1، 2.‏ اِک مسیحی کیس لحاظ نال اِک عمارت وانگوں اے؟ (‏1-‏کُرنتھیوں 15:‏58‏)‏

 1978 چ جاپان دے شہر ٹوکیو چ 60 منزلہ عمارت بنائی گئی۔ لوکاں دے ذہن چ ایہہ سوال آ رہیا سی کہ ایس شہر چ تے بڑے زلزلے آندے نیں تے کیہہ ایہہ عمارت ایہناں زلزلیاں نُوں برداشت کر سکے گی؟ عمارت بنان والیاں نے کیہہ کیتا تاکہ ایہہ زلزلیاں نُوں برداشت کر سکے؟ اوہناں نے ایس عمارت نُوں اِنج بنایا کہ ایہہ مضبوط ہون دے نال نال لچک‌دار وی ہووے۔ مسیحی وی ایس عمارت وانگوں نیں۔ پر کیس لحاظ نال؟‏

² اِک مسیحی لئی ضروری اے کہ اوہ ثابت‌قدم ہون دے نال نال لچک‌دار وی ہووے۔ اوہنوں یہوواہ دے اصولاں تے معیاراں تے قائم تے ڈٹے رہنا چاہی دا اے۔ ‏(‏1-‏کُرنتھیوں 15:‏58 نُوں پڑھو۔)‏ اوہ ایہناں تے سمجھوتہ نئیں کردا سگوں ایہناں تے عمل کرن لئی تیار رہندا اے۔پر ایہدے نال نال اوہنوں سمجھدار تے لچک‌دار وی ہونا چاہی دا اے۔ (‏یعقوب 3:‏17‏)‏ جیہڑے مسیحی چ ایہہ دونویں خوبیاں ہوندیاں نیں اوہ یہوواہ دے معیاراں بارے نہ تے بوہت زیادہ سخت ہوندا اے تے نہ ای بوہت زیادہ ڈِھلا ہوندا اے۔ ایس مضمون چ اَسی ویکھاں گے کہ اَسی کیہہ کر سکنے آں تاکہ اَسی ڈٹے رہیے۔ اَسی ایہہ وی ویکھاں گے کہ شیطان ساڈے عزم نُوں توڑن لئی کیہڑیاں پنج چالاں چلدا اے تے اَسی اوہناں توں کیویں بچ سکنے آں۔‏

3.‏ اعمال 15:‏28، 29 چ یہوواہ نے کیہڑے حکم دِتے نیں؟‏

³ قانون بنان دا حق یہوواہ دا اے تے اوہ ایہو جہے قانون بناندا اے جیہڑے آسانی نال سمجھ آ جاندے نیں۔ (‏یسعیاہ 33:‏22‏)‏ مثال لئی، پہلی صدی عیسوی دی گورننگ باڈی نے تِن ایہو جہے معاملیاں بارے دَسیا جنہاں چ مسیحیاں نُوں اپنے ایمان تے ڈٹے رہنا چاہی دا اے۔ (‏1)‏ اوہناں نُوں بُت‌پرستی توں بچنا چاہی دا اے تے صرف یہوواہ دی عبادت کرنی چاہی دی اے، (‏2)‏ اوہناں نُوں  یہوواہ دے حکم دے مطابق خون نُوں پاک سمجھنا چاہی دا اے تے (‏3)‏ اوہناں نُوں بائبل دے حکم دے مطابق حرام‌کاری توں بچنا چاہی دا اے۔ ‏(‏اعمال 15:‏28، 29 نُوں پڑھو۔)‏ مسیحی ایہناں معاملیاں چ اپنے ایمان تے کیویں قائم رہ سکدے نیں؟‏

4.‏ سانوں کیہہ کرنا چاہی دا اے جدے توں ظاہر ہوئے کہ اَسی صرف یہوواہ دی عبادت کرنے آں؟ (‏مکاشفہ 4:‏11‏)‏

⁴ اَسی بُت‌پرستی توں بچنے آں تے صرف یہوواہ دی عبادت کرنے آں۔‏ یہوواہ نے اِسرائیلیاں نُوں حکم دِتا سی کہ اوہ صرف اوہدی عبادت کرن۔ (‏اِستثنا 5:‏6-‏10‏)‏ جدوں شیطان نے یسوع نُوں اَزمایا سی تے یسوع نے کہیا سی:‏ ”‏سانوں صرف یہوواہ دی عبادت کرنی چاہی دی اے۔“‏ (‏متی 4:‏8-‏10‏)‏ ایس لئی اَسی بُتاں دی پوجا نئیں کردے۔ اَسی کسے انسان نُوں وی خدا ورگی عزت نئیں دیندے۔ فیر بھانویں اوہ کوئی مذہبی رہنما ہووے، سیاست‌دان ہووے، کوئی اداکار ہووے یاں فیر کوئی کھیڈاری ہووے۔ اَسی صرف یہوواہ دی عبادت کرنے آں جیہڑا ساریاں چیزاں دا خالق اے۔‏‏—‏مکاشفہ 4:‏11 نُوں پڑھو۔‏

5.‏ اَسی زندگی تے خون نُوں پاک سمجھن بارے یہوواہ دے حکم نُوں کیوں مننے آں؟‏

⁵ اَسی زندگی تے خون دے پاک ہون بارے یہوواہ دے حکم نُوں مننے آں۔‏ پر کیوں؟ یہوواہ نے کہیا اے کہ خون زندگی دی علامت اے تے زندگی اوہدے وَلّوں اِک بوہت وڈی نعمت اے۔ (‏احبار 17:‏14‏)‏ جدوں یہوواہ نے انساناں نُوں جانوراں دا گوشت کھان دی اجازت دِتی تے اوہنے اوہناں نُوں کہیا کہ اوہ گوشت دے نال خون نہ کھان۔ (‏پیدائش 9:‏4‏)‏ اِسرائیلیاں نُوں شریعت دیندے ویلے وی اوہنے ایس حکم تے زور دِتا۔ (‏احبار 17:‏10‏)‏ اوہنے پہلی صدی عیسوی دی گورننگ باڈی نُوں وی ایہہ ہدیت دِتی کہ اوہ مسیحیاں نُوں کہوے کہ اوہ خون توں پرہیز کرن۔ (‏اعمال 15:‏28، 29‏)‏ جدوں اَسی علاج کران بارے فیصلے کر رہے ہُنے آں تے اَسی ایہہ پکا ارادہ کرنے آں کہ اَسی یہوواہ دے ایس حکم تے عمل کراں گے۔‏ b

6.‏ اَسی یہوواہ دے اعلیٰ معیاراں مطابق زندگی گزارن لئی کیہہ کرنے آں؟‏

⁶ اَسی یہوواہ دے اعلیٰ معیاراں مطابق چلن لئی ڈٹے رہنے آں۔‏ (‏عبرانیوں 13:‏4‏)‏ پولس رسول نے سانوں نصیحت کیتی کہ اَسی اپنے جسم دے حصیاں نُوں مار دَئیے۔ ایہدا مطلب اے کہ سانوں اپنے دل چوں غلط خواہشاں نُوں ختم کرن دی پوری کوشش کرنی چاہی دی اے۔ اَسی کوئی وی ایہو جیہا کم نئیں کردے تے نہ ای کوئی ایہو جہی چیز ویکھنے آں جدے نال اَسی حرام‌کاری کرن دے خطرے چ پے جائیے۔ (‏کُلسّیوں 3:‏5؛‏ ایوب 31:‏1‏)‏ جدوں ساڈے سامنے کوئی غلط کم کرن دی اَزمیش آندی اے تے اَسی فوراً اپنے ذہن چوں ایہو جہی سوچ تے کم نُوں کڈھ دینے آں جدی وجہ توں یہوواہ نال ساڈی دوستی ٹُٹ سکدی اے۔‏

7.‏ سانوں کیہہ کرن دا ارادہ کرنا چاہی دا اے تے کیوں؟‏

⁷ یہوواہ چاہندا اے کہ اَسی دلوں اوہدی فرمانبرداری کرئیے۔ (‏رومیوں 6:‏17‏)‏ اوہدے حکم ساڈی بھلائی لئی نیں تے اَسی اوہدے حکماں نُوں اپنے حساب نال بدل نئیں سکدے۔ (‏یسعیاہ 48:‏17، 18؛‏ 1-‏کُرنتھیوں 6:‏9، 10‏)‏ اَسی یہوواہ نُوں خوش کرن دی پوری کوشش کرنے آں تے ساڈا وی اوہی ارادہ اے جیہڑا اِک زبور لکھن والے دا سی۔ اوہنے لکھیا:‏ ”‏مَیں ساری زندگی تیرے حکماں تے عمل کراں گا۔ مَیں مرن تک ایسے طرحاں کرن دا ارادہ کیتا اے۔“‏ (‏زبور 119:‏112‏)‏ پر شیطان ساڈے ایس ارادے نُوں توڑنا چاہندا اے۔ اِنج کرن لئی اوہ کیہڑی کیہڑی چال چلدا اے؟‏

8.‏ شیطان اذیت دے ذریعے ساڈے ارادے نُوں توڑن دی کوشش کیویں کردا اے؟‏

⁸ اذیت۔‏ شیطان تشدد تے ذہنی اذیت دے ذریعے خدا دے بندیاں دے ارادے نُوں توڑن دی کوشش کردا اے۔ اوہدا مقصد اے کہ اوہ سانوں چیرپاڑ دَوے یعنی خدا نال ساڈی دوستی نُوں ختم کر دَوے۔ (‏1-‏پطرس 5:‏8‏)‏ پہلی صدی دے مسیحی ایس گل تے ڈٹے ہوئے سن کہ اوہ یہوواہ دے وفادار رہن گے۔ ایسے وجہ توں دُشمناں نے اوہناں نُوں دھمکایا، ماریا کُٹیا تے کجھ نُوں تے قتل وی کر دِتا۔ (‏اعمال 5:‏27، 28،‏ 40؛‏ 7:‏54-‏60‏)‏ شیطان اَج وی ایسے طرحاں خدا دے بندیاں نُوں اذیت دے رہیا اے۔ ایس گل دا  ثبوت اوہ اذیت اے جیہڑی روس تے ہور کئی مُلکاں چ ساڈے بھین بھراواں نُوں دِتی جا رہی اے۔ نالے ہور وی کئی فرق فرق طریقیاں نال مخالف ساڈے بھین بھراواں نُوں ستاندے نیں۔‏

9.‏ مثال دے کے دَسو کہ سانوں ایہو جہے دباؤ توں کیوں ہوشیار رہنا چاہی دا اے جیہڑا شیطان بڑی چالاکی نال ساڈے تے پاندا اے۔‏

⁹ چالاکی نال دباؤ پانا۔‏ شیطان ساڈے خلاف کھلم‌کُھلا حملے تے کردا ای اے پر ایہدے نال نال اوہ ساڈے خلاف چالاں وی بڑیاں چلدا اے۔ (‏اِفسیوں 6:‏11‏)‏ ایس معاملے چ ذرا بھرا بوب دی مثال تے غور کرو جنہوں اِک آپریشن کران لئی ہسپتال داخل ہونا پیا۔ اوہنے ڈاکٹراں نُوں دَسیا کہ اوہ کسے وی حال چ خون نئیں لوائے گا۔ اوس ڈاکٹر نے اوہنوں کہیا کہ آپریشن اونویں ای ہوئے گا جیویں تُوں چاہنا ایں۔ پر جیس دن بھرا دا آپریشن ہونا سی اوہدے توں اِک دن پہلاں جدوں اوہدے گھر والے رات نُوں گھر چلے گئے تے اوہ ڈاکٹر بھرا بوب نُوں مِلن آیا جنہے اوہنوں آپریشن توں پہلاں بے‌ہوشی دا ٹیکا لانا سی۔ اوہنے بھرا بوب نُوں دَسیا کہ ڈاکٹر آپریشن دے دوران تے خون استمال نئیں کرن گے۔ پر اوہ خون دا بندوبست ضرور کر کے رکھن گے تاکہ ضرورت پین تے لا سکن۔ شاید اوہ ڈاکٹر ایہہ سوچ رہیا سی کہ جدوں بھرا بوب دے گھر والے اوہدے نال نئیں ہون گے تے اوہ اپنا فیصلہ بدل دے گا۔ پر بھرا بوب اپنے فیصلے تے ڈٹیا رہیا۔ اوہنے ڈاکٹر نُوں دَسیا کہ اوہ کیوں کسے وی حال چ خون نئیں لوائے گا۔‏

10.‏ جیہڑے لوک خدا دے حکماں نُوں نئیں من دے اوہناں دی سوچ خطرناک کیوں اے؟ (‏1-‏کُرنتھیوں 3:‏19، 20‏)‏

¹⁰ ایہو جہے لوکاں دی سوچ جیہڑے خدا دے حکماں نُوں نئیں من دے۔‏ جے اَسی ایہو جہے لوکاں وانگوں سوچن لگ پَواں گے جیہڑے خدا نُوں نئیں من دے تے شاید اَسی یہوواہ تے اوہدے معیاراں نُوں نظرانداز کر دَئیے۔ ‏(‏1-‏کُرنتھیوں 3:‏19، 20 نُوں پڑھو۔)‏ بوہت سارے لوک دُنیا دی عقل‌مندی مطابق چل کے خدا دی نافرمانی کردے نیں۔ پرگمن تے تھواتیرہ دے کجھ مسیحی اپنے شہراں دے اوہناں لوکاں وانگوں سوچن لگ پئے جیہڑے بُت‌پرست تے بدکار سن۔ یسوع مسیح نے سختی نال ایہناں دونواں کلیسیاواں دی درستی کیتی کیونکہ اوہ بدکاری نُوں روکن لئی کجھ نئیں کر رہیاں سن۔ (‏مکاشفہ 2:‏14،‏ 20‏)‏ اَج وی شاید لوک ساڈے اُتے اوہناں ورگی سوچ اپنان دا دباؤ پان۔ شاید ساڈے رشتے‌دار تے واقف‌کار سانوں کہن کہ اَسی اپنیاں خواہشاں نُوں پورا کرئیے تے یہوواہ دے حکماں نُوں توڑ دَئیے۔ مثال لئی، شاید اوہ سانوں کہن کہ بائبل چ اپنے چال چلن نُوں پاک رکھن لئی جیہڑے معیار دِتے گئے نیں اوہ پرانے زمانے دے لوکاں لئی سن، اَج ایہناں تے عمل کرنا ضروری نئیں۔‏

11.‏ اپنے ارادے تے ڈٹے رہن لئی سانوں کیہہ کرن توں بچنا چاہی دی اے؟‏

¹¹ کدی کدار شاید سانوں لگے کہ یہوواہ نے جیہڑی ہدیت دِتی اے اوہ اینی واضح نئیں اے۔ ہو سکدا اے کہ اَسی لکھیاں ہوئیاں گلاں توں اَگے ودھ جائیے۔ (‏1-‏کُرنتھیوں 4:‏6‏)‏ یسوع دے زمانے دے مذہبی رہنما وی اِنج ای کر رہے سن۔ اوہ شریعت چ اپنے بنائے ہوئے کجھ قانون شامل کر رہے سن تے عام لوکاں لئی ایہناں قانوناں تے عمل کرنا مشکل ہو رہیا سی۔ (‏متی 23:‏4‏)‏ یہوواہ اپنے کلام تے تنظیم دے ذریعے سانوں واضح ہدیتاں دیندا اے۔ ایس لئی ساڈے کول ایہناں ہدیتاں نُوں ودھان گھٹان دی کوئی گنجائش نئیں۔ (‏امثال 3:‏5-‏7‏)‏ اَسی کدی وی لکھیاں ہوئیاں ہدیتاں توں اَگے نئیں ودھدے تے ایہو جیہاں گلاں بارے اپنی مرضی نال کوئی قانون نئیں بناندے جنہاں بارے بائبل چ کجھ نئیں لکھیا۔‏

12.‏ شیطان ساڈے ارادے نُوں توڑن لئی فضول گلاں نُوں کیویں استمال کردا اے؟‏

¹² فضول گلاں۔‏ شیطان فضول گلاں تے دُنیا دے بنیادی اصولاں دے ذریعے لوکاں نُوں گمراہ کرنا چاہندا اے تے اوہناں چ پُھٹ پانا چاہندا اے۔ (‏کُلسّیوں 2:‏8‏)‏ پہلی صدی عیسوی چ شیطان نے مسیحیاں نُوں گمراہ کرن لئی انساناں دے فلسفیاں نُوں استمال کیتا۔ ایہدے علاوہ اوہنے یہودیاں دی ایہو جہی تلیم جیہڑی پاک کلام دے مطابق نئیں سی تے ایس عقیدے نُوں وی استمال کیتا کہ مسیحیاں نُوں شریعت تے لازمی عمل کرنا چاہی دا اے۔ ایہناں جھوٹھیاں گلاں دی وجہ توں لوکاں دا دھیان یہوواہ توں ہٹ گیا جیہڑا سچی حکمت دا سرچشمہ اے۔ اَج کل شیطان سیاسی لیڈراں نُوں استمال کر کے خبراں تے سوشل میڈیا دے ذریعے جھوٹھیاں گلاں پھیلا رہیا اے۔ کورونا دی وبا دے دوران اِنج ای ہویا۔ جنہاں  لوکاں نے ایہناں جھوٹھیاں گلاں تے یقین کیتا اوہ حدوں ودھ پریشان ہو گئے۔ پر یہوواہ دے گواہواں نے تنظیم وَلّوں مِلن والیاں ہدیتاں تے عمل کیتا۔ ایس لئی اوہ پُرسکون رہے۔—‏متی 24:‏45‏۔‏

13.‏ سانوں ایہو جہیاں چیزاں توں کیوں بچنا چاہی دا اے جیہڑیاں اہم گلاں توں ساڈا دھیان ہٹا سکدیاں نیں؟‏

¹³ اہم گلاں توں دھیان ہٹان والیاں چیزاں۔‏ سانوں اپنا دھیان ایہو جہیاں گلاں تے رکھنا چاہی دا اے جیہڑیاں زیادہ اہم نیں۔ جے ساڈا دھیان اہم گلاں توں ہٹ جائے گا تے ساڈا بوہت سارا وقت تے طاقت ضائع ہو جائے گی۔ (‏فِلپّیوں 1:‏9، 10‏)‏ کھانا پینا، تفریح تے نوکری ورگے روز دے کم وی ساڈا دھیان اہم گلاں توں ہٹا سکدے نیں۔ (‏لُوقا 21:‏34، 35‏)‏ ایہدے علاوہ سانوں ہر روز جلسے جلوساں تے ہور سیاسی مسئلیاں دِیاں خبراں وی مِلدیاں رہندیاں نیں۔ سانوں ایہو جہے معاملیاں چ پین توں بچنا چاہی دا اے۔ جے اَسی اِنج نئیں کراں گے تے شاید اَسی اپنے دل یاں ذہن چ کسے دی طرفداری کرن لگ پئیے۔ شیطان ایہناں ساریاں طریقیاں نُوں ایس لئی استمال کردا اے تاکہ اوہ صحی کم کرن دے ساڈے ارادے نُوں توڑ سکے۔ اَگے اَسی ویکھاں گے کہ اَسی اوہدیاں چالاں دا مقابلہ کیویں کر سکنے آں تے اپنے ارادے تے قائم کیویں رہ سکنے آں۔‏

14.‏ اَسی کیہہ کر سکنے آں تاکہ اَسی یہوواہ وَل رہن دے اپنے ارادے تے قائم رہ سکئے؟‏

¹⁴ سوچو کہ تُسی اپنی زندگی یہوواہ دے ناں کیوں کیتی اے تے بپتسمہ کیوں لیا اے۔‏ تُسی اِنج ایس لئی کیتا سی تاکہ تُسی ثابت کر سکو کہ تُسی یہوواہ وَل او۔ سوچو کہ کیس وجہ توں توانوں یقین ہو گیا کہ توانوں سچائی مِل گئی اے۔ تُسی یہوواہ بارے علم حاصل کیتا تے اوہنوں اپنا اسمانی باپ من کے اوہنوں پیار کرن لگ پئے تے اوہدی عزت کرن لگ پئے۔ تُسی ایمان لے آئے تے اپنے گُناہواں توں توبہ کر لئی۔ تُسی ایہو جہے کم چھڈ دِتے جنہاں توں یہوواہ نُوں نفرت اے تے اوہ کم کرن لگ پئے جنہاں توں اوہ خوش ہوندا اے۔ جدوں تُسی سمجھ گئے کہ یہوواہ نے توانوں معاف کر دِتا اے تے توانوں ذہنی سکون ملیا۔ (‏زبور 32:‏1، 2‏)‏ تُسی عبادتاں تے آن لگ پئے تے پاک کلام چوں سکھیاں ہوئیاں گلاں دُوجیاں نُوں دَسن لگ پئے۔ تے ہُن اِک بپتسمہ یافتہ گواہ دے طور تے تُسی اوس راہ تے چل رہے او جیہڑی زندگی وَل لے جاندی اے۔ نالے تُسی پکا ارادہ کیتا ہویا اے کہ تُسی ایس راہ تے چلدے رہوو گے۔—‏متی 7:‏13، 14‏۔‏

15.‏ خدا دے کلام نُوں پڑھن تے ایہدے تے سوچ‌وچار کرن نال کیہہ فائدہ ہوندا اے؟‏

 ¹⁵ خدا دے کلام نُوں پڑھو تے ایہدے تے سوچ‌وچار کرو۔‏ اِک درخت اوہدوں ای کھڑا رہ سکدا اے جدوں اوہدیاں جڑاں مضبوط ہوندیاں نیں۔ ایسے طرحاں جے یہوواہ تے ساڈا ایمان مضبوط ہوئے گا تے اَسی وی اوہدے وفادار رہن دے ارادے تے قائم رہ سکاں گے۔ جدوں اِک درخت ودھدا اے تے اوہدیاں جڑاں گہریاں ہوندیاں جاندیاں نیں تے پھیل دِیاں جاندیاں نیں۔ جدوں اَسی خدا دے کلام نُوں پڑھنے آں تے ایہدے تے سوچ‌وچار کرنے آں تے ساڈا ایمان مضبوط ہوندا اے۔ تے ایس گل تے ساڈا یقین ہور پکا ہو جاندا اے کہ یہوواہ دی گل منن چ ای ساڈی بھلائی اے۔ (‏کُلسّیوں 2:‏6، 7‏)‏ ایس گل تے غور کرو کہ ماضی چ یہوواہ دِیاں ہدیتاں تے مشوریاں توں اوہدے بندیاں نُوں کیہہ فائدہ ہویا۔ مثال لئی، حزقی‌ایل نے ایس گل تے بڑا غور کیتا کہ اِک فرشتہ اوس ہیکل نُوں کِنّے دھیان نال ناپ رہیا اے جیہڑی حِزقی‌ایل رویا چ ویکھ رہیا سی۔ ایس رویا دی وجہ توں حِزقی‌ایل دا ایمان مضبوط ہویا۔ ایہدے توں اَسی سکھنے آں کہ اَسی یہوواہ دی عبادت بارے اوہدے اعلیٰ معیاراں تے کیویں پورا اُتر سکنے آں۔ (‏حِزقی‌ایل 40:‏1-‏4؛‏ 43:‏10-‏12‏)‏ جدوں اَسی وی خدا دے کلام دِیاں گُوڑھیاں گلاں نُوں پڑھنے آں تے اوہناں تے سوچ‌وچار کرنے آں تے سانوں وی بڑا فائدہ ہوندا اے۔‏

16.‏ ثابت‌قدم رہن دی وجہ توں بھرا بوب نُوں کیویں فائدہ ہویا؟ (‏زبور 112:‏7‏)‏

¹⁶ اپنے دل نُوں ثابت‌قدم تے قائم رکھو۔‏ بادشاہ داؤد نے اِک زبور چ کہیا کہ اوہ اپنے دل چوں یہوواہ دی محبت نُوں کدی وی ختم نئیں ہون دَوے گا۔ اوہنے کہیا:‏ اَے خدا، میرا دل قائم اے۔ (‏زبور 57:‏7‏)‏ اَسی وی یہوواہ تے پورا بھروسا کر کے اپنے دل نُوں قائم رکھ سکنے آں یعنی ثابت‌قدم رہ سکنے آں۔ ‏(‏زبور 112:‏7 نُوں پڑھو۔)‏ غور کرو کہ اِنج کرن نال بھرا بوب دی مدد کیویں ہوئی۔ جدوں ڈاکٹر نے اوہنوں دَسیا کہ اوہ آپریشن دے دوران خون دا اِنتظام کر کے رکھن گے تاکہ لوڑ پین تے لا سکن تے بھرا نے ڈاکٹر نُوں کہیا:‏ ”‏جے اوہناں نے اوہنوں خون لان بارے سوچیا وی تے اوہ فوراً ہسپتال توں چلا جائے گا۔“‏ بعد چ بھرا بوب نے دَسیا:‏ ”‏مینوں چنگی طرحاں پتہ سی کہ مَیں کیہہ کرنا اے۔ مینوں ایس گل دی ذرا وی فکر نئیں سی کہ اَگے میرے نال کیہہ ہوئے گا۔“‏

17.‏ اَسی بھرا بوب دی مثال توں کیہہ سکھ سکنے آں؟ (‏تصویر نُوں وی ویکھو۔)‏

¹⁷ بھرا بوب ایس لئی ثابت‌قدم رہ سکیا کیونکہ اوہنے ہسپتال جان توں پہلاں ای ایہہ ارادہ کیتا ہویا سی کہ اوہ اپنے فیصلے تے قائم رہے گا۔ سب  توں پہلاں تے اوہنے اپنے دل چ ایہہ خواہش پیدا کیتی کہ اوہ یہوواہ نُوں خوش کرے گا۔ فیر اوہنے بائبل تے ساڈیاں کتاباں تے ویڈیوز دے ذریعے ایس گل بارے تحقیق کیتی کہ ایہناں چ زندگی تے خون دے پاک ہون بارے کیہہ دَسیا گیا اے۔ ایہدے بعد اوہنے ایس گل تے اپنا ایمان مضبوط کیتا کہ جے اوہ یہوواہ دے حکم منن دا فیصلہ کرے گا تے یہوواہ اوہنوں ایہدا انعام ضرور دَوے گا۔ بھرا بوب وانگوں اَسی وی ہر طرحاں دی مشکل دا سامنا کر دے ویلے ثابت‌قدم رہ سکنے آں۔‏

18.‏ برق نے یہوواہ تے بھروسا کرن دے معاملے چ ساڈے لئی چنگی مثال کیویں قائم کیتی؟ (‏پہلے صفحے دی تصویر نُوں ویکھو۔)‏

¹⁸ یہوواہ تے بھروسا کرو۔‏ ذرا برق دی مثال تے غور کرو جنہوں یہوواہ دِیاں ہدیتاں تے بھروسا کرن دا فائدہ ہویا۔ برق دے زمانے چ اِسرائیلی جنگ لئی تیار نئیں سن۔ اوہناں کول تے ہتھیار وی نئیں سن۔ پر یہوواہ نے برق نُوں کہیا کہ اوہ قنانی فوج دے سردار سیسرا تے اوہدی فوج نال لڑن جائے جنہاں کول بوہت سارے ہتھیار سن۔ (‏قضاۃ 5:‏8‏)‏ دبورہ نبِیّہ نے برق نُوں کہیا کہ اوہ پہاڑاں توں اُترے تے میدان چ جا کے سیسرا تے اوہدے 900 رتھاں دا مقابلہ کرے۔ کُھلے میدان چ اِسرائیلیاں لئی تیزی نال اَگے ودھدے ہوئے رتھاں دا مقابلہ کرنا اسان نئیں سی۔ تے برق نُوں وی ایس گل دا پتہ سی۔ پر فیر وی اوہنے اوس ہدیت تے عمل کیتا جیہڑی یہوواہ نے اوہنوں دبورہ نبِیّہ دے ذریعے دِتی سی۔ جیویں ای برق تے اوہدی فوج تبور دے پہاڑ توں تھلے اُتری، یہوواہ نے بوہت تیز مینہ پایا جدی وجہ توں سیسرا دے رتھ چکڑ چ پھس گئے۔ اِنج یہوواہ نے برق نُوں جنگ جتوا دِتی۔ (‏قضاۃ 4:‏1-‏7،‏ 10،‏ 13-‏16‏)‏ ایسے طرحاں جدوں اَسی وی یہوواہ دِیاں ہدیتاں تے عمل کراں گے جیہڑیاں اوہ اپنی تنظیم دے ذریعے سانوں دیندا اے تے اوہ سانوں وی کامیابی بخشے گا۔—‏اِستثنا 31:‏6‏۔‏

19.‏ تُسی ثابت‌قدم کیوں رہنا چاہندے او؟‏

¹⁹ جدوں تک اَسی شیطان دی ایس دُنیا چ رہ رہے آں سانوں ثابت‌قدم رہن لئی کوشش جاری رکھنی پئے گی۔ (‏1-‏تیمُتھیُس 6:‏11، 12؛‏ 2-‏پطرس 3:‏17‏)‏ دُعا اے کہ اَسی کدی وی اذیت، چالاکی نال پائے گئے دباؤ، انسانی سوچ، فضول گلاں تے ایہو جیہاں چیزاں دی وجہ توں اپنے ارادے نُوں کمزور نہ ہون دَئیے جیہڑیاں اہم گلاں توں ساڈا دھیان ہٹا سکدیاں نیں۔ (‏اِفسیوں 4:‏14‏)‏ ایہدی بجائے آؤ اَسی ثابت‌قدم رہیے تے یہوواہ نال پیار کردے رہیے تے اوہدے حکماں تے چلدے رہیے۔ پر ایہدے نال نال سانوں سمجھدار تے لچک‌دار وی ہونا چاہی دا اے۔ اگلے مضمون چ اَسی ویکھاں گے کہ یہوواہ تے یسوع مسیح نے ایس معاملے چ ساڈے لئی چنگی مثال کیویں قائم کیتی اے۔‏