1.‏ جدوں تُسی بائبل کورس کرنا شروع کیتا سی تے تُسی کیہڑیاں گلاں سکھیاں سن؟‏

 کیہہ توانوں یاد اے کہ جدوں تُسی بائبل کورس کرنا شروع کیتا سی تے تُسی کیہڑیاں کیہڑیاں گلاں سکھیاں سن؟ شاید تُسی ایہہ جان کے حیران ہوئے ہووو کہ خدا دا اِک ناں اے۔ نالے ایہہ جان کہ شاید توانوں تسلی مِلی ہووے کہ خدا لوکاں نُوں دوزخ دی اَگ چ نئیں تڑپاندا۔ تے ہو سکدا اے کہ ایس گل نے تواڈے دل نُوں چُھو لیا ہووے کہ تُسی اپنے فوت ہوئے عزیزاں نُوں دُبارہ ملو گے تے اوہناں نال زمین تے فردوس چ ہمیشاں تک زندہ رہوو گے۔‏

2.‏ بائبل چوں سچائیاں سکھن دے نال نال تُسی ہور کیہہ کیتا؟ (‏اِفسیوں 5:‏1، 2‏)‏

² جیویں جیویں تُسی پاک کلام چوں تلیم حاصل کیتی، تواڈے دل چ یہوواہ لئی محبت ودھدی گئی۔ ایس محبت دی وجہ توں تُسی سکھیاں ہوئیاں گلاں تے عمل کیتا۔ تُسی فیصلے وی بائبل دے اصولاں مطابق کیتے۔ تُسی یہوواہ نُوں خوش کرنا چاہندے سو، ایس لئی تُسی صحی سوچ اپنائی تے صحی کم کیتے۔ جیویں اِک بچہ اپنے ماں پیو دی مثال تے عمل کردا اے اوسے طرحاں تُسی اپنے اسمانی باپ دی مثال تے عمل کر رہے سو۔‏‏—‏اِفسیوں 5:‏1، 2 نُوں پڑھو۔‏

3.‏ اَسی اپنے آپ کولوں کیہڑے سوال پچھ سکنے آں؟‏

³ اَسی اپنے آپ کولوں ایہہ سوال پچھ سکنے آں:‏ ”‏جدوں مَیں یہوواہ دا گواہ بنیا ساں تے اوہدوں میرے دل چ یہوواہ لئی کِنّی محبت سی تے کیہہ ایہہ محبت پہلے نالوں ودھی اے؟ جدوں توں مَیں بپتسمہ لیا اے کیہہ مَیں یہوواہ دی مثال تے ہور زیادہ عمل کر رہیا واں، خاص طور تے اپنے بھین بھراواں لئی محبت وکھان دے معاملے چ؟“‏ جے تواڈی محبت پہلے ورگی نئیں رہی تے بے‌حوصلہ نہ ہووو۔ پہلی صدی دے مسیحیاں نال وی کجھ اِنج ای ہویا سی۔ پر یسوع نے اوہناں توں موُنہہ نئیں پھیریا سی تے نہ ای اوہ تواڈے توں موُنہہ پھیرے گا۔ (‏مکاشفہ 2:‏4،‏ 7‏)‏ اوہ جان دا اے کہ اَسی اپنے دل چ فیر توں اوہو جہی محبت پیدا کر سکنے آں جیہو جہی اوہدوں سی جدوں اَسی بائبل دی تلیم حاصل کرنی شروع کیتی سی۔‏

4.‏ ایس مضمون چ اَسی کِنہاں گلاں تے غور کراں گے؟‏

 ⁴ ایس مضمون چ اَسی ایس گل تے غور کراں گے کہ اَسی کیہہ کر سکنے آں تاکہ ساڈے دل چ یہوواہ تے دُوجیاں لئی محبت ودھدی رہوے۔ ایہدے بعد اَسی ویکھاں گے کہ جدوں اَسی یہوواہ تے دُوجیاں لئی محبت نُوں ودھانے آں تے ایہدے کیہہ فائدے ہوندے نیں۔‏

5، 6.‏ یہوواہ دی خدمت کردے ہوئیاں پولُس نُوں کیہڑیاں مشکلاں دا سامنا کرنا پیا؟ پر کیس چیز دی وجہ توں اوہ ایہہ خدمت کردا رہیا؟‏

⁵ پولُس رسول بڑی خوشی نال یہوواہ دی خدمت کر رہیا سی۔ پر اوہنوں بوہت ساریاں مشکلاں دا وی سامنا کرنا پیا۔ اوہ اکثر دُور دُور دے علاقیاں چ جاندا سی تے اوس زمانے چ سفر کرنا ایناں آسان نئیں سی۔ نالے سفر دے دوران کدی کدار اوہنوں دریاواں تے ڈاکوؤاں توں وی خطرہ ہوندا سی۔ کئی وار تے اوہدے مخالفاں نے اوہنوں ماریا کُٹیا وی سی۔ (‏2-‏کُرنتھیوں 11:‏23-‏27‏)‏ کدی کدار تے اِنج وی ہویا کہ پولُس دے اپنے ہم‌ایماناں نے ای ایس گل دی قدر نئیں کیتی کہ اوہ اوہناں دی مدد کرن لئی کِنّی محنت کر رہیا اے۔—‏2-‏کُرنتھیوں 10:‏10؛‏ فِلپّیوں 4:‏15‏۔‏

⁶ پر پولُس کیس چیز دی وجہ توں ایہہ خدمت کردا رہیا؟ پولُس رسول نے پاک کلام چوں تے اپنی زندگی دے تجربیاں توں یہوواہ بارے بوہت کجھ سکھیا سی۔ اوہنوں ایس گل دا پکا یقین ہو گیا سی کہ یہوواہ اوہنوں بوہت پیار کردا اے۔ (‏رومیوں 8:‏38، 39؛‏ اِفسیوں 2:‏4، 5‏)‏ پولُس دے دل چ یہوواہ لئی بوہت محبت سی تے ایسے محبت دی وجہ توں اوہ مُقدساں دی خدمت کردا رہیا۔—‏عبرانیوں 6:‏10‏۔‏

7.‏ اپنے دل چ یہوواہ لئی محبت ودھان دا اِک طریقہ کیہہ اے؟‏

⁷ جدوں اَسی دل لا کے کلام نُوں پڑھنے آں تے ساڈے دل چ یہوواہ لئی محبت ودھدی اے۔ بائبل پڑھدے ویلے ایہہ ویکھن دی کوشش کرو کہ ہر واقعے توں یہوواہ بارے کیہہ پتہ چلدا اے۔ اپنے آپ کولوں پچھو:‏ ”‏ایس واقعے توں کیویں پتہ چلدا اے کہ یہوواہ مینوں پیار کردا اے؟ ایہدے چوں مینوں یہوواہ نال محبت کرن دی کیہڑی کیہڑی وجہ مِلدی اے؟“‏

8.‏ دُعا کرن نال ساڈے دل چ یہوواہ لئی محبت کیویں ودھدی اے؟‏

⁸ اپنے دل چ یہوواہ لئی محبت ودھان دا اِک ہور طریقہ ایہہ وے کہ اَسی باقاعدگی نال دل کھول کے اوہدے کولوں دُعا کرئیے۔ (‏زبور 25:‏4، 5‏)‏ یہوواہ ساڈیاں دُعاواں دا جواب دے گا۔ (‏1-‏یوحنا 3:‏21، 22‏)‏ ایشیا چ رہن والی کیرن ناں دی اِک بھین نے کہیا:‏ ”‏شروع چ مَیں یہوواہ نال اوہناں گلاں دی وجہ توں محبت کرنی ساں جیہڑیاں مَیں اوہدے بارے سکھیاں سن۔ پر جدوں مَیں ویکھیا کہ اوہ میریاں دُعاواں دا جواب دے رہیا اے تے میرے دل چ اوہدے لئی محبت ہور وی ودھ گئی۔ ایس وجہ توں میرے دل چ ایہو جہے کم کرن دی خواہش پیدا ہوئی جنہاں توں یہوواہ خوش ہووے۔“‏ b

9.‏ تیمُتھیُس نے کیویں ثابت کیتا کہ اوہنے اپنے دل چ بھین بھراواں لئی محبت نُوں ودھایا اے؟‏

⁹ جدوں پولُس مسیحی بن گیا تے ایہدے کجھ سالاں بعد اوہ اِک نوجوان نُوں ملیا جدا ناں تیمُتھیُس سی۔ تیمُتھیُس یہوواہ تے اوہدے بندیاں نال بوہت محبت کردا سی۔ پولس نے فِلپّی چ رہن والے مسیحیاں نُوں کہیا:‏ ”‏میرے کول تیمُتھیُس ورگا ہور کوئی نئیں جیہڑا سچے دل نال تواڈی فکر کردا اے۔“‏ (‏فِلپّیوں 2:‏20‏)‏ پولُس نے ایہہ گل صرف ایس لئی نئیں کہی سی کیونکہ تیمُتھیُس کم نُوں منظم طریقے نال کردا سی تے بڑیاں چنگیاں تقریراں دیندا سی سگوں اوہنے ایہہ گل ایس لئی کہی کیونکہ اوہ ویکھ سکدا سی کہ تیمُتھیُس نُوں بھین بھراواں نال کِنّاں پیار اے۔ ایہدے چ کوئی شک نئیں کہ کلیسیاواں تیمُتھیُس دے آن دا بے‌صبری نال اِنتظار کر رہیاں سن۔—‏1-‏کُرنتھیوں 4:‏17‏۔‏

10.‏ بھین اینا تے اوہدے شوہر نے بھین بھراواں لئی محبت کیویں ظاہر کیتی؟‏

¹⁰ اَسی وی اپنے بھین بھراواں دی مدد کرن دے موقعے لبھدے رہنے آں۔ (‏عبرانیوں 13:‏16‏)‏ ذرا ایس بارے بھین اینا دی مثال تے غور کرو جدا پچھلے مضمون چ وی ذکر کیتا گیا سی۔ اِک وڈے طوفان توں بعد اوہ تے اوہدا شوہر اِک بھرا تے اوہدے گھر والیاں نُوں مِلن گئے۔ اوتھے جا  کے اوہناں نے ویکھیا کہ طوفان دی وجہ توں اوہناں دے گھر دی چھت ٹُٹ گئی اے تے اوہناں کول پان لئی صاف کپڑے وی نئیں نیں۔ بھین اینا نے کہیا:‏ ”‏اَسی اوہناں دے گندے کپڑیاں نُوں دھوتا، اِستری کیتا تے تہہ کر کے واپس دے دِتا۔ ساڈے لئی ایہہ کوئی وڈا کم نئیں سی۔ پر ایہدی وجہ توں اوس گھرانے نال ساڈی دوستی ہور گُوڑھی ہو گئی۔“‏ بھین اینا تے اوہدا شوہر بھین بھراواں نال محبت کردے سن جدی وجہ توں اوہ اوہناں دی مدد کرن لئی اَگے ودھے۔—‏1-‏یوحنا 3:‏17، 18‏۔‏

11.‏ (‏الف)‏ جدوں اَسی بھین بھراواں لئی محبت وکھانے آں تے اوہناں نُوں کیہو جیہا لگدا اے؟ (‏ب)‏ امثال 19:‏17 دے مطابق جدوں اَسی اپنے بھین بھراواں لئی محبت وکھانے آں تے یہوواہ نُوں کیہو جیہا لگدا اے؟‏

¹¹ جدوں اَسی اپنے بھین بھراواں لئی محبت وکھانے آں تے اوہناں دی مدد کرنے آں تے اوہ ویکھ سکدے نیں کہ اَسی یہوواہ دی مثال تے عمل کر رہے آں تے اوہ ایہدی بڑی قدر کردے نیں۔ بھین کیرن جدا ایس مضمون دے شروع چ ذکر ہویا سی، کہندی اے:‏ ”‏مَیں اوہناں ساریاں بھیناں دی بوہت شکرگزار آں جیہڑیاں مُنادی چ مینوں اپنے نال لے کے جاندیاں سن۔ اوہ مینوں لین لئی میرے گھر آندیاں سن۔ اَسی مِل کے دوپہر دا کھانا وی کھانے ساں تے بعد چ اوہ مینوں واپس گھر چھڈ کے جاندیاں سن۔ ہُن مینوں اندازہ ہوندا اے کہ اوہ میری مدد کرن لئی کِنّی محنت کردیاں سن۔ اوہ ایہہ سب کجھ ایس لئی کردیاں سن کیونکہ اوہ میرے نال پیار کردیاں سن۔“‏ یقیناً ہر بندہ سانوں ساڈے اوہناں کماں لئی شکریہ نئیں کہوے گا جیہڑے اَسی اوہناں لئی کرنے آں۔ بھین کیرن نے اپنی مدد کرن والیاں بھیناں بارے کہیا:‏ ”‏اوہناں بھیناں نے میرے لئی جو کجھ کیتا اوہدے بدلے چ کاش مَیں وی اوہناں لئی کجھ کر سکدی۔ پر مینوں نئیں پتہ کہ اوہ ساریاں ہُن کتھے رہندیاں نیں۔ پر یہوواہ نُوں ضرور پتہ اے تے میری دُعا اے کہ اوہناں بھیناں نے میرے لئی جو کجھ کیتا اے، اوہدے لئی یہوواہ اوہناں نُوں اَجر دَوے۔“‏ بھین کیرن نے بالکل صحی کہیا۔ جدوں اَسی اپنے بھین بھراواں لئی چھوٹے توں چھوٹا کم وی کرنے آں تے یہوواہ ایہنوں یاد رکھدا اے۔ یہوواہ ایہنوں اِک قیمتی قربانی وانگوں سمجھدا اے۔ نالے اوہدی نظر چ ایہہ اِک قرضے وانگوں اے جنہوں اوہ وقت آن تے واپس کر دَوے گا۔‏‏—‏امثال 19:‏17 نُوں پڑھو۔‏

12.‏ بھرا کلیسیا لئی محبت کیویں وکھا سکدے نیں؟ (‏تصویراں نُوں وی ویکھو۔)‏

 ¹² جے تُسی اِک بھرا او تے تُسی دُوجیاں لئی محبت کیویں وکھا سکدے او تے اوہناں دی مدد کیویں کر سکدے او؟ اِک نوجوان بھرا جورڈن نے اِک بزرگ نُوں پچھیا کہ اوہ کلیسیا دی مدد کرن لئی ہور کیہہ کر سکدا اے؟ بزرگ جان دا سی کہ جورڈن کلیسیا لئی پہلاں ای بوہت کجھ کر رہیا اے۔ ایس لئی بزرگ نے اوہنوں شاباش دِتی۔ نالے اوہنے اوہنوں مشورے وی دِتے کہ اوہ ہور کیہہ کر سکدا اے۔ مثال لئی، اوس بزرگ نے جورڈن نُوں کہیا کہ اوہ عبادت‌گاہ چ عبادت شروع ہون توں پہلاں آ سکدا اے تے آن والیاں نُوں جی آیاں نُوں کہہ سکدا اے۔ ایہدے علاوہ اوہ عبادت دے دوران جواب دے سکدا اے۔ اپنے گروپ دے نال مِل کے باقاعدگی نال مُنادی کر سکدا اے۔ نالے ایس گل تے دھیان دے سکدا اے کہ دُوجیاں نُوں کیہو جہی مدد دی لوڑ اے۔ بزرگ دے مشوریاں تے عمل کرن نال جورڈن نے نہ صرف نوِیاں مہارتاں سکھیاں سگوں اوہنے ایہہ وی سکھیا کہ اوہ اپنے بھین بھراواں لئی ہور زیادہ محبت کیویں وکھا سکدا اے۔ جورڈن نے ایہہ وی سکھیا کہ خادم بنن نال اِک بھرا کلیسیا دے بھین بھراواں دی مدد کرنا شروع نئیں کردا سگوں اوہناں دی مدد کرنا جاری رکھدا اے۔—‏1-‏تیمُتھیُس 3:‏8-‏10،‏ 13‏۔‏

13.‏ محبت نے بھرا کریس دے دل چ ایہہ خواہش کیویں پیدا کیتی کہ اوہ کلیسیا چ فیر توں بزرگ بنے؟‏

¹³ جے ہُن تُسی خادم یاں بزرگ نئیں او تے تُسی کیہہ کر سکدے او؟ یاد رکھو کہ تُسی یہوواہ تے اپنے بھین بھراواں لئی جیہڑی محنت کیتی اے، یہوواہ اوہنوں نئیں بُھلیا تے نہ ای اوس محبت نُوں بُھلیا اے جدی وجہ توں تُسی محنت کیتی سی۔ (‏1-‏کُرنتھیوں 15:‏58‏)‏ یہوواہ اوس محبت نُوں وی ویکھ رہیا اے جیہڑی تُسی حالے وی اوہدے لئی تے اپنے بھین بھراواں لئی وکھا رہے او۔ جدوں کریس ناں دے اِک بھرا کولوں کلیسیا چ بزرگ دا اعزاز لے لیا گیا تے اوہ بوہت مایوس ہو گیا۔ پر فیر وی اوہنے کہیا:‏ ”‏مَیں فیصلہ کیتا کہ مَیں یہوواہ لئی جو کجھ وی کر سکنا واں، اوہ ضرور کراں گا فیر بھانویں مَیں کلیسیا چ بزرگ رہواں یاں نہ رہواں۔“‏ کجھ عرصے بعد بھرا نُوں فیر توں کلیسیا چ بزرگ بنا دِتا گیا۔ ایہدے بارے اوہنے کہیا:‏ ”‏مَیں دُبارہ توں بزرگ دے طور تے خدمت کرن لئی تھوڑا ڈریا ہویا ساں۔ پر مَیں سوچیا کہ جے یہوواہ  چاہندا اے کہ مَیں دُبارہ بزرگ بناں تے مَیں ضرور اِنج کراں گا کیونکہ مَیں اوہنوں تے اپنے بھین بھراواں نُوں بوہت پیار کرنا واں۔“‏

14.‏ جارجیا چ رہن والی اِک بھین نے جیہڑی گل کہی، تُسی اوہدے توں کیہہ سکھیا اے؟‏

¹⁴ یہوواہ دے بندے اپنے گوانڈھیاں لئی وی محبت وکھاندے نیں۔ (‏متی 22:‏37-‏39‏)‏ مثال لئی، ملک جارجیا چ رہن والی بھین ایلانا کہندی اے:‏ ”‏شروع شروع چ مَیں مُنادی صرف ایس لئی کرنی ساں کیونکہ مینوں یہوواہ نال محبت سی۔ پر جیویں جیویں میرے دل چ اپنے اسمانی باپ لئی محبت ودھدی گئی، اونویں اونویں میرے دل چ لوکاں لئی وی محبت ودھدی گئی۔ مَیں ایہہ تصور کرن دی کوشش کرنی ساں کہ لوک کیہو جہیاں مشکلاں چوں لنگھ رہے نیں تے کیس بارے گل کرنا چاہندے نیں۔ جِنّاں زیادہ مَیں لوکاں بارے ایس طرحاں سوچیا اوناں ای زیادہ میرے دل چ ایہہ خواہش ودھی کہ مَیں اوہناں دی مدد کراں۔“‏—‏رومیوں 10:‏13-‏15‏۔‏

15، 16.‏ جیویں کہ تصویر چ وکھایا گیا اے، دُوجیاں لئی محبت وکھان دے کیہہ فائدے ہوندے نیں؟‏

¹⁵ جدوں اَسی اپنے بھین بھراواں دی مدد کرنے آں تے ایہدے توں صرف اوہناں نُوں ای فائدہ نئیں ہوندا۔ کورونا دی وبا شروع ہون توں بعد بھرا پاؤلو تے اوہدی بیوی نے کئی وڈیریاں بھیناں دی مدد کیتی تاکہ اوہ اپنے فون یاں ٹیبلٹ دے ذریعے لوکاں نُوں گواہی دے سکن۔ اِک بھین نُوں شروع شروع چ اِنج کرنا مشکل لگ رہیا سی۔ پر فیر اوہنے فون دے ذریعے گواہی دینا سکھ لیا۔ اوہنے اپنے رشتے‌داراں نُوں یادگیری عبادت چ شامل ہون دی دعوت دِتی تے اوہناں وچوں 60 لوکاں نے ویڈیو کال دے  ذریعے یادگیری عبادت ویکھی۔ بھرا پاؤلو تے اوہدی بیوی نے جیہڑی محنت کیتی سی، اوہدے توں اوس بھین تے اوہدے رشتے‌داراں نُوں بوہت فائدہ ہویا۔ بعد چ اوس بھین نے بھرا پاؤلو نُوں ایہہ لکھیا:‏ ”‏بوہت شکریہ کہ تُسی میرے ورگے وڈیریاں دی مدد کر رہے او۔ مَیں کدی نئیں بُھلاں گی کہ یہوواہ ساڈے ساریاں دی کِنّی فکر کردا اے۔ نالے ایہہ وی کہ تُسی ساڈی مدد کرن لئی کِنّی محنت کیتی اے۔“‏

¹⁶ ایہو جہے تجربیاں توں بھرا پاؤلو نے اِک بوہت ای خاص گل سکھی اے۔ اوہ ایہہ سمجھ گیا اے کہ محبت، علم تے مہارت نالوں بوہتی اہم اے۔ بھرا نے کہیا:‏ ”‏مَیں حلقے دے نگہبان دے طور تے وی خدمت کیتی اے۔ مینوں لگدا اے کہ شاید مبشراں نُوں میریاں تقریراں تے نہ یاد ہون پر اوہناں نُوں ایہہ چنگی طرحاں یاد اے کہ مَیں کِنہاں کِنہاں طریقیاں نال اوہناں دی مدد کیتی سی۔“‏

17.‏ جدوں اَسی دُوجیاں لئی محبت وکھانے آں تے ایہدے توں ہور کِنہوں فائدہ ہوئے گا؟‏

¹⁷ جدوں اَسی دُوجیاں لئی محبت وکھانے آں تے ایہدے توں سانوں ایہو جہے فائدے ہوندے نیں جنہاں بارے شاید اَسی کدی سوچیا وی نہ ہووے۔ ایہہ گل نیوزی‌لینڈ چ رہن والے بھرا جوناتھن دی مثال توں صاف پتہ چلدی اے۔ اِک وار ہفتے والے دن دوپہر نُوں بڑی سخت گرمی سی۔ بھرا جوناتھن نے ویکھیا کہ اِک پہل‌کار سڑک تے کلّا مُنادی کر رہیا اے۔ بھرا جوناتھن نے فیصلہ کیتا کہ اوہ ہر ہفتے دوپہر نُوں اوس پہل‌کار نال مِل کے مُنادی کرے گا۔ بھرا نے سوچیا وی نئیں سی کہ اِنج اوس بھرا دی مدد کرن نال اوہنوں آپ کِنّے فائدے ہون گے۔ بھرا جوناتھن نے کہیا:‏ ”‏ایہہ اوہدوں دی گل اے جدوں مینوں مُنادی کرن چ ایناں مزہ نئیں آندا سی۔ پر جدوں مَیں ویکھیا کہ اوہ بھرا کِنّی چنگی طرحاں دُوجیاں نُوں تلیم دے رہیا اے تے ایہدے کِنّے چنگے نتیجے نکل رہے نیں، تے میرے دل چ وی ہور زیادہ مُنادی کرن دا شوق پیدا ہویا۔ اوس بھرا نال میری دوستی ہور وی پکی ہو گئی۔ اوہدی مدد نال مینوں مُنادی کرن چ مزہ آن لگ پیا تے مَیں یہوواہ دے ہور وی نیڑے ہو گیا۔“‏

18.‏ یہوواہ ساڈے توں کیہہ چاہندا اے؟‏

¹⁸ یہوواہ چاہندا اے کہ اَسی اوہدے لئی تے دُوجیاں لئی اپنے دل چ محبت نُوں ودھائیے۔ ایس مضمون چ اَسی سکھیا اے کہ اَسی یہوواہ دے کلام نُوں پڑھن، ایہدے تے سوچ‌وچار کرن تے باقاعدگی نال دُعا کرن نال اپنے دل چ اوہدے لئی محبت نُوں ودھا سکنے آں۔ تے بھین بھراواں دی مدد کرن نال اَسی اپنے دل چ اوہناں لئی محبت نُوں ودھا سکنے آں۔ جِنّاں زیادہ ساڈے دل چ یہوواہ تے اپنے بھین بھراواں لئی محبت ودھے گی، اوناں ای زیادہ اَسی اوہناں دے نیڑے ہو جاواں گے۔ اِنج اوہناں نال ساڈی دوستی ہمیشاں تک قائم رہوے گی۔‏