مطالعیا کرن لئی مشورہ

توانوں کیہڑیاں چیزاں دا مطالعیا پہلے کرنا چاہی دا اے؟‏

ساڈے ساریاں کول ذاتی مطالعیا کرن لئی بوہتا وقت نئیں ہوندا۔ ایس لئی تواڈے کول جِنّاں وی وقت ہوندا اے اوہنوں سمجھداری نال استمال کرو۔ سب توں پہلی گل، کسے وی موضوع دا مطالعیا کردے ویلے اوہنوں ایناں وقت دَوو کہ اوہ توانوں سمجھ آ جائے۔ نالے اِک وقت چ بوہت ساریاں چیزاں دا مطالعیا نہ شروع کر دَوو۔ اِنج توانوں زیادہ فائدہ نئیں ہوئے گا۔ پر جے تُسی کسے اِک موضوع تے پورا دھیان دَوو گے تے توانوں بوہت فائدہ ہوئے گا۔‏

فیر سوچو کہ کیہڑیاں چیزاں دا مطالعیا کرنا زیادہ ضروری اے۔ (‏اِفسیوں 5:‏15، 16‏)‏ ایس بارے ذرا ایہناں مشوریاں تے غور کرو:‏

‏• ہر روز بائبل پڑھو۔ (‏زبور 1:‏2‏)‏ شروع شروع چ تُسی اوہ باب پڑھ سکدے او جنہاں تے ساڈی مسیحی زندگی تے خدمت والی عبادت چ گل کیتی جائے گی۔‏

‏• ‏”‏مینارِنگہبانی“‏ تے مسیحی زندگی تے خدمت والی عبادت دی تیاری کرو۔ چنگی تیاری کرو تاکہ تُسی جواب دے سکو۔—‏زبور 22:‏22‏۔‏

‏• جدوں وی تواڈے کول وقت ہووے ‏”‏مینارِنگہبانی“‏ دے دُوجے مضموناں نُوں پڑھو تے ویب‌سائٹ jw.org تے آن والیاں ویڈیوز تے مضموناں نُوں وی ویکھو۔‏

‏• کسے ایہو جہے موضوع تے تحقیق کرو جیہڑا توانوں بوہت پسند اے۔ تُسی اپنے کسے مسئلے، سوال یاں فیر بائبل دے کسے ایہو جہے موضوع تے تحقیق کر سکدے او جنہوں تُسی ہور چنگی طرحاں سمجھنا چاہندے او۔‏