1، 2.‏ یہوواہ دے بندے خوش کیوں رہندے نیں؟ (‏یعقوب 1:‏22-‏25‏)‏

 یہوواہ تے اوہدا پُتر چاہندا اے کہ اَسی خوش رہیے۔ زبور 119:‏2 چ لکھیا اے:‏ اوہ لوک خوش رہندے نیں جیہڑے اوہدیاں نصیحتاں تے عمل کردے نیں، جیہڑے پورے دل نال اوہنوں تلاش کردے نیں۔ یسوع مسیح نے وی دَسیا سی کہ اوہ لوک خوش رہندے نیں جیہڑے خدا دے کلام نُوں سُن دے نیں تے اوہدے تے عمل کردے نیں۔—‏لُوقا 11:‏28‏۔‏

² یہوواہ دے بندے خوش رہندے نیں تے اوہناں دے خوش رہن دی بوہت ساریاں وجہ نیں۔ پر اِک خاص وجہ ایہہ وے کہ اوہ باقاعدگی نال خدا دے کلام نُوں پڑھدے نیں تے ایہدے چ لکھیاں گلاں تے عمل کرن دی پوری کوشش کردے نیں۔‏‏—‏یعقوب 1:‏22-‏25 نُوں پڑھو۔‏

3.‏ خدا دے کلام چ لکھیاں گلاں تے عمل کرن نال سانوں کیہڑے فائدے ہوندے نیں؟‏

³ جدوں اَسی خدا دے ”‏کلام تے عمل“‏ کرنے آں تے ایہدے توں سانوں کئی فائدے ہوندے نیں۔ مثال لئی، سانوں پتہ اے کہ اِنج کرن نال یہوواہ خوش ہوندا اے تے یہوواہ نُوں خوش کرن نال سانوں وی خوشی مِلدی اے۔ (‏واعظ 12:‏13‏)‏ ایہدے علاوہ خدا دے کلام چ لکھیاں گلاں دے مطابق زندگی گزارن نال ساڈے اپنے خاندان تے کلیسیا چ دُوجیاں نال تعلقات بہتر ہو جاندے نیں۔ یقیناً تواڈے نال وی اِنج ضرور ہویا ہوئے گا۔ نالے اَسی ایہو جہیاں بوہت ساریاں مشکلاں توں وی بچ جانے آں جنہاں دا سامنا اوہناں لوکاں نُوں کرنا پیندا اے جیہڑے یہوواہ دے اصولاں تے نئیں چلدے۔ اَسی وی داؤد وانگوں سوچنے آں جنہے اِک گیت چ یہوواہ دے حکماں، معیاراں تے فیصلیاں دا ذکر کرن دے بعد کہیا:‏ ایہناں نُوں منن نال بڑا اجر مِلدا اے۔—‏زبور 19:‏7-‏11‏۔‏

4.‏ ساڈے لئی خدا دے کلام نُوں پڑھنا تے ایہدے تے عمل کرنا مشکل کیوں ہو سکدا اے؟‏

⁴ ایہہ گل وی سچ اے کہ خدا دے کلام نُوں پڑھنا تے ایہدے چ لکھیاں گلاں تے عمل کرنا ہمیشاں اسان نئیں ہوندا۔ بھانویں کہ ساڈے ساریاں دی زندگی بڑی مصروف اے پر فیر وی سانوں بائبل نُوں پڑھن تے ایہدے تے سوچ وچار کرن لئی وقت کڈھنا چاہی دا اے تاکہ اَسی ایہہ سمجھ سکئے کہ یہوواہ ساڈے  کولوں کیہہ چاہندا اے۔ ایس لئی آؤ کجھ ایہو جہے مشوریاں تے غور کرنے آں جیہڑے باقاعدگی نال خدا دے کلام نُوں پڑھن چ ساڈی مدد کرن گے۔ فیر اَسی ایس گل تے وی غور کراں گے کہ کیہڑی چیز ساڈی مدد کر سکدی اے تاکہ اَسی بائبل چ لکھیاں گلاں تے سوچ وچار کرئیے تے ایہناں تے عمل کرن دے طریقے لبھئے۔‏

خدا دے کلام نُوں پڑھن لئی وقت کڈھو

5.‏ کیہڑیاں ذمے‌داریاں ساڈا بوہت سارا وقت لے لیندیاں نیں؟‏

⁵ یہوواہ دے زیادہ‌تر بندیاں دی زندگی بڑی مصروف اے۔ ساڈا بوہت سارا وقت ایہو جہیاں ذمے‌داریاں نُوں نبھان چ لگ جاندا اے جیہڑیاں بائبل دے مطابق بوہت اہم نیں۔ (‏1-‏تیمُتھیُس 5:‏8‏)‏ مثال لئی، ساڈے وچوں زیادہ‌تر نُوں اپنی تے اپنے خاندان دِیاں ضرورتاں نُوں پورا کرن لئی نوکری کرنی پیندی اے۔ کئی مسیحیاں نُوں اپنے بیمار تے وڈیرے رشتے‌داراں دی دیکھ‌بھال کرنی پیندی اے۔ ایہدے علاوہ سانوں ساریاں نُوں اپنی صحت دا خیال رکھن لئی وی وقت دی ضرورت ہوندی اے۔ ایہناں ذمے‌داریاں دے علاوہ ساڈے کول کلیسیا چ وی ذمے‌داریاں ہوندیاں نیں جنہاں وچوں اِک اہم ذمے‌داری جوش نال مُنادی دا کم کرنا اے۔ ایہناں ساریاں ذمے‌داریاں نُوں پورا کرن دے نال نال تُسی بائبل نُوں پڑھن، ایہدے چ لکھیاں گلاں تے سوچ وچار کرن تے ایہناں تے عمل کرن لئی وقت کیویں کڈھ سکدے او؟‏

6.‏ تُسی بائبل پڑھن نُوں اہمیت کیویں دے سکدے او؟ (‏تصویر نُوں وی ویکھو۔)‏

⁶ بائبل پڑھنا اوہناں کماں وچوں اِک اے جیہڑے مسیحیاں لئی ”‏زیادہ اہم“‏ نیں۔ ایس لئی سانوں اپنی زندگی چ ایہنوں اہمیت دینی چاہی دی اے۔ (‏فِلپّیوں 1:‏10‏)‏ پہلے زبور چ اِک ایہو جہے بندے دا ذکر کیتا گیا اے جیہڑا خوش رہندا اے۔ اوہدے بارے ایہہ دَسیا گیا اے:‏ اوہنوں یہوواہ دے قانون توں خوشی مِلدی اے تے اوہ دن رات اوہدے قانون ہولی آواز چ پڑھدا اے۔ (‏زبور 1:‏1، 2‏)‏ ایہدے توں پتہ چلدا اے کہ بائبل نُوں پڑھن لئی سانوں وقت کڈھنا چاہی دا اے۔ بائبل نُوں پڑھن دا بہترین وقت کیہڑا ہو سکدا اے؟ ایہدے بارے ساڈے ساریاں دا جواب فرق ہوسکدا اے۔ اسان لفظاں چ کہیے تے ایہہ اوہ وقت ہوئے گا جدوں اَسی باقاعدگی نال بائبل پڑھ سکنے آں۔ ایس بارے ذرا بھرا وکٹر دی گل تے غور کرو۔ اوہنے کہیا:‏ ”‏بھانویں کہ مینوں صبح چھیتی اُٹھنا تھوڑا مشکل لگدا اے پر فیر وی مینوں صبح دے وقت بائبل پڑھنا بوہت پسند اے کیونکہ اوس ویلے میرا دھیان نئیں بھٹک دا۔ اوس ویلے میرا دماغ زیادہ چوکس ہوندا اے تے مَیں بائبل دِیاں گلاں تے زیادہ چنگی طرحاں دھیان دے پانا واں۔“‏ کیہہ  توانوں وی صبح دے وقت بائبل پڑھنا چنگا لگدا اے؟ اپنے آپ کولوں پچھو:‏ ”‏میرے لئی بائبل پڑھن دا بہترین وقت کیہڑا ہوئے گا؟“‏

جو کجھ پڑھدے او، اوہدے تے سوچ وچار کرو

7، 8.‏ کیہڑی گل دی وجہ توں شاید اَسی اوہناں گلاں توں پورا فائدہ حاصل نہ کر سکئے جیہڑیاں اَسی بائبل چ پڑھنے آں؟ مثال دَوو۔‏

⁷ بائبل پڑھدے ویلے سانوں اِک ہور گل دا وی خیال رکھن دی لوڑ اے۔ ذرا سوچو کہ کیہہ کدی تواڈے نال اِنج ہویا اے کہ تُسی کجھ پڑھیا تے تُسی اوہنوں فوراً ای بُھل گئے؟ ساڈے ساریاں نال اِنج ضرور ہویا ہوئے گا۔ پر اِنج بائبل پڑھدے ویلے وی ہو سکدا اے۔ شاید اَسی منصوبہ بنایا اے کہ اَسی ہر روز بائبل دے کجھ باب پڑھاں گے۔ ایہہ اچھی گل اے۔ سانوں بائبل پڑھن لئی منصوبے بنانے چاہی دے نیں تے ایہناں تے عمل کرن دی کوشش کرنی چاہی دی اے۔ (‏1-‏کُرنتھیوں 9:‏26‏)‏ سچ اے کہ جدوں اَسی بائبل پڑھنا شروع کراں گے تے سانوں فائدہ ہوئے گا۔ پر ایہدے توں زیادہ فائدہ حاصل کرن لئی سانوں کجھ ہور وی کرن دی لوڑ اے۔‏

⁸ ایس بارے ذرا اِک مثال تے غور کرو۔ پودیاں دے ودھن تے زندہ رہن لئی بارش بوہت ضروری ہوندی اے۔ پر جے تھوڑے وقت چ بوہت تیز بارش ہوئے گی تے زمین تے بوہت زیادہ پانی جمع ہو جائے گا۔ ایس صورت چ ہور زیادہ بارش دی لوڑ نئیں ہوندی۔ اصل چ زمین نُوں بارش دا پانی جذب کرن لئی وقت چاہی دا ہوندا اے۔ ایس لئی ہلکی ہلکی بارش پودیاں لئی چنگی ہوندی اے کیونکہ ایہدا پانی نال نال ای مٹی چ جذب ہوندا رہندا اے۔ ایسے طرحاں سانوں بائبل نُوں اینی تیزی نال نئیں پڑھنا چاہی دا کہ ایہہ ساڈے دل چ ای نہ اُتر سکے تے سانوں ایہہ یاد ای نہ رہوے کہ اَسی کیہہ پڑھیا سی تے اوہدے تے کیویں عمل کرنا اے۔—‏یعقوب 1:‏24‏۔‏

9.‏ جے سانوں تیز تیز بائبل پڑھن دی عادت اے تے سانوں کیہہ کرنا چاہی دا اے؟‏

⁹ کیہہ توانوں کدی لگیا اے کہ تُسی بڑی تیز تیز بائبل پڑھ رہے او؟ جے ایہہ گل اے تے توانوں کیہہ کرنا چاہی دا اے؟ ایہنوں ہولی ہولی پڑھو۔ تے جو کجھ تُسی پڑھ رہے او یاں پڑھ چُکے او، اوہدے تے سوچ وچار کرن دی کوشش کرو۔ اِنج کرنا بالکل وی مشکل نئیں اے۔ ایہدے لئی تُسی بائبل دا مطالعیا کرن دے وقت نُوں ودھا سکدے او تاکہ تُسی پڑھیاں ہوئیاں گلاں تے سوچ وچار کر سکو۔ یاں فیر تُسی بائبل چوں کجھ ایتاں پڑھ سکدے او تے باقی وقت اوہدے تے سوچ وچار کرن تے لا سکدے او۔ بھرا وکٹر جدا پہلے وی ذکر ہویا اے، اوہنے کہیا:‏ ”‏مَیں بائبل دا تھوڑا جیہا حصہ پڑھنا واں جیویں کہ اِک باب۔ سویرے سویرے بائبل پڑھن دی وجہ توں مَیں پورا دن  اوہناں گلاں تے سوچ وچار کر سکنا واں جیہڑیاں مَیں پڑھیاں ہوندیاں نیں۔“‏ بھانویں تُسی بائبل دے زیادہ باب پڑھو یاں تھوڑے، اہم گل ایہہ وے کہ تُسی ایہنوں ہولی ہولی پڑھو تاکہ تُسی ایہدے تے صحی طرحاں سوچ وچار کر سکو۔—‏زبور 119:‏97‏؛ ایس بکس نُوں ویکھو:‏  ‏”‏سوچ وچار کرن لئی سوال‏۔“‏

10.‏ مثال دے کے دَسو کہ تُسی اوہناں گلاں تے کیویں عمل کر سکدے او جیہڑیاں تُسی بائبل چ پڑھدے او؟ (‏1-‏تھسلُنیکیوں 5:‏17، 18‏)‏

¹⁰ بھانویں تُسی جدوں وی تے جِنّے وی وقت لئی بائبل پڑھو پر ایس بارے ضرور سوچو کہ جو کجھ تُسی پڑھیا اے، اوہدے تے تُسی عمل کیویں کرو گے۔ بائبل پڑھدے ویلے اپنے آپ کولوں پچھو:‏ ”‏جو کجھ مَیں پڑھیا اے، اوہدے تے مَیں ہُن تے مستقبل چ کیویں عمل کر سکنا واں؟“‏ ایس گل تے غور کرن لئی فرض کرو کہ تُسی 1-‏تھسلُنیکیوں 5:‏17، 18 نُوں پڑھیا اے۔ ‏(‏ایہناں ایتاں نُوں پڑھو۔)‏ ایہناں ایتاں نُوں پڑھن توں بعد تُسی تھوڑی دیر لئی رُک سکدے او تے سوچ سکدے او کہ کیہہ تُسی دل کھول کے دُعا کردے او تے کِنّی وار دُعا کردے او۔ ایہدے علاوہ تُسی اوہناں گلاں بارے وی سوچ سکدے او جنہاں لئی تُسی یہوواہ دے شکرگزار او۔ شاید تُسی ایہہ عزم کر سکدے او کہ ہر واری دُعا کردے ویلے تُسی یہوواہ دِیاں تِن برکتاں لئی اوہدا شکر ادا کرو گے۔ جے تُسی صرف کجھ منٹاں لئی وی اوہناں گلاں تے سوچ وچار کرو گے جیہڑیاں تُسی بائبل چوں پڑھیاں نیں تے تُسی کلام نُوں صرف سُنو گے ای نئیں سگوں ایہدے تے عمل وی کر سکو گے۔ ذرا سوچو کہ جدوں تُسی ہر روز اِنج کرو گے تے توانوں کِنّاں فائدہ ہوئے گا۔ تُسی ہور چنگے مسیحی بن جاؤ گے۔ پر جے بائبل پڑھدے ویلے توانوں لگدا اے کہ توانوں تے اپنے اندر بوہت زیادہ تبدیلیاں لیان دی لوڑ اے تے فیر تُسی کیہہ کر سکدے او؟‏

سمجھداری نال منصوبے بناؤ

11.‏ کدی کدار اَسی کیس گل توں بے‌حوصلہ ہو سکنے آں؟ اِک مثال دَوو۔‏

¹¹ جدوں تُسی بائبل پڑھدے او تے شاید توانوں محسوس ہوئے کہ ایہو جہیاں بوہت ساریاں گلاں نیں جنہاں چ توانوں بہتری لیان دی لوڑ اے تے شاید ایس وجہ توں تُسی بے‌حوصلہ ہو جاؤ۔ ایس گل نُوں سمجھن لئی فرض کرو کہ اَج تُسی بائبل چوں ایہو جہیاں ایتاں پڑھیاں نیں جنہاں چ دَسیا گیا اے کہ سانوں طرف‌داری نئیں کرنی چاہی دی۔ (‏یعقوب 2:‏1-‏8‏)‏ ایہناں ایتاں نُوں پڑھ کے توانوں احساس ہوندا اے کہ توانوں ایس معاملے چ بہتری لیان دی لوڑ اے تے تُسی اِنج کرن دا فیصلہ کردے او۔ ایہہ بوہت اچھی گل اے۔ فیر اگلے دن تُسی بائبل چ ایہو جہیاں ایتاں پڑھدے او جنہاں چ دَسیا گیا اے کہ اپنی زبان نُوں قابو چ رکھنا کِنّاں اہم اے۔ (‏یعقوب 3:‏1-‏12‏)‏ توانوں احساس ہوندا اے کہ کدی کدار تُسی دُوجیاں دا دل دُکھان والیاں گلاں کر جاندے او۔ ایس لئی تُسی فیصلہ کردے او کہ ہُن توں تُسی دُوجیاں نال ایہو جہیاں گلاں کرو گے جنہاں توں اوہناں دا حوصلہ ودھے۔ تیجے دن تُسی پڑھدے او کہ سانوں دُنیا نال دوستی کرن توں خبردار رہنا چاہی دا اے۔ (‏یعقوب 4:‏4-‏12‏)‏ ایہناں ایتاں نُوں پڑھ کے توانوں محسوس ہوندا اے کہ توانوں تفریح بارے ہور زیادہ سوچ سمجھ کے فیصلے کرن دی لوڑ اے۔ شاید چوتھے دن تُسی سوچو کہ تُسی اپنے اندر اینیاں زیادہ تبدیلیاں کیویں لیاؤ گے۔‏

12.‏ جے بائبل پڑھدے ویلے توانوں احساس ہوندا اے کہ توانوں اپنے اندر تبدیلیاں لیان دی لوڑ اے تے توانوں مایوس کیوں نئیں ہونا چاہی دا؟ (‏فٹ‌نوٹ نُوں وی ویکھو۔)‏

¹² جے توانوں لگدا اے کہ توانوں بوہت سارے معاملیاں چ اپنے اندر بہتری لیان دی لوڑ اے تے مایوس نہ ہووو۔ اصل چ ایہہ ایس گل دا  ثبوت اے کہ تُسی خاکسار تے ایمان‌دار او تے جیہڑا بندہ خاکسار تے ایمان‌دار ہوندا اے، اوہ ایس نیت نال بائبل پڑھدا اے کہ اوہ ویکھ سکے کہ اوہنوں اپنے اندر کیہڑیاں تبدیلیاں لیان دی لوڑ اے۔‏ a ایہہ وی یاد رکھو کہ نوِیں شخصیت نُوں پان لئی مسلسل کوشش کرنی پیندی اے۔ ایہہ صرف اِک وار دا کم نئیں اے۔ (‏کُلسّیوں 3:‏10‏)‏ کیہڑی چیز تواڈی مدد کرے گی کہ تُسی خدا دے کلام تے عمل کردے رہوو؟‏

13.‏ بائبل چ لکھیاں گلاں تے عمل کرن دا اِک چنگا طریقہ کیہہ اے؟ (‏تصویر نُوں وی ویکھو۔)‏

¹³ اِک ای وقت چ ساریاں گلاں تے عمل کرن دی بجائے اِک یاں دو گلاں تے عمل کرن دا منصوبہ بناؤ۔ (‏اَمثال 11:‏2‏)‏ اِنج کرن لئی تُسی ایہہ طریقہ اپنا سکدے او:‏ اوہناں گلاں دی اِک لسٹ بناؤ جنہاں چ توانوں بہتری لیان دی لوڑ اے۔ فیر اوہناں وچوں اِک یاں دو گلاں نُوں چُنو جنہاں نُوں تُسی پہلے بدلنا چاہندے او۔ باقی گلاں نُوں بعد لئی چھڈ دَوو۔ پر تُسی شروع کتھوں کر سکدے او؟‏

14.‏ تُسی شروع چ کیہڑا منصوبہ بنا سکدے او؟‏

¹⁴ تُسی شروع چ کوئی ایہو جیہا منصوبہ بنا سکدے او جنہوں تُسی اسانی نال پورا کر سکو۔ یاں فیر تُسی کسے ایہو جہے معاملے بارے سوچ سکدے او جدے چ توانوں خاص طور تے بہتری لیان دی لوڑ اے۔ اِک واری جدوں تُسی منصوبہ بنا لیندے او تے فیر ساڈیاں کتاباں تے رسالیاں وچوں اوہدے بارے تحقیق کرو۔ شاید تُسی اُردو زبان چ کتاب ‏”‏یہوواہ کے گواہوں کے لئے مطالعے کے حوالے“‏ وچوں تحقیق کر سکدے او۔ اپنے منصوبے بارے یہوواہ کولوں دُعا کرو تے اوہدے کولوں مدد منگو کہ اوہ تواڈے اندر اپنے منصوبے نُوں پورا کرن دی خواہش تے طاقت پیدا کرے۔ (‏فِلپّیوں 2:‏13‏)‏ فیر جو کجھ تُسی سکھیا اے، اوہدے تے عمل کرن دی کوشش کرو۔ جدوں تُسی اپنے پہلے منصوبے نُوں پورا کر لَوو گے تے تواڈے اندر اپنے دُوجے منصوبیاں نُوں پورا کرن دی وی خواہش پیدا ہوئے گی۔ سچ تے ایہہ وے کہ جدوں تُسی اِک  معاملے چ اپنے اندر بہتری لیاؤ گے یاں اپنے اندر کوئی خوبی پیدا کرو گے تے توانوں اپنے اندر دُوجیاں خوبیاں پیدا کرنا تے دُوجے معاملیاں چ بہتری لیانا وی اسان لگے گا۔‏

خدا دے کلام نُوں اپنے اُتے اثر کرن دَوو

15.‏ یہوواہ دے بندے کیس لحاظ نال بائبل پڑھن والے دُوجے لوکاں نالوں فرق نیں؟ (‏1-‏تھسلُنیکیوں 2:‏13‏)‏

¹⁵ بوہت سارے لوک کہندے نیں کہ اوہناں نے کئی واری بائبل پڑھی اے۔ پر کیہہ اوہ واقعی ایہدے چ لکھیاں گلاں تے ایمان رکھدے نیں؟ یاں ایہناں تے عمل کردے نیں تے ایس کلام نُوں اپنی زندگی تے اثر کرن دیندے نیں؟ افسوس دی گل اے کہ زیادہ‌تر لوک اِنج نئیں کردے۔ پر ایہناں لوکاں تے یہوواہ دے بندیاں چ زمین اسمان دا فرق اے۔ پہلی صدی چ رہن والے مسیحیاں وانگوں اَسی وی بائبل نُوں خدا دا کلام سمجھ کے قبول کرنے آں تے ایہہ واقعی خدا دا کلام اے۔ ایہدے علاوہ اَسی پوری کوشش کرنے آں کہ ایہہ ساڈی زندگی تے اثر کرے۔‏‏—‏1-‏تھسلُنیکیوں 2:‏13 نُوں پڑھو۔‏

16.‏ کیہڑی چیز خدا دے کلام تے عمل کرن چ ساڈی مدد کر سکدی اے؟‏

¹⁶ سچ اے کہ خدا دے کلام نُوں پڑھنا تے ایہدے تے عمل کرنا ہمیشاں اسان نئیں ہوندا۔ شاید سانوں ایہدے لئی وقت کڈھنا مشکل لگے۔ یاں شاید سانوں تیز تیز بائبل پڑھن دی عادت اے جدی وجہ توں اوہ گلاں ساڈے دل چ نئیں اُتردیاں جیہڑیاں اَسی پڑھیاں ہوندیاں نیں۔ یاں ایہہ وی ہو سکدا اے کہ بائبل پڑھدے ویلے جدوں سانوں وار وار محسوس ہوندا اے کہ سانوں اپنے اندر بہتری لیان دی لوڑ اے تے اَسی بے‌حوصلہ ہو جائیے۔ بائبل پڑھن بارے بھانویں توانوں جیہڑی وی مشکل دا سامنا ہووے، تُسی ایس گل دا یقین رکھ سکدے او کہ یہوواہ دی مدد نال تُسی اوس مشکل نُوں پار کر سکدے او۔ آؤ اَسی یہوواہ وَلّوں مِلن والی مدد نُوں قبول کرئیے تے کلام نُوں صرف سُنن والے ای نئیں سگوں ایہدے تے عمل کرن والے وی بنئے۔ ایہدے چ کوئی شک نئیں کہ جِنّاں زیادہ اَسی خدا دے کلام نُوں پڑھاں گے تے ایہدے تے عمل کراں گے، اوناں زیادہ اَسی خوش رہواں گے۔—‏یعقوب 1:‏25‏۔‏