میرا ابو یونائیٹڈ چرچ آف کینیڈا دا اِک رہنما سی۔ ایس لئی اوہ ہر اِتوار دی سویر مینوں تے میری بھین نُوں سنڈے سکول گھلدا ہوندا سی تے 11 وجے سانوں اپنے نال چرچ لے جاندا سی۔ تے دوپہر نُوں اَسی اپنی امی نال یہوواہ دے گواہواں دی عبادت تے جانے ساں۔ اَسی صاف صاف ویکھ سکنے ساں کہ دونواں مذہباں چ کِنّاں فرق اے۔‏

امی بائبل چوں جو کجھ وی سکھ رہی سی اوہدے بارے اوہنے اِک شادی‌شُدہ جوڑے بوب تے میریون ہے‌چیسن نُوں دَسیا۔ اوہ دونویں امی دے بڑے چنگے دوست سن تے اوہ وی یہوواہ دے گواہ بن گئے۔ 1958 چ بوب تے میریون اپنے تِن پُتراں دے نال مینوں وی شہر نیویارک چ ہون والی 8 دن دی بین‌الاقوامی کنونشن تے لے گئے۔ ہُن جدوں مَیں اوس ویلے بارے سوچنا واں تے مینوں اندازہ ہوندا اے کہ اوہناں لئی مینوں اپنے نال لے کے جانا ایناں اسان نئیں سی۔ پر اوس کنونشن نال میری زندگی دِیاں بڑیاں خاص یاداں جُڑیاں نیں۔‏

جدوں مَیں نوجوان ساں تے اَسی اِک ایہو جہی جگہ تے رہنے ساں جِتھے ساڈے کول بوہت سارے جانور سن۔ اوہناں دی دیکھ‌بھال کرن چ مینوں بڑا مزہ آندا سی ایتھوں تک کہ مَیں جانوراں دا ڈاکٹر بنن بارے سوچن لگ پیا۔ میری امی نے ایہہ گل ساڈی کلیسیا دے اِک بزرگ نُوں دَسی۔ اوس بزرگ نے مینوں بڑے پیار نال سمجھایا کہ اَسی آخری زمانے چ رہ رہے آں۔ نالے جے مَیں جانوراں دا ڈاکٹر بنن لئی یونیورسٹی چ کئی سالاں تک پڑھائی کراں گا تے ہو سکدا اے کہ یہوواہ نال میری دوستی کمزور پے جائے۔ (‏2-‏تیمُتھیُس 3:‏1‏)‏ ایس لئی مَیں فیصلہ کیتا کہ مَیں یونیورسٹی نئیں جانواں گا۔‏

 مَیں حالے وی ایہی سوچ رہیا ساں کہ کالج دی پڑھائی ختم ہون دے بعد مَیں کیہہ کراں گا۔ بھانویں کہ مَیں ہفتے دے آخر چ مُنادی کرن لئی جانا ساں پر مینوں مُنادی کرن چ مزہ نئیں آندا سی۔ مینوں نئیں لگدا سی کہ مَیں پہل‌کار بن سکنا واں۔ میرے ابو تے چاچا یہوواہ دے گواہ نئیں سن تے اوہ مینوں کہن لگ پئے کہ مَیں ٹورانٹو دی اِک وڈی اِنشورنس کمپنی چ کم کرنا شروع کر دَواں۔ میرا چاچا اوس کمپنی چ اِک وڈے عہدے تے سی۔ ایس لئی مَیں اوتھے نوکری کرنی شروع کر دِتی۔‏

ٹورانٹو چ میرا زیادہ‌تر وقت کم کرن چ تے ایہو جہے لوکاں نال گزردا سی جیہڑے یہوواہ دے گواہ نئیں سن۔ ایس وجہ توں مَیں باقاعدگی نال عبادتاں تے مُنادی تے نئیں جانا ساں۔ شروع شروع چ مَیں اپنے دادا نال رہنا ساں جیہڑا یہوواہ دا گواہ نئیں سی۔ پر اوہدے فوت ہون دے بعد مینوں رہن لئی جگہ دی لوڑ سی۔‏

بوب تے میریون جیہڑے 1958 چ مینوں اپنے نال کنونشن تے لے کے گئے سن میرے لئی ماں پیو ورگے سن۔ اوہناں نے مینوں کہیا کہ مَیں اوہناں دے گھر رہ سکنا واں۔ نالے اوہناں نے یہوواہ دے نیڑے رہن چ میری بڑی مدد کیتی۔ 1960 چ مَیں تے اوہناں دے بیٹے جان نے بپتسمہ لے لیا۔ جان نے پہل‌کار دے طور خدمت شروع کر دِتی تے اوہنوں ویکھ کے مینوں وی حوصلہ ملیا کہ مَیں وی ودھ‌چڑھ کے مُنادی کراں۔ کلیسیا چ بھراواں نے ویکھیا کہ مَیں یہوواہ دی خدمت چ اَگے ودھ رہیا واں۔ ایس لئی اوہناں نے مینوں مسیحی خدمتی سکول دا نگہبان مقرر کر دِتا۔‏ a

1966چ مَیں اِک پہل‌کار رینڈی برج نال شادی کر لئی۔ اوہ بوہت ای جوشیلی سی تے کسے ایہو جہی جگہ تے جا کے خدمت کرنا چاہندی سی جِتھے مبشراں دی زیادہ لوڑ ہووے۔ ساڈے حلقے دے نگہبان نے ساڈا حوصلہ ودھایا کہ اَسی کینیڈا دے صوبے اونٹاریو دے شہر اوریلیا دی کلیسیا چ خدمت کریئے۔ اَسی چھیتی ای اوتھے شفٹ ہو گئے۔‏

اوریلیا پونچن دے فوراً بعد ای مَیں وی رینڈی نال پہل‌کار دے طور تے خدمت کرن لگ پیا۔ اوہدا جوش ویکھ کے مَیں وی جوش نال بھر گیا۔ جدوں مَیں اِک چنگا پہل‌کار بنن لئی پوری وا لائی تے مَیں اوس خوشی نُوں محسوس کیتا جیہڑی دُوجیاں نُوں بائبل چوں تلیم دین تے اوہناں نُوں سچائی نُوں قبول کردیاں ویکھ کے مِلدی اے۔ سانوں اوریلیا چ اِک میاں بیوی دی مدد کر کے وی بڑی خوشی ہوئی جنہاں نے اپنی زندگی چ تبدیلیاں کیتیاں تے یہوواہ دے گواہ بن گئے۔‏

جدوں مَیں ٹورانٹو گیا تے میری ملاقات آرنلڈ میک‌نمارا نال ہوئی۔ اوہ اِک ذمے‌دار بھرا دے طور تے بیت‌ایل چ خدمت کر رہیا سی۔ اوہنے سانوں پچھیا کہ کیہہ اَسی خاص پہل‌کار دے طور تے خدمت کرنا چاہنے آں۔ مَیں اوہنوں فوراً کہیا:‏ ”‏ہاں جی، پر اَسی کیوبیک نئیں جانا چاہندے۔“‏ کینیڈا چ انگریزی زبان بولن والے لوک کیوبیک دے فرانسیسی بولن والے لوکاں بارے چنگی سوچ نئیں رکھدے سن تے میرے تے وی ایس سوچ دا اثر سی۔ اوس ویلے لوک حکومت دے خلاف احتجاج کر رہے سن کیونکہ اوہ چاہندے سن کہ کیوبیک نُوں کینیڈا توں آزادی ملے۔‏

بھرا آرنلڈ نے کہیا:‏ ”‏فی‌الحال برانچ خاص پہل‌کاراں نُوں کیوبیک ای گھل رہی اے۔“‏ مَیں اوتھے جان لئی فوراً ای تیار ہو گیا کیونکہ مینوں پتہ سی کہ رینڈی اوتھے خدمت کرنا چاہندی اے۔ بعد چ مینوں اندازہ ہویا کہ ایہہ ساڈی زندگی دا سب توں ودھیا فیصلہ سی۔‏

اَسی پنج ہفتیاں تک فرانسیسی زبان سکھن لئی کلاس لئی تے فیر مَیں، رینڈی تے اِک ہور پہل‌کار میاں بیوی شہر ریموسکی گئے جیہڑا شہر مونٹریال توں تقریباً 540 کلومیٹر (‏336 میل)‏ شمال مشرق وَل اے۔ سانوں حالے وی فرانسیسی زبان نُوں ہور چنگی طرحاں سکھن دی لوڑ سی۔ ایس گل دا احساس مینوں اوس ویلے ہویا جدوں مَیں اِک عبادت تے کجھ اعلان پڑھے۔ اعلان ایہہ سی کہ ”‏آن والی کنونشن تے اوسٹریا توں بوہت سارے بھین بھرا آن گے“‏ پر مَیں ایہو جہیا لفظ بول دِتا جدا مطلب سی کہ ”‏آن والی کنونشن تے بوہت سارے شترُمُرغ آن گے۔“‏

ریموسکی چ اَسی چارے پہل‌کار، چار غیرشادی‌شُدہ بھیناں تے اِک جوڑا اپنیاں دو دھیاں نال رہنے ساں۔ اوس جوڑے نے اِک بوہت وڈا گھر کرائے تے لیا ہویا سی۔ پر اَسی سارے مِل کے اوہدا کرایہ دینے ساں۔ اوس گھر نُوں اَسی ”‏وائٹ ہاؤس“‏ کہنے ساں کیونکہ اوہ سامنیوں چِٹے رنگ دا سی تے اوہدے ستون وی چِٹے سن۔ گھر چ عام طور تے 12 توں 14 لوک رہندے سن۔ ایس لئی جدوں اَسی صبح، دوپہر تے شام نُوں مُنادی تے جانے ساں تے ساڈے نال جان لئی کوئی نہ کوئی ضرور ہوندا سی تے اوہدوں وی جدوں باہر بڑی ٹھنڈ ہوندی سی۔‏

ساڈی اوہناں پہل‌کاراں نال اینی گُوڑھی دوستی ہو گئی کہ اوہ ساڈے لئی گھر دے جیاں ورگے بن گئے۔ کدی کدار اَسی باہر اَگ بال کے بیٹھنے ساں تے مِل کے کھانا بنانے ساں۔ نالے اِک بھرا بڑا اچھا ساز وجاندا سی ایس لئی اَسی اکثر ہفتے دی رات نُوں مِل کے نچنے گانے ساں۔‏

ریموسکی چ بوہت سارے لوک بائبل دی تلیم حاصل کرنا چاہندے سن۔ سانوں ایہہ ویکھ کے بڑی خوشی ہوئی کہ پنج سالاں دے اندر اندر بائبل کورس کرن والے بوہت سارے لوکاں نے بپتسمہ لے لیا تے کلیسیا چ مبشراں دی تعداد 35 ہو گئی۔‏

کیوبیک چ سانوں بادشاہی دے مُناداں دے طور تے بڑی چنگی تربیت مِلی۔ اَسی ویکھیا کہ یہوواہ مُنادی دے کم چ ساڈی بڑی مدد کر رہیا اے تے ساڈیاں لوڑاں نُوں پورا کر رہیا اے۔ ایہدے نال نال اَسی اپنے دل چ فرانسیسی زبان بولن والے لوکاں، اوہناں دی زبان تے ثقافت لئی محبت پیدا کر لئی۔ ایس وجہ توں اَسی دُوجیاں ثقافتاں دے لوکاں نال وی محبت کرن لگ پئے۔—‏2-‏کُرنتھیوں 6:‏13‏۔‏

اچانک ای برانچ نے سانوں کہیا کہ اَسی ٹراکیڈائے چلے جائیے جیہڑا صوبہ نیو برنسوک دے مشرقی ساحل تے وے۔ ساڈے لئی اوتھوں جانا اسان نئیں سی کیونکہ اَسی کجھ چِر پہلاں ای اِک گھر کرائے تے لین لئی ایگریمنٹ کیتا سی۔ نال مَیں جیس سکول چ پڑھانا ساں اوہدے نال وی مَیں کانٹریکٹ کیتا ہویا سی۔ ایہدے علاوہ اَسی جنہاں نُوں بائبل کورس کرا رہے ساں اوہ نویں نویں مبشر بنے سن تے اِک عبادت‌گاہ دی تعمیر دا کم وی چل رہیا سی۔‏

اَسی ایس بارے یہوواہ کولوں دُعا کیتی تے جاکے ٹراکیڈائے نُوں وی ویکھیا۔ اوہ ریموسکی توں کافی فرق سی۔ پر اَسی سوچیا کہ جے یہوواہ چاہندا اے کہ اَسی اوتھے جائیے تے اَسی ضرور جانواں گے۔ اَسی اپنیاں اَکھاں نال ویکھیا کہ یہوواہ ساڈی راہ چوں ہر رُکاوٹ نُوں دُور کر رہیا اے۔ (‏ملاکی 3:‏10‏)‏ رینڈی دی یہوواہ نال بڑی پکی دوستی  سی۔ اوہدے اندر قربانی دا جذبہ سی۔ نالے اوہ ہاسا مذاق وی کردی رہندی سی۔ ایس وجہ توں ساڈے لئی دُوجی جگہ تے رہنا اسان ہو گیا۔‏

اَسی جیس نوِیں کلیسیا چ گئے اوتھے صرف اِک ای بزرگ سی جدا نال رابرٹ راس سی۔ بھرا رابرٹ اپنی بیوی لینڈا دے نال اوتھے پہل‌کار دے طور تے خدمت کردا سی۔ اوہناں نے اپنے پہلے بچے دی پیدائش دے بعد وی اوتھے ای رہن دا فیصلہ کیتا۔ اوہ اپنے پُتر دی دیکھ‌بھال کرن دے نال نال بڑے جوش نال مُنادی کردے سن۔ نالے اوہ بوہت مہمان‌نواز وی سن۔ ایس وجہ توں مینوں تے رینڈی نُوں بڑا حوصلہ ملیا۔‏

جدوں سانوں ٹراکیڈائے چ خدمت کردے ہوئیاں دو سال ہو گئے تے سانوں اِک ہور ذمے‌داری مِلی جدے بارے اَسی سوچیا وی نئیں سی۔ مینوں حلقے دا دَورہ کرن لئی کہیا گیا۔ اَسی انگریزی زبان والے حلقیاں چ سَت سالاں تک خدمت کیتی۔ فیر سانوں کیوبیک چ فرانسیسی زبان والے حلقے چ گھل دِتا گیا۔ کیوبیک چ جیہڑا صوبائی نگہبان سی اوہدا ناں لیونس کریپولٹ سی۔ اوہ ہمیشاں میریاں تقریراں دی تعریف کردا سی۔ پر بعد چ مینوں پچھدا سی کہ ”‏کیہہ مَیں ایہناں نُوں ہور بہتر بنان لئی کجھ کر سکنا واں؟“‏ b اوہنے میری مدد کیتی تاکہ مَیں اپنے تلیم دین دے طریقے نُوں ہور بہتر تے اسان بنا سکاں۔‏

میری اِک ذمے‌داری جیہڑی مینوں اَج تک یاد اے اوہ 1978 چ ہون والی بین‌الاقوامی کنونشن تے مینوں دِتی گئی سی۔ ایہہ کنونشن مونٹریال چ ہوئی سی۔ مَیں کھانے دا اِنتظام کرن والے شعبے چ کم کر رہیا ساں۔ اوس کنونشن تے تقریباً 80 ہزار لوکاں نے آنا سی۔ کھان پین دے اِنتظام چ ایس واری کجھ تبدیلیاں سن۔ سب کجھ بالکل نواں سی، چیزاں، کھانا، تے کھانا بنان دا طریقہ۔ ساڈے کول تقریباً 20 وڈے فرج سن جیہڑے کدی کدی کم کرنا بند کر دیندے سن۔ کنونشن دا پہلا دن شروع ہون توں پہلاں سانوں اَدھی رات تک سٹیڈیم چ جان دی اجازت نئیں سی کیونکہ اوتھے کوئی میچ ہو رہیا سی۔ پر اَسی دن چڑھن توں پہلاں ناشتہ تیار کر کے رکھنا سی۔ اَسی سارے بوہت تھکے ہوئے ساں۔ پر میرے نال کم کرن والے بھین بھرا بڑی محنت تے لگن نال تے ہاسا مذاق کردے ہوئیاں کم کر رہے سن۔ ایس سب توں مَیں بوہت کجھ سکھیا۔ اَسی سارے اِک دُوجے دے چنگے دوست بن گئے تے ایہہ دوستی اَج تک قائم اے۔ کیوبیک چ ہون والی ایہہ بین‌الاقوامی کنونشن بڑی یادگار کنونشن سی۔ ایہدے تے حاضر ہو کے مینوں بڑی خوشی مِلی کیونکہ 1940 توں لے کے 1960 تک دا دَور ساڈے لئی بڑا ای مشکل سی۔‏

مَیں اوہناں بھراواں کولوں بوہت کجھ سکھیا اے جیہڑے مونٹریال چ ہون والیاں وڈیاں وڈیاں کنونشناں دا اِنتظام سنبھالدے سن۔ اِک وار اِک کنونشن دا سارا اِنتظام بھرا ڈیوڈ سپلین ویکھ رہے سن جیہڑے ہُن گورننگ باڈی دے ممبر نیں۔ اوس توں  اگلے ای سال مینوں کنونشن دے اِنتظام ویکھن لئی کہیا گیا۔ ایس اِنتظام نُوں سنبھالن چ بھرا ڈیوڈ نے میرا پورا پورا ساتھ دِتا۔‏

جدوں 2011 چ مینوں تے رینڈی نُوں حلقیاں دا دورہ کردے 36 سال ہو گئے تے فیر مینوں بزرگاں لئی سکول چ تربیت دین لئی بلا‌یا گیا۔ اوہناں دو سالاں چ اَسی 75 فرق فرق تھانواں تے رہے۔ پر ساڈیاں قربانیاں بے‌کار نئیں گئیاں۔ ہر ہفتے دے آخر تے بزرگ سانوں دَسدے سن کہ اوہ ایس سکول لئی بڑے شکرگزار نیں کیونکہ اوہ ویکھ سکدے سن کہ گورننگ باڈی نُوں ایس گل دی کِنّی فکر اے کہ بزرگاں دی یہوواہ نال دوستی مضبوط رہوے۔‏

بعد چ مَیں بادشاہی دے مُناداں لئی سکول چ وی تربیت دِتی۔ ایس سکول چ طالبِ‌علماں نُوں سَت گھنٹے لئی کلاس چ بیٹھنا پیندا سی۔ فیر ہر شام تِن گھنٹے ہوم‌ورک کرنا پیندا سی تے اوہناں نُوں ہر ہفتے چار یاں پنج حصے تیار کرن لئی وی مِلدے سن۔ ایس وجہ توں اوہ بوہت تھک جاندے سن۔ ایس لئی مَیں تے تربیت دین والا دُوجا بھرا اوہناں نُوں سمجھانے ساں کہ اوہ ایہہ سارا کجھ یہوواہ دی مدد نال کر سکدے نیں۔ مینوں اَج وی یاد اے کہ اوہ طالبِ‌علم ایہہ ویکھ کے بڑے حیران ہوندے سن کہ یہوواہ تے بھروسا کرن دی وجہ توں اوہ اپنی سوچ توں وی ودھ کے کر سکے۔‏

میری امی نے اوہناں لوکاں دی بڑی مدد کیتی جیہڑے اوہدے توں بائبل کورس کر رہے سن جدی وجہ توں اوہ یہوواہ دی خدمت چ اَگے ودھ سکے۔ امی نے تے ابو دی وی مدد کیتی۔ جدی وجہ توں سچائی لئی ابو دی سوچ تھوڑی بدل گئی۔ امی دے فوت ہون دے تِن دن بعد ابو عوامی تقریر سُنن لئی ساڈی عبادت تے آئے۔ ایہہ ویکھ کے اَسی بڑے حیران ہوئے۔ ابو اگلے 26 سالاں تک باقاعدگی نال عبادتاں تے آندے رہے۔ اوہناں نے بپتسمہ تے نئیں لیا پر بزرگ دَسدے نیں کہ میرے ابو ہر عبادت تے سب توں پہلاں آندے سن۔‏

امی نے میرے لئی تے میریاں بھیناں لئی بڑی چنگی مثال قائم کیتی۔ میریاں تِنے بھیناں تے اوہناں دے شوہر وفاداری نال یہوواہ دی خدمت کر رہے نیں۔ میری اِک بھین پُرتگال دی برانچ چ تے اِک ہیٹی دی برانچ خدمت کر رہی اے۔‏

ہُن مَیں تے رینڈی اونٹاریو دے شہر ہملٹن چ خاص پہل‌کاراں دے طور تے خدمت کر رہے آں۔ جدوں اَسی حلقیاں دا دورہ کرنے ساں تے سانوں بھین بھراواں نال اوہناں دِیاں واپسی ملاقاتاں تے بائبل کورساں تے جانا بڑا چنگا لگدا سی۔ پر ہُن سانوں ایہہ ویکھ کے خوشی مِلدی اے کہ جیہڑے لوکاں نُوں اَسی بائبل کورس کرا رہے آں اوہ اپنے دل چ یہوواہ لئی محبت پیدا کر رہے نیں۔ نوِیں کلیسیا چ بھین بھراواں نال ساڈی دوستی ہو رہی اے۔ تے سانوں ایہہ ویکھ کے بڑا حوصلہ مِل رہیا اے کہ یہوواہ نے کیویں چنگے تے ماڑے ویلے چ اوہناں دا ساتھ دِتا۔‏

مَیں تے رینڈی اوہناں بھین بھراواں دی بڑی قدر کرنے آں جنہاں نے ساڈی مدد کیتی۔ ایس لئی اَسی وی دُوجیاں لئی فکر وکھان دی پوری کوشش کیتی تے اوہناں دا حوصلہ ودھایا تاکہ اوہ ودھیا توں ودھیا طریقے نال یہوواہ دی خدمت کر سکن۔ (‏2-‏کُرنتھیوں 7:‏6، 7‏)‏ مثال لئی، اِک بھرا دی بیوی، پُتر تے دھی پہل‌کار دے طور تے خدمت کر رہے سن۔ مَیں اوس بھرا نُوں پچھیا:‏ ”‏کیہہ اوہنے آپ کدی پہل‌کار بنن بارے سوچیا اے؟“‏ اوہنے کہیا:‏ ”‏مَیں تِن پہل‌کاراں دِیاں ضرورتاں پوریاں کرن نال اوہناں دا ساتھ دے رہیا واں۔“‏ فیر مَیں اوہدے کولوں پچھیا:‏ ”‏کیہہ تُوں یہوواہ نالوں بہتر طریقے نال اوہناں دا خیال رکھ سکنا ویں؟“‏ مَیں اوہدا حوصلہ ودھیا کہ اوہ وی اوس خوشی دا تجربہ کرے جیہڑی اوہدی بیوی، پُتر تے دھی محسوس کر رہے نیں۔ اوہ بھرا چھ مہینے دے اندر اندر پہل‌کار بن گیا۔‏

مَیں تے رینڈی آن والیاں نسلاں نُوں یہوواہ دے شان‌دار کماں بارے دَسدے رہواں گے تے سانوں امید اے کہ اوہ وی یہوواہ دی خدمت چ اوہی خوشی محسوس کرن گے جیہڑی اَسی محسوس کیتی اے۔—‏زبور 71:‏17، 18