1.‏ بوہت چھیتی یسوع مسیح کیہہ کرے گا؟‏

 اَسی اِک ایہو جہے دَور چ رہ رہے آں جدے چ وڈیاں وڈیاں تبدیلیاں ہون والیاں نیں۔ بوہت چھیتی یسوع مسیح زمین تے رہن والے ہر انسان دی عدالت کرے گا۔ یسوع نے دَسیا سی کہ جدوں اوہ دُنیا دی عدالت کرن آئے گا تے ایہدے توں پہلاں کیہہ کجھ ہوئے گا۔ ایس بارے دَسن لئی اوہنے اپنے شاگرداں نُوں اپنی موجودگی تے ”‏دُنیا دے آخری زمانے دی نشانی“‏ دَسی۔ (‏متی 24:‏3‏)‏ ایس نشانی بارے متی 24 تے 25 باب‏، مرقس 13 باب تے لُوقا 21 باب چ دَسیا گیا اے۔‏

2.‏ ایس مضمون چ اَسی کیس گل تے غور کراں گے تے ایہدے توں سانوں کیہہ فائدہ ہوئے گا؟‏

² یسوع مسیح نے آن والے وقت بارے آگاہ کرن لئی تِن مثالاں دِتیاں۔ اوہنے ایس بارے بھیڈاں تے بکریاں، سمجھدار تے بے‌وقوف کنواریاں تے کاروبار کرن والے غلاماں دی مثال دِتی۔ ایس مضمون چ اَسی ایہناں تِناں مثالاں تے غور کراں گے۔ ہر مثال توں پتہ چلدا اے کہ یسوع کسے بندے دے کماں دے مطابق اوہدی عدالت کرے گا۔ ایہناں مثالاں تے غور کردے ویلے ویکھو کہ اَسی ایہناں توں کیہہ سکھنے آں تے سکھیاں ہوئیاں گلاں تے کیویں عمل کر سکنے آں۔ آؤ سب توں پہلے بھیڈاں تے بکریاں دی مثال تے غور کرنے آں۔‏

بھیڈاں تے بکریاں دی مثال

3.‏ یسوع مسیح انساناں دی عدالت کدوں کرے گا؟‏

³ بھیڈاں تے بکریاں دی مثال چ یسوع نے واضح کیتا کہ اوہ انساناں دی عدالت ایس بنیاد تے کرے گا کہ کیہہ اوہناں نے بادشاہی دی خوش‌خبری نُوں قبول کیتا تے اوہدے پاک روح نال مسح‌شُدہ بھراواں دا ساتھ دِتا۔ (‏متی 25:‏31-‏46‏)‏ ”‏وڈی مصیبت“‏ دے دوران تے ہرمجدون شروع ہون توں بالکل پہلاں یسوع مسیح ایہہ فیصلہ کرے گا کہ کیہڑے لوک بھیڈاں وانگوں نیں تے کیہڑے بکریاں  وانگوں۔ (‏متی 24:‏21‏)‏ جیویں اِک چرواہا بھیڈاں نُوں بکریاں توں وَکھ کردا اے اونویں ای یسوع اوہناں لوکاں نُوں دُوجے لوکاں توں وَکھ کرے گا جنہاں نے اوہدے مسح‌شُدہ بھراواں دا ساتھ دِتا ہوئے گا۔‏

4.‏ یسعیاہ 11:‏3، 4 دے مطابق اَسی ایس گل دا پکا یقین کیوں رکھ سکنے آں کہ یسوع اِنصاف نال لوکاں دی عدالت کرے گا؟ (‏تصویر نُوں وی ویکھو۔)‏

⁴ بائبل چ لکھی پیشین‌گوئی دے مطابق یسوع اِنصاف نال لوکاں دی عدالت کرے گا۔ ‏(‏یسعیاہ 11:‏3، 4 نُوں پڑھو۔)‏ اوہ بڑے دھیان نال لوکاں دے کماں، گلاں تے رویے دا جائزہ لے رہیا اے نالے ویکھ رہیا اے کہ اوہ اوہدے مسح‌شُدہ بھراواں نال کیویں پیش آندے نیں۔ (‏متی 12:‏36، 37؛‏ 25:‏40‏)‏ ایس لئی جدوں یسوع عدالت کرے گا تے اوہنوں پتہ ہوئے گا کہ کیہڑے لوکاں نے اوہدے مسح‌شُدہ بھراواں دی حمایت کیتی سی تے اوہناں دے کم چ اوہناں دا ساتھ دِتا سی۔‏ a مسیح دے بھراواں دی حمایت کرن دا اِک بہترین طریقہ ایہہ وے کہ اَسی خوش‌خبری دی مُنادی کرن چ اوہناں دا ساتھ دَئیے۔ جیہڑے لوک ایس کم چ اوہناں دی مدد کردے نیں، یسوع اوہناں نُوں ”‏نیک“‏ ٹھہرائے گا تے اوہناں کول زمین تے ”‏ہمیشاں تک“‏ زندہ رہن دا موقع ہوئے گا۔ (‏متی 25:‏46؛‏ مُکاشفہ 7:‏16، 17‏)‏ ایہہ کِنّاں شاندار انعام اے۔ جے ایہہ لوک وڈی مصیبت چ تے ایہدے بعد وی یہوواہ دے وفادار رہن گے تے ایہناں دے ناں زندگی دی کتاب چ لکھے رہن گے۔—‏مُکاشفہ 20:‏15‏۔‏

5.‏ اَسی بھیڈاں تے بکریاں دی مثال توں کیہہ سکھ سکنے آں تے ایس مثال تے غور کرن نال کنہاں کنہاں نُوں فائدہ ہو سکدا اے؟‏

⁵ ثابت کرو کہ تُسی وفادار او۔‏ یسوع نے بھیڈاں تے بکریاں دی جیہڑی مثال دِتی، اوہ خاص طور تے اوہناں لوکاں لئی اے جیہڑے زمین تے ہمیشاں دی زندگی حاصل کرن دی امید رکھدے نیں۔ ایہہ لوک مُنادی دے کم چ مسیح دے بھراواں دا ساتھ دین تے اوہدے چُنے ہوئے وفادار تے سمجھدار غلام دِیاں ہدیتاں تے عمل کرن نال ایمان ظاہر کردے نیں۔ (‏متی 24:‏45‏)‏ جیہڑے لوک اسمان تے زندگی حاصل کرن دی امید رکھدے نیں، اوہناں نُوں وی ایس مثال چ دِتی ہوئی آگاہی تے دھیان دینا چاہی دا اے۔ پر کیوں؟ کیونکہ یسوع اوہناں دے وی کماں، گلاں تے رویے دا جائزہ لے رہیا اے۔ ایس لئی اوہناں نُوں وی ثابت کرنا چاہی دا اے کہ اوہ یہوواہ دے وفادار نیں۔ سچ تے ایہہ وے کہ یسوع نے ایس بارے دو ہور مثالاں دِتیاں جنہاں چ خاص طور تے مسح‌شُدہ مسیحیاں لئی آگاہیاں نیں۔ ایہہ مثالاں متی 25 باب چ لکھیاں نیں۔ آؤ ہُن سمجھدار تے بے‌وقوف کنواریاں دی مثال تے غور کرنے آں۔‏

سمجھدار تے بے‌وقوف کنواریاں دی مثال

6.‏ پنج کنواریاں نے ایہہ کیویں ثابت کیتا کہ اوہ سمجھدار سن؟ (‏متی 25:‏6-‏10‏)‏

⁶ یسوع نے دس کنواریاں دی مثال دِتی جدے چ اوہنے دَسیا کہ اوہ لاڑے نُوں مِلن گئیاں۔ (‏متی 25:‏1-‏4‏)‏ اوہناں ساریاں دی خواہش سی کہ اوہ لاڑے نال ویاہ دی دعوت چ جان۔ یسوع نے دَسیا کہ ایہناں وچوں پنج کنواریاں ”‏سمجھدار“‏سن تے پنج ”‏بے‌وقوف۔“‏ جیہڑیاں کنواریاں سمجھدار سن اوہ چوکس تے تیار سن۔ بھانویں لاڑا رات نُوں دیر نال ای کیوں نہ آندا، سمجھدار کنواریاں اوہدا اِنتظار کرن لئی پوری طرحاں تیار سن۔ ایسے لئی اوہ اپنے نال دِیوے لے کے آئیاں سن تاکہ اوہ نھیرے چ ویکھ سکن۔ اوہ تے اپنے نال تیل دِیاں کُپیاں وی لیائیاں سن تاکہ جے لاڑے دے آن چ دیر ہو جائے تے اوہ اپنے دِیویاں چ تیل پا کے ایہناں نُوں بالی رکھن۔ ‏(‏متی 25:‏6-‏10 نُوں پڑھو۔)‏ فیر جدوں لاڑا پونچیا تے اوہ سمجھدار کنواریاں اوہدے نال ویاہ دی دعوت چ اندر چلیاں گئیاں۔ ایسے طرحاں جیہڑے مسح‌شُدہ مسیحی ایہہ ثابت کر چُکے ہون گے کہ اوہ چوکس تے تیار نیں تے یسوع دے آن تک اوہدے وفادار نیں، اوہناں نُوں یسوع انعام دے طور تے اپنی اسمانی بادشاہی چ شامل کرے گا۔‏ b (‏مُکاشفہ 7:‏1-‏3‏)‏ پر پنج بے‌وقوف کنواریاں نال کیہہ ہویا؟‏

7.‏ پنج بے‌وقوف کنواریاں نال کیہہ ہویا تے کیوں؟‏

⁷ دُوجیاں پنج کنواریاں بے‌وقوف ثابت ہوئیاں کیونکہ اوہ لاڑے  دے آن لئی تیار نئیں سن۔ اوہناں دے دِیوے بجھن لگ پئے سن تے اوہناں کول ہور تیل وی نئیں سی۔ جدوں اوہناں نُوں پتہ چلیا کہ لاڑا آن والا اے تے اوہناں نُوں اپنے دِیویاں نُوں بالن لئی تیل خریدن جانا پیا۔ اینی دیر چ لاڑا آ گیا پر اوہ حالے تک واپس نئیں آئیاں سن۔ پر ”‏جیہڑیاں کنواریاں تیار سن، اوہ ویاہ دی دعوت لئی لاڑے نال اندر چلیاں گئیاں تے دروازہ بند کر دِتا گیا۔“‏ (‏متی 25:‏10‏)‏ فیر جدوں بے‌وقوف کنواریاں واپس آئیاں تے اوہ اندر جانا چاہندیاں سن پر لاڑے نے اوہناں نُوں کہیا:‏ ”‏مَیں توانوں نئیں جان دا۔“‏ (‏متی 25:‏11، 12‏)‏ ایہہ کنواریاں لاڑے دا اوناں اِنتظار کرن لئی تیار نئیں سن جِنّاں اوہناں نُوں کرنا چاہی دا سی۔ ایس مثال توں پاک روح نال مسح ہوئے مسیحی کیہہ سکھدے نیں؟‏

8، 9.‏ کنواریاں دی مثال توں پاک روح نال مسح ہوئے مسیحی کیہہ سکھدے نیں؟ (‏تصویر نُوں وی ویکھو۔)‏

⁸ ثابت کرو کہ تُسی چوکس تے تیار او۔‏ سمجھدار تے بے‌وقوف کنواریاں دی مثال دے کے یسوع مسیح ایہہ پیشین‌گوئی نئیں کر رہیا سی کہ پاک روح نال مسح ہوئے مسیحیاں دے دو گروہ ہون گے جنہاں وچوں اِک گروہ دُنیا دے خاتمے تک اِنتظار کرن لئی تیار ہوئے گا جد کہ دُوجا تیار نئیں ہوئے گا۔ ایہدی بجائے ایس مثال دے ذریعے یسوع ایہہ سمجھا رہیا سی کہ جے پاک روح نال مسح ہوئے مسیحی آخر تک تیار تے چوکس نئیں رہن گے تے اوہناں نال کیہہ ہوئے گا۔ اوہناں نُوں اپنا انعام نئیں ملے گا۔ (‏یوحنا 14:‏3، 4‏)‏ ایس آگاہی تے دھیان دینا بوہت ضروری اے۔ بھانویں اَسی اسمان تے ہمیشاں دی زندگی پان دی امید رکھدے ہوئیے یاں زمین تے، سانوں ساریاں نُوں دس کنواریاں دی مثال توں مِلن والے سبق تے دھیان دینا چاہی دا اے۔ ساڈے وچوں ہر اِک نُوں آخر تک چوکس، تیار تے اپنے ایمان تے ڈٹے رہنا چاہی دا اے۔—‏متی 24:‏13‏۔‏

⁹ جدوں یسوع مسیح نے کنواریاں دی مثال دے کے دَسیا کہ چوکس تے تیار رہنا کِنّاں ضروری اے تے ایس توں بعد اوہنے اِک ہور مثال دِتی۔ ایہہ کاروبار کرن والے غلاماں دی مثال سی۔ ایس مثال دے ذریعے یسوع مسیح نے ایس گل نُوں واضح کیتا کہ محنتی ہونا کِنّاں ضروری اے۔‏

کاروبار کرن والے غلاماں دی مثال

10.‏ دو غلاماں نے کیویں ثابت کیتا کہ اوہ وفادار سن؟ (‏متی 25:‏19-‏23‏)‏

¹⁰ یسوع مسیح نے کاروبار کرن والے غلاماں دی مثال چ تِن غلاماں دا ذکر کیتا جنہاں وچوں دو اپنے مالک دے وفادار سن جد کہ اِک نئیں سی۔ (‏متی 25:‏14-‏18‏)‏ دو غلاماں نے کیویں ثابت کیتا کہ اوہ وفادار سن؟  اوہناں دے مالک نے پردیس جان توں پہلاں اوہناں نُوں بوہت زیادہ چاندی دِتی۔ اوہناں نے محنت نال کم کیتا تے جیہڑی چاندی اوہناں نُوں مِلی سی، اوہنوں سمجھداری نال استمال کیتا۔ اِنج اوہناں نے اپنے مالک دے کاروبار نُوں فائدہ پونچایا۔ جدوں مالک واپس آیا تے اوہ اوہدے مال نُوں دُگنا کر چُکے سن۔ مالک نے اوہناں دونواں نُوں شاباش دِتی تے کہیا:‏ ”‏میری خوشی چ شریک ہو۔“‏ ‏(‏متی 25:‏19-‏23 نُوں پڑھو۔)‏ پر تیجے غلام نے اپنے مالک وَلّوں ملن والی چاندی نال کیہہ کیتا؟‏

11.‏ ”‏سُست غلام“‏ نال کیہہ ہویا تے کیوں؟‏

¹¹ تیجے غلام نُوں اِک من چاندی مِلی سی پر اوہ ”‏سُست غلام“‏ سی۔ اوہدا مالک چاہندا سی کہ اوہ ایس چاندی نُوں سمجھداری نال استمال کرے۔ پر اوہنے ایہنوں ودھان دی بجائے زمین چ دَب دِتا۔ جدوں اوہدا مالک واپس آیا تے اوہنے اوہنوں اوہدی اِک من چاندی واپس دے دِتی۔ اوس غلام دا رویہ صحی نئیں سی۔ اوہنے اپنے مالک کولوں ایس گل لئی معافی نئیں منگی کہ اوہ اوہدی چاندی نُوں ودھا نئیں سکیا ایہدی بجائے اوہ اپنے مالک تے ای اِلزام لان لگ پیا کہ اوہ بڑا ”‏سخت آدمی“‏ اے۔ مالک اوس غلام توں بالکل وی خوش نئیں سی ایس لئی اوہنوں اوہدے وَلّوں کوئی انعام نئیں مِلیا سگوں اوہدے کولوں اوہ چاندی وی واپس لے لئی گئی جیہڑی اوہنوں دِتی گئی سی تے اوہنوں مالک دے گھروں کڈھ دِتا گیا۔—‏متی 25:‏24،‏ 26-‏30‏۔‏

12.‏ دو وفادار غلام اَج کدے وَل اشارہ کردے نیں؟‏

¹² دو وفادار غلام پاک روح نال مسح ہوئے اوہناں مسیحیاں وَل اشارہ کردے نیں جیہڑے وفادار نیں۔ ایہناں مسیحیاں دا مالک یسوع ایہناں نُوں دعوت دیندا اے کہ اوہ ”‏[‏اوہدی]‏خوشی چ شریک“‏ ہون۔ ایہناں مسیحیاں نُوں اسمان تے انعام مِلدا اے یعنی ایہناں نُوں ساریاں توں پہلے زندہ کیتا جاندا اے۔ (‏متی 25:‏21،‏ 23؛‏ مُکاشفہ 20:‏5‏)‏ پر سُست غلام دی مثال چ وی ایہناں مسیحیاں لئی اِک سبق اے۔ کیہڑا سبق؟‏

13، 14.‏ پاک روح نال مسح ہوئے مسیحی کاروبار کرن والے غلاماں دی مثال توں کیہہ سکھدے نیں؟ (‏تصویر نُوں وی ویکھو۔)‏

¹³ ثابت کرو کہ تُسی محنتی او۔‏ دس کنواریاں دی مثال وانگوں کاروبار کرن والے غلاماں دی مثال چ وی یسوع مسیح ایہہ پیشین‌گوئی نئیں کر رہیا سی کہ پاک روح نال مسح ہوئے مسیحی سُست پے جان گے۔ ایہدی بجائے یسوع مسیح ایہہ واضح کر رہیا سی کہ جے پاک روح نال مسح ہوئے مسیحیاں دا جوش ٹھنڈا پے جائے گا تے کیہہ ہوئے گا۔ اوہناں نُوں جیس کم لئی ”‏بلا‌یا تے چُنیا“‏ گیا اے، اوہ اوہدے قابل نئیں رہن گے  تے اوہناں نُوں اسمان دی بادشاہی چ جان دی اجازت نئیں ملے گی۔—‏2-‏پطرس 1:‏10‏۔‏

¹⁴ دس کنواریاں تے کاروبار کرن والے غلاماں دی مثال چ یسوع نے ایس گل نُوں واضح کیتا اے کہ پاک روح نال مسح ہوئے سارے مسیحیاں نُوں چوکس، تیار تے محنتی ہونا چاہی دا اے۔ پر کیہہ یسوع نے ایہناں مسیحیاں نُوں آگاہی دین لئی کجھ ہور وی کہیا سی؟ ہاں جی۔ ایہہ گل متی 24:‏40، 41 چ لکھی اے۔‏

کنہاں نُوں لے لیا جائے گا؟‏

15، 16.‏ متی 24:‏40، 41 چ ایس گل نُوں کیویں واضح کیتا گیا اے کہ پاک روح نال مسح ہوئے مسیحیاں نُوں چوکس رہن دی لوڑ اے؟‏

¹⁵ یسوع نے تِن مثالاں دین توں پہلاں ایہہ دَسیا کہ پاک روح نال مسح ہوئے مسیحیاں دی عدالت کیتی جائے گی جدے توں پتہ چلے گا کہ ایہناں وچوں کیہڑے مسیحیاں نُوں انعام ملے گا۔ اوہنے دَسیا کہ دو آدمی کھیت چ ہون گے تے دو عورتاں چکی پی رہیاں ہون گیاں۔ ویکھن چ دونواں عورتاں تے دونواں آدمیاں دا کم اِکو جیہا لگے گا۔ پر دونواں بارے یسوع نے کہیا کہ ”‏اِک نُوں لے لیا جائے گا تے دُوجے نُوں چھڈ دِتا جائے گا۔“‏ ‏(‏متی 24:‏40، 41 نُوں پڑھو۔)‏ فیر اوہنے اپنے پیروکاراں نُوں ایہہ نصیحت کیتی:‏ ”‏چوکس رہوو کیونکہ توانوں نئیں پتہ کہ تواڈا مالک کیہڑے دن آئے گا۔“‏ (‏متی 24:‏42‏)‏ یسوع نے ایہدے نال رَلدی مِلدی گل، دس کنواریاں دی مثال دین توں بعد وی کہی سی۔ (‏متی 25:‏13‏)‏ اِنج لگدا اے کہ ایہناں دونواں مثالاں دا آپس چ تعلق اے۔ یسوع اپنی اسمانی بادشاہی چ صرف اوہناں مسیحیاں نُوں لے کے جائے گا جیہڑے واقعی یہوواہ دی پاک روح نال مسح ہون گے تے اوہدے وفادار ہون گے۔—‏یوحنا 14:‏3‏۔‏

¹⁶ ثابت کرو کہ تُسی چوکس او۔‏ جے پاک روح نال مسح ہویا کوئی مسیحی چوکس نئیں رہوے گا تے اوہنوں ”‏چُنے ہوئے لوکاں“‏ دے طور تے جمع نئیں کیتا جائے گا۔ (‏متی 24:‏31‏)‏ بھانویں یہوواہ دا کوئی بندہ زمین تے ہمیشاں دی زندگی حاصل کرن دی امید رکھدا ہوئے یاں اسمان تے، اوہنوں یسوع دی ایس آگاہی تے دھیان دینا چاہی دا اے کہ اوہ چوکس رہوے تے یہوواہ دا وفادار رہوے۔‏

17.‏ جے یہوواہ ساڈے زمانے چ کسے مسیحی نُوں پاک روح نال مسح کردا اے تے سانوں پریشان کیوں نئیں ہونا چاہی دا؟‏

¹⁷ اَسی یہوواہ نُوں چنگی طرحاں جاننے آں ایس لئی اَسی پورا بھروسا کر سکنے آں کہ اوہ جو وی فیصلہ کردا اے، صحی کردا اے۔ جے یہوواہ ساڈے زمانے چ کسے نُوں پاک روح نال مسح کردا اے تے سانوں پریشان نئیں ہونا چاہی دا۔‏ c سانوں یسوع دی اوہ گل یاد رکھنی چاہی دی اے جیہڑی اوہنے انگوراں دے باغ والی مثال چ اوہناں مزدوراں بارے کہی جنہاں نے 5 وجے کم شروع کیتا سی۔ (‏متی 20:‏1-‏16‏)‏ باغ دے مالک نے اوہناں مزدوراں نُوں وی اونی دیہاڑی دِتی جِنّی اوہنے سویرے کم شروع کرن والیاں نُوں دِتی سی۔ ایسے طرحاں ایس گل توں کوئی فرق نئیں پیندا کہ کسے مسیحی نُوں کدوں پاک روح نال مسح کیتا جاندا اے۔ پاک روح نال مسح ہوئے مسیحیاں نُوں اوہناں دا انعام اوہدوں ای ملے گا جدوں اوہ یہوواہ دے وفادار رہن گے۔‏

آگاہیاں تے دھیان دیندے رہوو

18، 19.‏ یسوع نے جیہڑیاں مثالاں دِتیاں، اوہناں توں اَسی کیہہ سکھیا اے؟‏

¹⁸ اَسی کیہہ سکھیا اے؟ جیہڑے لوک زمین تے ہمیشاں دی زندگی پان دی امید رکھدے نیں، اوہناں لئی بھیڈاں تے بکریاں دی مثال چ ایہہ سبق اے کہ اوہ نہ صرف ہُن سگوں وڈی مصیبت دے دوران وی یہوواہ دے وفادار رہن۔ اوس ویلے یسوع اوہناں بارے فیصلہ کرے گا کہ اوہ ”‏ہمیشاں دی زندگی“‏ پان دے لائق ہے نیں یاں نئیں۔—‏متی 25:‏46‏۔‏

¹⁹ اَسی دو ایہو جہیاں مثالاں تے وی غور کیتا اے جنہاں چ پاک روح نال مسح ہوئے مسیحیاں لئی سبق نیں۔ دس کنواریاں والی مثال چ پنج بے‌وقوف سن تے پنج سمجھدار۔ سمجھدار کنواریاں چوکس تے تیار سن۔ بھانویں لاڑے دے آن چ جِنّی وی دیر ہوندی، اوہ اوہدا اِنتظار کرن لئی پوری طرحاں تیار سن۔ پر بے‌وقوف کنواریاں تیار نئیں سن۔ ایس لئی لاڑے نے اوہناں نُوں ویاہ دی دعوت چ آن توں منع کر دِتا۔ بھانویں جِنّی وی دیر لگے، سانوں اوس وقت دا اِنتظار کرن لئی تیار رہنا چاہی دا اے جدوں  یسوع ایس بھیڑی دُنیا نُوں ختم کر دَوے گا۔ ایہدے علاوہ اَسی کاروبار کرن والے غلاماں دی مثال توں سکھیا اے کہ دو غلام وفادار سن۔ اوہناں نے دل لا کے تے بڑی محنت نال اپنے مالک لئی کم کیتا تے مالک اوہناں توں خوش ہویا۔ پر سُست غلام نُوں مالک نے گھروں کڈھ دِتا۔ ایہدے توں اَسی کیہہ سکھنے آں؟ جدوں تک ایس دُنیا دا خاتمہ نئیں آ جاندا، سانوں محنت نال یہوواہ دی خدمت کردے رہنا چاہی دا اے۔ تے آخر چ اَسی ایس گل تے غور کیتا کہ پاک روح نال مسح ہوئے مسیحیاں نُوں چوکس رہن دی لوڑ اے تاکہ یسوع اوہناں نُوں انعام دین لئی اپنے نال اسمان تے لے جائے۔ ایہہ مسیحی اوس وقت دا بڑا اِنتظار کر رہے نیں جدوں یسوع مسیح اوہناں نُوں اسمان تے جمع کرے گا۔ ہرمجدون دی جنگ دے بعد اوہ یسوع دی دُلہن بن جان گے۔—‏2-‏تھسلُنیکیوں 2:‏1؛‏ مُکاشفہ 19:‏9‏۔‏

20.‏ یہوواہ اوہناں لوکاں لئی کیہہ کرے گا جیہڑے اوہدیاں آگاہیاں تے دھیان دیندے نیں؟‏

²⁰ بھانویں کہ اوہ وقت تیزی نال نیڑے آ رہیا اے جدوں یسوع لوکاں دی عدالت کرے گا پر سانوں ایہدے توں ڈرن دی لوڑ نئیں اے۔ جے اَسی اپنے اسمانی باپ دے وفادار رہواں گے تے اوہ سانوں ایہو جہی طاقت دَوے گا جیہڑی انسانی طاقت نالوں ودھ کے ہوئے گی تاکہ اَسی بچ سکئے تے انسان دے بیٹے دے سامنے کھلو سکئے۔ (‏2-‏کُرنتھیوں 4:‏7؛‏ لُوقا 21:‏36‏)‏ بھانویں اَسی اسمان تے ہمیشاں دی زندگی پان دی امید رکھنے آں یاں زمین تے، جے اَسی یسوع دِیاں مثالاں چ دِتے سبقاں تے دھیان دیندے رہواں گے تے ساڈا پیار کرن والا باپ یہوواہ ساڈے توں بوہت خوش ہوئے گا۔ اوہدی عظیم رحمت دی وجہ توں ساڈے ناں زندگی دی کتاب وچ لکھے جان گے۔—‏دانی‌ایل 12:‏1؛‏ مُکاشفہ 3:‏5‏۔‏