سچ اے کہ جدوں یسوع نے اپنے شاگرداں نُوں یادگیری منان دا حکم دِتا تے اوس ویلے اوہ 70 شاگرد اوتھے موجود نئیں سن۔ پر ایہدا ایہہ مطلب نئیں اے کہ اوہناں نے یسوع نُوں چھڈ دِتا سی یاں یسوع اوہناں توں خوش نئیں سی۔ اصل چ اوس ویلے یسوع صرف اپنے رسولاں نال وقت گزارنا چاہندا سی۔‏

یسوع مسیح اپنے 12 شاگرداں توں وی خوش سی تے 70 توں وی۔ اوہنے پہلے اپنے بوہت سارے شاگرداں چوں 12 نُوں چُنیا تے اوہناں نُوں رسول کہیا۔ (‏لُوقا 6:‏12-‏16‏)‏ یسوع اوس ویلے گلیل چ سی جدوں اوہنے اپنے 12 رسولاں نُوں بلا‌یا تے اوہناں نُوں بادشاہی دی خوش‌خبری دی مُنادی کرن تے شفا دین لئی گھلیا۔ (‏لُوقا 9:‏1-‏6‏)‏ بعد چوں اوہنے یہودیہ چ 70 ہور شاگرداں نُوں چُنیا تے اوہناں نُوں دو دو کر کے گھلیا۔ (‏لُوقا 9:‏51؛‏ 10:‏1‏)‏ ایہدا مطلب اے کہ فرق فرق علاقیاں چ یسوع دے شاگرد سن جیہڑے اوہدے بارے مُنادی کردے سن۔‏

جیہڑے یہودی یسوع مسیح دے شاگرد بن گئے سن، اوہ ہر سال شاید اپنے گھر والیاں نال مِل کے فسح دی عید مناندے سن۔ (‏خروج 12:‏6-‏11،‏ 17-‏20‏)‏ جدوں یسوع مسیح دی موت دا وقت نیڑے آیا تے اوہ اپنے رسولاں نال یروشلم گیا۔ پر اوہنے یہودیہ، گلیل تے پیریہ چ رہن والے اپنے سارے شاگرداں نُوں اپنے نال فسح دی عید منان لئی نئیں بلا‌یا۔ ایہدے توں پتہ چلدا اے کہ یسوع مسیح اوس موقعے تے صرف اپنے رسولاں نال رہنا چاہندا سی۔ اوہنے اپنے رسولاں نُوں کہیا:‏ ”‏میری بڑی خواہش سی کہ مَیں تکلیف سہن توں پہلاں تواڈے نال فسح دا کھانا کھانواں۔“‏—‏لُوقا 22:‏15‏۔‏

ایہدی اِک اہم وجہ سی۔ بوہت چھیتی یسوع خدا دے اوس ”‏میمنے دے طور تے اپنی جان قربان کرن والا سی جیہڑا دُنیا دے گُناہ دُور لے جاندا اے۔“‏ (‏یوحنا 1:‏29‏)‏ ایہہ سب کجھ یروشلم چ ہونا سی جتھے اِک لمے چِر توں یہوواہ دے حضور قربانیاں چڑھائیاں جا رہیاں سن۔ فسح دے میمنے توں بنی‌اِسرائیل نُوں اوہ وقت یاد آندا سی جدوں یہوواہ نے اوہناں نُوں مصر دی غلامی توں رہائی دَوائی سی۔ پر یسوع دی قربانی نے ایس توں وی ودھ کے کجھ کرنا سی۔ اوہدی قربانی توں سارے انساناں نُوں گُناہ تے موت دی غلامی توں رہائی ملنی سی۔ (‏1-‏کُرنتھیوں 5:‏7، 8‏)‏ ایس قربانی دی وجہ توں 12 رسولاں نے مسیحی کلیسیا دی نِیہہ بن جانا سی۔ (‏اِفسیوں 2:‏20-‏22‏)‏ ایہہ بڑی دلچسپ گل اے کہ مُقدس شہر یروشلم دے 12 بنیادی پتھر نیں جنہاں تے میمنے دے رسولاں دے 12 ناں لکھے نیں۔ (‏مُکاشفہ 21:‏10-‏14‏)‏ ایہدے توں پتہ چلدا اے کہ وفادار رسولاں نے یہوواہ دے مقصد نُوں پورا کرن چ بڑا اہم کردار ادا کرنا سی۔ ایس لئی ایہہ گل صاف سمجھ آندی اے کہ کیوں یسوع صرف اپنے رسولاں نال آخری فسح تے اوہ تقریب منانا چاہندا سی جیہڑی اوہنے فسح منان توں بعد قائم کیتی سی یعنی مالک دی یاد گیری تقریب۔‏

یسوع دے 70 شاگرد تے ہور دوسرے شاگرد ایس کھانے تے اوہدے نال موجود نئیں سن۔ پر اوہناں سارے شاگرداں نُوں یاد گیری تقریب توں فائدہ ہونا سی جنہاں نے یسوع دے وفادار رہنا سی۔ اوہ سارے شاگرد بعد چوں یہوواہ دی پاک روح نال مسح ہوئے تے بادشاہی دے اوس عہد چ داخل ہوئے جدا ذکر اوس رات یسوع نے کیتا سی۔—‏لُوقا 22:‏29، 30‏۔‏