1، 2.‏ یہوواہ نے سانوں اِنج کیوں بنایا اے کہ سانوں دُوجیاں نُوں دین نال خوشی ملے؟‏

 یہوواہ نے سانوں اِنج بنایا اے کہ سانوں لین نالوں زیادہ دین چ خوشی مِلدی اے۔ (‏اعمال 20:‏35‏)‏ پر کیہہ ایہدا ایہہ مطلب اے کہ جدوں دُوجے سانوں کجھ دیندے نیں تے سانوں خوشی نئیں ہوندی؟ نئیں، ایہہ گل نئیں اے۔ اَسی ساریاں نے ویکھیا ہوئے گا کہ جدوں دُوجے سانوں تحفہ دیندے نیں تے سانوں کِنّی خوشی مِلدی اے۔ پر سانوں اوس ویلے ہور زیادہ خوشی مِلدی اے جدوں اَسی کسے نُوں کجھ دینے آں۔ ایہہ صلاحیت یہوواہ وَلّوں اِک نعمت اے۔ پر کیویں؟‏

² ایس صلاحیت دی وجہ توں اَسی اپنی خوشی نُوں ودھا سکنے آں۔ یہوواہ جان دا اے کہ اَسی جِنّی زیادہ دُوجیاں لئی محبت وکھاواں گے تے اوہناں دی مدد کراں گے اونی زیادہ سانوں خوشی ملے گی۔ ایہہ کِنّی زبردست گل اے نا کہ یہوواہ نے سانوں بناندے ویلے ساڈے اندر ایہہ شاندار صلاحیت پائی اے۔—‏زبور 139:‏14‏۔‏

3.‏ بائبل چ یہوواہ نُوں خوش‌دل خدا کیوں کہیا گیا اے؟‏

³ بائبل چ سانوں ایہہ یقین دَوایا گیا اے کہ دُوجیاں نُوں دین نال خوشی مِلدی اے۔ ایس لئی جدوں اَسی پڑھنے آں کہ یہوواہ خوش‌دل خدا اے تے اَسی چنگی طرحاں سمجھ سکنے آں کہ اوہدے بارے ایہہ گل کیوں کہی گئی اے۔ (‏1-‏تیمُتھیُس 1:‏11‏)‏ اصل چ یہوواہ نے ای دُوجیاں نُوں دین چ پہل کیتی اے۔ جِنّاں اوہ دُوجیاں نُوں دیندا اے اوناں کوئی ہور نئیں دے سکدا۔ اوہدے ای ذریعے سانوں زندگی مِلی اے،اَسی ٹُردے پھردے آں تے موجود آں۔ (‏اعمال 17:‏28‏)‏ واقعی ہر شاندار نعمت تے ہر ودھیا تحفہ یہوواہ وَلّوں ای مِلدا اے۔—‏یعقوب 1:‏17‏۔‏

4.‏ کیہڑی چیز ہور زیادہ خوشی حاصل کرن چ ساڈی مدد کرے گی؟‏

⁴ اَسی وی اوس خوشی نُوں محسوس کرنا چاہنے آں جیہڑی دُوجیاں نُوں دین نال مِل سکدی اے۔ اِنج کرن لئی اَسی یہوواہ وانگوں دُوجیاں نُوں کُھلے دل نال دے سکنے آں۔ (‏اِفسیوں 5:‏1‏)‏ ایس مضمون چ اَسی غور کراں گے کہ یہوواہ نے دین دے معاملے چ ودھیا مثال کیویں قائم کیتی اے۔ اَسی ایہہ وی سکھاں گے کہ اَسی اوس ویلے کیہہ کر سکنے آں جدوں اَسی دُوجیاں لئی بوہت کجھ کرنے آں پر سانوں لگدا اے کہ اوہ ساڈے شکرگزار نئیں نیں۔ ایہناں گلاں تے غور کرن نال اَسی اپنی اوس خوشی نُوں ودھا سکنے آں جیہڑی دین نال مِلدی اے۔‏

 یہوواہ وانگوں کُھلے دل نال دَوو

5.‏ یہوواہ نے سانوں کیہڑیاں چیزاں دِتیاں نیں؟‏

⁵ یہوواہ دا دل بوہت وڈا اے۔ پر اوہ ایہہ گل کیہڑے طریقیاں نال ظاہر کردا اے؟ ایہدیاں کجھ مثالاں تے غور کرو۔ یہوواہ سانوں ضرورت دِیاں چیزاں دیندا اے۔‏ شاید ساڈے کول بوہت مہنگیاں مہنگیاں چیزاں تے نہ ہون۔ پر یہوواہ دا شکر اے کہ ساڈے وچوں زیادہ‌تر دے کول ضرورت دی ہر شے ہوندی اے۔ مثال لئی، یہوواہ ہمیشاں ایس گل دا خیال رکھدا اے کہ ساڈے کول کھان پین دِیاں شیواں،کپڑے تے رہن لئی جگہ ہووے۔ (‏زبور 4:‏8؛‏ متی 6:‏31-‏33؛‏ 1-‏تیمُتھیُس 6:‏6-‏8‏)‏ کیہہ یہوواہ صرف فرض سمجھ کے ساڈیاں ضرورتاں نُوں پورا کردا اے؟ بالکل نئیں۔ تے فیر اوہ اِنج کیوں کردا اے؟‏

6.‏ اَسی متی 6:‏25، 26 توں کیہہ سکھنے آں؟‏

⁶ یہوواہ ساڈیاں ضرورتاں نُوں ایس لئی پورا کردا اے کیونکہ اوہ سانوں پیار کردا اے۔ ذرا متی 6:‏25، 26 چ لکھی یسوع دی گل تے غور کرو۔ ‏(‏ایہناں ایتاں نُوں پڑھو۔)‏ اوہنے یہوواہ دِیاں بنائیاں ہوئیاں چیزاں دی مثال دِتی۔ اوہنے پرندیاں بارے کہیا:‏ ”‏اوہ نہ تے بیہہ بوندے نیں، نہ واڈھی کردے نیں تے نہ ای گوداماں چ جمع کردے نیں۔ پر فیر وی تواڈا اسمانی باپ اوہناں نُوں کھانا دیندا اے۔“‏ ایہدے بعد یسوع نے ایہہ سوال کیتا:‏ ”‏کیہہ تُسی اوہناں نالوں بوہتے اہم نئیں او؟“‏ یسوع مسیح سانوں ایس مثال توں ایہہ سکھانا چاہندا سی کہ جے یہوواہ جانوراں نُوں ایناں اہم سمجھدا اے تے اوہدی نظر چ اوہدے وفادار بندے کِنّے اہم ہون گے۔ نالے جے اوہ جانوراں دِیاں ضرورتاں پوریاں کر سکدا اے تے اَسی پکا یقین رکھ سکنے آں کہ اوہ ساڈیاں ضرورتاں نُوں وی پورا کرے گا۔ جیویں اِک چنگا باپ محبت دی وجہ توں اپنے خاندان دِیاں ضرورتاں پوریاں کردا اے اونویں ای یہوواہ محبت دی وجہ توں ساڈیاں ضرورتاں نُوں پورا کردا اے۔—‏زبور 145:‏16؛‏ متی 6:‏32‏۔‏

7.‏ یہوواہ وانگوں دُوجیاں دی مدد کرن دا اِک طریقہ کیہہ اے؟ (‏تصویر نُوں وی ویکھو۔)‏

⁷ یہوواہ وانگوں سانوں وی محبت دی وجہ توں دُوجیاں نُوں ضرورت دِیاں چیزاں دینیاں چاہی دِیاں نیں۔ مثال لئی، کیہہ تُسی کسے ایہو جہے بھین بھرا نُوں جان دے او جنہوں کھان پین دِیاں چیزاں یاں کپڑیاں دی لوڑ اے؟ یہوواہ خدا تواڈے ذریعے اوس بھین بھرا دی مدد کر سکدا اے۔ لوک یہوواہ دے بندیاں نُوں خاص طور تے ایس گل دی وجہ توں جان دے نیں کہ اوہ مصیبت دے وقت دل کھول کے دُوجیاں دی مدد کردے نیں۔ مثال لئی، کورونا دی وبا دے دوران ساڈے بھین بھراواں نے ضرورت‌مند بھین بھراواں نُوں کھانا، کپڑے تے ضرورت دِیاں ہور شیواں دِتیاں۔ ایہدے علاوہ بوہت سارے بھین بھراواں نے کُھلے دل نال عطیات وی دِتے۔ ایہناں عطیات نُوں کورونا دے دوران پوری دُنیا چ بھین بھراواں دی مدد کرن لئی استمال کیتا گیا۔ عطیات دین والے بھین بھراواں نے عبرانیوں 13:‏16 تے عمل کیتا جتھے لکھیا اے:‏ دُوجیاں دا بھلا کرنا تے اوہناں نال اپنیاں چیزاں وَنڈنا نہ بُھلو کیونکہ خدا ایہو جہیاں قربانیاں توں خوش ہوندا اے۔‏

8.‏ یہوواہ سانوں کیہہ کرن دی طاقت دیندا اے؟ (‏فِلپّیوں 2:‏13‏)‏

 ⁸ یہوواہ سانوں طاقت دیندا اے۔‏ یہوواہ چ بے اِنتہا طاقت اے تے اوہ خوشی نال ایہہ طاقت اپنے بندیاں نُوں دیندا اے۔ ‏(‏فِلپّیوں 2:‏13 نُوں پڑھو۔)‏ کیہہ تُسی کدی کسے ازمیش دا مقابلہ کرن یاں کسے مشکل نُوں برداشت کرن لئی یہوواہ کولوں طاقت منگی اے؟ یاں شاید تُسی یہوواہ کولوں بس ایہہ دُعا کیتی ہوئے کہ اوہ پورے دن دے کماں نُوں کرن لئی توانوں طاقت دَوے۔ جدوں یہوواہ ساڈیاں ایہو جہیاں دُعاواں دا جواب دیندا اے تے اَسی وی پولُس رسول وانگوں کہہ سکنے آں:‏ ”‏خدا مینوں اپنی طاقت نال ہر طرحاں دے حالاتاں دا سامنا کرن دی ہمت دیندا اے۔“‏—‏فِلپّیوں 4:‏13‏۔‏

9.‏ اَسی اپنی طاقت نُوں استمال کرن دے معاملے چ یہوواہ دی مثال تے کیویں عمل کر سکنے آں؟ (‏تصویر نُوں وی ویکھو۔)‏

⁹ سچ اے کہ ساڈے کول یہوواہ جِنّی طاقت نئیں اے تے نہ ای اَسی اوہدے وانگوں اپنی طاقت دُوجیاں نُوں دے سکنے آں۔ پر فیر وی اَسی یہوواہ دی مثال تے عمل کر سکنے آں۔ پر کیویں؟ اَسی اپنی طاقت نُوں دُوجیاں دی مدد کرن لئی استمال کر سکنے آں۔ مثال لئی، اَسی کسے وڈیرے یاں بیمار بھین بھرا دی گھر دے کماں چ مدد کر سکنے آں یاں دکان توں اوہنوں سودا سامان لیا کے دے سکنے آں۔ جے ساڈے حالات اجازت دیندے نیں تے اَسی اپنی عبادت‌گاہ دی صفائی کرن تے ایہدی دیکھ‌بھال کرن دے کم چ مدد کرسکنے آں۔ جے اَسی ایہو جہے کماں چ اپنی طاقت استمال کراں گے تے اَسی اپنے بھین بھراواں نُوں فائدہ پونچا رہے ہونواں گے۔‏

10.‏ اَسی اپنیاں گلاں نال دُوجیاں نُوں فائدہ کیویں پونچا سکنے آں؟‏

¹⁰ کدی نہ بُھلو کہ ساڈیاں گلاں چ وی بوہت طاقت اے۔ کیہہ تواڈے ذہن چ کوئی ایہو جیہا بھین بھرا آندا اے جدے کماں لئی تُسی اوہدی تعریف کر سکدے او؟ یاں کیہہ توانوں کسے ایہو جہے بھین بھرا بارے پتہ اے جنہوں تسلی دی لوڑ اے؟ جے ہاں تے ضرور اوس بھین بھرا نُوں دَسو کہ تُسی اوہدی کِنّی قدر کردے او تے اوہنوں کِنّاں پیار کردے او۔ تُسی اوہنوں ایہہ گل آمنے سامنے، فون کر کے یاں فیر کارڈ، میسج یاں ای‌میل گھل کے دَس سکدے او۔ ایس بارے سوچ کے پریشان نہ ہووو کہ تُسی اوہنوں کیہہ کہوو گے۔ جے تُسی دِلوں اپنے بھین بھراواں نُوں کوئی چھوٹی جہی گل وی کہوو گے تے اوہناں نُوں بڑا فائدہ ہوئے گا۔ شاید اوہناں نُوں یہوواہ دے وفادار رہن تے ہمت نہ ہارن لئی اوسے گل دی لوڑ ہوئے جیہڑی تُسی کہی اے۔—‏اَمثال 12:‏25؛‏ اِفسیوں 4:‏29‏۔‏

11.‏ یہوواہ اپنی حکمت کیویں استمال کردا اے؟‏

¹¹ یہوواہ سانوں حکمت دیندا اے۔‏ یعقوب نے لکھیا:‏ ”‏جے تواڈے وچوں کسے چ حکمت دی کمی اے تے اوہ خدا کولوں منگدا رہوے .‏ .‏ .‏ کیونکہ خدا ناراض ہوئے بغیر ساریاں نُوں دل کھول کے دیندا اے۔“‏ (‏یعقوب 1:‏5‏)‏ ایس ایت توں پتہ چلدا اے کہ یہوواہ اپنی حکمت نُوں صرف اپنے کول نئیں رکھدا سگوں اوہ کُھلے دل نال ایہنوں دُوجیاں نُوں وی دیندا اے۔ ایہدے علاوہ غور کرو کہ جدوں یہوواہ دُوجیاں نُوں حکمت دیندا اے تے اوہ ”‏ناراض ہوئے بغیر“‏ یعنی ”‏جِھڑکے بغیر“‏ اِنج کردا اے۔ جدوں وی اَسی اوہدے کولوں رہنمائی منگنے آں تے اوہ کدی وی سانوں ایس گل توں شرمندہ نئیں کردا کہ ساڈے چ حکمت دی کمی اے۔ ایہدی بجائے اوہ تے آپ سانوں کہندا اے کہ اَسی اوہدے کولوں حکمت منگئے۔—‏اَمثال 2:‏1-‏6‏۔‏

12.‏ اَسی کیہڑے طریقیاں نال اپنی حکمت توں دُوجیاں نُوں فائدہ پونچا سکنے آں؟‏

 ¹² کیہہ یہوواہ وانگوں اَسی وی اپنی حکمت توں دُوجیاں نُوں فائدہ پونچانے آں؟ (‏زبور 32:‏8‏)‏ یہوواہ دے بندیاں کول دُوجیاں نُوں اوہ گلاں دَسن دے بوہت سارے موقعے ہوندے نیں جیہڑیاں اوہناں نے سکھیاں نیں۔ مثال لئی، اَسی اکثر نویں مبشراں نُوں مُنادی کرنا سکھانے آں۔ کلیسیا دے بزرگ بڑے صبر نال خادماں تے بپتسمہ‌یافتہ بھراواں دی ایہہ سکھن چ مدد کردے نیں کہ اوہ کلیسیا چ اپنیاں ذمے‌داریاں نُوں کیویں پورا کر سکدے نیں۔ تے جیہڑے بھین بھراواں کول تعمیر تے مرمت دے کم دا تجربہ اے، اوہ دُوجے بھین بھراواں نُوں تنظیم دِیاں عمارتاں نُوں بنان تے ایہناں دی دیکھ‌بھال کرن دی تربیت دیندے نیں۔‏

13.‏ دُوجیاں نُوں تربیت دیندے ویلے اَسی یہوواہ دی مثال تے کیویں عمل کر سکنے آں؟‏

¹³ جے تُسی کسے نُوں تربیت دیندے او تے اوہناں نُوں یہوواہ وانگوں اپنی حکمت توں فائدہ پونچاؤ۔ یاد رکھو کہ یہوواہ کُھلے دل نال دُوجیاں نُوں حکمت دیندا اے۔ ایسے طرحاں سانوں وی کُھلے دل نال اوہناں لوکاں نُوں اپنے علم تے تجربے توں فائدہ پونچانا چاہی دا اے جنہاں نُوں اَسی تربیت دے رہے ہُنے آں۔ سانوں ایہہ سوچ کے اپنا علم دُوجیاں نال وَنڈن توں پچھے نئیں ہٹنا چاہی دا کہ کِتے اَگے چل کے اوہ ساڈی جگہ نہ لے لین۔ سانوں ایہہ وی نئیں سوچنا چاہی دا کہ ”‏مینوں وی تے کسے نے نئیں سکھایا تے ایس بندے نُوں وی آپ ای سکھنا چاہی دا اے۔“‏ یہوواہ دے بندیاں لئی ایہو جہی سوچ رکھنا بالکل وی مناسب نئیں اے۔ ایہدی بجائے جیہڑے بھین بھراواں نُوں اَسی تربیت دینے آں، اَسی اوہناں نال نہ صرف خوشی خوشی اپنا علم ونڈنے آں سگوں اوہناں واسطے اپنی جان دین لئی وی تیار رہنے آں۔ (‏1-‏تھسلُنیکیوں 2:‏8‏)‏ اَسی چاہنے آں کہ اَگے چل کے اوہ وی دُوجیاں نُوں تلیم دین دے لائق بنن۔ (‏2-‏تیمُتھیُس 2:‏1، 2‏)‏ جدوں اَسی کُھلے دل نال اپنا علم تے تجربہ دُوجیاں نال ونڈاں گے تے سانوں بڑی خوشی ملے گی تے سکھن والے لوک اَگے چل کے ہور لوکاں نُوں سکھا کے خوشی حاصل کرن گے۔ اِنج ایہہ سلسلہ چلدا رہوے گا۔‏

جدوں دُوجے ساڈے لئی شکرگزاری نئیں وکھاندے

14.‏ جدوں اَسی دُوجیاں لئی کجھ کرنے آں تے اوہناں وچوں زیادہ‌تر لوک بدلے چ کیہہ کردے نیں؟‏

¹⁴ جدوں اَسی دُوجیاں لئی، خاص کر اپنے بھین بھراواں لئی کُھلے دل نال کجھ کرنے آں تے اکثر اوہ ایہدے لئی ساڈے بڑے شکرگزار ہوندے نیں۔ اوہ شاید کوئی کارڈ لکھ کے یاں کسے ہور طریقے نال ساڈا شکریہ کردے نیں۔ (‏کُلسّیوں 3:‏15‏)‏ جدوں اوہ اِنج کردے نیں تے ساڈی خوشی ودھ جاندی اے۔‏

15.‏ جے دُوجے ساڈے لئی شکرگزاری نئیں وکھاندے تے سانوں کیہہ یاد رکھنا چاہی دا اے؟‏

¹⁵ ایہہ گل وی سچ اے کہ کدی کدار لوک اوہناں کماں لئی سانوں شکریہ نئیں کہندے جیہڑے اَسی اوہناں لئی کرنے آں۔ ہو سکدا اے کہ کدی کدار سانوں لگے کہ دُوجیاں نُوں ایس گل توں کوئی فرق نئیں پیندا کہ اَسی اوہناں دی مدد کرن لئی اپنا کِنّاں وقت، طاقت تے پیسہ لایا اے۔ جدوں ساڈے نال اِنج ہوندا اے تے اَسی مایوس ہون توں کیویں بچ سکنے آں؟ اعمال 20:‏35 نُوں یاد رکھو جیہڑی ایس مضمون دی مرکزی ایت اے۔ ایس ایت توں پتہ چلدا اے کہ سانوں دُوجیاں نُوں کجھ دین نال جیہڑی خوشی مِلدی اے، اوہدا تعلق ایس گل نال نئیں اے کہ دُوجے ساڈے کِنّے شکر گزار نیں۔ جے اوہ ساڈے شکرگزار نئیں وی ہوندے تے اوہدوں وی اَسی خوش رہ سکنے آں۔ پر کیویں؟ آؤ ایہدے کجھ طریقیاں تے غور کریئے۔‏

16.‏ دُوجیاں نُوں دیندے ویلے سانوں کیس گل تے اپنا دھیان رکھنا چاہی دا اے؟‏

¹⁶ یہوواہ دی مثال تے عمل کرن دی کوشش کرو۔‏ یہوواہ ساریاں نُوں چنگیاں چیزاں دیندا اے فیر بھانویں اوہ ایہدے لئی شکرگزار ہون یاں نہ ہون۔ (‏متی 5:‏43-‏48‏)‏ یہوواہ نے ساڈے نال وعدہ کیتا اے کہ جے اَسی دُوجیاں نُوں دیندے ویلے بدلے چ کجھ مِلن دی امید نئیں رکھاں گے تے اوہ سانوں بڑا اجر دَوے گا۔ (‏لُوقا 6:‏35‏)‏ کجھ واپس مِلن چ کسے دا شکریہ وی شامل اے۔ بھانویں کوئی ساڈے لئی شکرگزاری وکھائے یاں نہ وکھائے، یہوواہ ہمیشاں سانوں اوس نیکی دا بدلہ دَوے گا جیہڑی اَسی دُوجیاں لئی خوشی نال کرنے آں۔—‏اَمثال 19:‏17؛‏ 2-‏کُرنتھیوں 9:‏7‏۔‏

17.‏ دُوجیاں نُوں دین دی سب توں اہم وجہ کیہہ اے؟ (‏لُوقا 14:‏12-‏14‏)‏

 ¹⁷ جے اَسی چاہنے آں کہ اَسی دُوجیاں لئی کجھ کردے ویلے اپنی سوچ صحی رکھیئے تے سانوں لُوقا 14:‏12-‏14 تے عمل کرنا چاہی دا ا ے۔ ‏(‏ایہناں ایتاں نُوں پڑھو۔)‏ اوہناں لوکاں نُوں دعوت تے بلا‌نا یاں اوہناں لوکاں لئی کجھ کرنا غلط نئیں اے جیہڑے بدلے چ ساڈے لئی وی اِنج کر سکدے نیں۔ پر جے سانوں احساس ہوندا اے کہ اَسی ایس لئی دُوجیاں لئی کجھ کرنے آں تاکہ اوہ وی بدلے چ ساڈے لئی کجھ کرن تے فیر اَسی کیہہ کر سکنے آں؟ اوس ویلے اَسی اوس مشورے تے عمل کرن دی کوشش کر سکنے آں جیہڑا یسوع نے سانوں دِتا سی۔ اَسی اوہناں لوکاں نُوں دعوت تے بلا سکنے آں یاں اوہناں دی مدد کر سکنے آں جیہڑے بدلے چ ساڈے لئی اِنج نئیں کر سکدے۔ اِنج اَسی خوش رہ سکاں گے کیونکہ اَسی یہوواہ دی مثال تے عمل کر رہے ہونواں گے۔ ایہی سوچ اوس ویلے وی خوش رہن چ ساڈی مدد کرے گی جدوں دُوجے ساڈے لئی شکرگزاری نئیں وکھاندے۔‏

18.‏ کیہڑی چیز ساڈی مدد کرے گی کہ اَسی دُوجیاں دی نیت تے شک نہ کریئے؟‏

¹⁸ دُوجیاں دی نیت تے شک نہ کرو۔‏ (‏1-‏کُرنتھیوں 13:‏7‏)‏ جے کوئی بندہ ساڈی محبت یاں مدد لئی شکرگزاری نئیں وکھاندا تے اپنے آپ کولوں پچھو:‏ ”‏کیہہ اوہ واقعی ناشکرا اے یاں فیر بس اوہ سانوں شکریہ کہنا بُھل گیا اے؟“‏ ایہدے علاوہ ہور وی کئی گلاں ہو سکدیاں نیں جنہاں دی وجہ توں دُوجے ساڈا اوس طرحاں شکریہ نئیں کردے جیویں اَسی توقع کر رہے ہُنے آں۔ کجھ لوک دُوجیاں وَلّوں مِلن والی مدد دی دِلوں قدر کردے نیں پر اوہناں نُوں ایہدا اظہار کرنا مشکل لگدا اے۔ ایہدے علاوہ شاید کئیاں نُوں دُوجیاں کولوں مدد لین چ شرمندگی محسوس ہوندی اے کیونکہ اوہ سوچدے نیں کہ اِک وقت سی جدوں اوہ دُوجیاں دی مدد کردے ہوندے سن پر ہُن اوہناں نُوں آپ مدد دی لوڑ اے۔ وجہ بھانویں کوئی وی ہوئے، جے اَسی دِلوں اپنے بھین بھراواں نُوں پیار کرنے آں تے اَسی اوہناں دی نیت تے شک نئیں کراں گے تے خوشی نال اوہناں دی مدد کردے رہواں گے۔—‏اِفسیوں4:‏2۔‏

19، 20.‏ ایہہ کیوں ضروری اے کہ اَسی دُوجیاں لئی کجھ کرن توں بعد صبر نال کم لئیے؟ (‏تصویر نُوں وی ویکھو۔)‏

¹⁹ صبر نال کم لوو۔‏ کُھلے دل نال دین بارے بادشاہ سلیمان نے لکھیا:‏ اپنی روٹی پانی چ سُٹ دے تے بوہت دِناں بعد ایہہ تینوں دُبارہ ملے گی۔ (‏واعظ 11:‏1‏)‏ ایس گل توں اَسی سکھنے آں کہ جدوں اَسی کُھلے دل نال کسے لئی کجھ کرنے آں تے شاید اوہ کافی لمے چِر بعد سانوں شکریہ کہوے۔ ایس بارے آؤ اِک تجربے تے غور کرنے آں۔‏

²⁰ کئی سال پہلاں اِک حلقے دے نگہبان دی بیوی نے اِک بھین  دا حوصلہ ودھان لئی اوہنوں اِک خط لکھیا۔ اوس بھین نے نواں نواں بپتسمہ لیا سی۔ اوس خط چ حلقے دے نگہبان دی بیوی نے ایس گل تے زور دِتا کہ یہوواہ دا وفادار رہنا کِنّاں ضروری اے۔ ایہدے اَٹھ سال بعد بپتسمہ لین والی اوس بھین نے حلقے دے نگہبان دی بیوی نُوں جواب چ اِک خط لکھیا جدے چ اوہنے کہیا:‏ ”‏توانوں ایہہ گل نئیں پتہ پر مَیں توانوں دَسنا چاہنی آں کہ پچھلے کجھ سالاں چ تواڈیاں اوہناں گلاں دی وجہ توں میرا کِنّاں حوصلہ ودھیا جیہڑیاں تُسی مینوں اپنے خط چ لکھیاں سن۔ تواڈے محبت نال بھرے لفظاں توں مینوں بڑی ہمت مِلی۔تے جیس ایت دا تُسی خط چ ذکر کیتا سی، اوہنوں تے مَیں کدی نئیں بُھل سکدی۔ اوس ایت نے میرے دل تے بڑا گُوڑھا اثر کیتا۔“‏ a خط چ اوس بھین نے اپنے مسئلیاں دا ذکر کرن توں بعد کہیا:‏ ”‏کدی کدی میرا دل کردا سی کہ مَیں سب کجھ چھڈ دَواں، یہوواہ نُوں چھڈ دَواں، اپنیاں ساریاں ذمے‌داریاں نُوں چھڈ دَواں۔ پر فیر مَیں اوس ایت نُوں یاد کرنی ساں جیہڑی تُسی خط چ لکھی سی۔ ایہنوں پڑھ کے مینوں یہوواہ دے وفادار رہن دی ہمت مِلدی سی۔“‏ اوس بھین نے ایہہ وی لکھیا:‏ ”‏ایہناں اَٹھ سالاں چ جیس چیز توں مینوں سب توں زیادہ مدد مِلی اوہ تواڈا خط سی۔“‏ ذرا سوچو کہ اینے سالاں بعد اوس بھین دا خط پڑھ کے حلقے دے نگہبان دی بیوی نُوں کِنّی خوشی ہوئی ہوئے گی۔ اَسی جنہاں لوکاں لئی کجھ کرنے آں، ہو سکدا اے کہ اوہ وی بڑے لمے چِر بعد ساڈے لئی شکرگزاری وکھان۔‏

21.‏ تُسی ایہہ عزم کیوں کیتا اے کہ تُسی یہوواہ وانگوں کُھلے دل نال دُوجیاں نُوں دیندے رہوو گے؟‏

²¹ اَسی سکھیا اے کہ یہوواہ نے سانوں ایس خاص صلاحیت نال بنایا اے کہ دُوجیاں نُوں کجھ دے کے سانوں خوشی مِلدی اے۔ ایہہ سچ اے کہ سانوں اوس ویلے بڑی خوشی ہوندی اے جدوں کوئی ساڈے لئی کجھ کردا اے۔ پر جدوں اَسی دُوجیاں لئی کجھ کرنے آں تے ایہدے توں سانوں ہور وی زیادہ خوشی مِلدی اے۔ تے جدوں اوہ ایہدی قدر کردے نیں تے سانوں بڑا چنگا لگدا اے۔ بھانویں کوئی ساڈی مدد لئی شکرگزار ہوئے یاں نہ ہوئے، اَسی ایس گل توں خوش ہو سکنے آں کہ اَسی صحی کم کیتا اے۔ کدی نہ بُھلو کہ جو کجھ تُسی دُوجیاں نُوں دیندے او، یہوواہ توانوں ایس توں وی کِتے زیادہ دے سکدا اے۔ (‏2-‏تواریخ 25:‏9‏)‏ ساڈے لئی ایس توں زیادہ خوشی دی گل کیہہ ہو سکدی اے کہ یہوواہ سانوں ساڈی نیکی دا اجر دَوے۔ آؤ ایہہ عزم کریئے کہ اَسی اپنے اسمانی باپ وانگوں کُھلے دل نال دُوجیاں نُوں دیندے رہواں گے۔‏