں جاری رکھن دی لوڑ کیوں سی؟‏

¹⁵ جیویں جیویں یہودیہ چ حالات وِگڑدے جا رہے سن، عبرانی مسیحیاں نُوں صبر نال یہوواہ دی خدمت جاری رکھن دی لوڑ سی۔ (‏عبرانیوں 10:‏36‏)‏ بھانویں کہ کجھ عبرانی مسیحی ظلم دا سامنا کر چُکے سن پر ایہناں چوں زیادہ‌تر اوس ویلے مسیحی بنے سن جدوں مسیحیاں دے حالات کسے حد تک بہتر سن۔ پولُس نے اپنے اوہناں ہم‌ایماناں نُوں کہیا کہ بھانویں اوہ ایمان دے سخت اِمتحاناں چوں لنگھے نیں پر اوہناں نُوں ایس توں وی زیادہ ظلم سہن تے مردے دم تک یسوع وانگوں وفادار رہن لئی تیار رہنا چاہی دا اے۔ (‏عبرانیوں 12:‏4‏)‏ جیویں جیویں یہودی مسیحی بن رہے سن اونویں اونویں دُوجے یہودی اوہناں دے ہور خلاف ہو رہے سن نالے اوہناں تے ہور ظلم کرن لگ پئے سن۔ ایہدے توں کجھ سال پہلاں جدوں پولُس یروشلم چ مُنادی کر رہیا سی تے لوکاں دی اِک بِھیڑ نے اوہدے تے حملہ کر دِتا۔ 40 توں زیادہ یہودیاں نے ایہہ قسم کھادی سی کہ جدوں تک اوہ پولُس نُوں قتل نہ کر دین، اوہ کجھ نئیں کھان پین گے۔ (‏اعمال 22:‏22؛‏ 23:‏12-‏14‏)‏ لوکاں دی سخت نفرت تے ظلم دے باوجود اوہناں مسیحیاں نُوں عبادت لئی اِک دُوجے نال جمع ہون، مُنادی کرن تے اپنے ایمان نُوں مضبوط رکھن دی لوڑ سی۔‏

16.‏ عبرانیوں دے ناں خط تے غور کرن نال سانوں مشکلاں تے اذیت بارے صحی سوچ رکھن چ مدد کیویں مِلدی اے؟ (‏عبرانیوں 12:‏7‏)‏

¹⁶ کیہڑی چیز نے عبرانی مسیحیاں دی مدد کیتی کہ اوہ صبر نال مخالفت نُوں برداشت کر سکن؟ پولُس رسول جان دا سی کہ اوہدے ہم‌ایماناں نُوں ایہہ سمجھن دی لوڑ اے کہ مصیبتاں نُوں برداشت کرن نال اوہناں نُوں کیہڑے فائدے ہون گے۔ ایس لئی اوہنے دَسیا کہ جدوں اِک مسیحی نُوں اپنے ایمان دی وجہ توں کوئی مشکل برداشت کرنی پیندی اے تے اوہدوں اوس مسیحی دی تربیت ہوندی اے۔ ‏(‏عبرانیوں 12:‏7 نُوں پڑھو۔)‏ ایس تربیت دی وجہ توں اوہ اپنیاں خوبیاں نُوں نکھارن تے اپنے اندر ہور خوبیاں پیدا کرن دے قابل ہوندا اے۔ جدوں عبرانی مسیحیاں نے غور کیتا ہوئے گا کہ مشکلاں نُوں برداشت کرن دے کِنّے چنگے نتیجے نکلدے نیں تے اوہناں لئی صبر نال ایہناں نُوں برداشت کرنا اسان ہویا ہوئے گا۔—‏عبرانیوں 12:‏11‏۔‏

17.‏ پولُس رسول نے ظلم سہن بارے کیہہ سکھ لیا سی؟‏

 ¹⁷ پولُس رسول نے عبرانی مسیحیاں نُوں ہلاشیری دِتی کہ اوہ ڈٹ کے مشکلاں دا سامنا کرن تے ہمت نہ ہارن۔ پولُس اوہناں نُوں ایہہ گل ایس لئی کہہ سکدا سی کیونکہ مسیحی بنن توں پہلاں اوہ آپ مسیحیاں تے ظلم کردا ہوندا سی۔ اوہ جان دا سی کہ مسیحیاں نال کِنّاں بھیڑا سلوک کیتا جاندا اے۔ اوہ صبر نال ظلم نُوں برداشت کرنا وی جان دا سی کیونکہ مسیحی بنن توں بعد اوہنوں وی مخالفت تے ظلم دا سامنا کرنا پیا سی۔(‏2-‏کُرنتھیوں 11:‏23-‏25‏)‏ ایس لئی اوہ ظلم سہن بارے مسیحیاں نُوں نصیحت کر سکدا سی۔ اوہنے عبرانی مسیحیاں نُوں یاد دَوایا کہ ظلم سہندے ویلے اوہناں نُوں اپنے آپ تے بھروسا کرن دی بجائے یہوواہ تے بھروسا کرنا چاہی دا اے۔ پولُس دلیری نال کہہ سکدا سی:‏ یہوواہ میرا مددگار اے مَیں نئیں ڈراں گا۔—‏عبرانیوں 13:‏6‏۔‏

18.‏ مستقبل بارے کیہڑی گل جانن نال سانوں ظلم نُوں برداشت کرن دی ہمت ملے گی؟‏

¹⁸ ساڈے بوہت سارے بھین بھرا ہُن وی اذیت دا سامنا کر رہے نیں۔ اَسی اوہناں لئی دُعا کر کے اوہناں دا ساتھ دے سکنے آں تے کدی کدار دُوجے طریقیاں نال وی اوہناں دی مدد کر سکنے آں۔ (‏عبرانیوں 10:‏33‏)‏ بائبل چ دَسیا گیا اے کہ اوہناں ساریاں تے ظلم کیتا جائے گا جیہڑے مسیح یسوع دے شاگرد بن کے خدا دی عبادت کرنا چاہندے نیں۔ (‏2-‏تیمُتھیُس 3:‏12‏)‏ ایس لئی سانوں ساریاں نُوں اپنے آپ نُوں آن والے وقت لئی تیار کرن دی لوڑ اے۔ آؤ اَسی یہوواہ تے بھروسا کردے رہیے تے ایس گل تے اپنے یقین نُوں مضبوط کرئیے کہ یہوواہ ہر مشکل نُوں برداشت کرن چ ساڈی مدد کرے گا تے اوہ صحی وقت تے اپنے وفادار بندیاں نُوں آرام تے سکون دَوے گا۔—‏2-‏تھسلُنیکیوں 1:‏7، 8‏۔‏

19.‏ اَسی وڈی مصیبت لئی اپنے آپ نُوں کیویں تیار کر سکنے آں؟ (‏تصویر نُوں وی ویکھو۔)‏

¹⁹ ایہدے چ کوئی شک نئیں کہ پولُس رسول نے عبرانیوں دے ناں جیہڑا خط لکھیا، اوہدے توں پہلی صدی دے مسیحی آن والی مصیبت لئی اپنے آپ نُوں تیار کر سکے ہون گے۔ پولُس نے اپنے ہم‌ایماناں دا حوصلہ ودھایا کہ اوہ پاک کلام دِیاں سچائیاں دا گہرا علم حاصل کرن تے ایہناں نُوں چنگی طرحاں سمجھن دی کوشش کرن۔ اِنج کرن نال اوہ اوس تلیم نُوں پچھان سکدے سن تے اوہنوں رَد کر سکدے سن جیہڑی اوہناں دے ایمان نُوں کمزور کر سکدی سی۔ اوہنے اپنے ہم‌ایماناں نُوں ایہہ ہلاشیری وی دِتی کہ اوہ اپنے ایمان نُوں ہور مضبوط کرن تاکہ اوہ یسوع مسیح تے کلیسیا چ پیشوائی کرن والے بھراواں دِیاں ہدیتاں تے فوراً عمل کر سکن۔ ایہدے علاوہ اوہنے مسیحیاں دی مدد کیتی کہ اوہ مشکلاں نُوں برداشت کردے ویلے ایہہ یاد رکھن کہ ایہناں دے ذریعے اوہناں نُوں اپنے پیار کرن والے اسمانی باپ کولوں تربیت پان دا موقع مِلدا اے۔ دُعا اے کہ اَسی پاک روح دی رہنمائی چ لکھیاں ایہناں ہدیتاں تے عمل کرئیے۔ فیر اَسی آخر تک یہوواہ دے وفادار رہ سکاں گے۔—‏عبرانیوں 3:‏14‏۔‏