1.‏ مسیحیاں نُوں کیس لحاظ نال اِک درخت وانگوں ہونا چاہی دا اے؟ (‏تصویر نُوں وی ویکھو۔)‏

 منیا جاندا اے کہ اِک لچک‌دار درخت نُوں تیز ہوا توڑ نئیں سکدی۔ ایس مثال توں پتہ چلدا اے کہ اِک درخت تیز ہوا دے باوجود اوسے صورت چ ٹکیا رہ سکدا اے جے اوہ لچک‌دار ہووے۔ جے اَسی وی زندگی دِیاں مشکلاں دے باوجود خوشی نال یہوواہ دی خدمت کردے رہنا چاہنے آں تے سانوں وی لچک‌دار بننا چاہی دا اے۔ اَسی اِنج کیویں کر سکنے آں؟ سانوں سمجھداری نال بدلدے حالاتاں مطابق ڈھلنا چاہی دا اے تے دُوجیاں دی رائے تے فیصلیاں لئی احترام وکھانا چاہی دا اے۔‏

2.‏ (‏الف)‏ اپنے آپ نُوں بدلدے حالاتاں مطابق ڈھالن چ کیہڑیاں خوبیاں ساڈی مدد کر سکدیاں نیں؟ (‏ب)‏ ایس مضمون چ اَسی کیس بارے گل کراں گے؟‏

² اَسی یہوواہ دی خدمت کرنے آں ایس لئی سانوں لچک‌دار ہونا چاہی دا اے۔ ایہدے علاوہ ساڈے اندر خاکساری تے ہمدردی دی خوبی وی ہونی چاہی دی اے۔ ایس مضمون چ اَسی ویکھاں گے کہ ایہناں خوبیاں دی وجہ توں ساڈے کجھ ہم‌ایمان بدلدے حالاتاں مطابق کیویں ڈھل سکے۔ اَسی ایہہ وی ویکھاں گے کہ ایہہ خوبیاں ساڈے کم کیویں آ سکدیاں نیں؟ پر آؤ، سب توں پہلاں یہوواہ تے یسوع دی مثال تے غور کرئیے جیہڑے لچک‌دار ہون دی سب توں ودھیا مثال نیں۔‏

3.‏ سانوں کیویں پتہ اے کہ یہوواہ لچک‌دار اے؟‏

³ بائبل چ یہوواہ نُوں چٹان کہیا گیا اے کیونکہ اوہ ثابت‌قدم تے ڈٹیا رہندا اے۔ (‏اِستثنا 32:‏4‏)‏ پر اوہ لچک‌دار وی اے۔ جیویں جیویں دُنیا دے حالات بدل رہے نیں یہوواہ اپنے آپ نُوں ایہناں حالاتاں مطابق ڈھال رہیا اے تاکہ اوہ اپنا مقصد پورا کر سکے۔ یہوواہ نے سانوں اپنی صورت تے بنایا اے۔ ایس لئی اَسی وی اپنے آپ نُوں بدلدے حالاتاں مطابق ڈھال سکنے آں۔ اوہنے بائبل چ واضح اصول دِتے نیں جنہاں دی مدد نال اَسی مشکل حالاتاں چ وی چنگے فیصلے کر سکنے آں۔ یہوواہ آپ تے بائبل چ  دِتے گئے اصول ایس گل دا ثبوت نیں کہ یہوواہ اِک چٹان ہون دے نال نال لچک‌دار وی اے۔‏

4.‏ اِک مثال دے کے دَسو کہ یہوواہ لچک‌دار اے۔ (‏احبار 5:‏7،‏ 11‏)‏

⁴ یہوواہ دِیاں راہواں راست نیں تے اوہ لچک‌دار اے۔ اوہ انساناں توں حدوں ودھ توقع نئیں کردا۔ ذرا غور کہ یہوواہ نے بنی‌اِسرائیل نال پیش آندے ویلے لچک‌داری کیویں ظاہر کیتی۔ اوہنے اوہناں توں ایس گل دی توقع نئیں کیتی کہ امیر تے غریب اِکو جہیاں قربانیاں چڑھان۔ کدی کدار تے اوہنے ہر بندے نُوں اپنے حالاتاں مطابق قربانی چڑھان دی اجازت دِتی۔‏‏—‏احبار 5:‏7،‏ 11 نُوں پڑھو۔‏

5.‏ اِک مثال دے کے دَسو کہ یہوواہ خاکسار تے ہمدرد اے۔‏

⁵ یہوواہ اپنی خاکساری تے ہمدردی دی وجہ توں لچک‌دار اے۔ مثال لئی، یہوواہ نے اوہدوں خاکساری ظاہر کیتی جدوں اوہ سدوم دے بھیڑے لوکاں نُوں تباہ کرن والا سی۔ یہوواہ نے اپنے فرشتیاں دے ذریعے اپنے بندے لُوط نُوں کہیا کہ اوہ بھج کے اِک پہاڑی علاقے چ چلا جائے۔ پر لُوط اوتھے جان توں ڈر رہیا سی۔ ایس لئی اوہنے یہوواہ توں درخاست کیتی کہ اوہ اوہنوں تے اوہدے گھرانے نُوں اِک چھوٹے شہر ضغرُ چ پناہ لین دَوے جد کہ یہوواہ نے اوس شہر نُوں وی تباہ کرنا سی۔ یہوواہ چاہندا تے لُوط نُوں کہہ سکدا سی کہ جو اوہنوں کہیا گیا اے، اوہ اوہی کرے۔ پر یہوواہ نے اِنج نئیں کیتا۔ بھانویں کہ ایہدی وجہ توں یہوواہ نُوں شہر ضغرُ نُوں تباہ کرن توں اپنا ہتھ روکنا پیا۔ (‏پیدایش 19:‏18-‏22‏)‏ ایہدے کئی صدیاں بعد یہوواہ نے شہر نینوہ دے لوکاں لئی ہمدردی ظاہر کیتی۔ اوہنے اپنے نبی یُوناہ نُوں اوہناں کول گھلیا تاکہ اوہ اوس شہر تے اوہدے بھیڑے لوکاں دی تباہی دا اعلان کرے۔ پر جدوں لوکاں نے دِلوں توبہ کیتی تے یہوواہ نے اوہناں لئی ہمدردی وکھائی تے اوس شہر نُوں بخش دِتا۔—‏یُوناہ 3:‏1،‏ 10؛‏ 4:‏10، 11‏۔‏

6.‏ مثالاں دے کے دَسو کہ یسوع نے یہوواہ وانگوں لچک‌داری کیویں ظاہر کیتی۔‏

⁶ یسوع نے یہوواہ وانگوں لچک‌داری ظاہر کیتی۔ زمین تے یسوع ”‏اِسرائیل دے گھرانے دِیاں گواچیاں ہوئیاں بھیڈاں“‏ چ مُنادی کرن آیا سی۔ پر اپنی ایس ذمے‌دار ی نُوں پورا کردے ہوئیاں اوہنے لچک‌داری ظاہر کیتی۔ مثال لئی، اِک وار یسوع کول اِک ایہو جہی عورت آئی جیہڑی غیرقوم توں سی۔ اوہنے یسوع کولوں درخاست کیتی کہ اوہ اوہدی دھی نُوں ٹھیک کر دَوے جنہوں اِک باغی فرشتہ چِمبڑیا ہویا سی۔ یسوع نے ہمدردی دی وجہ توں اوس عورت دی دھی نُوں ٹھیک کر دِتا۔ (‏متی 15:‏21-‏28‏)‏ ذرا اِک ہور مثال تے غور کرو۔ جدوں یسوع نے زمین تے یہوواہ دی خدمت کرنی شروع کیتی تے اوہنے کہیا:‏ ”‏جیہڑا میرا شاگرد ہون توں اِنکار کردا اے، مَیں وی اوہنوں قبول کرن توں اِنکار کراں گا۔“‏ (‏متی 10:‏33‏)‏ پر جدوں پطرس نے تِن وار یسوع دا اِنکار کیتا تے کیہہ یسوع نے اوہدے توں موُنہہ موڑ لیا؟ جی نئیں۔ یسوع جان دا سی کہ پطرس اپنی غلطی تے بوہت شرمندہ اے تے اوہ اِک وفادار انسان اے۔ جدوں یسوع زندہ ہویا تے اوہ پطرس نُوں ملیا تے ہوسکدا اے کہ اوہنے پطرس نُوں ایس گل دا یقین دَوایا ہووے کہ اوہنے اوہنوں معاف کر دِتا اے تے اوہ ہُن وی اوہدے نال پیار کردا اے۔—‏لُوقا 24:‏33، 34‏۔‏

7.‏ فِلپّیوں 4:‏5 دے مطابق سانوں دُوجیاں دی نظر چ کیہو جیہا انسان ہونا چاہی دا اے؟‏

⁷ اَسی ویکھیا اے کہ یہوواہ خدا تے یسوع مسیح لچک‌دار نیں۔ پر ساڈے بارے کیہہ؟ یہوواہ چاہندا اے کہ اَسی وی لچک‌دار ہوئیے۔ ‏(‏فِلپّیوں 4:‏5 نُوں پڑھو۔)‏ ساڈے کماں توں دُوجیاں نُوں نظر آنا چاہی دا اے کہ اَسی  اِک لچک‌دار انسان آں۔ اَسی اپنے آپ کولوں پچھ سکنے آں:‏ ”‏کیہہ دُوجے ویکھ سکدے نیں کہ مَیں اِک لچک‌دار انسان آ ں تے میرے چ بوہت برداشت اے؟ یاں کیہہ مَیں سخت آں تے اپنی گل تے اَڑیا رہنا واں؟ کیہہ مَیں دُوجیاں نُوں مجبور کرنا واں کہ اوہ کوئی کم اُنج ای کرن جیویں مَیں چاہنا واں؟ یاں کیہہ مَیں اوہناں دی گل سُننا واں تے جتھوں تک ممکن ہوئے مننا وی آں؟“‏ جِنّاں زیادہ اَسی لچک‌دار ہوواں گے اوہناں ای زیادہ اَسی یہوواہ تے یسوع دی مثال تے عمل کر رہے ہوواں گے۔ آؤ، ایہو جہے دو معاملیاں تے غور کرنے آں جنہاں چ لچک‌دار ہونا بوہت ضروری اے۔ (‏1)‏ جدوں ساڈے حالات بدل جاندے نیں تے (‏2)‏ جدوں دُوجیاں دی رائے تے فیصلے ساڈے توں فرق ہوندے نیں۔‏

8.‏ اَسی اپنے آپ نُوں بدلدے حالاتاں مطابق ڈھالن لئی کیہہ کر سکنے آں؟ (‏فٹ‌نوٹ نُوں وی ویکھو۔)‏

⁸ سانوں اوہدوں وی لچک‌دار ہونا چاہی دا اے جدوں ساڈے حالات بدل جاندے نیں۔ حالات بدلن دی وجہ توں شاید سانوں ایہو جہیاں مشکلاں دا سامنا کرنا پووے جنہاں بارے اَسی سوچیا وی نہ ہووے۔ ہو سکدا اے کہ سانوں صحت دا کوئی وڈا مسئلہ ہو جائے۔ یاں شاید اچانک سیاسی حالات بدل جان یاں مہنگائی ودھ جائے جدی وجہ توں ساڈی زندگی مشکل ہو جائے۔ (‏واعظ 9:‏11؛‏ 1-‏کُرنتھیوں 7:‏31‏)‏ سانوں اوس ویلے وی مشکل دا سامنا کرنا پے سکدا اے جدوں کلیسیا چ ساڈی ذمے‌داری بدل جاندی اے۔ بھانویں ساڈے تے کوئی وی مشکل آئے اَسی ایہناں چار گلاں تے عمل کر کے اپنے آپ نُوں نویں حالاتاں مطابق ڈھال سکنے آں:‏ (‏1)‏ حقیقت نُوں قبول کرو، (‏2)‏ مستقبل بارے سوچو، (‏3)‏ اپنی زندگی چ ہون والیاں چنگیاں گلاں تے دھیان دَوو تے (‏4)‏ دُوجیاں دے کم آؤ۔‏ b ہُن اَسی اپنے کجھ ہم‌ایماناں دِیاں مثالاں تے غور کرنے آں جنہاں نُوں ایہناں چار گلاں تے عمل کرن نال فائدہ ہویا۔‏

9.‏ مشنری دے طور تے اِک میاں بیوی نے اوہناں مشکلاں دا سامنا کیویں کیتا جنہاں بارے اوہناں نے سوچیا وی نئیں سی؟‏

⁹ حقیقت نُوں قبول کرو۔‏ بھرا عمانوئیل تے اوہدی بیوی فرانسیسکا نُوں کسے دُوجے ملک چ مشنری دے طور تے خدمت کرن لئی گھلیا گیا۔ جیویں ای اوہناں نے اوس ملک دی زبان سکھنی شروع کیتی تے نوِیں کلیسیا چ اوہناں دا دل لگ گیا تے اوہدوں ای کورونا دی وبا شروع ہو گئی جدی وجہ توں اوہ بھین بھراواں نُوں آمنے سامنے نئیں مِل سکدے سن۔ فیر اچانک بھین فرانسیسکا دی امی فوت ہو گئی۔ بھین اپنے گھر والیاں نُوں ملنا چاہندی سی۔ پر وبا دی وجہ توں اوہ سفر نئیں کر سکدی سی۔ ایہناں مشکل حالاتاں چ کیہڑی چیز نے بھین دی مدد کیتی؟ پہلی گل، بھرا عمانوئیل تے اوہدی بیوی فرانسیسکا نے ہر روز دُعا چ یہوواہ کولوں حکمت منگی تاکہ اوہ حدوں ودھ پریشان نہ ہون۔ یہوواہ نے بالکل صحی ویلے تے اپنی تنظیم دے ذریعے اوہناں دِیاں دُعاواں دا جواب دِتا۔ مثال لئی، اوہناں نُوں اوس گل توں بڑا حوصلہ ملیا جیہڑی اِک بھرا نے اِک ویڈیو چ کہی سی۔ بھرا نے کہیا:‏ ”‏جِنّی چھیتی ہو سکے سانوں ایہہ سمجھ لینا چاہی دا اے کہ ساڈے حالات ہُن بدل گئے نیں تے نویں حالات بھانویں جیہو جہے وی ہون اَسی دُوجیاں نُوں یہوواہ خدا بارے دَس کے خوش رہ سکنے آں۔“‏‏  c دُوجی گل ایہہ‌کہ اوہناں نے فون دے ذریعے گواہی دین دی اپنی مہارت نُوں نکھارن دا فیصلہ کیتا۔ نالے اوہناں نے اِک بائبل کورس وی شروع کرایا۔ تیجی گل ایہہ کہ اوہناں نے خوشی نال بھین بھراواں وَلّوں مِلن والی مدد تے حوصلے نُوں قبول کیتا۔ اِک بھین اوہناں نُوں ہر روز میسج دے ذریعے بائبل دی اِک ایت لکھ کے گھلدی سی تے اوہ اِک سال تک اِنج ای کردی رہی۔ جدوں اَسی وی نویں حالاتاں نُوں قبول کرنے آں تے سانوں اوہ کم کر کے خوشی مِلدی اے جیہڑے ساڈے وَس چ نیں۔‏

10.‏ اِک بھین نے اپنی زندگی چ ہون والی اِک وڈی تبدیلی مطابق اپنے آپ نُوں کیویں ڈھالیا؟‏

¹⁰ مستقبل بارے سوچو تے اپنی زندگی چ ہون والیاں چنگیاں گلاں  تے دھیان دَوو۔‏ ملک رومانیہ توں تعلق رکھن والی اِک بھین کرسٹینا جاپان چ رہندی اے تے اوہ انگریزی زبان والی کلیسیا چ جاندی سی۔ پر جدوں اوس کلیسیا نُوں ختم کر دِتا گیا تے اوہ بڑی بے‌حوصلہ ہو گئی۔ پر اوہ ایس بارے سوچ سوچ کے پریشان نئیں ہوندی رہی سگوں اوہنے جاپانی زبان والی کلیسیا چ جان دا فیصلہ کیتا۔ تے اوہ پورے دل نال ایس زبان چ مُنادی کرن لگ پئی۔ بھین نے اوس عورت کولوں جدے نال اوہ پہلاں کم کردی سی پچھیا کہ کیہہ اوہ بائبل تے کتاب ‏”‏خوشیاں بھری زندگی پاؤ“‏ دے ذریعے اوہنوں ہور چنگی طرحاں جاپانی بولنا سکھا سکدی اے۔ اوہ عورت اِنج کرن لئی من گئی۔ ایس دوران نہ صرف بھین کرسٹینا جاپانی زبان چنگی طرحاں بولنا سکھ گئی سگوں اوہ عورت وی بائبل دے پیغام چ دلچسپی لین لگ پئی۔ جدوں اَسی مستقبل بارے سوچنے آں تے اپنا دھیان چنگیاں گلاں تے رکھنے آں تے اچانک ہون والیاں تبدیلیاں وی ایہو جہیاں برکتاں چ بدل جاندیاں نیں جنہاں بارے اَسی سوچیا وی نئیں ہوندا۔‏

11.‏ پیسے دھیلے دی تنگی دا سامنا کرن چ کیس چیز نے اِک میاں بیوی دی مدد کیتی؟‏

¹¹ دُوجیاں دے کم آؤ۔‏ اِک میاں بیوی اِک ایہو جہے ملک چ رہندے سن جِتھے ساڈے کم تے پابندی لگی ہوئی سی۔ جدوں ملک دے مالی حالات خراب ہو گئے تے اوہناں نُوں وی پیسیاں دی تنگی دا سامنا کرنا پیا۔ اوہناں نے اپنے آپ نُوں بدلدے حالاتاں مطابق کیویں ڈھالیا؟ سب توں پہلاں تے اوہناں نے اپنے خرچے گھٹ کرن دی کوشش کیتی۔ فیر اوہناں نے فیصلہ کیتا کہ اوہ اپنیاں مشکلاں تے دھیان دین دی بجائے مُنادی کردے رہن گے تے اِنج دوجیاں دی مدد کرن گے۔ (‏اعمال 20:‏35‏)‏ بھرا نے دَسیا:‏ ”‏اَسی مُنادی کرن چ مصروف رہنے ساں۔ ایس لئی ساڈے کول اپنیاں پریشانیاں بارے سوچن دا زیادہ وقت نئیں ہوندا سی۔ ساڈا دھیان اوس کم تے ہوندا سی جیہڑا یہوواہ نے سانوں کرن لئی کہیا اے۔“‏جدوں ساڈے حالات بدل جاندے نیں اوہدوں وی سانوں یاد رکھنا چاہی دا اے کہ دُوجیاں دی مدد کرنا بوہت ضروری اے۔ تے ایہدا سب توں ودھیا طریقہ ایہہ وے کہ اَسی مُنادی کرئیے۔‏

12.‏ پولُس رسول وانگوں اَسی مُنادی کرن دے کم چ لچک‌دار کیویں بن سکنے آں؟‏

¹² مُنادی کرن لئی سانوں لچک‌دار بنن دی ضرورت اے۔ جنہاں لوکاں نُوں اَسی مُنادی کرنے آں اوہناں دی خدا بارے فرق فرق رائے ہوندی اے تے اوہناں دا تعلق وی فرق فرق تھانواں توں ہوندا اے۔ پولس رسول لچک‌دار بنن دی اِک ودھیا مثال اے تے اَسی اوہدے توں بوہت کجھ سکھ سکنے آں۔ یسوع نے اوہنوں غیریہودیاں دا رسول مقرر کیتا سی۔ (‏رومیوں 11:‏13‏)‏ تے ایس وجہ توں پولُس نے یہودیاں، یونانیاں، پڑھے لکھے لوکاں، عام لوکاں، حکومت دے افسراں تے بادشاہواں نُوں گواہی دِتی۔ اینے فرق فرق لوکاں دے دل تک پونچن لئی پولُس نے اپنے آپ نُوں اوہناں مطابق ڈھالیا۔ (‏1-‏کُرنتھیوں 9:‏23-‏19)‏ اوہنے ایس گل تے خاص توجہ دِتی کہ لوکاں دا تعلق کیہڑی جگہ نال اے تے اوہ کیہہ من دے نیں۔ اِنج اوہ لچک‌دار بن سکیا تے ہر بندے نال ایس طریقے نال گل کیتی کہ اوہدے دل تے اثر ہوئے۔ جدوں اَسی وی لچک‌دار بننے آں تے اپنے پیغام نُوں لوکاں دی ضرورت مطابق ڈھالنے آں تے اَسی گواہی دین دِیاں اپنیاں مہارتاں نُوں نکھار رہے ہُنے آں۔‏

13.‏ 1-‏کُرنتھیوں 8:‏9 دے مطابق جے اَسی دُوجیاں دی رائے دا احترام کرنے آں تے سانوں کیہہ کرن توں بچنا چاہی دا اے؟‏

¹³ جدوں اَسی لچک‌دار ہُنے آں تے اَسی دُوجیاں دی رائے دا احترام کرنے آں۔ مثال لئی،ساڈیاں کجھ بھیناں نُوں میک‌اَپ کرنا پسند اے جد کہ کجھ نُوں نئیں پسند۔ کجھ مسیحیاں نُوں حد چ رہ کے شراب پینا پسند اے جد کہ کجھ نے فیصلہ کیتا اے کہ اوہ شراب بالکل وی نئیں پین گے۔ ایہدے علاوہ اَسی سارے ای چاہنے آں کہ ساڈی صحت چنگی رہوے۔ پر اَسی اپنا خیال رکھن لئی فرق فرق طریقے اپنانے آں۔ جے سانوں لگدا اے کہ جو اَسی کر رہے آں اوہی صحی اے تے اَسی اپنی رائے دُوجیاں تے تھوپن دی کوشش کرنے آں تے ایہدے توں نہ صرف دُوجے گمراہ ہون گے سگوں کلیسیا چ پُھٹ وی پے جائے گی۔ یقیناً ساڈے وچوں کوئی وی ایہہ نئیں چاہندا۔ ‏(‏1-‏کُرنتھیوں 8:‏9 نُوں پڑھو،‏ 10:‏23، 24)‏ آؤ،  دو مثالاں تے غور کرئیے جنہاں توں پتہ چلدا اے کہ اَسی صحی سوچ کیویں رکھ سکنے آں تے کلیسیا چ امن کیویں قائم رکھ سکنے آں۔‏

14.‏ کپڑیاں تے والاں دے سٹائل بارے فیصلہ لیندے ویلے سانوں بائبل دے کیہڑے اصولاں نُوں ذہن چ رکھنا چاہی دا اے؟‏

¹⁴ کپڑے تے والاں دا سٹائل۔‏ یہوواہ نے سانوں ایہہ نئیں دَسیا کہ سانوں کیہہ پانا چاہی دا اے تے کیہہ نئیں۔ پر اوہنے بائبل چ کجھ اصول ضرور دِتے نیں۔ کپڑیاں بارے فیصلہ لیندے ویلے سانوں سمجھداری نال کم لینا چاہی دا اے۔ سانوں ایہو جہے کپڑے پانے چاہی دے نیں جیہڑے خدا دے بندیاں لئی مناسب تے حیادار ہون۔ (‏1-‏تیمُتھیُس 2:‏9، 10؛‏ 1-‏پطرس 3:‏3‏)‏ ایس لئی اَسی ایہو جہے کپڑے نئیں پاندے جنہاں دی وجہ توں لوکاں دی توجہ ساڈے تے آ جائے۔ بائبل دے اصول بزرگاں دی وی مدد کردے نیں تاکہ اوہ کپڑیاں تے والاں دے سٹائل بارے اپنے اصول نہ بنان۔ مثال لئی، اِک کلیسیا دے بزرگ اوہناں نوجوان بھراواں دی مدد کرنا چاہندے سن جیہڑے اپنے والاں دا سٹائل دُنیا دے لوکاں ورگے بنان لگ پئے سن۔اوہ بزرگ کوئی قانون بنائے بغیر اوہناں دی مدد کیویں کر سکدے سن؟ اوس کلیسیا دے حلقے دے نگہبان نے بزرگاں نُوں مشورہ دِتا کہ اوہ بھراواں نُوں کہن:‏ ”‏جے تُسی سٹیج تے اپنا کوئی حصہ پیش کر رہے او تے بھین بھراواں دی توجہ تواڈی گل دی بجائے تواڈے تے جا رہی اے تے ایہدا مطلب اے کہ تواڈا حُلیہ صحی نئیں اے۔“‏ ایس سادہ جہی گل توں اوہ نوجوان سمجھ گئے کہ اوہناں نُوں کیہہ کرنا چاہی دا اے۔ اِنج بزرگ وی کوئی قانون بنان توں بچ گئے۔‏ d

15.‏ جدوں سانوں اپنی صحت بارے فیصلے کرنے ہوندے نیں تے بائبل دے کیہڑے حکم تے اصول ساڈی مدد کر سکدے نیں؟ (‏رومیوں 14:‏5‏)‏

¹⁵ اپنی صحت دا خیال رکھو۔‏ مسیحیاں نُوں ایہہ فیصلہ آپ کرنا چاہی دا اے کہ اوہ اپنی صحت دا خیال کیویں رکھن گے۔ (‏گلتیوں 6:‏5‏)‏ جدوں اوہ ایہہ فیصلہ کر رہے ہوندے نیں کہ اوہ کیہڑا علاج کران گے تے اوہناں نُوں بائبل دے ایس حکم نُوں ذہن چ رکھنا چاہی دا اے کہ مسیحیاں نُوں خون لین تے جادو ٹونے دے ذریعے علاج کران توں باز رہنا چاہی دا  اے۔ (‏اعمال 15:‏20؛‏ گلتیوں 5:‏19، 20‏)‏ کجھ معاملے ایہو جہے نیں جنہاں بارے اوہ آپ فیصلہ لے سکدے نیں۔ کجھ مسیحی علاج بارے صرف ڈاکٹراں کولوں مدد لیندے نیں جد کہ کجھ دُوجے طریقیاں نال علاج کراندے نیں۔ بھانویں سانوں کِنّاں ای یقین کیوں نہ ہووے کہ کوئی علاج فائدےمند ہے یاں نئیں، فیر وی سانوں علاج بارے اپنے بھین بھراواں دے فیصلے لئی احترام وکھانا چاہی دا اے۔ ایس بارے سانوں ایہناں گلاں نُوں ذہن چ رکھنا چاہی دا اے:‏ (‏1)‏ صرف خدا دی بادشاہی ساریاں بیماریاں نُوں ہمیشاں لئی ختم کر سکدی اے۔ (‏یسعیاہ 33:‏24‏)‏ (‏2)‏ اِک مسیحی نُوں پورا یقین ہونا چاہی دا اے کہ اوہدے لئی علاج دا کیہڑا طریقہ بہتر اے۔ ‏(‏رومیوں 14:‏5 نُوں پڑھو۔)‏ (‏3)‏ سانوں اپنے بھین بھراواں دی نکتہ‌چینی نئیں کرنی چاہی دی تے نہ ای کوئی ایہو جیہا کم کرنا چاہی دا اے جیہڑا اوہناں نُوں بُرا لگے۔ (‏رومیوں 14:‏13‏)‏ (‏4)‏ سانوں اپنے بھین بھراواں لئی محبت وکھانی چاہی دی اے تے ایس گل دا خیال رکھنا چاہی دا اے کہ ساڈی مرضی نالوں زیادہ ضروری کلیسیا دا اِک مُٹھ رہنا اے۔ (‏رومیوں 14:‏15،‏ 19، 20‏)‏ جدوں اَسی ایہناں گلاں نُوں اپنے ذہن چ رکھاں گے تے بھین بھراواں نال ساڈی دوستی گُوڑھی ہوئے گی تے کلیسیا چ امن وی قائم رہوے گا۔‏

16.‏ کلیسیا دا اِک بزرگ دُوجے بزرگاں نال پیش آندے ویلے کیویں ظاہر کر سکدا اے کہ اوہ لچک‌دار اے؟ (‏تصویراں نُوں وی ویکھو۔)‏

¹⁶ بزرگاں نُوں لچک‌دار ہون بارے اِک چنگی مثال قائم کرنی چاہی دی اے۔ (‏1-‏تیمُتھیُس 3:‏2، 3‏)‏ مثال لئی، اِک بزرگ نُوں ایہہ نئیں سوچنا چاہی دا کہ ہر وار اوہدی گل صرف ایس لئی منی جائے کیونکہ اوہ عمر چ وڈا اے۔ اِک بزرگ ایس گل نُوں سمجھے گا کہ خدا دی پاک روح کسے وی بزرگ دے ذہن چ ایہو جہی گل پا سکدی اے جدے ذریعے اوہ اِک چنگا فیصلہ لے سکدے نیں۔ جے زیادہ‌تر بزرگ کسے اِک گل تے من جان تے بائبل دا کوئی اصول وی نہ ٹُٹ رہیا ہووے تے اِک بزرگ لچک‌داری ظاہر کرے گا تے اوس فیصلے دی حمایت کرے گا۔ اوس ویلے وی جے اوہدی رائے دُوجے بزرگاں نالوں فرق ہووے۔‏

17.‏ لچک‌دار بنن نال مسیحیاں نُوں کیہہ فائدہ ہوندا اے؟‏

¹⁷ لچک‌دار بنن نال مسیحیاں نُوں بوہت فائدہ ہوندا اے۔ ساڈی بھین بھراواں نال دوستی گُوڑھی ہوندی اے تے کلیسیا چ امن وی قائم رہندا اے۔ یہوواہ دے سارے بندے اِک دُوجے توں فرق نیں۔ پر خوشی دی گل اے کہ ایہدے باوجود اَسی اِک مُٹھ ہو کے یہوواہ دی عبادت کرنے آں۔ سب توں ودھ کے خوشی دی گل ایہہ وے کہ اَسی اپنے خدا یہوواہ دی مثال تے عمل کرنے آں جیہڑا کہ بوہت لچک‌دار اے۔‏